Ĩvuku ya Mbee ya Mavinda
16 Kwoou nĩmalikilye Ĩsandũkũ ya Ngai ũla wa w’o na mayia ĩeemanĩ yĩla Ndaviti wambĩte kwondũ wayo; na maumya nthembo sya kũvĩvw’a na nthembo sya ngwatanĩo mbee wa Ngai ũla wa w’o. 2 Ndaviti amina kumya nthembo sya kũvĩvw’a na nthembo sya ngwatanĩo, nĩwaathimie andũ ĩsyĩtwanĩ ya Yeova. 3 O na ĩngĩ, nĩwaaĩie Aisilaeli onthe, kĩla mũndũũme na mũndũ mũka, mũkate wa kĩlinge, kamũkate ka ndende, na kamũkate ka nzavivũ mbũmĩthye. 4 Ĩtina wa ũu, nĩwanyuvie Alivai amwe mathũkũmae mbee wa Ĩsandũkũ ya Yeova, mamũkumasye* Yeova Ngai wa Isilaeli, mamũtũngĩae mũvea, na maimũtaĩaa. 5 Asavu nĩwe waĩ mũtongoi, na aatĩĩwe nĩ Nzekalia; na Yeieli, Semilamothi, Yeielu, Matithia, Eliavu, Mbenaia, Oveti-etomu, na Yeieli nĩmo maingaa mĩio ya kũinga yĩ na ndii na mĩio ya wathi yĩ na ndii 12;* na Asavu nĩwe wakũnanganasya masaya, 6 namo athembi Mbenaia na Yaanzieli mavuvaa masoo kĩla ĩvinda mbee wa ĩsandũkũ ya ũtianĩo wa Ngai ũla wa w’o.
7 Mũthenya ũsu nĩwʼo Ndaviti watilile ya mbee wathi wa kũtũngĩa Yeova mũvea na eeaĩa Asavu na ana-a-ĩthe mawine, ayasya:
8 “Mũtũngĩei Yeova mũvea, ĩkaĩlei ĩsyĩtwa yake,
Manyĩthyai ngo sya andũ meko make!
10 Ĩkathĩĩei nũndũ wa ĩsyĩtwa yake ĩtheu.
Ekai ngoo sya ala mamũmanthaa Yeova itane.
11 Mũmanthei Yeova na vinya wake.
Manthaai ũthyũ wake* kĩla ĩvinda.
12 Lilikanaai mawĩa ma kũsengy’a ala wĩkĩte,
Syama syake na sila ũla ũtwʼĩte,
13 Inywʼĩ ũsyao wa* Isilaeli mũthũkũmi wake,
Inywʼĩ syana sya Yakovo, andũ make ala ũnyuvĩte.
14 We nĩ Yeova Ngai witũ.
Sila wake wĩ kĩla vandũ ĩũlũ wa nthĩ.
15 Lilikanaai ũtianĩo wake tene na tene,
Watho ũla wawetie,* nginya nzyawa ngili,
16 Ũtianĩo ũla watianĩie na Avalaamu,
Na wĩvĩto ũla weevĩtĩie Isaka,
17 Ũla walũlũmĩĩlye wĩthĩwe mwĩao vala ve Yakovo
Na wĩthĩwe ũtianĩo wa ĩvinda yonthe vala ve Isilaeli,
18 Ayasya, ‘Ngaũnenga nthĩ ya Kanaanĩ
Yĩthĩwe ũtiĩwa waku kwosana na kula.’
19 Yĩu nĩ ĩvinda yĩla mwaĩ o avũthũ,
Ĩĩ, avũthũ mũno, na mwaĩ aeni nthĩ ĩsu.
20 Maendaa kuma mbaĩnĩ ĩmwe kũthi ĩngĩ,
Kuma ũsumbĩnĩ ũmwe kũthi ũsumbĩnĩ ũngĩ.
21 Ndaaĩtĩkĩlya mũndũ o na ũmwe amanyamasye,
Ĩndĩ nĩwakanasya asumbĩ nũndũ woo,
22 Ayasya, ‘Mũikakiite etĩkĩwʼa mauta makwa,
Na mũikeke athani makwa ũndũ o na ũmwe mũthũku.’
23 Mwinĩei Yeova, inywʼĩ nthĩ yonthe!
Tavanyʼai ũtangĩĩo wake mũthenya kũthi ũla ũngĩ!
24 Tavanyʼai ũtheu wake mũtisu katĩ wa mbaĩ,
Mawĩa make ma kũsengyʼa ngonĩ syonthe sya andũ.
25 Nũndũ Yeova nĩ mũnene na aĩle kũtaĩwa kwĩ ala angĩ onthe.
Nĩwe waĩle kũkĩwa na kũnengwa ndaĩa mũno kwĩ ngai ila ingĩ syonthe.
26 Ngai syonthe sya ngo sya andũ nĩ ngai sya mana,
Ĩndĩ Yeova nĩwe woombie matu.
27 Athyũlũlũkĩtwe nĩ ũtheu mũtisu* na ũseo mwingĩ;
Wĩkalonĩ wake vethĩawa na vinya na ũtanu.
28 Nengai Yeova kĩla kĩmwaĩle, inywʼĩ mĩsyĩ ya ngo sya andũ,
Nengai Yeova kĩla kĩmwaĩle nũndũ wa ũtheu wake mũtisu na vinya wake.
29 Nengai Yeova ũkumyo ũla waĩlĩte ĩsyĩtwa yake;
Etei mũthĩnzĩo na mũyũka mbee wake.
Kumanĩai* Yeova mwĩkĩĩte syĩndũ ntheu sya kwĩyanakavya.*
30 Tetemai mwĩ mbee wake, inywʼĩ nthĩ yonthe!
Nthĩ* nĩlũlũmĩĩlwʼe vyũ; ndĩsa kũsongangwʼa.*
31 Matu nĩmatane, na nthĩ nĩyĩthĩwe na ũtanu;
Tavanyʼai katĩ wa i mbaĩ: ‘Yeova nĩwatwʼĩka Mũsumbĩ!’
32 Ũkanga nũtundume na kyonthe kĩla kĩwusũĩte;
Mĩũnda na kyonthe kĩla kĩ nthĩnĩ wayo nĩkĩthĩwe na ũtanu.
33 Ĩvindanĩ o yĩu mĩtĩ ya kĩthekanĩ nĩsĩlĩle na ũtanu mbee wa Yeova,
Nũndũ nĩwũkĩte* kũtwʼĩĩa nthĩ sila.
34 Mũtũngĩei Yeova mũvea, nũndũ nĩ mũseo;
Wendo wake ũtathelaa wĩkalaa tene na tene.
35 Na mũyasya, ‘Tũtangĩĩe, ame Ngai wa ũtangĩĩo witũ,
Tũmbanyʼe na ũitwovosya kuma mbaĩnĩ,
Nĩ kana tũtũngĩe ĩsyĩtwa yaku ĩtheu mũvea
Na tũikũtaĩa twĩ atanu mũno.*
Na andũ onthe masya, “Ameni!”* na mamũtaĩa Yeova.
37 Na ĩndĩ Ndaviti atia Asavu na ana-a-ĩthe vau mbee wa ĩsandũkũ ya ũtianĩo wa Yeova nĩ kana mathũkũmae mavinda onthe mbee wa Ĩsandũkũ yĩu, kwosana na mũvango wa kĩla mũthenya. 38 Oveti-etomu na ana-a-ĩthe 68, na Oveti-etomu, mwana wa Yetuthuni, na Osa maĩ asũvĩi ma mĩvĩa; 39 na mũthembi Nzatoki na athembi ala mathũkũmaa nake meethĩawa mbee wa ĩeema ya ũthaithi ya Yeova vandũnĩ vatũlu kũu Ngiveoni 40 nĩ kana maumĩasye Yeova nthembo sya kũvĩvw’a kĩla ĩvinda kĩthembeonĩ kya nthembo sya kũvĩvwʼa, kwakya na ĩ ya wĩoo, na mayĩkaa kyonthe kĩla kĩandĩkĩtwe Mĩaonĩ ya Yeova ĩla weeĩaĩe Aisilaeli. 41 Maĩ na Emani na Yetuthuni na aũme ala angĩ manyuvĩtwe na masyĩtwa nĩ kana matũngĩae Yeova mũvea, nũndũ “wendo wake ũtathelaa wĩkalaa tene na tene”; 42 na maĩ na Emani na Yetuthuni nĩ kana mavuvae masoo, makũnanganasye masaya, na mĩio ĩla yatũmĩawa kũtaĩa* Ngai ũla wa w’o; na ana ma Yetuthuni meethĩawa mũvĩanĩ. 43 Nĩvo ĩndĩ andũ onthe menũkie, na Ndaviti athi kũathima mũsyĩ wake.