Kwa Alomi
10 Ana-a-asa, kwenda kwa ngoo yakwa na kwĩsũvana kwakwa kwa Ngai nĩ kwondũ wa kũtangĩĩwa kwoo. 2 Nũndũ nĩngũkũsĩĩa ĩũlũ woo kana me na kĩthito kwondũ wa Ngai, ĩndĩ ti kwosana na ũmanyi wa wʼo. 3 Na nũndũ wa kũlea kũmanya ũlũngalu wa Ngai, na vandũ va ũu mamantha kwĩyiĩa ũlũngalu woo ene, mo mayaaĩnyivĩsya ũlũngalu wa Ngai. 4 Nĩkwĩthĩwa Klĩsto nĩwe mũthya wa ĩla Mĩao, nĩ kana kĩla mũndũ wĩthĩawa na mũĩkĩĩo atonye kwĩthĩwa e mũlũngalu.
5 Nũndũ Mose aandĩkĩte ũũ ĩũlũ wa ũlũngalu ũla umanaa na Mĩao: “Mũndũ ũla wĩkaa maũndũ aa akekala thayũ nũndũ wamo.” 6 Ĩndĩ ũlũngalu ũla umanaa na mũĩkĩĩo waĩtye ũũ: “Ndũkasye ngoonĩ yaku, ‘Nũũ ũla ũkambata ĩtunĩ?’ na ũu nĩ kwasya, akamũtheesye Klĩsto, 7 kana, ‘Nũũ ũla ũkatheea ĩimanĩ yĩte kĩtulu?’ * na ũu nĩ kwasya, akamwambatye Klĩsto kuma kĩkwʼũnĩ.” 8 Ĩndĩ ĩandĩko yaĩtye ata? “Ndeto yĩ vakuvĩ naku, kanywʼanĩ waku mwene na ngoonĩ yaku mwene”; nayo nĩ “ndeto” ya mũĩkĩĩo ĩla tũũtavanyʼa. 9 Nũndũ ethĩwa nũũtavanyʼa ũtheinĩ na kanywʼa waku kana Yesũ nĩ Mwĩaĩi, na wĩ na mũĩkĩĩo ngoonĩ yaku kana Ngai nĩwamũthayũũkisye, ũkatangĩĩwa. 10 Nũndũ mũndũ nũĩkĩĩaa na ngoo kwondũ wa ũlũngalu, ĩndĩ kwĩsĩla kanywʼa nũtavanasya ũtheinĩ kwondũ wa ũtangĩĩo.
11 Nũndũ ĩandĩko yaĩtye: “Vaiĩ ũmwe ũla ũmũĩkĩĩaa ũkasonoka.” 12 Nĩkwĩthĩwa vaiĩ kĩvathũkanyʼo katĩ wa Mũyuti na Mũkiliki. Ve Mwĩaĩi o ũmwe ĩũlũ wa onthe, nake nĩ mũthwii * kwa onthe ala mamwĩkaĩlaa. 13 Nũndũ “kĩla mũndũ wĩkaĩlaa ĩsyĩtwa ya Yeova akatangĩĩwa.” 14 Ĩndĩ, makamwĩkaĩla ata ethĩwa maimũĩkĩĩĩte? Na makamũĩkĩĩa ata ũla matamwĩwʼĩte? Na makamwĩwʼa ata vate mũndũ ũkũtavanyʼa? 15 Na makatavanyʼa ata mate atũme? O tondũ kũandĩkĩtwe: “Nĩ maseo ta kĩ maaũ ma ala matavanasya ũvoo mũseo wa maũndũ maseo!”
16 O na ũu wĩ o vo, ti onthe maaĩthĩwa me ewi kwa ũla ũvoo mũseo. Nũndũ Isaia akũlĩtye atĩĩ: “Yeova, nũũ ũĩkĩĩĩte ũndũ ũla weewʼĩkie kuma kwitũ?” * 17 Kwoou mũĩkĩĩo ũatĩĩaa ũndũ ũla wĩwʼĩkĩte. Nawʼo ũndũ ũla wĩwʼĩkĩte nĩ kwĩsĩla ndeto ĩũlũ wa Klĩsto. 18 Ĩndĩ nĩkũlya, Mo nĩmaleile kwĩwʼa? Vate nzika, “wasya woo nĩwavikie nthĩ yonthe, na ũvoo woo wavikĩa nthĩ yonthe.” 19 Ĩndĩ nĩkũlya, Mo Aisilaeli nĩmaleile kũmanya? Ũndũ wa mbee Mose aĩtye: “Ngatuma mwĩthĩwa na kĩwĩu kwĩsĩla ĩla ĩte mbaĩ; ngatuma mũthata mũno kwĩsĩla mbaĩ ndumanu.” 20 Ĩndĩ Isaia nũneenete na ũkũmbaũ mwingĩ akasya: “Nĩnoonekie nĩ ala matamanthaa; nĩnamanyĩkie nĩ ala matakũlasya ĩũlũ wakwa.” 21 Ĩndĩ aĩtye ũũ ĩũlũ wa Isilaeli: “Mũthenya wʼonthe nĩnĩtambũũkĩtye moko makwa kwelekela andũ matewʼaa na omũ.”