Motalo
23 Na ĩndĩ Mbalaamu amwĩa Mbalaki: “Aka ithembeo mũonza vaa, na ũinzeũvĩsya nzaũ mũonza na ndũũme mũonza.” 2 Na vau kwa vau Mbalaki eeka o tondũ Mbalaamu wamwĩie. Na Mbalaki e na Mbalaamu mathemba nzaũ ĩmwe na ndũũme ĩmwe ĩũlũ wa kĩla kĩmwe kya ithembeo isu. 3 Nĩvo ĩndĩ Mbalaamu weeie Mbalaki: “Ĩkala vaa ũtee wa nthembo yaku ya kũvĩvwʼa, nakwa nĩngũthi. Noĩthwa Yeova akaneena nakwa. Na kyonthe kĩla ũkũmbuanĩsya, nĩkyo ngũũtavya.” Na kwoou athi kalĩmanĩ kaĩ kathei.
4 Na ĩndĩ Ngai aneena na Mbalaamu, na Mbalaamu amwĩa: “Nĩnĩseũvisye ithembeo mũonza iatĩanĩe, na nathemba nzaũ ĩmwe na ndũũme ĩmwe ĩũlũ wa kĩla kĩmwe kya ithembeo isu.” 5 Na Yeova eekĩa ndeto ii kanywʼanĩ wa Mbalaamu: “Syoka vala ve Mbalaki, na ũũ nĩwʼo ũũmũtavya.” 6 Na kwoou asyoka na eethĩa Mbalaki e vamwe na anene onthe me mbee ũsumbĩnĩ wa Moavi maũngamĩte ũtee wa nthembo yake ya kũvĩvwʼa. 7 Na ĩndĩ aneena na nthimo, ayasya:
“Mbalaki mũsumbĩ wa Moavi nũmbumĩtye Alamu,
Kuma iĩmanĩ sya wumĩlonĩ wa sua:
‘Ũka ũumanĩe Yakovo kwondũ wakwa.
Ĩĩ, ũka ũkaĩe ũseo wa Isilaeli.’
8 Ndonya ata kũumanĩa ala Ngai ũtaumanĩĩte?
Na ndonya ata kũmatwʼa athũku ala Yeova ũtamatwʼĩte athũku?
9 Kuma mavianĩ ĩũlũ nĩnĩmene,
Na kuma iĩmanĩ nĩnĩmene.
Nĩ mbaĩ ĩtwĩe vau yĩ yoka;
Mayĩtalanasya vamwe na mbaĩ ila ingĩ.
10 Nũũ ũtonya kũtala kĩtoo kya Yakovo
Kana nũũ wĩthĩwa atonya kũtala kĩlungu kya kana kya Isilaeli?
Eka nĩkwʼe* ta mũndũ mũlũngalu,
Na eka mũminũkĩlyo wakwa wĩthĩwe ta woo.”
11 Na ĩndĩ Mbalaki amwĩa Mbalaamu: “Yu wambĩka ata? Ngũetie nĩ kana ũumanĩe amaitha makwa, na yu vandũ va ũu, weeka kũmaathima.” 12 Nake amũsũngĩa: “Yo nyie ndyaĩle o kũneena kĩla Yeova weekĩa kanywʼanĩ wakwa?”
13 Na Mbalaki amwĩa: “Nĩngũkwĩsũva tũthi vandũ vangĩ ũkwĩthĩwa ũtonya kũmona. Wĩona o amwe moo; ndwĩmona onthe. Na ĩndĩ twĩ vau maumanĩe kwondũ wakwa.” 14 Na kwoou ambata nake nginya kĩsesinĩ kya Nzovimu, kĩla kĩ kĩsionĩ kya Visika, na aaka ithembeo mũonza na athemba nzaũ ĩmwe na ndũũme ĩmwe ĩũlũ wa kĩla kĩmwe kya ithembeo isu. 15 Kwoou Mbalaamu amwĩa Mbalaki: “Ĩkala vaa ũtee wa nthembo yaku ya kũvĩvwʼa nakwa nĩngũthi vaya nĩneene na Ngai.” 16 Na Yeova aneena na Mbalaamu na eekĩa ndeto ĩĩ kanywʼanĩ wake: “Syoka vala ve Mbalaki, na ũũ nĩwʼo ũũmũtavya.” 17 Na ĩndĩ Mbalaamu asyoka vala ve Mbalaki na amwĩthĩa eteele ũtee wa nthembo yake ya kũvĩvwʼa, e vamwe na anene me mbee ũsumbĩnĩ wa Moavi. Na Mbalaki amũkũlya: “Yeova asya ata?” 18 Na ĩndĩ aneena na nthimo, ayasya:
“Ũkĩla, Mbalaki, na ũitea kũtũ.
Mbĩthukĩĩsye, we mwana wa Nzivoli.
19 Ngai ti mũndũ atĩ aneene ũvũngũ,
Kana mwana wa mũndũ ũla ũvĩndũaa mosũanĩo make.*
Aweta ũndũ, we ndawĩkaa?
Aneena, we ndeanĩasya?
20 Sisya! nĩnosetwe nĩathime;
Yu Ngai nũathimĩte, na nditonya kũvĩndũa ũndũ ũsu.
21 Ndomĩĩasya mavinya ma syama sya ũwe ĩũlũ wa Yakovo,
Na ndetĩkĩlasya ũthũku ũkwate Isilaeli.
Yeova Ngai wake e vamwe namo,
Na nũtaĩawa na wasya mũnene ta we mũsumbĩ katĩ woo.
22 Ngai nũmaumĩtye Misili.
Ailye ta mbya sya nzaũ ya kĩthekanĩ sya kũmaseseea.
23 Nũndũ vai mũndũ ũtonya kwathana maũndũ mathũku ĩũlũ wa Yakovo,
Na vai kwaũsya kũtonya Isilaeli.
Ĩvindanĩ yĩĩ ũndũ ũũ nĩwʼo ũtonya kũwetwa ĩũlũ wa Yakovo na Isilaeli:
‘Sisya kĩla Ngai wĩkĩte!’
24 Ĩĩ nĩ mbaĩ ĩkũkĩla ta mũnyambũ,
Na o ta mũnyambũ, ĩkeeyũkĩlya.
Ndĩkathũmũa nginya ĩye nzyĩma yayo
Na kũnywʼa nthakame ya ala yũwaĩte.”
25 Nĩvo ĩndĩ Mbalaki weeie Mbalaamu: “Ethĩwa ndũtonya kũmaumanĩa, o na kũmaathima ndwaĩle kũmaathima.” 26 Na Mbalaamu amwĩa Mbalaki: “Nyie ndineekwĩa, ‘Nĩĩka kyonthe kĩla Yeova ũkũweta’?”
27 Na ĩndĩ Mbalaki amwĩa Mbalaamu: “Nĩngũkwĩsũva ũmbĩtĩkĩlye ngũtwae vandũ vangĩ. Noĩthwa Ngai ũla wa wʼo atonya kũkwĩtĩkĩlya ũumanĩe andũ aa kwondũ wakwa wĩ vau.” 28 Na kwoou Mbalaki amwambatya Mbalaamu kĩsionĩ kĩ mũthyanĩ wa Veoli, kĩla kĩsianĩtye na Yesimoni.* 29 Na ĩndĩ Mbalaamu amwĩa Mbalaki: “Aka ithembeo mũonza vaa, na ũinzeũvĩsya nzaũ mũonza na ndũũme mũonza.” 30 Na kwoou Mbalaki eeka o tondũ Mbalaamu waisye, na athemba nzaũ ĩmwe na ndũũme ĩmwe ĩũlũ wa kĩla kĩmwe kya ithembeo isu.