Kwosana na Yoana
16 “Namũtavya maũndũ aa nĩ kana mũikalulutĩke. 2 Andũ makamũlũngya masinakokenĩ. Vate nzika, saa nĩwũkĩte yĩla onthe ala makamũaa mesũanĩaa kana methũkũma ũthũkũmi mũtheu kwa Ngai. 3 Ĩndĩ makeeka maũndũ asu nũndũ maimwĩsĩ Asa, o na maimbĩsĩ. 4 O na ũu wĩ o vo, namũtavya maũndũ aa nĩ kana saa wa kwĩkĩka kwamo wavika, mwĩlilikana kana nĩnamũtavisye mo.
“Ndyaamũtavya maũndũ aa mwambĩlĩlyonĩ nũndũ naĩ vamwe nenyu. 5 Ĩndĩ yu nĩngũthi kwa Ũla wandũmie; na vaiĩ ũmwe wenyu ũkũngũlya, ‘Wĩthi va?’ 6 Ĩndĩ nũndũ nĩnamũtavya maũndũ aa, kyeva nĩkyausũa ngoonĩ syenyu. 7 O na ũu wĩ o vo, nĩmũtavya ũla wʼo, kũthi kwakwa kũkamũtethya. Nũndũ ethĩwa ndiũthi, ũla mũtetheesya ndakoka kũla mũĩ; ĩndĩ nathi, ngamũtũma kũla mũĩ. 8 Yĩla wĩũka akamanyĩsya andũ onthe mamanye nesa naĩ nĩ kyaũ, ũlũngalu nĩ kyaũ, na ũsilĩlo nĩ kyaũ: 9 mbee, akamanyĩsya ĩũlũ wa naĩ, nũndũ maiũndĩkĩĩa; 10 na ĩndĩ ĩũlũ wa ũlũngalu, nĩkwĩthĩwa nĩngũthi kũla kwĩ Asa na mũikambona; 11 na mũthya ĩũlũ wa ũsilĩlo, nũndũ mũnene wa nthĩ ĩno nĩ mũsilĩle.
12 “Nĩ na maũndũ maingĩ ma kũmũtavya, ĩndĩ yu mũitonya kũmomĩĩsya. 13 Ĩndĩ yĩla ũsu * wĩũka, veva wa ũla wʼo, akamũtongoesya kũmanya ũwʼo wʼonthe, nũndũ ndakaneenaa kumana na ũtwi wake mwene, ĩndĩ akaneenaa kwosana na kĩla weewʼa, na akamũtavya maũndũ ala mokĩte. 14 Ũsu akandaĩa, nũndũ akamũtavya kĩla wĩwʼĩte kuma kwakwa. 15 Syĩndũ syonthe ila Asa wĩ nasyo nĩ syakwa. Na nĩkyo kĩtumi nasya akamũtavya kĩla wĩwʼĩte kuma kwakwa. 16 Ĩtina wa ĩvinda ĩnini mũikambona, na ĩngĩ, ĩtina wa ĩvinda ĩnini mũkambona.”
17 Yĩla amwe ma amanyĩwʼa make meewie ũu meeana: “We eonanyʼa ata yĩla ũkũtwĩa, ‘Ĩtina wa ĩvinda ĩnini mũikambona, na ĩngĩ, ĩtina wa ĩvinda ĩnini mũkambona,’ na, ‘nĩkwĩthĩwa nĩngũthi kũla kwĩ Asa’?” 18 Kwoou makũlya: “We eonanyʼa kyaũ yĩla ũkwasya, ‘ĩvinda ĩnini’? Ithyĩ tũiũmanya kĩla ũkũneenea.” 19 Yesũ nĩwamanyie kana nĩmekwenda kũmũkũlya ũndũ, na kwoou amea: “Inywʼĩ mwĩkũlanyʼa ũu nũndũ nĩnasya: ‘Ĩtina wa ĩvinda ĩnini mũikambona, na ĩngĩ, ĩtina wa ĩvinda ĩnini mũkambona’? 20 Nĩmũtavya wʼo ki kana, mũkaĩa na kũmeta, ĩndĩ nthĩ ĩkatana; mũkeethĩwa na kyeva, ĩndĩ kyeva kyenyu kĩkaalyũlwa kĩtwʼĩke ũtanu. 21 Yĩla mũndũ mũka ũkũsyaa ethĩawa na kyeva nũndũ saa wake nĩ mũviku, ĩndĩ amina kũsyaa kana, ndalilikanaa woo ĩngĩ, ĩndĩ nũtanaa nĩkwĩthĩwa mũndũ nĩwasyawa ĩũlũ wa nthĩ. 22 Kwoou o nenyu yu mwĩ na kyeva, ĩndĩ ngamwona ĩngĩ, na ngoo syenyu ikatana, na vaiĩ mũndũ ũkamũvena ũtanu wenyu. 23 Mũthenya ũsu mũikangũlya ĩkũlyo nongi. Nĩmũtavya wʼo ki kana, kĩndũ o na kĩva kĩla mwĩvoya Asa ĩsyĩtwanĩ yakwa, akamũnenga. 24 Kũvikĩĩa yu vaiĩ kĩndũ o na kĩmwe mwaamũvoya ĩsyĩtwanĩ yakwa. Voyai na mũkanengwa, nĩ kana ũtanu wenyu wusũe.
25 “Namũtavya maũndũ asu nĩtũmĩĩte ngelekanyʼo. Saa nĩwũkĩte yĩla ndakaneena ĩngĩ nenyu nĩtũmĩĩte ngelekanyʼo, ĩndĩ ngamũtavasya ĩũlũ wa Asa ũtheinĩ. 26 Mũthenya ũsu mũkavoya Asa ĩsyĩtwanĩ yakwa; yĩla ngwasya ũu, ndikwonanyʼa kana ngavoya kwondũ wenyu. 27 Nũndũ Asa mwene nũmwendete, nĩkwĩthĩwa inywʼĩ nĩmũmbendete na nĩmũĩkĩĩĩte kana natũmiwe nĩ Ngai. 28 Nookie kũũ nthĩ nĩtũmĩtwe nĩ Asa. Na yu nĩnguma kũũ nthĩ nĩsyoke kũla kwĩ Asa.”
29 Namo amanyĩwʼa mamwĩa: “Sisya! Yu wĩneena ũtheinĩ ũteũtũmĩa ngelekanyʼo. 30 Yu nĩtwamanya kana nĩwĩsĩ maũndũ onthe na vaiĩ vata wa mũndũ o na ũmwe kũũkũlya makũlyo. Na nũndũ wa ũu, nĩtwaĩkĩĩa kana waumie kwa Ngai.” 31 Nake Yesũ amakũlya: “Yu nĩmwaĩkĩĩa? 32 Sisyai! Saa nĩwũkĩte, na vate nzika, nĩ mũviku, yĩla inywʼonthe mwĩnyaĩĩkwʼa kĩla ũmwe athi nyũmba kwake na mũindia nĩ nyioka. Ĩndĩ nyie ndi nyioka nũndũ Asa e vamwe nakwa. 33 Namũtavya maũndũ asu nĩ kana kwĩsĩla kwakwa mwĩthĩwe na mũuo. Ĩũlũ wa nthĩ mũkeethĩwa na thĩna, ĩndĩ ĩthĩwai na ũkũmbaũ! Nyie nĩnĩkĩlĩtye nthĩ vinya.”