Valũa wa Kelĩ kwa Athesalonika
3 Na mũthya, ana-a-asa, endeeai kũtũvoyea nĩ kana ndeto ya Yeova ĩendeee kũnyaĩĩka mĩtũkĩ na kũkumw’a, o ũndũ vailye kwenyu, 2 na nĩ kana tũvonokw’e kuma kwa andũ athũku ala matonya kũtwĩka naĩ, nũndũ ti andũ onthe methĩawa na mũĩkĩĩo. 3 Ĩndĩ Mwĩaĩi nĩ mũĩkĩĩku, na akamwĩkĩa vinya na kũmũsũvĩana na ũla mũthũku. 4 O na ĩngĩ, tũi na nzika nthĩnĩ wa Mwĩaĩi ĩũlũ wenyu kana nĩmũatĩĩaa na nĩmũkũendeea kũatĩĩa maũndũ ala tũmũtavasya. 5 Mwĩaĩi naendeee kũtongoesya ngoo syenyu nesa nĩ kana mũmwende Ngai na mũyũmĩĩsya kwondũ wa Klĩsto.
6 Yu, ana-a-asa, twĩenda kũmũtaa ĩsyĩtwanĩ ya Mwĩaĩi Yesũ Klĩsto, mwĩvathane na mwana-a-asa o na wĩva ũla ũte na mwĩkalĩle mũseo na ũtekalaa kwosana na syĩthĩo ila mwakwatie kuma kwitũ. 7 Nũndũ inyw’ĩ ene nĩmwĩsĩ ũndũ mwaĩle kũatĩĩa ngelekany’o yitũ, nũndũ tũyaĩ na mwĩkalĩle mũthũku yĩla twaĩ katĩ wenyu, 8 o na tũyaaya lĩu wa mũndũ mana. Vandũ va ũu, twatethasya wĩa mũmũ na wĩ mĩnoo ũtukũ na mũthenya nĩ kana tũikakuĩthye o na ũmwe wenyu mũio mũito. 9 Ti aĩ tũyaĩ na ũkũmũ wa kwĩka ũu, ĩndĩ twendaa kũmwiĩa ngelekany’o nĩ kana inyw’ĩ mũmĩatĩĩe. 10 O na yĩla twaĩ vamwe nenyu nĩtwamwĩaĩaa ũũ: “Ethĩwa mũndũ o na wĩva ndekwenda kũtethya wĩa, o na kũya ndakaye.” 11 Nũndũ nĩtwĩw’ĩte kana ve amwe katĩ wenyu mate na mwĩkalĩle mũseo, na maitethasya wĩa o na vanini, ĩndĩ melikasya maũndũnĩ matamakonetye. 12 Andũ ta asu twĩmeaĩa na kũmataa nthĩnĩ wa Mwĩaĩi Yesũ Klĩsto kana maĩle kũtethya wĩa mavindĩtye na maiya lĩu ũla mathũkũmĩe mo ene.
13 Ĩndĩ inyw’ĩ, ana-a-asa, mũikanoe nĩ kwĩka ũseo. 14 Ĩndĩ ethĩwa ve mũndũ ũte kũatĩĩa ndeto sitũ ila syĩ valũanĩ ũũ, mwĩkĩei ũvano na mũyĩeka kũvulana nake nĩ kana ew’e nthoni. 15 Ĩndĩ mũikamwone ta mũmaitha, vandũ va ũu endeeai kũmũtaa ta mwana-a-asa.
16 Na Mwĩaĩi wa mũuo naendeee kũmũnenga mũuo kwa nzĩa syonthe. Mwĩaĩi nĩ ethĩwe nenyu iny’wonthe.
17 Nyie Vaulo nĩnamũkethya nĩandĩkĩte na kw’oko kwakwa mwene, na ũsu nĩw’o ũvano wa valũa syakwa syonthe; ũu nĩw’o nĩandĩkaa.
18 Ũseo mwingĩ wa Mwĩaĩi waitũ Yesũ Klĩsto nĩwĩthĩwe vamwe nenyu inyw’onthe.