Valũa kwa Akolosai

2 Nũndũ nĩenda mũmanye kĩthito kĩla nĩ nakyo kwondũ wenyu na kwondũ wa ala me Laotisia na kwondũ wa ala mataambona nyie mwene. 2 Nĩ kana makwate ũkiakisyo na mayĩthĩwa makwatanĩtw’e nesa vamwe nthĩnĩ wa wendo, na mayĩthĩwa na ũthwii w’onthe ũla wumanaa na kwĩthĩwa maĩkĩĩthĩtw’e nesa na me na ũmanyi wa w’o ĩũlũ wa kĩmbithĩ kĩtheu kya Ngai, nakyo nĩ Klĩsto. 3 Na nthĩnĩ wake ũthwii w’onthe na ũĩ na ũmanyi nivithĩtwe nesa. 4 Nĩneena ũu nĩ kana mũndũ o na wĩva ndakamũkenge na ndeto sya maũĩ. 5 O na kau ndi vau mũĩ, nĩ vamwe nenyu nthĩnĩ wa veva, na nĩngũtana kwona ũndũ mwĩkaa maũndũ na mũvango, na ũndũ mwĩ na mũĩkĩĩo ũlũmĩte nthĩnĩ wa Klĩsto.

6 Kwoou o ũndũ mwamwĩtĩkĩlile Mwĩaĩi, Klĩsto Yesũ, endeeai kwĩkala mwĩ ngwatanĩo vamwe nake, 7 mwĩ na mĩi mĩlũmu na mũkakwa nthĩnĩ wake, na kũlũlũmĩĩlw’a mũĩkĩĩonĩ, o tondũ mwamanyĩiw’e, na tũngaai mũvea kĩla ĩvinda.

8 Ĩsũvĩei mũndũ o na wĩva ndakamũtave na ũĩ wa nthĩ na ũvũngũ mũthei wosanĩte na kĩthĩo kya andũ na maũndũ ma mũsingi ma nthĩ ĩno, ĩndĩ ti kwosana na Klĩsto; 9 nũndũ ndaĩa syonthe sya Ngai itwĩe nthĩnĩ wake. 10 Na kwĩsĩla kwake vaiĩ kĩndũ o na kĩmwe tũte nakyo, nake nĩwe wĩ ĩũlũ * wa silikalĩ syonthe na mokũmũ. 11 Nũndũ wa ngwatanĩo yenyu vamwe nake, inyw’ĩ mũyaĩkĩtwe nzaĩko ya moko ĩla ya kumya mwĩĩ wa nyama, ĩndĩ mwaĩkĩtwe nzaĩko ĩla ya Klĩsto. 12 Nũndũ mwathikiwe nake ũvatisonĩ wake, na nũndũ wa ngwatanĩo yenyu vamwe nake nĩmwathayũũkiw’e vamwe nake kwĩsĩla mũĩkĩĩo wenyu nthĩnĩ wa maũndũ ala meanĩiw’e kwa vinya wa Ngai, nake nĩwe wamũthayũũkisye.

13 O na ĩngĩ, o na kau mwaĩ akw’ũ nũndũ wa mavĩtyo menyu na kwĩthĩwa mũte aĩke nthĩnĩ wa mwĩĩ, Ngai nĩwatumie mwĩthĩwa thayũ vamwe na Yesũ. Na nũndũ wa ũseo Wake, nĩwatũekeie mavĩtyo maitũ onthe 14 na nĩwavutie ĩla mĩao yaandĩkĩtwe na kw’oko na yaĩ na motw’ĩo, ĩla yoonanasya mavĩtyo maitũ ũtheinĩ. Na nĩwamĩvetie kwa kũmĩathĩĩa mũtĩnĩ wa mathĩna. * 15 Na kwĩsĩla mũtĩ ũsu wa mathĩna, * nĩwasindie silikalĩ na mokũmũ onthe na amatava na amekĩĩthya nthoni ũtheinĩ, na oonany’a kana nũkwatĩte ũsindi ĩũlũ woo onthe.

16 Kwoou mũikaeke mũndũ o na wĩva amũsilĩle ĩũlũ wa kĩla mũũya na kũnyw’a, kana ĩũlũ wa kũkwata mũthenya wa mboka kana kũtisa kwa mwei, kana kũkwata savato. 17 Maũndũ asu maĩ kyuu kya maũndũ ala makoka, ĩndĩ kĩla kya w’o nĩ Klĩsto. 18 Ĩsũvĩanei na mũndũ o na wĩva ũla wĩthĩawa na wĩnyivyo ũte wa w’o na ũla ũthaithaa alaĩka * nũndũ nũtonya kũtuma mũtakwata mũthĩnzĩo wenyu. Mũndũ ta ũsu alũmanasya vyũ na kĩla wene na ekathĩaa na mosũanĩo make matatethya, 19 na ndalũmanasya na ũla ũnengae mwĩĩ w’onthe kĩla wĩ na vata nakyo, nake nĩwe mũtwe, na nĩwe ũtumaa mwĩĩ ũkwatanw’a nesa kwĩsĩla maleenyũ na malangũ maw’o, na ũyĩana kwosana na ũndũ Ngai ũwĩanasya.

20 Ethĩwa nĩmwakwie vamwe na Klĩsto maũndũnĩ ma mũsingi ma nthĩ ĩno, nĩkĩ mwĩkalaa ta mwĩ o ma nthĩ kwa kũendeea kũatĩĩa mĩao ĩno: 21 “Ndũkakwate, ndũkasame, na ndũkakiite”? 22 Nũndũ mĩao ĩsu ĩvatanĩte syĩndũ ila syanangĩkaa syamina kũtũmĩwa oou, na ĩsu nĩ mĩao na momanyĩsyo ma andũ. 23 O na kau maũndũ asu monekaa ta ma ũĩ, yĩla mũndũ ũkũthaitha kwosana na ũndũ we ũkwenda na e na wĩnyivyo ũte wa w’o, o vamwe na kũthĩny’a mwĩĩ, maitonya kũtetheesya mũndũ o na vanini kũkitana na mawendi ma mwĩĩ.