Ĩvuku ya Kelĩ ya Asumbĩ

17 Mwakanĩ wa 12 wa Mũsumbĩ Aasu wa Yuta, Osiea mwana wa Ela nĩwatwʼĩkie mũsumbĩ wa Isilaeli e Samalia; asumbĩkie myaka kenda. 2 Nĩwaendeeie kwĩka kĩla kĩthũku methonĩ ma Yeova, ĩndĩ ti mũno ta asumbĩ ma Isilaeli ala maĩ mbee wake. 3 Mũsumbĩ Salimaneseli wa Asuli nĩwookie kũkita nake, na Osiea atwʼĩka mũthũkũmi wake na ambĩĩa kũmũĩva koti. 4 Ĩndĩ mũsumbĩ wa Asuli nĩwamanyie kana Osiea nĩwalikĩte mũvangonĩ wa kũmũmina, nũndũ aĩ anatũma andũ kwa Mũsumbĩ So wa Misili na ndaĩ anaete koti kwa mũsumbĩ wa Asuli o tondũ weekaa myakanĩ mĩvĩtu. Na kwoou mũsumbĩ wa Asuli amwova na ekala amũvingĩĩte yela.

5 Na ĩndĩ mũsumbĩ wa Asuli avithũkĩa nthĩ ĩsu yonthe, na avika Samalia na ekala amĩthyũlũlũkĩte kwa ĩvinda ya myaka ĩtatũ. 6 Na mwakanĩ wa kenda wa Osiea, mũsumbĩ wa Asuli nĩwasindie Samalia na amĩkwata. Na ĩndĩ oosa andũ ma Isilaeli ta mũtavo na amatwaa Asuli, na amanenga ũtũo kĩsionĩ kya Aalaa na kya Avoli vakuvĩ na ũsĩ wa Ngosani na ndũanĩ sya Ametia.

7 Ũndũ ũsu weekĩkie nũndũ andũ ma Isilaeli nĩmamũvĩtĩisye Yeova Ngai woo, ũla wamaumĩtye nthĩ ya Misili kũla masumbĩkĩtwe nĩ Valao mũsumbĩ wa Misili. Nĩmathaithaa* ngai ingĩ, 8 nĩmaatĩĩie syĩthĩo sya mbaĩ ila Yeova walũngĩtye ikauma mbee wa Aisilaeli, na nĩmaatĩĩie syĩthĩo ila asumbĩ ma Isilaeli mambĩĩisye.

9 Aisilaeli maatĩanĩaa na maũndũ ala mataĩle methonĩ ma Yeova Ngai woo. Nĩmaakaa kũndũ kũtũlu ndũanĩ syoo syonthe, kuma mwakonĩ mũtũlu wa mũsyaĩĩsya nginya ndũanĩ ĩla mbiĩĩe.* 10 Nĩmaendeeie kwĩseũvĩsya ituĩ sya ũthaithi na mĩtĩ ya ũthaithi* ĩũlũ wa kĩla kalĩma katũlu na ungu wa kĩla mũtĩ wĩ na matũ maingĩ; 11 na nĩmatumaa nthembo itoa ĩũlũ wa kũndũ kũu kwʼonthe kũtũlu, o ta mbaĩ ila Yeova walũngĩtye ikauma mbee woo na akaeka syoswe ta mũtavo. Nĩmaendeeie kwĩka maũndũ mathũku nĩ kana mamũthatye Yeova.

12 Nĩmaendeeie kũthũkũma mĩvwʼanano ya kũthatya,* ĩla Yeova wamakanĩtye ĩũlũ wayo akamea: “Mũyaĩlĩte o na vanini kwĩka ũu!” 13 Yeova nĩwatũmĩie athani make onthe na kĩla mwoni kũkanyʼa andũ ma Isilaeli na Yuta ĩngĩ na ĩngĩ, aimea: “Vĩndũkai mũtie mĩendele yenyu mĩthũku! Kwatai mĩao yakwa na motwʼĩo makwa kwosana na mĩao ĩla neeaĩe aa-ũmae menyu na ĩla namũtavisye kwĩsĩla athũkũmi makwa athani.” 14 Ĩndĩ mayaaĩthukĩĩsya, na nĩmaendeeie kũmya ngoo o ta* aa-ũmae moo ala mataamũĩkĩĩa Yeova Ngai woo. 15 Nĩmaendeeie kũlea myolooto yake na ũtianĩo ũla watianĩĩte na aa-ũmae moo na molilikanyʼo ala wamanengete nĩ kana amakanyʼe, na maendeea kũatĩĩa mĩvwʼanano ya mana na o namo matwʼĩka andũ vathei, maiatĩĩa mbaĩ ila syamathyũlũlũkĩte, ila Yeova wameaĩe maikaatĩĩe mĩtuo yasyo.

16 Nĩmaendeeie kũtia mĩao yonthe ya Yeova Ngai woo, na nĩmaseũvisye mĩvwʼanano ya kyũma* ya tũsaũ twĩlĩ na mũtĩ wa ũthaithi,* na nĩmakumanĩie nguthu yonthe ya matunĩ na mathũkũma Mbaali. 17 O na nĩmavĩtĩlasya ana na eĩtu moo mwakinĩ, nĩmaaũasya na kũmantha maũndũ matonya kũmonyʼa ĩũlũ wa ĩvinda yũkĩte, na nĩmaendeeie kwĩyumya vyũ* meke kĩla kĩthũku methonĩ ma Yeova nĩ kana mamũthatye.

18 Na kwoou, Yeova athatĩa Aisilaeli mũno, na nũndũ wa ũu, amavetanga mbee wa ũthyũ wake. Ndaatialya o na ũmwe ate o mbaĩ ya Yuta yĩ yoka.

19 O namo andũ ma Yuta mayaalũmanyʼa na mĩao ya Yeova Ngai woo; o namo nĩmaatĩĩie syĩthĩo ila andũ ma Isilaeli maatĩĩaa. 20 Yeova nĩwaleile nzyawa syonthe sya Isilaeli na asyĩkĩĩthya nthoni na ainengane mokonĩ ma avenani nginya aivetanga vyũ mbee wake. 21 Nĩwavetangie Isilaeli kuma ũtongoinĩ wa nyũmba ya Ndaviti, na manyuva Yelovoamu mwana wa Nevati atwʼĩke mũsumbĩ woo. Ĩndĩ Yelovoamu atuma Isilaeli yelelũka yaeka kũmũatĩĩa Yeova, na atuma meka naĩ ngito. 22 Na andũ ma Isilaeli maendeea kũkinyĩla naĩnĩ syonthe ila Yelovoamu weekĩte. Mayaaitia 23 nginya yĩla Yeova wavetangie Isilaeli mbee wa ũthyũ wake, o tondũ wathanĩte kwĩsĩla athũkũmi make onthe athani. Na kwoou andũ ma Isilaeli mooswa ta mũtavo kuma nthĩ yoo na matwawa nthĩ ya Asuli, kũla matwĩe nginya ũmũnthĩ.

24 Na ĩndĩ mũsumbĩ wa Asuli oosa andũ kuma Mbavilonĩ, Kutha, Ava, Amathi, na Sevalivaimu na amaete matũe ndũanĩ sya Samalia kũla Aisilaeli matwĩe; na mamesya kĩsio kya Samalia na matũa ndũanĩ ila syaĩ kũu. 25 Yĩla mambĩĩie kũtũa kũu, mayamũkĩaa* Yeova. Na kwoou Yeova atũma mĩnyambũ katĩ woo, na yooaa amwe moo. 26 Na ĩndĩ mũsumbĩ wa Asuli atavwʼa atĩĩ: “Andũ ma mbaĩ ila woosie ta mũtavo na wamatwaa ndũanĩ sya Samalia mayĩsĩ ũndũ Ngai wa nthĩ ĩsu ũthaithawa.* Na kwoou ethĩĩtwe aitũma mĩnyambũ katĩ woo ĩkamoaa, nũndũ vai ũmwe katĩ woo wĩsĩ ũndũ Ngai wa nthĩ ĩsu ũthaithawa.”

27 Nĩvo ĩndĩ mũsumbĩ wa Asuli waisye: “Nyuvai mũthembi ũmwe mwoosie ta mũtavo kuma kũu na mũimũtũnga akekale kũu nĩ kana amamanyĩsye ũndũ Ngai wa nthĩ ĩsu ũthaithawa.” 28 Na kwoou mũthembi ũmwe katĩ wa ala moosetwe ta mũtavo kuma Samalia asyoka na ambĩĩa kwĩkala Mbetheli, na ambĩĩa kũmamanyĩsya ũndũ maĩlĩte kũmũkĩa* Yeova.

29 Ĩndĩ kĩla mbaĩ nĩyaseũvisye ngai yayo,* na maia ngai isu nyũmbanĩ sya ũthaithi ila syaĩ ĩũlũ wa kũndũ kũtũlu kũla Asamalia maseũvĩtye; mbaĩ syĩ kĩvathũkanyʼo nĩsyeekie ũu ndũanĩ ila syatwĩe. 30 Na kwoou andũ ma Mbavilonĩ maseũvya Sukothi-mbenothi, andũ ma Kuthi maseũvya Nelikali, andũ ma Amathi maseũvya Asima, 31 na Aava maseũvya Niviasi na Talitaki. Asevalivaimu nĩmavĩvĩasya syana syoo mwakinĩ kwondũ wa Atalameleki na Anameleki, ngai sya Sevalivaimu. 32 O na kau nĩmamũkĩaa Yeova, nĩmanyuvie athembi katĩ wa andũ ala angĩ kwondũ wa kũla kũndũ kũtũlu, na asu nĩmo mathũkũmaa andũ nyũmbanĩ sya ũthaithi ila syaĩ ĩũlũ wa kũla kũndũ kũtũlu. 33 Na kwoou nĩmamũkĩaa Yeova, ĩndĩ mathaithaa ngai syoo kwosana na ũthaithi wa* mbaĩ ila maumĩte yĩla mataviwe.

34 Kũvika ũmũnthĩ maatĩĩaa mothaithi moo ma* tene. Vai ũmwe woo ũthaithaa* Yeova, na vai ũmwe ũatĩĩaa motwʼĩo make, sila wake, Mĩao yake, na kĩla wĩaĩte, kwosana na ũndũ Yeova wanengie ana ma Yakovo, ũla wavĩndũie ĩsyĩtwa yake amwĩta Isilaeli. 35 Yĩla Yeova watianĩaa ũtianĩo namo, ameaĩe ũũ: “Mũikaatate kũkĩa ngai ingĩ, na mũikaatate kũikumanĩa kana kũithũkũma kana kũithembea. 36 Ĩndĩ Yeova, ũla wamumisye nthĩ ya Misili na vinya mwingĩ na kwʼoko kũtambũũkye, nĩwe Ngai ũla mwaĩlĩte kũkĩa, na nĩwe mwaĩlĩte kũkumanĩa, na nĩwe mwaĩlĩte kũthembea nthembo. 37 Na mavinda onthe mwaĩlĩte kũatĩĩa nesa myolooto, motwʼĩo, ĩla Mĩao, na kĩla namwĩaĩe, o tondũ namũandĩkĩie, na mũyaĩlĩte o na vanini kũkĩa ngai ingĩ. 38 Na mũyaĩlĩte o na vanini kũlwa nĩ ũtianĩo ũla natianĩie nenyu, na mũyaĩlĩte o na vanini kũkĩa ngai ingĩ. 39 Ĩndĩ no Yeova Ngai wenyu mwaĩlĩte kũkĩa, nĩkwĩthĩwa nĩwe ũkamũvonokya kuma kwʼokonĩ kwa amaitha menyu onthe.

40 Ĩndĩ mayaaĩw’a, na nĩmaatĩĩie ũthaithi woo wa* tene. 41 Kwoou andũ ma mbaĩ isu nĩmamũkĩie Yeova, ĩndĩ no mathaithaa mĩvwʼanano yoo myasũvye. Na ana moo vamwe na esũkũũe moo mekaa o ta aa-ũmae moo, kũvika ũmũnthĩ.