Ĩvuku ya Mbee ya Mavinda
17 Yĩla Ndaviti wambĩĩie kwĩkala nyũmbanĩ yake mwene* oou, eeie mwathani Nathani atĩĩ: “Nyie nĩkalaa nyũmbanĩ ya mĩtalakwe* ĩndĩ ĩsandũkũ ya ũtianĩo wa Yeova yĩkalaa itambaanĩ sya ĩeema.” 2 Nathani asũngĩie Ndaviti atĩĩ: “Ĩka kĩndũ o na kĩva kĩla kĩ ngoonĩ yaku, nũndũ Ngai ũla wa w’o e vamwe naku.”
3 Ũtukũ o ũsu, ndeto ya Ngai nĩyookĩie Nathani, na eewa atĩĩ: 4 “Enda ũkatavye mũthũkũmi wakwa Ndaviti, ‘Ũũ nĩwʼo Yeova ũkwasya: “Tue wĩmbakĩa nyũmba nĩkalae vo. 5 Nĩkwĩthĩwa ndyaaĩkala nyũmbanĩ kuma mũthenya ũla naumisye Aisilaeli nthĩ ya Misili kũvika ũmũnthĩ, ĩndĩ nathamaa kuma ĩeemanĩ kũthi ĩeemanĩ yĩngĩ na kuma ĩeemanĩ yĩmwe ya ũthaithi kũthi ĩeemanĩ yĩngĩ ya ũthaithi.* 6 Ĩvinda yonthe yĩla naendanasya na Aisilaeli onthe, yo ve ĩvinda naatavya mũsili o na wĩva katĩ wa asili ma Isilaeli ala nanyuvĩte methĩwe aĩthi ma andũ makwa ũndũ o na ũmwe, ndimea, ‘Mũemete kũmbakĩa nyũmba ya mĩtalakwe* nĩkĩ?ʼ”ʼ
7 “Yu tavya mũthũkũmi wakwa Ndaviti, ‘Ũũ nĩwʼo Yeova wa nguthu ũkwasya: “Nakumisye isesinĩ, ũeke kũĩthya malondu, nĩ kana ũtwʼĩke mũtongoi wa andũ makwa Aisilaeli. 8 Na ngeethĩawa vamwe naku kũndũ kwʼonthe kũla wĩthi, na ngavetanga* amaitha maku onthe maume mbee waku; na ngaũseũvĩsya ĩsyĩtwa ta ya andũ ala anene ma nthĩ. 9 Nganyuva vandũ kwondũ wa andũ makwa Aisilaeli na ndimekalya vo, namo makekala vau na maikathĩnwʼa ĩngĩ; na andũ athũku maikamanyamasya* ĩngĩ o tondũ meekaa tene, 10 kuma mũthenya ũla nanyuvĩie andũ makwa Aisilaeli asili. Na ngakĩlya vinya amaitha maku onthe. O na ĩngĩ, nĩkwĩa, ‘Yeova akakwakĩa nyũmba ya* kĩ-ũsumbĩ.’
11 “‘“Yĩla mĩthenya yaku ĩkathela na ũikwʼa,* ngookĩlya ũsyao waku* ĩtina waku, ũmwe wa ana maku, na ngalũlũmĩĩlya ũsumbĩ wake vyũ. 12 Nĩwe ũkambakĩa nyũmba, na ngalũlũmĩĩlya vyũ kĩvĩla kyake kya ũsumbĩ tene na tene. 13 Ngatwʼĩka ĩthe wake, nake akatwʼĩka mwana wakwa. Ndikavetanga wendo wakwa ũtathelaa vala ũĩ o ũndũ naũvetangie vala ve ũla waĩ mbee waku. 14 Ngatuma aũngama nyũmbanĩ yakwa na ũsumbĩnĩ wakwa tene na tene, na kĩvĩla kyake kya ũsumbĩ kĩkekala tene ne tene.”’”
15 Nathani nĩwatavisye Ndaviti ndeto isu syonthe na woni ũsu wʼonthe.
16 Nĩvo ĩndĩ Mũsumbĩ Ndaviti walikile na ekala nthĩ mbee wa Yeova na asya: “Nyie nĩ ũũ, ame Yeova Ngai? Na nyũmba yakwa nĩ kyaũ nĩ kana ũtwĩke maũndũ maingĩvĩte ũu? 17 Na ndũnona ũu ũtoetye, ame Ngai, nũndũ nĩwasyoka watavya mũthũkũmi waku maũndũ ala mekũendeea kũkwata nyũmba yake kwa ĩvinda yĩasa yũkĩte, na wonete nĩ mũndũ waĩlĩte kũnenevwʼa mũnango,* ame Yeova Ngai. 18 Nĩ ũndũ ũngĩ wĩva mũthũkũmi waku Ndaviti ũtonya kũũtavya ĩũlũ wa ndaĩa ĩla wanenga naku nĩwĩsĩ mũthũkũmi waku nesa vyũ? 19 Ame Yeova, kwondũ wa mũthũkũmi waku na kwosana na ngoo yaku* nĩweeka maũndũ aa onthe manene kwa kũvuanyʼa ũnene waku. 20 Ame Yeova, vai ũngĩ taku, na kũi Ngai eka we; maũndũ onthe ala twĩwʼĩte na matũ maitũ nĩmekũĩkĩĩthya ũu. 21 Na nĩ mbaĩ ĩngĩ yĩva ĩũlũ wa nthĩ ĩilye ta andũ maku Aisilaeli? Ngai ũla wa w’o nĩwaendie na amatangĩĩa matwʼĩke andũ make. Nĩweeseũvĩisye ĩsyĩtwa kwa kwĩka maũndũ manene na ma kũsengyʼa na ma kũkĩwa, yĩla walũngilye mbaĩ syume mbee wa andũ maku, ala watangĩĩie kuma Misili. 22 Nĩwatumie andũ maku Aisilaeli methĩwa andũ maku mwene ĩvinda yonthe; na we, ame Yeova, nĩwatwʼĩkie Ngai woo. 23 Yu, ame Yeova, eka watho ũla waweta ĩũlũ wa mũthũkũmi waku na nyũmba yake wĩanĩae ĩvinda yonthe, na mwa ĩka o ũndũ wathana. 24 Ĩsyĩtwa yaku nĩyĩtũae vo* na nĩyĩnenevwʼe tene na tene, nĩ kana andũ masye, ‘Yeova wa nguthu, Ngai wa Isilaeli, nĩwe Ngai wa Isilaeli,’ na nyũmba ya mũthũkũmi waku Ndaviti nĩlũlũmĩĩlwʼe vyũ mbee waku. 25 Nũndũ we, Ngai wakwa, nĩwavuanĩsya mũthũkũmi waku kĩeleelo kyaku kya kũmwakĩa nyũmba ya* kĩ-ũsumbĩ. Nĩkyo kĩtumi mũthũkũmi waku wĩ na ũkũmbaũ wa kũũvoya mboya ĩĩ. 26 Na yu, ame Yeova, nue Ngai ũla wa w’o, na nĩwatha mũthũkũmi waku maũndũ aa maseo. 27 Kwoou, endeewʼa nĩ kũathima nyũmba ya mũthũkũmi waku, na eka yĩkale tene na tene mbee waku, nũndũ we, ame Yeova, nĩwamĩathima, nayo nĩ mbathime tene na tene.”