Meko ma Atũmwa
15 Na aũme amwe nĩmatheeie kuma Yutia mooka Andiokia na mambĩĩa kũmanyĩsya ana-a-asa, makyasya: “Mwalea kwaĩkwa kwosana na kĩthĩo kya Mose, mũitonya kũtangĩĩwa.” 2 Ĩndĩ ĩtina wa Vaulo na Valanava kũkananĩa mũno na aũme asu na kũlea kwĩw’ana namo, nĩveekiwe mũvango nĩ kana Vaulo, Valanava, na andũ angĩ mambate Yelusaleme kũla kwĩ atũmwa na atumĩa makamakũlye ĩũlũ wa ũndũ ũsu. *
3 Kwoou ĩtina wa kumaaw’a nĩ kĩkundi, nĩmaendie mesĩla Voenike na Samalia, na nĩmaeleasya nesa ũndũ andũ ma mbaĩ ingĩ maĩ manaalyũla mũĩkĩĩo na ũndũ ũsu nĩwamatanĩthasya mũno ana-a-asa onthe. 4 Na yĩla mavikie Yelusaleme, nĩmathokiw’e nesa nĩ kĩkundi na atũmwa vamwe na atumĩa, namo mamaelesya maũndũ maingĩ ala Ngai weekĩte kwĩsĩla kwoo. 5 Ĩndĩ amwe ala maĩ ma kĩkundi kya ndĩni ya Avalisi, ala maĩ manatw’ĩka etĩkĩli, mookĩla ivĩlanĩ syoo, na masya: “No nginya maĩkwe na maitavw’a maatĩĩe Mĩao ya Mose.”
6 Kwoou atũmwa na atumĩa moombana vamwe nĩ kana masũanĩe ũndũ ũsu. 7 Ĩtina wa kũũneenea kwa ũito, * Vetelo nĩwookĩlile, na amea: “Ana-a-asa, nĩmwĩsĩ kana kuma tene nĩnanyuviwe nĩ Ngai kuma katĩ wenyu nĩ kana kwĩsĩla kanyw’a wakwa andũ ma mbaĩ ingĩ mew’e ndeto ya ũvoo mũseo na maiĩkĩĩa. 8 Na nũndũ Ngai nĩwĩthĩawa esĩ kĩla kĩ ngoonĩ, nĩwaumisye ũkũsĩ kwa kũmanenga veva mũtheu, o ũndũ watũnengie ithyĩ. 9 Na ndaaĩkĩa kĩvathũkany’o katĩ witũ namo, ĩndĩ nĩwamatheisye ngoo nũndũ wa mũĩkĩĩo woo. 10 Kwoou nĩkĩ mũũmũtata Ngai kwa kũmaĩkya amanyĩw’a aa ĩsoki yĩla aa-ũmae maitũ, o naitũ, tũtaĩ tũtonya kũkua? 11 Ĩndĩ yu twĩ na mũĩkĩĩo kana tũtangĩĩawa kwĩsĩla ũseo mwingĩ wa Mwĩaĩi Yesũ o ũndũ ũmwe namo.”
12 Yĩla waneenie ũu, ĩkomano yonthe yavindya, na yambĩĩa kwĩthukĩĩsya Valanava na Vaulo mayĩelesya syama na maũndũ maingĩ ma ũsengy’o ala Ngai weekĩte andũnĩ ma mbaĩ ingĩ kwĩsĩla vala maĩ. 13 Mamina kũneena, Yakovo nĩwaisye atĩĩ: “Ana-a-asa, mbĩthukĩĩsyei. 14 Simeoni * nĩwaelesya nesa ũndũ kwa ĩvinda ya mbee Ngai wametĩkĩlile andũ ma mbaĩ ingĩ nĩ kana kuma katĩ woo anyuve andũ kwondũ wa ĩsyĩtwa yake. 15 Na ũndũ ũsu nĩwosanĩte na ndeto ila iandĩkĩtwe Mavukunĩ ma Athani, ala maĩtye: 16 ‘Ĩtina wa maũndũ asu ngasyoka na ngookĩlya ĩngĩ ĩeema * ya Ndaviti yĩla yavalũkile; ngayĩseũvya kũla kwanangĩku na ndiyĩtũngĩĩa ũndũ yailye, 17 nĩ kana andũ ala metiala mamũmanthe Yeova na kĩthito, me na andũ ma mbaĩ syonthe, andũ ala metanĩaw’a na ĩsyĩtwa yakwa, easya ũu Yeova, ũla ũkwĩka maũndũ aa, 18 ala meesĩkĩe kuma tene.’ 19 Kwoou, kwa woni * wakwa, tũikamathĩny’e andũ ma mbaĩ ingĩ ala matw’ĩte kũmũthũkũma Ngai, 20 ĩndĩ tũmaandĩkĩe mevathane na syĩndũ ila ivukĩtw’e nĩ mĩvw’anano, na mayĩvathana na ũlaalai, * na nyamũ ila sitĩtwe, * na nthakame. 21 Nũndũ kuma tene andũ nĩmethĩĩtwe maitavany’a ndeto sya Mose kĩla ndũa, nĩkwĩthĩwa nĩmasomaa ndeto syake na wasya mũnene masinakokenĩ kĩla mũthenya wa savato.”
22 Na ĩndĩ atũmwa na atumĩa, vamwe na kĩkundi kyonthe matw’a kũnyuva aũme amwe katĩ woo, na maimatũma Andiokia vamwe na Vaulo na Valanava; na kwoou matũma Yutasi ũla wĩtawa Valisava na Sila, aũme ala matongoetye katĩ wa ana-a-asa. 23 Na maandĩka valũa ũũ na matũma aũme asu maũtwae:
“Ithyĩ ana-a-asa menyu, atũmwa na atumĩa, kwa ana-a-asa ma mbaĩ ingĩ ala me Andiokia, Silia, na Silisia: Nĩtwamũkethya! 24 Nĩtwĩw’ĩte kana amwe kuma katĩ witũ nĩmamũthĩnĩtye na ndeto ila maneenete, mayenda kwananga mũĩkĩĩo wenyu, o na kau tũyaameaĩa ũndũ o na ũmwe, 25 kwoou, nĩtwĩtĩkĩlanile ithyonthe tũnyuve aũme amwe na tũimatũma kwenyu vamwe na endwa maitũ Valanava na Vaulo, 26 aũme meyumĩtye vyũ kwondũ wa ĩsyĩtwa ya Mwĩaĩi waitũ Yesũ Klĩsto. 27 Kwoou nĩtwatũma Yutasi na Sila, nĩ kana o namo mamũelesye maũndũ o asu na kanyw’a. 28 Nũndũ veva mũtheu o naitũ nĩtwonie kana nĩ ũseo tũikamwongeleele mũio ũngĩ ate o maũndũ aa ma vata: 29 mwĩvathane na syĩndũ ila ithembewe mĩvw’anano, mwĩvathane na nthakame na nyamũ ila sitĩtwe, * na mũyĩvathana na ũlaalai. * Mweevathana vyũ na maũndũ asu, maũndũ menyu makeethĩwa me maseo. Twĩmwendea ũseo!”
30 Na aũme asu mauma vau, nĩmatheeie Andiokia na moombany’a amanyĩw’a onthe na mamanenga ũla valũa. 31 Na maũsoma, nĩmatanie mũno nũndũ valũa ũsu nĩwamathangaaisye. 32 Na nũndũ o namo Yutasi na Sila maĩ athani, nĩmamaumĩisye ana-a-asa maũvoo ma kũmathangaasya na kũmekĩa vinya. 33 Ĩtina wa kwĩkala kũu ĩvinda yĩana ũndũ mũna, ana-a-asa nĩmamaekie masyoke na mũuo kwa ala mamatũmĩte. 34* —— 35 Ĩndĩ Vaulo na Valanava mekala Andiokia maimanyĩsya na kũtavany’a ũvoo mũseo wa ndeto ya Yeova, me vamwe na angĩ aingĩ.
36 Ĩtina wa mĩthenya yĩana ũna, Vaulo nĩwamwĩie Valanava atĩĩ: “Yu eka tũsyoke ndũanĩ syonthe kũla twatavanisye ndeto ya Yeova, tũkasisye ũndũ ana-a-asa maendeee.” 37 Valanava nĩwatw’ĩte vyũ maendany’e na Yoana, ũla wĩtawa Maliko. 38 Ĩndĩ Vaulo ndendaa maendany’e nake nũndũ nĩwamatiie yĩla maĩ Vambilia na ndaathi namo wĩanĩ wa kũtavany’a. 39 Na ĩndĩ veethĩwa ĩteta ĩvyũ katĩ woo, na mataanĩsya; na Valanava oosa Maliko na malika melinĩ mathi Kuvolo. 40 Na ĩtina wa ana-a-asa kũmũnengane Vaulo ũseonĩ mwingĩ wa Yeova, Vaulo amũnyuva Sila na mathi. 41 Na athi esĩla Silia na Silisia, ayĩkĩa ikundi vinya.