Mwambĩlĩĩlyo
9 Na Ngai aathima Noa na ana make, aimea: “Syaanai mwingĩve, na mũyusũsya nthĩ. 2 Na syũmbe syonthe ila syĩ thayũ ĩũlũ wa nthĩ na syũmbe syonthe sya matunĩ ila iũlũkaa, na kyonthe kĩla kĩendaa ĩũlũ wa nthĩ na makũyũ onthe ma ũkanganĩ, ikamũkĩaa na kũtelema nũndũ wenyu. Yu nĩsyanenganwe mokonĩ menyu.* 3 Nyamũ syonthe ila iendaa na syĩ thayũ no syĩthĩwe lĩu kwondũ wenyu. O tondũ namũnengie mĩmea ĩla ĩtonya kũĩwa, o nasyo nĩnamũnenga syonthe. 4 Ĩndĩ nyama vamwe na nthakame yayo, nayo nĩ thayũ wayo, mũikaaye nongi. 5 Na eka ũu, ngeetya ũtalo kwondũ wa nthakame yenyu.* Kwondũ wayo, ngeetya ũtalo kuma kwa kĩla kyũmbe kĩ thayũ; na kuma kwa kĩla mũndũ, ngeetya ũtalo kwondũ wa thayũ wa mwana-a-ĩthe. 6 Mũndũ o na wĩva ũla wĩĩtĩkya nthakame ya mũndũ ũngĩ, mũndũ ũngĩ aketĩkya nthakame yake, nũndũ Ngai oombie mũndũ na mũvwʼano wake. 7 Nenyu a venyu, syaanai mwingĩve, mwongeleke, na mũyusũsya nthĩ.”
8 Nĩvo ĩndĩ Ngai waneenie na Noa na ana make na amea: 9 “Yu nĩngũtianĩa ũtianĩo nenyu na ũsyao wenyu ũla ũkoka ĩtina wenyu, 10 na vamwe na syũmbe syonthe syĩ thayũ ila syĩ vamwe nenyu, nyũnyi, nyamũ, na syũmbe syonthe syĩ thayũ ila syĩ ĩũlũ wa nthĩ syĩ vamwe nenyu, syonthe ila syaumaalile ngalawanĩ, syũmbe syonthe ila syĩ thayũ ĩũlũ wa nthĩ. 11 Ĩĩ, nĩngũtianĩa ũtianĩo nenyu: Mĩĩ yonthe ndĩkaanangwa ĩngĩ o na ĩndĩĩ na kĩwʼũ kingĩ, na kũikethĩwa ĩngĩ o na ĩndĩĩ kĩwʼũ kingĩ kya kwananga nthĩ.”
12 Na Ngai ongela kwasya: “Ũũ nĩwʼo ũvano wa ũtianĩo ũla ngũtianĩa nenyu vamwe na syũmbe syonthe ila syĩ thayũ syĩ vamwe nenyu, na nzyawa syonthe ila syũkĩte.” 13 Nĩngwia ũtaathi wakwa matunĩ, na ũkeethĩawa wĩ ũvano wa ũtianĩo ũla wĩ katĩ wakwa na nthĩ. 14 Kĩla ĩvinda naete matu ĩũlũ wa nthĩ, nawʼo ũtaathi ũkaumĩlaa matunĩ. 15 Na vate nzika, ngalilikanaa ũtianĩo ũla natianĩie nenyu na syũmbe syonthe syĩ thayũ sya kĩla mũthemba;* na vai ĩvinda yĩngĩ o na ĩndĩĩ kĩwʼũ kingĩ kĩkananga mĩĩ yonthe. 16 Na ũtaathi ũkaumĩlaa matunĩ, na vate ndĩi, ngawonaa na ndililikana ũtianĩo wa tene na tene ũla wĩ katĩ wa Ngai na syũmbe syonthe syĩ thayũ sya kĩla mũthemba* ila syĩ ĩũlũ wa nthĩ.
17 Na Ngai atũngĩlĩĩla Noa ũndũ ũsu ĩngĩ, aimwĩa: “Ũũ nĩwʼo ũvano wa ũtianĩo ũla ngũtianĩa na mĩĩ yonthe ĩla yĩ ĩũlũ wa nthĩ.”
18 Ana ma Noa ala maumaalile ngalawanĩ maĩ Semu, Amu, na Yavethi. Na ĩtina, Amu nĩwasyaie Kanaanĩ. 19 Asu atatũ nĩmo maĩ ana ma Noa, na nzyawa syonthe ĩũlũ wa nthĩ syaumie kwoo na syanyaĩĩka nthĩ yonthe.
20 Noa nĩwambĩĩie kwĩthĩwa mũĩmi na avanda mũũnda wa mĩsavivũ. 21 Yĩla wanywie mbinyu nĩwamililwe, na aumya ngũa e ĩeemanĩ yake. 22 Amu, ĩthe wa Kanaanĩ, nĩwoonie ĩthe e mũthei na atavya ana-a-inyia make elĩ ala maĩ nza. 23 Nĩvo ĩndĩ Semu na Yavethi moosie ngũa na mamĩkwatĩla ituonĩ syoo na malika ĩeemanĩ masyokete na ĩtina. Na kwoou mavwʼĩka ĩthe woo masyaĩtye ũtee, namo mayaaona ĩthe woo e mũthei.
24 Yĩla Noa wamilũkilwe na aamũka, na amanya kĩla mwana wake ũla mũnini wamwĩkĩte, 25 aisye:
“Naumanĩwe Kanaanĩ.
Na natwʼĩke ngombo ĩla ya nthĩ vyũ katĩ wa ana-a-inyia.”
26 Na asyoka asya:
“Nataĩwe Yeova, Ngai wa Semu,
Na Kanaanĩ natwʼĩke ngombo yake.
27 Ngai nanenevye mwanya wa Yavethi,
Na nĩekalae maeemanĩ ma Semu.
Na Kanaanĩ natwʼĩke ngombo yake o nake.”
28 Ĩtina wa mbua ya kĩwʼũ kingĩ, Noa nĩwaendeeie kwĩkala thayũ myaka 350. 29 Kwoou Noa ekalile thayũ myaka 950, na ĩndĩ akw’a.