Ĩvuku ya Mbee ya Mavinda

11 Ĩtina wa ĩvinda, Aisilaeli onthe nĩmoombanĩie vala ve Ndaviti kũu Eviloni na masya: “Sisya! Ithyĩ twĩ ĩvĩndĩ yaku na nyama yaku.* 2 Ĩvindanĩ ĩvĩtu yĩla Saũlo waĩ mũsumbĩ, nue watongoeasya Isilaeli kaũnĩ.* Na Yeova Ngai waku akwĩie atĩĩ: ‘Ũkaĩthya andũ makwa Aisilaeli, na ũkeethĩwa mũtongoi wa andũ makwa Aisilaeli.’” 3 Kwoou atumĩa onthe ma Isilaeli nĩmookie vala ve mũsumbĩ kũu Eviloni, na Ndaviti atianĩa ũtianĩo namo kũu Eviloni mbee wa Yeova. Na ĩndĩ metĩkĩsya Ndaviti mauta atwʼĩke mũsumbĩ wa Isilaeli, kwosana na ndeto ila Yeova waneeneete kwĩsĩla Samũeli.

4 Ĩtina wa ĩvinda, Ndaviti na Aisilaeli onthe nĩmaendie Yelusalemu, nayo nĩ, Yevusi, nthĩ ĩla Ayevusi matwĩe. 5 Ekali ma Yevusi mavũthĩĩisye Ndaviti maimwĩa: “We ndũkesa kũlika vaa!” Ĩndĩ o na ũu wĩ o vo, Ndaviti nĩwakwatie ngome ya Saioni, ĩla yu nĩ Ndũa ya Ndaviti. 6 Kwoou Ndaviti asya: “Mũndũ ũla ũkethĩwa wa mbee kũvithũkĩa Ayevusi akatwʼĩka mũũngamĩi wa ita.” Na Yoavu mwana wa Nzeluia ambata mbee, na atwʼĩka mũnene. 7 Na ĩndĩ Ndaviti ambĩĩa kwĩkala ngomenĩ ĩsu. Nĩkyo kĩtumi mamĩtie Ndũa ya Ndaviti. 8 Nĩwambĩĩie kwaka ndũa ĩsu kũmĩthyũlũlũka, kuma kĩla Kĩvumbunĩ* nginya isionĩ ila syamĩthyũlũlũkĩte, na Yoavu atũngĩĩa kũla kwatialĩte ndũanĩ ĩsu. 9 Kwoou Ndaviti aendeea kwĩthĩwa na vinya mũno, na Yeova wa nguthu aĩ vamwe nake.

10 Yu ĩndĩ aa nĩmo aũngamĩi ma ngũmbaũ sya kaũ sya Ndaviti, ala mamũkwatie mbau vyũ ũsumbĩnĩ wake, vamwe na Aisilaeli onthe, nĩ kana mamũtwʼĩkĩthye mũsumbĩ kwosana na ndeto ila Yeova waneeneete ĩũlũ wa Isilaeli. 11 Ii nĩsyo ngũmbaũ sya kaũ sya Ndaviti: Yasoveamu mwana wa Mũakimoni, mũũngamĩi wa ala atatũ. Nĩwooaie andũ 300 na ĩtumo yake o ĩvindanĩ yĩmwe. 12 Aatĩĩwe nĩ Eleasali mwana wa Ndoto ũla waĩ Mũaoi. Aĩ katĩ wa ila ngũmbaũ itatũ sya kaũ. 13 Aĩ na Ndaviti kũu Vasi-ndamimu, vala Avilisiti moombanĩe mokite namo. Yu vaĩ na mũũnda wausĩe mbaale, na andũ maĩ manasemba makakĩa Avilisiti. 14 Ĩndĩ ndaakĩa, vandũ va ũu, aũngamie mũũndanĩ ũsu katĩ na aũtetea na aendeea kũaa Avilisiti, na kĩu kyatuma Yeova aete ũsindi* mũnene.

15 Aũngamĩi 3 katĩ wa aũngamĩi 30 nĩmatheeie ĩvianĩ kũla kwĩ Ndaviti, ngunganĩ ya Atulamu, ita sya Avilisiti syambĩte kambi Mwandanĩ* wa Alevai. 16 Ĩvindanĩ yĩu Ndaviti aĩ ngomenĩ, nayo kambi ya Avilisiti yaĩ Mbethileemu. 17 Na ĩndĩ Ndaviti aweta kĩla wendaa, asya: “Ta keka no nĩnywʼe kĩw’ũ kya kĩthima* kĩla kĩ vakuvĩ na mũvĩa wa Mbethileemu!” 18 Nĩvo ĩndĩ aũme asu me atatũ malikile kambinĩ ya Avilisiti na vinya na matava kĩw’ũ kĩthimanĩ kĩla kĩ vakuvĩ na mũvĩa wa Mbethileemu na makĩetee Ndaviti; ĩndĩ Ndaviti nĩwaleile kũkĩnywʼa na akĩtĩa Yeova. 19 Aisye: “Kwosana na woni wa Ngai wakwa ndyamba kũsũanĩa kwĩka ũu! Yo nĩnaĩle kũnywʼa nthakame ya aũme aa malikilye mathayũ moo mũisyonĩ? Nũndũ nĩmalikilye mathayũ moo mũisyonĩ nĩ kana makĩete.” Kwoou alea kũkĩnywʼa. Aa nĩmo maũndũ ala ngũmbaũ isu itatũ syake sya kaũ syeekie.

20 Avisai mwana-a-inyia wa Yoavu nĩwatwʼĩkie mũũngamĩi wa ala angĩ atatũ; ooaie andũ 300 na ĩtumo yake, na aĩ nguma o ta asu atatũ. 21 Katĩ wa ala angĩ atatũ, nĩwe wanengetwe ndaĩa mũno kwĩ elĩ katĩ woo, na nĩwe waĩ mũnene woo; o na vailye ũu, kĩanda kyake kĩyaaĩsa kwĩanana na kya ala atatũ ma mbee.

22 Mbenaia mwana wa Yeoiata aĩ mũndũũme ngũmbaũ* na nĩweekie maũndũ maingĩ manene kũu Kaviseeli. Nĩwooaie ana elĩ ma Alieli kuma Moavi, na mũthenya ũmwe kwĩ ĩa nĩwalikile ĩimanĩ ya kĩwʼũ na ooaa mũnyambũ. 23 O na nĩwooaie Mũmisili waĩ mũnene mũno; aĩ na ũasa wa mĩkono ĩtano.* O na kau Mũmisili ũsu akwete ĩtumo ĩnene ta mũamba wa atumi, Mbenaia aendie kũkita nake na ndata na avulya ĩtumo yĩu wakwete na amũaa o nayo. 24 Mbenaia mwana wa Yeoiata nĩweekie maũndũ asu, na aĩ nguma o ta ila ngũmbaũ itatũ sya kaũ. 25 O na kau nĩwanengetwe ndaĩa kwĩ ala 30, ndaaĩsa kwĩthĩwa na kĩanda ta kya ala atatũ. O na ũu wĩ o vo, Ndaviti nĩwamũnyuvie aũngamĩe asungi make.

26 Ngũmbaũ sya kaũ ila syaĩ itanĩ syaĩ Asaeli mwana-a-inyia wa Yoavu, Elianani mwana wa Ndoto kuma Mbethileemu, 27 Samothi ũla waĩ Mũaloli, Elesu ũla waĩ Mũveloni, 28 Ila mwana wa Ikesi ũla waĩ Mũtekoa, Avi-eseli ũla waĩ Mũanathothi, 29 Sivekai ũla waĩ Mũuusa, Ilai ũla waĩ Mũaoi, 30 Maalai ũla waĩ Mũnetova, Eleti mwana wa Mbaana ũla waĩ Mũnetova, 31 Ithai mwana wa Livai kuma Ngivea ya Ambenyamini, Mbenaia ũla waĩ Mũvilathoni, 32 Ulai ũla waumĩte myandanĩ ya* Ngaasi, Avieli ũla waĩ Mũaliva, 33 Asimavethi ũla waĩ Mũmbaulimu, Eliava ũla waĩ Mũsaalivoni, 34 ana ma Asemu ũla waĩ Mũngisoni, Yonathani mwana wa Sake ũla waĩ Mũalali, 35 Aiamu mwana wa Sakali ũla waĩ Mũalali, Elivali mwana wa Ulu, 36 Eevieli ũla waĩ Mũmekelathi, Aiya ũla waĩ Mũveloni, 37 Esilo ũla waĩ Mũkalimeli, Naalai mwana wa Esivai, 38 Yoeli mwana-a-inyia wa Nathani, Mivali mwana wa Akili, 39 Nzeleki ũla waĩ Mũamimoni, Naalai ũla waĩ Mũmbelothi, mũkui wa mĩio ya kaũ wa Yoavu mwana wa Nzeluia; 40 Ila ũla waĩ Mũithili, Ngalevu ũla waĩ Mũithili, 41 Ulia ũla waĩ Mũititi, Nzavati mwana wa Alai, 42 Atiina mwana wa Sinza Mũleũveni, mũũngamĩi wa Aleũveni, na aĩ na angĩ 30; 43 Anani mwana wa Maaka, Yosavati ũla waĩ Mũmithini, 44 Usisia ũla waĩ Mũasitalothi, Sama na Yeieli, ana ma Othamu ũla waĩ Mũaloeli; 45 Yetiaeli mwana wa Simili, na mwana-a-inyia Yooa ũla waĩ Mũtisi; 46 Elieli ũla waĩ Mũmaava, Yelivai na Yosavia ana ma Elinaamu, na Ithima ũla waĩ Mũmoavi; 47 Elieli, Oveti, na Yaasieli ũla waĩ Mũmesova.