Valũa wa Mbee kwa Akolintho

13 O na nganeena na ithyomo sya andũ na sya alaĩka na ũyĩthĩa ndi na wendo, nĩthĩwa nĩilye kyũma kĩkumya wasya kana ĩsaya yĩũkaya. 2 Na ethĩwa nĩ na mũthĩnzĩo wa kwathana na nĩnĩeleawa syĩmbithĩ syonthe ntheu na nĩ na ũmanyi w’onthe, na ethĩwa nĩ na mũĩkĩĩo ũtonya kũthamya iĩma na ũyĩthĩa ndi na wendo, nyie nĩ vathei. 3 O na ethĩwa nĩngũnengane syĩndũ syakwa syonthe iĩthye ala angĩ, o na ethĩwa nĩngũnengane mwĩĩ wakwa nĩ kana nĩthĩwe ndonya kwĩkathĩĩa, ĩndĩ ndi na wendo, ndyĩsa kũtetheka o na vanini.

4 Wendo nĩweteelaa * na nĩwĩkaa ũseo. Wendo ndwĩ kĩwĩu. Wendo ndwĩkathĩĩaa, ndwĩ mĩtũlyo, 5 ndwĩkaa ũndũ ũtaĩle, * ndũmanthaa kwĩyĩuna, ndũthataa mĩtũkĩ. Ndũtalaa mavĩtyo. 6 Ndũtanĩaa ũndũ ũte ũlũngalu, ĩndĩ ũtanaa nthĩnĩ wa ũla w’o. 7 Nũvw’ĩkaa maũndũ onthe, nũĩkĩĩaa maũndũ onthe, nĩwĩkwatasya maũndũ onthe, na nĩwũmĩĩasya maũndũ onthe.

8 Wendo ndũsindawa. Ĩndĩ ethĩwa ve mĩthĩnzĩo ya wathani, ĩkavetwa, ethĩwa ve kũneena na ithyomo, kũkathela, ethĩwa ve ũmanyi, ũkavetwa. 9 Nũndũ ũmanyi witũ ti mwĩanĩu na wathani witũ ti mwĩanĩu, 10 ĩndĩ yĩla kĩla kĩanĩu kĩkoka, kĩla kĩte kĩanĩu kĩkavetwa. 11 Yĩla naĩ kana, naneenaa ta kana, neesilasya ta kana, nasũanĩaa ta kana; ĩndĩ yu nũndũ nĩndw’ĩkĩte mũndũ mũima, nĩndiĩte mwĩkalĩle wa kana. 12 Nũndũ yu twene na menyenyi ta tũũtũmĩa kĩoo kya kyũma, ĩndĩ ĩvinda yĩu ũkeethĩa nĩ ũthyũ kwa ũthyũ. Ĩvindanĩ yĩĩ ndyĩsĩ maũndũ onthe, ĩndĩ ĩvinda yĩu ngamanya maũndũ nesa o tondũ nyie nĩsĩkĩe nesa. 13 Yu vatiele syĩndũ ii itatũ: mũĩkĩĩo, wĩkwatyo, na wendo; ĩndĩ kĩla kĩnene katĩ wasyo nĩ wendo.