Valũa wa Yuta
1 Nyie Yuta, ngombo ya Yesũ Klĩsto, ĩndĩ mwana-a-inyia wa Yakovo, kwa ala meetiwe na mendetwe nĩ Ngai, ũla nĩwe Asa, na masũvĩĩtwe kwondũ wa Yesũ Klĩsto:
2 Tei na mũuo na wendo nĩsyongeleke kwenyu.
3 Endwa, o na kau naĩ na mea ma kũmũandĩkĩa ĩũlũ wa ũtangĩĩo ũla twĩ naw’o ithyonthe, nĩnonie ne ũndũ wa vata nĩmũandĩkĩe nĩ kana nĩmũtae mũkitĩe mũĩkĩĩo ũla wanengiwe atheu ĩvinda o yĩmwe na weany’a tene na tene. 4 Nĩmũandĩkĩa nũndũ andũ amwe nĩmelikĩtye katĩ wenyu, ala kuma tene matw’ĩwe ũsilĩlo nĩ Maandĩko; asu nĩ andũ matamũkĩaa Ngai, ala matũmĩaa ũseo mwingĩ wa Ngai waitũ kwĩthĩwa kĩtumi kya kwĩka maũndũ mavuku na ngũlũ, * na meko moo monanasya nĩmamũkaĩaa Yesũ Klĩsto, ũla nĩwe e weka vwana na Mwĩaĩi waitũ.
5 O na kau nĩmwĩsĩ nesa maũndũ aa onthe, nĩenda kũmũlilikany’a kana o na kũtw’ĩka Yeova nĩwoovoisye andũ kuma nthĩ ya Misili, ĩtina nĩwamanangie ala mataaĩthĩwa na mũĩkĩĩo. 6 Namo alaĩka ala mataaendeea kwĩkala vandũ voo va mbee, ĩndĩ matiie wĩkalo woo ũla wamaĩlĩte, nĩwamaiie me ove tene na tene kĩvindunĩ kingĩ meteele ũsilĩlo wa ũla mũthenya mũnene. 7 O ta ũu, Sotomo na Ngomola na ndũa ila syaithyũlũlũkĩte nĩsyeelikĩtye vyũ ũlaalainĩ * na kwĩanĩsya mawendi mataĩle ma mwĩĩ, nasyo siĩtwe mbee waitũ syĩthĩwe ũkany’o nũndũ nĩsyasilĩilwe na syaanangwa tene na tene.
8 O na eka ũu, andũ asu nĩmasũanĩaa maũndũ mathũku, nĩmavukasya mwĩĩ, nĩmavũthĩĩasya ũkũmũ, na nĩmaneeneaa atheu naĩ. 9 Ĩndĩ ĩla Mikaeli, ũla mũlaĩka mũnene, waneenanasya na Ndevili ĩũlũ wa mwĩĩ wa Mose, we ndaatata kũmũsilĩla na ndeto nthũku, ĩndĩ amwĩie: “Yeova naũkany’e.” 10 Ĩndĩ andũ asu maneenaa naĩ ĩũlũ wa maũndũ mate kũmaelewa o na vanini. Na maũndũ onthe ala mamanyaa mateũtũmĩa kĩlĩko o ta nyamũ, nĩmo maendeeaa kwĩyananga namo.
11 Kyeva nĩ kwoo, nũndũ nĩmaatĩĩie nzĩa ya Kaini na masembea mwĩkalĩle mũthũku wa Mbalaamu nĩ kenda makwate mũthĩnzĩo, na nĩmanangĩtwe nĩ ndeto sya ũlei sya Kola! 12 Andũ asu mailye ta mavia manene mevithĩte kĩw’ũnĩ ĩla mwĩ mbokanĩ sya ana-a-asa, * ta aĩthi meyĩĩthasya mo ene mate na wia; ta matu mate na mbua ala matwaawa kũũ na kũũ nĩ kĩseve; ta mĩtĩ ĩte matunda ĩvinda ya kwĩtĩkya matũ, yũmĩte vyũ * na kũkũwa vyũ; 13 itulumo itasiĩĩka sya ũkanga ila syĩkasya ĩvũyũ ya nthoni syasyo; mailye ta ndata syangangaa kũũ na kũũ siĩwe kĩvindu kingĩ kya tene na tene.
14 Enoko, ũla waĩ wa mũonza kuma kwa Atamu, nĩwathanie ĩũlũ woo, na asya: “Sisya! Yeova nĩwookie vamwe na atheu make ngili mbingĩ mũno 15 kũmasilĩla onthe, na kũmaumĩsya ũtw’ĩo onthe ala matamũkĩaa Ngai ĩũlũ wa meko onthe mathũku ala meekie mateũmũkĩa Ngai, na ĩũlũ wa maũndũ maũtelemya ala andũ matamũkĩaa Ngai maneenie ĩũlũ wake.”
16 Andũ asu nĩmanyungunyĩasya, mayĩanĩawa nĩ syĩndũ ila me nasyo, maatĩĩaa mawendi moo ene, na nĩmekathĩĩaa ũtheinĩ ĩla meũkenga angĩ nĩ kenda meyĩune.
17 Ĩndĩ inyw’ĩ endwa, lilikanai maũndũ ala mawetiwe mbeenĩ * nĩ atũmwa ma Mwĩaĩi waitũ Yesũ Klĩsto; 18 mamũtavasya atĩĩ: “Ĩvinda ya mũminũkĩlyo kũkeethĩwa andũ me kĩvũthya, maiatĩĩa mawendi moo mathũku ma kũlea kũmũkĩa Ngai.” 19 Andũ asu nĩmo maetae mũtilĩkangano, andũ mailye ta nyamũ, * na mate ma kĩ-veva. * 20 Ĩndĩ inyw’ĩ endwa, ĩyakei ene nthĩnĩ wa mũĩkĩĩo wenyu ũla mũtheu mũno, na voyai mũtongoew’e nĩ veva mũtheu, 21 nĩ kana mwĩyĩkalye ene wendonĩ wa Ngai, mweteele tei wa Mwĩaĩi waitũ Yesũ Klĩsto na thayũ wa tene na tene. 22 O na ĩngĩ, endeeai kũmew’ĩa tei amwe ala me na nzika; 23 matangĩĩei kwa kũmavulya kuma mwakinĩ. Ĩndĩ endeeai kũmew’ĩa angĩ tei, mũyĩka ũu na wia, mwĩsũvĩĩte mũikavukw’e nĩ naĩ ĩla mekĩte. *
24 Na ĩndĩ kwa ũla ũtonya kũmũsũvĩa mũikalulutĩke, na ũtonya kũtuma mũũngama mũte avuku na mwĩ na ũtanu mũnene ũtheunĩ wake mũtisu, 25 kwa Ngai waitũ weka, ũla nĩwe Mũtangĩĩi waitũ, kwĩsĩla Yesũ Klĩsto Mwĩaĩi waitũ, kwĩthĩwe ndaĩa, ũnene, ũtonyi, na ũkũmũ kuma tene na tene, na yu, na nginya tene na tene. Ameni.