Ĩvuku ya Mbee ya Mavinda
29 Yu Mũsumbĩ Ndaviti atavisye ũmbano wʼonthe atĩĩ: “Mwanawa Solomoni, ũla Ngai ũnyuvĩte, nĩ mũnini na nde na ũmanyi,* na wĩa nĩ mwingĩ, nũndũ ĩkalũ yĩĩ* ti ya mũndũ ĩndĩ nĩ ya Yeova Ngai. 2 Na nĩnĩkĩĩte kĩthito kingĩ mũno nũmbanyʼe syĩndũ kwondũ wa nyũmba ya Ngai wakwa, nganengane thaavu wa kũseũvya syĩndũ sya thaavu, vetha wa kũseũvya syĩndũ sya vetha, ũthuku wa kũseũvya syĩndũ sya ũthuku, kyũma* kya kũseũvya syĩndũ sya kyũma, mbwaũ sya kũseũvya syĩndũ sya mbwaũ, mavia ma soamu, na mavia ma mwanya ma kũvangwa na maikwatanwʼa na kĩndũ kya kũmakwatanyʼa, tũvila twanake twa kwanakavya, kĩla mũthemba wa mavia ma thooa mũnene, na mavia maingĩ mũno ma alambasita. 3 O na ĩngĩ, nũndũ nĩnendete nyũmba ya Ngai wakwa, nĩngumya thaavu na vetha ũthwiinĩ wakwa mwene nĩnengane nyũmbanĩ ya Ngai wakwa, o vamwe na syĩndũ syonthe ila nũmbanĩtye kwondũ wa nyũmba ĩsu ntheu, 4 vamwe na talendi 3,000* sya thaavu kuma Ovilu na talendi 7,000 sya vetha mũtheu, itũmĩwe kũvwʼĩka ngũta sya nyũmba, 5 thaavu wa kũseũvya syĩndũ sya thaavu na vetha wa kũseũvya syĩndũ sya vetha, na kwondũ wa wĩa wʼonthe waĩle kũtethwʼa nĩ mavundi. Yu nũũ ũkwĩyumya ũmũnthĩ aetee Yeova mũthĩnzĩo?”
6 Kwoou anene ma nyũmba sya aa-ĩthe, anene ma mbaĩ sya Isilaeli, anene ma makili na ma maana, na anene ma wĩa wa mũsumbĩ meeyumya na ngenda. 7 Na manengane syĩndũ ii kwondũ wa ũthũkũmi wa nyũmba ya Ngai ũla wa w’o: talendi 5,000 sya thaavu, ndaliki 10,000,* talendi 10,000 sya vetha, talendi 18,000 sya ũthuku, na talendi 100,000 sya kyũma.* 8 Mũndũ o na wĩva waĩ na mavia ma thooa mũnene nĩwamanenganie vala vaiawa ũthwii wa nyũmba ya Yeova, ungu wa ũũngamĩi wa Yeielu Mũngelisoni. 9 Andũ nĩmatanĩie mũno kumya mĩvothi ĩsu ya ngenda, nũndũ mamumĩasya Yeova mĩvothi ĩsu ya ngenda na ngoo yonthe, na o nake Mũsumbĩ Ndaviti nĩwatanie mũno.
10 Na ĩndĩ Ndaviti amũtaĩa Yeova mbee wa metho ma ũmbano wʼonthe. Ndaviti aisye atĩĩ: “Taĩwa tene na tene wʼonthe,* ame Yeova Ngai wa Isilaeli ĩthe witũ. 11 Ũnene na vinya na wanake na ũseo mwingĩ na ũtheu mũtisu* nĩ waku, ame Yeova, nĩkwĩthĩwa syĩndũ syonthe ĩtunĩ na ĩũlũ wa nthĩ nĩ syaku. Ũsumbĩ nĩ waku, ame Yeova. We ũla wĩnenevetye ũkethĩwa mũnene ĩũlũ wa syonthe. 12 Ũthwii na ũkumyo syumaa kwaku, na ũsumbĩkaa kĩla kĩndũ, na kwʼokonĩ kwaku ve ũtonyi na vinya, na kwʼoko kwaku no kũnenevye onthe na kũimanenga vinya. 13 Yu ĩndĩ, ame Ngai witũ, nĩtũũkũtũngĩa mũvea na tũitaĩa ĩsyĩtwa yaku ya kwendeesya.
14 “Na yu ĩndĩ, nyie nĩ ũũ na andũ makwa naaũ nĩ kana twĩthĩwe tũtonya kumya mĩvothi ta ĩĩ ya ngenda? Nũndũ syĩndũ syonthe syumaa kwaku, na twakũnenga kĩla kyumĩte kwʼokonĩ kwaku mwene. 15 Nũndũ methonĩ maku, o ta aa-ũmae maitũ onthe, twĩ ekali ma ũeninĩ na andũ mathamĩte makatũa kũndũ kũngĩ. Nĩkwĩthĩwa mĩthenya yitũ ĩũlũ wa nthĩ no ta kyuu; tũyĩthĩawa na wĩkwatyo. 16 Ame Yeova Ngai witũ, ũthwii ũũ wʼonthe tũmbanĩtye tũkwakĩe nyũmba kwondũ wa ĩsyĩtwa yaku ĩtheu wumĩte kwʼokonĩ kwaku, na wʼonthe nĩ waku. 17 Nĩnĩsĩ nesa, ame Ngai wakwa, kana we nũthianaa ngoo na nĩwendeeawʼa nĩ wĩanĩu.* Naumya syĩndũ ii syonthe na ngenda, nĩ na ngoo ĩte na ũkengani, na nĩ mũtanu mũno kwona andũ maku ala me vaa maikumĩsya mĩvothi ya ngenda. 18 Ame Yeova, Ngai wa aa-ũmae maitũ, Avalaamu, Isaka, na Isilaeli, ĩkalasya mawendi na mosũanĩo aa ngoonĩ sya andũ maku tene na tene, na tongoeasya ngoo syoo kũla ũĩ. 19 Na nenga mwanawa Solomoni ngoo ĩlũmanĩtye naku vyũ,* nĩ kana akwatae mĩao yaku, molilikanyʼo maku, na myolooto yaku na ayĩkaa maũndũ aa onthe na ayaka ĩkalũ yĩla* nũmbanĩsye syĩndũ.”
20 Nĩvo ĩndĩ Ndaviti weeie ũmbano wʼonthe atĩĩ: “Yu mũtaĩei Yeova Ngai wenyu.” Na ũmbano wʼonthe wamũtaĩa Yeova Ngai wa aa-ũmae moo na wakumana nginya nthĩ na weevalũkya mbee wa Yeova na mbee wa mũsumbĩ. 21 Na maendeea kũmũthembea Yeova na mũthenya ũla waatĩĩe mamumĩsya Yeova nthembo sya kũvĩvw’a, tũsalũ 1,000, ndũũme 1,000, tũlondu tũũme 1,000, na nthembo syoo sya kũnyuwa; maumisye nthembo mbingĩ mũno kwondũ wa Aisilaeli onthe. 22 Mũthenya ũsu, nĩmaendeeie kũya na kũnywʼa mbee wa Yeova me atanu, na matwʼĩkĩthya Solomoni mwana wa Ndaviti mũsumbĩ ya kelĩ na mamwĩtĩkĩsya mauta mbee wa Yeova ethĩwe mũtongoi woo, na o nake Nzatoki ethĩwe mũthembi. 23 Na Solomoni ekalĩla kĩvĩla kya ũsumbĩ kya Yeova e mũsumbĩ vandũ va Ndaviti ĩthe wake, na aaĩla, na Aisilaeli onthe nĩmamwĩwʼaa. 24 Anene onthe me mbee ũsumbĩnĩ, ngũmbaũ sya kaũ, o vamwe na ana onthe ma Mũsumbĩ Ndaviti nĩmenyivĩisye Mũsumbĩ Solomoni. 25 Na Yeova anenevya Solomoni mũno mbee wa metho ma Aisilaeli onthe na amũnenga ũnene wa kĩ-ũsumbĩ ũtaaĩthĩwa na mũsumbĩ ũngĩ wa Isilaeli ũla wasumbĩkĩte mbee wake.
26 Kwoou Ndaviti mwana wa Yese nĩwasumbĩkie Isilaeli yonthe, 27 na ĩvinda yĩla* wasumbĩkie Isilaeli yaĩ myaka 40. Asumbĩkie e Eviloni myaka 7, na asumbĩka e Yelusalemu myaka 33. 28 Na Ndaviti akwʼa e mũtumĩu nesa, eanĩwe nĩ mĩthenya mingĩ, e mũthwii, na e na nguma; na mwanae Solomoni atwʼĩka mũsumbĩ vandũ vake. 29 Ngewa ya Mũsumbĩ Ndaviti, kuma mwambĩĩo nginya mũthya, ĩandĩkĩtwe ndetonĩ sya Samũeli ũla mwoni, mwathani Nathani, na Ngati ũla mwoni, 30 vamwe na ũsumbĩ wake wʼonthe, ũnene wake, na maũndũ ala meekĩkie ĩvindanĩ yake na ya Isilaeli na mosumbĩnĩ onthe ala mamũthyũlũlũkĩte.