Meko ma Atũmwa
11 Na atũmwa na ana-a-asa ala maĩ Yutia nĩmeewie kana andũ ma mbaĩ ingĩ o namo nĩmetĩkĩlile ndeto ya Ngai. 2 Kwoou, yĩla Vetelo wambatie Yelusaleme, ala makwete mbau nzaĩko nĩmambĩĩie kũkananĩa nake, * 3 makyasya: “Ũendie nyũmbanĩ ya andũ mate aĩke na waya vamwe namo.” 4 Yĩla Vetelo weewie ũu amaelesya ũndũ ũsu nesa, akyasya:
5 “Naĩ ndũanĩ ya Yova ngĩvoya, na noona woni, kĩndũ kĩilye suka mũnene wa katane kĩtheeetw’e nthĩ kuma ĩtunĩ kĩkwetwe mĩthya yakyo ĩna, na kyooka vala naĩ. 6 Na yĩla nakĩsyaisye nesa, noona nyamũ ila syĩ maaũ ana sya nthĩ, nyamũ sya kĩthekanĩ, tũsamũ tũla tũtambũkaa, * na nyũnyi sya yayaya. 7 O na nĩneewie wasya ũimbĩa: ‘Ũkĩla Vetelo, na ũithĩnza ũye!’ 8 Ĩndĩ nasya: ‘Aiee, Mwĩaĩi, nĩkwĩthĩwa vai kĩndũ o na kĩmwe kĩvuku kana kĩte kĩtheu kyaalika kanyw’anĩ wakwa.’ 9 Na ya kelĩ, wasya ũsu kuma ĩtunĩ wanzũngĩa, ũkyasya: ‘Eka kũsyĩta mbuku syĩndũ ila Ngai ũtheetye.’ 10 Wasya ũsu nĩweew’ĩkie ya katatũ, na syĩndũ isu syonthe syambatw’a ĩtunĩ. 11 O na ĩngĩ, ĩvindanĩ yĩu aũme atatũ nĩmaũngamĩte vakuvĩ na nyũmba ĩla twekalaa, matũmĩtwe kuma Kaisalea. 12 Na ĩndĩ veva mũtheu wambĩa nĩendany’e namo, na ndikethĩwe na nzika nongi. Ĩndĩ ana-a-asa aa thanthatũ o namo maendany’a nakwa, na twalika nyũmba kwa mũndũ ũsu.
13 “Nĩwatũeleisye ũndũ woonie mũlaĩka aũngama nyũmba kwake, na amwĩa: ‘Tũma andũ Yova makete Simoni ũla ĩsyĩtwa yĩngĩ wĩtawa Vetelo, 14 na nũkũũtavya maũndũ matonya kũtuma we ũtangĩĩwa o vamwe na andũ onthe ma nyũmba yaku.’ 15 Ĩndĩ yĩla nambĩĩie kũneena, veva mũtheu wamatheeea o tondũ watũtheeete mwambĩlĩlyonĩ. 16 Nĩvo ĩndĩ nalilikanile ndeto sya Mwĩaĩi, ũndũ waasya: ‘Yoana avatisaa na kĩw’ũ, ĩndĩ inyw’ĩ mũkavatiswa na veva mũtheu.’ 17 Ethĩwa Ngai nĩwamanengie asu mũthĩnzĩo o ũla watũnengie ithyĩ ala twaĩkĩĩie Mwĩaĩi Yesũ Klĩsto, nyie ninyie ũũ nĩmũsiĩĩe Ngai?”
18 Yĩla meewie maũndũ asu nĩmaekie kũleana nake na mamũkumya Ngai, makyasya: “Kwoou, Ngai nũnengete andũ ma mbaĩ ingĩ mwanya wa kwĩlila nĩ kana makwate thayũ.”
19 Ala manyaĩĩkĩtw’e nĩ thĩna ũla waumĩlile nũndũ wa Sitivini nĩmaendie nginya Voenike, Kuvolo, na Andiokia, na matavasya Ayuti me oka ĩla ndeto. 20 Ĩndĩ aũme amwe ala maumĩte Kuvolo na Kulene mooka Andiokia na mambĩĩa kũneena na andũ ala maneenaa Kĩkiliki, maimatavya ũvoo mũseo ĩũlũ wa Mwĩaĩi Yesũ. 21 Na kw’oko kwa Yeova kwaĩ vamwe namo, na aingĩ matw’ĩka etĩkĩli na mamũatĩĩa Mwĩaĩi.
22 Na ũvoo ĩũlũ woo nĩwavikĩie kĩkundi kĩla kyaĩ Yelusaleme, na matũma Valanava athi nginya Andiokia. 23 Yĩla wavikie na oona ũseo mwingĩ wa Ngai, nĩwatanie mũno na ambĩĩa kũmathangaasya onthe maendeee kũmũthũkũma Mwĩaĩi na ngoo yonthe; 24 nĩkwĩthĩwa aĩ mũndũ mũseo wusũĩtwe nĩ veva mũtheu na mũĩkĩĩo. Na andũ aingĩ mamũĩkĩĩa Mwĩaĩi. 25 Kwoou athi Taliso na amũmantha Saulo kĩla vandũ. 26 Na ĩtina wa kũmwona amũete Andiokia. Na kwa ĩvinda ya mwaka mũima nĩmoombanaa na kĩkundi na kũmanyĩsya andũ aingĩ, na kũu Andiokia nĩkw’o amanyĩw’a, matongoew’e nĩ Ngai, mambĩĩie kwĩtwa Aklĩsto.
27 Na mĩthenyanĩ ĩsu athani nĩmookie Andiokia maumĩte Yelusaleme. 28 Ũmwe woo weetawa Akavo nĩwaũngamie na athana kwĩsĩla veva mũtheu kana yũa ĩnene yaĩ vakuvĩ kũkwata nthĩ yonthe, na kwa w’o nĩkweethĩiwe yũa ĩnene ĩvindanĩ ya Kilautiosi. 29 Kwoou amanyĩw’a matw’a, kwosana na ũtonyi wa kĩla ũmwe, maumye ũtethyo * kwondũ wa ana-a-asa ala mekalaa Yutia; 30 na nĩmeekie ũu, na matũma Valanava na Saulo matwae ũtethyo ũsu kwa atũmĩa.