Valũa wa Mbee kwa Akolintho

2 Kwoou yĩla nookie kũla mũĩ, ana-a-asa, ndyaaũka kũmwendeesya na ndeto kana ũĩ ngĩmũtavya kĩmbithĩ kĩtheu kya Ngai. 2 Nũndũ nĩnatwie kũlea kũmanya kĩndũ o na kĩmwe katĩ wenyu eka Yesũ Klĩsto e mũaĩe mũtĩnĩ wa mathĩna. 3 Nookie kwenyu nĩ mwonzu na nĩ na wia na kũtetema kwingĩ; 4 na ũneeninĩ wakwa na ũtavany’anĩ wakwa ndyaatũmĩa ndeto sya ũĩ sya kũingĩĩsya andũ metĩkĩle, ĩndĩ ndeto syakwa syoonanisye veva na vinya, 5 nĩ kana mũĩkĩĩo wenyu wĩthĩwe nthĩnĩ wa vinya wa Ngai ĩndĩ ti ũĩ wa mũndũ.

6 Yu twĩneena ndeto sya ũĩ katĩ wa ala aimu kĩ-veva, ĩndĩ ti ũĩ wa nthĩ ĩno kana wa atongoi ma nthĩ ĩno, ala makatw’ĩka vathei. 7 Ĩndĩ tũneenaa ũĩ wa Ngai nthĩnĩ wa kĩmbithĩ kĩtheu, nakyo nĩ ũĩ mũvithe, kĩla Ngai wavangie kuma tene mbee wa mavinda aa nĩ kana tũkwate ndaĩa. 8 Ũĩ ũsu nĩw’o vate ũmwe wa atongoi ma nthĩ ĩno * waaũmanya, nũndũ ta kethĩwa nĩmaũmanyie mayĩthĩwa maamũaa * ũla Mwĩaĩi mũnene. 9 Ĩndĩ o tondũ kũandĩkĩtwe: “Maũndũ ala itho yĩtaaona na kũtũ kũtaaĩw’a, na mataalika ngoonĩ sya andũ, maũndũ asu nĩmo Ngai ũseũvĩsye ala mamwendete.” 10 Nũndũ nithyĩ Ngai ũvuanĩsye maũndũ asu kwĩsĩla veva wake, nũndũ veva nũvuanasya maũndũ onthe, o na maũndũ maliku ma Ngai.

11 Nũndũ nũũ katĩ wa andũ wĩsĩ maũndũ ma mũndũ ate o veva wa mũndũ mwene ũla wĩ nthĩnĩ wake? O ta ũu, vaiĩ mũndũ wĩsĩ maũndũ ma Ngai ate o veva wa Ngai. 12 Yu ithyĩ twoosie veva ũla wumĩte kwa Ngai, ĩndĩ ti veva wa nthĩ, nĩ kana tũtonye kũmanya maũndũ ala Ngai ũtũnengete nũndũ wa ũseo wake. 13 Maũndũ asu nĩmo tũneenaa, na ti kwa ndeto tũmanyĩĩtw’e nĩ ũĩ wa mũndũ, ĩndĩ kwa ndeto ila tũmanyĩĩtw’e nĩ veva, nũndũ tũeleasya maũndũ ma kĩ-veva tũitũmĩa ndeto sya kĩ-veva.

14 Ĩndĩ mũndũ wa kĩ-mwĩĩ ndetĩkĩlaa maũndũ ma veva wa Ngai, nũndũ kwake nĩ ũtumanu; na ndesa kũmamanya nũndũ masiaw’a kwa nzĩa ya kĩ-veva. 15 Ĩndĩ mũndũ wa kĩ-veva athianaa maũndũ onthe, ĩndĩ we mwene ndekuũawa nĩ mũndũ o na wĩva. 16 Nũndũ “nũũ wĩsĩ kĩlĩko kya Yeova, nĩ kana amũmanyĩsye?” Ĩndĩ ithyĩ twĩ na kĩlĩko kya Klĩsto.