ALIVAI

1 Na Yeova eeta Mose na aneena nake kuma ĩeemanĩ ya kũmbanĩa, aimwĩa: 2 “Neena na Aisilaeli* na ũimea, ‘Ethĩwa mũndũ o na wĩva katĩ wenyu nũkumĩsya Yeova nthembo kuma nyamũnĩ sya mũsyĩ, aĩlĩte kumya nthembo yake ngʼombenĩ kana malondunĩ na mbũinĩ.

3 “‘Ethĩwa nthembo yake nĩ nthembo ya kũvĩvwʼa na amyumya ngʼombenĩ, aĩlĩte kumya nyamũ nũme ĩte na thĩna o na ũmwe. Aĩlĩte kũmyumya kwa ngenda mbee wa Yeova mũomonĩ wa ĩeema ya kũmbanĩa. 4 Aĩlĩte kwilĩĩla kwʼoko kwake mũtwenĩ wa nthembo ĩsu ya kũvĩvwʼa, na ĩkeetĩkĩlwa kwondũ wake nĩ kana ewʼanĩthwʼe.

5 “‘Na ĩndĩ kasalũ kau no nginya kathĩnzĩwe mbee wa Yeova, na ana ma Alũni, ala athembi, makaete nthakame na maimĩminzangya ngalĩko syonthe sya kĩthembeo, kĩla kĩ mũomonĩ wa ĩeema ya kũmbanĩa. 6 Nthembo ĩsu ya kũvĩvwʼa yaĩlĩte kumwʼa kĩthuma na ĩitilangwa ilungu. 7 Ana ma Alũni, ala athembi, maĩlĩte kwĩkĩa mwaki kĩthembeonĩ na maivanga ngũ mwakinĩ ũsu. 8 Ana ma Alũni, ala athembi, makavanga ilungu sya nthembo ĩsu vamwe na mũtwe na mathunya ala mathyũlũlũkĩte mbio ngũnĩ ila syĩ mwakinĩ ĩũlũ wa kĩthembeo. 9 Maa mayo na maaũ mayo makathambwʼa na kĩwʼũ, na mũthembi akatuma yonthe ĩtoa kĩthembeonĩ ta nthembo ya kũvĩvwʼa, nthembo ĩvĩvĩtwʼe na mwaki ya mũuke ũũmwendeesya* Yeova.

10 “‘Ethĩwa nthembo yake kwondũ wa nthembo ya kũvĩvwʼa yumĩte ndĩthyanĩ, kuma tũtũlũmenĩ kana mbũinĩ, aĩlĩte kumya nyamũ nũme ĩte na thĩna o na ũmwe. 11 Yaĩlĩte kũthĩnzĩwa ngalĩkonĩ ya ĩũlũ ya kĩthembeo mbee wa Yeova, na ana ma Alũni, ala athembi, makaminzangya nthakame yayo ngalĩko syonthe sya kĩthembeo. 12 Akamĩtilanga ilungu, vamwe na mũtwe wayo na mathunya mayo ala mathyũlũlũkĩte mbio, mũthembi akaivanga ngũnĩ ila syĩ mwakinĩ ĩũlũ wa kĩthembeo. 13 Akathambya maa na maaũ na kĩwʼũ, na mũthembi akaumya yonthe na aituma ĩtoa kĩthembeonĩ. Nĩ nthembo ya kũvĩvwʼa, nthembo ĩvĩvĩtwʼe na mwaki ya mũuke ũũmwendeesya* Yeova.

14 “‘Ĩndĩ ethĩwa eumĩsya Yeova nyũnyi ta nthembo ya kũvĩvwʼa, akaumya nthembo yake kuma ndumbũnĩ kana maswiinĩ ma ĩvũĩ. 15 Mũthembi akamyumĩsya kĩthembeonĩ na aimĩtila mũtwe kwa kũmĩvũnya na aituma ĩtoa kĩthembeonĩ, ĩndĩ nthakame yayo yaĩlĩte kwĩtwa ũtee wa kĩthembeo. 16 Aĩlĩte kũvetanga kĩmoeo kyayo na mawʼĩa mayo na aisyĩkya ũtee wa kĩthembeo, ngalĩko ya wumĩlonĩ wa sua, vala mũu* wĩtawa. 17 Akamyatũanĩlya nthwaunĩ ate kũmĩaanyʼa ilungu ilĩ. Na ĩndĩ mũthembi ũsu akatuma ĩtoa kĩthembeonĩ ĩũlũ wa ngũ ila syĩ mwakinĩ. Nĩ nthembo ya kũvĩvwʼa, nthembo ĩvĩvĩtwʼe na mwaki ya mũuke ũũmwendeesya* Yeova.

2 “‘Yu ethĩwa mũndũ* eumĩsya Yeova nthembo ya lĩu, no nginya nthembo yake yĩthĩwe mũtu mũvinyu, na aĩlĩte kũwĩtĩkĩsya mauta na ayĩkĩa ũvani ĩũlũ wawʼo. 2 Na ĩndĩ akamĩete vala ve ana ma Alũni, ala athembi, na mũthembi akauta ngundi ĩmwe yusĩe ya mũtu ũsu mũvinyu na mauta na ũvani wawʼo wʼonthe, na aituma ũtoa kĩthembeonĩ ta nthembo ya ũlilikanyʼo,* nthembo ĩvĩvĩtwʼe na mwaki ya mũuke ũũmwendeesya* Yeova. 3 Kĩndũ o na kĩva kĩla kĩkatiala kya nthembo ĩsu ya lĩu nĩ kya Alũni na ana make. Nĩ kĩndũ kĩtheu vyũ. Kyumĩtwʼe nthembonĩ sya Yeova ivĩvĩtwʼe na mwaki.

4 “‘Ethĩwa wĩumya nthembo ya lĩu ĩla ĩuwĩwe ikonĩ, yaĩlĩte kwĩthĩwa ya mũtu mũvinyu, mĩkate ya kĩlinge ĩte ĩlawa yĩ ĩima katĩ ĩvulanĩtwʼe na mauta kana mĩkate mĩtheke ĩte ĩlawa ĩvakĩtwe mauta.

5 “‘Ethĩwa nthembo yaku nĩ nthembo ya lĩu kuma kĩkaanginĩ, yaĩlĩte kwĩthĩwa yĩ ya mũtu mũvinyu, ũte ĩlawa ũvulanĩtwʼe na mauta. 6 Yaĩlĩte kũtilangwa ilungu, na ũimĩtĩkĩsya mauta. Nĩ nthembo ya lĩu.

7 “‘Ethĩwa nthembo yaku nĩ nthembo ya lĩu ĩseũvĩwʼe kalaĩnĩ ka kũua, yaĩlĩte kwĩthĩwa yĩ ya mũtu mũvinyu wĩ na mauta. 8 Waĩlĩte kũetee Yeova nthembo ĩsu ya lĩu ĩla yaseũvwʼa na syĩndũ isu, na ĩkanengwa mũthembi, ũla ũkamĩete vakuvĩ na kĩthembeo. 9 Na mũthembi akoosa kĩlungu kĩmwe kya nthembo ya lĩu kĩthĩwe nthembo ya ũlilikanyʼo* na aituma kĩtoa kĩthembeonĩ ta nthembo ĩvĩvĩtwʼe na mwaki ya mũuke ũũmwendeesya* Yeova. 10 Kĩla kĩkatiala kya nthembo ĩsu ya lĩu nĩ kya Alũni na ana make. Nĩ kĩndũ kĩtheu vyũ. Kyumĩtwʼe nthembonĩ sya Yeova ivĩvĩtwʼe na mwaki.

11 “‘Vai nthembo ya lĩu ĩla mũkumĩsya Yeova yaĩlĩte kwĩthĩwa yĩkĩĩtwe ĩlawa, nũndũ mũyaĩle kũtuma mũtu o na wĩva mũkime* mũkaatu kana ũkĩ wa nzũkĩ ũtoa ta nthembo ĩvĩvĩtwʼe na mwaki kwondũ wa Yeova.

12 “‘No mũsyumĩsye Yeova ta nthembo ya ũsyao wa mbee, ĩndĩ iyaĩlĩte kũetwe kĩthembeonĩ ta mũuke wa kwendeesya.*

13 “‘Kĩla nthembo ya lĩu ũkumya yaĩlĩte kwĩthĩwa yĩkĩĩtwe mũnyũ; na ndũketĩkĩlye mũnyũ wa ũtianĩo wa Ngai waku wĩthĩwe ũte vo nthembonĩ yaku ya lĩu. Ũkaumanĩasya kĩla nthembo ũkumya vamwe na mũnyũ.

14 “‘Ethĩwa wĩumĩsya Yeova nthembo ya lĩu ya ũsyao mwĩu wa mbee, waĩlĩte kumya lĩu wa ngetha nzaũ ũkaangĩtwe* na mwaki, mbeke nzaũ ikimĩtwe ikaema kũvinyĩthwʼa, ta nthembo ya lĩu ya ũsyao waku mwĩu wa mbee. 15 Waĩlĩte kwĩkĩa mauta na ũyilĩĩla ũvani ĩũlũ wayo. Nĩ nthembo ya lĩu. 16 Mũthembi akatuma ũtoa ta nthembo ya ũlilikanyʼo,* nayo nĩ kĩlungu kĩmwe kya lĩu ũte mũvinyu na mauta vamwe na ũvani wayo wʼonthe, ta nthembo ĩvĩvĩtwʼe na mwaki kwondũ wa Yeova.

3 “‘Ethĩwa nthembo yake nĩ nthembo ya ngwatanĩo* na ethĩwa emyumya ndĩthyanĩ, yĩthĩwe nĩ nũme kana nĩ nga, aĩle kumya nyamũ ĩte kĩema* mbee wa Yeova. 2 Aĩle kwilĩĩla kwʼoko kwake mũtwenĩ wa nthembo ĩsu, na ĩkathĩnzĩwa mũomonĩ wa ĩeema ya kũmbanĩa; na ana ma Alũni, ala athembi, makaminzangya nthakame ĩsu ngalĩko syonthe sya kĩthembeo. 3 Akaumya kĩlungu kya nthembo ĩsu ya ngwatanĩo ta nthembo ĩvĩvĩtwʼe na mwaki kwondũ wa Yeova: mathunya ala mavwʼĩkĩte maa, mathunya onthe ala mathyũlũlũkĩte maa, 4 na mbio syelĩ vamwe na mathunya ala me ĩũlũ wasyo ala me vakuvĩ na inyunyu. O na ĩngĩ, akavetanga mathunya ma ĩtema vamwe na mbio. 5 Ana ma Alũni makatuma itoa kĩthembeonĩ ĩũlũ wa nthembo ya kũvĩvwʼa ĩla yilĩĩlwe ngũnĩ ila syĩ mwakinĩ; nĩ nthembo ĩvĩvĩtwʼe na mwaki yĩthĩwe mũuke ũũmwendeesya* Yeova.

6 “‘Ethĩwa akamumĩsya Yeova nthembo ya ngwatanĩo kuma ndĩthyanĩ, akaumya nyamũ nũme kana nyamũ nga ĩte na thĩna o na ũmwe. 7 Ethĩwa eumya katũlũme kethĩwe nthembo yake, akakaumya mbee wa Yeova. 8 Akailĩĩla kwʼoko kwake mũtwenĩ wa nthembo yake, na ĩkathĩnzĩwa mũomonĩ wa ĩeema ya kũmbanĩa. Ana ma Alũni makaminzangya nthakame yayo ngalĩko syonthe sya kĩthembeo. 9 Akaumya mathunya kuma nthembonĩ ĩsu ya ngwatanĩo methĩwe nthembo ĩvĩvĩtwʼe na mwaki kwondũ wa Yeova. Akavetanga kĩsithe kyonthe kĩnou kĩla kĩ vakuvĩ na ĩvĩndĩ ya mũongo, mathunya ala mavw’ĩkĩte maa, mathunya onthe ala mathyũlũlũkĩte maa, 10 na mbio syelĩ vamwe na mathunya ala me ĩũlũ wasyo ala me vakuvĩ na inyunyu. O na ĩngĩ, akavetanga mathunya ma ĩtema o vamwe na mbio. 11 Na mũthembi akatuma itoa kĩthembeonĩ ta lĩu,* nthembo ĩvĩvĩtwʼe na mwaki kwondũ wa Yeova.

12 “‘Ethĩwa nthembo yake nĩ mbũi, akamĩete mbee wa Yeova. 13 Akailĩĩla kwʼoko kwake mũtwenĩ wayo, na ĩkathĩnzĩwa mbee wa ĩeema ya kũmbanĩa, na ana ma Alũni no nginya maminzangye nthakame yayo ngalĩko syonthe sya kĩthembeo. 14 Kĩlungu kĩla ũkaumya ta nthembo yake ĩvĩvĩtwʼe na mwaki kwondũ wa Yeova nĩ mathunya ala mavw’ĩkĩte maa, mathunya onthe ala mathyũlũlũkĩte maa, 15 na mbio syelĩ vamwe na mathunya ala me ĩũlũ wasyo ala me vakuvĩ na inyunyu. O na ĩngĩ, akavetanga mathunya ma ĩtema o vamwe na mbio. 16 Mũthembi akatuma itoa kĩthembeonĩ ta lĩu,* nthembo ĩvĩvĩtwʼe na mwaki yĩthĩwe mũuke wa kwendeesya.* Mathunya onthe nĩ ma Yeova.

17 “‘Nĩ ũtwʼĩo wa ĩvinda yonthe kwondũ wa nzyawa syenyu, kũndũ kwʼonthe kũla mwĩkalaa: Mũikaye mathunya o na amwe kana nthakame o na ĩmwe.’”

4 Na Yeova aendeeie kwĩa Mose atĩĩ: 2 “Tavya Aisilaeli, ‘Ethĩwa mũndũ* nĩweeka naĩ ate kwenda kwa kwĩka ũndũ ũmwe katĩ wa maũndũ ala Yeova weeaie mayaĩle kwĩkwa:

3 “‘Ethĩwa mũthembi ũla wĩtĩkĩwʼe mauta nĩweeka naĩ na atuma andũ matalĩlwa mavĩtyo, no nginya aumĩsye Yeova kasalũ kate na thĩna o na ũmwe kethĩwe nthembo ya naĩ kwondũ wa naĩ ĩla weeka. 4 Akaete nzaũ ĩsu mũomonĩ wa ĩeema ya kũmbanĩa mbee wa Yeova na ayilĩĩla kwʼoko mũtwenĩ wa nzaũ ĩsu, na aĩlĩte kũthĩnzĩa nzaũ ĩsu mbee wa Yeova. 5 Na ĩndĩ mũthembi ũla wĩtĩkĩwʼe mauta akoosa nthakame ĩmwe ya nzaũ ĩsu na aimĩlikya ĩeemanĩ ya kũmbanĩa; 6 na mũthembi ũsu akainda kyaa kyake nthakamenĩ ĩsu na akatalĩkangya nthakame ĩmwe mavinda mũonza mbee wa Yeova, mbee wa vasia wa vandũ vatheu. 7 O na ĩngĩ, mũthembi ũsu akavaka nthakame ĩmwe mbyanĩ sya kĩthembeo kya ũvumba wĩ mũuke mũseo, kĩla kĩ mbee wa Yeova ĩeemanĩ ya kũmbanĩa; na aketa nthakame ĩla ĩtiele yonthe ya nzaũ ĩsu ĩtinanĩ ya kĩthembeo kya nthembo sya kũvĩvwʼa, kĩla kĩ mũomonĩ wa ĩeema ya kũmbanĩa.

8 “‘Na ĩndĩ akavetanga mathunya onthe ma nzaũ ĩsu ya nthembo ya naĩ, vamwe na mathunya ala mavwʼĩkĩte maa na mathunya ala mathyũlũlũkĩte maa, 9 na mbio syelĩ vamwe na mathunya ala me ĩũlũ wasyo ala me vakuvĩ na inyunyu. Na akavetanga mathunya ma ĩtema vamwe na mbio. 10 Ikeethĩwa o ta kĩla kyumawʼa nzaũnĩ ya nthembo ya ngwatanĩo. Na mũthembi ũsu akatuma itoa kĩthembeonĩ kya nthembo sya kũvĩvwʼa.

11 “‘Ĩndĩ kĩthuma kya nzaũ ĩsu na nyama syayo syonthe vamwe na mũtwe wayo, maaũ mayo, maa mayo, na kyaa kyayo, 12 kyonthe kĩla kĩtiele kya nzaũ ĩsu, akatuma kĩtwawa nza wa kambi vandũ vatheu vala mũu* wĩtawa, na akakĩvĩvĩsya ngũnĩ ila syĩ mwakinĩ. Kyaĩle kũvĩvĩwʼa vala mũu wĩtawa.

13 “‘Yu ethĩwa ũmbano w’onthe wa Isilaeli nĩweethĩwa na ĩvĩtyo nũndũ wa kwĩka naĩ ũte kwenda, ĩndĩ ũmbano ũsu ndũneesĩ kana nĩwĩkĩte kĩndũ Yeova wawĩaĩe ndũkeke, 14 na ĩndĩ naĩ ĩsu ĩimanyĩka, no nginya ũmbano ũsu wumye kasalũ kwondũ wa nthembo ya naĩ na ũikaete mbee wa ĩeema ya kũmbanĩa. 15 Atumĩa ma ũmbano ũsu makailĩĩla moko moo mũtwenĩ wa nzaũ ĩsu mbee wa Yeova, na nzaũ ĩsu ĩkathĩnzĩwa mbee wa Yeova.

16 “‘Na ĩndĩ mũthembi ũla wĩtĩkĩwʼe mauta akaete nthakame ĩmwe ya nzaũ ĩsu ĩeemanĩ ya kũmbanĩa. 17 Mũthembi ũsu akainda kyaa kyake nthakamenĩ ĩsu na aitalĩkangya ĩmwe mavinda mũonza mbee wa Yeova, mbee wa vasia. 18 Na ĩndĩ akavaka nthakame ĩmwe mbyanĩ sya kĩthembeo kĩla kĩ mbee wa Yeova, kĩla kĩ ĩeemanĩ ya kũmbanĩa; na aketa nthakame ĩla ĩtiele yonthe ĩtinanĩ ya kĩthembeo kya nthembo sya kũvĩvwʼa, kĩla kĩ mũomonĩ wa ĩeema ya kũmbanĩa. 19 Akavetanga mathunya mayo onthe na aituma matoa kĩthembeonĩ. 20 Aĩlĩte kwĩkana na nzaũ ĩsu o ũndũ wĩkanie na nzaũ ĩla ĩngĩ ya nthembo ya naĩ. Ũu nĩwʼo ũkamĩka, na mũthembi ũsu akamewʼanĩthya, namo makaekewa. 21 Akatuma nzaũ ĩsu ĩtwawa nza wa kambi na aimĩvĩvya, o ũndũ ũvĩvisye nzaũ ĩla ya mbee. Nĩ nthembo ya naĩ kwondũ wa ũmbano.

22 “‘Yĩla mũnene weeka naĩ ate kwenda kwa kwĩka ũndũ ũmwe katĩ wa maũndũ onthe ala Yeova Ngai wake wĩyĩaĩte mayaĩle kwĩkwa na nĩweethĩwa na ĩvĩtyo, 23 kana ethĩwa nĩwamanya naĩ wĩkĩte akatũla mwĩao, no nginya aete kathenge kate na thĩna o na ũmwe kethĩwe nthembo yake. 24 Akailĩĩla kwʼoko kwake mũtwenĩ wa kathenge kau na aikathĩnzĩa vala nthembo ya kũvĩvwʼa ĩthĩnzĩawa mbee wa Yeova. Nĩ nthembo ya naĩ. 25 Mũthembi akatola nthakame ĩmwe ya nthembo ya naĩ na kyaa kyake na aimĩvaka mbyanĩ sya kĩthembeo kya nthembo sya kũvĩvwʼa, na aketa nthakame ĩla ĩtiele ĩtinanĩ ya kĩthembeo kya nthembo sya kũvĩvwʼa. 26 Akatuma mathunya mayo onthe matoa kĩthembeonĩ o ta mathunya ma nthembo ya ngwatanĩo; na mũthembi ũsu akamwĩwʼanĩthya nũndũ wa naĩ yake, nake akaekewa.

27 “‘Ethĩwa mũndũ o na wĩva* katĩ wa andũ ma nthĩ ĩno nĩweeka naĩ ate kwenda na nĩweethĩwa na ĩvĩtyo nũndũ wa kwĩka ũndũ ũmwe katĩ wa maũndũ ala Yeova wĩyĩaĩte kana mayaĩle kwĩkwa, 28 kana ethĩwa nĩwamanya naĩ wĩkĩte, aĩlĩte kũete kavalika kate na thĩna o na ũmwe kethĩwe nthembo yake kwondũ wa naĩ ĩla wĩkĩte. 29 Akailĩĩla kwʼoko kwake mũtwenĩ wa nthembo ĩsu ya naĩ na aithĩnzĩa nthembo ĩsu ya naĩ vala nthembo ya kũvĩvwʼa ĩthĩnzĩawa. 30 Mũthembi akatola nthakame ĩmwe yayo na kyaa kyake na aimĩvaka mbyanĩ sya kĩthembeo kya nthembo sya kũvĩvwʼa, na aketa nthakame ĩla ĩtiele yonthe ĩtinanĩ ya kĩthembeo kĩu. 31 Akavetanga mathunya mayo onthe, o tondũ mathunya mavetangawa nthembonĩ ya ngwatanĩo, na mũthembi akatuma matoa kĩthembeonĩ ta mũuke ũũmwendeesya* Yeova; na mũthembi ũsu akamwĩwʼanĩthya, nake akaekewa.

32 “‘Ĩndĩ ethĩwa eumya kalondu kethĩwe nthembo yake ya naĩ, aĩlĩte kũete kalondu kaka kate na thĩna o na ũmwe. 33 Akailĩĩla kwʼoko kwake mũtwenĩ wa nthembo ĩsu ya naĩ na aimĩthĩnza ta nthembo ya naĩ vala nthembo ya kũvĩvwʼa ĩthĩnzĩawa. 34 Mũthembi akatola nthakame ĩmwe ya nthembo ya naĩ na kyaa kyake na aimĩvaka mbyanĩ sya kĩthembeo kya nthembo sya kũvĩvwʼa, na aketa nthakame ĩla ĩtiele yonthe ĩtinanĩ ya kĩthembeo kĩu. 35 Akavetanga mathunya mayo onthe o ũndũ mathunya ma katũlũme ka nthembo ya ngwatanĩo mavetangawa, na mũthembi ũsu akatuma matoa kĩthembeonĩ ĩũlũ wa nthembo sya Yeova ivĩvĩtwʼe na mwaki; na mũthembi ũsu akamwĩwʼanĩthya nũndũ wa naĩ ĩla wĩkĩte, nake akaekewa.

5 “‘Ethĩwa mũndũ* nĩweeka naĩ nũndũ nĩweewʼa wĩtano wa ũtheinĩ wa kumya ũkũsĩ* na we nĩ ngũsĩ kana nĩwonete ũndũ ũsu kana akaũmanya na ayĩema kũũweta, akasũngĩa nũndũ wa ĩvĩtyo yake.

2 “‘Kana yĩla mũndũ* wakwata kĩndũ o na kĩva kĩvuku, kĩthĩwe nĩ mwĩĩ mũkwʼũ wa nyamũ ya kĩthekanĩ mbuku, nyamũ ya mũsyĩ mbuku, kana kyũmbe o na kĩva kĩvuku katĩ wa ila syĩkalaa syĩ ikundi, akeethĩawa e mũvuku na akeethĩwa na ĩvĩtyo o na ethĩwa ndesĩ. 3 Kana ethĩwa mũndũ atesĩ nĩwakwata ũvuku wa mũndũ, kĩndũ o na kĩva kĩvuku kĩla kĩtonya kũtuma ethĩwa e mũvuku, na nĩwamanya, akeethĩawa e na mavĩtyo.

4 “‘Kana ethĩwa mũndũ* nĩweevĩta na mĩtũkĩ kwĩka ũndũ, wĩthĩwe nĩ kwĩka ũndũ mũseo kana nĩ kwĩka ũndũ mũthũku, o na ethĩwa nĩ ũndũ ũilye ata, na ndeeĩsĩ, na ĩndĩ ayĩsa kũmanya kana evĩtie na mĩtũkĩ, akeethĩawa na ĩvĩtyo.*

5 “‘Ethĩwa e na ĩvĩtyo nũndũ wa ũndũ ũmwe katĩ wa asu, no nginya aumbũle ũndũ ũnavĩtangisye. 6 O na ĩngĩ, akamũetee Yeova nthembo ya ĩvĩtyo kwondũ wa naĩ ĩla wĩkĩte, nayo nthembo ĩsu nĩ, nyamũ nga kuma ndĩthyanĩ, yĩthĩwe nĩ kalondu kaka kana nĩ kavalika, kwondũ wa nthembo ya naĩ. Na ĩndĩ mũthembi akamwĩwʼanĩthya nũndũ wa naĩ yake.

7 “‘Ĩndĩ, ethĩwa ndatonya kumya ĩlondu, no nginya amũetee Yeova ndumbũ ilĩ kana maswii elĩ ma ĩvũĩ methĩwe nthembo ya ĩvĩtyo kwondũ wa naĩ yake, ĩmwe kwondũ wa nthembo ya naĩ na ĩmwe kwondũ wa nthembo ya kũvĩvwʼa. 8 Akasiete vala ve mũthembi, ũla ũkamba kumya ĩmwe kwondũ wa nthembo ya naĩ na aimĩtila mũtwe kwa kũmĩvũnya ngalĩko ya mbee ya ngingo yayo, ate kũmĩtila vyũ. 9 Akatalĩkangya nthakame ĩmwe ya nthembo ya naĩ ngalĩko ĩmwe ya kĩthembeo, ĩndĩ nthakame ĩla yatiala akamĩta ĩtinanĩ ya kĩthembeo. Nĩ nthembo ya naĩ. 10 Akeekana na nyũnyi ĩla ĩngĩ kwosana na mũtalatala ũla waĩle kũatĩĩwa nthembo sya kũvĩvwʼa iyumwʼa; na mũthembi akamwĩwʼanĩthya nũndũ wa naĩ ĩla wĩkĩte, nake akaekewa.

11 Yu ethĩwa ndatonya kumya ndumbũ ilĩ kana maswii elĩ ma ĩvũĩ, no nginya aete kĩlungu kya ĩkũmi kya eva* ya mũtu mũvinyu wĩthĩwe nthembo ya naĩ. Ndaĩlĩte kũwongela mauta kana kwilĩĩla ũvani ĩũlũ wawʼo, nũndũ nĩ nthembo ya naĩ. 12 Akaũetee mũthembi, na mũthembi ũsu akauta ngundi ĩmwe yusĩe wĩthĩwe nthembo ya ũlilikanyʼo* na aituma ũtoa kĩthembeonĩ ĩũlũ wa nthembo sya Yeova ivĩvĩtwʼe na mwaki. Nĩ nthembo ya naĩ. 13 Mũthembi akamwĩwʼanĩthya nũndũ wa naĩ ĩla wĩkĩte, naĩ ĩmwe katĩ wa isu syawetwa, nake akaekewa. Kĩla kĩkatiala kya nthembo ĩsu kĩkeethĩwa kya mũthembi, o ta nthembo ya lĩu.’”

14 Yeova aendeeie kũneena na Mose, ayasya: 15 “Ethĩwa mũndũ* nĩweethĩwa ate mũĩkĩĩku kwa kwĩka naĩ ate kwenda ũndũnĩ ũkonetye syĩndũ ntheu sya Yeova, akaetee Yeova ndũũme ĩte na thĩna o na ũmwe kuma ndĩthyanĩ yake yĩthĩwe nthembo ya ĩvĩtyo; thooa wayo ũkathimwa na sekeli* sya vetha kwosana na kĩthimo kya sekeli ya vala vandũ vatheu.* 16 Na akaĩvĩa naĩ ĩla wĩkĩte ũndũnĩ ũsu ũkonetye vandũ vatheu, o na ĩngĩ, akongela kĩlungu kya katano kya thooa wayo. Akakĩnenga mũthembi, nĩ kana mũthembi ũsu amwĩwʼanĩthye atũmĩĩte ndũũme ya nthembo ya ĩvĩtyo, nake akaekewa.

17 “‘Ethĩwa mũndũ* nĩweeka naĩ kwa kwĩka ũndũ ũmwe katĩ wa maũndũ ala Yeova wĩyĩaĩte maikekwe, o na ethĩwa ndeeĩsĩ akeethĩawa na ĩvĩtyo na akasũngĩa kwondũ wa ĩvĩtyo yake. 18 Aĩlĩte kũetee mũthembi ndũũme ĩte na thĩna o na ũmwe kuma ndĩthyanĩ yake kwosana na ũndũ thooa wayo ũkwoneka wĩana, kwondũ wa nthembo ya ĩvĩtyo. Na ĩndĩ mũthembi akamwĩwʼanĩthya nũndũ wa ĩvĩtyo yĩla wĩkie ate kwenda na atesĩ, nake akaekewa. 19 Nĩ nthembo ya ĩvĩtyo. Vate nzika nũmũvĩtanĩsye Yeova.”

6 Yeova aendeeie kwĩa Mose atĩĩ: 2 “Ethĩwa mũndũ* nĩweeka naĩ na eethĩwa ate mũĩkĩĩku kwa Yeova kwa kũkenga mũtũi wake ũndũnĩ ũkonetye kĩndũ ũnanengiwe asũvĩe, kana kĩndũ ũnatiĩwe, kana ooyĩa mũtũi wake kana amũvena, 3 kana nĩwoona kĩndũ kyaĩte na aikengana ĩũlũ wakyo, na ethĩwa nĩweevĩta kwa ũvũngũ ĩũlũ wa naĩ o na yĩva ta ĩsu ũtonya kwĩka, ũũ nĩwʼo waĩle kwĩka: 4 Ethĩwa nĩwĩkĩte naĩ na e na ĩvĩtyo, no nginya atũnge kĩla ũyĩte, kĩla ũvenanĩte na vinya, kĩla wosete kwa ũkengani, kĩla ũnanengetwe asũvĩe, kana kĩla kĩnaaĩte na akyona, 5 kana kĩndũ o na kĩva kĩla weevĩta na ũvũngũ ĩũlũ wakyo, na no nginya akĩĩvĩe vyũ, na akongela kĩlungu kya katano kya thooa wakyo. Akakĩnenga mwene mũthenya ũla ĩvĩtyo yake yĩkamanyĩka. 6 Na akaetee mũthembi ndũũme ĩte na thĩna o na ũmwe kuma ndĩthyanĩ yake yumĩwʼe Yeova ta nthembo ya ĩvĩtyo kwosana na ũndũ thooa wa nthembo ya ĩvĩtyo ũkwoneka wĩana. 7 Na mũthembi akamwĩwʼanĩthya mbee wa Yeova, nake akaekewa kwondũ wa ũndũ o na wĩva wĩthĩwa ekĩte ũkatuma ethĩwa na ĩvĩtyo.”

8 Yeova aendeeie kũneena na Mose, ayasya: 9 “Ĩaĩe Alũni na ana make na ũyasya, ‘Ũũ nĩwʼo mwĩao wa nthembo ya kũvĩvwʼa: Nthembo ya kũvĩvwʼa ĩkekalaa mwakinĩ ũla wĩ kĩthembeonĩ ũtukũ wʼonthe nginya kwakya, na mwaki waĩle kwĩkalawʼa wakanĩte kĩthembeonĩ. 10 Mũthembi akeekĩa ngũa yake ya ũthembi ya katane, na akeekĩa kĩnyasa kya* katane. Na ĩndĩ akavetanga mũu* wa nthembo ya kũvĩvwʼa ĩla ĩvĩvĩwʼe nĩ mwaki kĩthembeonĩ na akawia ũtee wa kĩthembeo. 11 Na ĩndĩ akaumya ngũa syake na ayĩkĩa ngũa ingĩ na akatwaa mũu ũsu vandũ vatheu nza wa kambi. 12 Mwaki ũkekalawʼa wakanĩte kĩthembeonĩ. Ndwaĩlĩte kũvoa. No nginya mũthembi avĩvĩasye ngũ vau kĩla kwakya na aivanga nthembo ya kũvĩvwʼa vo, na akatumaa mathunya ma nthembo sya ngwatanĩo matoa ĩũlũ wakyo. 13 Mavinda onthe mwaki waĩlĩte kwĩkalawʼa wakanĩte kĩthembeonĩ. Ndwaĩlĩte kũvoa.

14 “‘Yu ũũ nĩwʼo mwĩao wa nthembo ya lĩu: Inywʼĩ ana ma Alũni mũkamĩetae mbee wa Yeova, mbee wa kĩthembeo. 15 Ũmwe woo akauta ngundi ĩmwe yusĩe ya mũtu mũvinyu wa nthembo ya lĩu na mauta amwe mayo na ũvani wʼonthe ũla wĩ nthembonĩ ya lĩu na akatuma ũtoa kĩthembeonĩ ta mũuke wa kwendeesya* wa nthembo ya ũlilikanyʼo* kwondũ wa Yeova. 16 Alũni na ana make makaya kĩla kĩkatiala kya nthembo ĩsu. Ĩkaĩwa ta mũkate ũte ĩlawa vandũnĩ vatheu. Makaĩĩa kĩwanzanĩ kya ĩeema ya kũmbanĩa. 17 Ĩyaĩle kũuwanĩwʼa na kĩndũ kĩngĩ kĩ ĩlawa. Nĩmanengete yĩthĩwe kĩlungu kyoo kuma nthembonĩ syakwa ivĩvĩtwʼe na mwaki. Nĩ kĩndũ kĩtheu vyũ, o ta nthembo ya naĩ na o ta nthembo ya ĩvĩtyo. 18 Kĩla mũndũũme ananĩ ma Alũni akamĩĩsaa. Nĩ kĩlungu kyoo kya ĩvinda yonthe nzyawanĩ syenyu kuma nthembonĩ sya Yeova sya kũvĩvwʼa na mwaki. Kĩla kĩndũ kĩikiita* kĩkeethĩwa kĩ kĩtheu.’”

19 Yeova aneenie na Mose ĩngĩ amwĩa: 20 “Ĩĩ nĩyo nthembo ĩla Alũni na ana make makaumĩsya Yeova mũthenyanĩ ũla ũketĩkĩwʼa mauta: kĩlungu kya ĩkũmi kya eva* ya mũtu mũvinyu ta nthembo ya lĩu ĩla yumawʼa kĩla ĩvinda, nusu yawʼo kwakya na nusu ĩla ĩngĩ yawʼo ĩ ya wĩoo. 21 Ũkauwa na mauta kĩkaanginĩ. Ũkaũete ũvulanĩtwʼe nesa na mauta na ũyumya wĩ ilungu mbue sya nthembo ya lĩu wĩthĩwe mũuke ũũmwendeesya* Yeova. 22 Mũthembi ũla wĩtĩkĩwʼe mauta ũla ũkoka ĩtina wake kuma ananĩ make akaũseũvya. Nĩ mwolooto wa ĩvinda yonthe: Nthembo ĩsu yĩ nima ĩkavĩvwʼa ĩtoe kwondũ wa Yeova. 23 Kĩla nthembo ya lĩu ya mũthembi yaĩlĩte kumwʼa yĩ nima. Ndyaĩlĩte kũĩwa.”

24 Yeova aneenie na Mose ĩngĩ na amwĩa: 25 “Tavya Alũni na ana make, ‘Ũũ nĩwʼo mwĩao wa nthembo ya naĩ: Vala nthembo ya kũvĩvwʼa ĩthĩnzĩawa, no vo nthembo ya naĩ yĩthĩnzĩawa mbee wa Yeova. Nĩ kĩndũ kĩtheu vyũ. 26 Mũthembi ũla wĩmyumya kwondũ wa naĩ akamĩya. Ĩkaĩĩawa vandũ vatheu, kĩwanzanĩ kya ĩeema ya kũmbanĩa.

27 “‘Kĩla kĩndũ kyakiita nyama yayo kĩkeethĩawa kĩtheu, na yĩla mũndũ watalĩkĩlya nthakame yayo ngũanĩ yake, waĩlĩte kũthambĩsya kĩu kyatalĩkĩlwa nĩ nthakame vandũ vatheu. 28 Mũio wa yũmba ũla ĩnatheũkĩiwʼe waĩlĩte kũawa. Ĩndĩ ethĩwa ĩnatheũkĩiwʼe mũionĩ wa ũthuku, no nginya mũio ũsu ũngʼũlwe na ũithambwʼa na kĩwʼũ.

29 “‘Kĩla mũndũũme katĩ wa athembi akamĩya. Nĩ kĩndũ kĩtheu vyũ. 30 O na ũu wĩ o vo, vai nthembo ya naĩ yaĩlĩte kũĩwa ethĩwa nthakame ĩmwe yayo nĩyaetwe vandũnĩ vatheu ĩeemanĩ ya kũmbanĩa nĩ kana yĩwʼanĩthye mũndũ na Ngai. Yaĩlĩte kũvĩvwʼa na mwaki.

7 “‘Ũũ nĩwʼo mwĩao wa nthembo ya ĩvĩtyo: Nĩ kĩndũ kĩtheu vyũ. 2 Makathĩnzĩaa nthembo ya ĩvĩtyo vala mathĩnzĩaa nthembo sya kũvĩvwʼa, na nthakame yayo yaĩlĩte kũminzangwʼa ngalĩko syonthe sya kĩthembeo. 3 Akaumya mathunya mayo onthe, vamwe na kĩsithe kyayo kĩnou, mathunya ala mavwʼĩkĩte maa, 4 na mbio syelĩ vamwe na mathunya masyo ala me vakuvĩ na inyunyu. O na ĩngĩ, akavetanga mathunya ma ĩtema vamwe na mbio. 5 Mũthembi akatuma itoea kĩthembeonĩ ta nthembo ĩvĩvĩtwʼe na mwaki kwondũ wa Yeova. Nĩ nthembo ya ĩvĩtyo. 6 Kĩla mũndũũme katĩ wa athembi akamĩya, na yaĩlĩte kũĩĩwa vandũ vatheu. Nĩ kĩndũ kĩtheu vyũ. 7 Mwĩao ũla ũkonetye nthembo ya naĩ nowʼo ũkatũmĩawa nthembonĩ ya ĩvĩtyo; nyama ya nthembo ĩsu nĩ ya mũthembi ũla wamyumya ĩvwʼĩke naĩ.

8 “‘Yĩla mũthembi waumya nthembo ya kũvĩvwʼa kwondũ wa mũndũ, kĩthuma kya nthembo ya kũvĩvwʼa ĩla waetewe kĩkeethĩawa kya mũthembi ũsu.

9 “‘Kĩla nthembo ya lĩu yauĩwa ikonĩ kana yauĩwa kalaĩnĩ ka kũua kana kĩkaanginĩ ĩkeethĩawa ya mũthembi ũla wamyumya. Ĩkatwʼĩkaa yake. 10 Ĩndĩ kĩla nthembo ya lĩu ĩla ĩvulanĩtwʼe na mauta kana ĩtavulanĩtwʼe na mauta ĩkeethĩawa ya ana ma Alũni onthe; kĩla ũmwe akakwataa kĩlungu kĩanene na kya ũla ũngĩ.

11 “‘Yu ũũ nĩwʼo mwĩao wa nthembo ya ngwatanĩo ĩla mũndũ ũtonya kumĩsya Yeova: 12 Ethĩwa emyumya nĩ kana atũnge mũvea, akaumya nthembo ĩsu ya kũtũnga mũvea vamwe na mĩkate ya kĩlinge ĩte ĩlawa yĩ ĩima katĩ ĩvulanĩtwʼe na mauta, mĩkate mĩtheke ĩte ĩlawa ĩvakĩtwe mauta, na mĩkate ya kĩlinge yĩ ĩima katĩ ĩseũvĩtwʼe na mũtu mũvinyu, ũvulanĩtwʼe nesa na ũkakimwa na mauta. 13 Akaumya nthembo yake vamwe na mĩkate ya kĩlinge yĩkĩĩtwe ĩlawa yĩ ĩima katĩ na nthembo ya kũtũnga mũvea ya nthembo syake sya ngwatanĩo. 14 Aĩle kumya mũkate ũmwe wa kĩla mũthemba nthĩnĩ wayo wĩthĩwe kĩlungu kĩtheu kwondũ wa Yeova; kĩkeethĩawa kya mũthembi ũla ũkũminzangya nthakame ya nthembo sya ngwatanĩo. 15 Nyama sya nthembo ya kũtũnga mũvea ya nthembo syake sya ngwatanĩo syaĩlĩte kũĩwa mũthenya ũla wamyumya. Ndaĩlĩte kwia o na ĩmwe nginya kwakya.

16 “‘Ethĩwa nthembo yake nĩ wĩvĩto kana nĩ nthembo ya ngenda, yaĩlĩte kũĩwa mũthenya ũla waumya nthembo yake, na kĩla kyatiala no kĩĩwe mũthenya ũla ũatĩĩe. 17 Ĩndĩ nyama ĩla yatiala ya nthembo ĩsu yaĩlĩte kũvĩvwʼa na mwaki mũthenya wa katatũ. 18 O na vailye ũu, ethĩwa nyama ĩmwe ya nthembo yake ya ngwatanĩo nĩyaĩwa mũthenya wa katatũ, ũla ũkũmyumya ndaketĩkĩlwa. Kĩla waumya kĩiketĩkĩlwa; nĩ ũndũ wa kũthatya, na mũndũ* ũla waya ĩmwe akasũngĩa kwondũ wa naĩ yake. 19 Nyama ĩla yakiita kĩndũ o na kĩva kĩvuku ndyaĩlĩte kũĩwa. Yaĩlĩte kũvĩvwʼa na mwaki. Kĩla mũndũ ũte mũvuku no aye nyama ĩte mbuku.

20 “‘Ĩndĩ ethĩwa mũndũ* o na wĩva mũvuku nĩwaya nyama ya nthembo ya ngwatanĩo, ĩla nĩ ya Yeova, no nginya mũndũ* ũsu avetangwe* andũnĩ make. 21 Ethĩwa mũndũ* nĩwakiita kĩndũ o na kĩva kĩvuku, kĩthĩwe nĩ ũvuku wa mũndũ kana nyamũ mbuku kana kĩndũ o na kĩva kĩvuku na kya kũthatya, na nĩwaya nyama ĩmwe ya nthembo ya ngwatanĩo, ĩla nĩ ya Yeova, no nginya mũndũ* ũsu avetangwe* andũnĩ make.’”

22 Yeova aendeeie kũneena na Mose, aimwĩa: 23 “Tavya Aisilaeli, ‘Mũikaaye mathunya o na meva ma nzaũ kana ma katũlũme kana ma mbũi. 24 Mathunya ma nyamũ yĩthĩiwe yĩ ngwʼũ na mathunya ma nyamũ yũaiwe nĩ nyamũ ĩngĩ no mũmatũmĩe ũndũnĩ ũngĩ o na wĩva, ĩndĩ mũikaamaye nongi. 25 Nũndũ mũndũ o na wĩva ũla waya mathunya ma nyamũ ĩla waumya ta nthembo ĩvĩvĩtwʼe na mwaki kwondũ wa Yeova no nginya avetangwe* andũnĩ make.

26 “‘Mũikaaye nthakame o na ĩmwe mwĩ vandũ o na va vala mwĩkalaa, yĩthĩwe nĩ ya nyũnyi kana nĩ ya nyamũ. 27 Mũndũ* o na wĩva ũla wĩya nthakame o na ĩmwe no nginya avetangwe* andũnĩ make.’”

28 Yeova aendeeie kũneena na Mose, aimwĩa: 29 “Tavya Aisilaeli, ‘Mũndũ o na wĩva ũkumĩsya Yeova nthembo ya ngwatanĩo akaete kĩlungu kya nthembo ĩsu kĩthĩwe nthembo ya Yeova. 30 Akaete na moko make mwene mathunya vamwe na nyama ya kĩthũi syĩthĩwe nthembo ĩvĩvĩtwʼe na mwaki kwondũ wa Yeova, na akaivyũlya mbee na ĩtina ta nthembo ya kũvyũlwʼa mbee wa Yeova. 31 Mũthembi akatuma mathunya asu matoa kĩthembeonĩ, ĩndĩ nyama ya kĩthũi ĩkeethĩwa ya Alũni na ana make.

32 “‘Ũkanenga mũthembi kũũ kwa ngalĩko ya aũme kwĩthĩwe kĩlungu kĩtheu kuma nthembonĩ syaku sya ngwatanĩo. 33 Mwana wa Alũni ũla waumya nthakame ya nthembo sya ngwatanĩo na mathunya akanengawe kũũ kwa ngalĩko ya aũme ta kĩlungu kyake. 34 Nũndũ nĩngwosa nyama ya kĩthũi ya nthembo ya kũvyũlwʼa na kũũ kwa kĩlungu kĩtheu kuma nthembonĩ sya ngwatanĩo sya Aisilaeli, na nĩngũinenga mũthembi Alũni na ana make ta mwolooto wa ĩvinda yonthe kwondũ wa Aisilaeli.

35 “‘Kĩu nĩkyo kĩlungu kĩla kyaumawʼa nthembonĩ sya Yeova ivĩvĩtwʼe na mwaki na kĩyĩiwa ũtee kwondũ wa athembi, kwondũ wa Alũni na ana make, mũthenyanĩ ũla metĩkĩiwʼe mauta mathũkũme Yeova me athembi. 36 Yeova nĩweeaie manengawe kĩlungu kĩu kuma kwa Aisilaeli mũthenyanĩ ũla wametĩkĩisye mauta. Nĩ ũtwʼĩo wa ĩvinda yonthe nzyawanĩ syoo.’”

37 Ũũ nĩwʼo mwĩao ũla ũkonetye nthembo ya kũvĩvwʼa, nthembo ya lĩu, nthembo ya naĩ, nthembo ya ĩvĩtyo, nthembo ya kũnenga andũ ũkũmũ wa kwĩthĩwa athembi, na nthembo ya ngwatanĩo, 38 o tondũ Yeova weeĩaĩe Mose Kĩĩmanĩ kya Sinaĩ mũthenyanĩ ũla Mose weeĩaĩe Aisilaeli maumĩsye Yeova nthembo syoo weũnĩ wa Sinaĩ.

8 Yeova aendeeie kũneena na Mose, ayasya: 2 “Osa Alũni na ana make, ngũa syoo sya ũthembi, mauta ma kwĩtĩkĩsya, nzaũ ya nthembo ya naĩ, ndũũme ilĩ, na kĩkavũ kya mĩkate ĩte ĩlawa, 3 na ũyũmbanyʼa Aisilaeli onthe mũomonĩ wa ĩeema ya kũmbanĩa.”

4 Na ĩndĩ Mose eeka o ũndũ Yeova wamwĩaĩe, na Aisilaeli moombanĩa mũomonĩ wa ĩeema ya kũmbanĩa. 5 Nĩvo ĩndĩ Mose weeie Aisilaeli atĩĩ: “Ũũ nĩwʼo Yeova ũtwĩaĩe twĩke.” 6 Kwoou Mose athengeesya Alũni na ana make na amathambya na kĩw’ũ. 7 Ĩtina wa ũu, amwĩkĩa kanzũ, amwova mũsivi wa kanzũ, amwĩkĩa ĩkoti yĩte moko, na amwĩkĩa evoti na amyova na mũsivi mũtume* wa evoti, yalũma vyũ. 8 Nĩwasyokie amwĩkĩa kamũvuko ka kĩthũinĩ na eekĩa Ulimu na Thumimu kamũvukonĩ kau. 9 Na ĩndĩ amwĩkĩa kĩlemba mũtwenĩ wake, na ngalĩko ya mbee ya kĩlemba kĩu eekĩa kalungu keũtisatisa ka thaavu, ũla wonanyʼo mũtheu wa kwĩyumya,* o tondũ Yeova weeaĩe Mose.

10 Na Mose oosa mauta ma kwĩtĩkĩsya na etĩkĩsya ĩeema ya ũthaithi mauta na kyonthe kĩla kyaĩ nthĩnĩ wayo na aithesya. 11 Ĩtina wa ũu, nĩwatalĩkangilye mauta amwe mavinda mũonza kĩthembeonĩ na etĩkĩsya kĩthembeo mauta na mĩio yakyo yonthe na kalaĩ na kĩndũ kya kũkailĩĩla nĩ kana aithesye. 12 Mũthya nĩwetie mauta amwe ma kwĩtĩkĩsya mũtwenĩ wa Alũni. Amwĩtĩkĩisye mauta nĩ kana amũthesye.

13 Na ĩndĩ Mose athengeesya ana ma Alũni na amekĩa kanzũ na amova mĩsivi ya kanzũ na amekĩa ngovia, o tondũ Yeova weeaĩe Mose.

14 Ĩtina wa ũu, nĩwaetie nzaũ ya nthembo ya naĩ, na Alũni na ana make mailĩĩla moko moo mũtwenĩ wa nzaũ ĩsu ya nthembo ya naĩ. 15 Mose nĩwamĩthĩnzie na atola nthakame yayo na kyaa kyake na amĩvaka mbyanĩ sya kĩthembeo ngalĩko syonthe, na athesya kĩthembeo kĩikethĩwe na naĩ, ĩndĩ nĩwetie nthakame ĩla yatialile ĩtinanĩ ya kĩthembeo, nĩ kana akĩthesye aumĩasye nthembo sya ũekeo wa naĩ ĩũlũ wakyo. 16 Ĩtina wa ũu, nĩwoosie mathunya onthe ala maĩ ĩũlũ wa maa, mathunya ma ĩtema, na mbio syelĩ na mathunya masyo, na Mose atuma itoa kĩthembeonĩ. 17 Na ĩndĩ syĩndũ ila syatialile sya nzaũ ĩsu, kĩthuma kyayo, nyama yayo, na kyaa kyayo, syavĩvĩwʼa na mwaki nza wa kambi, o tondũ Yeova weeaĩe Mose.

18 Nĩvo ĩndĩ wathengeeisye ndũũme ya nthembo ya kũvĩvwʼa, na Alũni na ana make mailĩĩla moko moo mũtwenĩ wa ndũũme ĩsu. 19 Ĩtina wa ũu, Mose nĩwamĩthĩnzie na aminzangya nthakame yayo ngalĩko syonthe sya kĩthembeo. 20 Ndũũme ĩsu nĩyatilangilwe ilungu, na Mose avĩvya mũtwe wayo, ilungu isu, na mathunya ala mathyũlũlũkĩte mbio nĩ kana matoe. 21 Nĩwathambisye maa na maaũ mayo na kĩw’ũ, na Mose atuma ndũũme ĩsu yonthe ĩtoa kĩthembeonĩ. Yaĩ nthembo ya kũvĩvwʼa ya mũuke wa kwendeesya.* Yaĩ nthembo ĩvĩvĩtwʼe na mwaki kwondũ wa Yeova, o tondũ Yeova weeaĩe Mose.

22 Na ĩndĩ aete ndũũme ya kelĩ, ndũũme ĩla yumawʼa andũ mainengwa ũkũmũ wa kwĩthĩwa athembi, na Alũni na ana make mailĩĩla moko moo mũtwenĩ wa ndũũme ĩsu. 23 Mose nĩwamĩthĩnzie na oosa nthakame ĩmwe yayo na amĩvaka mũthyanĩ wa kũtũ kwa Alũni kwa ngalĩko ya aũme na kyaanĩ kĩla kĩnene kya kwʼoko kwake kwa aũme na kyaanĩ kĩla kĩnene kya kũũ kwake kwa ngalĩko ya aũme. 24 Na Mose asyoka aete ana ma Alũni vau mbee na amavaka nthakame ĩmwe mũthyanĩ wa matũ moo ma ngalĩko ya aũme na kyaanĩ kĩla kĩnene mokonĩ moo ma aũme na kyaanĩ kĩla kĩnene maaũnĩ moo ma ngalĩko ya aũme; ĩndĩ Mose aminzangya nthakame ĩla yatialile ngalĩko syonthe sya kĩthembeo.

25 Na ĩndĩ oosa mathunya, kĩsithe kĩnou, mathunya onthe ala maĩ ĩũlũ wa maa, mathunya ma ĩtema, mbio syelĩ na mathunya masyo, na kũũ kwa ngalĩko ya aũme. 26 Na oosa mũkate ũmwe ũte ĩlawa wa kĩlinge wĩ yĩima katĩ kuma kĩkavũnĩ kya mĩkate ĩte ĩlawa kĩla kyaĩ mbee wa Yeova, vamwe na mũkate ũmwe wa kĩlinge wĩ yĩima katĩ mũvake mauta na mũkate ũmwe mũtheke. Na ĩndĩ asilĩĩla ĩũlũ wa ilungu sya mathunya na kũũnĩ kwa ngalĩko ya aũme. 27 Ĩtina wa ũu, nĩwasilĩĩile syonthe itaanĩ sya moko sya Alũni na itaanĩ sya moko sya ana make na ambĩĩa kũivyũlya mbee na ĩtina ta nthembo ya kũvyũlwʼa mbee wa Yeova. 28 Na ĩndĩ Mose asyosa kuma mokonĩ moo na atuma itoa kĩthembeonĩ ĩũlũ wa nthembo ya kũvĩvwʼa. Syaĩ nthembo ya kũnenga andũ ũkũmũ wa kwĩthĩwa athembi ya mũuke wa kwendeesya.* Yaĩ nthembo ĩvĩvĩtwʼe na mwaki kwondũ wa Yeova.

29 Nĩvo ĩndĩ Mose woosie nyama ya kĩthũi na amĩvyũlya mbee na ĩtina ta nthembo ya kũvyũlwʼa mbee wa Yeova. Kĩlungu kĩu kuma ndũũmenĩ ĩla yaumawʼa andũ mainengwa ũkũmũ wa kwĩthĩwa athembi kyatwʼĩkie kya Mose, o tondũ Yeova weeaĩe Mose.

30 Na Mose oosa mauta amwe ma kwĩtĩkĩsya na nthakame ĩmwe ĩla yaĩ kĩthembeonĩ na amĩtalĩkangĩlya Alũni na ngũa syake na ana make na ngũa sya ana make ala maĩ vamwe nake. Kwoou nĩwatheisye Alũni na ngũa syake na ana make na ngũa syoo.

31 Na ĩndĩ Mose eea Alũni na ana make: “Theũkĩsyai nyama ĩsu mũomonĩ wa ĩeema ya kũmbanĩa, na mũimĩĩĩa vau vamwe na mũkate ũla wĩ kĩkavũnĩ kya kũnenga andũ ũkũmũ wa kwĩthĩwa athembi, o tondũ neeĩaĩwe, ‘Alũni na ana make makamĩya.’ 32 Nyama na mũkate ũla ũũtiala mũkaũvĩvya vyũ na mwaki. 33 Mũikaumaale nza wa mũomo wa ĩeema ya kũmbanĩa kwa mĩthenya mũonza, nginya mĩthenya yenyu ya kũnengwa ũkũmũ wa kwĩthĩwa athembi ĩthele, nũndũ mwĩkua mĩthenya mũonza mũinengwa ũkũmũ wa kwĩthĩwa athembi.* 34 Yeova nĩweeaie twĩke kĩla tweeka ũmũnthĩ nĩ kana tũmwĩwʼanĩthye nake. 35 Mwĩĩkala mũomonĩ wa ĩeema ya kũmbanĩa mĩthenya mũonza, mũthenya na ũtukũ, na mũianĩsya kĩla Yeova ũmwĩaĩe, nĩ kana mũikakwʼe; nũndũ ũu nĩwʼo nĩaĩwe.”

36 Na Alũni na ana make meeka maũndũ onthe ala Yeova weeaĩte kwĩsĩla Mose.

9 Mũthenya wa nyanya, Mose nĩweetie Alũni na ana make na atumĩa ma Isilaeli. 2 Eeie Alũni atĩĩ: “Ĩyosee kasaũ kwondũ wa nthembo ya naĩ na ndũũme kwondũ wa nthembo ya kũvĩvwʼa, ite na thĩna o na ũmwe, na ũisyumya mbee wa Yeova. 3 Ĩndĩ ũkatavya Aisilaeli, ‘Osai nthenge kwondũ wa nthembo ya naĩ na kasaũ na katũlũme, syonthe sya mwaka ũmwe, ite na thĩna o na ũmwe, kwondũ wa nthembo ya kũvĩvwʼa, 4 na nzaũ na ndũũme kwondũ wa nthembo sya ngwatanĩo, mũithembe mbee wa Yeova, na nthembo ya lĩu ĩvulanĩtwʼe na mauta, nũndũ ũmũnthĩ Yeova nũkũmumĩlĩĩla.’”

5 Kwoou nĩmatwaie kĩla Mose weeĩaĩte mbee wa ĩeema ya kũmbanĩa. Na ĩndĩ ũmbano wʼonthe wooka na waũngama mbee wa Yeova. 6 Na Mose asya atĩĩ: “Ũũ nĩwʼo Yeova ũmwĩaĩe mwĩke, nĩ kana ũtheu mũtisu wa Yeova ũmumĩlĩĩle.” 7 Na ĩndĩ Mose eea Alũni: “Thengeea kĩthembeo na ũyumya nthembo yaku ya naĩ na nthembo yaku ya kũvĩvwʼa, na ũyumya nthembo ya kũvwʼĩka naĩ syaku mwene na sya nyũmba yaku; na ũyumya nthembo ya kũvwʼĩka naĩ sya andũ, o tondũ Yeova wĩaĩte.”

8 Vau kwa vau Alũni nĩwathengeeie kĩthembeo na athĩnza kasaũ ka nthembo ya naĩ kala kaĩ kwondũ wake. 9 Na ĩndĩ ana ma Alũni mamũetee nthakame, na ainda kyaa kyake nthakamenĩ ĩsu na amĩvaka mbyanĩ sya kĩthembeo, na eta nthakame ĩla yatialile ĩtinanĩ ya kĩthembeo. 10 Nĩwatumie mathunya na mbio na mathunya ma ĩtema kuma nthembonĩ ya naĩ matoa kĩthembeonĩ, o tondũ Yeova weeĩaĩe Mose. 11 Na avĩvĩsya nyama vyũ vamwe na kĩthuma nza wa kambi.

12 Ĩtina wa ũu, athĩnza nthembo ya kũvĩvwʼa, na ana ma Alũni mamũnenga nthakame, nake amĩminzangya ngalĩko syonthe sya kĩthembeo. 13 Na mamũnenga ilungu sya nthembo ya kũvĩvwʼa vamwe na mũtwe, na atuma itoa kĩthembeonĩ. 14 O na ĩngĩ, nĩwathambisye maa na maaũ na atuma matoa kĩthembeonĩ ĩũlũ wa nthembo ya kũvĩvwʼa.

15 Na ĩndĩ aumya nthembo kwondũ wa andũ na oosa mbũi ya nthembo ya naĩ ĩla yaĩ kwondũ wa andũ na amĩthĩnza na aumya nthembo ya naĩ na mbũi ĩsu o ta ĩla ya mbee. 16 Na aumya nthembo ya kũvĩvwʼa na eekana nayo kwosana na mũtalatala ũla waĩle kũatĩĩwa nthembo sya kũvĩvwʼa iyumwʼa.

17 Nĩwasyokie aumya nthembo ya lĩu, ausũsya kwʼoko kwake na ĩmwe yayo na atuma ĩtoa kĩthembeonĩ, vamwe na nthembo ya kũvĩvwʼa ya kwakya.

18 Ĩtina wa ũu, nĩwathĩnzie nzaũ na ndũũme ya nthembo ya ngwatanĩo ĩla yaĩ kwondũ wa andũ. Na ĩndĩ ana ma Alũni mamũnenga nthakame, na amĩminzangya ngalĩko syonthe kũthyũlũlũka kĩthembeo. 19 Nasyo ilungu sya mathunya ma nzaũ, kĩsithe kĩnou kya ndũũme, mathunya ala mavwʼĩkĩte syĩndũ sya nda, mbio, na mathunya ma ĩtema, 20 ana ma Alũni nĩmailĩĩile ilungu isu syonthe sya mathunya nyamanĩ sya kĩthũi, na ĩndĩ atuma ilungu isu sya mathunya itoa kĩthembeonĩ. 21 Ĩndĩ Alũni nĩwavyũlilye nyama sya kĩthũi na kũũ kwa ngalĩko ya aũme mbee na ĩtina ta nthembo ya kũvyũlwʼa mbee wa Yeova, o tondũ Mose weeaĩte.

22 Na ĩndĩ Alũni ookĩlya moko make melekele andũ na amaathima na atheea ĩtina wa kumya nthembo ya naĩ na nthembo ya kũvĩvwʼa na nthembo sya ngwatanĩo. 23 Mũthya Mose na Alũni nĩmalikile ĩeemanĩ ya kũmbanĩa na maumaala na maathima andũ.

Nĩvo ĩndĩ ũtheu mũtisu wa Yeova waumĩlĩĩile andũ onthe, 24 na mwaki wauma kũla kwĩ Yeova na wambĩĩa kũvĩvya nthembo ya kũvĩvwʼa na ilungu sya mathunya ila syaĩ kĩthembeonĩ. Yĩla andũ onthe moonie kĩu, nĩmambĩĩie kũkayanyʼa na mavalũka nthĩ na mothyũ moo.

10 Ĩtina ana ma Alũni, Natavu na Aviũ, nĩmoosie kĩla ũmwe kĩndũ kyake kya kwĩkĩa mwaki na meekĩa mwaki nthĩnĩ na mailĩĩla ũvani ĩũlũ wawʼo. Na mambĩĩa kumya mwaki ũte mwĩtĩkĩlye mbee wa Yeova, ũndũ ũla ũtameĩaĩte meke. 2 Nũndũ wa ũu, mwaki nĩwaumie mbee wa Yeova na wamavĩvya, makwʼĩĩa mbee wa Yeova. 3 Na ĩndĩ Mose eea Alũni atĩĩ: “Ũũ nĩwʼo Yeova ũkwasya, ‘Ngathewʼa katĩ wa andũ ala me vakuvĩ nakwa, na ngakumwʼa mbee wa andũ onthe.’” Na Alũni avindya.

4 Kwoou Mose eeta Misaeli na Elusavani, ana ma Usieli, mwendwʼa-ĩthe wa Alũni, na amea atĩĩ: “Ũkai vaa, kuai ana-a-ĩthe menyu mũmaumye mbee wa vandũ vatheu mũmatwae vandũ nza wa kambi.” 5 Na kwoou mooka na makua aũme asu me o na kanzũ syoo mamatwaa vandũ nza wa kambi, o tondũ Mose wamatavĩtye.

6 Na ĩndĩ Mose eea Alũni na ana ala angĩ make Eleasali na Ithamali: “Mũikalekeleelye mĩtwe yenyu kana mũtembũe ngũa syenyu, nĩ kana mũikakwʼe na nĩ kana Ngai ndakathatĩe ũmbano wʼonthe. Ana-a-ĩthe menyu ma nyũmba yonthe ya Isilaeli makaĩĩa ala Yeova ũaĩte na mwaki. 7 Mũyaĩlĩte kumaala nza wa mũomo wa ĩeema ya kũmbanĩa nũndũ mweeka ũu nĩmũũkwʼa, nĩkwĩthĩwa Yeova nũmwĩtĩkĩsye mauta.” Kwoou meeka kwosana na ndeto sya Mose.

8 Ĩtina wa ũu, Yeova eeie Alũni atĩĩ: 9 “Ndũkaanywʼe mbinyu kana syĩndũ ingĩ itonya kũtuma ũmilwa, we na ana maku, yĩla mũkũka ĩeemanĩ ya kũmbanĩa, nĩ kana mũikakwʼe. Nĩ ũtwʼĩo wa ĩvinda yonthe nzyawanĩ syenyu. 10 Kĩu kĩkatuma mũvathũkanyʼa katĩ wa kĩndũ kĩtheu na kĩte kĩtheu na katĩ wa kĩndũ kĩvuku na kĩte kĩvuku, 11 na mũimanyĩsya Aisilaeli myolooto yonthe ĩla Yeova ũmatavĩtye kwĩsĩla Mose.”

12 Na ĩndĩ Mose aneena na Alũni na Eleasali na Ithamali, ana make ala matialile, amea atĩĩ: “Osai nthembo ya lĩu ĩla ĩtialile kuma nthembonĩ sya Yeova ivĩvĩtwʼe na mwaki na mũimĩĩĩa vakuvĩ na kĩthembeo ta mũkate ũte ĩlawa, nũndũ nĩ kĩndũ kĩtheu vyũ. 13 No nginya mũmĩĩĩe vandũ vatheu, nũndũ nĩ kĩlungu kyaku na kĩlungu kya ana maku kuma nthembonĩ sya Yeova ivĩvĩtwʼe na mwaki, nũndũ ũu nĩwʼo nĩaĩwe. 14 O na ĩngĩ, mwaĩlĩte kũĩĩa nyama ya kĩthũi ya nthembo ya kũvyũlwʼa na kũũ kwa kĩlungu kĩtheu vandũnĩ vatheu, we na ana maku na eĩtu maku, nũndũ syĩndũ isu nũnengetwe syĩthĩwe kĩlungu kyaku na kĩlungu kya ana maku kuma nthembonĩ sya ngwatanĩo sya Aisilaeli. 15 Makaete kũũ kwa kĩlungu kĩtheu na nyama ya kĩthũi ya nthembo ya kũvyũlwʼa vamwe na nthembo sya mathunya ivĩvĩtwʼe na mwaki, nĩ kana mavyũlye nthembo ya kũvyũlwʼa mbee na ĩtina mbee wa Yeova; na ĩkeethĩwa kĩlungu kya ĩvinda yonthe kwondũ waku na ana maku, o tondũ Yeova wĩyĩaĩte.”

16 Na Mose amantha mbũi ya nthembo ya naĩ na kĩthito mũno, na amanya kana yaĩ ĩnavĩvwʼa. Kwoou athatĩa mũno Eleasali na Ithamali, ana ma Alũni ala matialĩte, na asya: 17 “Nĩkĩ mũtanaĩĩa nthembo ya naĩ vandũ vatheu, nũndũ nĩ kĩndũ kĩtheu vyũ na nũmũnengete yo nĩ kana mũvetange naĩ ya ũmbano na mũyumya nthembo ya kũvwʼĩka naĩ syoo mbee wa Yeova? 18 Sisya! Nthakame yayo ndĩnaetwe vandũnĩ vatheu. Vate nzika, mwĩĩaĩlĩte kũmĩĩĩa vandũnĩ vatheu, o tondũ nĩaĩwe.” 19 Alũni asũngĩie Mose amwĩa: “Sisya! Ũmũnthĩ nĩmaumisye nthembo yoo ya naĩ na nthembo yoo ya kũvĩvwʼa mbee wa Yeova, na o na ũu wĩ o vo maũndũ aa mangwata. Kethĩwa nĩnĩĩe nthembo ya naĩ ũmũnthĩ, wʼo ũndũ ũsu nĩwĩthĩwa ũmwendeeisye Yeova?” 20 Yĩla Mose weewie ũu, nĩweanĩiwe.

11 Na ĩndĩ Yeova eea Mose na Alũni atĩĩ: 2 “Tavyai Aisilaeli, ‘Ii nĩsyo syũmbe syĩ thayũ sya nthĩ* ila mũtonya kũya: 3 No mũye kĩla nyamũ yĩ na ĩvũngũ yatũku na mavũngũ me na mwanya na ĩthaumasya.

4 “‘Ĩndĩ mũyaĩlĩte kũya nyamũ ii ithaumasya kana syĩ na ĩvũngũ yatũku: ngamĩle, ĩla ĩthaumasya ĩndĩ ndĩthĩawa na ĩvũngũ yatũku. Mwaĩlĩte kũmyona ta kĩndũ kĩvuku. 5 O na kĩnyowe, nũndũ nĩkĩthaumasya ĩndĩ kĩi na ĩvũngũ yatũku. Mwaĩlĩte kũkyona ta kĩndũ kĩvuku. 6 O na mbũkũ, nũndũ nĩthaumasya ĩndĩ ndĩthĩawa na ĩvũngũ yatũku. Mwaĩlĩte kũmyona ta kĩndũ kĩvuku. 7 O na ngũlũe, nũndũ yĩthĩawa na ĩvũngũ yatũku na ĩvũngũ yĩ na mwanya ĩndĩ ndĩthaumasya. Mwaĩlĩte kũmyona ta kĩndũ kĩvuku. 8 Mũyaĩlĩte kũya nyama o na ĩmwe ya nyamũ isu kana kũkiita simba syasyo. Mwaĩlĩte kũsyona ta kĩndũ kĩvuku.

9 “‘Katĩ wa nyamũ syonthe ila syĩkalaa kĩw’ũnĩ, ii nĩsyo mũtonya kũya: Kĩndũ o na kĩva kĩkalaa kĩw’ũnĩ kĩ nthwau na makwaũ, kĩthĩwe kĩ ũkanganĩ kana kĩ mbũsĩnĩ, no mũye. 10 Ĩndĩ kĩndũ o na kĩva kĩla kĩthĩawa ũkanganĩ na kĩthĩawa mbũsĩnĩ kĩla kĩte nthwau na makwaũ, katĩ wa syũmbe syonthe ila syĩkalaa syĩ ikundi na kĩla kyũmbe kĩ thayũ kĩkalaa kĩw’ũnĩ, nĩ kĩndũ kya kũthatya kwenyu. 11 Ĩĩ, syaĩlĩte kwĩthĩwa syĩ sya kũthatya kwenyu, na mũyaĩlĩte kũya nyama o na ĩmwe yasyo na mwaĩlĩte kũmena simba syasyo. 12 Kĩla kĩndũ kĩ kĩw’ũnĩ kĩte na nthwau na makwaũ nĩ kĩndũ kya kũthatya kwenyu.

13 “‘Ii nĩsyo syũmbe ila iũlũkaa mwaĩlĩte kũmena; iyaĩlĩte kũĩwa, nũndũ nĩ sya kũthatya: ndiũ, kĩvaalala, ndei nziũ, 14 mbolosya ndune na kĩla mũthemba wa mbolosya nziũ, 15 kĩla mũthemba wa ngũngũũ, 16 nyaa, ndunduli, ĩngwʼaa, na kĩla mũthemba wa kĩlũĩ, 17 ndunduli nini, ĩvutavutĩlya, ndunduli yĩ na matũ maasa, 18 ĩvata ya kĩwʼũnĩ, ngunĩ, ndei, 19 ĩsaũ, kĩla mũthemba wa makũthakũthĩi, ngomakomi, na ũvuvu.* 20 Syũmbe syonthe syĩ nthwau ila syĩkalaa syĩ ikundi* na iendaa na maaũ onthe ana nĩ kĩndũ kya kũthatya kwenyu.

21 “‘Katĩ wa syũmbe syĩ nthwau ila syĩkalaa syĩ ikundi na iendaa na maaũ onthe ana, no mũye o ila syĩ na maaũ elĩ maasa ma kũthaanyũkanga ĩũlũ wa nthĩ. 22 Katĩ wa ii no mũye: mĩthemba yĩ kĩvathũkanyʼo ya ngie ila ithamaa, ngie ingĩ itonya kũĩwa, ngĩli, na itooli.* 23 Syũmbe ila ingĩ syonthe syĩ nthwau ila syĩkalaa syĩ ikundi na iendaa na maaũ ana nĩ kĩndũ kya kũthatya kwenyu. 24 Mwaiya mũkeethĩwa mwĩ avuku. Kĩla mũndũ ũkakiita simba syasyo akeethĩwa e mũvuku nginya ĩ ya wĩoo. 25 Mũndũ o na wĩva ũla ũkakua kimba o na kĩmwe kyasyo aĩlĩte kũvũa ngũa syake; akeethĩwa e mũvuku nginya ĩ ya wĩoo.

26 “‘Nyamũ o na yĩva yĩ na ĩvũngũ yatũku ĩndĩ ĩte na ĩvũngũ yĩ na mwanya na ĩtathaumasya nĩ mbuku kwenyu. Kĩla mũndũ ũkaikiita akeethĩwa e mũvuku. 27 Kĩla kyũmbe kĩ thayũ kĩendaa na ithu katĩ wa syũmbe ila iendaa na maaũ onthe ana nĩ kĩvuku kwenyu. Kĩla mũndũ wĩkiita simba syasyo akeethĩwa e mũvuku nginya ĩ ya wĩoo. 28 Ũla wĩkua simba syasyo aĩlĩte kũvũa ngũa syake, na akeethĩwa e mũvuku nginya ĩ ya wĩoo. Nĩ mbuku kwenyu.

29 “‘Ii nĩsyo syũmbe ila syĩkalaa syĩ ikundi sya nthĩ ila mbuku kwenyu: mbuko, mbĩa, mĩthemba yonthe ya matelembũ,* 30 kamwilũ, ĩtelembũ ĩnene, ĩnyolo, mwilũ, na kĩmbu. 31 Syũmbe isu nĩ mbuku kwenyu. Kĩla mũndũ ũkakiita simba syasyo akeethĩwa e mũvuku nginya ĩ ya wĩoo.

32 “‘Yu kĩndũ o na kĩva kĩla syavalũkĩla syakwʼa kĩkeethĩawa kĩ kĩvuku, kĩthĩwe nĩ mũio wa mbwaũ, ngũa, kĩthuma, kana kĩlungu kya ngũa ya ĩkunia. Mũio o na wĩva ũla watũmĩwa waĩlĩte kũindwa kĩwʼũnĩ, na ũkeethĩwa wĩ mũvuku nginya ĩ ya wĩoo; na ĩndĩ ũyĩthĩwa ũte mũvuku. 33 Ethĩwa syavalũka mũionĩ wa yũmba, mwaĩlĩte kũũaa, na kĩndũ o na kĩva kĩla kĩĩ nthĩnĩ wawʼo kĩkeethĩwa kĩ kĩvuku. 34 Mũthemba o na wĩva wa lĩu ũla ũkakiitwa nĩ kĩw’ũ kĩĩ mũionĩ ta ũsu ũkeethĩwa wĩ mũvuku, na kĩndũ o na kĩva kya kũnyuwa kĩla kĩĩ mũionĩ ta ũsu kĩkeethĩwa kĩ kĩvuku. 35 Kĩndũ o na kĩva kĩla kyavalũkĩlwa nĩ simba syasyo kĩkeethĩwa kĩvuku. Kĩndũ kĩu kyaĩlĩte kwatũangwa ilungu, kĩthĩwe nĩ ĩiko kana kaliko kanini. Syĩndũ isu nĩ mbuku, na ikaendeea kwĩthĩwa syĩ mbuku kwenyu. 36 No mbuluti* na ĩima ya kwia kĩw’ũ ikaendeea kwĩthĩwa syĩ ntheu, ĩndĩ mũndũ o na wĩva ũla wakiita simba syasyo akeethĩwa mũvuku. 37 Ethĩwa simba syasyo nĩsyavalũkĩla mbeũ yaĩlĩte kũthi kũvandwa, ti mbuku. 38 Ĩndĩ ethĩwa kĩw’ũ nĩkyeekĩwa mbeũnĩ ĩsu na kĩlungu kĩmwe kya simba syasyo kĩimĩvalũkĩla, mbeũ ĩsu nĩ mbuku kwenyu.

39 “‘Yu ethĩwa ve nyamũ mwĩtĩkĩlĩtwʼe kũya yakwʼa, ũla wakiita kimba kyayo akeethĩawa e mũvuku nginya ĩ ya wĩoo. 40 Mũndũ o na wĩva waya kĩlungu kya kimba kyayo aĩle kũvũa ngũa syake, na akeethĩwa e mũvuku nginya ĩ ya wĩoo. Mũndũ o na wĩva wakua kimba kyayo aĩle kũvũa ngũa syake, na akeethĩwa e mũvuku nginya ĩ ya wĩoo. 41 Syũmbe syonthe ila syĩkalaa syĩ ikundi ĩũlũ wa nthĩ nĩ kĩndũ kya kũthatya. Iyaĩle kũĩwa. 42 Mũikaye kĩndũ o na kĩva kĩendaa na ĩvu yakyo, kĩndũ o na kĩva kĩendaa na maaũ onthe ana, kana kyũmbe o na kĩva katĩ wa ila syĩkalaa syĩ ikundi ĩũlũ wa nthĩ syĩ maaũ maingĩ mũno, nũndũ isu nĩ syĩndũ sya kũthatya. 43 Mũiketwʼĩkĩthye* ma kũthatya nũndũ wa kyũmbe o na kĩva katĩ wa ila syĩkalaa syĩ ikundi na mũikevukye mwĩthĩwe mũte atheu nũndũ wasyo. 44 Nũndũ ninyie Yeova Ngai wenyu, na no nginya mwĩthesye na mũyĩthĩwa atheu, nũndũ nyie nĩ mũtheu. Kwoou mũikevukye* na kyũmbe o na kĩva katĩ wa ila syĩkalaa syĩ ikundi ila iendaa ĩũlũ wa nthĩ. 45 Nũndũ ninyie Yeova, ũla ũmũtongoesye kuma nthĩ ya Misili nĩ kana nĩĩkĩĩthye nĩ Ngai wenyu, na no nginya mwĩthĩwe mwĩ atheu, nũndũ nyie nĩ mũtheu.

46 “‘Ũũ nĩwʼo mwĩao ũkonetye nyamũ, syũmbe ila iũlũkaa, kĩla kyũmbe kĩ thayũ kĩsĩlaa kĩwʼũnĩ, na syũmbe* syonthe ila syĩkalaa syĩ ikundi ĩũlũ wa nthĩ, 47 nĩ kana mũvathũkanyʼe katĩ wa kĩla kĩvuku na kĩte kĩvuku na katĩ wa syũmbe syĩ thayũ ila itonya kũĩwa na ila itatonya kũĩwa.’”

12 Yeova aendeeie kwĩa Mose atĩĩ: 2 “Tavya Aisilaeli, ‘Ethĩwa mũndũ mũka nĩwaitava na asyaa kamwana, akeethĩwa e mũvuku mĩthenya mũonza, o tondũ wĩthĩawa e mũvuku mĩthenya ĩla ũkumwa nĩ nthakame. 3 Mũthenyanĩ wa nyanya, kavĩsĩ kau kakaĩkwa.* 4 Akaendeea kwĩthesya kumana na nthakame ĩsu vandũ va mĩthenya 33 ĩla ĩatĩĩe. Ndaĩlĩte kũkwata kĩndũ o na kĩva kĩtheu, na ndaĩlĩte kũlika vandũ vatheu nginya eanĩĩsye mĩthenya ya kwĩthesya kwake.

5 “‘Asyaa kelĩtu, akeethĩwa e mũvuku mĩthenya 14, o tondũ wĩthĩawa e mũvuku ĩvindanĩ yĩla ũkumwa nĩ nthakame. Akaendeea kwĩthesya kumana na nthakame ĩsu vandũ va mĩthenya 66 ĩla ĩatĩĩe. 6 Mĩthenya ya kwĩthesya kwake nũndũ wa kũsyaa kamwana kana kelĩtu yathela, akaetee mũthembi mũomonĩ wa ĩeema ya kũmbanĩa katũlũme katavĩtũkĩtye mwaka ũmwe kwondũ wa nthembo ya kũvĩvwʼa na kaswii ka ĩvũĩ kana ndumbũ kwondũ wa nthembo ya naĩ. 7 Mũthembi akasyumya mbee wa Yeova na aimwĩwʼanĩthya na Ngai, na ndakaendeea kwĩthĩwa e mũvuku nũndũ wa kumwa nĩ nthakame. Ũũ nĩwʼo mwĩao ũla ũkonetye mũndũ mũka ũla wasyaa kamwana kana kelĩtu. 8 Ĩndĩ ethĩwa ndatonya kumya ĩlondu, no nginya aumye ndumbũ ilĩ kana maswii elĩ ma ĩvũĩ, nyũnyi ĩmwe kwondũ wa nthembo ya kũvĩvwʼa na ĩmwe kwondũ wa nthembo ya naĩ, na mũthembi akamwĩwʼanĩthya na Ngai, nake akeethĩwa ate mũvuku.’”

13 Yeova aendeeie kũneena na Mose na Alũni, ayasya: 2 “Ethĩwa mũndũ nĩwakwatwa nĩ wimbu kĩkondenĩ kyake,* ngũsĩ, kana ĩlavata na ũsu nũtonya kũtwʼĩka ũwau wa mangũ* kĩkondenĩ kyake, no nginya atwawe vala ve mũthembi Alũni kana vala ve ũmwe wa ana make, ala athembi. 3 Mũthembi akasisya nesa vandũ vau vawau kĩkondenĩ kyake. Ethĩwa nzwʼĩĩ sya vandũ vau vawau nivĩndũkĩte ikethĩwa na langi mweũ na vandũ vau vawau veoneka valikĩte kĩkondenĩ mũno, ũsu nĩ ũwau wa mangũ. Mũthembi akavasisya nesa na aitangaasa kana mũndũ ũsu nĩ mũvuku. 4 Ĩndĩ ethĩwa ĩlavata yĩu yĩ kĩkondenĩ kyake nĩ yeũ na yĩoneka yĩtalikĩte kĩkondenĩ mũno na nzwʼĩĩ iivĩndũkĩte ikethĩwa na langi mweũ, mũthembi ũsu akavatha mũndũ ũsu mũwau mĩthenya mũonza. 5 Na ĩndĩ mũthembi akamũsisya ĩngĩ mũthenyanĩ wa mũonza, na ethĩwa veoneka ũwau ũsu nũthelete na ndũnyaĩĩkĩte kĩkondenĩ, mũthembi akamũvatha mĩthenya ĩngĩ mũonza.

6 “Mũthembi aĩle kũmũsisya ĩngĩ mũthenyanĩ wa mũonza, na ethĩwa ũwau wake nũolekete na ndũnyaĩĩkĩte kĩkondenĩ, mũthembi akamũtangaasa kana nĩ mũtheu; ĩnaĩ o ngũsĩ. Na mũndũ ũsu akavũa ngũa syake na ayĩthĩwa ate mũvuku. 7 Ĩndĩ ethĩwa vate nzika ngũsĩ isu ninyaĩĩkĩte* kĩkondenĩ ĩtina wa mũndũ ũsu kũthi mbee wa mũthembi akaĩkĩĩthwʼe kana nĩ mũtheu, nĩvo ĩndĩ ũkathi ĩngĩ* mbee wa mũthembi. 8 Mũthembi akaisisya nesa, na ethĩwa ngũsĩ isu ninyaĩĩkĩte kĩkondenĩ, nĩvo ĩndĩ mũthembi ũkatangaasa kana mũndũ ũsu nĩ mũvuku. Nĩ mangũ.

9 “Ethĩwa mũndũ nĩwawaa ũwau wa mangũ, no nginya aetwe mbee wa mũthembi, 10 na mũthembi akamũsisya nesa. Ethĩwa e na wimbu wa langi mweũ kĩkondenĩ na nũvĩndũĩte nzwʼĩĩ ikeũva na wimbu ũsu wĩ na kĩtau, 11 nĩ mangũ ma kũendeea me kĩkondenĩ kyake, na mũthembi akamũtangaasa kana nĩ mũvuku. Ndaĩlĩte kũmũvatha, nũndũ nĩ mũvuku. 12 Yu ethĩwa mangũ nĩmanyaĩĩka kĩla vandũ kĩkondenĩ na mangũ nĩmavwʼĩka mũndũ ũsu kuma mũtwe nginya nyaaĩ, kĩla vandũ mũthembi ũtonya kwona, 13 na mũthembi nĩwamũsisya nesa na nĩwoona kana mangũ mavwʼĩkĩte kĩkonde kyake kyonthe, nĩvo ĩndĩ ũkatangaasa kana mũndũ ũsu mũwau ti mũvuku.* Kĩkonde kyake nĩkĩvĩndũkĩte kĩkethĩwa kĩ kyeũ, na ti mũvuku. 14 Ĩndĩ ĩvinda yĩla kĩtau kyaumĩla kĩkondenĩ kyake, akeethĩawa e mũvuku. 15 Mũthembi oona kĩtau kĩu akatangaasa kana mũndũ ũsu nĩ mũvuku. Kĩtau kĩu nĩ kĩvuku. Nĩ mangũ. 16 Ĩndĩ ethĩwa kĩtau kĩu nĩkyavĩndũka ĩngĩ kyeethĩwa na langi mweũ, nĩvo ĩndĩ mũndũ ũsu ũkathi vala ve mũthembi. 17 Mũthembi akamũsisya nesa, na ethĩwa vandũ vau vawau nĩvavĩndũkĩte vakethĩwa na langi mweũ, nĩvo ĩndĩ mũthembi ũkatangaasa kana mũndũ ũsu mũwau ti mũvuku. Nĩ mũtheu.

18 “Mũndũ akwatwa nĩ mũimũ kĩkondenĩ kyake na ũivoa, 19 ĩndĩ vandũ vau veĩ na mũimũ ũsu vayĩthĩwa na wimbu wa langi mweũ kana ĩlavata ya langi mweũ ũvulanĩte na mũtune, no nginya athi akeyonanyʼe vala ve mũthembi. 20 Mũthembi akavasisya nesa, na ethĩwa nĩvalikĩte kĩkondenĩ mũno na nzwʼĩĩ syavo nivĩndũkĩte ikethĩwa na langi mweũ, nĩvo ĩndĩ mũthembi ũkatangaasa kana mũndũ ũsu nĩ mũvuku. Nĩ ũwau wa mangũ wumie mũimũnĩ ũsu. 21 Ĩndĩ mũthembi avasisya nesa na oona kana nzwʼĩĩ sya vandũ vau iivĩndũkĩte ikethĩwa na langi mweũ na vailikĩte kĩkondenĩ mũno na ũwau ũsu wĩoneka ũolekete, nĩvo ĩndĩ mũthembi ũkamũvatha mĩthenya mũonza. 22 Na ethĩwa nĩvenekee nesa ũwau ũsu nũnyaĩĩkĩte kĩkondenĩ, nĩvo ĩndĩ mũthembi ũkatangaasa kana mũndũ ũsu nĩ mũvuku. Nĩ ũwau. 23 Ĩndĩ ethĩwa ĩlavata yĩu yĩinanyaĩĩka, no wimbu wa mũimũ ũsu, kwoou mũthembi akatangaasa kana mũndũ ũsu ti mũvuku.

24 “Kana ethĩwa mũndũ e na ĩlanga ya kũvya na kĩtau kĩu kĩtavoete kĩitwʼĩka ĩlavata ya langi mweũ ũvulanĩte na mũtune kana o langi mweũ, 25 nĩvo ĩndĩ mũthembi ũkakĩsisya nesa. Na ethĩwa nzwʼĩĩ ila syĩ ĩlavatanĩ yĩu nivĩndũkĩte ikethĩwa na langi mweũ na yĩoneka yĩlikĩte kĩkondenĩ mũno, nĩ mangũ maumie ĩlanganĩ yĩu, na mũthembi akatangaasa kana mũndũ ũsu nĩ mũvuku. Nĩ ũwau wa mangũ. 26 Ĩndĩ ethĩwa mũthembi avasisya nesa nĩwoona kana ĩlavata yĩu yĩi na nzwʼĩĩ nzaũ na yĩilikĩte kĩkondenĩ mũno na nĩyĩendeee kũoleka, nĩvo ĩndĩ mũthembi ũkamũvatha mĩthenya mũonza. 27 Mũthenyanĩ wa mũonza mũthembi akamũsisya nesa, na ethĩwa nĩvenekee nesa kana ũwau ũsu nũnyaĩĩkĩte kĩkondenĩ, nĩvo ĩndĩ mũthembi ũkatangaasa kana mũndũ ũsu nĩ mũvuku. Nĩ ũwau wa mangũ. 28 Ĩndĩ ethĩwa ĩlavata yĩu yĩinyaĩĩkĩte kĩkondenĩ na nĩyĩolekete, no wimbu wa ĩlanga, na mũthembi akatangaasa kana mũndũ ũsu ti mũvuku, nũndũ no ĩlanga yimbĩte.

29 “Yĩla mũndũũme kana mũndũ mũka wakwatwa nĩ ũwau wa kĩkonde mũtwe kana ngolu, 30 nĩvo ĩndĩ mũthembi ũkasisya nesa vandũ vau vawau. Na ethĩwa nĩvalikĩte kĩkondenĩ mũno na nzwʼĩĩ syavo nĩ sya yelo na nĩ ntheke, nĩvo ĩndĩ mũthembi ũkatangaasa kana mũndũ ũsu nĩ mũvuku; nĩ ũwau wa kĩkonde kya mũtwe kana wa kĩngʼee. Nĩ mangũ ma mũtwe kana ma ngolu. 31 Ĩndĩ ethĩwa mũthembi nĩwoona kana vandũ vau vaikwoneka valikĩte kĩkondenĩ mũno na vai na nzwʼĩĩ nziũ, mũthembi aĩle kũvatha mũndũ ũsu mũwau mĩthenya mũonza. 32 Mũthenyanĩ wa mũonza, mũthembi akavasisya nesa na ethĩwa vandũ vau vawau vainyaĩĩkĩte na vai na nzwʼĩĩ sya yelo na vandũ vau vawau veoneka vatalikĩte kĩkondenĩ mũno, 33 mũndũ ũsu aĩlĩte kwenzwa, ĩndĩ ndakenzwa vandũ vau vawau. Ĩtina wa ũu, mũthembi akavatha mũndũ ũsu mũwau mĩthenya mũonza.

34 “Mũthenyanĩ wa mũonza, mũthembi akasisya ĩngĩ nesa vandũ vau vawau na ethĩwa ũwau wa kĩkonde kya mũtwe na kĩngʼee ndũnanyaĩĩka kĩkondenĩ na ndũkwoneka ũlikĩte kĩkondenĩ mũno, no nginya ĩndĩ mũthembi atangaase kana mũndũ ũsu ti mũvuku, na aĩlĩte kũvũa ngũa syake na ayĩthĩwa ate mũvuku. 35 Ĩndĩ ethĩwa nĩvenekee nesa ũwau ũsu nũnyaĩĩkĩte kĩkondenĩ ĩtina wa kũthewʼa kwake, 36 mũthembi akamũsisya nesa, na ethĩwa ũwau ũsu nũnyaĩĩkĩte kĩkondenĩ, mũthembi ndakethĩwa na vata wa kũsisya ethĩwa ve nzwʼĩĩ sya yelo; mũndũ ũsu nĩ mũvuku. 37 Ĩndĩ ethĩwa ĩtina wa kũmũsisya nesa veoneka ũwau ũsu ndũnyaĩĩkĩte na nĩvameie nzwʼĩĩ nziũ, ũwau ũsu nũvoete. Mũndũ ũsu ti mũvuku, na mũthembi akatangaasa kana ti mũvuku.

38 “Ethĩwa mũndũũme kana mũndũ mũka nĩweethĩwa na malavata kĩkondenĩ* na malavata asu nĩ meũ, 39 mũthembi akamasisya nesa. Ethĩwa malavata asu ti meũ mũno, tũu no tũkũndũ tumĩlĩte kĩkondenĩ kyake. Mũndũ ũsu ti mũvuku.

40 “Ethĩwa mũndũũme nĩwaasya nzwʼĩĩ sya mũtwe wake na eethĩwa na ũvaa, ti mũvuku. 41 Ethĩwa nĩwaasya nzwʼĩĩ ngalĩko ya mbee ya mũtwe wake na veethĩwa na ũvaa, ti mũvuku. 42 Ĩndĩ ethĩwa kĩtau kĩ na langi mweũ wĩ na kaũtune nĩkyaumĩla ũvaanĩ ũla wĩ kĩkondenĩ kya mũtwe wake kana kĩtulyanĩ kyake, asu nĩ mangũ maendeee kumĩla kĩkondenĩ kya mũtwe wake kana kĩtulyanĩ kyake. 43 Mũthembi akamũsisya nesa, na ethĩwa wimbu wa ũwau wake wĩ na langi mweũ wĩ na kaũtune ũvaanĩ ũla wĩ mũtwenĩ wake kana kĩtulyanĩ kyake na kĩkonde kyake kĩilye ta kĩ na mangũ, 44 nĩ mũndũ mũwau mangũ. Nĩ mũvuku, na mũthembi aĩle kũtangaasa kana mũndũ ũsu nĩ mũvuku nũndũ wa ũwau ũla wĩ mũtwenĩ wake. 45 Ngũa sya mũndũ ũsu mũwau mangũ syaĩle kũtembũwa na ndaĩlĩte kũsanũa nzwʼĩĩ syake na aĩlĩte kũvwʼĩka kĩngʼee kyake na aineena ũũ na wasya mũnene, ‘Nĩ mũvuku, nĩ mũvuku!’ 46 Akeethĩawa e mũvuku ĩvinda yonthe yĩla wĩ na ũwau ũsu. Nũndũ nĩ mũvuku, aĩle kwĩkala e weka. Akekalaa nza wa kambi.

47 “Ethĩwa ũwau wa mangũ nĩwakwata ngũa, yĩthĩwe nĩ ya wʼĩa kana nĩ ya katane, 48 syĩthĩwe nĩ ndii ila syumĩte ĩũlũ nginya nthĩ kana nĩ ndii ila ikelanĩte sya ngũa ya katane kana ya wʼĩa, kana nĩ kĩthumanĩ kana kĩndũnĩ kĩngĩ kya kĩthuma, 49 na ĩsola ya langi wa yelo na ngilinĩ kana mũtune ya ũwau ũsu yakwata ngũa, kĩthuma, ndii ila syumĩte ĩũlũ nginya nthĩ ngũanĩ, ndii ila ikelanĩte ngũanĩ, kana kĩndũ o na kĩva kya kĩthuma, kĩndũ kĩu kĩ na ũwau wa mangũ, na kyaĩlĩte kwonwʼa mũthembi. 50 Mũthembi akasisya nesa ũwau ũsu, na no nginya avathe kĩndũ kĩla kĩ na ũwau ũsu mĩthenya mũonza. 51 Mũthenyanĩ wa mũonza, asisya nesa ũwau ũsu na ayona kana nũnyaĩĩkĩte ngũanĩ, ndiinĩ ila syumĩte ĩũlũ nginya nthĩ ngũanĩ, ndiinĩ ila ikelanĩte ngũanĩ, kana kĩthumanĩ (o na ethĩwa kĩthuma kĩu kĩtũmĩawa ũndũnĩ wĩva), ũwau ũsu nĩ mangũ mathũku mũno, na kĩndũ kĩu nĩ kĩvuku. 52 Aĩlĩte kũvĩvya ngũa ĩsu kana ndii isu syumĩte ĩũlũ nginya nthĩ kana ndii ila ikelanĩte syĩ w’ĩanĩ kana kĩtambaanĩ kya katane kana kĩndũnĩ o na kĩva kya kĩthuma kĩla kĩkwatĩtwe nĩ ũwau ũsu, nũndũ asu nĩ mangũ mathũku mũno. Kĩndũ kĩu kyaĩlĩte kũvĩvwʼa vyũ na mwaki.

53 “Ĩndĩ ethĩwa mũthembi nĩwakĩsisya nesa na eethĩa kana ũwau ũsu ndũnyaĩĩkĩte ngũanĩ kana ndiinĩ ila syumĩte ĩũlũ nginya nthĩ kana ndiinĩ ila ikelanĩte ngũanĩ kana kĩndũnĩ o na kĩva kya kĩthuma, 54 nĩvo ĩndĩ mũthembi ũkeyĩaa kana maĩlĩte kũthambya kĩndũ kĩu kĩ na ũwau, na akakĩvatha mĩthenya ĩngĩ mũonza. 55 Kĩndũ kĩu kĩ na ũwau kyamina kũthambwʼa vyũ nĩvo ĩndĩ mũthembi ũkakĩsisya nesa. Ethĩwa vandũ vau veĩ na ũwau vainavĩndũka, o na ethĩwa ũwau ũsu ndũnanyaĩĩka, kĩndũ kĩu nĩ kĩvuku. Mwaĩlĩte kũkĩvĩvya na mwaki nũndũ nĩkĩĩtwe, kĩthĩwe kĩĩtwe kuma ngalĩko ya nthĩnĩ kana kuma ngalĩko ya nza.

56 “Ĩndĩ ethĩwa mũthembi nĩwakĩsisya nesa na oona kana ũwau ũsu nũolekete ĩtina wa kũthambwʼa vyũ, nĩvo ĩndĩ ũkatembũa vandũ vau vaume ngũanĩ kana kĩthumanĩ kana ndiinĩ ila syumĩte ĩũlũ nginya nthĩ kana ndiinĩ ila ikelanĩte ngũanĩ. 57 O na ũu wĩ o vo, ethĩwa ũwau ũsu nĩwaumĩla vandũ vangĩ ngũanĩ ĩsu kana ndiinĩ ila syumĩte ĩũlũ nginya nthĩ kana ndiinĩ ila ikelanĩte ngũanĩ kana kĩndũnĩ o na kĩva kya kĩthuma, nũendeee kũnyaĩĩka, na mwaĩlĩte kũvĩvya na mwaki kĩndũ o na kĩva kĩ na ũwau. 58 Ĩndĩ ethĩwa ũwau ũsu nĩwathela ngũanĩ kana ndiinĩ ila syumĩte ĩũlũ nginya nthĩ kana ndiinĩ ila ikelanĩte ngũanĩ kana kĩndũnĩ o na kĩva kya kĩthuma mwathambya, nĩvo ĩndĩ kyaĩlĩte kũthambwʼa ĩvinda ya kelĩ, na kĩkeethĩwa kĩte kĩvuku.

59 “Ũũ nĩwʼo mwĩao ũkonetye ũwau wa mangũ yĩla wakwata ngũa ya wʼĩa kana ya katane, kana ndiinĩ ila syumĩte ĩũlũ nginya nthĩ kana ndiinĩ ila ikelanĩte ngũanĩ, kana kĩndũnĩ o na kĩva kya kĩthuma, ũla ũkatũmĩawa kũkĩtangaasa nĩ kĩvuku kana ti kĩvuku.”

14 Yeova aendeeie kũneena na Mose, ayasya: 2 “Ũũ nĩwʼo mwĩao ũkonetye mũndũ wĩ na mangũ ũla ũkaatĩĩawa mũthenya ũla ũkũĩkĩĩthwʼa kana nĩwathewʼa, yĩla waetwe vala ve mũthembi. 3 Mũthembi akaumaalũka nza wa kambi na aimũsisya nesa. Ethĩwa mũndũ ũsu ũwaĩte mangũ nũvoete mangũ, 4 mũthembi akamwĩaĩa aete nyũnyi ilĩ syĩ thayũ ntheu, ũvonge wa mũtalakwe,* kĩtambaa kĩtune mũno, na ĩsovo kwondũ wa kũmũthesya. 5 Mũthembi akeyĩaa nyũnyi ĩmwe yũaĩwe mũionĩ wa yũmba wĩ na kĩwʼũ kĩtavĩtwe vandũ kĩnavĩtĩte. 6 Ĩndĩ aĩlĩte kwosa nyũnyi ĩla yĩ thayũ vamwe na ũvonge wa mũtalakwe,* kĩtambaa kĩtune mũno, na ĩsovo, na ayĩinda syĩndũ isu syonthe vamwe nthakamenĩ ya nyũnyi ĩla yũaĩwe kĩwʼũnĩ kĩtavĩtwe vandũ kĩnavĩtĩte. 7 Na ĩndĩ akamĩtalĩkangĩlya mũndũ ũla ũkwĩthesya kumana na mangũ mavinda mũonza na aitangaasa kana mũndũ ũsu ti mũvuku, na akalekya nyũnyi ĩla yĩ thayũ ĩthi kĩthekanĩ.

8 “Ũla ũkwĩthesya no nginya avũe ngũa syake na ayenza nzwʼĩĩ yake yonthe na aithamba na kĩwʼũ, na akeethĩwa ate mũvuku. Ĩtina wa ũu, no alike kambinĩ, ĩndĩ akekala nza wa ĩeema yake mĩthenya mũonza. 9 Mũthenyanĩ wa mũonza, aĩlĩte kwenza nzwʼĩĩ syonthe ila syĩ mũtwenĩ wake, ngolunĩ yake na syĩnzakuvanĩ syake. Ĩtina wa kwenza nzwʼĩĩ yake yonthe, akavũa ngũa syake na aithamba na kĩwʼũ, na akeethĩwa ate mũvuku.

10 “Mũthenyanĩ wa nyanya, akoosa tũtũlũme twĩlĩ tũte na thĩna o na ũmwe, kalondu kamwe kaka ka mwaka ũmwe kate na thĩna o na ũmwe, ithimo itatũ sya kĩlungu kya ĩkũmi kya eva* ya mũtu mũvinyu ũvulanĩtwʼe na mauta ta nthembo ya lĩu, na kĩthimo kya loki ĩmwe* ya mauta; 11 na mũthembi ũla ũkũtangaasa kana mũndũ ũsu ti mũvuku akaete mũndũ ũsu ũkwĩthesya, vamwe na nthembo syake, mbee wa Yeova mũomonĩ wa ĩeema ya kũmbanĩa. 12 Mũthembi akoosa katũlũme kamwe na aikaumya kethĩwe nthembo ya ĩvĩtyo vamwe na kĩla kĩthimo kya loki ya mauta, na akaivyũlya mbee na ĩtina syĩthĩwe nthembo ya kũvyũlwʼa mbee wa Yeova. 13 Na ĩndĩ akathĩnzĩa katũlũme kau vala nthembo ya naĩ na nthembo ya kũvĩvwʼa ithĩnzĩawa, vandũnĩ vatheu, nũndũ, o ta nthembo ya naĩ, nthembo ya ĩvĩtyo nĩ ya mũthembi. Nĩ kĩndũ kĩtheu vyũ.

14 “Na ĩndĩ mũthembi akoosa nthakame ĩmwe ya nthembo ya ĩvĩtyo, na akamĩvaka mũthyanĩ wa kũtũ kwa ngalĩko ya aũme kwa ũla ũkwĩthesya na kyaanĩ kĩla kĩnene kya kwʼoko kwake kwa aũme na kyaanĩ kĩla kĩnene kya kũũ kwake kwa ngalĩko ya aũme. 15 Na mũthembi akoosa mauta amwe kuma kĩla kĩthimonĩ kya loki na aimeta kĩtaanĩ kyake mwene kya kwʼoko kwake kwa aka. 16 Na ĩndĩ mũthembi akainda kyaa kyake kya kwʼoko kwa aũme mautanĩ ala me kĩtaanĩ kyake kya kwʼoko kwa aka na aitalĩkangya amwe na kyaa kyake mavinda mũonza mbee wa Yeova. 17 Ĩtina wa ũu, mũthembi akavaka mauta amwe ala matiele kĩtaanĩ kyake mũthyanĩ wa kũtũ kwa ngalĩko ya aũme kwa ũla ũkwĩthesya na kyaanĩ kĩla kĩnene kya kwʼoko kwake kwa aũme na kyaanĩ kĩla kĩnene kya kũũ kwake kwa ngalĩko ya aũme ĩũlũ wa nthakame ya nthembo ya ĩvĩtyo. 18 Mũthembi akavaka mauta ala matiala kĩtaanĩ kyake mũtwenĩ wa ũla ũkwĩthesya, na mũthembi akamwĩwʼanĩthya mbee wa Yeova.

19 “Mũthembi akaumya nthembo ya naĩ na ayĩwʼanĩthya ũla ũkwĩthesya, na ĩtina akathĩnza nthembo ya kũvĩvwʼa. 20 Na mũthembi akaumĩsya kĩthembeonĩ nthembo ya kũvĩvwʼa na nthembo ya lĩu, na akamwĩwʼanĩthya, nake akeethĩwa ate mũvuku.

21 “Ĩndĩ ethĩwa mũndũ ũsu nĩ ngya na ndatonya kũkwata syĩndũ isu, nĩvo ĩndĩ wĩosa katũlũme kamwe kethĩwe nthembo ya ĩvĩtyo kwondũ wa nthembo ya kũvyũlwʼa, nĩ kana asyumye ewʼanĩthwʼe na Ngai, vamwe na kĩlungu kya ĩkũmi kya eva* ya mũtu mũvinyu ũvulanĩtwʼe na mauta wĩthĩwe nthembo ya lĩu, kĩthimo kya loki ya mauta, 22 na ndumbũ ilĩ kana maswii elĩ ma ĩvũĩ, kwosana na ũtonyi wake. Ĩmwe ĩkeethĩwa nthembo ya naĩ, na ĩla ĩngĩ nthembo ya kũvĩvwʼa. 23 Mũthenyanĩ wa nyanya, akaietee mũthembi mũomonĩ wa ĩeema ya kũmbanĩa mbee wa Yeova nĩ kana aĩkĩĩthye kũthewʼa kwake.

24 “Mũthembi akoosa katũlũme ka nthembo ya ĩvĩtyo na kĩthimo kya loki ya mauta, na akaivyũlya mbee na ĩtina ta nthembo ya kũvyũlwʼa mbee wa Yeova. 25 Na ĩndĩ akathĩnza katũlũme ka nthembo ya ĩvĩtyo, na mũthembi akoosa nthakame ĩmwe ya nthembo ya ĩvĩtyo na aimĩvaka mũthyanĩ wa kũtũ kwa ngalĩko ya aũme kwa ũla ũkwĩthesya na kyaanĩ kĩla kĩnene kya kwʼoko kwake kwa aũme na kyaanĩ kĩla kĩnene kya kũũ kwake kwa ngalĩko ya aũme. 26 Mũthembi aketa mauta amwe kĩtaanĩ kyake mwene kya kw’oko kwake kwa aka, 27 na ĩndĩ akatalĩkangya na kyaa kyake kya kw’oko kwa aũme mauta amwe ala me kĩtaanĩ kyake kya kw’oko kwa aka mavinda mũonza mbee wa Yeova. 28 Na mũthembi akavaka mauta amwe ala me kĩtaanĩ kyake mũthyanĩ wa kũtũ kwa ngalĩko ya aũme kwa ũla ũkwĩthesya na kyaanĩ kĩla kĩnene kya kw’oko kwake kwa aũme na kyaanĩ kĩla kĩnene kya kũũ kwake kwa ngalĩko ya aũme o kũndũ kũla eĩvakĩte nthakame ya nthembo ya ĩvĩtyo. 29 Na ĩndĩ mũthembi akavaka mauta ala matialĩte kĩtaanĩ kyake mũtwenĩ wa ũla ũkwĩthesya, nĩ kana amwĩwʼanĩthye mbee wa Yeova.

30 “Akaumya ndumbũ ĩmwe katĩ wa ila ndumbũ ilĩ kana ĩswii yĩmwe ya ĩvũĩ katĩ wa ala maswii elĩ ma ĩvũĩ, kwosana na ũtonyi wake, 31 nyũnyi ila ũtonya ũkwata, ĩmwe yĩthĩwe nthembo ya naĩ na ĩla ĩngĩ ĩyĩthĩwa nthembo ya kũvĩvw’a vamwe na nthembo ya lĩu; na mũthembi akeewʼanĩthya ũla ũkwĩthesya mbee wa Yeova.

32 “Ũũ nĩwʼo mwĩao ũla ũkonetye mũndũ ũnaĩ na ũwau wa mangũ ĩndĩ ũte na ũtonyi yĩla ũkũĩkĩĩthya kũthewʼa kwake.”

33 Na ĩndĩ Yeova eea Mose na Alũni: 34 “Yĩla mwĩlika nthĩ ya Kanaanĩ, ĩla ngũmũnenga yĩthĩwe yenyu, na ndituma nyũmba yĩ nthĩ yenyu yĩthĩwa na ũwau wa mangũ, 35 mwene nyũmba ĩsu aĩle kũthi vala ve mũthembi na aimwĩa, ‘Ve mũthemba mũna wa ũwau umĩlĩte nyũmbanĩ kwakwa.’ 36 Mũthembi akaumya mwĩao nĩ kana syĩndũ ila syĩ nyũmbanĩ ĩsu syumaalwʼe atanamba kũka kũsisya ũwau ũsu nesa, nĩ kana ndakatangaase kana syĩndũ syonthe ila syĩ nyũmbanĩ ĩsu nĩ mbuku; na ĩtina wa ũu, mũthembi akalika nyũmbanĩ ĩsu nĩ kana amĩsisye nesa. 37 Akasisya nesa kũndũ kũu kwĩ na ũwau, na ethĩwa ngũta sya nyũmba ĩsu syĩ na kũndũ kũvondeku kwĩ na langi wa yelo ũvulanĩte na ngilinĩ kana mũtune na kwĩoneka kũlikĩte ngũtanĩ mũno, 38 nĩvo ĩndĩ mũthembi wĩumaala nza wa nyũmba ĩsu na aivinga nyũmba ĩsu mĩthenya mũonza.

39 “Na mũthembi akasyoka mũthenyanĩ wa mũonza na aimĩsisya nesa. Ethĩwa ũwau ũsu nũnyaĩĩkĩte ngũtanĩ sya nyũmba ĩsu, 40 nĩvo ĩndĩ mũthembi wĩumya mwĩao, na no nginya mavia ala me na ũwau ũsu maombowe na mayĩkwʼa vandũnĩ vavuku nza wa ndũa. 41 Ĩtina wa ũu, akeeĩaa ngalĩko ya nthĩnĩ ya nyũmba ĩsu ĩvivwe vyũ, na ndaka ĩla ĩkauma vo yaĩlĩte kwĩkwʼa nza wa ndũa vandũnĩ vavuku. 42 Makeekĩa mavia angĩ vala mavia asu mavetwa, na aĩlĩte kũtũmĩa ndaka ĩngĩ na nyũmba ĩsu ĩikandĩkwa.

43 “O na vailye ũu, ũwau ũsu wasyoka na wanyaĩĩka nyũmbanĩ ĩsu ĩtina wa mavia kũombowa na nyũmba ĩsu kũvingwa na kũkandĩkwa ĩngĩ, 44 nĩvo ĩndĩ mũthembi wĩmĩlika na aimĩsisya nesa. Ethĩwa ũwau ũsu nũnyaĩĩkĩte nyũmbanĩ ĩsu, asu nĩ mangũ mathũku mũno me vo. Nyũmba ĩsu nĩ mbuku. 45 Akeeĩaa nyũmba ĩsu yĩombowe, na ũu nĩ kwasya, mavia mayo, mbwaũ syayo, na kyonthe kĩla kĩĩmĩkandĩkĩte na ndaka ya nyũmba ĩsu, na ĩndĩ ikakuwa itwawe vandũnĩ vavuku nza wa ndũa. 46 Ĩndĩ mũndũ o na wĩva ũla ũkalika nyũmbanĩ ĩsu mũthenyanĩ o na wĩva ũla ĩvingĩtwe akeethĩwa e mũvuku nginya ĩ ya wĩoo; 47 na mũndũ o na wĩva ũla ũkakoma nyũmbanĩ ĩsu aĩlĩte kũvũa ngũa syake, na mũndũ o na wĩva ũla ũkaĩĩa nyũmbanĩ ĩsu aĩlĩte kũvũa ngũa syake.

48 “Ĩndĩ ethĩwa mũthembi akooka na ayona kana ũwau ũsu ndũnyaĩĩkĩte kũu nyũmbanĩ ĩtina wa nyũmba ĩsu kũkandĩkwa ĩngĩ, nĩvo ĩndĩ mũthembi wĩtangaasa kana nyũmba ĩsu ti mbuku nũndũ ũwau ũsu nũvoete. 49 Akoosa nyũnyi ilĩ, ũvonge wa mũtalakwe,* kĩtambaa kĩtune mũno, na ĩsovo, nĩ kana athesye nyũmba ĩsu kumana na ũvuku.* 50 Aĩlĩte kũaĩa nyũnyi ĩmwe mũionĩ wa yũmba wĩ na kĩwʼũ kĩtavĩtwe vandũ kĩnavĩtĩte. 51 Na ĩndĩ ayosa ũvonge wa mũtalakwe,* ĩsovo, kĩtambaa kĩtune mũno, na nyũnyi ĩla yĩ thayũ na ayĩinda syĩndũ isu syonthe nthakamenĩ ya nyũnyi ĩla yooaĩwa kĩwʼũnĩ kĩla kĩtavĩtwe vandũ kĩnavĩtĩte, na no nginya amĩtalĩkangye yelekele nyũmba ĩsu mavinda mũonza. 52 Na akathesya nyũmba ĩsu kumana na ũvuku* atũmĩĩte nthakame ya nyũnyi ĩsu, kĩwʼũ kĩtavĩtwe vandũ kĩnavĩtĩte, nyũnyi ĩla yĩ thayũ, ũvonge wa mũtalakwe,* ĩsovo, na kĩtambaa kĩtune mũno. 53 Na ĩndĩ akalekya nyũnyi ĩsu yĩ thayũ ĩthi kĩthekanĩ nza wa ndũa na ayĩwʼanĩthya nyũmba ĩsu, na ĩkeethĩwa ĩte mbuku.

54 “Ũũ nĩwʼo mwĩao ũkonetye ũwau o na wĩva wa mangũ, ũwau wa kĩkonde kya mũtwe kana kĩngʼee, 55 mangũ ma ngũa kana nyũmba, 56 na ũla ũkonetye wimbu, ngũsĩ, na malavata, 57 nĩ kana vamanyĩke yĩla kĩndũ kĩvuku na yĩla kĩndũ kĩte kĩvuku. Ũũ nĩwʼo mwĩao ũkonetye mangũ.”

15 Yeova aendeeie kũneena na Mose na Alũni, aimea: 2 “Neenai na Aisilaeli na mũimatavya, ‘Ethĩwa mũndũũme nũkumwa nĩ kĩko ĩmuthanĩ yake ya ũsyai,* kĩko kĩu kĩtuma ethĩwa e mũvuku. 3 Nĩ mũvuku nũndũ wa kĩko kĩu kĩkuma, kĩthĩwe nĩkĩkũendeea kuma ĩmuthanĩ yake ya ũsyai kana nĩkĩsiĩĩe, no mũvuku.

4 “‘Kĩtanda o na kĩva kĩla mũndũ ũsu ũkumwa nĩ kĩko wakomea kĩkeethĩwa kĩvuku, na kĩndũ o na kĩva wekalĩla kĩkeethĩwa kĩvuku. 5 Mũndũ ũla ũkakiita kĩtanda kyake no nginya avũe ngũa syake, na aĩlĩte kũthamba na kĩw’ũ na ayĩthĩwa e mũvuku nginya ĩ ya wĩoo. 6 Mũndũ o na wĩva ũkekalĩla kĩndũ mũndũ ũsu ũkumwa nĩ kĩko eĩkalĩle aĩlĩte kũvũa ngũa syake, athambe na kĩw’ũ, na ayĩthĩwa e mũvuku nginya ĩ ya wĩoo. 7 Mũndũ o na wĩva wakiita ũla ũkumwa nĩ kĩko kĩu aĩlĩte kũvũa ngũa syake, athambe na kĩwʼũ, na ayĩthĩwa e mũvuku nginya ĩ ya wĩoo. 8 Ethĩwa ũla ũkumwa nĩ kĩko kĩu nĩwatw’ĩla mũndũ ũte mũvuku mata, mũndũ ũsu no nginya avũe ngũa syake, athambe na kĩwʼũ, na ayĩthĩwa e mũvuku nginya ĩ ya wĩoo. 9 Ĩtandĩko o na yĩva yĩla mũndũ ũsu ũkumwa nĩ kĩko wekalĩla akuĩtwe nĩ nyamũ yĩkeethĩawa yĩ ĩvuku. 10 Mũndũ o na wĩva ũla ũkakiita kĩndũ o na kĩva kĩla eĩkalĩle akeethĩwa e mũvuku nginya ĩ ya wĩoo, na mũndũ o na wĩva ũla ũkakua syĩndũ isu akavũa ngũa syake, athambe na kĩwʼũ, na ayĩthĩwa e mũvuku nginya ĩ ya wĩoo. 11 Ethĩwa mũndũ ũsu ũkumwa nĩ kĩko ndanathamba moko make na kĩw’ũ na aikiita mũndũ ũngĩ, no nginya ĩndĩ mũndũ ũsu ũngĩ avũe ngũa syake, athambe na kĩw’ũ, na ayĩthĩwa e mũvuku nginya ĩ ya wĩoo. 12 Mũio wa yũmba ũla ũsu ũkumwa nĩ kĩko wakiita waĩle kũawa, na mũio wa mbwaũ o na wĩva ũla wakiita waĩle kũthambwʼa na kĩwʼũ.

13 “‘Yĩla mũndũ waeka kumwa nĩ kĩko na eethĩwa ate mũvuku, nĩvo ĩndĩ ũkatala mĩthenya mũonza ya kũthewʼa kwake, na no nginya avũe ngũa syake, athambe na kĩwʼũ kĩtavĩtwe vandũ kĩnavĩtĩte, na akeethĩwa ate mũvuku. 14 Mũthenyanĩ wa nyanya, aĩlĩte kwosa ndumbũ ilĩ kana maswii elĩ ma ĩvũĩ na ayũka mbee wa Yeova mũomonĩ wa ĩeema ya kũmbanĩa na ainenga mũthembi nyũnyi isu. 15 Na mũthembi akasyumya, ĩmwe yĩthĩwe nthembo ya naĩ na ĩla ĩngĩ yĩthĩwe nthembo ya kũvĩvw’a, na mũthembi akamwĩwʼanĩthya mbee wa Yeova nũndũ wa kumwa nĩ kĩko.

16 “‘Yu ethĩwa mũndũũme nũkumwa nĩ ũsamba,* aĩlĩte kũthamba mwĩĩ wʼonthe na kĩw’ũ na ayĩthĩwa e mũvuku nginya ĩ ya wĩoo. 17 No nginya avũe ngũa o na yĩva na kĩwʼũ na aithambya na kĩwʼũ kĩthuma o na kĩva kĩ na ũsamba, na ikeethĩwa syĩ mbuku nginya ĩ ya wĩoo.

18 “‘Yĩla mũndũũme wakoma na mũndũ mũka na aumwa nĩ ũsamba, maĩlĩte kũthamba na kĩwʼũ na mayĩthĩwa me avuku nginya ĩ ya wĩoo.

19 “‘Ethĩwa mũndũ mũka nũkumwa nĩ nthakame, akaendeea kwĩthĩwa e mũvuku mĩthenya mũonza. Mũndũ o na wĩva ũla wĩmũkiita akeethĩwa e mũvuku nginya ĩ ya wĩoo. 20 Kĩndũ o na kĩva kĩla wĩkomea ĩvindanĩ yĩu ũkumwa nĩ nthakame kĩkeethĩwa kĩ kĩvuku, na kĩla kĩndũ ũkekalĩla kĩkeethĩwa kĩ kĩvuku. 21 Mũndũ o na wĩva wakwata kĩtanda kyake aĩlĩte kũvũa ngũa syake, athambe na kĩw’ũ, na ayĩthĩwa e mũvuku nginya ĩ ya wĩoo. 22 Mũndũ o na wĩva wakiita kĩndũ o na kĩva mũndũ mũka ũsu eĩkalĩle aĩlĩte kũvũa ngũa syake, athambe na kĩw’ũ, na ayĩthĩwa e mũvuku nginya ĩ ya wĩoo. 23 Ethĩwa mũndũ mũka ũsu eĩkalĩle kĩtanda kana kĩndũ kĩngĩ, ũla wakĩkiita akeethĩwa e mũvuku nginya ĩ ya wĩoo. 24 Na ethĩwa mũndũũme nĩwakoma na mũndũ mũka ũsu na nĩwakiita nthakame ĩla ĩkũmuma, nĩvo ĩndĩ ũkethĩwa e mũvuku mĩthenya mũonza, na kĩtanda o na kĩva wakomea kĩkeethĩwa kĩ kĩvuku.

25 “‘Yĩla mũndũ mũka waumwa nĩ nthakame mĩthenya mingĩ ĩvinda yake ya kumwa nĩ nthakame yĩte ĩviku, kana ethĩwa nĩwaumwa nĩ nthakame ĩvinda yĩasanga kwĩ ũndũ wumawa nĩ nthakame, akeethĩwa e mũvuku mĩthenyanĩ yonthe ĩla ũkumwa nĩ nthakame, o ta mĩthenyanĩ ĩla wĩthĩawa e mũvuku nũndũ wa kumwa nĩ nthakame. 26 Kĩtanda o na kĩva wakomea mĩthenyanĩ ĩla ũkumwa nĩ nthakame kĩkeethĩwa kĩilye ta kĩtanda kya ĩvinda yĩla wĩthĩawa e mũvuku nũndũ wa kumwa nĩ nthakame, na kĩndũ o na kĩva ũkekalĩla kĩkeethĩwa kĩ kĩvuku ta ũvuku ũla wĩthĩawa nawʼo ĩvindanĩ yĩla ũkumwa nĩ nthakame. 27 Mũndũ o na wĩva ũla ũkaikiita akeethĩwa e mũvuku, na no nginya avũe ngũa syake, athambe na kĩw’ũ, na ayĩthĩwa e mũvuku nginya ĩ ya wĩoo.

28 “‘Ĩndĩ yĩla waeka kumwa nĩ nthakame, akatala mĩthenya mũonza, na ĩtina wa ũu akeethĩwa ate mũvuku. 29 Mũthenyanĩ wa nyanya, aĩle kwosa ndumbũ ilĩ kana maswii elĩ ma ĩvũĩ, na akaetee mũthembi nyũnyi isu mũomonĩ wa ĩeema ya kũmbanĩa. 30 Mũthembi akoosa ĩmwe yĩthĩwe nthembo ya naĩ na ĩla ĩngĩ yĩthĩwe nthembo ya kũvĩvw’a, na mũthembi akamwĩwʼanĩthya mbee wa Yeova nũndũ wa kwĩthĩwa ate mũtheu yĩla ũkumawa nĩ nthakame.

31 “‘Kwoou no nginya mũtetheesye Aisilaeli methĩwe mate avuku, nĩ kana maikakwʼĩĩe ũvukunĩ woo kwa kũvukya ĩeema yakwa ya ũthaithi, yĩla yĩ katĩ woo.

32 “‘Ũũ nĩwʼo mwĩao ũkonetye mũndũũme ũla ũkumwa nĩ kĩko, mũndũũme mũvuku nũndũ wa kumwa nĩ ũsamba, 33 mũndũ mũka mũvuku ĩvindanĩ yĩla ũkumwa nĩ nthakame, mũndũũme kana mũndũ mũka o na wĩva ũkumwa nĩ kĩko, na mũndũũme wakoma na mũndũ mũka mũvuku.’”

16 Yeova nĩwaneenie na Mose ĩtina wa ana elĩ ma Alũni kũkwʼa nũndũ wa kũmũthengeea Yeova. 2 Yeova eeie Mose atĩĩ: “Tavya Alũni mwana-a-inyia waku kana ndakokaa ĩvinda o yonthe vandũnĩ vatheu ĩtina wa vasia, mbee wa ngunĩko ya Ĩsandũkũ, nĩ kana ndakakwʼe nũndũ ngaumĩlaa ĩũlũ wa ngunĩko nĩ nthĩnĩ wa ĩtu.

3 “Kĩĩ nĩkyo Alũni waĩlĩte kũete yĩla ũkũka vandũnĩ vatheu: kasalũ kwondũ wa nthembo ya naĩ na ndũũme kwondũ wa nthembo ya kũvĩvwʼa. 4 Aĩlĩte kwĩkĩa kanzũ ntheu ya katane, na kĩnyasa kya* katane kyaĩlĩte kũvwʼĩka mwĩĩ wake,* na aĩlĩte kwova mũsivi wa kanzũ wa katane na ayĩkĩa kĩlemba kya katane mũtwenĩ wake. Nĩ ngũa ntheu. Akathamba na kĩwʼũ na aisyĩkĩa.

5 “Aĩlĩte kwosa kuma ũmbanonĩ wa Aisilaeli tũthenge twĩlĩ kwondũ wa nthembo ya naĩ na ndũũme ĩmwe kwondũ wa nthembo ya kũvĩvwʼa.

6 “No nginya Alũni aete nzaũ ya nthembo ya naĩ, ĩla ĩkumwʼa kwondũ wake mwene, na ayumya nthembo ya kũvwʼĩka naĩ syake mwene na sya nyũmba yake.

7 “Na ĩndĩ akoosa ila mbũi ilĩ na aisiũngamya mbee wa Yeova mũomonĩ wa ĩeema ya kũmbanĩa. 8 Alũni akakũna kula kwondũ wa mbũi isu ilĩ, kula ĩmwe yĩthĩwe ya Yeova na kula ĩla ĩngĩ ĩyĩthĩwa ya Asaseli.* 9 Alũni akoosa mbũi ĩla yakũnĩwa kula yĩthĩwe ya Yeova na aimyumya yĩthĩwe nthembo ya naĩ. 10 Ĩndĩ mbũi ĩla yakũnĩwa kula yĩthĩwe ya Asaseli yaĩlĩte kũetwe yĩ thayũ yĩũngame mbee wa Yeova nĩ kana nthembo ya kũvwʼĩka naĩ yumĩwʼe ĩũlũ wayo, na ĩilekwʼa ĩthi weũnĩ yĩthĩwe ya Asaseli.

11 “Alũni akaete ĩla nzaũ ya nthembo ya naĩ, ĩla ĩkumwʼa kwondũ wake mwene, na ayumya nthembo ya kũvwʼĩka naĩ syake mwene na sya nyũmba yake; ĩtina wa ũu, akathĩnza nzaũ ĩsu ya nthembo ya naĩ, ĩla ĩkumwʼa kwondũ wake mwene.

12 “Na ĩndĩ akoosa kĩndũ kya kwĩkĩa mwaki kyusĩe makaa me mwaki kuma kĩthembeonĩ kĩla kĩ mbee wa Yeova na ngundi ilĩ syusĩe ũvumba mũvinyu wĩ mũuke mũseo, na akasiete ĩtina wa vasia. 13 O na ĩngĩ, akeekĩa ũvumba ũsu mwakinĩ mbee wa Yeova, na ĩtu ya syũki ya ũvumba yĩkavwʼĩka ngunĩko ya Ĩsandũkũ, ĩla yĩ ĩũlũ wa Ũkũsĩ, nĩ kana ndakakwʼe.

14 “Akoosa nthakame ĩmwe ya nzaũ ĩsu na aimĩtalĩkangya na kyaa kyake mbee wa ngunĩko ngalĩko ya wumĩlonĩ wa sua, na akatalĩkangya nthakame ĩmwe na kyaa kyake mavinda mũonza mbee wa ngunĩko ĩsu.

15 “Ĩtina wa ũu, akathĩnza mbũi ya nthembo ya naĩ, ĩla nĩ kwondũ wa andũ, na ayĩete nthakame yayo ĩtina wa vasia na ayĩkana na nthakame yayo o ũndũ weekana na nthakame ya nzaũ; aĩlĩte kũmĩtalĩkangya amyelekelye ngunĩkonĩ ĩsu na mbee wa ngunĩko ĩsu.

16 “No nginya aumye nthembo ya kũvwʼĩka naĩ kwondũ wa vandũ vatheu nũndũ wa meko ma ũvuku ma Aisilaeli na nũndũ wa mavĩtyo na naĩ syoo, na ũu nĩwʼo waĩlĩte kwĩka kwondũ wa ĩeema ya kũmbanĩa, yĩla yĩ katĩ woo katĩkatĩ wa meko moo ma ũvuku.

17 “Vai mũndũ ũngĩ waĩlĩte kwĩthĩwa ĩeemanĩ ya kũmbanĩa kuma yĩla walika vandũnĩ vatheu nĩ kana aumye nthembo ya kũvwʼĩka naĩ nginya aumaale. Akaumya nthembo ya kũvwʼĩka naĩ syake mwene na sya nyũmba yake na sya ũmbano wʼonthe wa Isilaeli.

18 “Na ĩndĩ akauma vau na aithi kĩthembeonĩ kĩla kĩ mbee wa Yeova, na ayumya nthembo ya kũvwʼĩka naĩ kwondũ wakyo, na akoosa nthakame ĩmwe ya ĩla nzaũ na nthakame ĩmwe ya ĩla mbũi na aimĩvaka mbyanĩ sya kĩthembeo ngalĩko syonthe. 19 O na ĩngĩ, akatalĩkangya nthakame ĩmwe ĩũlũ wakyo na kyaa kyake mavinda mũonza na aikĩthesya nũndũ wa meko ma ũvuku ma Aisilaeli.

20 “Amina kumya nthembo ya kũvwʼĩka naĩ kwondũ wa vandũ vatheu na ĩeema ya kũmbanĩa na kĩthembeo, akasyoka aete mbũi ĩla yĩ thayũ. 21 Alũni akailĩĩla moko make mũtwenĩ wa mbũi ĩsu yĩ thayũ na ayumbũla ĩũlũ wayo mavĩtyo onthe ma Aisilaeli na naĩ syoo syonthe, na akasilĩĩla mũtwenĩ wa mbũi ĩsu na aimĩnengane ĩtwawe weũnĩ nĩ mũndũ ũla eĩnyuvĩtwe eke ũu.* 22 Mbũi ĩsu ĩkakua mavĩtyo moo onthe ĩtwae yalatanĩ, na akalekya mbũi ĩsu ĩthi weũnĩ.

23 “Na ĩndĩ Alũni akalika ĩeemanĩ ya kũmbanĩa na ayumya ngũa sya katane ila wĩkĩie yĩla ũlikile vandũ vatheu, na aisiia vau nthĩ. 24 No nginya athambe mwĩĩ na kĩwʼũ e vandũnĩ vatheu na ayĩkĩa ngũa syake; na ĩndĩ ayumaala na ayumya nthembo yake ya kũvĩvw’a na nthembo ya andũ ya kũvĩvw’a na ayumya nthembo ya kũvwʼĩka naĩ syake mwene na sya andũ. 25 Akatuma mathunya ma nthembo ya naĩ matoa kĩthembeonĩ.

26 “Mũndũ ũla watwaa mbũi ya Asaseli aĩle kũvũa ngũa syake na aithamba na kĩw’ũ, na ĩtina wa ũu, no alike kambinĩ.

27 “Na ĩla nzaũ ya nthembo ya naĩ na ĩla mbũi ya nthembo ya naĩ, ila nthakame yasyo ĩetiwe vandũnĩ vatheu nĩ kana ĩvwʼĩke naĩ, ikaumaalw’a nza wa kambi, na ithuma syasyo na nyama syasyo na kyaa kyasyo ikavĩvwʼa vyũ na mwaki. 28 Ũla waivĩvya aĩle kũvũa ngũa syake na aithamba na kĩw’ũ, na ĩtina wa ũu, no alike kambinĩ.

29 “Ũũ ũkeethĩawa ũtwʼĩo wa ĩvinda yonthe kwondũ wenyu: Mweinĩ wa mũonza, mũthenya wa ĩkũmi wa mwei ũsu, mwaĩle kwĩthĩny’a,* na mũyaĩlĩte kũtethya wĩa o na wĩva, inyw’ĩ kana mũeni ũtwĩe katĩ wenyu. 30 Mũthenyanĩ ũsu nĩwʼo nthembo ya kũvwʼĩka naĩ yĩumwa kwondũ wenyu, nĩ kana mũtalwe kwĩthĩwa mũte avuku. Mũkeethĩwa mwĩ atheu kumana na naĩ syenyu syonthe mbee wa Yeova. 31 Nĩ savato ya kũthũmũa vyũ kwondũ wenyu, na mwaĩlĩte kwĩthĩnyʼa.* Nĩ ũtwʼĩo wa ĩvinda yonthe.

32 “Mũthembi ũla wetĩkĩwʼa mauta na anengwa ũkũmũ wa kũthũkũma* e mũthembi ĩtina wa ĩthe, akaumya nthembo ya kũvwʼĩka naĩ na ayĩkĩa ila ngũa ntheu sya katane. 33 Akaumya nthembo ya kũvwʼĩka naĩ kwondũ wa vala vandũ vatheu, ĩeema ya kũmbanĩa, na kĩthembeo; na ayumya nthembo ya kũvwʼĩka naĩ kwondũ wa athembi na kwondũ wa andũ onthe ma ũmbano wa Isilaeli. 34 Ũsu ũkeethĩawa ũtwʼĩo wa ĩvinda yonthe kwondũ wenyu, nĩ kana nthembo ya kũvwʼĩka naĩ syonthe sya Aisilaeli yumawʼe ĩvinda yĩmwe kĩla mwaka.”

Kwoou eeka o ũndũ Yeova weeaĩe Mose.

17 Yeova aendeeie kwĩa Mose atĩĩ: 2 “Neena na Alũni na ana make na Aisilaeli onthe na ũimea, ‘Ũũ nĩwʼo Yeova wĩaĩte:

3 “‘“Ethĩwa mũndũ o na wĩva wa nyũmba ya Isilaeli nĩwathĩnzĩa nzaũ kana katũlũme kana mbũi kambinĩ kana ethĩwa nĩwamĩthĩnzĩa nza wa kambi, 4 vandũ va kũmĩete mũomonĩ wa ĩeema ya kũmbanĩa nĩ kana amyumye yĩthĩwe nthembo kwondũ wa Yeova mbee wa ĩeema ya ũthaithi ya Yeova, mũndũ ũsu akatalĩlwa ĩvĩtyo ya kwĩtĩkya nthakame. Nĩwetĩkya nthakame, na no nginya mũndũ ũsu avetangwe* andũnĩ make. 5 Ũu ũkeethĩawa nĩ kana Aisilaeli maetee Yeova nthembo, ila yu mathembeaa kũndũ nza, masiete mũomonĩ wa ĩeema ya kũmbanĩa, vala ve mũthembi. Maĩlĩte kũithembea Yeova syĩthĩwe nthembo sya ngwatanĩo. 6 Na mũthembi akaminzangya nthakame yasyo kĩthembeonĩ kya Yeova mũomonĩ wa ĩeema ya kũmbanĩa na aituma mathunya matoa nĩ kana methĩwe mũuke ũũmwendeesya* Yeova. 7 Kwoou mayaĩlĩte kũendeea kumĩsya ndaimoni iilye mbũi* nthembo, ila mekaa ũmalwaya nasyo. Ũũ ũkeethĩawa ũtwʼĩo wa ĩvinda yonthe kwondũ wenyu nzyawanĩ syenyu syonthe.”’

8 “Waĩlĩte kũmea, ‘Mũndũ o na wĩva wa nyũmba ya Isilaeli kana mũeni o na wĩva ũla wĩkalaa katĩ wenyu aumya nthembo ya kũvĩvwʼa kana nthembo ĩngĩ 9 na ailea kũmĩete mũomonĩ wa ĩeema ya kũmbanĩa nĩ kana amyumĩsye Yeova, no nginya avetangwe* andũnĩ make.

10 “‘Ethĩwa mũndũ o na wĩva wa nyũmba ya Isilaeli kana mũeni o na wĩva ũla wĩkalaa katĩ wenyu nĩwaya nthakame o na yĩva, vate nzika ngalea mũndũ* ũsu waya nthakame, na ngamũvetanga* andũnĩ make. 11 Nũndũ thayũ wa kyũmbe wĩ nthakamenĩ yakyo, na nyie mwene nĩnĩmĩnenganĩte kĩthembeonĩ kwondũ wenyu nĩ kana mumye nthembo ya kũvwʼĩka naĩ syenyu,* nĩkwĩthĩwa nthakame nĩyo ĩvwʼĩkaa naĩ nũndũ wa thayũ ũla wĩ nthĩnĩ wayo. 12 Kĩu nĩkyo kĩtumi natavya Aisilaeli: “Vai ũmwe* katĩ wenyu waĩlĩte kũya nthakame, na vai mũeni wĩkalaa katĩ wenyu waĩle kũya nthakame.”

13 “‘Ethĩwa mũndũ ũmwe katĩ wa Aisilaeli kana mũeni ũla wĩkalaa katĩ wenyu nĩwathi kũsyĩma na akwatya nyamũ ya kĩthekanĩ kana nyũnyi ĩtonya kũĩwa, no nginya ete nthakame yayo nthĩ na aimĩvwʼĩka na mũthanga. 14 Nũndũ thayũ wa kĩla mũthemba wa kyũmbe nĩ nthakame yakyo, nĩkwĩthĩwa thayũ wĩ nthakamenĩ. Nĩkyo kĩtumi ndavĩtye Aisilaeli ũũ: “Mũikaye nthakame ya kyũmbe kya mũthemba o na wĩva nũndũ thayũ wa kĩla kyũmbe nĩ nthakame yakyo. Mũndũ o na wĩva wamĩya akavetangwa.”* 15 Ethĩwa mũndũ* o na wĩva, ethĩwe asyaĩwe nthĩ yenyu kana nĩ mũeni, nĩwaya nyamũ yĩthĩiwe yĩ ngwʼũ kana ĩtembũangiwe nĩ nyamũ ya kĩthekanĩ, no nginya avũe ngũa syake na aithamba na kĩw’ũ na ayĩthĩwa e mũvuku nginya ĩ ya wĩoo; ĩtina wa ũu, akeethĩwa ate mũvuku. 16 Ĩndĩ ethĩwa ndanaivũa na ndanathamba mwĩĩ, akasũngĩa nũndũ wa ĩvĩtyo yake.’”

18 Yeova aendeeie kũneena na Mose, aimwĩa: 2 “Neena na Aisilaeli na ũimatavya, ‘Ninyie Yeova Ngai wenyu. 3 Mũikeke ũndũ andũ mekaa nthĩ ya Misili, kũla mwatwĩe, na mũikeke ũndũ andũ mekaa nthĩ ya Kanaanĩ, kũla nĩmũtwaĩte. Na mũikaatĩĩe motwʼĩo moo. 4 Mwaĩlĩte kũatĩĩa sila wakwa, na mwaĩlĩte kũkwata motwʼĩo makwa na kũmaatĩĩa. Ninyie Yeova Ngai wenyu. 5 No nginya mũkwatae motwʼĩo makwa na sila wakwa; mũndũ o na wĩva ũla wĩkaa maũndũ asu akekalaa thayũ nũndũ wamo. Ninyie Yeova.

6 “‘Vai mũndũ katĩ wenyu waĩlĩte kũthengeea mũndũ o na wĩva katĩ wa andũ make ma mũsyĩ ma vakuvĩ nĩ kana amanyane nake kĩ-mwĩĩ.* Ninyie Yeova. 7 Ndũkamanyane kĩ-mwĩĩ na ĩthe waku, na ndũkamanyane kĩ-mwĩĩ na inyia waku. Nĩ inyia waku, na ndwaĩlĩte kũmanyana kĩ-mwĩĩ nake.

8 “‘Ndũkamanyane kĩ-mwĩĩ na kĩveti kya ĩthe waku. Kũu nĩ kwĩkĩĩthya ĩthe waku nthoni.*

9 “‘Ndũkamanyane kĩ-mwĩĩ na mwĩĩtu mũsyaanĩwʼe, ethĩwe nĩ mwĩĩtu wa ĩthe waku kana nĩ mwĩĩtu wa inyia waku, ethĩwe asyaĩwe mũsyĩnĩ o ũsu kana asyaĩwe nza wawʼo.

10 “‘Ndũkamanyane kĩ-mwĩĩ na mwĩĩtu wa mwana waku kana mwĩĩtu wa mwĩĩtu waku, nũndũ mo nĩ ũthei waku.

11 “‘Ndũkamanyane kĩ-mwĩĩ na mwĩĩtu wa kĩveti kya ĩthe waku, ũsyao wa ĩthe waku, nũndũ nĩmũsyaanĩwʼe.

12 “‘Ndũkamanyane kĩ-mwĩĩ na mwĩĩtu ũsyaanĩwʼe na ĩthe waku. Nũndũ nĩ mũndũ ũilenyʼe ũndũ kĩ-nthakame na ĩthe waku.

13 “‘Ndũkamanyane kĩ-mwĩĩ na mwĩĩtu ũsyaanĩwʼe na inyia waku, nũndũ nĩ mũndũ ũilenyʼe ũndũ kĩ-nthakame na inyia waku.

14 “‘Ndũkekĩĩthye nthoni mũndũũme ũsyaanĩwʼe na ĩthe waku* kwa kũmanyana kĩ-mwĩĩ na kĩveti kyake. Kyo nĩ ta inyia waku.

15 “‘Ndũkamanyane kĩ-mwĩĩ na mũka-a-mwana waku. Nĩ kĩveti kya mwana waku, na ndwaĩlĩte kũmanyana kĩ-mwĩĩ nakyo.

16 “‘Ndũkamanyane kĩ-mwĩĩ na kĩveti kya mũndũũme mũsyaanĩwʼe, nũndũ kũu nĩ kwĩkĩĩthya mũndũũme mũsyaanĩwʼe nthoni.*

17 “‘Ndũkamanyane kĩ-mwĩĩ na mũndũ mũka na mwĩĩtu wake. Ndũkose mwĩĩtu ũsyaĩtwe nĩ mwana wa mũndũ mũka ũsu na mwĩĩtu ũsyaĩtwe nĩ mwĩĩtu wake nĩ kana mũmanyane kĩ-mwĩĩ. Asu nĩ andũ make ma mũsyĩ ma vakuvĩ; nĩ ũndũ mũthũku mũno.*

18 “‘Ndũkose mũndũ mũka ũsyaanĩwʼe na kĩveti kyaku ethĩwe kĩveti kyaku kya kelĩ nĩ kana ũmanyane nake kĩ-mwĩĩ mwĩĩtu ũsu masyaanĩwʼe e thayũ.

19 “‘Ndũkathengeee mũndũ mũka ĩvindanĩ yĩla wĩ na ũvuku wa kumwa nĩ nthakame nĩ kana ũmanyane kĩ-mwĩĩ nake.

20 “‘Ndũkamanyane kĩ-mwĩĩ na kĩveti kya mũndũ ũngĩ,* na kwoou ũyĩthĩwa wĩ mũvuku.

21 “‘Ndũketĩkĩlye ũsyao o na wĩva waku wumĩwʼe* Moleki. Ndũkavukye ĩsyĩtwa ya Ngai waku kwa nzĩa ĩsu. Ninyie Yeova.

22 “‘Ndũkakome na mũndũũme o ũndũ ũkomaa na mũndũ mũka. Kĩu nĩ kĩko kya kũthatya.

23 “‘Mũndũũme ndaĩlĩte kũmanyana kĩ-mwĩĩ na nyamũ nĩ kana evukye nayo; mũndũ mũka ndaĩlĩte kũmanyana kĩ-mwĩĩ na nyamũ. Ũsu nĩ ũndũ ũtaĩle kwĩkwa nĩ andũ.

24 “‘Mũikevukye na ũndũ o na wĩva katĩ wa maũndũ asu, nĩkwĩthĩwa mbaĩ ila ngũlũngya syume mbee wenyu nĩsyĩvukĩtye na maũndũ asu onthe. 25 Nũndũ wa ũu, nthĩ nĩ mbuku, na ngamĩsilĩla nũndũ wa ĩvĩtyo yayo, na nthĩ ĩkatavĩka ekali mayo. 26 Ĩndĩ inywʼĩ no nginya mũkwatae motwʼĩo makwa na sila wakwa, na mũyaĩlĩte kwĩka ũndũ o na wĩva katĩ wa maũndũ asu ma kũthatya, ethĩwe nĩ mũndũ ũsyaĩwe nthĩ yenyu kana nĩ mũeni wĩkalaa katĩ wenyu. 27 Nũndũ maũndũ asu onthe ma kũthatya nĩmeekiwe nĩ andũ ala mekalaa nthĩ ĩsu, na yu nthĩ ĩsu nĩ mbuku. 28 Na ĩndĩ nthĩ ndĩkamũtavĩka nũndũ wa kũmĩvukya o ũndũ ĩkatavĩka mbaĩ ila syaĩ vo mbee wenyu. 29 Ethĩwa mũndũ o na wĩva nĩweeka ũndũ ũmwe katĩ wa maũndũ asu ma kũthatya, onthe* ala mamekaa no nginya mavetangwe* katĩ wa andũ moo. 30 No nginya mwĩanĩsye kĩla nĩmwĩaĩe kwa kũema kwĩka ũndũ o na wĩva katĩ wa mĩtuo ĩsu ya kũthatya ĩla yeekawa mbee wenyu, nĩ kana ĩikatume mwĩthĩwa mwĩ avuku. Ninyie Yeova Ngai wenyu.’”

19 Yeova aendeeie kũneena na Mose aimwĩa: 2 “Neena na ũmbano w’onthe wa Isilaeli na ũiũtavya, ‘Mwaĩle kwĩthĩwa atheu, nũndũ nyie, Yeova Ngai wenyu, nĩ mũtheu.

3 “‘Kĩla ũmwe wenyu aĩlĩte kũnenga ndaĩa* inyia wake na ĩthe wake, na mwaĩlĩte kũkwata savato syakwa. Ninyie Yeova Ngai wenyu. 4 Mũikethyũũĩe ngai sya mana kana mwĩseũvĩsye ngai sya kyũma kĩtwekethye. Ninyie Yeova Ngai wenyu.

5 “‘Yu ethĩwa nĩmũkumĩsya Yeova nthembo ya ngwatanĩo, mwaĩlĩte kũmyumya kwa nzĩa ĩkũtuma mwĩtĩkĩlwa. 6 Yaĩlĩte kũĩwa mũthenya ũla yaumw’a, na mũthenya ũla ũatĩĩe, ĩndĩ kĩla kyatiala nginya mũthenya wa katatũ kyaĩlĩte kũvĩvw’a vyũ na mwaki. 7 Ĩndĩ ethĩwa ĩmwe nĩyaĩwa mũthenya wa katatũ, ũsu nĩ ũndũ wa kũthatya na ndĩketĩkĩlwa. 8 Ũla wamĩya akasũngĩa kwondũ wa naĩ yake nũndũ nũvukĩtye kĩndũ kĩtheu kya Yeova, na mũndũ* ũsu no nginya avetangwe* andũnĩ make.

9 “‘Yĩla mũũketha ngetha ya nthĩ yenyu, mũikakethe ndee sya mĩũnda yenyu vyũ na mũikakolanyʼe kĩla kyatiala kya ngetha yenyu. 10 O na ĩngĩ, mũikombanyʼe kĩla kyatiala mĩũndanĩ yenyu ya mĩsavivũ kana mũkolanyʼe nzavivũ ila inyaĩĩkĩte mĩũndanĩ yenyu ya mĩsavivũ. Mwaĩlĩte kũkĩtiĩa ũla ngya* na mwĩkali wa ũeninĩ. Ninyie Yeova Ngai wenyu.

11 “‘Mũikoye, mũikakengane, na mũikekane maũndũ ma ũseleke. 12 Mũikevĩte na ũvũngũ ĩsyĩtwanĩ yakwa na kwoou mũivukya ĩsyĩtwa ya Ngai wenyu. Ninyie Yeova. 13 “‘Ndũkavene mũndũ ũngĩ, na ndũkavutane. Ndũkekale nginya kwakya na mũsaala wa mũthũkũmi mũandĩke.

14 “‘Ndũkaumanĩe* mũndũ ũtatonya kwĩwʼa kana ũiĩe kĩlalinda kĩsiĩĩi, na no nginya ũmũkĩe Ngai waku. Ninyie Yeova.

15 “‘Ndũkaumye ũsili ũte wa katĩ. Ndũkendeesye ũla ngya kana wonyʼe ũla mũthwii kyende. Waĩlĩte kũatĩĩa ũsili wa katĩ yĩla ũũsilĩla mũndũ ũla ũngĩ.

16 “‘Ndũkathi ũnyaĩĩkĩtye andũnĩ maku ndeto sya ũvũngũ sya kwanangĩa angĩ ĩsyĩtwa. Ndũkeke ũndũ ũtonya kũlikya thayũ wa* mũndũ ũla ũngĩ mũisyonĩ.* Ninyie Yeova.

17 “‘Ndũkamene mwana-a-inyia waku ngoonĩ yaku. Waĩle kũkany’a mũndũ ũla ũngĩ, nĩ kana ndũkakue naĩ vamwe nake.

18 “‘Ndũkeyĩĩvanĩsye kana woveee ana ma andũ maku ũthatu ngoonĩ yaku, na no nginya ũmwende mũndũ ũla ũngĩ o ũndũ wĩyendete. Ninyie Yeova.

19 “‘Mwaĩlĩte kũkwata motwʼĩo makwa: Ndũketĩkĩle mĩthemba ĩlĩ ya nyamũ syaku sya mũsyĩ ĩsyaane. Ndũkavande mĩthemba ĩlĩ ya mbeũ mũũndanĩ waku, na ndũkekĩe ngũa ĩtumĩtwe na mĩthemba ĩlĩ ya ndii ivulanĩte.

20 “‘Yu ethĩwa mũndũũme nĩwamanyana kĩ-mwĩĩ na mũndũ mũka na mũndũ mũka ũsu nĩ mũthũkũmi wĩvaĩtwʼe nĩ mũndũũme ũngĩ, ĩndĩ ndanamba kwovowʼa kana kũthaw’a, maĩle kũsilĩlwa. O na ũu wĩ o vo, mayaĩlĩte kũawa, nũndũ mũndũ mũka ũsu ndanamba kũthaw’a. 21 Mũndũũme ũsu aĩlĩte kũetee Yeova nthembo yake ya ĩvĩtyo mũomonĩ wa ĩeema ya kũmbanĩa, ndũũme ya nthembo ya ĩvĩtyo. 22 Mũthembi akatũmĩa ndũũme ĩsu ya nthembo ya ĩvĩtyo amwĩwʼanĩthye mbee wa Yeova nũndũ wa naĩ ĩla wĩkĩte, nake akaekewa naĩ ĩsu.

23 “‘Yĩla mwĩlika nthĩ ĩsu na mũivanda mũtĩ o na wĩva wa lĩu, mwaĩlĩte kwona ũsyao waw’o ta kĩndũ kĩte kĩtheu na kĩvatane.* Kwa myaka ĩtatũ mũkeethĩwa mwĩ avate kũũya.* Ndwaĩlĩte kũĩwa. 24 Ĩndĩ mwakanĩ wa kana, matunda maw’o onthe makeethĩwa me matheu; mũkamumĩsya Yeova mwĩ atanu. 25 Na ĩndĩ mwakanĩ wa katano, no mũye matunda mawʼo nĩ kana mwongelange ũsyao wawʼo ngethanĩ yenyu. Ninyie Yeova Ngai wenyu.

26 “‘Mũikaye kĩndũ o na kĩva kĩ na nthakame.

“‘Mũikamanthe maũndũ meũmwonyʼa ĩũlũ wa ĩvinda yũkĩte kana kwĩka syama sya ũwe.

27 “‘Mũikenze* nzwʼĩĩ ila syĩ ndee sya mĩtwe yenyu* kana kwananga mĩthya ya ing’ee syenyu.

28 “‘Mũikatemange mĩĩ yenyu nũndũ wa mũndũ mũkwʼũ,* na mũikevane movano. Ninyie Yeova.

29 “‘Ndũkavũthye mwĩĩtu waku kwa kũmũtw’ĩkĩthya ĩlwaya, nĩ kana ĩ nthĩ ndĩkeke ũmalwaya na ĩyusũwa nĩ mwĩkalĩle mũthũku.

30 “‘No nginya mũkwatae savato syakwa, na no nginya mũnengae ndaĩa* vandũ vakwa vatheu. Ninyie Yeova.

31 “‘Mũikamanthe ũtethyo kwa ala maneenanasya na maveva, na mũikakũlye ũtao ala me na mavinya ma kũvuanyʼa ĩvinda yũkĩte nĩ kana maikatume mwĩthĩwa mwĩ avuku. Ninyie Yeova Ngai waku.

32 “‘Waĩlĩte kũkĩla mbee wa mũtwe wĩ mbuĩ, na no nginya ũnenge mũndũ mũkũũ ndaĩa, na no nginya ũkĩe Ngai waku. Ninyie Yeova.

33 “‘Ethĩwa mũeni nĩwooka kwĩkala nenyu nthĩ yenyu, mũikamũthĩnyʼe. 34 Mũeni ũla wĩkalaa nenyu aĩle kwĩthĩwa ailye tenyu; na no nginya ũmwende o ũndũ wĩyendete, nũndũ inyw’ĩ mwaĩ ekali ma ũeninĩ nthĩ ya Misili. Ninyie Yeova Ngai wenyu.

35 “‘Mũikatũmĩe ithimi sya ũvũngũ yĩla mũũthima ũasa, ũito, kana wingĩ wa kĩndũ. 36 Mwaĩlĩte kũtũmĩa ithimi sya w’o, mavia ma w’o, kĩthimo kya w’o kya syĩndũ mbũmũ,* na kĩthimo kya w’o kya syĩndũ sya kĩw’ũ.* Ninyie Yeova Ngai wenyu, ũla wamumisye nthĩ ya Misili. 37 Kwoou no nginya mũkwatae motwʼĩo makwa onthe na sila wakwa wʼonthe, na no nginya mũatĩĩae maũndũ asu. Ninyie Yeova.’”

20 Yeova aendeeie kũneena na Mose, ayasya: 2 “Waĩlĩte kũtavya Aisilaeli, ‘Mũndũ o na wĩva wa Isilaeli na mũeni o na wĩva ũla wĩkalaa Isilaeli ũla wanenga Moleki ũsyao wake o na wĩva, vate nzika, aĩlĩte kũawa. Andũ ma vau wĩkalaa maĩlĩte kũmũkimanga na mavia nginya akwʼe. 3 Nyie mwene ngathatĩa mũndũ ũsu, na ngamũvetanga* andũnĩ make, nũndũ nũnengete Moleki ũsyao ũmwe wake na nũvukĩtye vandũ vakwa vatheu na akavukya ĩsyĩtwa yakwa ĩtheu. 4 Ethĩwa andũ ma nthĩ ĩsu makavinga metho moo na ngenda yĩla moona mũndũ ũsu ainenga Moleki ũsyao wake na maiema kũmũaa, 5 nĩvo ĩndĩ vate nzika nyie mwene nĩthatĩa mũndũ ũsu na mũsyĩ wake. Ngamũvetanga* andũnĩ make vamwe na onthe ala mamũkwatie mbau meke ũmalwaya na Moleki.

6 “‘Na ĩũlũ wa mũndũ* ũla wĩthyũũĩaa ala maneenanasya na maveva na ala me na mavinya ma kũvuanyʼa ĩvinda yũkĩte nĩ kana eke ũmalwaya wa kĩ-veva namo, vate nzika, ngathatĩa mũndũ* ũsu na ndimũvetanga* andũnĩ make.

7 “‘No nginya mwĩthesye na mũyĩthĩwa atheu, nũndũ ninyie Yeova Ngai wenyu. 8 Na no nginya mũkwatae motwʼĩo makwa na mũimaatĩĩaa. Ninyie Yeova, ũla ũkũmũthesya.

9 “‘Ethĩwa ve mũndũ o na wĩva waumanĩa* ĩthe wake kana inyia wake, vate nzika aĩlĩte kũawa. Nũndũ nĩwaumanĩa ĩthe wake kana inyia wake, nthakame yake mwene yĩ ĩũlũ wake.

10 “‘Yu ũũ nĩwʼo mwĩao ũla ũkaatĩĩawa yĩla mũndũũme weeka ũlaalai na kĩveti kya mũndũũme ũngĩ: Ũla weeka ũlaalai na kĩveti kya mũndũ ũngĩ vate nzika aĩlĩte kũawa, mũndũũme ũsu na mũndũ mũka ũsu. 11 Mũndũũme ũla wakoma na kĩveti kya ĩthe nĩweekĩĩthya ĩthe nthoni.* Vate nzika elĩ maĩlĩte kũawa. Nthakame yoo ene yĩ ĩũlũ woo. 12 Ethĩwa mũndũũme nĩwakoma na mũka-a-mwanae, vate nzika elĩ maĩlĩte kũawa. Meeka ũndũ ũtaĩle kwĩkwa nĩ andũ. Nthakame yoo ene yĩ ĩũlũ woo.

13 “‘Ethĩwa mũndũũme nĩwakoma na mũndũũme ũngĩ o ũndũ mũndũũme ũtonya kũkoma na mũndũ mũka, elĩ mekĩte ũndũ wa kũthatya. Vate nzika maĩlĩte kũawa. Nthakame yoo ene yĩ ĩũlũ woo.

14 “‘Ethĩwa mũndũũme nĩwoosa mũndũ mũka na inyia wake, nĩ ũndũ mũthũku mũno.* Maĩlĩte kũvĩvya mũndũũme ũsu na aka asu na mwaki, nĩ kana mwĩkalĩle ũsu mũthũku ndũkaendeee katĩ wenyu.

15 “‘Ethĩwa mũndũũme nĩwamanyana kĩ-mwĩĩ na nyamũ, vate nzika aĩlĩte kũawa, na maĩlĩte kũaa nyamũ ĩsu. 16 Ethĩwa mũndũ mũka nĩwathengeea nyamũ o na yĩva nĩ kana amanyane nayo kĩ-mwĩĩ, no nginya mũae mũndũ mũka ũsu na nyamũ ĩsu. Vate nzika, mwaĩlĩte kũaa mũndũ mũka ũsu na nyamũ ĩsu. Nthakame yoo ene yĩ ĩũlũ woo.

17 “‘Ethĩwa mũndũũme nĩwamanyana kĩ-mwĩĩ na mwĩĩtu masyaanĩwʼe, mwĩĩtu wa ĩthe wake kana mwĩĩtu wa inyia wake, na oona ũthei wa mwĩĩtu ũsu na mwĩĩtu ũsu oona ũthei wake, ũsu nĩ ũndũ wĩ nthoni. No nginya mavetangwe* mbee wa metho ma ana ma andũ moo. Mũndũũme ũsu nĩweekĩĩthya mwĩĩtu ũsu masyaanĩwʼe nthoni.* Aĩlĩte kũsũngĩa nũndũ wa ĩvĩtyo yake.

18 “‘Ethĩwa mũndũũme nĩwakoma na mũndũ mũka ũkumwa nĩ nthakame na amanyana kĩ-mwĩĩ nake, me elĩ nĩmaleete kũnenga ndaĩa kumwa nĩ nthakame kwake. No nginya me elĩ mavetangwe* andũnĩ moo.

19 “‘Ndũkamanyane kĩ-mwĩĩ na mwĩĩtu ũsyaanĩwʼe na inyia waku kana mwĩĩtu ũsyaanĩwʼe na ĩthe waku, nũndũ kwĩka ũu nĩ kwĩkĩĩthya nthoni mũndũ mũilenyʼe ũndũ kĩ-nthakame. Maĩlĩte kũsũngĩa nũndũ wa ĩvĩtyo yoo. 20 Mũndũũme ũla wakoma na kĩveti kya mwendwʼa-ĩthe eekĩĩthya mwendwʼa-ĩthe nthoni.* Maĩlĩte kũsũngĩa nũndũ wa naĩ yoo. Maĩlĩte kũkwʼa mate kana. 21 Ethĩwa mũndũũme nĩwoosa kĩveti kya mũndũũme masyaanĩwʼe, nĩ ũndũ waĩle kũmenwa vyũ. Nĩweekĩĩthya mũndũũme masyaanĩwʼe nthoni.* Maĩlĩte kwĩkala mate kana.

22 “‘No nginya mũkwatae motwʼĩo makwa onthe na sila wakwa wʼonthe na mũiũatĩĩaa, nĩ kana nthĩ ĩla nĩmũtwaĩte mwĩkalae ĩikamũtavĩke. 23 Mũikaendae motwʼĩonĩ ma mbaĩ ila ngũlũngya syume mbee wenyu; nũndũ nĩsyĩkĩte maũndũ asu onthe na nĩnĩimenete vyũ. 24 Nĩkyo kĩtumi namwĩie: “Mũkoosa nthĩ yoo, na ngamũnenga yo yĩthĩwe yenyu, nthĩ yusũĩte ĩia na ũkĩ wa nzũkĩ. Ninyie Yeova Ngai wenyu, ũla ũmũvathĩte kuma ngonĩ sya andũ.” 25 No nginya mũvathũkanyʼe katĩ wa nyamũ ĩla ĩte mbuku na ĩla mbuku na katĩ wa nyũnyi ĩla mbuku na ĩte mbuku; mũiketwʼĩkĩthye* kĩndũ kya kũthatya kwa kũya nyamũ kana nyũnyi kana kĩndũ o na kĩva kĩla kĩtambũkaa ĩũlũ wa nthĩ kĩla nĩvathĩte mũkyonae kĩ kĩvuku. 26 No nginya mwĩthĩwe atheu methonĩ makwa, nũndũ nyie, Yeova, nĩ mũtheu, na nĩngũmũvathanyʼa kuma ngonĩ sya andũ nĩ kana mwĩthĩwe makwa.

27 “‘Mũndũũme kana mũndũ mũka o na wĩva ũla ũneenanasya na maveva kana ũla wĩ na mavinya ma kũvuanyʼa ĩvinda yũkĩte,* vate nzika, aĩlĩte kũawa. Andũ maĩlĩte kũmakimanga na mavia nginya makwʼe. Nthakame yoo ene yĩ ĩũlũ woo.’”

21 Yeova aendeeie kũtavya Mose atĩĩ: “Neena na athembi, ana ma Alũni, na ũimatavya, ‘Vai mũndũ o na ũmwe waĩle kwĩvukya kwa kũkiita mũndũ mũkwʼũ* katĩ wa andũ make. 2 Ĩndĩ no eke ũu kwondũ wa mũndũ wa mũsyĩ wa vakuvĩ mailenyʼe ũndũ kĩ-nthakame, kwondũ wa inyia wake, ĩthe wake, mwana wake, mwĩĩtu wake, mũndũũme masyaanĩwʼe, 3 na no evukye nũndũ wa mwĩĩtu masyaanĩwʼe ethĩwa ndesĩ mũndũũme na nĩ wa vakuvĩ nake na ti mũtwae. 4 Ndaĩlĩte kwĩvukya mwene nĩ kana ethĩwe ate mũtheu nũndũ wa mũndũ mũka wa mũndũũme umĩte andũnĩ make. 5 Mayaĩlĩte kwenza mĩtwe yoo ngunũ kana kwenza mĩthya ya ingʼee syoo kana kũtemanga mĩĩ yoo. 6 Maĩlĩte kwĩthĩwa me atheu kwa Ngai woo, na mayaĩlĩte kũvukya ĩsyĩtwa ya Ngai woo, nũndũ nĩmaumĩasya Yeova nthembo ivĩvĩtwʼe na mwaki, mũkate* wa Ngai woo, na no nginya methĩwe me atheu. 7 Mayaĩlĩte kũtwaa ĩlwaya, mũndũ mũka mũvukye, kana mũndũ mũka ũla mũtwaano wake mũthasye, nũndũ mũthembi nĩ mũtheu kwa Ngai wake. 8 No nginya ũmũthesye, nũndũ nĩwe umasya mũkate wa Ngai waku. Aĩlĩte kwĩthĩwa e mũtheu kwaku, nũndũ nyie, Yeova, ũla ũkũmũthesya, nĩ mũtheu.

9 “‘Yu ethĩwa mwĩĩtu wa mũthembi nĩweevukya kwa kwĩka ũmalwaya, evũthya ĩthe wake. Aĩlĩte kũvĩvwʼa na mwaki.

10 “‘Mũthembi mũnene kuma ana-a-ĩthenĩ make,* ũla wĩtĩkĩwʼe mauta mũtwenĩ wake na ũla ũnengetwe ũkũmũ wa kwĩkĩa* ngũa sya mũthembi, ndaĩlĩte kũlekeleelya mũtwe wake kana kũtembũa ngũa syake. 11 Ndaĩlĩte kũthengeea mũndũ o na wĩva mũkwʼũ;* o na ndaĩlĩte kwĩvukya we mwene kwondũ wa ĩthe wake kana inyia wake. 12 Ndaĩlĩte kuma vala vandũ vatheu na ndaĩlĩte kũvukya vala vandũ vatheu va Ngai wake, nũndũ wonanyʼo wa kwĩyumya, mauta ma kwĩtĩkĩsya ma Ngai wake, wĩ ĩũlũ wake. Ninyie Yeova.

13 “‘No nginya atwae mũndũ mũka ũtesĩ mũndũũme. 14 Ndaĩlĩte kũtwaa ndiwa, mũndũ mũka ũla mũtwaano wake mũthasye, mũndũ mũka mũvukye, kana ĩlwaya; ĩndĩ aĩlĩte kũtwaa mũndũ mũka ũtesĩ mũndũũme umĩte andũnĩ make. 15 Ndaĩlĩte kũvukya ũsyao wake* katĩ wa andũ make, nũndũ ninyie Yeova, ũla ũkũmũthesya.ʼ”

16 Yeova aendeeie kũneena na Mose aimwĩa atĩĩ: 17 “Tavya Alũni, ‘Vai mũndũũme wa ũsyao waku* nzyawanĩ syoo syonthe wĩ kĩema* waĩlĩte kũthengeea nĩ kana aumye mũkate wa Ngai wake. 18 Ethĩwa ve mũndũũme o na wĩva wĩ kĩema,* ndaĩlĩte kũthengeea: mũndũũme kĩlalinda kana mwonzu kana mwanangĩku ũthyũ* kana wĩ na kũũ kana kwʼoko kũmwe kũasa mũno, 19 mũndũũme mũtũlĩku kũũ kana mũtũlĩku kwʼoko, 20 wĩ na nguu* mũongo kana ũteanaa,* kana mũndũũme wĩ na thĩna o na wĩva wa itho kana mũvũlĩkango wa makũndũ kana mĩnyoo kana mee manange. 21 Vai mũndũũme wa ũsyao wa* mũthembi Alũni wĩ na kĩema* waĩlĩte kũthengeea aumĩsye Yeova nthembo ivĩvĩtwʼe na mwaki. Nũndũ e na kĩema, ndaĩlĩte kũthengeea aumye mũkate wa Ngai wake. 22 No aye mũkate wa Ngai wake kuma syĩndũnĩ ila ntheu vyũ na kuma syĩndũnĩ ila ntheu. 23 Ĩndĩ o na ũu wĩ o vo, ndaĩlĩte kũthengeea vasia, na ndaĩlĩte kũthengeea kĩthembeo, nũndũ e na kĩema; na ndaĩlĩte kũvukya vandũ vakwa vatheu, nũndũ ninyie Yeova, ũla ũkũmathesya.ʼ”

24 Kwoou Mose aneena na Alũni na ana make na Aisilaeli onthe.

22 Yeova aendeeie kũneena na Mose, aimwĩa: 2 “Tavya Alũni na ana make kana maĩlĩte kũnenga ndaĩa* syĩndũ ntheu sya Aisilaeli na maikavukye ĩsyĩtwa yakwa ĩtheu ũndũnĩ ũkonetye syĩndũ ila meũthesya kwondũ wakwa. Ninyie Yeova. 3 Matavye, ‘Nzyawanĩ syenyu syonthe, mũndũ o na wĩva wa ũsyao wenyu, ũla wathengeea syĩndũ ntheu ila Aisilaeli matheetye kwondũ wa Yeova, e mũvuku, mũndũ* ũsu akavetangwa* mbee wakwa. Ninyie Yeova. 4 Vai mũndũ wa ũsyao wa Alũni ũla wĩ na mangũ kana ũkumwa nĩ kĩko waĩle kũya syĩndũ ntheu nginya ethĩwe ate mũvuku, o na mũndũ ũla wakiita mũndũ wĩthĩĩtwe e mũvuku nũndũ wa mũndũ mũkwʼũ,* o na mũndũ ũla ũkumwa nĩ ũsamba,* 5 o na mũndũ ũla wakiita kasamũ kavuku katĩ wa tũsamũ tũnini tũla twĩkalaa twĩ ikundi kana mũndũ ũla wakiita mũndũ mũvuku nũndũ wa kĩtumi o na kĩva na ũla ũtonya kũtuma ethĩwa e mũvuku. 6 Mũndũ* ũla wakiita kĩndũ o na kĩva katĩ wa syĩndũ isu akeethĩwa e mũvuku nginya ĩ ya wĩoo na ndaĩle kũya kĩndũ o na kĩva kya syĩndũ ntheu, ĩndĩ aĩlĩte kũthamba na kĩw’ũ. 7 Sua yathũa, akeethĩwa ate mũvuku, na ĩtina wa ũu, no aye syĩndũ imwe katĩ wa syĩndũ ntheu nũndũ nĩ lĩu wake. 8 O na ĩngĩ, ndaĩlĩte kũya nyamũ o na yĩva yeethĩwa yĩ ngwʼũ kana kĩndũ o na kĩva kĩtembũangĩtwe nĩ nyamũ sya kĩthekanĩ na kĩu kĩituma ethĩwa e mũvuku. Ninyie Yeova.

9 “‘No nginya meanĩsye kĩla nĩmeaĩe, nĩ kana maikeke naĩ nũndũ wa kũlea kũkĩanĩsya na kĩu kĩituma makwʼa nũndũ wa kũvukya syĩndũ ntheu. Ninyie Yeova, ũla ũkũmathesya.

10 “Mũndũ ũte mwĩtĩkĩlye* ndaĩle kũya kĩndũ o na kĩva kĩtheu. Mũeni wa mũthembi kana mũthũkũmi mũandĩke ndaĩle kũya kĩndũ o na kĩva kĩtheu. 11 Ĩndĩ ethĩwa mũthembi nĩwathooa mũndũ* na mbesa syake, mũndũ ũsu no aye syĩndũ isu. Ngombo ila syasyaĩwa mũsyĩ kwake o nasyo no iye lĩu wake. 12 Ethĩwa mwĩĩtu wa mũthembi nĩwatwawa nĩ mũndũ ũte mũthembi,* ndaĩlĩte kũya syĩndũ ntheu ila andũ maumĩtye. 13 Ĩndĩ ethĩwa mwĩĩtu wa mũthembi nĩwatwʼĩka ndiwa kana mũtwaano wake nĩ mũthasye na nde na syana na nĩwasyoka mũsyĩ kwa ĩthe wake vala wekalaa e mũnini, no aye lĩu ũmwe wa ĩthe wake; ĩndĩ vai mũndũ ũte mwĩtĩkĩlye* waĩlĩte kũũya.

14 “‘Yu ethĩwa mũndũ nĩwaya kĩndũ kĩtheu atesĩ, no nginya ongele kĩlungu kya katano kya thooa wakyo na ainenga mũthembi nthembo isu ntheu. 15 Kwoou mayaĩlĩte kũvukya syĩndũ ntheu ila Aisilaeli mamumĩsye Yeova 16 na maituma masilĩlwa nũndũ wa ĩvĩtyo yoo ya kũya syĩndũ syoo ntheu; nũndũ ninyie Yeova, ũla ũkũmathesya.’”

17 Yeova aendeeie kũneena na Mose, aimwĩa: 18 “Neena na Alũni na ana make na Aisilaeli onthe na ũimatavya, ‘Yĩla Mũisilaeli kana mwĩkali wa ũeninĩ nthĩ ya Isilaeli wamumĩsya Yeova nthembo ya kũvĩvwʼa nĩ kana eanĩsye wĩvĩto wake kana aumye nthembo ya ngenda, 19 aĩlĩte kumya nyamũ nũme ĩte na thĩna o na ũmwe kuma ndĩthyanĩ yake, tũtũlũme, kana mbũi, nĩ kana etĩkĩlwe. 20 Mũyaĩlĩte kumya kĩndũ o na kĩva kĩ na thĩna o na ũmwe, nũndũ kwĩka ũu kũkatuma mũtetĩkĩlwa.

21 “‘Ethĩwa mũndũ eumĩsya Yeova nthembo ya ngwatanĩo nĩ kana eanĩsye wĩvĩto kana yĩthĩwe nthembo ya ngenda, yaĩlĩte kwĩthĩwa nyamũ ĩte na thĩna o na ũmwe kuma ngʼombenĩ kana mbũinĩ na malondunĩ, nĩ kana etĩkĩlwe. Vai ĩmwe yaĩlĩte kwĩthĩwa na thĩna o na ũmwe. 22 Vai nthembo o na ĩmwe yaĩlĩte kwĩthĩwa kĩlalinda, ndũlĩku, ĩtemetwe, yĩ na nthunthua, ũngʼũũ, kana mĩnyoo; mũyaĩlĩte kumĩsya Yeova nthembo ĩmwe katĩ wa isu kana mumĩsye Yeova nthembo ya mũthemba ta ũsu kĩthembeonĩ. 23 No umye nzaũ kana ĩlondu yĩ na kwʼoko kana kũũ kũasa mũno kana kũkuvĩ mũno yĩthĩwe nthembo ya ngenda, ĩndĩ kĩla waumya kĩiketĩkĩlwa kĩthĩwe nthembo ya wĩvĩto. 24 Mũyaĩlĩte kumĩsya Yeova nyamũ yĩ na mee manange kana mavevenze kana makusĩtwʼe makaumwʼa kana makatilwa, na mũyaĩlĩte kũthemba nyamũ sya mũthemba ũsu nthĩ yenyu. 25 Na mũikathembe nyamũ o na ĩmwe katĩ wa isu kuma kwʼokonĩ kwa mũeni yĩthĩwe mũkate wa Ngai wenyu, nũndũ nĩ iema na syĩ na mathĩna. Nyamũ isu iiketĩkĩlwa.’”

26 Yeova aendeeie kũneena na Mose, aimwĩa: 27 “Yĩla nzaũ kana katũlũme kana mbũi yasyawa, ĩkaendeea kwĩkala na inyia wayo mĩthenya mũonza, ĩndĩ kuma mũthenyanĩ wa nyanya na kũendeea no yumwʼe yĩthĩwe nthembo na ĩyĩtĩkĩlwa, nthembo ĩvĩvĩtwʼe na mwaki kwondũ wa Yeova. 28 Mũyaĩlĩte kũthĩnza kasaũ ka nyamũ mwosete ngʼombenĩ syenyu kana katena ka ĩlondu mũthenya ũmwe na inyia wako.

29 “Ethĩwa nĩmũkumĩsya Yeova nthembo ya kũtũnga mũvea, mwaĩlĩte kũmyumya nĩ kana mwĩtĩkĩlwe. 30 Yaĩlĩte kũĩwa o mũthenya ũsu. Mũyaĩlĩte kũtia o na ĩmwe nginya kwakya. Ninyie Yeova.

31 “No nginya mũkwatae mĩao yakwa na kũmĩatĩĩaa. Ninyie Yeova. 32 Mũikavukye ĩsyĩtwa yakwa ĩtheu, na no nginya nĩthewʼe katĩ wa Aisilaeli. Ninyie Yeova, ũla ũkũmũthesya, 33 ũla ũmumĩtye nthĩ ya Misili nĩ kana nĩĩkĩĩthye nĩ Ngai wenyu. Ninyie Yeova.”

23 Yeova aendeeie kũneena na Mose, ayasya: 2 “Neena na Aisilaeli na ũimatavya, ‘Mboka sya Yeova sya mavinda ala matwʼĩtwe mwakanĩ ila mwaĩlĩte kũtangaasa nĩ maũmbano matheu. Ii nĩsyo mboka syakwa sya mavinda ala matwʼĩtwe:

3 “‘Wĩa no ũtethwʼe mĩthenya thanthatũ, ĩndĩ mũthenya wa mũonza nĩ savato ya kũthũmũa vyũ, ũmbano mũtheu. Mũyaĩle kũtethya wĩa o na ũmwe. Yaĩlĩte kwĩthĩwa savato kwondũ wa Yeova kw’onthe kũla mũtwĩe.

4 “‘Ii nĩsyo mboka sya Yeova sya mavinda ala matwʼĩtwe mwakanĩ, maũmbano matheu ala mwaĩlĩte kũtangaasa mavindanĩ ala manyuvĩtwe kwondũ wasyo: 5 Mweinĩ wa mbee, mũthenyanĩ wa 14 wa mwei ũsu, ĩ ya wĩoo* nĩ Vasaka ya Yeova.

6 “‘Mũthenyanĩ wa 15 wa mwei ũũ nĩ Mboka ya Mũkate ũte Ĩlawa kwondũ wa Yeova. Mwaĩlĩte kũya mĩkate ĩte ĩlawa mĩthenya mũonza. 7 Mũthenyanĩ wa mbee, mũkeethĩwa na ũmbano mũtheu. Mũyaĩlĩte kũtethya wĩa o na ũmwe mũmũ. 8 Ĩndĩ mwaĩlĩte kumĩsya Yeova nthembo ĩvĩvĩtw’e na mwaki mĩthenya mũonza. Mũkeethĩwa na ũmbano mũtheu mũthenyanĩ wa mũonza. Mũyaĩlĩte kũtethya wĩa o na ũmwe.’”

9 Yeova aendeeie kũneena na Mose, ayasya: 10 “Neena na Aisilaeli na ũimatavya, ‘Yĩla mwĩĩsa kũlika nthĩ ĩla ngũmũnenga na mũiketha ngetha ya nthĩ ĩsu, no nginya mũetee mũthembi kyove kya ũsyao wa mbee kya ngetha yenyu. 11 Na akavyũlya kyove kĩu mbee na ĩtina mbee wa Yeova nĩ kana atume mwĩtĩkĩlwa. Mũthembi aĩlĩte kũkĩvyũlya mũthenya ũla ũatĩĩe savato. 12 Mũthenya ũla kyove kĩu kĩkavyũlw’a, no nginya mumye katũlũme ka mwaka ũmwe kate na thĩna o na ũmwe, kethĩwe nthembo ya kũvĩvwʼa kwondũ wa Yeova. 13 Nthembo yayo ya lĩu ĩkeethĩwa ithimo ilĩ sya kĩlungu kya ĩkũmi kya eva* ya mũtu mũvinyu ũvulanĩtwʼe na mauta, yĩthĩwe nthembo ĩvĩvĩtwʼe na mwaki kwondũ wa Yeova, mũuke wa kwendeesya.* Nthembo yayo ya kũnyuwa ĩkeethĩwa kĩlungu kya kana kya ini* ya mbinyu. 14 Mũikaye mũkate o na ũmwe, mbaale ngaange, kana mbaale nziũ nginya mũthenya ũũ, nginya mũete nthembo ya Ngai wenyu. Nĩ ũtwʼĩo wa ĩvinda yonthe nzyawanĩ syenyu syonthe kw’onthe kũla mwĩtũa.

15 “‘Mwaĩlĩte kũtala savato mũonza kuma mũthenya ũla ũatĩĩe Savato, kwambĩĩa mũthenya ũla mwaete kyove kya nthembo ya kũvyũlw’a. Syaĩlĩte kwĩthĩwa syumwa nima. 16 Mũkatala mĩthenya 50 nginya mũthenya ũla ũatĩĩe Savato ya mũonza, na ĩndĩ mwaĩlĩte kumĩsya Yeova nthembo nzaũ ya lĩu. 17 Mwaĩlĩte kũete kuma kũla mũtwĩe mĩkate ĩlĩ yĩthĩwe nthembo ya kũvyũlwʼa. Yaĩlĩte kũuwa na ithimo ilĩ sya kĩlungu kya ĩkũmi kya eva* sya mũtu mũvinyu. Yaĩlĩte kũuwa na ĩlawa, yĩthĩwe ũsyao mwĩu wa mbee kwondũ wa Yeova. 18 Mwaĩlĩte kumanĩsya mĩkate ĩsu vamwe na tũlondu mũonza tũũme tũte na thĩna o na ũmwe, kĩla kamwe ke na mwaka ũmwe, na kasalũ kamwe na ndũũme ilĩ. Ikeethĩwa nthembo ya kũvĩvw’a kwondũ wa Yeova ĩla ĩkaumanĩw’a na nthembo ya lĩu na nthembo sya kũnyuwa, syĩthĩwe nthembo ĩvĩvĩtw’e na mwaki, yĩ na mũuke ũũmwendeesya* Yeova. 19 Na no nginya mumye kavũli kamwe kethĩwe nthembo ya naĩ na tũlondu twĩlĩ tũũme, kĩla kamwe ke na mwaka ũmwe, twĩthĩwe nthembo ya ngwatanĩo. 20 Mũthembi akaivyũlya mbee na ĩtina vamwe na ĩla mĩkate ya ũsyao mwĩu wa mbee, syĩthĩwe nthembo ya kũvyũlw’a mbee wa Yeova, o vamwe na tũla tũlondu twĩlĩ tũũme. Syaĩlĩte kwĩthĩwa kĩndũ kĩtheu kyumĩw’e Yeova kwondũ wa mũthembi. 21 Mũthenyanĩ ũsu mũkatangaasa kwĩthĩwe na ũmbano mũtheu kwondũ wenyu. Mũyaĩlĩte kũtethya wĩa o na ũmwe mũmũ. Nĩ ũtwʼĩo wa ĩvinda yonthe kũndũ kwʼonthe kũla mũtwĩe nzyawanĩ syenyu syonthe.

22 “‘Yĩla mũũketha ngetha ya nthĩ yenyu, mũikakethe ndee sya mĩũnda yenyu vyũ na mũyaĩlĩte kũkolany’a kĩla kyatiala kuma ngethanĩ yenyu. Mwaĩlĩte kũkĩtiĩa ũla ngya* na mwĩkali wa ũeninĩ. Ninyie Yeova Ngai wenyu.’”

23 Yeova aendeeie kũneena na Mose, ayasya: 24 “Tavya Aisilaeli, ‘Mweinĩ wa mũonza, mũthenyanĩ wa mbee wa mwei ũsu, mwaĩlĩte kũthũmũa vyũ, ũkeethĩwa ũlilikanyʼo ũla ũkatangaaswa kwa kũvuva soo, nĩ ũmbano mũtheu. 25 Mũyaĩlĩte kũtethya wĩa o na ũmwe mũmũ, na mũkaumĩsya Yeova nthembo ĩvĩvĩtw’e na mwaki.’”

26 Yeova nĩwasyokie aneena na Mose ĩngĩ, amwĩa: 27 “Ĩndĩ o na vailye ũu, mũthenyanĩ wa ĩkũmi wa mwei ũũ wa mũonza nĩ Mũthenya wa Wĩw’anĩthyo. Mwaĩlĩte kwĩthĩwa na ũmbano mũtheu, na no nginya mwĩthĩny’e* na mũyumĩsya Yeova nthembo ĩvĩvĩtw’e na mwaki. 28 Mũyaĩlĩte kũtethya wĩa o na ũmwe mũthenya ũũ nũndũ nĩ mũthenya wa wĩw’anĩthyo nĩ kana nthembo sya kũvw’ĩka naĩ syumw’e kwondũ wenyu mbee wa Yeova Ngai wenyu. 29 Mũndũ* o na wĩva ũla ũtakethĩny’a* mũthenyanĩ ũũ akavetangwa* andũnĩ make. 30 Na ngaananga kĩla mũndũ* ũtethasya wĩa o na wĩva mũthenyanĩ ũũ kuma andũnĩ make. 31 Mũikatethye wĩa o na ũmwe. Nĩ ũtwʼĩo wa ĩvinda yonthe nzyawanĩ syenyu syonthe kw’onthe kũla mwĩtũa. 32 Nĩ savato ya kũthũmũa vyũ kwondũ wenyu, na mũkeethĩny’a* mũthenyanĩ wa kenda wa mwei ũsu ĩ ya wĩoo. Mwaĩlĩte kũkwata savato yenyu kuma ĩ ya wĩoo nginya ĩ ya wĩoo.”

33 Yeova aendeeie kũneena na Mose, ayasya: 34 “Tavya Aisilaeli, ‘Mũthenyanĩ wa 15 wa mwei ũũ wa mũonza nĩ Mboka ya Ivanda* ĩla ĩkethĩwa mĩthenya mũonza kwondũ wa Yeova. 35 Mũkeethĩwa na ũmbano mũtheu mũthenyanĩ wa mbee, na mũyaĩlĩte kũtethya wĩa o na ũmwe mũmũ. 36 No nginya mumĩsye Yeova nthembo ĩvĩvĩtwʼe na mwaki mĩthenya mũonza. Mũthenyanĩ wa nyanya, mwaĩlĩte kwĩthĩwa na ũmbano mũtheu, na mwaĩlĩte kumĩsya Yeova nthembo ĩvĩvĩtwʼe na mwaki. Nĩ ũmbano wa mwanya. Mũyaĩlĩte kũtethya wĩa o na ũmwe mũmũ.

37 “‘Ii nĩsyo mboka sya Yeova sya mavinda ala matwʼĩtwe mwakanĩ ila mwaĩle kũtangaasa syĩthĩwe maũmbano matheu ma kũmumĩsya Yeova nthembo ĩvĩvĩtwʼe na mwaki: nthembo ya kũvĩvw’a na nthembo ya lĩu ya nthembo ĩsu na nthembo sya kũnyuwa kwosana na mũvango wa kĩla mũthenya. 38 Mũkasyumya vamwe na kĩla mumasya savatonĩ sya Yeova, na mĩthĩnzĩo yenyu, nthembo syenyu sya wĩvĩto, na nthembo syenyu sya ngenda, ila mwaĩlĩte kũmũnenga Yeova. 39 Ĩndĩ o na ũu wĩ o vo, mũthenyanĩ wa 15 wa mwei wa mũonza, yĩla mwoombanyʼa ũsyao wa ĩ nthĩ, mwaĩlĩte kũtanĩa mboka ya Yeova mĩthenya mũonza. Mũthenya wa mbee nĩ wa kũthũmũa vyũ na mũthenya wa nyanya nĩ wa kũthũmũa vyũ. 40 Mũthenyanĩ wa mbee, mũkoosa matunda ma mĩtĩ mĩseo mũno, mbonge sya mĩtende, mbonge sya mĩtĩ yĩ matũ maingĩ na mĩtĩ* ya mwandanĩ,* na mũkatana mbee wa Yeova Ngai wenyu mĩthenya mũonza. 41 Mũkamĩtanĩaa ta mboka ya kũmũkumya Yeova mĩthenya mũonza kĩla mwaka. Mwaĩlĩte kũmĩtanĩaa mweinĩ wa mũonza, nũndũ nĩ ũtwʼĩo wa ĩvinda yonthe nzyawanĩ syenyu syonthe. 42 Mwaĩlĩte kwĩkala ivandanĩ mĩthenya mũonza. Onthe ala masyaĩwe Isilaeli maĩlĩte kwĩkala ivandanĩ, 43 nĩ kana nzyawa syenyu ila syũkĩte itonye kũmanya kana nĩnatumie Aisilaeli mekala ivandanĩ yĩla namaumĩtye nthĩ ya Misili. Ninyie Yeova Ngai wenyu.’”

44 Kwoou Mose atavya Aisilaeli ĩũlũ wa mboka sya Yeova sya mavinda ala matwʼĩtwe mwakanĩ.

24 Yeova aendeeie kũneena na Mose, aimwĩa: 2 “Ĩaĩe Aisilaeli makũetee mauta makime na matheu ma mĩthata kwondũ wa taa, nĩ kana taa syĩkalae syakanĩte mavinda onthe. 3 Alũni aĩlĩte kũvanga nĩ kana taa ikekalaa syakanĩte mbee wa Yeova mavinda onthe kuma ĩ ya wĩoo nginya kwakya, nza wa vasia wa Ũkũsĩ ĩeemanĩ ya kũmbanĩa. Nĩ ũtwʼĩo wa ĩvinda yonthe nzyawanĩ syenyu syonthe. 4 Aĩlĩte kũvangaa taa isu nesa iatĩanĩe kĩndũnĩ kya kwilĩĩla taa kya thaavu mbee wa Yeova mavinda onthe.

5 “Ũkoosa mũtu mũvinyu na ũyĩua mĩkate 12 ya kĩlinge yĩ na ĩima katĩ nawʼo. Kĩla mũkate waĩlĩte kũuwa na ithimo ilĩ sya kĩlungu kya ĩkũmi kya eva.* 6 Ũkamĩvanga tũkundi twĩlĩ mesanĩ ya thaavu mũtheu mbee wa Yeova, kĩla kakundi ke na mĩkate thanthatũ ĩilĩanĩlwʼe. 7 Waĩlĩte kwĩkĩa ũvani mũtheu ĩũlũ wa kĩla kakundi, na ũkeethĩwa ta mũkate wa nthembo ya ũlilikanyʼo* ĩvĩvĩtwʼe na mwaki kwondũ wa Yeova. 8 Kĩla mũthenya wa Savato, aĩlĩte kũmĩvangaa mbee wa Yeova. Nĩ ũtianĩo wa ĩvinda yonthe katĩ wakwa na Aisilaeli. 9 Ĩkatwʼĩka ya Alũni na ana make, na makamĩya me vandũ vatheu, nũndũ nĩ kĩndũ kĩtheu vyũ kwondũ wake kyumĩtwʼe nthembonĩ sya Yeova ivĩvĩtwʼe na mwaki. Nĩ mwolooto wa ĩvinda yonthe.”

10 Yu katĩ wa Aisilaeli vaĩ mwanake wa mũndũ mũka Mũisilaeli na mũndũũme Mũmisili, na mwanake ũsu ambĩĩa kũkita na mũndũũme Mũisilaeli kambinĩ. 11 Mwana wa mũndũ mũka ũsu Mũisilaeli nĩwambĩĩie kũvũthĩĩsya yĩla Ĩsyĩtwa* na kũyĩumanĩa.* Kwoou mamũete vala ve Mose. Kaĩ inyia wake aĩ Selomithi, mwĩĩtu wa Ndivili wa mbaĩ ya Ndani. 12 Kwoou nĩmamũvingĩie vandũ nginya yĩla mataviwʼe ũtwi wa Yeova.

13 Nĩvo ĩndĩ Yeova weeie Mose: 14 “Umaalũkyai ũla ũnaumanĩie ĩsyĩtwa ya Ngai nza wa kambi, na no nginya onthe ala manamwĩw’ie mailĩĩle moko moo mũtwenĩ wake, na ĩndĩ ũmbano wʼonthe no nginya ũmũkimange na mavia. 15 Na waĩlĩte kũtavya Aisilaeli, ‘Ethĩwa mũndũ o na wĩva nĩwaumanĩa Ngai wake, akasũngĩa nũndũ wa naĩ yake. 16 Kwoou ũla wavũthĩĩsya ĩsyĩtwa ya Yeova, vate nzika, aĩlĩte kũawa. Vate ndĩi, ũmbano wʼonthe waĩlĩte kũmũkimanga na mavia. Mwĩkali wa ũeninĩ aĩlĩte kũawa o ũndũ ũmwe nenyu nũndũ wa kũvũthĩĩsya yĩla Ĩsyĩtwa.

17 “‘Ethĩwa mũndũ nĩwooaa mũndũ ũngĩ,* vate nzika aĩlĩte kũawa. 18 Mũndũ o na wĩva ũla wakũna nyamũ ya mũsyĩ amyũaa* aĩlĩte kũmĩĩvĩa, thayũ kwa thayũ. 19 Ethĩwa mũndũ nĩwaũmĩsya mũndũ ũngĩ, aĩlĩte kwĩkwa o ũndũ wamwĩka. 20 Ĩtũlĩka kwa ĩtũlĩka, itho kwa itho, ĩeo kwa ĩeo, o ũndũ waũmĩsya mũndũ ũla ũngĩ nowʼo o nake waĩle kũũmĩwʼa. 21 Mũndũ ũla wakũna nyamũ amyũaa aĩlĩte kũmĩĩvĩa, ĩndĩ ũla wakũna mũndũ amũaa aĩlĩte kũawa.

22 “‘Mũkaatĩĩaa ũtwʼĩo ũmwe, mũndũ ethĩwe nĩ mwĩkali wa ũeninĩ kana nĩ wa nthĩ yenyu, nũndũ ninyie Yeova Ngai wenyu.’”

23 Nĩvo ĩndĩ Mose waneenie na Aisilaeli, na maumaalya ũla waumanĩie ĩsyĩtwa ya Ngai nza wa kambi, na mamũkimanga na mavia. Kwoou Aisilaeli meeka o tondũ Yeova weeaĩe Mose.

25 Yeova nĩwaendeeie kũneena na Mose Kĩĩmanĩ kya Sinaĩ, aimwĩa: 2 “Neena na Aisilaeli na ũimatavya, ‘Yĩla mwĩĩsa kũvika nthĩ ĩla ngũmũnenga, nĩvo ĩndĩ nthĩ ĩsu ĩkakwata savato kwondũ wa Yeova. 3 Myaka thanthatũ mwaĩlĩte kũvanda mbeũ mĩũndanĩ yenyu, na myaka thanthatũ mwaĩlĩte kũsea mĩũnda yenyu ya mĩsavivũ, na mũkoombanyʼa ũsyao wa ĩ nthĩ. 4 Ĩndĩ mwakanĩ wa mũonza, nthĩ yaĩlĩte kwĩthĩwa na savato ya kũthũmũa vyũ, savato kwondũ wa Yeova. Mũyaĩlĩte kũvanda mbeũ mĩũndanĩ yenyu kana kũsea mĩũnda yenyu ya mĩsavivũ. 5 Mũikakethe ũsyao wa metĩkĩa, na mũikakolanyʼe nzavivũ sya mĩsavivũ ĩla mũtaasea. Nthĩ yaĩlĩte kwĩthĩwa na mwaka ũmwe wa kũthũmũa vyũ. 6 Ĩndĩ o na vailye ũu, no mũye lĩu ũla wamea nthĩ ĩsu savatonĩ yayo; inywʼĩ, aũme menyu ngombo na aka menyu ngombo, athũkũmi menyu ala mũandĩkĩte, na ekali ma ũeninĩ ala mekalaa nenyu no maye, 7 o vamwe na nyamũ syenyu sya mũsyĩ na nyamũ sya kĩthekanĩ ila syĩ nthĩ yenyu. Kĩla kĩndũ nthĩ yasyaa no kĩĩwe.

8 “‘Mũkatala myaka mũonza ya savato, mũonza kũndũ myaka mũonza, na mĩthenya ya myaka ĩsu mũonza ya savato ĩkeethĩwa myaka 49. 9 Na ĩndĩ mũkavuva ũvya na wasya mũnene mweinĩ wa mũonza, mũthenyanĩ wa ĩkũmi wa mwei ũsu; Mũthenyanĩ wa Wĩwʼanĩthyo, mwaĩlĩte kũtuma wasya wa ũvya wĩw’ĩka nthĩ yenyu yonthe. 10 No nginya mũthesye mwaka wa 50 na mũitangaasĩa ekali onthe ma nthĩ yenyu ũthasyo. Ũkeethĩwa Yuvilii kwenyu, na kĩla ũmwe wenyu akasyoka ngʼũndũnĩ yake* na kĩla ũmwe wenyu aĩlĩte kũsyoka andũnĩ make. 11 Mwaka ũsu wa 50 ũkatwʼĩka Yuvilii kwenyu. Mũikavanda mbeũ kana mũkethe ũsyao wa metĩkĩa o na mũikombanyʼa nzavivũ sya mĩsavivũ ĩla ĩtaasewa. 12 Nũndũ nĩ Yuvilii. Yaĩlĩte kwĩthĩwa ntheu kwenyu. Kĩla mwaĩlĩte kũya no kĩla nthĩ yasyaa yĩ yoka.

13 “‘Mwakanĩ ũũ wa Yuvilii, kĩla ũmwe wenyu aĩlĩte kũsyoka ngʼũndũnĩ yake. 14 Ethĩwa nĩwathooesya mũndũ ũngĩ kĩndũ o na kĩva kana wamũthooea, ndũkamũtũmĩe naĩ. 15 Waĩle kũthooea mũndũ ũla ũngĩ, ũsũanĩĩte ũtalo wa myaka ĩla ĩvĩtĩte ĩtina wa Yuvilii, nake aĩlĩte kũũthooesya kwosana na myaka ĩla ĩtialĩte ya kũketha lĩu. 16 Ethĩwa vatialĩte myaka mingĩ, no ongele thooa wayo, na ethĩwa vatialĩte myaka mĩnini, aĩlĩte kũola thooa wayo, nũndũ eũthooesya ũtalo wa lĩu ũla ũkakethwa. 17 Vai ũmwe katĩ wenyu waĩlĩte kũtũmĩa mũndũ ũla ũngĩ naĩ, na no nginya mũkĩe Ngai wenyu, nũndũ ninyie Yeova Ngai wenyu. 18 Mwaatĩĩa motwʼĩo makwa na mwakwata sila wakwa, mũkekalaa nthĩ ĩsu mwĩ asũvĩĩku. 19 Nthĩ ĩsu ĩkasyaaa ũsyao wayo, na mũkaĩsaa mũkeanĩwa na mũkekalaa vo mwĩ asũvĩĩku.

20 “‘Ĩndĩ ethĩwa mũkasya: “Tũkaya kyaũ mwakanĩ wa mũonza twaema kũvanda mbeũ kana kũmbanyʼa lĩu witũ?” 21 Ngeeĩaĩa ũathimo wakwa wũke ĩũlũ wenyu mwakanĩ wa thanthatũ, na nthĩ ĩkasyaa lĩu wĩanĩtye myaka ĩtatũ. 22 Nĩvo ĩndĩ mwĩvanda mbeũ mwakanĩ wa nyanya na mũkaya lĩu ũsu mũkũũ nginya mwaka wa kenda. Mũkaya lĩu ũsu mũkũũ nginya yĩla mwĩketha lĩu ũsu mwavanda.

23 “‘Nthĩ ĩsu ndyaĩle kũthoowʼa vyũ, nũndũ nthĩ ĩsu nĩ yakwa. Nĩkwĩthĩwa methonĩ makwa mwĩ ekali ma ũeninĩ na andũ mathamĩte makatũa kũndũ kũngĩ. 24 Kĩla vandũ nthĩ yenyu, mwaĩlĩte kũnengane ũthasyo wa kwovosya nthĩ ĩsu.

25 “‘Ethĩwa mwana-a-ĩthe waku nĩwatwʼĩka ngya na weethĩa no nginya athoosye malĩ ĩmwe yake, mwovosya* wa mũvĩa wa vakuvĩ nake no nginya oke na ayovosya kĩla mwana-a-ĩthe wathooisye. 26 Ethĩwa mũndũ nde na mwovosya* ĩndĩ ayĩendeea nesa na ayona nzĩa ũtonya kũmyovosya, 27 aĩlĩte kwĩka ĩsavu ya thooa wayo wa myaka ĩla ĩvĩtĩte kuma amĩthoosya na aitũngĩa ũla wamũthooeisye kĩla kĩ ĩũlũ. Na ĩndĩ no asyoke ngʼũndũnĩ yake.

28 “‘Ĩndĩ aema kũkwata nzĩa ũtonya kũmyovosya kuma kwake, kĩla wathooisye kĩkaendeea kwĩthĩwa kya ũla wathooie nginya mwaka wa Yuvilii; na akakĩtũngĩwa mwakanĩ ũsu wa Yuvilii, nake akasyoka ngʼũndũnĩ yake.

29 “‘Yu ethĩwa mũndũ nĩwathoosya nyũmba yĩ ndũanĩ mbiĩĩe na ngũta, ũthasyo wake wa kũmyovosya o nawʼo ũkaendeea kwĩthĩwa vo nginya mũthyanĩ wa mwaka kuma yĩla waminie kũmĩthoosya; akeethĩwa atonya kũtũmĩa ũthasyo wake wa kũmyovosya kwa ĩvinda ya mwaka mũima. 30 Ĩndĩ ethĩwa ndĩnathoowa ĩngĩ mũthyanĩ wa mwaka ũsu mũima, ũla wathooa nyũmba ĩsu yĩ ndũanĩ mbiĩĩe na ngũta akamĩmesya vyũ na ĩyĩthĩwa yake nzyawanĩ syake syonthe. Ndyaĩle kũtũngwa mwakanĩ wa Yuvilii. 31 Ĩndĩ o na ũu wĩ o vo, nyũmba sya kwĩkala ila itathyũlũlũkĩtwe nĩ ngũta syaĩlĩte kũtalwa ta kĩlungu kya mĩũnda ĩte miĩĩe. Ũthasyo wa kwovosya waĩlĩte kũendeea kũtũmĩwa kũsyovosya, na syaĩlĩte kũtũngwa mwakanĩ wa Yuvilii.

32 “‘Ĩndĩ ĩũlũ wa nyũmba sya Alivai ila syĩ ndũanĩ syoo, Alivai makaendeeaa kwĩthĩwa na ũthasyo wa kũsyovosya. 33 Yĩla malĩ ya Alivai yaema kwovowʼa, nyũmba ĩla ĩthooetwʼe ndũanĩ yoo o nayo ĩkatũngwa mwakanĩ wa Yuvilii, nũndũ nyũmba ila syĩ ndũanĩ sya Alivai nĩ malĩ yoo katĩ wa Aisilaeli. 34 O na ĩngĩ, isesi sya kũĩthya ila ithyũlũlũkĩte ndũa syoo iyaĩlĩte kũthoowʼa, nũndũ nĩ ngʼũndũ yoo ĩvinda yonthe.

35 “‘Ethĩwa mwana-a-ĩthe waku ũla wĩ vakuvĩ naku nĩwatwʼĩka ngya na ndatonya kũkwata syĩndũ ila wĩ na vata nasyo, no nginya ũmũtetheesye o ũndũ ũtonya kũtetheesya mwĩkali wa ũeninĩ na mũndũ ũthamĩĩte kũndũ kũngĩ, nĩ kana aendeee kwĩkala thayũ vamwe naku. 36 Ndũkose ũsyao kana vaita* kuma kwake. No nginya ũkĩe Ngai waku, na mwana-a-ĩthe waku akaendeea kwĩkala thayũ vamwe naku. 37 Ndũkamũkovethye mbesa syaku nĩ kana ũkwate ũsyao kana ũmũnenge lĩu waku nĩ kana ũkwate vaita. 38 Ninyie Yeova Ngai wenyu, ũla wamumisye nthĩ ya Misili nĩmũnenge nthĩ ya Kanaanĩ, nĩ kana nĩĩkĩĩthye nĩ Ngai wenyu.

39 “‘Ethĩwa mwana-a-ĩthe waku ũla wĩkalaa vakuvĩ naku nĩwatwʼĩka ngya na weethĩa no nginya ethoosye kwaku, ndũkamũlasimĩthye kũtethya wĩa wa ngombo. 40 Aĩlĩte kũkuwa ta mũthũkũmi mũandĩke, ta mũndũ ũthamĩĩte kũndũ kũngĩ. Aĩlĩte kũũthũkũma nginya mwaka wa Yuvilii. 41 Na ĩndĩ akaũtia, we na syana syake ila wĩ nasyo,* na akasyoka andũnĩ make. Aĩlĩte kũsyoka ngʼũndũnĩ ya aa-ũmae make. 42 Nũndũ mo nĩ ngombo syakwa ila naumisye nthĩ ya Misili. Mayaĩlĩte kwĩthoosya o ũndũ ngombo ĩthooawʼa. 43 Ndũkamũnyamasye, na no nginya ũkĩe Ngai waku. 44 Aũme maku ngombo na aka maku ngombo maĩlĩte kuma mbaĩnĩ ila imũthyũlũlũkĩte, kuma mbaĩnĩ isu no mũthooe mũndũũme ngombo kana mũndũ mũka ngombo. 45 O na ĩngĩ, no mũthooe ngombo kuma ananĩ ma aeni ala mathamĩte na makatũa kwenyu ala mekalaa nenyu, kuma kwoo na kuma andũnĩ ma mĩsyĩ yoo ala masyaĩwe nthĩ yenyu, na ikatwʼĩka malĩ yenyu. 46 No mũtiĩe ana menyu ngombo isu syĩthĩwe ũtiĩwa woo na iitwʼĩka malĩ yoo ĩvinda yonthe. No mũitũmĩe ta athũkũmi, ĩndĩ mũikanyamasye ana-a-ĩthe menyu Aisilaeli.

47 “‘Ĩndĩ ethĩwa mwĩkali wa ũeninĩ kana mũndũ ũthamĩĩe kwenyu ũla wĩkalaa katĩ wenyu nĩwatwʼĩka mũthwii na mwana-a-ĩthe waku nĩwatwʼĩka ngya e vakuvĩ nake na weethĩa no nginya ethoosye kwa mwĩkali ũsu wa ũeninĩ kana kwa mũndũ ũsu ũthamĩĩe kwenyu ũla wĩkalaa katĩ wenyu, kana vala ve mũndũ wa mũsyĩ wa mwĩkali ũsu wa ũeninĩ, 48 akaendeea kwĩthĩwa na ũthasyo wa kwovowʼa o na ĩtina wa kwĩthoosya. Ũmwe wa ana-a-ĩthe make no amwovosye, 49 kana mwendwʼa-ĩthe wake kana mwana wa mwendwʼa-ĩthe wake no amwovosye, kana mũndũ o na wĩva wa vakuvĩ nake,* ũmwe wa andũ ma mũsyĩ wake, no amwovosye.

“‘Kana ethĩwa o nake nĩwatwʼĩka mũthwii, no eyovosye. 50 Aĩlĩte kwĩka ĩsavu vamwe na ũla wamũthooie ya ĩvinda yĩla yĩvĩtĩte kuma mwaka ũla weethooisye kwake nginya mwaka wa Yuvilii, na mbesa ila ũkwovowʼa nasyo ikeethĩwa syosanĩte na ũtalo wa myaka ĩsu. Thooa wa mĩthenya ĩla ũthũkũmĩte ĩvinda yĩu waĩlĩte kũthimwa kwĩanana na ĩtuvi ya mũthũkũmi mũandĩke. 51 Ethĩwa ve myaka mingĩ ĩtialĩte, aĩlĩte kũĩva mbesa sya kũmwovosya kwosana na myaka ĩla ĩtialĩte. 52 Ĩndĩ ethĩwa vatiele o myaka mĩnini mwaka wa Yuvilii ũvike, nĩvo ĩndĩ waĩlĩte kwĩka ĩsavu we mwene na ayĩĩva mbesa sya kwĩyovosya kwosana na myaka ĩla ĩtialĩte. 53 Aĩlĩte kũendeea kũmũthũkũma mwaka kũthi ũla ũngĩ e mũthũkũmi mũandĩke; na mwaĩlĩte kũĩkĩĩthya kana ndanamũnyamasya. 54 Ĩndĩ o na vailye ũu, ethĩwa ndatonya kwĩyovosya atũmĩĩte nzĩa isu, nĩvo ĩndĩ ũkalekwʼa vate ndĩvi mwakanĩ wa Yuvilii, we na syana syake ila wĩ nasyo.*

55 “‘Nũndũ Aisilaeli nĩ ngombo syakwa mwene. Nĩ ngombo syakwa ila naumisye nthĩ ya Misili. Ninyie Yeova Ngai wenyu.

26 “‘Mũikeseũvĩsye ngai sya mana, na mũikeseũvĩsye mũvwʼanano mwasũvye kana kĩtuĩ kya ũthaithi na mũyaĩlĩte kũũngamya ĩvia yasũvye nthĩ yenyu nĩ kana mũyĩkumanĩe; nũndũ ninyie Yeova Ngai wenyu. 2 Mwaĩlĩte kũkwataa savato syakwa na mũinenga ndaĩa* vandũ vakwa vatheu. Ninyie Yeova.

3 “‘Ethĩwa mũkaendaa motwʼĩonĩ makwa na mũkakwataa mĩao yakwa na kũmĩatĩĩaa, 4 ngamuwĩasya mbua ĩvindanĩ yayo yĩla yaĩlĩte, na nthĩ ĩkasyaaa ũsyao wayo, na mĩtĩ ya matunda ĩkasyaaa matunda mayo. 5 Ĩvinda yenyu ya kũvũa lĩu yĩkaendeeaa nginya ĩvinda yenyu ya kũketha nzavivũ, na ĩvinda yenyu ya kũketha nzavivũ yĩkaendeeaa nginya ĩvinda ya kũvanda; na mũkaĩsaa mũkate wenyu mũkeanyʼa na mũkekalaa nthĩ yenyu mwĩ asũvĩĩku. 6 Ngatuma nthĩ yenyu yĩthĩwa na mũuo, na mũkakomaa vate mũndũ ũkũtuma mũkĩa; na ngavetanga nyamũ mbai sya kĩthekanĩ nthĩ ĩsu, na ũvyũ wa kaũ ndũkavĩtĩla nthĩ yenyu. 7 Vate nzika, mũkasembanyʼa amaitha menyu, na mũkamoaa na ũvyũ. 8 Andũ atano katĩ wenyu makasembanyʼa amaitha 100, na andũ 100 katĩ wenyu makasembanyʼa amaitha 10,000, na mũkooaa amaitha menyu na ũvyũ.

9 “‘Ngamwonyʼa ũseo wakwa* na ngatuma mũsyaana na ngamwingĩvya, na ngeanĩsya ũtianĩo wakwa nenyu. 10 O mũendeee kũya ũsyao mũkũũ wa mwaka mũvĩtu, mũkeethĩwa mwaĩlĩte kũvetanga ũsu mũkũũ nĩ kana mũkwate mwanya wa ũla mweũ. 11 Ngaia ĩeema yakwa ya ũthaithi katĩ wenyu, na nyie ndikamũlea.* 12 Ngaendaa katĩ wenyu na ngeethĩwa Ngai wenyu, na inywʼĩ a venyu mũkeethĩwa andũ makwa. 13 Ninyie Yeova Ngai wenyu, ũla wamumisye nthĩ ya Misili mwaeka kwĩthĩwa ngombo syoo, na natũla mĩtĩ ya ĩsoki yenyu na natuma mũthi mũũngalalĩtye mĩtwe yenyu.*

14 “‘Ĩndĩ o na ũu wĩ o vo, mwaema kũmbĩthukĩĩsya kana mwalea kũkwata mĩao ĩsu yonthe, 15 na mwalea motwʼĩo makwa, na mwamena* sila wakwa vyũ na kwoou mũiema kũkwata mĩao yakwa yonthe, na mwaananga ũtianĩo wakwa, 16 nyie nakwa, ngamwĩka maũndũ aa: ngamũkũna na ũthĩnyʼo, na ũwau wa kĩthũi kĩnene na ũvyũvu mwingĩ, na ũu ũkatuma metho menyu maeka kwona nesa na thayũ wenyu wonza. Mũkavandaa mbeũ syenyu mana, nũndũ amaitha menyu makasiĩsaa. 17 Ngamũlea, na mũkasindwa nĩ amaitha menyu; na ala mamũmenaa makamũkinyangĩa nthĩ, na mũkasemba mũkĩe vate mũndũ ũmũsembanĩtye.

18 “‘O na maũndũ asu maema kũtuma mũmbĩthukĩĩsya, ngalasimĩka kũmũkũna mavinda mũonza mũnango nũndũ wa naĩ syenyu. 19 Ngatũla ngathĩĩo syenyu na ngatuma matu menyu mekala ta kyũma* na nthĩ yenyu yĩkala ta ũthuku. 20 Mũkaananga vinya wenyu mana, nũndũ nthĩ yenyu ndĩkasyaa ũsyao wayo, na mĩtĩ ya nthĩ yenyu ndĩkasyaa matunda.

21 “‘Ĩndĩ mwaendeea kũleana nakwa na mwalea kũmbĩthukĩĩsya, nĩvo ĩndĩ ngalasimĩka kũmũkũna mavinda mũonza mũnango, kwosana na naĩ syenyu. 22 Ngamũtũmĩa nyamũ sya kĩthekanĩ, na ikooaa syana syenyu na ikamina nyamũ syenyu sya mũsyĩ na ũtalo wenyu ũkaoleka, na malelũ menyu maikethĩawa na andũ.

23 “‘Ethĩwa o na ĩtina wa maũndũ asu mũkalea ndimũlũnga na mũiendeea kũleana nakwa, 24 nĩvo ĩndĩ o nakwa nĩleana nenyu, na nyie mwene ngamũkũna mavinda mũonza nũndũ wa naĩ syenyu. 25 Ngaete ũvyũ wa ũĩvanĩsyo ĩũlũ wenyu nũndũ wa kũtũla ũtianĩo. Mwoombanĩa ndũanĩ syenyu, ngatũma ũwau katĩ wenyu, na mũkanenganwe kwʼokonĩ kwa mũmaitha. 26 Yĩla ngananga makũmbĩ* menyu ma mĩkate,* aka ĩkũmi makeethĩwa matonya kũuĩa mĩkate yenyu ĩikonĩ o yĩmwe na makamũthimĩa mĩkate yenyu na maimũnenga kĩlungu kĩnini; na mũkaya ĩndĩ mũikavũna.

27 “‘Ethĩwa o na maũndũ asu me vo mũikambĩthukĩĩsya na mũkaendeea kũleana nakwa, 28 ngaleana nenyu mũnango, na nyie mwene ngalasimĩka kũmũkũna mavinda mũonza nũndũ wa naĩ syenyu. 29 Kwoou mũkalasimĩka kũya nyama sya ana menyu, na mũkaya nyama sya eĩtu menyu. 30 Ngaananga vyũ kũndũ kwenyu kũtũlu kwa kũthaithĩa na nditilanga syĩndũ syenyu sya kwilĩĩla ũvumba na ndilĩĩla simba syenyu ĩũlũ wa simba sya mĩvwʼanano yenyu ya kũthatya,* na ngeethyũũa nĩmũtie* nũndũ nĩmũnthatasya. 31 Nganengane ndũa syenyu syanangwe na ngatuma vandũ venyu vatheu vatiwa vate andũ, na ndikanyungĩa mĩuke ya kwendeesya* ya nthembo syenyu. 32 Nyie mwene ngatuma nthĩ yenyu yĩkala yĩ nthei, na amaitha menyu ala mekalaa vo makamĩketeeaa matelemete. 33 Na ngamũnyaĩĩkya katĩ wa i mbaĩ, na ngakũa ũvyũ ĩtina wenyu; na nthĩ yenyu ĩkatiwa yĩ nthei, na ndũa syenyu ikaanangwa vyũ.

34 “‘Ĩvinda yu nthĩ ĩkaĩvĩa savato syayo mĩthenya yonthe ĩla ĩkethĩwa yĩ nthei, yĩla inywʼĩ mũkethĩwa nthĩ ya amaitha menyu. Ĩvindanĩ yĩu nthĩ ĩkathũmũa,* nũndũ no nginya yĩĩvĩe savato syayo. 35 Mĩthenya yonthe ĩla ĩkethĩwa yĩ nthei ĩkathũmũa, nũndũ ndyaathũmũa ĩvindanĩ ya savato syenyu yĩla inywʼĩ mwatwĩe vo.

36 “‘Na ĩũlũ wa ala makavonoka, ngausũsya ngoo syoo wia me nthĩ sya amaitha moo; na wasya wa ĩtũ yĩũlũkĩtwʼe nĩ nzeve ũkatuma masemba makĩe, na makasemba ta mũndũ ũsembete akĩĩte ũvyũ na makavalũka vate mũndũ o na ũmwe ũmasembanĩtye. 37 Makatulanyʼa na maivalũkĩlanĩla mo ene ta andũ masembete makĩĩte ũvyũ, o na kau vai mũndũ ũmasembanĩtye. Mũikethĩwa mũtonya kũsinda amaitha menyu. 38 Mũkathelela katĩ wa i mbaĩ, na nthĩ ya amaitha menyu ĩkamũmelya. 39 Ala makatiala makatiwa moee nthĩ sya amaitha menyu nũndũ wa ĩvĩtyo yenyu. Ĩĩ makoa vyũ nũndũ wa mavĩtyo ma aa-ĩthe moo. 40 Na ĩndĩ makaumbũla mavĩtyo moo ene na mavĩtyo ma aa-ĩthe moo na kũlea kwĩthĩwa mate aĩkĩĩku na makeetĩkĩla kana mayaĩ aĩkĩĩku nũndũ wa kũleana nakwa. 41 Nĩvo ĩndĩ o nakwa namaleile na namatwaa nthĩ ya amaitha moo.

“‘Ũu weethĩiwe nĩ kana ngoo syoo ite mbaĩke* itonye kwĩnyivya, na ĩndĩ mayĩĩvĩa mavĩtyo moo. 42 Na ngalilikana ũtianĩo wakwa na Yakovo, na ũtianĩo wakwa na Isaka, na ngalilikana ũtianĩo wakwa na Avalaamu, na ngalilikana nthĩ yoo. 43 Yĩla matiĩte nthĩ yoo, nĩyaĩvĩaa savato syayo na yekalaa yĩ nthei mate vo, na nĩmaĩvĩaa mavĩtyo moo, nũndũ nĩmaleile sila wakwa na mamena* motwʼĩo makwa vyũ. 44 Ĩndĩ o na maũndũ asu onthe me o vo, me nthĩ ya amaitha moo, ndikesa kũmalea vyũ kana nĩmekye ĩtheka nginya nĩmanange vyũ, nũndũ ũu ũkatuma nananga ũtianĩo wakwa namo, nũndũ ninyie Yeova Ngai woo. 45 Kwondũ woo ngalilikana ũtianĩo wakwa na aa-ũmae moo ala namaumisye nthĩ ya Misili mbaĩ isyaĩĩsye, nĩ kana nĩĩkĩĩthye nĩ Ngai woo. Ninyie Yeova.’”

46 Ĩĩ nĩyo myolooto, sila, na mĩao ĩla Yeova wanengeie Aisilaeli Kĩĩmanĩ kya Sinaĩ kwĩsĩla Mose.

27 Yeova aendeeie kũneena na Mose, aimwĩa: 2 “Neena na Aisilaeli na ũimatavya, ‘Ethĩwa mũndũ nĩweevĩta wĩvĩto wa mwanya nĩ kana aumĩsye Yeova thooa ũla ũtwʼĩtwe wa mũndũ,* 3 thooa ũla ũtwʼĩtwe wa mũndũũme wa myaka 20 nginya 60 ũkeethĩwa sekeli 50* sya vetha kwosana na kĩthimo kya sekeli ya vala vandũ vatheu.* 4 Ĩndĩ ethĩwa nĩ mũndũ mũka, thooa ũla ũtwʼĩtwe ũkeethĩwa sekeli 30. 5 Ethĩwa mũndũ e na myaka 5 nginya 20, thooa ũla ũtwʼĩtwe wa mũndũũme ũkeethĩwa sekeli 20 na wa mũndũ mũka ũkeethĩwa sekeli 10. 6 Ethĩwa mũndũ e na mwei ũmwe nginya myaka ĩtano, thooa ũla ũtwʼĩtwe wa mũndũũme ũkeethĩwa sekeli itano sya vetha na wa mũndũ mũka ũkeethĩwa sekeli itatũ sya vetha.

7 “‘Ethĩwa mũndũ e na myaka 60 na kwambata, thooa ũla ũtwʼĩtwe ũkeethĩwa sekeli 15 kwondũ wa mũndũũme na sekeli 10 kwondũ wa mũndũ mũka. 8 Ĩndĩ ethĩwa nĩ ngya mũno ũkethĩa ndaĩva thooa ũsu ũtwʼĩtwe, mũndũ ũsu akaũngama mbee wa mũthembi, na mũthembi akatwʼa thooa wake. Mũthembi akatwʼa thooa wake kwosana na kĩla ũsu ũkwĩvĩta ũtonya kũkwata.

9 “‘Ethĩwa wĩvĩto ũsu ũkonetye nyamũ ĩtonya kumĩwʼa Yeova, kĩndũ o na kĩva kĩla kĩkanengwa Yeova kĩkatwʼĩka kĩndũ kĩtheu. 10 Ndatonya kũete nyamũ ĩngĩ vandũ va nyamũ ĩsu kana kũkũanyʼa nyamũ nzeo na nthũku kana nyamũ nthũku na nzeo. Ĩndĩ ethĩwa nũkũkũanyʼa nyamũ ĩsu na ĩngĩ, nyamũ ĩla ya mbee na ĩla wamĩkũanyʼa nayo ikeethĩwa ntheu. 11 Ethĩwa nĩ nyamũ mbuku ĩtatonya kũthembewa Yeova, nĩvo ĩndĩ wĩũngamya nyamũ ĩsu mbee wa mũthembi. 12 Na ĩndĩ mũthembi akatwʼa thooa wayo, ethĩwa nĩ nzeo kana nĩ nthũku. Thooa ũla mũthembi ũkatwʼa nĩwʼo ũkatwʼĩka wa nyamũ ĩsu. 13 Ĩndĩ ethĩwa akesa kwenda kũmĩthooa ĩngĩ, no nginya anengane kĩlungu kya katano kyayo vamwe na thooa ũla ũtwʼĩtwe.

14 “‘Yu ethĩwa mũndũ nĩwathesya nyũmba yake yĩthĩwe kĩndũ kĩtheu kwa Yeova, nĩvo ĩndĩ mũthembi ũkatwʼa thooa wayo, yĩthĩwe nĩ nzeo kana nĩ nthũku. Thooa ũla mũthembi ũkatwʼa, nĩwʼo ũkatwʼĩka wayo. 15 Ĩndĩ ethĩwa ũla wathesya nyũmba yake eenda kũmĩthooa ĩngĩ, no nginya anengane kĩlungu kya katano kya mbesa sya thooa ũla ũtwʼĩtwe vamwe na thooa wayo, na ĩkatwʼĩka yake.

16 “‘Ethĩwa mũndũ nĩwathesya kĩlungu kĩmwe kya mũũnda wake kwondũ wa Yeova, thooa wakyo ũkatuwa kwosana na mbeũ ĩla yaĩlĩte kũvandwa vo: komeli ĩmwe* ya mbeũ sya mbaale ĩkeethĩwa sekeli 50 sya vetha. 17 Ethĩwa athesya mũũnda wake mwakanĩ wa Yuvilii, thooa ũla ũtwʼĩtwe ũkaendeea kwĩthĩwa vo. 18 Ethĩwa athesya mũũnda wake ĩtina wa Yuvilii, mũthembi akamwĩkĩa ĩsavu ya thooa wawʼo kwosana na myaka ĩla ĩtiele nginya mwaka ũla ũatĩĩe wa Yuvilii ũvike, na thooa wawʼo ũla ũtwʼĩtwe waĩlĩte kũolangwa. 19 Ĩndĩ ethĩwa ũla eĩũtheetye akesa kwovosya mũũnda ũsu, no nginya anengane kĩlungu kya katano kya mbesa sya thooa ũla ũtwʼĩtwe vamwe na thooa wawʼo, na ũkaendeea kwĩthĩwa wake. 20 Yu ethĩwa ndanathooa mũũnda ũsu ĩngĩ na mũũnda ũsu nĩwathooewʼa mũndũ ũngĩ, ndũtonya kwovowʼa. 21 Mũũnda ũsu wathawʼa mwakanĩ wa Yuvilii, ũkatwʼĩka kĩndũ kĩtheu kwa Yeova, ta mũũnda ũnengetwe. Ũkeethĩwa wa athembi.

22 “‘Ethĩwa mũndũ nĩwathesya kwondũ wa Yeova mũũnda ũthooete ũte kĩlungu kya ũtiĩwa wake, 23 mũthembi akamwĩkĩa ĩsavu ya ũndũ thooa wawʼo wĩana nginya mwaka wa Yuvilii, na akamũnenga thooa ũsu ũtwʼĩtwe mũthenya ũsu. Nĩ kĩndũ kĩtheu kwondũ wa Yeova. 24 Mwakanĩ wa Yuvilii, mũũnda ũsu ũkasyoka kwa ũla waũthooisye, ũkatũngĩwa mwene.

25 “‘Kĩla thooa waĩlĩte kũtuwa kwosana na kĩthimo kya sekeli ya vala vandũ vatheu. Sekeli ĩsu yaĩlĩte kwĩthĩwa ngela 20.*

26 “‘Ĩndĩ o na vailye ũu, vai mũndũ waĩlĩte kũthesya ĩkithathi ya nyamũ,* nũndũ yĩsyaawa yĩ ĩkithathi kwondũ wa Yeova. Yĩthĩwe nĩ nzaũ kana nĩ ĩlondu, yĩthĩawa yĩ ya Yeova. 27 Ethĩwa nyamũ ĩsu nĩ katĩ wa ila mbuku na amyovosya kwosana na thooa ũla ũtwʼĩtwe, aĩlĩte kũnengane kĩlungu kya katano kyawʼo vamwe na thooa ũsu. Ĩndĩ ethĩwa ndĩnovowʼa, ĩkathoowʼa kwosana na thooa ũla ũtwʼĩtwe.

28 “‘Ĩndĩ vai kĩndũ kĩnengane kĩla mũndũ wanenga Yeova vyũ* kuma syĩndũnĩ syake kĩtonya kũthoowʼa kana kwovowʼa, ethĩwe nĩ mũndũ kana nyamũ kana mũũnda wake. Kĩla kĩndũ kĩnengetwe Ngai nĩ kĩndũ kĩtheu vyũ kwa Yeova. 29 Kwongela ũu, vai mũndũ ũtwʼĩĩwe kũawa* ũtonya kwovowʼa. Vate nzika aĩlĩte kũawa.

30 “‘Kĩla kĩlungu kya ĩkũmi kya nthĩ, kĩthĩwe kyumĩtwʼe ũsyaonĩ wa mĩũnda kana matundanĩ ma mĩtĩ, nĩ kya Yeova. Nĩ kĩndũ kĩtheu kwa Yeova. 31 Ethĩwa mũndũ akesa kwenda kũthooa ĩngĩ kĩlungu o na kĩva kya ĩkũmi kĩla waumya, aĩlĩte kũnengane kĩlungu kya katano kya thooa wakyo vamwe na thooa wakyo. 32 Kĩla kĩlungu kya ĩkũmi kya ngʼombe na malondu na mbũi, kĩla kĩndũ kĩsĩlaa ungu wa ndata ya mũĩthi, nyamũ ĩla ya ĩkũmi yaĩlĩte* kũtwʼĩka kĩndũ kĩtheu kwa Yeova. 33 Ndaĩlĩte kũsisya nesa ethĩwa nĩ nzeo kana nĩ nthũku, o na ndaĩlĩte kũmĩkũanyʼa na ĩngĩ. Ĩndĩ ethĩwa akatata kũmĩkũanyʼa na ĩngĩ, nyamũ ĩla ya mbee na ĩla wakũanyʼa nayo syaĩlĩte kũtwʼĩka kĩndũ kĩtheu. Ndĩtonya kwovowʼa.’”

34 Ĩĩ nĩyo mĩao ĩla Yeova wanengie Mose kwondũ wa Aisilaeli Kĩĩmanĩ kya Sinaĩ.