Ĩvuku ya Mbee ya Mavinda

23 Yĩla Ndaviti wakũie na waĩ vakuvĩ na mũthya wa thayũ wake,* nĩwatwʼĩkĩthisye mwanae Solomoni mũsumbĩ wa Isilaeli. 2 Na ĩndĩ oombanyʼa anene onthe ma Isilaeli, athembi, na Alivai. 3 Alivai ala maĩ na myaka 30 na kwambata nĩmatalilwe; ũtalo woo, matalĩtwe mũndũũme kwa mũndũũme, maĩ 38,000. 4 Katĩ wa asu, 24,000 maĩ aũngamĩi ma wĩa wa nyũmba ya Yeova, na vaĩ anene na asili 6,000, 5 vamwe na asũvĩi ma mĩvĩa 4,000, na andũ 4,000 nĩmamũtaĩaa Yeova na mĩio ya wini ĩla Ndaviti waisye ũũ ĩũlũ wayo: “Nĩmĩseũvĩtye ya kũmũtaĩaa.”

6 Na ĩndĩ Ndaviti amavanga* ikundi kwosana na ana aa ma Livai: Ngelisoni, Koathi, na Melali. 7 Kuma kwa Angelisoni vaĩ Latani na Simei. 8 Ana ma Latani maĩ Yeielu, ũla waĩ mũũngamĩi, Nzethamu, na Yoeli, maĩ atatũ. 9 Ana ma Simei maĩ Selomothi, Aasieli, na Alani, maĩ atatũ. Asu nĩmo maĩ aũngamĩi ma nyũmba sya aa-ĩthe sya Latani. 10 Na ana ma Simei maĩ Yaathi, Nzina, Yeusi, na Mbelia. Asu me ana maĩ ana ma Simei. 11 Yaathi nĩwe waĩ mũũngamĩi, na aatĩĩwe nĩ Nzisa. Ĩndĩ Yeusi na Mbelia mayaĩ na ana aingĩ, na kwoou matalilwe ta maumĩte mũsyĩnĩ o ũmwe na manengwa kĩanda o kĩmwe.

12 Ana ma Koathi maĩ Amilamu, Isali, Eviloni, na Usieli, maĩ ana. 13 Ana ma Amilamu maĩ Alũni na Mose. Ĩndĩ Alũni aĩ avathiwe vyũ atheasye vala Vandũ Vatheu Vyũ, e na ana make, maumasye nthembo mbee wa Yeova, mamũthũkũmae, na maitangaasaa moathimo ĩsyĩtwanĩ yake mavinda onthe. 14 Ana ma Mose, mũndũ wa Ngai ũla wa w’o, matalanilwʼe mbaĩnĩ ya Alivai. 15 Ana ma Mose maĩ Ngelisomu na Elieseli. 16 Sevueli nĩwe waĩ mũũngamĩi ananĩ ma Ngelisomu. 17 Leavia nĩwe waĩ mũũngamĩi nzyawanĩ sya* Elieseli; Elieseli ndaĩ na ana angĩ, ĩndĩ ana ma Leavia maĩ aingĩ mũno. 18 Selomithi nĩwe waĩ mũũngamĩi ananĩ ma Isali. 19 Ana ma Eviloni maĩ Yelia, ũla waĩ mũũngamĩi, akaatĩĩwa nĩ Amalia, wa katatũ Yaanzieli, na wa kana Yekameamu. 20 Mika nĩwe waĩ mũũngamĩi ananĩ ma Usieli na aatĩĩwe nĩ Isia.

21 Ana ma Melali maĩ Mali na Musi. Ana ma Mali maĩ Eleasali na Kisi. 22 Eleasali akwie ate na ana, ĩndĩ aĩ na eĩtu oka. Kwoou ana ma Kisi, andũ ma mũsyĩ woo,* nĩmamatwaie. 23 Ana ma Musi maĩ Mali, Eteli, na Yelemothi, maĩ atatũ.

24 Asu nĩmo maĩ ana ma Livai. Maandĩkĩthiwʼe kwosana na nyũmba sya aa-ĩthe, kwosana na atongoi ma nyũmba sya aa-ĩthe. Kĩla ũmwe atalilwe na aandĩkĩthwʼa na ĩsyĩtwa yake, na ala maandĩkĩthiwʼe maĩ na myaka 20 na kwambata. Nĩmo matethasya wĩa nyũmbanĩ ya Yeova. 25 Nũndũ Ndaviti aisye atĩĩ: “Yeova Ngai wa Isilaeli nũnengete andũ make ũthũmũo, na akekalaa Yelusalemu tene na tene. 26 O na ĩngĩ, Alivai maikethĩawa maĩlĩte kũkua ĩeema ya ũthaithi kana kĩndũ o na kĩmwe kya ũthũkũmi wayo.” 27 Nĩkwĩthĩwa kwosana na mĩao ya mũthya ya Ndaviti, Alivai ala maĩ na myaka 20 na kwambata nĩmatalilwe. 28 Wĩa woo waĩ kũtetheesya ana ma Alũni ũthũkũminĩ wa nyũmba ya Yeova, kũũngamĩa iwanza, tũlumu twa kũĩĩa, kũthesya syĩndũ syonthe ntheu, na wĩanĩ o na wĩva wendaa kũtethwʼa ũthũkũminĩ wa nyũmba ya Ngai ũla wa w’o. 29 Matetheeasya wĩanĩ ũkonetye ĩla mĩkate yavangawa tũkundi ĩilĩanĩlwʼe,* mũtu mũvinyu wa nthembo ya lĩu wa mbaa ngetha, mĩkate mĩtheke ĩte ĩlawa, tũmĩkate tuĩwe kĩkaanginĩ, mũtu mũkime* mũvulanyʼe, na ithimo syonthe sya wingĩ na ũnene. 30 Maaĩle kũũngama kwakya kũthi kũla kũngĩ mamũtũngĩe Yeova mũvea na maimũtaĩa, na ĩ ya wĩoo mayĩka oou. 31 Nĩmatetheeasya ĩvinda o na yĩva nthembo sya kũvĩvwʼa ikumĩwʼa Yeova ĩvindanĩ ya Savato, ya kũtisa kwa myei, na mavindanĩ ma mboka ila itwʼĩtwe mwakanĩ, kwosana na ũtalo ũla wawetetwe mĩaonĩ ĩla yaĩ vo, na meekaa ũu kĩla ĩvinda mbee wa Yeova. 32 O na ĩngĩ, nĩmathĩnĩkĩaa ianda syoo ila syakonetye ĩeema ya ũthaithi, vala vandũ vatheu, na ila syakonetye ana-a-ĩthe, ana ma Alũni, kwondũ wa ũthũkũmi wa nyũmba ya Yeova.