Valũa wa Kelĩ kwa Akolintho

13 Yĩĩ nĩyo ĩvinda ya katatũ ngwenda kũka kwenyu. “No nginya kĩla ũndũ ũĩkĩĩthwʼe nĩ ũkũsĩ * wa ngũsĩ ilĩ kana itatũ.” 2 O na kau yu ndi vamwe nenyu, no ta nĩ vamwe nenyu ĩvinda ya kelĩ, na nĩngũmakanyʼa kwĩ tene andũ ala mekĩte naĩ, o vamwe na ala angĩ onthe, ngĩmea kana nesa kũka ĩngĩ ndikamewʼĩa tei, 3 nũndũ mwĩenda kũĩkĩĩthwʼa kana Klĩsto, ũla wĩthĩawa ate mwonzu ĩndĩ e na vinya katĩ wenyu, nĩwe kwa wʼo ũkũneena kwĩsĩla vala nĩĩ. 4 Nĩkwĩthĩwa nĩwooaĩwe mũtĩnĩ nũndũ wa wonzu, ĩndĩ yu e thayũ nũndũ wa vinya wa Ngai. Nĩ wʼo kana o naitũ twĩ onzu o tondũ we waĩ mwonzu, ĩndĩ tũkekala thayũ vamwe nake nũndũ wa vinya wa Ngai, vinya ũla ũtethasya wĩa katĩ wenyu.

5 Endeeai kwĩyĩosya kana inywʼĩ mwĩ ũla mũĩkĩĩonĩ; endeeai kũĩkĩĩthya ũndũ inywʼĩ ene mũilye. Kana mũyĩsĩ Yesũ Klĩsto e ngwatanĩo vamwe nenyu? Ate o ethĩwa mwĩ alee. 6 Nĩĩkwatya mũkamanya kana ithyĩ tũi alee.

7 Na nĩtũũvoya Ngai nĩ kana mũikeke ĩvĩtyo o na yĩmwe, na tũikwĩka ũu nĩ kana ithyĩ twoneke nĩtwĩtĩkĩlĩtwe, ĩndĩ nĩ kana mwĩke ũla ũseo, o na ethĩwa ithyĩ twĩoneka ta twĩ alee. 8 Nũndũ tũitonya kwĩka ũndũ o na ũmwe ũũleana na ũla wʼo, ĩndĩ twĩkaa maũndũ kwosana na ũla wʼo. 9 Nĩ wʼo kana ithyĩ nĩtũtanaa ĩvinda yonthe yĩla twĩ onzu nenyu mwĩ na vinya. Na tũvoyaa nĩ kana mũlũngwe. 10 Na nĩkyo kĩtumi ngũandĩka maũndũ aa nde vamwe nenyu, nĩ kana yĩla nĩĩthĩwa vamwe nenyu vaikethĩwe ũndũ ũtuma nĩtũmĩa kũvĩtũka ũndũ vaĩle ũkũmũ ũla nanengiwe nĩ Mwĩaĩi, wa kwaka ĩndĩ ti kũomboa.

11 Na mũthya ana-a-asa, endeeai kũtana, kũlũngwa, kũkiakiwʼa, kwĩthĩwa na kĩsũanĩo kĩmwe, kwĩkala na mũuo; na Ngai wa wendo na mũuo akeethĩwa vamwe nenyu. 12 Kethanyʼai na ngethi ya wendo. * 13 Atheu onthe nĩmamũkethya.

14 Inywʼonthe ĩthĩwai na ũseo mwingĩ wa Mwĩaĩi Yesũ Klĩsto na wendo wa Ngai na veva mũtheu ũla inywʼonthe mũtethekete nũndũ wawʼo.