Ĩvuku ya Mbee ya Mavinda

4 Ana ma Yuta maĩ Velesi, Esiloni, Kalimi, Uulu, na Sovali. 2 Leaia mwana wa Sovali nĩwe waĩ ĩthe wa Yaathi; Yaathi nĩwe waĩ ĩthe wa Aumai na Laati. Ĩsu nĩyo yaĩ mĩsyĩ ya Anzolathi. 3 Aa nĩmo maĩ ana ma ĩthe wa Etamu: Yesileeli, Isima, na Itivasi (na mwĩĩtu-a-inyia woo eetawa Aselelivoni), 4 Venueli nĩwe waĩ ĩthe wa Ngetoli, na Eseli nĩwe waĩ ĩthe wa Uusa. Asu maĩ ana ma Uulu, mwana ũla mũkũũ wa Evilatha na ĩthe wa Mbethileemu. 5 Asuli ĩthe wa Tekoa aĩ na iveti ilĩ, Eela na Naala. 6 Naala amũsyaĩe Ausamu, Eevieli, Temeni, na Aasitali. Asu nĩmo maĩ ana ma Naala. 7 Na ana ma Eela maĩ Nzelethi, Isali, na Ethinani. 8 Kosi nĩwe waĩ ĩthe wa Anuvu, Nzoveva, na mĩsyĩ ya Aalieli mwana wa Alumu.

9 Yavesu nĩwanengetwe ndaĩa kwĩ ana-a-ĩthe; na inyia amwĩtie Yavesu,* ayasya: “Namũsyaie na woo.” 10 Yavesu nĩwamwĩkaĩlile Ngai wa Isilaeli, ayasya: “Ame keka nũmbathima na ũinenevangya kĩsio kyakwa na ũieka kwʼoko kwaku kwĩthĩwe vamwe nakwa na ũinzũvĩana na mũisyo, nĩ kana mũisyo ũsu ndũkambũmĩsye!” Kwoou Ngai eanĩsya kĩla wamũvoyie.

11 Keluvu mwana-a-inyia wa Suai nĩwe waĩ ĩthe wa Meili, ũla waĩ ĩthe wa Esitoni. 12 Esitoni nĩwe waĩ ĩthe wa Mbethi-lava, Vasea, na Teina, ĩthe wa Ili-naasi. Asu maĩ aũme ma Leka. 13 Na ana ma Kenasi maĩ Othinieli na Selaia, na mwana* wa Othinieli aĩ Athathi. 14 Meonothai nĩwe waĩ ĩthe wa Ovala. Selaia nĩwe waĩ ĩthe wa Yoavu ĩthe wa ala mekalaa Nge-aalasimu.* Vandũ vau veetiwe ũu nũndũ ala mekalaa vo maĩ mavundi.

15 Ana ma Kalevu mwana wa Yevune maĩ Ilu, Ela, na Naami; na mwana* wa Ela aĩ Kenasi. 16 Ana ma Yealeleli maĩ Nzivu, Siva, Tilia, na Asalelu. 17 Ana ma Esila maĩ Yetheli, Meleti, Evieli, na Yaloni; nĩwaitavie* na asyaa Miliamu, Samai, na Isiva ĩthe wa Esitemoa. 18 (Na kĩveti kyake kĩla kyaĩ Mũyuti nĩkyasyaie Yeleti ĩthe wa Ngetoli, Eeveli ĩthe wa Soko, na Yekuthieli ĩthe wa Nzanoa.) Asu nĩmo maĩ ana ma Mbithia mwĩĩtu wa Valao, ũla watwaiwe nĩ Meleti.

19 Ana ma kĩveti kya Otia, mwĩĩtu-a-inyia wa Naamu, maĩ aa-ĩthe ma Keila Mũngalimi na Esitemoa Mũmaaka. 20 Na ana ma Simonu maĩ Aminoni, Lina, Mbeni-anani, na Tiloni. Na ana ma Isi maĩ Nzoethi na Mbeni-nzoethi.

21 Ana ma Siela mwana wa Yuta maĩ Elu ĩthe wa Leka, Laata ĩthe wa Malesa, na mĩsyĩ ya ala mathũkũmaa na kĩtambaa kĩseo ma nyũmba ya Asivea, 22 na Yokimu, aũme ma Koseva, Yoasi, na Salavu, ala matwaie aka Amoavi, na Yasuvi-leemu. Lekoti ii nĩ sya tene.* 23 Maĩ ombi ma mbisũ ala mekalaa Netaimu na Ngetela. Mekalaa kũu na mathũkũmĩaa mũsumbĩ.

24 Ana ma Simeoni maĩ Nemũeli, Yamini, Yalivu, Nzela, na Sauli. 25 Salumu aĩ mwana wake, Mivisamu mwana wake, na Misima mwana wake. 26 Na ana ma Misima maĩ Amueli mwana wake, Nzakuli mwana wake, Simei mwana wake. 27 Na Simei aĩ na ana 16 na eĩtu 6; ĩndĩ ana-a-ĩthe mayaĩ na ana aingĩ, na vai mũsyĩ o na ũmwe woo waĩ na ana aingĩ ta aũme ma Yuta. 28 Mekalaa Mbeeli-sieva, Molata, Asali-suali, 29 Mbila, Esemu, Tolati, 30 Mbethueli, Olima, Nzikilaki, 31 Mbethi-malikavothi, Asali-susimu, Mbethi-mbili, na Saalaimu. Isu nĩsyo syaĩ ndũa syoo nginya yĩla Ndaviti wambĩĩie kũsumbĩka.

32 Matwĩe Etamu, Aini, Limoni, Tokeni, na Asani, ndũanĩ itano, 33 o vamwe na motũi moo ala mathyũlũlũkĩte ndũa ii nginya Mbaali. Asu nĩmo masyĩtwa ala matalanĩtwʼe lekotinĩ sya mĩsyĩ yoo o vamwe na kũndũ kũla mekalaa. 34 Na Mesovavu, Yamileki, Yosa mwana wa Amasia, 35 Yoeli, Yeu mwana wa Yosivia mwana wa Selaia mwana wa Asieli, 36 na Elioenai, Yaakova, Yesoaia, Asaia, Atieli, Yesimieli, Mbenaia, 37 na Nzisa mwana wa Sivi mwana wa Aloni mwana wa Yetaia mwana wa Simili mwana wa Semaia; 38 asu mawetwa na masyĩtwa maĩ anene mĩsyĩnĩ yoo, na ũtalo wa andũ ma mĩsyĩ ya aa-ũmae moo nĩwongelekile. 39 Na nĩmaendie ũtee wa ndũa ya Ngetoli, ngalĩko ya wumĩlonĩ wa sua ya mwanda, makamanthe isesi sya kũĩthya indo syoo. 40 Mũthya, nĩmakwatie isesi syaĩ na ũĩthyo mwingĩ na nzeo, na nthĩ ĩsu yaĩ nene, ĩvindĩtye, na yĩ na mũuo. Aamu nĩmo matwĩe kwʼo mbeenĩ. 41 Asu ala masyĩtwa moo matalanĩtwʼe nĩmookie mĩthenyanĩ ya Mũsumbĩ Esekia wa Yuta na maomboa maeema ma Aamu na Ameuni ala maĩ kwʼo. Nĩmamanangie vyũ na vai ũmwe woo woneka nginya ũmũnthĩ; na matũa kũla mekalaa nũndũ kwaĩ na isesi sya kũĩthya indo syoo.

42 Andũ amwe ma mbaĩ ya Simeoni, aũme 500, nĩmaendie Kĩĩmanĩ kya Seili me na Velatia, Nealia, Levaia, na Usieli; ana asu ma Isi nĩmo mamatongoesye. 43 Na nĩmooaie Aamaleki ala matialĩte yĩla masembie mathi, na matwĩe kwʼo nginya ũmũnthĩ ũũ.