Valũa wa Mbee kwa Akolintho

8 Na yu ĩũlũ wa lĩu ũla ũthembewe mĩvw’anano: Nĩtwĩsĩ kana ithyonthe twĩ na ũmanyi. Ũmanyi nũetae ngathĩĩo ĩndĩ wendo nĩwakaa. 2 Ethĩwa mũndũ o na wĩva esũanĩa nĩwĩsĩ ũndũ, ndanamba kũũmanya ũndũ waĩle kwĩthĩwa awĩsĩ. 3 Ĩndĩ ethĩwa mũndũ o na wĩva nũmwendete Ngai, ũsu nĩwĩsĩkĩe nĩwe.

4 Na yu ĩũlũ wa malĩu ala mathembewe mĩvw’anano, nĩtwĩsĩ kana mĩvw’anano ti kĩndũ ĩũlũ wa nthĩ na kana Ngai no ũmwe. 5 Nũndũ o na ethĩwa kwĩ ila syĩtawa ngai, syĩthĩwe syĩ ĩtunĩ kana syĩ kũũ nthĩ, o tondũ kwĩ “ngai” mbingĩ na “eaĩi” aingĩ, 6 ithyĩ twĩ na Ngai ũmwe, ũla nĩwe Asa, na ũla syĩndũ syonthe syumĩte kwake, naitũ twĩ make; na twĩ na Mwĩaĩi ũmwe, Yesũ Klĩsto, ũla kwĩsĩla kwake syĩndũ syonthe syeethĩiwe, o naitũ tweethĩiwe kwĩsĩla kwake.

7 Ĩndĩ ti onthe me na ũmanyi ũsu. Vandũ va ũu, amwe ala mbeenĩ mathaithaa mĩvw’anano, yĩla meũya lĩu mawonaa ta ũthembewe mĩvw’anano, na wasya woo wa ngoo nũvukaa nũndũ nĩ mwonzu. 8 Ĩndĩ lĩu ndwĩsa kũtũthengeanĩsya na Ngai; ti atĩ twĩ athũku twalea kũya, o na twaya ti atĩ nĩw’o twĩthĩawa twĩ aseo. 9 Ĩndĩ endeeai kwĩthĩwa mwĩ metho nĩ kana ũthasyo wenyu wa kwĩnyuvĩa ndũkatw’ĩke kĩndũ kya kũlulutĩkya ala onzu. 10 Nũndũ ethĩwa mũndũ akakwona we wĩ na ũmanyi ũiya lĩu ĩkalũnĩ ya mĩvw’anano, w’o wasya wa ngoo wa mũndũ ũsu mwonzu ndũkamũnenga ũkũmbaũ nginya wĩthĩe no aye lĩu wumĩw’e mĩvw’anano? 11 Kwoou nũndũ wa ũmanyi waku nũkwananga mũndũ ũla mwonzu, nake nĩ mwana-a-asa waku ũla Klĩsto wakwie kwondũ wake. 12 Yĩla mwavĩtĩsya ana-a-asa kwa nzĩa ĩsu na kũũmĩsya wasya woo wa ngoo mwonzu, mwĩthĩawa mũimũvĩtĩsya Klĩsto. 13 Kĩu nĩkyo kĩtumi ethĩwa lĩu nũũtuma mwana-a-asa alulutĩka, ndikaya nyama ĩngĩ ndikese kũtuma mwana-a-asa alulutĩka.