Ĩvuku ya Mbee ya Mavinda
9 Aisilaeli onthe nĩmatalanilwʼe lekotinĩ sya mĩsyĩ yoo, na nĩmaandĩkĩtwe Ĩvukunĩ ya Asumbĩ ma Isilaeli. Na andũ ma Yuta nĩmataviwe matwawa Mbavilonĩ nũndũ wa kwĩthĩwa mate aĩkĩĩku. 2 Aisilaeli amwe, athembi, Alivai, na athũkũmi ma ĩkalũnĩ* nĩmo maĩ andũ ma mbee kũsyoka ngʼũndũnĩ yoo ndũanĩ syoo. 3 Na nzyawa ii imwe sya Yuta, sya Mbenyamini, sya Evilaimu, na sya Manase nĩsyatũie Yelusalemu: 4 Uthai mwana wa Amiuti mwana wa Omili mwana wa Imili mwana wa Mbani, ũla waumĩte nzyawanĩ sya Velesi mwana wa Yuta. 5 Na kuma kwa Asilo, Asaia ũla waĩ mwana ũla mũkũũ vamwe na ana make. 6 Na kuma ananĩ ma Nzela, Yeueli na ana-a-ĩthe 690.
7 Na kuma nzyawanĩ sya Mbenyamini, Salu mwana wa Mesulamu mwana wa Otavia mwana wa Asenua, 8 Ivineia mwana wa Yeloamu, Ela mwana wa Usisi mwana wa Mikili, na Mesulamu mwana wa Sevatia mwana wa Leueli mwana wa Iviniya. 9 Na ana-a-ĩthe kwosana na ũndũ nzyawa syoo iatĩanĩe maĩ 956. Aũme asu onthe maĩ aũngamĩi ma nyũmba sya aa-ĩthe.*
10 Na kuma kwa athembi vaĩ Yetaia, Yeoialivu, Yakini, 11 Asalia mwana wa Ilikia mwana wa Mesulamu mwana wa Nzatoki mwana wa Melaiothi mwana wa Aituvu, mũtongoi wa nyũmba* ya Ngai ũla wa w’o, 12 Ataia mwana wa Yeloamu mwana wa Vasuli mwana wa Malikiya, Maasai mwana wa Atieli mwana wa Yasela mwana wa Mesulamu mwana wa Mesilemithi mwana wa Imeli, 13 na ana-a-ĩthe, aũngamĩi ma nyũmba sya aa-ĩthe, aũme 1,760 maĩ na vinya na ũtonyi, na meeyũmbanĩtye kwondũ wa ũthũkũmi wa nyũmba ya Ngai ũla wa w’o.
14 Na kuma kwa Alivai, vaĩ Semaia mwana wa Asuvu mwana wa Asilikamu mwana wa Asavia ala maumĩte nzyawanĩ sya Melali; 15 na Mbakivakali, Elesi, Ngalali, Matania mwana wa Mika mwana wa Nzikili mwana wa Asavu, 16 Ovatia mwana wa Semaia mwana wa Ngalali mwana wa Yetuthuni, na Mbelekia mwana wa Asa mwana wa Elikana, ũla wekalaa motũinĩ ma Anetova.
17 Na asũvĩi ma mĩvĩa maĩ Salumu, Akuvu, Talimoni, Aimani, na mwana-a-ĩthe woo Salumu, ũla nĩwe wamaũngamĩe, 18 na kũvika ĩvindanĩ yĩu eethĩawa mũvĩanĩ wa mũsumbĩ ngalĩko ya wumĩlonĩ wa sua. Asu nĩmo maĩ asũvĩi ma mĩvĩa kambinĩ sya Alivai. 19 Na Salumu mwana wa Kole mwana wa Eviasavu mwana wa Kola, na ana-a-ĩthe ma nyũmba ya aa-ĩthe, Akola, nĩmo maũngamĩe wĩa wa ũthũkũmi wa asũvĩi ma mũomo wa ĩeema, namo aa-ĩthe meethĩĩtwe maũngamĩe kambi ya Yeova me asũvĩi ma vala valikĩlawa. 20 Vineasi mwana wa Eleasali nĩwe waĩ mũtongoi woo tene; Yeova aĩ vamwe nake. 21 Nzekalia mwana wa Meselemia nĩwe waĩ mũsũvĩi wa mũvĩa mũomonĩ wa ĩeema ya kũmbanĩa.
22 Ũtalo wa onthe ala manyuviwe methĩwe asũvĩi ma mĩvĩa, methĩawe mĩomonĩ, waĩ 212. Mekalile motũinĩ moo kwosana na ũndũ lekoti syamatalanĩtye. Ndaviti na Samũeli ũla mwoni nĩmo mamanyuvie matethasye wĩa ũsu wa kũĩkĩĩwa. 23 Me na ana moo nĩmo maũngamĩe ũthũkũmi wa kũsunga mĩvĩa ya nyũmba ya Yeova, ĩla ĩvindanĩ yĩu yaĩ ĩeema. 24 Asũvĩi ma mĩvĩa maĩ ngalĩko syonthe inya; maĩ ngalĩko ya wumĩlonĩ wa sua, ya ũthũĩlonĩ wa sua, ya ĩũlũ, na ya ĩtheo. 25 Mavinda kwa mavinda, ana-a-ĩthe maaĩlĩte kuma motũinĩ moo na mayũka mathũkũme namo mĩthenya mũonza. 26 Vaĩ anene ana ma asũvĩi* ma mĩvĩa wĩanĩ ũsu wa kũĩkĩĩwa. Maĩ Alivai, na nĩmo maũngamĩe tũlumu* na vala vaiawa ũthwii wa nyũmba ya Ngai ũla wa w’o. 27 Mekalaa vala maĩle kwĩkala ũtukũ wʼonthe kũthyũlũlũka nyũmba ya Ngai ũla wa w’o, nĩkwĩthĩwa nĩmeanĩasya ũthũkũmi ũsu wa kũsunga na nĩmo maĩ na ũvungũo na mavingũaa nyũmba ĩsu kĩla kwakya.
28 Amwe moo maũngamĩe mĩio ya ũthũkũmi; mamĩtalaa maimĩtũnga na maimĩtala maimyumaalya. 29 Na amwe moo manyuviwe maũngamĩe mĩio, mĩio yonthe mĩtheu, na mũtu mũvinyu, mbinyu, mauta, ũvani, na mauta ma seli. 30 Ana amwe ma athembi mavulanasya manukato ma mauta ma seli. 31 Na Mũlivai ũmwe weetawa Matithia, ũla waĩ mwana ũla mũkũũ wa Mũkola weetawa Salumu, aĩ wĩanĩ wa kũĩkĩĩwa aũngamĩe syĩndũ ila syauawa na tũlaĩ twa kũua. 32 Ana-a-ĩthe amwe ma Akoathi maũngamĩe mĩkate ĩla yavangawa tũkundi ĩilĩanĩlwʼe,* na mamĩuaa kĩla savato.
33 Asu maĩ aini, aũngamĩi ma nyũmba sya aa-ĩthe sya Alivai ala meethĩawa tũla tũlumunĩ,* na mayanengawe wĩa ũngĩ; mũthenya na ũtukũ maaĩlĩte kwĩthĩwa wĩanĩ ũsu. 34 Asu maĩ aũngamĩi ma nyũmba sya aa-ĩthe sya Alivai kwosana na ũndũ nzyawa syoo syaatĩanĩe. Mekalaa Yelusalemu.
35 Yeieli, ĩthe wa Ngiveoni, ekalaa Ngiveoni. Kĩveti kyake kyeetawa Maaka. 36 Na Avitoni nĩwe waĩ mwana wake ũla mũkũũ, akaatĩĩwa nĩ Nzuli, Kisi, Mbaali, Neli, Natavu, 37 Ngetoli, Aio, Nzekalia, na Mikilothi. 38 Mikilothi nĩwe waĩ ĩthe wa Simeamu. Na onthe mekalaa vakuvĩ na ana-a-ĩthe Yelusalemu, o vamwe na ana-a-ĩthe ala angĩ. 39 Neli nĩwe waĩ ĩthe wa Kisi; Kisi nĩwe waĩ ĩthe wa Saũlo; Saũlo nĩwe waĩ ĩthe wa Yonathani, Maliki-sua, Avinatavu, na Esimbaali. 40 Na mwana wa Yonathani aĩ Melivi-mbaali. Melivi-mbaali nĩwe waĩ ĩthe wa Mika. 41 Na ana ma Mika maĩ Vithoni, Meleki, Taalea, na Aasu. 42 Aasu nĩwe waĩ ĩthe wa Yala; Yala nĩwe waĩ ĩthe wa Alemethi, Asimavethi, na Nzimili. Nzimili nĩwe waĩ ĩthe wa Mosa. 43 Mosa nĩwe waĩ ĩthe wa Mbinea na Levaia mwana wake, Eleasa mwana wake, Aselu mwana wake. 44 Aselu aĩ na ana thanthatũ, na meetawa Asilikamu, Mbokelu, Isimaeli, Sealia, Ovatia, na Anani. Asu nĩmo maĩ ana ma Aselu.