Ĩvuku ya Mbee ya Samũeli
21 Ĩtina, Ndaviti nĩwavikie Novu kwa mũthembi Aimeleki. Yĩla Aimeleki wakomanie na Ndaviti nĩwambĩĩie kũtetema, na ĩndĩ amũkũlya atĩĩ: “Nĩkĩ wĩ weka na ndũnokanyʼa na mũndũ?” 2 Ndaviti asũngĩie mũthembi Aimeleki amwĩa atĩĩ: “Mũsumbĩ ambĩaĩe nĩke ũndũ mũna, ĩndĩ ambĩa, ‘Ndũkaeke mũndũ o na ũmwe amanye ũndũ o na wĩva ĩũlũ wa ũndũ ũla naũtũma ũkeke na ĩũlũ wa maũndũ ala nakwĩaĩa wĩke.’ Kwoou navanga na anake makwa tũkomanĩe vandũ vana. 3 Yu ethĩwa wĩ na mĩkate ĩtano, nenge, kana kĩndũ kĩngĩ o na kĩva kĩla ũtonya kwĩthĩwa nakyo.” 4 Ĩndĩ mũthembi ũsu asũngĩie Ndaviti atĩĩ: “Ndi na mũkate ũngĩ eka o ũla mũtheu, ĩndĩ no nĩũnenge anake asu maye ethĩwa nĩmevathanĩte na aka.”* 5 Ndaviti asũngĩie mũthembi ũsu amwĩa: “Vate nzika, nĩtwĩvathanĩte na aka o tondũ twĩthĩĩtwe tũyĩka mavindanĩ mavĩtu yĩla nathi kaũnĩ. Ethĩwa mĩĩ ya anake aa yĩthĩawa yĩ mĩtheu yĩla tũendete maũndũnĩ ala twĩkaa kĩla ĩvinda, mayaĩlĩte kwĩthĩwa me atheu mũnango ũmũnthĩ!” 6 Kwoou mũthembi amũnenga mĩkate mĩtheu, nĩkwĩthĩwa vayaĩ mũkate ũngĩ eka o mĩkate ya wonanyʼo, ĩla yaĩ ĩnavetangwa mbee wa Yeova na vakaiwa mĩkate ĩngĩ myeũ mũthenya ũsu.
7 Yu mũthũkũmi ũmwe wa Saũlo aĩ vau mũthenya ũsu, ovetwe mbee wa Yeova. Aĩ Mũetomu na eetawa Ndoeki, mũnene wa aĩthi ma Saũlo.
8 Nĩvo ĩndĩ Ndaviti weeie Aimeleki: “Wĩ na ĩtumo kana ũvyũ vaa? Ndinakua ũvyũ wakwa kana mĩio yakwa ya kaũ, nũndũ mũsumbĩ eendaa nĩthi vala ũndũmie na mĩtũkĩ.” 9 Mũthembi ũsu eewʼa ũu aisye: “Ũvyũ wa Ngoliathi ũla Mũvilisiti, ũla wooaĩe Mwandanĩ* wa Ela, wĩ vaa, wovetwe na ngũa ĩtina wa evoti. Ethĩwa nũkwenda kũwosa, wose, nũndũ nowʼo wĩ vaa.” Nake Ndaviti asya: “Vai ũngĩ ũilye tawʼo. Nenge.”
10 Mũthenya ũsu, Ndaviti nĩwookĩlile na aendeea kũsemba akĩĩte Saũlo, na mũthya avika kwa Mũsumbĩ Akisi wa Ngathi. 11 Athũkũmi ma Akisi mamwĩie atĩĩ: “We ũũ ti Ndaviti, mũsumbĩ wa nthĩ yake? We ti ũla mainaa ĩũlũ wake yĩla masũngaa, mayasya,
‘Saũlo nĩũaĩte makili make,
Na Ndaviti makũmi make ma makili’?”
12 Ndaviti nĩweekĩie ndeto isu ngoonĩ, na akĩa Mũsumbĩ Akisi wa Ngathi mũno. 13 Kwoou nĩweetwʼĩkĩthisye nde na kĩlĩko kĩseo mbee woo na ambĩĩa kwĩkanyʼa ta mũndũ wĩ na ndũũka e katĩ woo.* Nĩwasolaa mĩomonĩ ya mũvĩa na nĩwaekie ũta wake wĩtĩke kĩngʼeenĩ kyake. 14 Mũthya, Akisi eeie athũkũmi make atĩĩ: “Mũyene kana mũndũ ũũ e na ndũũka! Mwamũete vaa nĩkĩ? 15 Yo nĩ na vata wa andũ me na ndũũka nĩ kana mũndũ ũũ wĩ na ndũũka oke mbee wakwa? Mũndũ ũũ nĩwaĩlĩte kũlika nyũmbanĩ yakwa?”