Valũa wa Mbee wa Yoana

1 Twĩmũandĩkĩa ĩũlũ wa kĩla kyaĩ vo kuma mwambĩlĩlyonĩ, kĩla tweewie, kĩla twoonie na metho maitũ, kĩla twasyaisye nesa na twakiita na moko maitũ, nakyo kĩkonetye ndeto ya thayũ, 2 (ĩĩ, thayũ nĩwoonaniw’e na nĩtwonete na nĩtumasya ũkũsĩ na kũmũtavya ĩũlũ wa thayũ ũsu wa tene na tene ũla wumĩte kwa Asa na nĩwoonaniw’e kwitũ), 3 kĩla twonete na kwĩw’a nĩtũũmũtavya, nĩ kana o nenyu mwĩthĩwe na ngwatanĩo vamwe naitũ. Ngwatanĩonĩ ĩsu twĩthĩawa vamwe na Asa na Mwana wake Yesũ Klĩsto. 4 Na twĩandĩka maũndũ aa nĩ kana ũtanu witũ wusũe.

5 Ũũ nĩw’o ũvoo ũla tweewie kuma kwake na tũũmũtavya: Ngai nĩ kyeni, na nthĩnĩ wake vaiĩ kĩvindu nongi. 6 Ethĩwa twĩasya, “Twĩ ngwatanĩo vamwe nake,” na tũendaa kĩvindunĩ, nĩtũũkengana na tũyĩkaa kwosana na ũla w’o. 7 Ĩndĩ, ethĩwa tũendaa kyeninĩ o tondũ Ngai mwene wĩ kyeninĩ, twĩ ngwatanĩo ithyĩ kwa ithyĩ, na nthakame ya Yesũ, Mwana wake, nĩtũtheasya naĩ syonthe.

8 Ethĩwa twĩasya, “Tũi na naĩ,” nĩtũkwĩkenga, na ũla w’o ndwĩ nthĩnĩ witũ. 9 Ethĩwa nĩtũkumbũla naĩ sitũ, we nĩ mũĩkĩĩku na nĩ mũlũngalu na kwoou akatũekea naĩ sitũ na kũtũthesya kĩla ũndũ ũte ũlũngalu. 10 Ethĩwa twĩasya, “Tũyĩkĩte naĩ,” twĩmũtw’a mũkengani, na ndeto yake ndĩ nthĩnĩ witũ.