Kuma
15 Ĩvindanĩ yĩu Mose na Aisilaeli nĩmamwinĩie Yeova wathi ũũ:
“Eka nĩmwinĩe Yeova, nũndũ nĩwanenevwʼa mũno.
Mbalasi na mũtwai wayo nĩwekya ũkanganĩ.
2 Vinya wakwa na ũtonyi wakwa nĩ Yeova, nũndũ nĩwatwʼĩka ũtangĩĩo wakwa.
Ũũ nĩ Ngai wakwa, na nĩngũmũtaĩa; Ngai wa ĩthe wakwa, na nĩngũmũnenevya.
3 Yeova nĩ ngũmbaũ ya kaũ yĩ vinya. Yeova nĩyo ĩsyĩtwa yake.
4 Makasya ma Valao na ita syake nĩwekya ũkanganĩ,
Na ngũmbaũ syake sya kaũ ila nzeo vyũ nĩsyathelekelya Ũkanganĩ Mũtune.
5 Kĩwʼũ kĩ vinya nĩkyamavwʼĩka; mathelekelya vyũ ũkanganĩ ta ĩvia.
6 Kwʼoko kwaku kwa aũme, ame Yeova, kwĩ vinya mwingĩ;
Kwʼoko kwaku kwa aũme, ame Yeova, no kũtilange mũmaitha.
7 Ũnenenĩ waku mwingĩ nũtonya kũmekya nthĩ ala matataa kũũvĩnga;
Nũtũmaa ũthatu waku wakanĩte, na ũimaya ta nyeki.
8 Mĩthũmũ ya manyiũũ maku nĩyatumie kĩwʼũ kyũmbana vamwe;
Kĩw’ũ nĩkyaũngamie vyũ, na kyasiĩĩwa kĩikavĩte;
Kĩwʼũ kĩ vinya nĩkyoomĩlĩanĩile ũkanganĩ katĩ.
9 Mũmaitha aisye: ‘Nĩngũmaatĩĩa! Nĩngũmakwata!
Nĩaanyʼa mũtavo nginya nĩanĩwe!*
Nĩngũkũa ũvyũ wakwa! Kwʼoko kwakwa nĩkũũmakĩlya vinya!’
10 Wavuvie na mĩthũmũ yaku, ũkanga wamavwʼĩka;
Mathelekeilye ta kyũma kĩito kĩwʼũnĩ kĩ vinya.
11 Nũũ katĩ wa i ngai ũilye taku, ame Yeova?
Nũũ ũilye taku, we wĩyonanasya wĩ mũtheu mũno vyũ?
Ũla waĩle kũkĩwa na mbathi sya kũtaĩa, ũla wĩkaa maũndũ ma ũsengyʼo.
12 Watambũũkisye kwʼoko kwaku kwa aũme, na nthĩ yamamelya.
13 Wendonĩ waku ũtathelaa nũtongoesye andũ ala wovoetye;
Vinyanĩ waku ũkamatongoesya nginya wĩkalonĩ waku mũtheu.
14 No nginya ngo sya andũ syĩwʼe; ikatetema;
Woo* ũkakwata ekali ma Vilisitia.
Ekali onthe ma Kanaanĩ makakwʼa ngoo.
16 Makakwatwa nĩ wia na kũtelema.
Nũndũ wa vinya wa kwʼoko kwaku, makekala mateũnyaunyia ta ĩvia
Nginya andũ maku mavĩte, ame Yeova,
Nginya andũ ala woombie mavĩte.
17 Ũkamaete na ũimavanda kĩĩmanĩ kya ũtiĩwa waku,
Wĩkalo waku wa tene na tene ũla weeseũvĩisye wĩkalae, ame Yeova,
Vandũ vatheu, ame Yeova, vala moko maku malũlũmĩĩilye.
18 Yeova akasumbĩka e mũsumbĩ tene na tene.
19 Yĩla mbalasi sya Valao vamwe na makasya make ma kaũ na atwai make ma mbalasi malikile ũkanganĩ,
Nĩvo ĩndĩ Yeova watũngĩanĩie kĩw’ũ kya ũkanga kyamavwʼĩka,
Ĩndĩ andũ ma Isilaeli mesĩlile katĩkatĩ wa ũkanga makinyĩle nthĩ nyũmũ.”
20 Na ĩndĩ Miliamu mwathani mũndũ mũka, mwĩĩtu-a-inyia wa Alũni, oosa ndambulĩnĩ, na aka onthe mamũatĩĩa me na ndambulĩnĩ masũngĩte. 21 Miliamu ainie ũũ etĩkĩĩsye aũme:
“Mwinĩei Yeova, nũndũ nĩwanenevwʼa mũno.
Mbalasi na mũtwai wayo nĩwekya ũkanganĩ.”
22 Ĩtina Mose nĩwatongoeisye Aisilaeli kuma Ũkanganĩ Mũtune, na mauma mathi weũnĩ wa Suli na mathi kyalo kya mĩthenya ĩtatũ weũnĩ, ĩndĩ mayaakwata kĩwʼũ. 23 Nĩmavikie Mala,* ĩndĩ mayaĩ matonya kũnywʼa kĩwʼũ kya Mala nũndũ kyaĩ ũũ. Nĩkyo kĩtumi wavetie Mala. 24 Kwoou andũ mambĩĩa kũmũnyungunyĩĩsya Mose maimwĩa: “Twĩnywʼa kĩ?” 25 Na Mose amũĩĩa Yeova, na Yeova amũtongoesya mũtĩnĩ mũna. Yĩla wawĩkisye kĩw’ũnĩ, kĩw’ũ kĩu nĩkyameisye mũyo.
Na vau Ngai amekĩĩa mwolooto na mwĩao wa kũatĩĩaa yĩla meũtwʼa sila, na vau amatata. 26 Aisye: “Ethĩwa mũkeethukĩĩasya nesa vyũ wasya wa Yeova Ngai wenyu na kwĩkaa kĩla kyaĩle methonĩ make na kwĩthukĩĩasya nesa mĩao yake na kũatĩĩa myolooto yake yonthe, ndikamũetee ũwau o na ũmwe katĩ wa mowau ala naetie ĩũlũ wa Amisili, nũndũ nyie, Yeova, nĩngũmũvosya.”
27 Ĩtina wa ũu, nĩmavikie Elimu, vala vaĩ na nthongo* 12 sya kĩwʼũ, na mĩtende 70. Na kwoou nĩmambie maeema vau ũtee wa kĩwʼũ.