Ĩvuku ya Mbee ya Samũeli
16 Mũthya, Yeova eeie Samũeli atĩĩ: “Wĩendeea kũmetea Saũlo nginya ĩndĩĩ nũndũ nĩnĩmũleete ndakethĩwe mũsumbĩ ĩũlũ wa Isilaeli? Usũsya ũvya waku mauta na ũithi. Nĩngũũtũma kwa Yese, ũla Mũmbethileemu, nĩkwĩthĩwa nĩnĩnyuvĩe ũmwe wa ana make ethĩwe mũsumbĩ.” 2 Ĩndĩ Samũeli amwĩa atĩĩ: “Ndonya kũthi ata? Yĩla Saũlo ũkwĩwʼa ĩũlũ wa ũndũ ũsu, nũkũmbũaa.” Nake Yeova amũsũngĩa amwĩa: “Osa moi* ũthi nayo na ũyasya, ‘Nooka kumĩsya Yeova nthembo.’ 3 Mũthokye Yese nthembonĩ ĩsu; na ĩndĩ nĩngũũmanyĩthya kĩla waĩlĩte kwĩka. No nginya wĩtĩkĩsye mauta kwondũ wakwa ũla ngũnyuva.”
4 Samũeli nĩweekie maũndũ ala Yeova wamũtavisye. Yĩla wavikie Mbethileemu, atumĩa ma ndũa ĩsu nĩmatetemaa makomana nake, na maasya: “Wooka na mũuo?” 5 Nũndũ wa ũu, ameie: “Nooka na mũuo. Nooka kũthembea Yeova. Ĩthesyei, na mũyũka tũthi nthembonĩ.” Nĩvo ĩndĩ watheisye Yese na ana make, na ĩtina wa ũu ameta mathi nthembonĩ ĩsu. 6 Mokĩte nĩwoonie Eliavu, na asya: “Vate nzika, mwĩtĩkĩwʼa mauta wa Yeova nũũ ũũngamĩte mbee wake.” 7 Ĩndĩ Yeova eeie Samũeli atĩĩ: “Ndũkasisye wũmbo wake na ũndũ ũasavĩte, nĩkwĩthĩwa nĩnĩmũleete. Nũndũ ũndũ mũndũ wonaa tiwʼo Ngai wonaa, nĩkwĩthĩwa mũndũ onaa wũmbo wa nza, ĩndĩ Yeova onaa kĩla kĩ ngoonĩ.” 8 Nĩvo ĩndĩ Yese weetie Avinatavu na amũvĩtĩlya mbee wa Samũeli, ĩndĩ Samũeli asya: “Yeova ndanyuvĩte ũũ o nake.” 9 Ĩtina wa ũu, Yese nĩwaetie Samuma, ĩndĩ Samũeli asya: “Yeova ndanyuvĩte ũũ o nake.” 10 Kwoou Yese nĩwavĩtĩilye ana make mũonza mbee wa Samũeli, ĩndĩ Samũeli eea Yese: “Yeova ndanyuvĩte o na ũmwe katĩ wa aa.”
11 Mũthya, Samũeli akũlilye Yese atĩĩ: “Ii nĩsyo imwana syaku syonthe?” Nake amũsũngĩa amwĩa: “Ve ũmwe ũtialĩte, ũla mũnini; eĩthya malondu.” Nĩvo ĩndĩ Samũeli weeie Yese atĩĩ: “Mũtũmane, nĩkwĩthĩwa tũyĩĩkala nthĩ tũye atavikĩte vaa.” 12 Kwoou nĩwamũtũmanie na aetwe. Yu aĩ mũtune, aĩ na metho manake, na aĩ mũmbe nesa. Nĩvo ĩndĩ Yeova waisye atĩĩ: “Ũkĩla, mwĩtĩkĩsye mauta, nũndũ ũũ nĩwe!” 13 Kwoou Samũeli nĩwoosie ũvya wa mauta na amwĩtĩkĩsya mbee wa ana-a-ĩthe. Na veva wa Yeova wambĩĩa kwĩkĩa Ndaviti vinya kuma mũthenya ũsu na kũendeea. Ĩtina, Samũeli nĩwookĩlile na athi Lama.
14 Yu veva wa Yeova nĩwatiĩte Saũlo, na veva mũthũku kuma kwa Yeova nĩwamũthĩnasya. 15 Athũkũmi ma Saũlo mamwĩie atĩĩ: “Nĩwene kana veva mũthũku kuma kwa Ngai ũendeee kũũthĩnyʼa. 16 Mwa mwĩai witũ, ĩaĩe athũkũmi maku aa me mbee waku maũmanthĩe mũndũũme wĩ na ũtũĩka wa kũkũna mũio wa wathi wĩ na ndii 12.* Ĩvinda o na yĩva yĩla veva mũthũku wa Ngai wooka ĩũlũ waku, akakũnaa mũio ũsu, na ũyĩwʼa kavaa.” 17 Kwoou Saũlo eea athũkũmi make atĩĩ: “Mwa manthĩei mũndũũme wĩsĩ kũũkũna nesa, na mũimũete vaa.”
18 Ũmwe wa athũkũmi make aisye atĩĩ: “Sisyai! Nĩnonete ũndũ mwana wa Yese ũla Mũmbethileemu ũkũnaa mũio ũsu na ũtũĩka, e ũkũmbaũ, na vinya. Nũneenaa nesa, nĩ mũmbe nesa, na Yeova e vamwe nake.” 19 Nĩvo ĩndĩ Saũlo watũmie atũmwa kwa Yese na mamwĩa atĩĩ: “Nenganĩe mwana waku Ndaviti, ũla ũkũĩthya malondu.” 20 Kwoou Yese nĩwoosie mĩkate, sũva wa kĩthuma wĩ na mbinyu, na katena ka mbũi, na ailĩĩla syĩndũ isu ĩngʼoinĩ na ĩndĩ ainenga mwana wake Ndaviti atwaĩe Saũlo. 21 Ndaviti nĩwookie kwa Saũlo na ambĩĩa kũmũthũkũma. Saũlo nĩwamwendie mũno, na atwʼĩka mũndũ wa kũmũkuĩa mĩio yake ya kaũ. 22 Nũndũ wa ũu, Saũlo nĩwatũmanie Yese akatavwʼe atĩĩ: “Mwa eka Ndaviti aendeee kũnthũkũma, nũndũ nĩwonete ũseo methonĩ makwa.” 23 Ĩvinda o na yĩva yĩla veva mũthũku kuma kwa Ngai wookĩa Saũlo, Ndaviti nĩwoosaa mũio wa wathi wĩ na ndii 12* na ayĩũkũna, na Saũlo nĩwauasya na ayĩwʼa kavaa, na veva ũsu mũthũku nĩwaumaa nthĩnĩ wake.