Meko ma Atũmwa

8 Na Saulo nĩweetĩkĩlanile na kũawa kwa Sitivini.

Mũthenya ũsu nĩkweethĩiwe thĩna mũnene kwa kĩkundi kĩla kyaĩ Yelusaleme; na onthe manyaĩĩkw’a isionĩ syonthe sya Yutia na Samalia, ate o atũmwa. 2 Ĩndĩ andũ amwe maĩ na kĩkĩo kwa Ngai nĩmakuie Sitivini mamũthika, na mamũĩĩa mũno. 3 Na Saulo ambĩĩa kũthĩny’a kĩkundi mũno. Avithũkĩaa nyũmba ĩmwe ĩtina wa ĩla ĩngĩ, na aikusũlany’a aũme na aka na aimatwaa yela.

4 O na ũu wĩ o vo, ala manyaĩĩkiw’e maendie nthĩ ĩsu yonthe maitavany’a ũvoo mũseo wa ĩla ndeto. 5 Na Vilivu atheea ndũanĩ ya Samalia, na ambĩĩa kũmatavya ũvoo ĩũlũ wa Klĩsto. 6 Ĩkomano nĩyateete matũ nesa yĩendeee kwĩthukĩĩsya kĩla Vilivu wayĩtavasya na kwona syama ila weekaa. 7 Na kwaĩ aingĩ maĩ na maveva mavuku, na maveva asu nĩmakayaa na wasya mũnene na makauma. O na ĩngĩ, aingĩ ala maĩ onzu mamutha na au mamutha nĩmavoiw’e. 8 Kwoou nĩkweethĩiwe ũtanu mwingĩ ndũanĩ ĩsu.

9 Na ndũanĩ ĩsu kwaĩ mũndũ ũmwe weetawa Simoni, ũla mbeenĩ weekaa syama sya ũwe na waseng’asya andũ onthe ma Samalia, nũndũ aasya kana we nĩ mũndũ wa vata. 10 Onthe, kuma ũla mũnini kũvika ũla mũnene, nĩmamwĩthukĩĩasya, na makasya: “Mũndũ ũũ nĩ Vinya wa Ngai, vinya ũla wĩtawa Mũnene.” 11 Kwoou nĩmamwĩthukĩĩasya nũndũ aĩ amaseng’etye kwa ĩvinda yĩasa na syama syake sya ũwe. 12 Ĩndĩ yĩla mamũĩkĩĩie Vilivu, ũla watavanasya ũvoo mũseo ĩũlũ wa Ũsumbĩ wa Ngai na ĩũlũ wa ĩsyĩtwa ya Yesũ Klĩsto, aũme na aka nĩmavatisiwe. 13 Simoni o nake nĩwaĩkĩĩie, na ĩtina wa kũvatiswa, nĩwaendanisye na Vilivu; na nĩwaseng’aa nũndũ wa kwona mawonany’o na syama nene ila syeekĩkaa.

14 Yĩla atũmwa ala maĩ Yelusaleme meewie kana andũ ma Samalia nĩmetĩkĩlile ndeto ya Ngai, nĩmatũmie Vetelo na Yoana kũla maĩ; 15 na asu elĩ nĩmatheeie kũu na mamavoyea nĩ kana makwate veva mũtheu. 16 Meekie ũu nũndũ vai ũmwe woo waũkwatĩte, ĩndĩ meekĩte o kũvatiswa ĩsyĩtwanĩ ya Mwĩaĩi Yesũ. 17 Na ĩndĩ mamailĩĩla moko, na mambĩĩa kũkwata veva mũtheu.

18 Yĩla Simoni woonie kana andũ makwataa veva mũtheu mailĩĩlwa moko nĩ atũmwa, amaetee mbesa, 19 akyasya: “O nakwa nengai ũkũmũ ũũ, nĩ kana mũndũ o na wĩva ũla namwilĩĩla moko akwate veva mũtheu.” 20 Ĩndĩ Vetelo amwĩa: “Mbesa syaku nithele vamwe naku, nũndũ wĩsũanĩa nũtonya kũkwata mũthĩnzĩo wa Ngai ũtũmĩĩte mbesa. 21 Ndwĩ na kĩanda ũndũnĩ ũũ, nũndũ ngoo yaku ti ndũngalu methonĩ ma Ngai. 22 Kwoou ĩlile nũndũ wa ũthũku ũsu waku, na ũimũvoya Yeova na kĩthing’ĩĩsyo nĩ kana, ethĩwa nĩvatonyeka, akũekee nũndũ wa mosũanĩo mathũku ma ngoo yaku; 23 nũndũ nĩngwona wĩ sumu mũthũku * na ngombo ya maũndũ mate malũngalu.” 24 Nake Simoni amasũngĩa, amea: “Voyai Yeova na kĩthing’ĩĩsyo kwondũ wakwa, nĩ kana ndikakwatwe nĩ ũndũ o na ũmwe katĩ wa asu mwaweta.”

25 Kwoou, mamina kumya ũkũsĩ mwĩanĩu na kũneena ndeto ya Yeova, nĩmakwatie nzĩa masyoka Yelusaleme, na maendete nĩmatavanasya ũvoo mũseo motũinĩ maingĩ ma Samalia.

26 Ĩndĩ mũlaĩka wa Yeova aneena na Vilivu, akĩmwĩa: “Ũkĩla ũthi ngalĩko ya ĩtheo, nzĩanĩ ĩla ĩtheeete Ngasa kuma Yelusaleme.” (Ĩno nĩ nzĩa ya weũnĩ.) 27 Ĩtina wa vau nĩwookĩlile na athi, na sisya! nĩwoonie Mũethiovia ũmwe mũvakũe, * mũndũ waĩ na ũkũmũ ungu wa Kandake, mũsumbĩ mũndũ mũka wa Aethiovia, na nĩwe waũngamĩe syĩndũ syake syonthe. Mũethiovia ũsu aĩ anathi Yelusaleme kũthaitha, 28 na yu asyokete kwoo na ailyĩ nthĩ ĩkasyanĩ yake aisoma na wasya mũnene ĩvuku ya mwathani Isaia. 29 Kwoou veva wamwĩa Vilivu: “Enda ũthengeee ĩkasya yĩu.” 30 Na Vilivu asemba athengeea ũtee wayo na amwĩw’a aisoma na wasya mũnene ĩvuku ya mwathani Isaia, na amwĩa: “We nũũmanya * kĩla ũũsoma?” 31 Nake asya: “Ndonya kũmanya ata ndemũmanyĩsye nĩ mũndũ?” Kwoou amwĩsũva Vilivu alĩse ĩkasyanĩ na ayĩkala nthĩ nake. 32 Kĩlungu kya Maandĩko kĩla wasomaa nĩkyo kĩĩ: “O ta ĩlondu nĩwaetiwe kĩthĩnzĩonĩ, na o ta kalondu keũtilwa w’ĩa kavindĩtye, we ndaathamya kanyw’a wake. 33 Ĩvinda yĩla mamwĩkĩĩthasya nthoni, ũsili wa katĩ nĩwavetiwe vala ũĩ. Nũũ ũla ũkaelesya ũvoo ĩũlũ wa nzyawa yake? Nũndũ thayũ wake nĩwavetiwe ĩũlũ wa nthĩ.”

34 Na ĩndĩ mũndũ ũsu mũvakũe amwĩa Vilivu: “Mwa ndavye! we mwathani eneena maũndũ aa ĩũlũ waũ? Eneena ĩũlũ wake mwene kana nĩ ĩũlũ wa mũndũ ũngĩ?” 35 Vilivu nĩwambĩĩie kũneena, na amũtavya ũvoo mũseo ĩũlũ wa Yesũ, ambĩĩe na ĩandĩko yĩu. 36 Na maendete nzĩanĩ meethĩa ndia ya kĩw’ũ, na ũla mũndũ mũvakũe amwĩa: “Sisya! Vaa ve kĩw’ũ; nĩ kyaũ kĩũnziĩĩa kũvatiswa?” 37* —— 38 Ĩtina wa ũu nĩweeaie ĩkasya yĩũngamw’e, na mũndũ ũsu mũvakũe na Vilivu matheea kĩw’ũnĩ, na amũvatisa. 39 Yĩla mambatie kuma kĩw’ũnĩ, o mĩtũkĩ veva wa Yeova nĩwamumisye Vilivu vau, na mũndũ ũsu mũvakũe ndaasyoka kũmwona ĩngĩ, ĩndĩ nĩwaendeeie na kyalo kyake atanĩte. 40 Nake Vilivu eeyĩthĩĩla Asoto, na esĩle kĩsionĩ kĩu aendeea kũtavany’a ũvoo mũseo ndũanĩ syonthe nginya avika Kaisalea.