Meko ma Atũmwa
28 Ĩtina wa kũvonoka na kũvika nthĩ nyũmũ, nĩtwamanyie kana kĩthama kĩu kyeetawa Melita. 2 Na andũ ma kũu maneenaa kĩthyomo kĩeni na nĩmatwonisye ũseo mũnene. * Nĩmavuvie mwaki na matũthokya ithyonthe nesa nũndũ nĩkwauaa na kwaĩ na mbevo. 3 Ĩndĩ yĩla Vaulo wakolanilye ngũ na asyĩkĩa mwakinĩ, nzoka mbai nĩyaumie vo nũndũ wa muutĩa yamũũma na yalũma kw’okonĩ kwake. 4 Yĩla andũ asu maneenaa kĩthyomo kĩeni moonie nzoka ĩsu yĩ sumu ĩsũnzũũlĩte kw’okonĩ kwake, mambĩĩa kũneenany’a ene kwa ene, makyasya: “Vate nzika mũndũ ũũ nĩ mũaani, nũndũ o na kau nũvonokie kuma ũkanganĩ, Ũsili wa Katĩ * ndanamwĩtĩkĩlya kwĩkala thayũ.” 5 Ĩndĩ nĩwavuunzie nzoka ĩsu amĩkya mwakinĩ na ndaakwatwa nĩ ũndũ mũthũku. 6 Na nĩmeeteelete aimbe na o mĩtũkĩ aivalũka akw’e. Ĩndĩ yĩla meeteelile kwa ĩvinda yĩasa na moona kana vaiĩ ũndũ mũthũku ũũmũkwata, maalyũla woni woo na mambĩĩa kwasya we nĩ ngai.
7 Na vau ũtũinĩ vaĩ mĩũnda ya mũnene wa kĩthama kĩu weetawa Vuvilio, na nĩwatũthokisye nesa mũno na twekala kwake mĩthenya ĩtatũ. 8 Na kweethĩwa kana ĩthe wa Vuvilio nĩwakomete kĩtandanĩ awaĩte ndetema na kwĩtũũa nthakame, na Vaulo athi vala waĩ amũvoyea, na amwilĩĩla moko na amũvosya. 9 Yĩla ũndũ ũsu weekĩkie, andũ ala angĩ kĩthamanĩ kĩu mambĩĩa kũka vala waĩ na kũvow’a. 10 O na nĩmoonanisye nĩmeũtũnga mũvea kwa kũtũnenga mĩthĩnzĩo mingĩ, na tũithi matwĩkĩĩa melinĩ syĩndũ syonthe ila twaĩ na vata nasyo.
11 Ĩtina wa myei ĩtatũ nĩtwalikile meli yĩ na mũvw’anano wa “Ana ma Nzeusi.” Meli ĩsu yaumĩte Alekisandalia na yekalĩte kĩthamanĩ kĩu ĩvinda ya mbevo. 12 Nĩtwavikie Silakuse vala meli iũngamaa, na twavekala mĩthenya ĩtatũ; 13 kuma vau twathi twavika Lekio. Na ĩtina wa mũthenya ũmwe kĩseve kya ngalĩ ya ĩtheo kyauutana na mũthenya wa kelĩ twathi twavika Vutiolo. 14 Yĩla twavikie kũu nĩtweethĩie ana-a-asa na matwĩsũva twekala namo mĩthenya mũonza, na twauma vau twelekele Lomi. 15 Yĩla ana-a-asa ma Lomi meewie ũvoo ĩũlũ witũ, nĩmookie nginya Soko wa Avio na Mĩkaawa Ĩtatũ makomane naitũ. Na yĩla Vaulo wamonie amũtũngĩa Ngai mũvea na eethĩwa na ũkũmbaũ. 16 Yĩla twesie kũvika Lomi, Vaulo nĩweetĩkĩlilw’e kwĩkala nyũmbanĩ yake na aĩ na mũsikalĩ ũla wamũsungaa.
17 Ĩndĩ ĩtina wa mĩthenya ĩtatũ nĩwametie aũme me nguma katĩ wa Ayuti, na yĩla moombanie amea: “Ana-a-asa, o na kau vaiĩ ũndũ neekĩte ũte kwosana na ũndũ andũ mendete kana ũte kwosana na syĩthĩo sya aa-ũmae maitũ, nĩnakwatĩiwe Yelusaleme na nanenganwe kwa Alomi. 18 Ĩtina wa kũngũlya makũlyo nĩmendaa kũndekya, nũndũ vayaĩ ũndũ waĩ ũtonya kũtuma nũawa. 19 Ĩndĩ yĩla Ayuti maleile, yaĩ no nginya nasye nĩenda ĩkoani yakwa yĩkethukĩĩw’e nĩ Kaisali, ĩndĩ ti kwĩthĩwa naĩ na ũndũ o na ũmwe wa kũsikatĩa mbaĩ yaitũ. 20 Kwoou nĩkyo kĩtumi nendie kũmwona nĩneene nenyu, nĩkwĩthĩwa novetwe nyololo ĩno nũndũ wa wĩkwatyo wa Isilaeli.” 21 Namo mamwĩa: “Vaiĩ valũa tũkwatĩte kuma Yutia ũkũkonetye, o na vaiĩ ũmwe katĩ wa ana-a-asa ala maumie kũu ũnaete ũvoo kana akaneena ũndũ mũthũku ĩũlũ waku. 22 Ĩndĩ twĩona nũseo twĩthukĩĩsye ũndũ we mwene ũkwasya, nũndũ nĩtwĩsĩ kwa w’o kana kĩkundi kĩĩ kya ndĩni kĩneeneawa naĩ kĩla vandũ.”
23 Kwoou mavanga mũthenya wa kũkomana nake na mooka kwa wingĩ vala wekalaa. Na kwambĩĩa kwakya nginya mawĩoo, amaelesya ũndũ ũsu kwa kũmaumĩsya ũkũsĩ mwĩanĩu ĩũlũ wa Ũsumbĩ wa Ngai, nĩ kana amaĩkĩĩthye ĩũlũ wa Yesũ aitũmĩa maũndũ ala maandĩkĩtwe Mĩaonĩ ya Mose na Mavukunĩ ma Athani. 24 Na amwe mambĩĩa kũĩkĩĩa maũndũ ala waneenaa, ĩndĩ angĩ malea kũĩkĩĩa. 25 Na nũndũ mo ene mayaaĩw’ana, mambĩĩa kũthi, na Vaulo aneena ũndũ ũũ:
“Veva mũtheu nĩwaneenie nesa na aa-ũmae menyu kwĩsĩla mwathani Isaia, 26 ũkyasya, ‘Enda kwa andũ aa na ũimea: “Kwa w’o, mũkeew’a na mũikaelewa kĩndũ nongi, na mũkasisya ĩndĩ mũikona nongi. 27 Nũndũ ngoo sya andũ aa nĩ mbũmũ, nĩmew’aa na matũ moo ĩndĩ mayosaa ĩtambya, na nĩmalalĩtye nĩ kana maikone, na makalinda matũ moo nĩ kana maikew’e, na maieleawa kĩndũ na ngoo syoo nĩ kana maalyũke nakwa ngĩmavosya.”’ 28 Kwoou manyai kana ũtangĩĩo ũũ wumĩte kwa Ngai nũtavanĩtw’e kwa andũ ma mbaĩ ingĩ; na vate nzika mo makawĩthukĩĩsya.” 29* ——
30 Kwoou ekala kũu myaka ĩlĩ mĩima nyũmbanĩ yake ya kũkomboa, na nĩwamathokasya nesa ala mooka kwake, 31 na nĩwamatavasya ũvoo ĩũlũ wa Ũsumbĩ wa Ngai na kũmamanyĩsya ĩũlũ wa Mwĩaĩi Yesũ Klĩsto, e na ũthasyo mwingĩ wa kũneena * na ate na kĩsiĩĩi.