Meko ma Atũmwa
12 Ta ĩvindanĩ o yĩu, Mũsumbĩ Elote nĩwambĩĩie kũthĩny’a andũ amwe kĩkundinĩ. 2 Nĩwamũaie na ũvyũ Yakovo mwana-a-inyia wa Yoana. 3 Yĩla woonie kana ũndũ ũsu nĩwamatanĩthya Ayuti, nĩwamũkwatie Vetelo o nake. (Amũkwatie ĩvinda ya Mboka ya Mũkate Ũte Ĩlawa.) 4 Elote nĩwamũkwatie na amũvingĩa yela nĩ kana amũete mbee wa andũ Vasaka yathela, na kwoou amũnengane kwa ikundi inya sya asikalĩ, ila syaumanĩasya kũmũsunga, na kĩla kĩkundi kyeethĩawa na asikalĩ ana. 5 Na kwoou Vetelo nĩwekalile e mũvingĩe yela, ĩndĩ kĩkundi nĩkyavoyaa Ngai na kĩthito kingĩ kwondũ wake.
6 Na Elote e vakuvĩ kũmũete mbee wa andũ, ũtukũ ũsu Vetelo nĩwakomete katĩ wa asikalĩ elĩ ovetwe na nyololo ilĩ, na vaĩ asungi elĩ maũngamĩte mũomonĩ maisunga yela. 7 Na sisya! Mũlaĩka wa Yeova nĩwaũngamĩte vau, na kyeni kyakena kasũmbanĩ ka yela vala Vetelo waĩ. Na mũlaĩka ũsu amũkũnanga waunĩ na amũamũkya, akĩmwĩa: “Ũkĩla mĩtũkĩ!” Na ila nyololo woovetwe nasyo syauma mokonĩ make syavalũka. 8 Na mũlaĩka amwĩa: “Ĩyũmbany’e na ũyĩkĩa iatũ syaku.” Nake eeka ũu. Nĩvo ĩndĩ mũlaĩka wamwĩie: “Ĩkĩa ngũa yaku ya ĩũlũ, na ũingatĩĩa.” 9 Na aumaala na aendeea kũmũatĩĩa, ĩndĩ ndamanyaa kana kĩla kyaendeee kwĩkĩka kwĩsĩla mũlaĩka ũsu kyaĩ kya w’o. Asũanĩaa ta woonaa woni. 10 Na mathi mavĩtũka asungi ma mbee na ma kelĩ, na yĩla mavikie mũvĩanĩ wa kyũma ũla wesĩlawa yĩla mũndũ ũendete ndũanĩ, mũvĩa ũsu weevingũa. Na mamina kumaala, matheelela nzĩanĩ ĩmwe nene, na vau kwa vau ũla mũlaĩka amũtia. 11 Na yĩla Vetelo wamanyie kĩla kyaendeee, asya: “Yu nĩnamanya vyũ kana Yeova nũtũmie mũlaĩka wake, na ambovosya kuma kw’okonĩ kwa Elote, na kuma maũndũnĩ onthe ala Ayuti mekwonaa ta mekwĩkĩka.”
12 Ĩtina wa kũmanya ũndũ ũsu, Vetelo nĩwaendie nyũmba kwa Meli inyia wa Yoana ũla ĩsyĩtwa yĩngĩ wĩtawa Maliko, na andũ aingĩ nĩmoombanĩte vau maivoya. 13 Yĩla wakũnangie mũomo ũla waĩ mũvĩanĩ, mũthũkũmi mwĩĩtu ũla weetawa Lota nĩwaendie kũsisya nũũ ũkũkũnanga. 14 Na yĩla wamanyie nesa kana wasya ũsu nĩ wa Vetelo, nĩwatanie mũno o na ndaavingũa mũomo, vandũ va ũu, nĩwasembie asyoka nthĩnĩ na amatavya ala moombanĩte kana Vetelo nĩwe wĩ mũomonĩ. 15 Namo mamwĩa: “We wĩ na ndũũka.” Ĩndĩ aendeea kũmatavya na kĩthing’ĩĩsyo kana eneena w’o. Kwoou andũ asu mambĩĩa kwasya: “Nĩ mũlaĩka wake.” 16 Ĩndĩ Vetelo nĩwaendeeie na kũkũnanga. Na yĩla mavingũie mũomo, mamwona na maseng’a mũno. 17 Ĩndĩ Vetelo amony’a na kw’oko mavindye, na amaelesya nesa ũndũ Yeova wamumya yela, na amea: “Tavyai Yakovo na ana-a-asa maũndũ asu.” Na ĩndĩ Vetelo auma vau na athi vandũ vangĩ.
18 Na kwakya, asikalĩ nĩmavũavũanĩte mũno nũndũ mayeesĩ vala Vetelo ũendie. 19 Elote nĩwamũmanthie na kĩthito kingĩ na yĩla waleile kũmwona, akũlya ala asungi makũlyo na eaa mosewe ĩtambya; na auma Yutia athi Kaisalea na ekala kũu matukũ meana ũna.
20 Na Elote nĩwamathatĩe andũ ma Tile na Sitoni. Kwoou mooka kwake me na kĩeleelo kĩmwe, na ĩtina wa kũneena na Vilasito, mũndũ ũla waũngamĩe nyũmba ya mũsumbĩ, makũlya methĩwe na mũuo na mũsumbĩ, nũndũ nthĩ yoo yakwataa lĩu kuma nthĩ ya Mũsumbĩ Elote. 21 Na mũthenya ũmwe ũla watw’ĩtwe, Elote nĩweekĩie ngũa ya kĩ-ũsumbĩ na ekala nthĩ kĩvĩlanĩ kyake kya sila, na ambĩĩa kumĩsya andũ ũvoo. 22 Nĩvo ĩndĩ andũ ala moombanĩte mambĩĩie kũneena na wasya mũnene, makyasya: “Nĩ wasya wa ngai, ti wa mũndũ!” 23 Na vau kwa vau mũlaĩka wa Yeova amũkũna na ũwau, nũndũ ndaamũkumya Ngai, nake aĩwa nĩ iinyũ na akw’a.
24 Ĩndĩ ndeto ya Yeova yaendeea kũnyaĩĩka na andũ aingĩ matw’ĩka etĩkĩli.
25 Na yĩla Valanava na Saulo maminie ũthũkũmi woo wa kũnengane ũtethyo Yelusaleme, nĩmasyokie Andiokia na maendany’a na Yoana, ũla ĩsyĩtwa yĩngĩ wĩtawa Maliko.