Ũvuanyʼo kwa Yoana

10 Na noona mũlaĩka ũngĩ wĩ na vinya atheeete kuma ĩtunĩ, avwʼĩkĩtwe ĩthweo, na aĩ na ũtaathi mũtwenĩ wake na ũthyũ wake wailye syũa, na maaũ * make mailye ituĩ sya mwaki, 2 na kwʼokonĩ kwake aĩ na kavuku ka kũkũnzwa ke kakũnzũe. Na akinya ũkanga na kũũ kwake kwa aũme, na akinya nthĩ nyũmũ na kũũ kwake kwa aka, 3 na aneena na wasya mũnene o tondũ mũnyambũ ũlumaa. Na yĩla waneenie na wasya mũnene, mawasya ma ila itundumo mũonza maneena.

4 Na yĩla ila itundumo mũonza syaneenie, naĩ vakuvĩ kũandĩka, ĩndĩ neewʼa wasya kuma ĩtunĩ ũyasya: “Ĩkĩa ũsiĩlo maũndũ ala weewʼa maineenwa nĩ ila itundumo mũonza, na ndũkamaandĩke.” 5 Na mũlaĩka ũla noonie aũngamĩte, akinyĩte ũkanga na nthĩ nyũmũ, ookĩlya kwʼoko kwake kwa aũme elekelye ĩtunĩ, 6 na eevĩta na Ũla wĩkalaa tene na tene, ũla woombie ĩtu na syĩndũ syonthe ila syĩ nthĩnĩ wayo, na nthĩ na syĩndũ ila syĩ nthĩnĩ wayo, na ũkanga na syĩndũ ila syĩ nthĩnĩ wawʼo, akyasya: “Ĩvinda ya kweteela nĩ ĩthelu. 7 Ĩndĩ mĩthenyanĩ ĩla mũlaĩka wa mũonza wĩĩthĩwa e vakuvĩ kũvuva soo wake, nĩvo ĩndĩ Ngai ũkeanĩsya kĩmbithĩ kĩtheu kĩla watavanisye ta ũvoo mũseo kwa ngombo syake mwene, nasyo nĩ athani.”

8 Na neewʼa wasya kuma ĩtunĩ ũineena nakwa ĩngĩ, ũkyasya: “Enda wose kavuku kau kakũnzũe kala ke kwʼokonĩ kwa ũla mũlaĩka ũũngamĩte akinyĩte ũkanga na nthĩ nyũmũ.” 9 Na nathi kwa ũla mũlaĩka na namwĩa anenge kavuku kau ka kũkũnzwa. Nake ambĩa: “Kose na ũikaya, na nĩkeũtuma ĩvu yaku yĩthĩwa na ũũ, ĩndĩ kanywʼanĩ waku keĩthĩwa ke mũyo ta ũkĩ wa nzũkĩ.” 10 Na noosa kavuku kau ka kũkũnzwa kwʼokonĩ kwa ũla mũlaĩka na nakaya, na kanywʼanĩ wakwa kaĩ mũyo ta ũkĩ wa nzũkĩ, ĩndĩ yĩla nakaĩye, ĩvu yakwa yeethĩwa na ũũ. 11 Na neewa: “No nginya wathane ĩngĩ ĩũlũ wa andũ, mbaĩ, ithyomo, na asumbĩ aingĩ.”