Meko ma Atũmwa
27 Na nũndũ ũtwi waĩ ũneekwa tũthi na meli nginya Italia, nĩmamũnenganie Vaulo na ovwa angĩ kwa mũnene wa asikalĩ weetawa Yuliusi, wa kĩkosi kya Aukusito. 2 Na twalika melinĩ yaumĩte Atilamitio ĩla yakilye kũkũsya yĩsĩle kũndũ kũla meli iũngamaa kĩsionĩ kya Asia, na twambĩĩa kyalo; na Alisitaliko ũla waĩ Mũmasetonia kuma Thesalonika aĩ vamwe naitũ. 3 Na ũnĩ wake nĩtwavikie Sitoni, na Yuliusi amwĩka Vaulo nesa * kwa kũmwĩtĩkĩlya athi kwa anyanyae nĩ kana mamũsũvĩe.
4 Na twalika melinĩ twauma vau, na nũndũ kĩseve kyauutanaa kyumĩte ngalĩ ĩla twaendete, twesĩla vakuvĩ na kĩthama kya Kuvolo nĩ kana kĩtũseseee kĩseve kĩu. 5 Na ĩndĩ twesĩla ũkanganĩ mũliku tũkuumanĩte na Silisia na Vambilia na twaũngama Mila, ndũa ya Lisia yĩ ũtee wa ũkanga. 6 Na twavika kũu mũnene wa asikalĩ nĩweethĩie meli yaumĩte Alekisandalia ĩendete Italia, na atũlikya melinĩ ĩsu. 7 Na ĩtina wa kũthi kavola mĩthenya mingĩ, nĩtwavikie na thĩna mwingĩ ndũanĩ ya Kinito. Na nũndũ kĩseve nĩkyatũsiĩĩe kũthi na mbee, twesĩla vakuvĩ na Salimone kĩthamanĩ kya Kilete, nĩ kana kĩtũseseee kĩseve kĩu. 8 Nĩtwaendeeie na kyalo kitũ na thĩna mwingĩ, tũkuumanĩte na isio ila syĩ ũtee wa ũkanga, na twavika vandũ veetawa Ũthũmũo Mũseo, vakuvĩ na ndũa ya Lasea.
9 Ĩvinda yĩasa yaĩ yĩnavĩta na kũendeea na kyalo kwaĩ kũtũlikye mũisyonĩ, nũndũ o na ĩvinda ya kũtĩĩa kũya ya Mũthenya wa Wĩw’anĩthyo yaĩ ĩvĩtu, kwoou Vaulo aumya woni, 10 amea atĩĩ: “Aũme, nĩona kyalo kĩĩ kĩĩthĩwa na wanangĩko na wasyo mũnene, ti wa mĩio na meli tũ, ĩndĩ o na wa mathayũ maitũ.” 11 Ĩndĩ mũnene wa asikalĩ amwĩthukĩĩsya mũtwai wa meli na mwene wa ĩ meli vandũ va kwĩthukĩĩsya kĩla Vaulo waneenaa. 12 Na nũndũ kĩlĩndĩ kya vau kĩyaĩ kĩseo kya kwĩkala ĩvinda ya mbevo, aingĩ masya tũendeee na kyalo kuma vau twone kana nĩtũvika Vinisi nĩ kana twĩkale kũu ĩvinda ya mbevo. Kĩu nĩ kĩlĩndĩ kĩ kĩthamanĩ kya Kilete, kĩla kĩsyaĩtye ngalĩko ya ĩũlũ kwelekela wumĩlonĩ wa syũa, na ngalĩko ya ĩtheo kwelekela wumĩlonĩ wa syũa.
13 Na yĩla kĩseve kuma ngalĩko ya ĩtheo kyauisye, masũanĩa kana kĩeleelo kyoo nĩkĩkwĩanĩa, kwoou mambatya nanga na matwaĩla meli vakuvĩ na nthĩ nyũmũ, makuumanĩte na kĩthama kya Kilete. 14 Ĩndĩ ĩtina wa ĩvinda ĩkuvĩ, kĩseve kĩ na vinya kĩtawa Eulakulo * nĩkyatheeie kĩuutanĩte kuma kĩthamanĩ kĩu. 15 Na kĩseve kĩu kyakima meli ĩsu na vinya weethĩa ndĩthi na mbee kwelekela kũla kyumĩte, kwoou twamĩeka yatwawa nĩkyo. 16 Na twesĩla vakuvĩ na kathama keetawa Kauta nĩ kana katũseseee kĩseve, ĩndĩ ũyaĩ ũndũ wĩ laisi kũlũmya kasiwa * kala kaĩ ngalĩ ya ĩtina ya meli. 17 Ĩndĩ ĩtina wa kũkalĩsya melinĩ, nĩmalũlũmĩĩlye meli kwa kũmyova na makanda, na nũndũ nĩmakĩaa kũlũma kĩthangathĩnĩ kya Siliti, * matheesya makanda vamwe na kĩtambaa na maeka meli ĩtwawe nĩ kĩseve. 18 Na nũndũ kĩuutani kyaĩ na vinya nĩkyatwĩkasya kũũ na kũũ, nĩmambĩĩie kũola syĩndũ melinĩ mũthenya ũla waatĩĩe. 19 Na mũthenya wa katatũ mekya mo ene syĩndũ sya kũtwaa meli.
20 Na kwa mĩthenya mingĩ tũyaaona syũa kana ndata, na nũndũ nĩtwaendeee kũkimwa nĩ kĩuutani kĩ na vinya, wĩkwatyo witũ w’onthe wa kũvonoka wambĩĩa kũthela. 21 Na ĩtina wa kwĩkala mĩthenya mingĩ mateũya, Vaulo nĩwaũngamie katĩ woo, na asya: “Aũme, vate nzika mwaĩle kwĩthĩwa mũneethukĩĩisye ũtao wakwa na kũlea kuma Kilete, nũndũ tũyĩthĩwa twakwatwa nĩ wanangĩko na wasyo ũũ. 22 Ĩndĩ yu nĩmwĩsũva mwĩthĩwe na ũkũmbaũ nũndũ vaiĩ ũmwe wenyu wĩkw’a, ĩndĩ meli nĩkwanangĩka. 23 Ũtukũ, mũlaĩka wa Ngai ũla nyie nĩthaithaa na o ũla nĩthũkũmaa ũthũkũmi mũtheu nũũngamie vakuvĩ nakwa, 24 na asya: ‘Vaulo, ndũkakĩe. No nginya ũũngame mbee wa Kaisali, na sisya! Ngai nũkũnengete onthe ala wĩ namo melinĩ.’ 25 Kwoou ĩthĩwai na ũkũmbaũ aũme, nũndũ nĩnĩĩkĩĩe kana Ngai nũkwĩka maũndũ asu o ũndũ nĩtaviw’e. 26 Ĩndĩ, no nginya twĩkw’e ũtee wa kĩthama kĩna.”
27 Na yĩla ũtukũ wa 14 wavikie o tũendeee kwĩkw’a kũũ na kũũ Ũkanganĩ wa Atilia, ũtukũ katĩ atwai ma meli mambĩĩa kwona kana maĩ vakuvĩ na nthĩ nyũmũ. 28 Kwoou mathima ũliku wa kĩw’ũ na meethĩa nĩ ta vuti 120, * na maendanga mbee na mathima ĩngĩ meethĩa nĩ ta vuti 90. * 29 Na nũndũ maĩ na wia mayona kana nĩtũtonya kũlũma mavianĩ, nĩmatheeisye nanga inya sya ngalĩ ya ĩtina ya meli na mambĩĩa kwenda mũno kũkye. 30 Ĩndĩ yĩla atwai ma meli mambĩĩie kũmantha nzĩa ya kũkĩa maume melinĩ ĩsu, na mambĩĩa kũtheesya kala kasiwa kĩw’ũnĩ mayĩtw’ĩkĩthya kana meenda kũtheesya nanga sya ngalĩ ya mbee ya meli, 31 Vaulo nĩwaneenie na mũnene wa asikalĩ o vamwe na asikalĩ, na amea atĩĩ: “Andũ aa malea kwĩkala melinĩ, mũyĩĩthĩwa mũtonya kũtangĩĩwa.” 32 Nĩvo ĩndĩ asikalĩ asu matilile makanda ma kasiwa kau na maeka kavalũka.
33 Na kũkilye kũkya, Vaulo nĩwamekĩie vinya onthe maye lĩu, akyasya: “Ũmũnthĩ nĩ mũthenya wa 14 o mweteele na mea, na mwĩthĩĩtwe mũteũya lĩu o na vanini. 34 Kwoou nĩngũmwĩsũva mũye lĩu; nũndũ ũu nũũmũtethya, nĩkwĩthĩwa vaiĩ ũsw’ĩĩ wa mũtwe wa ũmwe wenyu o na wĩva ũkaa.” 35 Na ĩtina wa kwasya ũu, oosa mũkate na amũtũngĩa Ngai mũvea mbee woo onthe, na aũtilanga na ambĩĩa kũya. 36 Kwoou onthe meethĩwa na ũkũmbaũ na mambĩĩa kũya lĩu. 37 Na ithyonthe twaĩ andũ 276 melinĩ ĩsu. 38 Na yĩla maĩe mavũna, mekya nganũ ũkanganĩ nĩ kana meli ĩvũthe.
39 Na yĩla kwakyee, mayaamanya nesa nthĩ ĩsu, ĩndĩ moona vandũ ũkanga waumĩtye mũthya ũkalika nthĩ nyũmũ na vaĩ kĩthangathĩ, kwoou mavanga matwae meli ĩsu vau ethĩwa nĩmatonya. 40 Kwoou matila ila nanga na maeka syavalũka ũkanganĩ, na ĩvindanĩ yĩu mathasya makanda ala moovete mĩko ĩla yatũmĩawa kũkomoa meli; na ĩtina wa kwambatya kĩtambaa kya mbee kya meli nĩ kana kĩkwate kĩseve, mathi melekele vandũ vau vaĩ na kĩthangathĩ ũtee wa ũkanga. 41 Yĩla makimie kĩvumbu kya kĩthangathĩ ũkanganĩ meli yatina nthĩ, na ngalĩ ya mbee ya meli yalũma kĩvumbunĩ kĩu weethĩa ndĩthi, ĩndĩ ngalĩ ya ĩtina yambĩĩa kũtũlangwa nĩ itulumo syĩ na vinya. 42 Na asikalĩ moona ũu mavanga kũaa ovwa onthe nĩ kana maikathambĩe makĩe mathi. 43 Ĩndĩ mũnene wa asikalĩ nĩwatw’ĩte kũmũvonokya Vaulo na kwoou amasiĩĩa maikeke ũu mavangĩte. Na eeaĩa ala maĩ matonya kũthambĩa meyĩkye ũkanganĩ mavike nthĩ nyũmũ mbee, 44 na ĩndĩ ala angĩ maimaatĩĩa; amwe matũmĩĩte mbwaũ na ala angĩ ilungu sya meli. Kwoou onthe mavika nesa nthĩ nyũmũ.