Meko ma Atũmwa
18 Ĩtina wa maũndũ asu nĩwaumie Athene na athi Kolintho. 2 Na kũu nĩweethĩie Mũyuti weetawa Akwila, ũla wasyaĩwe Vondo, nake aĩ anavika kuma Italia e na Vilisila mũka wake, nũndũ Kilautiosi nĩweeaĩte Ayuti onthe maume Lomi. Kwoou Vaulo athi kwoo, 3 na nũndũ matethasya wĩa ũmwe, ekala kwoo na athũkũma vamwe namo, nĩkwĩthĩwa maĩ aseũvya ma maeema o take. 4 Na nĩwaumasya ũvoo * ĩsinakokenĩ kĩla mũthenya wa savato nĩ kana amaĩkĩĩthye Ayuti na Akiliki kĩla waneenaa.
5 Yĩla Sila na Timotheo matheeie kuma Masetonia, Vaulo nĩwambĩĩie kũtavany’a ĩla ndeto na kĩthito mũno, aimaumĩsya Ayuti ũkũsĩ nĩ kana aĩkĩĩthye kana Yesũ nĩwe Klĩsto. 6 Ĩndĩ yĩla maendeeie kũmũvĩnga na kũmũumanga, avuunza ngũa syake, na amea: “Nthakame yenyu nĩyĩthĩwe ĩũlũ wa mĩtwe yenyu. Nyie nĩ mũtheu. Kuma yu na kũendeea nĩthi kwa andũ ma mbaĩ ingĩ.” 7 Kwoou auma vau na athi kwa mũndũ weetawa Tito Yusito, mũthaithi wa Ngai, ũla nyũmba yake yakwatene na ĩsinakoke. 8 Ĩndĩ Kilisivo, mũũngamĩi wa ĩsinakoke, amũĩkĩĩa Mwĩaĩi, vamwe na andũ onthe ma nyũmba yake. Na Akolintho aingĩ ala meewie mambĩĩa kũĩkĩĩa na kũvatiswa. 9 Na Mwĩaĩi aneena na Vaulo ũtukũ woninĩ, na amwĩa: “Ndũkakĩe, ĩndĩ endeea kũneena na ndũkakilye, 10 nũndũ nĩ vamwe naku na vai mũndũ ũkakwĩka ũndũ ũtonya ũkũũmĩsya; nĩkwĩthĩwa nĩ na andũ aingĩ ndũanĩ ĩno.” 11 Kwoou ekala kũu mwaka ũmwe na nusu akĩmamanyĩsya ndeto ya Ngai.
12 Na yĩla Kalio waĩ mũnene wa Akaia, Ayuti nĩmamũkĩlĩle Vaulo na ngoo ĩmwe na mamũtwaa mbee wa kĩvĩla kya sila, 13 makyasya: “Mũndũ ũũ emanyĩsya andũ mamũthaithe Ngai kwa nzĩa ĩte kwosana na mĩao.” 14 Ĩndĩ Vaulo akilye kũneena, Kalio amea Ayuti atĩĩ: “Inyw’ĩ Ayuti, ta kethĩwa kwa w’o mũndũ ũũ nĩwĩkĩte ĩvĩtyo kana ũndũ mũthũku, nĩthĩwa nĩ na kĩtumi kya kũmwĩthukĩĩsya na wũmĩĩsyo. 15 Ĩndĩ ethĩwa nĩ ngananĩo ĩũlũ wa ndeto na masyĩtwa na ĩũlũ wa mĩao yenyu, inyw’ĩ ene nĩmwaĩle kũsisya maũndũ asu. Nyie ndikwenda kwĩthĩwa mũsili wa maũndũ asu.” 16 Na amina kũneena ũu amakuthũa mauma mbee wa kĩvĩla kya sila. 17 Kwoou mamũkwata Sosithene mũũngamĩi wa ĩsinakoke na mambĩĩa kũmũvũĩa vau mbee wa kĩvĩla kya sila. Ĩndĩ Kalio ndaatĩanĩa na maũndũ asu.
18 Ĩndĩ ĩtina wa kwĩkala kũu mĩthenya ĩngĩ mingĩ, Vaulo nĩwataanĩisye na ana-a-asa na alika melinĩ athi Silia e vamwe na Vilisila na Akwila. Na e Kengelea nĩweenziwe nzw’ĩĩ syake nũndũ nĩweeyĩavĩte. 19 Na mavika Eveso nĩwamatiie vau; ĩndĩ we alika ĩsinakokenĩ na asũanĩa na Ayuti. 20 O na kau nĩmaendeeie kũmwĩsũva ekalange namo, ndaaĩtĩkĩla, 21 vandũ va ũu nĩwataanĩisye namo, na amea atĩĩ: “Ngasyoka ĩngĩ kwenyu ethĩwa nĩ kwenda kwa Yeova.” Na ĩndĩ alika melinĩ auma Eveso 22 atheea Kaisalea. Na ambata Yelusaleme akethya kĩkundi na ĩndĩ atheea Andiokia.
23 Ĩtina wa kwĩkala kũu ĩvinda yĩana ũna, nĩwaumie kw’o na athi kũndũ kwingĩ kĩsionĩ kya Kalatia na Velikia aimekĩa vinya amanyĩw’a onthe.
24 Na Mũyuti ũmwe weetawa Avolo, ũla wasyaĩwe Alekisandalia, nĩwavikie Eveso; aĩ mũneeni mũseo na aĩ na ũmanyi mwingĩ wa Maandĩko. 25 Mũndũ ũsu nĩwamanyĩĩtw’e nzĩa ya Yeova, na athangaaĩtw’e nĩ veva, nĩwaneenaa na nĩwamanyĩasya nesa ĩũlũ wa Yesũ, ĩndĩ eesĩ ũvatiso wa Yoana w’oka. 26 Na nĩwambĩĩie kũneena na ũkũmbaũ ĩsinakokenĩ, na yĩla Vilisila na Akwila mamwĩwie, mamwosa na mamũelesya nesa nzĩa ya Ngai. 27 O na ĩngĩ, nĩkwĩthĩwa nĩwendaa kũinga ũkanga athi Akaia, ana-a-asa nĩmamaandĩkĩie amanyĩw’a na mamea mamũthokye nesa. Kwoou yĩla wavikie kũu, nĩwamatetheeisye ala kwĩsĩla ũseo mwingĩ wa Ngai matw’ĩkĩte etĩkĩli; 28 nũndũ nĩwoonanasya kwa kĩthito kingĩ mbee wa andũ kana Ayuti maĩ na mavĩtyo, na nĩwamonasya kwĩsĩla Maandĩko kana Yesũ nĩwe Klĩsto.