Valũa wa Mbee kwa Timotheo

2 Ũndũ wa mbee, nĩngwĩsũvana nĩ kana mboya sya kĩthingʼĩĩsyo, mboya sya kũvoyea angĩ, na mboya sya kũtũnga mũvea ivoyawe kwondũ wa andũ ma kĩla mũthemba, 2 na kwondũ wa asumbĩ na onthe ala me na ũkũmũ, nĩ kana tũendeee kwĩkala kwa ũuu na mũuo o vamwe na kũmũkĩa Ngai vyũ na kwosa maũndũ kwa ũito. 3 Ũndũ ũsu nĩ mũseo na nĩwĩtĩkĩlĩkaa methonĩ ma Mũtangĩĩi waitũ, Ngai, 4 ũla wendaa andũ ma mĩthemba yonthe matangĩĩwe na kũkwata ũmanyi wa wʼo ĩũlũ wa ũla wʼo. 5 Nũndũ kwĩ Ngai ũmwe, na mwĩwʼanĩthya ũmwe katĩ wa Ngai na andũ, nake nĩ mũndũ, Klĩsto Yesũ, 6 ũla weenenganie mwene ethĩwe wovosyo wĩanĩe kwovosya andũ onthe, na ũndũ ũsu nĩwʼo ũkaumĩwʼa ũkũsĩ ĩvinda yawʼo yĩla yaĩlĩte yavika. 7 Na kwondũ wa kumya ũkũsĩ ũsu nĩnanyuviwe nĩthĩwe mũtavanyʼa na mũtũmwa, na nĩneena wʼo ndiũneena ũvũngũ, nanyuviwe nĩmanyĩsye mbaĩ ingĩ ĩũlũ wa mũĩkĩĩo na ĩũlũ wa ũla wʼo.

8 Kwoou nĩenda kĩla vandũ aũme mavoyae mokĩlĩtye moko matheu, mate na ũthatu kana ngananĩo. 9 O ta ũu, aka namo maĩlĩte kwĩyanakavya kwa kwĩkĩa ngũa ila syaĩlĩte, me na ndaĩa na kĩlĩko kĩanĩu, na ti kwa mĩseũvĩlye ya nzwʼĩĩ na thaavu na lũlũ na ngũa sya thooa mũnene, 10 ĩndĩ kwa nzĩa ĩla yaĩlĩte aka ala maasya kana nĩmamũkĩaa Ngai, na ũu nĩ kwasya, methĩwe na meko maseo.

11 Mũndũ mũka nĩ emanyĩsye avindĩtye * na e na wĩnyivyo wʼonthe. 12 Ndiũmwĩtĩkĩlya mũndũ mũka kũmanyĩsya kana kwĩthĩwa na ũkũmũ ĩũlũ wa mũndũũme, ĩndĩ aĩlĩte kwĩkala avindĩtye. * 13 Nũndũ Atamu nĩwe woombiwe mbee, na ĩtina Eva oombwa. 14 O na ĩngĩ, Atamu ndaakengwa, ĩndĩ ũla mũndũ mũka nĩwakengiwe vyũ na alika ĩvĩtyonĩ. 15 Ĩndĩ mũndũ mũka akasũvĩĩka kwĩsĩla kũsyaa syana, ethĩwa nũkũendeea kwĩthĩwa na mũĩkĩĩo na wendo na ũtheu, o vamwe na kĩlĩko kĩanĩu.