Kuma
14 Na Yeova eea Mose: 2 “Tavya Aisilaeli kana maĩlĩte kũsyoka na mayamba maeema mbee wa Viailothi, katĩkatĩ wa Mikitoli na ũkanga, masyaĩtye Mbaali-nzevoni. Maĩlĩte kwamba maeema ũtee wa ũkanga mavasyaĩtye. 3 Na ĩndĩ Valao akasya ĩũlũ wa Aisilaeli, ‘Maendeee kwanganga me avũavũanu. Vai ũndũ matonya kuma weũnĩ.’ 4 Nĩngwĩtĩkĩlya ngoo ya Valao yĩthĩwe mbũmũ, nake nũkũmasembanyʼa, na nĩngwĩkumya kwĩsĩla Valao na ita syake syonthe; na vate nzika, Amisili nĩmeũmanya kana ninyie Yeova.” Kwoou ũu nĩwʼo meekie.
5 Ĩtina mũsumbĩ wa Misili nĩwataviwʼe kana Aisilaeli maĩ manasemba makathi. Vau kwa vau, Valao na athũkũmi make nĩmavĩndũie mesilya moo ĩũlũ wa Aisilaeli, na masya: “Nĩkĩ twĩkie ũu? Nĩkĩ tũlekilye Aisilaeli mathi maeke kwĩthĩwa ngombo sitũ?” 6 Kwoou nĩwoombanisye makasya make ma kaũ, na oosa andũ make maendanyʼa nake. 7 Nĩwoosie makasya 600 ala maseo vyũ na makasya ala angĩ onthe ma Misili, na kĩla yĩmwe yaĩ na ngũmbaũ sya kaũ. 8 Kwoou Yeova nĩweetĩkĩlilye ngoo ya Valao mũsumbĩ wa Misili yĩthĩwe mbũmũ, na Valao asembanyʼa Aisilaeli ala maendeee kuma nthĩ ĩsu me na ũkũmbaũ.* 9 Amisili nĩmamasembanisye, na mbalasi syonthe sya kũkusya makasya sya Valao na atwai make ma mbalasi na ita syake, maendeee kũthengeea Aisilaeli ala mambĩte maeema ũtee wa ũkanga, vakuvĩ na Viailothi, masyaĩtye Mbaali-nzevoni.
10 Yĩla Valao wathengeeie, Aisilaeli nĩmookĩlilye metho moo na moona Amisili mamaatĩĩe. Aisilaeli nĩmakwatiwe nĩ wia na mambĩĩa kũmũĩĩa Yeova. 11 Meeie Mose atĩĩ: “Ũtũetie kũũ weũnĩ tũkwʼĩĩe kwʼo nĩkwĩthĩwa Misili kũi kũndũ andũ matonya kũthikwa? Nĩkĩ ũtwĩkĩte ũũ? Nĩkĩ ũnatumisye Misili?” 12 Kĩu tyo kyo twakũtavisye twĩ Misili, yĩla twakwĩie, ‘Ekana naitũ, nĩ kana tũthũkũme Amisili’? Nũndũ nĩ kavaa kwitũ kũthũkũma Amisili kwĩ kũkwʼĩĩa weũnĩ.” 13 Na ĩndĩ Mose eea andũ: “Mũikakĩe. Ũngamai mwĩ alũmu mwone ũndũ Yeova ũkũmũtangĩĩa ũmũnthĩ. Nũndũ Amisili ala mũmene ũmũnthĩ, mũikamona ĩngĩ nongi. 14 Yeova mwene nũkũmũkitĩa, nenyu mwĩĩkala mũvindĩtye.”
15 Nĩvo ĩndĩ Yeova weeie Mose: “Nĩkĩ ũendeee kũmbĩĩa? Tavya Aisilaeli maendeee na kyalo. 16 Naku, ũkĩlya ndata yaku na ũitambũũkya kwʼoko kwaku ĩũlũ wa ũkanga na ũiũaanyʼa, nĩ kana Aisilaeli mesĩle katĩkatĩ wa ũkanga makinyĩle nthĩ nyũmũ. 17 Nakwa nĩngwĩtĩkĩlya ngoo sya Amisili syĩthĩwe mbũmũ, nĩ kana malike mamaatĩĩe; kwoou nĩngwĩkumya kwĩsĩla Valao na ita syake syonthe, makasya make ma kaũ, na atwai make ma mbalasi. 18 Na vate nzika, Amisili nĩmeũmanya kana ninyie Yeova yĩla ngwĩkumya kwĩsĩla Valao, makasya make ma kaũ, na atwai make ma mbalasi.”
19 Na ĩndĩ mũlaĩka wa Ngai wa w’o ũla waendaa mbee wa kambi ya Isilaeli auma mbee woo na asyoka ĩtina woo, na kĩtuĩ kya ĩtu kĩla kyaĩ mbee woo kyasyoka ĩtina woo na kyaũngama vau. 20 Kwoou nĩkyookie katĩkatĩ wa kambi ya Amisili na kambi ya Aisilaeli. Ngalĩko ĩmwe, kyaĩ ĩtu ĩtuku. Na ngalĩko ĩla ĩngĩ, nĩkyamamulĩkĩle ũtukũ. Kwoou kambi ya Amisili ndyaathengeea kambi ya Aisilaeli ũtukũ wʼonthe.
21 Na Mose atambũũkya kwʼoko kwake ĩũlũ wa ũkanga; na Yeova atuma kĩseve kĩ vinya kya wumĩlonĩ wa sua kĩuutana ũtukũ wʼonthe, na kĩwʼũ kyaaanĩka na ũkanga watwʼĩka nthĩ nyũmũ. 22 Kwoou Aisilaeli mesĩla katĩkatĩ wa ũkanga makinyĩle nthĩ nyũmũ, nakyo kĩw’ũ kyaseũvĩtye ũkũta kwʼokonĩ kwoo kwa aũme na kwʼokonĩ kwoo kwa aka. 23 Amisili nĩmamaatĩĩie, na mbalasi syonthe sya Valao, makasya make ma kaũ, na atwai make ma mbalasi mambĩĩa kũmaatĩĩa katĩkatĩ wa ũkanga. 24 Kũkilye kũkya,* Yeova nĩwasyaisye kambi ya Amisili e kĩtuĩnĩ kya mwaki na ĩtu, na avũavũanyʼa kambi ya Amisili. 25 Nĩwaumasya makasya moo ndĩa nginya weethĩa mematwaa na vinya, na Amisili maasya: “Ekai tũsembe tũikathengeee Aisilaeli, nũndũ Yeova aendeee kũkita Amisili kwondũ woo.”
26 Na ĩndĩ Yeova eea Mose: “Tambũũkya kwʼoko kwaku ĩũlũ wa ũkanga nĩ kana kĩw’ũ kĩsyokeanĩe na kĩivwʼĩka Amisili, makasya moo ma kaũ, na atwai moo ma mbalasi.” 27 Mose ate kwananga ĩvinda nĩwatambũũkisye kwʼoko kwake ĩũlũ wa ũkanga, na kũendeee kũkya, ũkanga wasyokeanĩa. Na yĩla Amisili masembete maũkĩĩte, Yeova nĩwamavunzangĩie ũkanganĩ katĩ. 28 Kĩw’ũ kĩla kyaendeee kũsyokeanĩa nĩkyavwʼĩkie makasya ma kaũ na atwai ma mbalasi na ita syonthe sya Valao ila syaĩ inalika ũkanganĩ imaatĩĩe. Vai o na ũmwe katĩ woo waaĩtĩkĩlwʼa kũvonoka.
29 Ĩndĩ Aisilaeli mesĩile nthĩ nyũmũ katĩkatĩ wa ũkanga, na kĩw’ũ kyaseũvĩtye ũkũta kwʼokonĩ kwoo kwa aũme na kwʼokonĩ kwoo kwa aka. 30 Na ũu nĩwʼo Yeova watangĩĩie Aisilaeli mũthenya ũsu kuma kwʼokonĩ kwa Amisili, na Aisilaeli moona Amisili me akwʼũ ũtee wa ũkanga. 31 O na ĩngĩ, Aisilaeli nĩmoonie vinya mwingĩ ũla* Yeova watũmĩie kũkita Amisili, na andũ mambĩĩa kũmũkĩa Yeova na kũmũĩkĩĩa Yeova o vamwe na mũthũkũmi wake Mose.