Kwa Akalatia
2 Na ĩndĩ ĩtina wa myaka 14 nĩnambatie ĩngĩ Yelusaleme nĩ na Valanava na Tito. 2 Nambatie kũu nũndũ nĩnakwatie ũvuanyʼo, na namatwaĩe ũvoo mũseo ũla natavanasya kwa andũ ma mbaĩ ingĩ. Ĩndĩ neekie ũu mbee wa aũme ala manengetwe ndaĩa me oka, nĩ kana ũndũnĩ o na wĩva ndikethĩwe ngĩsemba mana kana ndikethĩwe nasembie mana. 3 Ĩndĩ o na Tito, ũla naĩ nake, ndaathingʼĩĩwʼa aĩkwe, o na kau aĩ Mũkiliki. 4 Ĩndĩ ũndũ ũsu waumĩlile nũndũ wa ana-a-asa ma ũvũngũ ala malikĩtwʼe kĩkundinĩ na kĩmbithĩ, ĩĩ, ala malikĩte mateũmanyĩka nĩ kana mathiane ũthasyo ũla tũtanĩaa nũndũ wa ngwatanĩo yitũ vamwe na Klĩsto Yesũ, na maitũtwʼĩkĩthya ngombo vyũ; 5 na tũyaamethukĩĩsya kana kũmenyivĩsya nongi, tũyaaĩka ũu o na kwa kavinda kanini, * nĩ kana ũwʼo ĩũlũ wa ũvoo mũseo ũendeee kwĩthĩwa nthĩnĩ wenyu.
6 Ĩndĩ ĩũlũ wa ala moonekaa me ma vata, o na ethĩwa maĩ aaũ, ũsu ti ũndũ kwakwa, nũndũ andũ asu manengetwe ndaĩa vaiĩ ũndũ mweũ maandethya nawʼo, nĩkwĩthĩwa Ngai ndasiasya ũndũ mũndũ ũilye nza. 7 Ĩndĩ yĩla moonie kana nĩnanengetwe ũvoo mũseo kwondũ wa ala mate aĩke, o tondũ Vetelo wanengetwe ũvoo mũseo kwondũ wa ala aĩke, 8 nũndũ o ũla wamũnengie Vetelo vinya nĩ kana ethĩwe mũtũmwa kwa ala aĩke, nowe wanengie vinya nĩthĩwe mũtũmwa kwa andũ ma mbaĩ ingĩ, 9 na yĩla mamanyie ũseo mwingĩ ũla nanengetwe, Yakovo na Keva * na Yoana, ala moonekaa ta ituĩ, nĩmatũnengie twĩ na Valanava kwʼoko kwa aũme kwa mũamba, * nĩ kana tũthi kwa andũ ma mbaĩ ingĩ namo maithi kwa ala aĩke. 10 Na no ũndũ ũmwe matũkũlilye twĩke, nawʼo nĩ kũsũanĩa ĩũlũ wa ala ngya, na ũndũ ũsu o nawʼo nĩndatĩte mũno kũwĩka.
11 Ĩndĩ yĩla Keva * wookie Andiokia nĩnaleanile nake ũthyũ kwa ũthyũ, nũndũ vate nzika aĩ na mavĩtyo. * 12 Nĩkwĩthĩwa andũ amwe kuma kũla kwĩ Yakovo matavikĩte, nĩwaĩsanĩaa na andũ ma mbaĩ ingĩ, ĩndĩ yĩla mavikie aeka kwĩka ũu na eevatha, aikĩa ala maĩ aĩke. 13 Na Ayuti ala angĩ o namo makwatana nake nthĩnĩ wa wanganganyʼa ũsu, nginya o na Valanava eetĩkĩlana namo nthĩnĩ wa wanganganyʼa woo. 14 Ĩndĩ yĩla noonie kana mayekalaa kwosana na ũwʼo wa ũvoo mũseo, nĩnamwĩie Keva * ũũ mbee woo onthe: “Ethĩwa we, o na kau wĩ Mũyuti, wĩkalaa o tondũ andũ ma mbaĩ ingĩ mekalaa na ti ũndũ Ayuti mekalaa, ũtonya ata kũmathingʼĩĩsya andũ ma mbaĩ ingĩ mekale kwosana na syĩthĩo sya Ayuti?”
15 Ithyĩ ala twĩ Ayuti kwa kũsyawa, na tũi eki ma naĩ kuma kwa andũ ma mbaĩ ingĩ, 16 nĩtwĩsĩ kana mũndũ ndatalĩlawa ũlũngalu nũndũ wa kwĩka mawĩa ala mĩao ĩwetete, ĩndĩ nũndũ wa mũĩkĩĩo nthĩnĩ wa Yesũ Klĩsto. Kwoou, ithyĩ nĩtũmũĩkĩĩe Klĩsto Yesũ nĩ kana tũtalĩlwe ũlũngalu kwĩsĩla mũĩkĩĩo nthĩnĩ wa Klĩsto ĩndĩ ti ũndũ wa kwĩka mawĩa ala mĩao ĩwetete, nĩkwĩthĩwa vaiĩ mũndũ o na ũmwe ũkatalĩlwa ũlũngalu nũndũ wa kwĩka mawĩa ala mĩao ĩwetete. 17 Yu ethĩwa twĩoneka twĩ eki ma naĩ yĩla tũũmantha ũlũngalu kwĩsĩla Klĩsto, we Klĩsto nĩ mũthũkũmi wa naĩ? Aiee! 18 Ethĩwa nĩngwaka ĩngĩ maũndũ o ala naomboaa, nĩonanyʼa kana nĩ mũvĩtanyʼa. 19 Nũndũ kwĩsĩla mĩao nĩnakwie maũndũnĩ ma mĩao, nĩ kana nĩthĩwe thayũ kwondũ wa Ngai. 20 Nĩathĩĩĩtwe mũtĩnĩ vamwe na Klĩsto. Nyie ndi thayũ, ĩndĩ nĩ Klĩsto wĩ thayũ e ngwatanĩo vamwe nakwa. Nĩ wʼo kana thayũ ũla nĩkalaa nthĩnĩ wa mwĩĩ, nĩkalaa nũndũ wa mũĩkĩĩo nthĩnĩ wa Mwana wa Ngai, ũla wambendie na eenengane we mwene kwondũ wakwa. 21 Nyie ndiũlea ũseo mwingĩ wa Ngai, nũndũ ethĩwa ũlũngalu ũkwatĩkanaa kwĩsĩla mĩao, vate nzika Klĩsto akwie mana.