MOTALO

1 Na Yeova aneena na Mose e weũnĩ wa Sinaĩ, e ĩeemanĩ ya kũmbanĩa, mũthenyanĩ wa mbee wa mwei wa kelĩ, mwakanĩ wa kelĩ kuma mauma nthĩ ya Misili, na amwĩa: 2 “Tala ũmbano wʼonthe wa Aisilaeli,* kĩla ũmwe* kwosana na mĩsyĩ yoo, kwosana na nyũmba sya aa-ĩthe moo, kwosana na ũtalo wa masyĩtwa ma aũme onthe. 3 We na Alũni nĩmwaĩlĩte kũmaandĩkĩthya kwosana na nguthu syoo,* onthe ala me na myaka 20 kwambata na matonya kũlika itanĩ sya Isilaeli.

4 “Osa mũndũũme ũmwe kuma kĩla mbaĩ; kĩla ũmwe eĩthĩwa mũtwe wa nyũmba ya aa-ĩthe make. 5 Aa nĩmo masyĩtwa ma aũme ala mekũũngama ũtee wenyu: kuma mbaĩnĩ ya Leũveni, Elisuli mwana wa Seteuli; 6 kuma mbaĩnĩ ya Simeoni, Selumieli mwana wa Nzulisatai; 7 kuma mbaĩnĩ ya Yuta, Nasoni mwana wa Aminatavu; 8 kuma mbaĩnĩ ya Isakali, Nethaneli mwana wa Nzuali; 9 kuma mbaĩnĩ ya Nzevuluni, Eliavu mwana wa Eeloni; 10 kuma kwa ana ma Yosevu: mbaĩnĩ ya Evilaimu, Elisama mwana wa Amiuti; mbaĩnĩ ya Manase, Ngamalieli mwana wa Vetasuli; 11 kuma mbaĩnĩ ya Mbenyamini, Avitani mwana wa Kiteoni; 12 kuma mbaĩnĩ ya Ndani, Aieseli mwana wa Amisatai; 13 kuma mbaĩnĩ ya Aseli, Vakieli mwana wa Okalani; 14 kuma mbaĩnĩ ya Ngati, Eliasavu mwana wa Ndeueli; 15 kuma mbaĩnĩ ya Navitali, Aila mwana wa Enani. 16 Asu nĩmo manyuviwe kuma ũmbanonĩ ũsu. Nĩmo anene ma mbaĩ sya aa-ĩthe moo na aũngamĩi ma makili ma Isilaeli.”

17 Na kwoou Mose na Alũni moosa aũme asu manyuvĩtwe kwosana na masyĩtwa moo. 18 Na moombanyʼa ũmbano wʼonthe mũthenyanĩ wa mbee wa mwei wa kelĩ, nĩ kana kĩla mũndũ aandĩkĩthwʼe kwosana na ĩsyĩtwa yake, kwosana na mũsyĩ wake, na kwosana na nyũmba sya aa-ĩthe moo, kuma myaka 20 kwambata, 19 o tondũ Yeova weeaĩe Mose. Na ĩndĩ amaandĩkĩthya me weũnĩ wa Sinaĩ.

20 Ana ma Leũveni, ala maĩ nzyawa sya mwana ũla mũkũũ wa Isilaeli, nĩmaandĩkĩthiwʼe kwosana na masyĩtwa moo, kwosana na mĩsyĩ yoo, na kwosana na nyũmba sya aa-ĩthe moo. Aũme onthe ala maĩ na myaka 20 kwambata na maĩ matonya kũlika itanĩ nĩmatalilwe mũndũ ũmwe ũmwe, 21 na ũtalo wa ala maandĩkĩthiwʼe kuma mbaĩnĩ ya Leũveni waĩ 46,500.

22 Nzyawa sya Simeoni nĩsyaandĩkĩthiwʼe kwosana na masyĩtwa masyo, kwosana na mĩsyĩ yasyo, na kwosana na nyũmba sya aa-ĩthe masyo. Aũme onthe ala maĩ na myaka 20 kwambata na maĩ matonya kũlika itanĩ nĩmatalilwe mũndũ ũmwe ũmwe, 23 na ũtalo wa ala maandĩkĩthiwʼe kuma mbaĩnĩ ya Simeoni waĩ 59,300.

24 Nzyawa sya Ngati nĩsyaandĩkĩthiwʼe kwosana na masyĩtwa masyo, kwosana na mĩsyĩ yasyo, na kwosana na nyũmba sya aa-ĩthe masyo. Aũme onthe ala maĩ na myaka 20 kwambata na maĩ matonya kũlika itanĩ nĩmatalilwe, 25 na ũtalo wa ala maandĩkĩthiwʼe kuma mbaĩnĩ ya Ngati waĩ 45,650.

26 Nzyawa sya Yuta nĩsyaandĩkĩthiwʼe kwosana na masyĩtwa masyo, kwosana na mĩsyĩ yasyo, na kwosana na nyũmba sya aa-ĩthe masyo. Aũme onthe ala maĩ na myaka 20 kwambata na maĩ matonya kũlika itanĩ nĩmatalilwe, 27 na ũtalo wa ala maandĩkĩthiwʼe kuma mbaĩnĩ ya Yuta waĩ 74,600.

28 Nzyawa sya Isakali nĩsyaandĩkĩthiwʼe kwosana na masyĩtwa masyo, kwosana na mĩsyĩ yasyo, na kwosana na nyũmba sya aa-ĩthe masyo. Aũme onthe ala maĩ na myaka 20 kwambata na maĩ matonya kũlika itanĩ nĩmatalilwe, 29 na ũtalo wa ala maandĩkĩthiwʼe kuma mbaĩnĩ ya Isakali waĩ 54,400.

30 Nzyawa sya Nzevuluni nĩsyaandĩkĩthiwʼe kwosana na masyĩtwa masyo, kwosana na mĩsyĩ yasyo, na kwosana na nyũmba sya aa-ĩthe masyo. Aũme onthe ala maĩ na myaka 20 kwambata na maĩ matonya kũlika itanĩ nĩmatalilwe, 31 na ũtalo wa ala maandĩkĩthiwʼe kuma mbaĩnĩ ya Nzevuluni waĩ 57,400.

32 Nzyawa sya Yosevu ila syaumanie na Evilaimu nĩsyaandĩkĩthiwʼe kwosana na masyĩtwa masyo, kwosana na mĩsyĩ yasyo, na kwosana na nyũmba sya aa-ĩthe masyo. Aũme onthe ala maĩ na myaka 20 kwambata na maĩ matonya kũlika itanĩ nĩmatalilwe, 33 na ũtalo wa ala maandĩkĩthiwʼe kuma mbaĩnĩ ya Evilaimu waĩ 40,500.

34 Nzyawa sya Manase nĩsyaandĩkĩthiwʼe kwosana na masyĩtwa masyo, kwosana na mĩsyĩ yasyo, na kwosana na nyũmba sya aa-ĩthe masyo. Aũme onthe ala maĩ na myaka 20 kwambata na maĩ matonya kũlika itanĩ nĩmatalilwe, 35 na ũtalo wa ala maandĩkĩthiwʼe kuma mbaĩnĩ ya Manase waĩ 32,200.

36 Nzyawa sya Mbenyamini nĩsyaandĩkĩthiwʼe kwosana na masyĩtwa masyo, kwosana na mĩsyĩ yasyo, na kwosana na nyũmba sya aa-ĩthe masyo. Aũme onthe ala maĩ na myaka 20 kwambata na maĩ matonya kũlika itanĩ nĩmatalilwe, 37 na ũtalo wa ala maandĩkĩthiwʼe kuma mbaĩnĩ ya Mbenyamini waĩ 35,400.

38 Nzyawa sya Ndani nĩsyaandĩkĩthiwʼe kwosana na masyĩtwa masyo, kwosana na mĩsyĩ yasyo, na kwosana na nyũmba sya aa-ĩthe masyo. Aũme onthe ala maĩ na myaka 20 kwambata na maĩ matonya kũlika itanĩ nĩmatalilwe, 39 na ũtalo wa ala maandĩkĩthiwʼe kuma mbaĩnĩ ya Ndani waĩ 62,700.

40 Nzyawa sya Aseli nĩsyaandĩkĩthiwʼe kwosana na masyĩtwa masyo, kwosana na mĩsyĩ yasyo, na kwosana na nyũmba sya aa-ĩthe masyo. Aũme onthe ala maĩ na myaka 20 kwambata na maĩ matonya kũlika itanĩ nĩmatalilwe, 41 na ũtalo wa ala maandĩkĩthiwʼe kuma mbaĩnĩ ya Aseli waĩ 41,500.

42 Nzyawa sya Navitali nĩsyaandĩkĩthiwʼe kwosana na masyĩtwa masyo, kwosana na mĩsyĩ yasyo, na kwosana na nyũmba sya aa-ĩthe masyo. Aũme onthe ala maĩ na myaka 20 kwambata na maĩ matonya kũlika itanĩ nĩmatalilwe, 43 na ũtalo wa ala maandĩkĩthiwʼe kuma mbaĩnĩ ya Navitali waĩ 53,400.

44 Asu nĩmo maandĩkĩthiwʼe nĩ Mose na Alũni na ala anene 12 ma Isilaeli, kĩla mũnene kwondũ wa nyũmba ya aa-ĩthe make. 45 Aisilaeli onthe ala maĩ na myaka 20 kwambata na maĩ matonya kũlika itanĩ sya Isilaeli nĩmaandĩkĩthiwʼe kwosana na nyũmba ya aa-ĩthe moo, 46 na ũtalo wʼonthe wa ala maandĩkĩthiwʼe waĩ 603,550.

47 Ĩndĩ mĩsyĩ ya mbaĩ ya Livai ndyaandĩkĩthwʼa vamwe namo. 48 Yeova eeie Mose atĩĩ: 49 “No mbaĩ ya Livai yĩ yoka ũtaĩle kũandĩkĩthya, na ndwaĩle kwongelanyʼa ũtalo woo na wa Aisilaeli ala angĩ. 50 Waĩle kũnyuva Alivai maũngamĩe ĩeema ya Ũkũsĩ na maiũngamĩa mĩio yayo yonthe na kyonthe kĩla kĩ vo. Makakuaa ĩeema yĩu na mĩio yayo yonthe, na makathũkũmaa vau, na maĩle kwamba kambi kũthyũlũlũka ĩeema yĩu. 51 Kĩla ĩvinda ĩeema ya ũthaithi yĩũthamwʼa, Alivai nĩmo maĩlĩte kũyĩthasya; na kĩla ĩvinda yĩkwambwa, Alivai nĩmo maĩlĩte kũyamba; na mũndũ o na wĩva ũte mwĩtĩkĩlye* athengeea vo aĩlĩte kũawa.

52 “Kĩla Mũisilaeli aĩlĩte kwamba ĩeema yake kambinĩ ĩla ũaĩwe; kĩla mũndũ aĩlĩte kwamba ĩeema vala kĩkundi kyake kya mbaĩ itatũ kĩĩ,* kĩla ũmwe kwosana na nguthu yake.* 53 Na Alivai maĩlĩte kwamba kambi mathyũlũlũkĩte ĩeema ya Ũkũsĩ nĩ kana ndikewʼĩe woo ũmbano wa Aisilaeli; na no nginya Alivai meanĩasye kĩanda kyoo kya kũsũvĩa ĩeema* ya Ũkũsĩ.”

54 Andũ ma Isilaeli nĩmeekie kyonthe kĩla Yeova weeaĩe Mose. Meekie o ũndũ weeaĩwe.

2 Nĩvo ĩndĩ Yeova waneenie na Mose na Alũni, ayasya: 2 “Aisilaeli maĩlĩte kwambaa maeema moo vala kĩkundi kyoo kya mbaĩ itatũ kĩaĩwe, kĩla mũndũ vakuvĩ na ũvano wa* nyũmba ya aa-ĩthe make. Maĩlĩte kwambaa kambi masyaĩtye ĩeema ya kũmbanĩa mayĩthyũlũlũkĩte.

3 “Ala makambaa kambi ngalĩko ya wumĩlonĩ wa sua makeethĩawa me kĩkundi kya mbaĩ itatũ kya kambi ya Yuta kwosana na nguthu syoo;* mũnene wa ana ma Yuta nĩ Nasoni mwana wa Aminatavu. 4 Ala maandĩkĩthĩtwʼe itanĩ syake nĩ 74,600. 5 Ala makambaa kambi ũtee wake nĩ mbaĩ ya Isakali; mũnene wa ana ma Isakali nĩ Nethaneli mwana wa Nzuali. 6 Ala maandĩkĩthĩtwʼe itanĩ syake nĩ 54,400. 7 Nayo mbaĩ ĩla ĩngĩ nĩ ya Nzevuluni; mũnene wa ana ma Nzevuluni nĩ Eliavu mwana wa Eeloni. 8 Ala maandĩkĩthĩtwʼe itanĩ syake nĩ 57,400.

9 “Onthe ala maandĩkĩthĩtwʼe itanĩ sya kambi ya Yuta nĩ 186,400. Kĩu nĩkyo kĩkethĩawa kĩkundi kya mbee kũkũsya.

10 “Kĩkundi kya mbaĩ itatũ kya kambi ya Leũveni kwosana na nguthu syoo* kĩkeethĩawa ngalĩko ya ĩtheo; mũnene wa ana ma Leũveni nĩ Elisuli mwana wa Seteuli. 11 Ala maandĩkĩthĩtwʼe itanĩ syake nĩ 46,500. 12 Ala makambaa kambi ũtee wake nĩ mbaĩ ya Simeoni; mũnene wa ana ma Simeoni nĩ Selumieli mwana wa Nzulisatai. 13 Ala maandĩkĩthĩtwʼe itanĩ syake nĩ 59,300. 14 Nayo mbaĩ ĩla ĩngĩ nĩ ya Ngati; mũnene wa ana ma Ngati nĩ Eliasavu mwana wa Leueli. 15 Ala maandĩkĩthĩtwʼe itanĩ syake nĩ 45,650.

16 “Onthe ala maandĩkĩthĩtwʼe itanĩ sya kambi ya Leũveni nĩ 151,450, na kĩu nĩkyo kĩkethĩawa kĩkundi kya kelĩ kũkũsya.

17 “Yĩla ĩeema ya kũmbanĩa yĩũthamwʼa, kambi ya Alivai yaĩlĩte kwĩthĩawa katĩkatĩ wa kambi ila ingĩ.

“Onthe maĩle kũendaa maatĩanĩe o ũndũ mambĩte kambi, kĩla kambi vandũ vayo, kwosana na ikundi syayo sya mbaĩ itatũ.

18 “Kĩkundi kya mbaĩ itatũ kya kambi ya Evilaimu kwosana na nguthu syoo* kĩkeethĩawa ngalĩko ya ũthũĩlonĩ wa sua; mũnene wa ana ma Evilaimu nĩ Elisama mwana wa Amiuti. 19 Ala maandĩkĩthĩtwʼe itanĩ syake nĩ 40,500. 20 Mbaĩ ya Manase nĩyo ĩkethĩawa ũtee wake; mũnene wa ana ma Manase nĩ Ngamalieli mwana wa Vetasuli. 21 Ala maandĩkĩthĩtwʼe itanĩ syake nĩ 32,200. 22 Nayo mbaĩ ĩla ĩngĩ nĩ ya Mbenyamini; mũnene wa ana ma Mbenyamini nĩ Avitani mwana wa Kiteoni. 23 Ala maandĩkĩthĩtwʼe itanĩ syake nĩ 35,400.

24 “Onthe ala maandĩkĩthĩtwʼe itanĩ sya kambi ya Evilaimu nĩ 108,100, na kĩu nĩkyo kĩkethĩawa kĩkundi kya katatũ kũkũsya.

25 “Kĩkundi kya mbaĩ itatũ kya kambi ya Ndani kwosana na nguthu syoo* kĩkeethĩawa ngalĩko ya ĩũlũ; mũnene wa ana ma Ndani nĩ Aieseli mwana wa Amisatai. 26 Ala maandĩkĩthĩtwʼe itanĩ syake nĩ 62,700. 27 Ala makambaa kambi ũtee wake nĩ mbaĩ ya Aseli; mũnene wa ana ma Aseli nĩ Vakieli mwana wa Okalani. 28 Ala maandĩkĩthĩtwʼe itanĩ syake nĩ 41,500. 29 Nayo mbaĩ ĩla ĩngĩ nĩ ya Navitali; mũnene wa ana ma Navitali nĩ Aila mwana wa Enani. 30 Ala maandĩkĩthĩtwʼe itanĩ syake nĩ 53,400.

31 “Onthe ala maandĩkĩthĩtwʼe kambinĩ ya Ndani nĩ 157,600. Kĩu nĩkyo kĩkethĩawa kĩkundi kya mũthya kũkũsya, kwosana na ikundi syoo sya mbaĩ itatũ.”

32 Asu nĩmo Aisilaeli onthe ala maandĩkĩthiwʼe kwosana na nyũmba sya aa-ĩthe moo; onthe ala maĩ kambinĩ isu na maandĩkĩthiwʼe itanĩ maĩ 603,550. 33 Ĩndĩ o tondũ Yeova wamwĩaĩe Mose, Alivai mayaaandĩkĩthwʼa vamwe na Aisilaeli ala angĩ. 34 Aisilaeli nĩmeekie kyonthe kĩla Yeova wamwĩaĩe Mose. Ũu nĩwʼo maambaa maema kwosana na ikundi syoo sya mbaĩ itatũ, na ũu nĩwʼo makũasya kuma vala maĩ, kĩla mũndũ na mũsyĩ wake na kwosana na nyũmba sya aa-ĩthe moo.

3 Yu ĩndĩ, ii nĩsyo syaĩ nzyawa sya* Alũni na Mose mũthenyanĩ ũla Yeova waneeneie na Mose Kĩĩmanĩ kya Sinaĩ. 2 Aa nĩmo maĩ masyĩtwa ma ana ma Alũni: ũla mũkũũ Natavu, na ĩndĩ Aviũ, Eleasali, na Ithamali. 3 Asu nĩmo maĩ masyĩtwa ma ana ma Alũni, ala maĩ athembi etĩkĩsye mauta na manengetwe ũkũmũ wa* kũthũkũma me athembi. 4 Ĩndĩ Natavu na Aviũ nĩmakwie me mbee wa Yeova yĩla mamũkwatĩisye Yeova mwaki ũte mwĩtĩkĩlye me weũnĩ wa Sinaĩ, namo mayaĩ na ana. Ĩndĩ Eleasali na Ithamali nĩmaendeeie kũthũkũma me athembi vamwe na Alũni ĩthe woo.

5 Na ĩndĩ Yeova amwĩa Mose: 6 “Thengeesya mbaĩ ya Livai, na ũimĩũngamya mbee wa mũthembi Alũni, nayo ĩkamũthũkũmaa. 7 No nginya meanĩasye ianda syoo kwondũ wa Alũni na kwondũ wa ũmbano wʼonthe me mbee wa ĩeema ya kũmbanĩa kwa kwĩanĩsya ũthũkũmi woo ũla ũkonanĩtye na ĩeema yĩu. 8 Nĩmo makasũvĩaa mĩio yonthe ya ĩeema ya kũmbanĩa na maianĩsya ianda syoo kwondũ wa Aisilaeli kwa kwĩanĩsya ũthũkũmi woo ũla ũkonanĩtye na ĩeema yĩu. 9 No nginya ũnengane Alivai kwa Alũni na anae. Asu nĩmo manenganĩtwe, nĩmo manengetwe Alũni kuma kwa Aisilaeli. 10 No nginya ũnyuve Alũni na ana make, na no nginya meanĩasye ianda syoo sya ũthembi, na mũndũ o na wĩva ũte mwĩtĩkĩlye* athengeea vo aĩle kũawa.”

11 Na Yeova aendeea kũneena na Mose, ayasya: 12 “Nyie a vakwa, sisya! nĩngwosa Alivai kuma kwa Aisilaeli vandũ va kĩla mwana mũkũũ wa* Aisilaeli, na Alivai makeethĩawa makwa. 13 Kyonthe kĩla kyasyawa mbee nĩ kyakwa. Mũthenya ũla nooaie makithathi onthe* nthĩ ya Misili, nĩnatheisye makithathi onthe* nthĩnĩ wa Isilaeli kwondũ wakwa, kuma mũndũ nginya nyamũ. Makeethĩawa makwa. Ninyie Yeova.”

14 Na Yeova aendeea kũneena na Mose weũnĩ wa Sinaĩ, ayasya: 15 “Andĩkĩthya ana ma Livai kwosana na nyũmba sya aa-ĩthe moo na kwosana na mĩsyĩ yoo. No nginya ũandĩkĩthye kĩla mũndũũme wĩ na ũkũũ wa mwei ũmwe kwambata.” 16 Kwoou Mose amaandĩkĩthya kwosana na mwĩao wa Yeova, o tondũ weeaĩwe. 17 Aa nĩmo maĩ masyĩtwa ma ana ma Livai: Ngelisoni, Koathi, na Melali.

18 Yu ĩndĩ, aa nĩmo maĩ masyĩtwa ma ana ma Ngelisoni kwosana na mĩsyĩ yoo: Livini na Simei.

19 Namo ana ma Koathi kwosana na mĩsyĩ yoo maĩ Amilamu, Isali, Eviloni, na Usieli.

20 Namo ana ma Melali kwosana na mĩsyĩ yoo maĩ Mali na Musi.

Ĩsu nĩyo yaĩ mĩsyĩ ya Alivai kwosana na nyũmba sya aa-ĩthe moo.

21 Nake Ngelisoni nĩwe waumĩlilye mũsyĩ wa Alivini na mũsyĩ wa Asimei. Ĩsu nĩyo yaĩ mĩsyĩ ya Angelisoni. 22 Ũtalo wa aũme moo onthe me na ũkũũ wa mwei ũmwe kwambata ala maandĩkĩthiwʼe waĩ 7,500. 23 Mĩsyĩ ya Angelisoni yambie maeema ĩtina wa ĩeema ya ũthaithi ngalĩko ya ũthũĩlonĩ wa sua. 24 Mũnene wa nyũmba ya* Angelisoni aĩ Eliasavu mwana wa Laeli. 25 Kĩanda kya ana ma Ngelisoni ĩeemanĩ ya kũmbanĩa kyaĩ kũsũvĩa ĩeema ya ũthaithi na kyandalũa kyayo, syĩndũ sya kũyĩvwʼĩka, vasia ũla wĩ mũomonĩ wa ĩeema ya kũmbanĩa, 26 itambaa ila iniinĩte kũthyũlũlũka kĩwanza, vasia ũla wĩ mũvĩanĩ wa kĩwanza kĩla kĩthyũlũlũkĩte ĩeema ya ũthaithi na kĩthembeo, makanda ma ĩeema, na ũthũkũmi wʼonthe ũla ũkonanĩtye na syĩndũ isu.

27 Nake Koathi nĩwe waumĩlilye mũsyĩ wa Aamilamu, mũsyĩ wa Aisali, mũsyĩ wa Aeviloni, na mũsyĩ wa Ausieli. Ĩsu nĩyo yaĩ mĩsyĩ ya Akoathi. 28 Ũtalo wa aũme onthe me na ũkũũ wa mwei ũmwe kwambata waĩ 8,600; asu nĩmo maĩ na kĩanda kya kũsũvĩa vala vandũ vatheu. 29 Mĩsyĩ ya ana ma Koathi yambie kambi ngalĩko ya ĩtheo ya ĩeema ya ũthaithi. 30 Mũnene wa nyũmba ya aa-ĩthe ma mĩsyĩ ya Akoathi aĩ Elisavani mwana wa Usieli. 31 Kĩanda kyoo kyaĩ kũsũvĩa yĩla Ĩsandũkũ, mesa, kĩndũ kya kwilĩĩla taa, ithembeo, mĩio ĩla yatũmĩawa ũthũkũminĩ wa vala vandũ vatheu, na ũthũkũmi wʼonthe ũla wakonanĩtye na syĩndũ isu.

32 Mũũngamĩi wa anene ma Alivai aĩ Eleasali mwana wa mũthembi Alũni, na nĩwe waũngamĩe ala maĩ na ianda sya kũtethya wĩa vala vandũ vatheu.

33 Nake Melali nĩwe waumĩlilye mũsyĩ wa Amali na mũsyĩ wa Amusi. Ĩsu nĩyo yaĩ mĩsyĩ ya Melali. 34 Ũtalo wa aũme onthe me na ũkũũ wa mwei ũmwe kwambata ala maandĩkĩthiwʼe waĩ 6,200. 35 Mũnene wa nyũmba ya aa-ĩthe ma mĩsyĩ ya Melali aĩ Nzulieli mwana wa Aviaili. Asu nĩmo mambĩte kambi ngalĩko ya ĩũlũ ya ĩeema ya ũthaithi. 36 Ana ma Melali nĩmo maĩ na kĩanda kya kũũngamĩa vulemu sya ĩeema ya ũthaithi, mĩamba yayo, ituĩ syayo, matina mayo me na ĩima, mĩio yayo yonthe, na ũthũkũmi wʼonthe ũla wakonanĩtye na syĩndũ isu, 37 o vamwe na ituĩ ila syathyũlũlũkĩte kĩwanza na matina masyo me na ĩima, syambo syasyo, na makanda masyo.

38 Mose na Alũni na ana make mambĩte kambi mbee wa ĩeema ya ũthaithi ngalĩko ya wumĩlonĩ wa sua, mbee wa ĩeema ya kũmbanĩa. Nĩmo maĩ na kĩanda kya kũsũvĩa vala vandũ vatheu; waĩ wĩa woo kwondũ wa Aisilaeli. Mũndũ o na wĩva ũte mwĩtĩkĩlye* athengeea vo aaĩlĩte kũawa.

39 Aũme onthe Alivai me na ũkũũ wa mwei ũmwe kwambata, ala Mose na Alũni maandĩkĩthisye kwosana na mĩsyĩ yoo o tondũ Yeova weeaĩte, maĩ 22,000.

40 Na ĩndĩ Yeova amwĩa Mose: “Andĩkĩthya aũme onthe ma Aisilaeli ala masyaĩtwe mbee na me na ũkũũ wa mwei ũmwe kwambata, matale, na ũiandĩka masyĩtwa moo. 41 No nginya wose Alivai kwondũ wakwa vandũ va kĩla mwana mũkũũ wa Aisilaeli, na osa indo sya Alivai vandũ va indo syonthe ila isyaĩtwe mbee sya Aisilaeli. Ninyie Yeova.” 42 Nĩvo ĩndĩ Mose waandĩkĩthisye kĩla mwana mũkũũ wa Aisilaeli, o tondũ Yeova wamwĩaĩe. 43 Ũtalo wa aũme onthe ala masyaĩtwe mbee ala maandĩkĩthiwʼe kwosana na masyĩtwa moo na maĩ na ũkũũ wa mwei ũmwe kwambata waĩ 22,273.

44 Na Yeova aendeea kũneena na Mose, ayasya: 45 “Osa Alivai vandũ va kĩla mwana mũkũũ wa Aisilaeli, na osa indo sya Alivai vandũ va indo syoo, na no nginya Alivai methĩwe makwa. Ninyie Yeova. 46 Kwondũ wa ndĩvi ya wovosyo ya ana ala 273 ma Aisilaeli masyaĩtwe mbee, ala mavĩtũkĩte ũtalo wa Alivai, 47 wĩosa sekeli itano* kwondũ wa kĩla ũmwe, kwosana na kĩthimo kya sekeli ya vala vandũ vatheu.* Sekeli ĩmwe nĩ ngela 20.* 48 No nginya ũnenge Alũni na ana make mbesa isu ta ndĩvi ya wovosyo kwondũ wa ala mavĩtũkĩte ũtalo wa Alivai.” 49 Na kwoou Mose akolanyʼa mbesa sya ndĩvi ya wovosyo nĩ kana ovosye ala mavĩtũkĩte ũtalo wa Alivai. 50 Oosie mbesa isu kuma kwa ana ma Aisilaeli ala masyaĩtwe mbee, nasyo syaĩ sekeli 1,365, kwosana na kĩthimo kya sekeli ya vala vandũ vatheu. 51 Na ĩndĩ Mose anenga Alũni na anae mbesa isu sya ndĩvi ya wovosyo kwosana na ndeto ya* Yeova, o tondũ Yeova wamwĩaĩe Mose.

4 Na Yeova aneena na Alũni, ayasya: 2 “Ũtalo wa ana ma Koathi nĩwaĩle kwoswa kuma katĩ wa ana ma Livai, kwosana na mĩsyĩ yoo na kwosana na nyũmba sya aa-ĩthe moo, 3 onthe ala me na myaka 30 nginya 50 na me kĩkundinĩ kĩla kĩaĩwe wĩa ĩeemanĩ ya kũmbanĩa.

4 “Ũũ nĩw’o ũthũkũmi wa ana ma Koathi ĩeemanĩ ya kũmbanĩa. Nĩ ũthũkũmi mũtheu vyũ: 5 Yĩla kambi ĩkũmbũũka, Alũni na ana make makookaa na mayumya vasia ũla wĩ mbee wa ĩsandũkũ ya Ũkũsĩ na maiyĩvw’ĩka naw’o. 6 Makailĩĩlaa kĩthuma kyololo* ĩũlũ wayo, na mayalany’a ĩũlũ wayo kĩtambaa kya mbuluu ĩtavulanĩtw’e na langi ũngĩ, na mailikya mĩtĩ ya kũyĩkua vala vaĩlĩte.

7 O na ĩngĩ, makalanasya kĩtambaa kya mbuluu ĩũlũ wa mesa ya mĩkate ya wonany’o, na makailĩĩlaa ĩũlũ wayo masaani, ikombe, mbakũli, na ngyaki sya nthembo ya kũnyuwa; na mũkate ũla wumaw’a ta nthembo waĩle kwĩkalaa ĩũlũ wayo. 8 Makalanasya kĩtambaa kĩtune mũno ĩũlũ wa syĩndũ isu, na maivw’ĩka mesa ĩsu na kĩthuma kyololo, na mailikya mĩtĩ ya kũmĩkua vala vaĩlĩte. 9 Ĩtina wa ũu, makoosaa kĩtambaa kya mbuluu na mailinga kĩla kĩndũ kya kwilĩĩla taa sya kũmulĩka, vamwe na taa syakyo, mĩkasi yakyo ya kũkwatĩĩa ndambi, syĩndũ syakyo sya kwĩkĩa mwaki, na mĩio yakyo yonthe ya kwĩkĩa mauta. 10 Makalingaa ĩngĩ kĩndũ kĩu kya kwilĩĩla taa vamwe na mĩio yakyo yonthe matũmĩĩte kĩthuma kyololo, na maikilĩĩla mũambanĩ wa kũkĩkua. 11 Na makalanasya kĩtambaa kya mbuluu ĩũlũ wa kĩla kĩthembeo kya thaavu, maikĩvwʼĩka na kĩthuma kyololo, na mailikya mĩtĩ ya kũkĩkua vala vaĩlĩte. 12 Ĩtina wa ũu, makoosaa mĩio yonthe ya ũthũkũmi woo ĩla matũmĩaa kũthũkũma vala vandũ vatheu kĩla ĩvinda, na maimĩkĩa kĩtambaanĩ kya mbuluu, na maimĩvwʼĩka na kĩthuma kyololo, na maimilĩĩla mũambanĩ wa kũmĩkua.

13 “Maĩlĩte kũveta mũu* kĩthembeonĩ na mayalanyʼa kĩtambaa kya wʼĩa wa langi wa nzambalaũ ĩũlũ wakyo. 14 Makailĩĩlaa kĩthembeonĩ kĩu mĩio yakyo yonthe ĩla matũmĩaa yĩla meũthũkũma kĩthembeonĩ: syĩndũ sya kwĩkĩa mwaki, ũma, mĩko, na mbakũli, mĩio yonthe ya kĩthembeo kĩu; na makalanasya kĩthuma kyololo ĩũlũ wakyo na mailikya mĩtĩ ya kũkĩkua vala vaĩlĩte.

15 “Kambi ĩtanombũũka, no nginya Alũni na ana make mambae kũmina kũvwʼĩka vala vandũ vatheu na mĩio yonthe ya vala vandũ vatheu. Ĩtina wa ũu, ana ma Koathi makalikaa nĩ kana makue syĩndũ isu, ĩndĩ mayaĩlĩte o na vanini kũkiita vala vandũ vatheu nũndũ meeka ũu makakwʼa. Syĩndũ isu ikonanĩtye na ĩeema ya kũmbanĩa syĩ mokonĩ ma* ana ma Koathi.

16 “Eleasali mwana wa mũthembi Alũni nĩwe wĩ na kĩanda kya kũũngamĩa mauta ma kwakanyʼa taa, ũvumba ũla wĩthĩawa na mũuke mũseo, nthembo ya lĩu ĩla yumawʼa kĩla ĩvinda, na mauta ma kwĩtĩkĩsya. Nĩwe ũũngamĩe ĩeema yonthe ya ũthaithi na kyonthe kĩla kĩ nthĩnĩ wayo, o vamwe na vala vandũ vatheu na mĩio ya vo.”

17 Na Yeova aendeea kũneena na Mose na Alũni, ayasya: 18 “Ndũkaeke mbaĩ ya mĩsyĩ ya Akoathi ĩvetwe kuma kwa Alivai. 19 Ĩndĩ ĩka ũũ kwondũ woo nĩ kana maendeee kwĩkala thayũ na maikese kũkwʼa nũndũ wa kũthengeea ila syĩndũ ntheu vyũ. Alũni na ana make nĩmalike na maiaĩa kĩla ũmwe ũthũkũmi wake na kĩla waĩlĩte kũkua. 20 Mayaĩlĩte o na vanini kũlika na kwona syĩndũ ila ntheu o na ethĩwa no kwa ĩvenyʼa, nũndũ meeka ũu makakw’a.”

21 Na ĩndĩ Yeova aneena na Mose, ayasya: 22 “Ũtalo wa ana ma Ngelisoni nĩwaĩlĩte kwoswa kwosana na nyũmba sya aa-ĩthe moo na mĩsyĩ yoo. 23 Waĩlĩte kũandĩkĩthya onthe ala me na myaka 30 nginya 50 na me kĩkundinĩ kĩla kĩaĩwe kũthũkũma ĩeemanĩ ya kũmbanĩa. 24 Syĩndũ ii nĩsyo mĩsyĩ ya Angelisoni ĩaĩwe kũsũvĩa na kũkua: 25 Makakuaa itambaa sya ĩeema ya ũthaithi, ĩeema ya kũmbanĩa, syĩndũ ila syĩthĩawa iivw’ĩkĩte na kĩthuma kyololo kĩla kĩthĩawa ĩũlũ wayo, vasia ũla wĩthĩawa mũomonĩ wa ĩeema ya kũmbanĩa, 26 itambaa ila iniinĩte sya kĩwanza, vasia ũla wĩ mũvĩanĩ wa kĩwanza kĩla kĩthyũlũlũkĩte ĩeema ya ũthaithi na kĩthembeo, makanda masyo na mĩio yasyo yonthe na kyonthe kĩla kĩtũmĩawa ũthũkũminĩ ũla ũkonanĩtye na ĩeema yĩu. Ũsu nĩw’o wĩa woo. 27 Alũni na ana make nĩmo maĩlĩte kũũngamĩa ũthũkũmi w’onthe na mĩio ya Angelisoni; manenge mĩio ĩsu yonthe yĩthĩwe mokonĩ moo. 28 Ũsu nĩw’o ũthũkũmi ũla mĩsyĩ ya Angelisoni ĩkeanĩasya ĩeemanĩ ya kũmbanĩa, na ianda syoo ikaũngamĩawa nĩ Ithamali mwana wa mũthembi Alũni.

29 “Kwondũ wa ana ma Melali, maandĩkĩthye kwosana na mũsyĩ woo na kwosana na nyũmba ya aa-ĩthe moo. 30 Andĩkĩthya ala me na myaka 30 nginya 50, onthe ala me kĩkundinĩ kĩla kĩaĩwe kũthũkũma ĩeemanĩ ya kũmbanĩa. 31 Syĩndũ ii ikonanĩtye na ũthũkũmi woo ĩeemanĩ ya kũmbanĩa nĩsyo makakuaa: vulemu sya ĩeema ya ũthaithi, mĩamba yayo, ituĩ syayo, matina mayo me na ĩima, 32 ituĩ ila ithyũlũlũkĩte kĩwanza, matina masyo me na ĩima, syambo syasyo, na makanda masyo vamwe na syĩndũ ila ingĩ syonthe syasyo na ũthũkũmi w’onthe ũla ũkonetye syĩndũ isu. Wĩaĩa kĩla ũmwe na ĩsyĩtwa kĩla waĩlĩte kũkua. 33 Ũu nĩw’o mĩsyĩ ya ana ma Melali ĩkathũkũmaa ĩeemanĩ ya kũmbanĩa, ĩũngamĩwe nĩ Ithamali mwana wa mũthembi Alũni.”

34 Nĩvo ĩndĩ Mose na Alũni na anene ma Isilaeli maandĩkĩthisye ana ma Koathi kwosana na mĩsyĩ yoo na kwosana na nyũmba ya aa-ĩthe moo, 35 onthe ala maĩ na myaka 30 nginya 50 na maĩ kĩkundinĩ kĩla kyaaĩwe kũthũkũma ĩeemanĩ ya kũmbanĩa. 36 Ũtalo wa ala maandĩkĩthiw’e kwosana na mĩsyĩ yoo waĩ 2,750. 37 Asu nĩmo maandĩkĩthiw’e kuma mĩsyĩnĩ ya Akoathi, onthe ala mathũkũmaa ĩeemanĩ ya kũmbanĩa. Mose na Alũni nĩmamaandĩkĩthisye kwosana na mwĩao wa Yeova o tondũ weeaĩe Mose.

38 Ana ma Ngelisoni nĩmaandĩkĩthiw’e kwosana na mĩsyĩ yoo na kwosana na nyũmba ya aa-ĩthe moo, 39 onthe ala maĩ na myaka 30 nginya 50 na maĩ kĩkundinĩ kĩla kyaaĩwe kũthũkũma ĩeemanĩ ya kũmbanĩa. 40 Ũtalo wa ala maandĩkĩthiw’e kwosana na mĩsyĩ yoo na kwosana na nyũmba ya aa-ĩthe moo waĩ 2,630. 41 Asu nĩmo maandĩkĩthiw’e kuma mĩsyĩnĩ ya ana ma Ngelisoni, onthe ala mathũkũmaa ĩeemanĩ ya kũmbanĩa. Mose na Alũni nĩmamaandĩkĩthisye kwosana na mwĩao wa Yeova.

42 Ana ma Melali nĩmaandĩkĩthiwʼe kwosana na mĩsyĩ yoo na kwosana na nyũmba ya aa-ĩthe moo, 43 onthe ala maĩ na myaka 30 nginya 50 na maĩ kĩkundinĩ kĩla kyaaĩwe kũthũkũma ĩeemanĩ ya kũmbanĩa. 44 Ũtalo wa ala maandĩkĩthiw’e kwosana na mĩsyĩ yoo waĩ 3,200. 45 Asu nĩmo maandĩkĩthiw’e kuma mĩsyĩnĩ ya ana ma Melali, ala Mose na Alũni mamaandĩkĩthisye kwosana na mwĩao wa Yeova o tondũ weeaĩe Mose.

46 Mose na Alũni na anene ma Isilaeli nĩmaandĩkĩthisye Alivai asu onthe kwosana na mĩsyĩ yoo na kwosana na nyũmba sya aa-ĩthe moo; 47 maĩ na myaka 30 nginya 50, na onthe maaĩwe kũthũkũma ĩeemanĩ ya kũmbanĩa na kũkua syĩndũ ila ikonanĩtye nayo. 48 Ũtalo wa ala maandĩkĩthiw’e waĩ 8,580. 49 Nĩmaandĩkĩthiwʼe kwosana na mwĩao wa Yeova o tondũ wamwĩaĩe Mose, kĩla ũmwe kwosana na ũthũkũmi ũla waaĩwe na mũio ũla wanengetwe; nĩmaandĩkĩthiw’e o tondũ Yeova wamwĩaĩe Mose.

5 Na Yeova aneena ĩngĩ na Mose, ayasya: 2 “Ĩaĩe Aisilaeli mavetange kambinĩ kĩla mũndũ wĩ na mangũ na kĩla mũndũ ũkumwa nĩ kĩko mwĩĩnĩ wake na kĩla mũndũ ũvukĩtwʼe nĩ kũkiita mũndũ mũkwʼũ.* 3 No nginya mũmumaalye nza, ethĩwe nĩ mũndũũme kana nĩ mũndũ mũka. No nginya mũmumaalye nza wa kambi nĩ kana ndakavukye kambi sya ala nĩkalaa katĩ woo.” 4 Na kwoou Aisilaeli meeka ũu, na mamaumaalya nza wa kambi. O ũndũ Yeova watavĩtye Mose, nowʼo Aisilaeli meekie.

5 Na Yeova aendeea kũneena na Mose, ayasya: 6 “Tavya Aisilaeli ũũ: ‘Ethĩwa mũndũũme kana mũndũ mũka nĩweeka naĩ o na yĩva ĩla yĩkawa nĩ mũndũ, na ndanethĩwa e mũĩkĩĩku kwa Yeova, mũndũ ũsu nĩwaĩle kũtalĩlwa ĩvĩtyo. 7 No nginya aumbũle naĩ ĩla wĩkĩte na aiĩva ndĩvi ĩanĩĩe ĩvĩtyo yake na aisyoka ongele kĩlungu kya katano kya ndĩvi ĩsu; aĩlĩte kũnengane ndĩvi ĩsu kwa ũla ũvĩtĩsye. 8 Ĩndĩ ethĩwa ũla ũvĩtĩwʼe nde na mũndũ wa mũsyĩ wa vakuvĩ ũtonya kwosa ndĩvi ĩsu, yaĩlĩte kũnengwa Yeova na ĩkeethĩawa ya mũthembi, ate o ndũũme ya wĩw’anĩthyo ĩla ũkũtũmĩa kwĩwʼanĩthya mũndũ ũsu na Ngai.

9 “‘Mũvothi wʼonthe mũtheu waumwʼa nĩ Aisilaeli na wanengwa mũthembi waĩlĩte kũtwʼĩka wake. 10 Syĩndũ ila ntheu sya kĩla mũndũ ikaendeeaa kwĩthĩwa syĩ syake. Kĩndũ o na kĩva kĩla mũndũ wanenga mũthembi, kĩu kĩkatwʼĩkaa kya mũthembi.’”

11 Na Yeova aendeea kũneena na Mose, ayasya: 12 “Neena na Aisilaeli na ũimea atĩĩ: ‘Ũũ nĩwʼo vaĩle kwĩkwa ethĩwa kĩveti nĩkyeelelũka na kyeethĩwa kĩte kĩĩkĩĩku kwa mũũme wakyo 13 na mũndũũme ũngĩ aikoma nakyo, ĩndĩ mũũme ailea kũmanya ũndũ ũsu na ũiendeea kwĩkala wĩ kĩmbithĩ, na kwoou ũyĩthĩa nĩkyeevukya ĩndĩ vai ngũsĩ ĩtonya kũkũsĩĩa ũndũ ũsu na kĩinakwatwʼa: 14 Ethĩwa mũũme nĩwalikwa nĩ kĩwĩu na aeka kũĩkĩĩa kĩveti kyake na ũyĩthĩa nĩkĩvukĩtye, kana ethĩwa nĩwalikwa nĩ kĩwĩu na aeka kũĩkĩĩa kĩveti kyake o na kau kĩyĩvukĩtye, 15 no nginya mũndũ ũsu aete kĩveti kyake vala ve mũthembi, vamwe na nthembo kwondũ wa kĩveti kyake; aĩlĩte kũete kĩlungu kya ĩkũmi kya eva* ya mũtu wa mbaale. Ndaĩlĩte o na vanini kũwĩtĩkĩsya mauta kana kũwĩkĩa ũvani, nĩkwĩthĩwa ĩsu nĩ nthembo ya lĩu yanenganwe nũndũ wa kĩwĩu, na nĩ nthembo ya lĩu ya kũlilikanyʼa ĩvĩtyo yake.

16 “‘Mũthembi akamũthengeesya na aimũũngamya mbee wa Yeova. 17 Mũthembi akeekĩa kĩwʼũ kĩtheu mũionĩ wa yũmba, na akauta mũthanga nthĩ ĩeemanĩ ya ũthaithi na aiwĩkĩa kĩwʼũnĩ kĩu. 18 Na mũthembi akaũngamya mũndũ mũka ũsu mbee wa Yeova na aithasya nzwʼĩĩ sya mũndũ mũka ũsu na ayĩkĩa itaanĩ syake nthembo ya lĩu ya kũlilikanyʼa ĩvĩtyo, nayo nĩ ĩla nthembo ya lĩu ĩnenganĩtwe nũndũ wa kĩwĩu, na mũthembi akeethĩwa akwete kw’okonĩ kwake kĩw’ũ kĩ ũũ kĩla kĩetae kĩumo.

19 “‘Na ĩndĩ mũthembi akatuma mũndũ mũka ũsu evĩta, na akamũtavya ndeto ii: “Ethĩwa vai mũndũũme waakoma naku ĩvinda yĩla wĩthĩĩtwe wĩ ungu wa ũkũmũ wa mũemeu na ndwaaelelũka na ũkevukya, wĩmũthasye na kĩwʼũ kĩĩ kĩ ũũ kĩetae kĩumo kĩikwĩka ũndũ. 20 Ĩndĩ ethĩwa ve ĩvinda waaelelũka wĩ o ungu wa ũkũmũ wa mũemeu na ũkevukya, na ũkakoma na mũndũũme ũngĩ eka mũemeu—” 21 Na mũthembi akatuma mũndũ mũka ũsu evĩta wĩvĩto ũtonya kũmũetee kĩumo, na akatavya mũndũ mũka ũsu ndeto ii: “Yeova nakũtwʼĩkĩthye kĩndũ kya kũumanĩa na kya kwĩvĩta katĩ wa andũ maku, nĩkwĩthĩwa Yeova akatuma ũtambĩ* waku ũvalũka* na akatuma ĩvu yaku yimba. 22 Kĩw’ũ kĩĩ kĩla kĩetae kĩumo kĩlika mĩĩthinĩ yaku nĩ kana kĩtume ĩvu yaku yimba na ũtambĩ* waku ũvalũka.”* Ĩtina wa mũndũ mũka ũsu kwĩwʼa ndeto isu aĩle kwasya: “Ameni! Ameni!”*

23 “‘Na ĩndĩ mũthembi aĩlĩte kũandĩka iumo isu ĩvukunĩ na ayĩithambĩsya kĩla kĩwʼũnĩ kĩ ũũ. 24 Akatuma mũndũ mũka ũsu anywʼa kĩwʼũ kĩu kĩ ũũ kĩla kĩetae kĩumo, na kĩwʼũ kĩu kĩla kĩetae kĩumo kĩkalika nthĩnĩ wake na kĩituma ethĩwa na ũũ. 25 Na mũthembi aĩlĩte kwosa ĩla nthembo ya lĩu ĩnenganĩtwe nũndũ wa kĩwĩu kuma kw’okonĩ kwa mũndũ mũka ũsu na aivyũlĩlya Yeova nthembo ĩsu ya lĩu mbee na ĩtina, na ĩndĩ aimĩete vakuvĩ na kĩthembeo. 26 Na mũthembi akauta ngundi ĩmwe yusĩe ya nthembo ya lĩu yĩthĩwe ta nthembo ya ũlilikanyʼo na aituma ĩtoa kĩthembeonĩ, na ĩtina wa ũu, akatuma mũndũ mũka ũsu anywʼa kĩw’ũ kĩu. 27 Mũthembi amina kũnenga mũndũ mũka ũsu kĩw’ũ kĩu, ethĩwa nĩwĩvukĩtye na akethĩwa ate mũĩkĩĩku kwa mũũme, nĩvo ĩndĩ kĩwʼũ kĩu kĩetae kĩumo kĩkalika nthĩnĩ wake na kĩitwʼĩka kĩndũ kĩ ũũ, na ĩvu yake yĩkaimba, na ũtambĩ* wake ũkavalũka,* na mũndũ mũka ũsu akeethĩwa kĩndũ kya kũumanĩa katĩ wa andũ make. 28 Ĩndĩ ethĩwa mũndũ mũka ũsu ndevukĩtye na nĩ mũtheu, nĩvo ĩndĩ wĩĩthĩwa e mũthasye ndakakwatwe nĩ ũkũno ũsu, na akaendeea kwĩthĩwa na ũtonyi wa kũitava na kwĩthĩwa na ũsyao.

29 “‘Ũsu nĩwʼo mwĩao ũla ũkaatĩĩawa yĩla mũndũ walikwa nĩ kĩwĩu, ĩvinda yĩla kĩveti kyeelelũka na kyeevukya kĩ o ungu wa ũkũmũ wa mũũme wakyo, 30 kana ĩvinda yĩla mũndũũme walikwa nĩ kĩwĩu na aeka kũĩkĩĩa mũka wake; aĩlĩte kũũngamya mũka wake mbee wa Yeova, na no nginya mũthembi eke mũka wa mũndũ ũsu kyonthe kĩla kĩwetetwe mwĩaonĩ ũũ. 31 Mũndũũme ũsu ndakatalĩlwa ĩvĩtyo, ĩndĩ mũka akaumya ũtalo kwondũ wa ĩvĩtyo yake.’”

6 Na Yeova aneena ĩngĩ na Mose na amwĩa: 2 “Neena na Aisilaeli na ũimea, ‘Ethĩwa mũndũũme kana mũndũ mũka nĩweevĩta wĩvĩto wa mwanya wa kwĩkala ta Mũnasili* methonĩ ma Yeova, 3 aĩlĩte kwĩvathana na mbinyu na kĩndũ kĩngĩ o na kĩva kya kũnyuwa kĩtonya kũtuma amilwa. Ndaĩlĩte kũnywʼa siki wa mbinyu kana siki wa kĩndũ kĩngĩ o na kĩva kĩ na ũkĩ. Ndaĩlĩte kũnywʼa kĩndũ kĩseũvĩtwʼe na nzavivũ, na ndaĩlĩte kũya nzavivũ, syĩthĩwe nĩ mbĩu kana nĩ mboovu. 4 Mĩthenya yonthe ĩla ũkwĩthĩwa e Mũnasili ndaĩle kũya kĩndũ o na kĩmwe kyumanĩte na mũsavivũ, kuma nzavivũ mbĩthĩ nginya masyũlyo masyo.

5 “‘Mĩthenya yonthe ĩla wĩvĩtĩte kwĩthĩwa e Mũnasili vai wenzi waĩlĩte kwĩsĩla mũtwenĩ wake. Aĩlĩte kwĩyĩkalya e mũtheu kwa kũeka nzwʼĩĩ sya mũtwe wake iane nginya yĩla mĩthenya ya kwĩthĩwa avathĩtwe kwondũ wa Yeova ĩkathela. 6 Ndaĩlĩte kũthengeea mũndũ* mũkwʼũ mĩthenya yonthe ĩla ũkwĩthĩwa avathĩtwe kwondũ wa Yeova. 7 O na ethĩwa ĩthe wake kana inyia wake kana mwana-a-inyia kana mwĩĩtu-a-inyia nĩwakwʼa, ndaĩlĩte kwĩvukya, nũndũ ũvano wa kwĩthĩwa e Mũnasili kwondũ wa Ngai wake wĩ ĩũlũ wa mũtwe wake.

8 “‘Nĩ mũtheu kwa Yeova mĩthenya yonthe ĩla ũkwĩthĩwa e Mũnasili. 9 Ĩndĩ vakethĩwa ve mũndũ ũtee wake na mũndũ ũsu aikw’a atataĩĩe na aivukya nzwʼĩĩ syake ila syonanasya kana nũvathĩtwe kwondũ wa Ngai,* no nginya enze mũtwe wake mũthenyanĩ ũla ũkathewʼa. Aĩle kũwenza mũthenyanĩ wa mũonza. 10 Na mũthenyanĩ wa nyanya, aĩlĩte kũetee mũthembi ndumbũ ilĩ kana maswii elĩ ma ĩvũĩ mũomonĩ wa ĩeema ya kũmbanĩa. 11 Na mũthembi akaseũvya kasũni kamwe kethĩwe nthembo ya naĩ na kasũni kala kangĩ kethĩwe nthembo ya kũvĩvw’a na aimwĩwʼanĩthya kwondũ wa naĩ yake nũndũ wa mũndũ ũla mũkwʼũ.* Na ĩndĩ no nginya Mũnasili ũsu athesye mũtwe wake mũthenya ũsu. 12 Na no nginya evathe ĩngĩ kwondũ wa Yeova nĩ kana ethĩwe e Mũnasili, nake akaete katũlũme ke mwakanĩ wako wa mbee ta nthembo ya ĩvĩtyo. Ĩndĩ mĩthenya ya mbee ndĩkatalwa nũndũ nũnevukisye ĩvinda yĩla ũnaĩ Mũnasili.

13 “‘Yu ĩndĩ, ũũ nĩwʼo mwĩao ĩũlũ wa Mũnasili: Amina mĩthenya yake ya kwĩthĩwa e Mũnasili, akaetwe mũomonĩ wa ĩeema ya kũmbanĩa. 14 E vau no nginya aumĩsye Yeova nthembo ĩĩ: katũlũme kamwe kate na thĩna o na ũmwe na ke mwakanĩ wako wa mbee ta nthembo ya kũvĩvw’a, kalondu kamwe kaka kate na thĩna o na ũmwe na ke mwakanĩ wako wa mbee ta nthembo ya naĩ, ndũũme ĩmwe ĩte na thĩna o na ũmwe ta nthembo ya ngwatanĩo, 15 kĩkavũ kĩ na mĩkate ya kĩlinge ĩte ĩlawa yĩ ĩima katĩ ĩla ĩuĩtwe na mũtu mũvinyu ũvulanĩtwʼe na mauta, mĩkate mĩtheke ĩte ĩlawa na ĩvakĩtwe mauta, na nthembo yasyo ya lĩu na nthembo syasyo sya kũnyuwa. 16 Mũthembi akaiete mbee wa Yeova na akathemba nthembo yake ya naĩ na nthembo yake ya kũvĩvw’a. 17 Na akamũthembea Yeova ĩla ndũũme ta nthembo ya ngwatanĩo vamwe na kĩla kĩkavũ kya mĩkate ĩte ĩlawa, na mũthembi akathemba nthembo yayo ya lĩu na nthembo yayo ya kũnyuwa.

18 “‘Na ĩndĩ no nginya Mũnasili ũsu enze nzwʼĩĩ sya mũtwe wake* e mũomonĩ wa ĩeema ya kũmbanĩa, nake akoosa nzwʼĩĩ sya mũtwe wake ila syeanie yĩla waĩ Mũnasili na aisyĩkĩa mwakinĩ ũla wĩ ungu wa nthembo ya ngwatanĩo. 19 Na no nginya mũthembi ose kĩtuo kya ndũũme ĩsu kĩla kĩtheũkĩtwʼe, mũkate ũmwe ũte ĩlawa wĩ ĩima katĩ kuma kĩla kĩkavũnĩ, na mũkate ũmwe mũtheke ũte ĩlawa, na aisilĩĩla itaanĩ sya Mũnasili ũsu ĩtina wa kwenza ũvano wake wa kwĩthĩwa e Mũnasili. 20 Na no nginya mũthembi aivyũlĩlye Yeova mbee na ĩtina ta nthembo ya kũvyũlwʼa. Isu nĩ syĩndũ ntheu kwondũ wa mũthembi, vamwe na nyama ya kĩthũi ya nthembo ya kũvyũlwʼa na kũũ kũla kũnenganĩtwe ta mũvothi. Ĩtina wa ũu, Mũnasili ũsu no anywʼe mbinyu.

21 “‘Ũũ nĩwʼo mwĩao ĩũlũ wa Mũnasili ũla weevĩta: Ethĩwa nĩweevĩta na e na ũtonyi wa kũthembea Yeova nthembo ĩngĩ eka ila syaĩle kumwa nĩ Mũnasili, no nginya eanĩsye wĩvĩto wake nũndũ wa kũnenga ndaĩa mwĩao ũla waĩle kwĩanĩsya e Mũnasili.’”

22 Na ĩndĩ Yeova eea Mose: 23 “Neena na Alũni na ana make na ũimea, ‘Ũũ nĩwʼo mwaĩlĩte kũathima andũ ma Isilaeli. Matavyei atĩĩ:

24 “Yeova namũathime na aimũsũvĩa.

25 Yeova naeke ũthyũ wake ũmũkenee, na aimwonyʼa ũseo.

26 Yeova namũkĩlĩlye ũthyũ wake na aimũnenga mũuo.”’

27 Na no nginya mailĩĩle ĩsyĩtwa yakwa ĩũlũ wa andũ ma Isilaeli nĩ kana nĩmaathime.”

7 Mũthenya ũla Mose waminie kwamba ĩeema ya ũthaithi, nĩwayĩtĩkĩisye mauta na ayĩthesya, vamwe na syĩndũ syayo syonthe, kĩthembeo, na mĩio yayo yonthe. Na amina kwĩtĩkĩsya syĩndũ isu mauta na kũithesya, 2 anene ma Isilaeli, ala maĩ aũngamĩi ma nyũmba sya aa-ĩthe moo, maete nthembo. Anene asu ma mbaĩ ala maũngamĩĩte kũtalwa kwa ala maandĩkĩthiw’e 3 nĩmaetie mbee wa Yeova nthembo yoo ya makasya thanthatũ mavwʼĩkĩtwe vamwe na nzaũ 12, ĩkasya yĩmwe kwondũ wa anene elĩ na nzaũ ĩmwe kwondũ wa kĩla ũmwe woo; na masiete mbee wa ĩeema ya ũthaithi. 4 Na ĩndĩ Yeova amwĩa Mose: 5 “Osa syĩndũ ii kuma kwoo, nũndũ ikatũmĩawa ũthũkũminĩ wa ĩeema ya kũmbanĩa, na waĩle kũinenga Alivai, kĩla ũmwe kwosana na vata ũla wĩ vo wĩanĩ wake.”

6 Kwoou Mose oosa makasya asu na ngʼombe isu na ainenga Alivai. 7 Anengie ana ma Ngelisoni makasya elĩ na nzaũ inya, kwosana na vata ũla waĩ vo wĩanĩ woo; 8 na anenga ana ma Melali makasya ana na nzaũ nyanya, kwosana na vata ũla waĩ vo wĩanĩ woo, maũngamĩwe nĩ Ithamali mwana wa mũthembi Alũni. 9 Ĩndĩ ndaanenga ana ma Koathi ĩkasya o na yĩmwe kana nzaũ o na ĩmwe nũndũ wĩa woo waĩ kũthũkũma vala vandũ vatheu, na makuaa ila syĩndũ ntheu ituonĩ syoo.

10 Yu ĩndĩ, anene asu nĩmaetie nthembo yoo ĩvinda yĩla kĩthembeo kyavathawa kwondũ wa kũtũmĩwa na mũthenya ũla kyetĩkĩiwʼe mauta. Na yĩla anene asu maetie nthembo yoo mbee wa kĩthembeo, 11 Yeova amwĩa Mose atĩĩ: “Kĩla mũthenya mũnene ũmwe akaetae nthembo yake kwondũ wa kũvatha kĩthembeo nĩ kana kĩtũmĩwe, na vai mũthenya o na ũmwe waĩle kũkĩlwa.”

12 Ũla waetie nthembo yake mũthenya wa mbee aĩ Nasoni mwana wa Aminatavu kuma mbaĩnĩ ya Yuta. 13 Nthembo yake yaĩ ĩsaani yĩmwe ya vetha yĩ na ũito wa sekeli 130* na mbakũli ĩmwe ya vetha yĩ na ũito wa sekeli 70 kwosana na kĩthimo kya sekeli ya vala vandũ vatheu,* na syelĩ syausĩe mũtu mũvinyu ũvulanĩtwʼe na mauta kwondũ wa nthembo ya lĩu; 14 na kĩkombe kĩmwe kya* thaavu kĩ na ũito wa sekeli 10 kyusũĩte ũvumba; 15 na kasalũ kamwe, ndũũme ĩmwe, na katũlũme kamwe ke mwakanĩ wako wa mbee kwondũ wa nthembo ya kũvĩvw’a; 16 na kavũli kamwe kwondũ wa nthembo ya naĩ; 17 na kwondũ wa nthembo ya ngwatanĩo, ngʼombe ilĩ, ndũũme itano, nthenge itano, na tũtũlũme tũtano, kĩla kamwe ke na mwaka ũmwe. Ĩsu nĩyo yaĩ nthembo ya Nasoni mwana wa Aminatavu.

18 Mũthenyanĩ wa kelĩ, Nethaneli mwana wa Nzuali, ũla waĩ mũnene wa mbaĩ ya Isakali, nĩwaetie nthembo. 19 Nthembo ĩla waetie yaĩ ĩsaani yĩmwe ya vetha yĩ na ũito wa sekeli 130 na mbakũli ĩmwe ya vetha yĩ na ũito wa sekeli 70 kwosana na kĩthimo kya sekeli ya vala vandũ vatheu, na syelĩ syausũĩte mũtu mũvinyu ũvulanĩtwʼe na mauta kwondũ wa nthembo ya lĩu; 20 na kĩkombe kĩmwe kya thaavu kĩ na ũito wa sekeli 10 kyusũĩte ũvumba; 21 na kasalũ kamwe, ndũũme ĩmwe, na katũlũme kamwe ke mwakanĩ wako wa mbee kwondũ wa nthembo ya kũvĩvw’a; 22 na kavũli kamwe kwondũ wa nthembo ya naĩ; 23 na kwondũ wa nthembo ya ngwatanĩo, ngʼombe ilĩ, ndũũme itano, nthenge itano, na tũtũlũme tũtano, kĩla kamwe ke na mwaka ũmwe. Ĩsu nĩyo yaĩ nthembo ya Nethaneli mwana wa Nzuali.

24 Mũthenyanĩ wa katatũ, mũnene wa ana ma Nzevuluni, ũla waĩ Eliavu mwana wa Eeloni, 25 nĩwaetie nthembo yake ya ĩsaani yĩmwe ya vetha yĩ na ũito wa sekeli 130 na mbakũli ĩmwe ya vetha yĩ na ũito wa sekeli 70 kwosana na kĩthimo kya sekeli ya vala vandũ vatheu, na syelĩ syausũĩte mũtu mũvinyu ũvulanĩtwʼe na mauta kwondũ wa nthembo ya lĩu; 26 na kĩkombe kĩmwe kya thaavu kĩ na ũito wa sekeli 10 kyusũĩte ũvumba; 27 na kasalũ kamwe, ndũũme ĩmwe, na katũlũme kamwe ke mwakanĩ wako wa mbee kwondũ wa nthembo ya kũvĩvw’a; 28 na kavũli kamwe kwondũ wa nthembo ya naĩ; 29 na kwondũ wa nthembo ya ngwatanĩo, ngʼombe ilĩ, ndũũme itano, nthenge itano, na tũtũlũme tũtano, kĩla kamwe ke na mwaka ũmwe. Ĩsu nĩyo yaĩ nthembo ya Eliavu mwana wa Eeloni.

30 Mũthenyanĩ wa kana, mũnene wa ana ma Leũveni, ũla waĩ Elisuli mwana wa Seteuli, 31 nĩwaetie nthembo yake ya ĩsaani yĩmwe ya vetha yĩ na ũito wa sekeli 130 na mbakũli ĩmwe ya vetha yĩ na ũito wa sekeli 70 kwosana na kĩthimo kya sekeli ya vala vandũ vatheu, na syelĩ syausũĩte mũtu mũvinyu ũvulanĩtwʼe na mauta kwondũ wa nthembo ya lĩu; 32 na kĩkombe kĩmwe kya thaavu kĩ na ũito wa sekeli 10 kyusũĩte ũvumba; 33 na kasalũ kamwe, ndũũme ĩmwe, na katũlũme kamwe ke mwakanĩ wako wa mbee kwondũ wa nthembo ya kũvĩvw’a; 34 na kavũli kamwe kwondũ wa nthembo ya naĩ; 35 na kwondũ wa nthembo ya ngwatanĩo, ngʼombe ilĩ, ndũũme itano, nthenge itano, na tũtũlũme tũtano, kĩla kamwe ke na mwaka ũmwe. Ĩsu nĩyo yaĩ nthembo ya Elisuli mwana wa Seteuli.

36 Mũthenyanĩ wa katano, mũnene wa ana ma Simeoni, ũla waĩ Selumieli mwana wa Nzulisatai, 37 nĩwaetie nthembo yake ya ĩsaani yĩmwe ya vetha yĩ na ũito wa sekeli 130 na mbakũli ĩmwe ya vetha yĩ na ũito wa sekeli 70 kwosana na kĩthimo kya sekeli ya vala vandũ vatheu, na syelĩ syausũĩte mũtu mũvinyu ũvulanĩtwʼe na mauta kwondũ wa nthembo ya lĩu; 38 na kĩkombe kĩmwe kya thaavu kĩ na ũito wa sekeli 10 kyusũĩte ũvumba; 39 na kasalũ kamwe, ndũũme ĩmwe, na katũlũme kamwe ke mwakanĩ wako wa mbee kwondũ wa nthembo ya kũvĩvw’a; 40 na kavũli kamwe kwondũ wa nthembo ya naĩ; 41 na kwondũ wa nthembo ya ngwatanĩo, ngʼombe ilĩ, ndũũme itano, nthenge itano, na tũtũlũme tũtano, kĩla kamwe ke na mwaka ũmwe. Ĩsu nĩyo yaĩ nthembo ya Selumieli mwana wa Nzulisatai.

42 Mũthenyanĩ wa thanthatũ, mũnene wa ana ma Ngati, ũla waĩ Eliasavu mwana wa Ndeueli, 43 nĩwaetie nthembo yake ya ĩsaani yĩmwe ya vetha yĩ na ũito wa sekeli 130 na mbakũli ĩmwe ya vetha yĩ na ũito wa sekeli 70 kwosana na kĩthimo kya sekeli ya vala vandũ vatheu, na syelĩ syausũĩte mũtu mũvinyu ũvulanĩtwʼe na mauta kwondũ wa nthembo ya lĩu; 44 na kĩkombe kĩmwe kya thaavu kĩ na ũito wa sekeli 10 kyusũĩte ũvumba; 45 na kasalũ kamwe, ndũũme ĩmwe, na katũlũme kamwe ke mwakanĩ wako wa mbee kwondũ wa nthembo ya kũvĩvw’a; 46 na kavũli kamwe kwondũ wa nthembo ya naĩ; 47 na kwondũ wa nthembo ya ngwatanĩo, ngʼombe ilĩ, ndũũme itano, nthenge itano, na tũtũlũme tũtano, kĩla kamwe ke na mwaka ũmwe. Ĩsu nĩyo yaĩ nthembo ya Eliasavu mwana wa Ndeueli.

48 Mũthenyanĩ wa mũonza, mũnene wa ana ma Evilaimu, ũla waĩ Elisama mwana wa Amiuti, 49 nĩwaetie nthembo yake ya ĩsaani yĩmwe ya vetha yĩ na ũito wa sekeli 130 na mbakũli ĩmwe ya vetha yĩ na ũito wa sekeli 70 kwosana na kĩthimo kya sekeli ya vala vandũ vatheu, na syelĩ syausũĩte mũtu mũvinyu ũvulanĩtwʼe na mauta kwondũ wa nthembo ya lĩu; 50 na kĩkombe kĩmwe kya thaavu kĩ na ũito wa sekeli 10 kyusũĩte ũvumba; 51 na kasalũ kamwe, ndũũme ĩmwe, na katũlũme kamwe ke mwakanĩ wako wa mbee kwondũ wa nthembo ya kũvĩvw’a; 52 na kavũli kamwe kwondũ wa nthembo ya naĩ; 53 na kwondũ wa nthembo ya ngwatanĩo, ngʼombe ilĩ, ndũũme itano, nthenge itano, na tũtũlũme tũtano, kĩla kamwe ke na mwaka ũmwe. Ĩsu nĩyo yaĩ nthembo ya Elisama mwana wa Amiuti.

54 Mũthenyanĩ wa nyanya, mũnene wa ana ma Manase, ũla waĩ Ngamalieli mwana wa Vetasuli, 55 nĩwaetie nthembo yake ya ĩsaani yĩmwe ya vetha yĩ na ũito wa sekeli 130 na mbakũli ĩmwe ya vetha yĩ na ũito wa sekeli 70 kwosana na kĩthimo kya sekeli ya vala vandũ vatheu, na syelĩ syausũĩte mũtu mũvinyu ũvulanĩtwʼe na mauta kwondũ wa nthembo ya lĩu; 56 na kĩkombe kĩmwe kya thaavu kĩ na ũito wa sekeli 10 kyusũĩte ũvumba; 57 na kasalũ kamwe, ndũũme ĩmwe, na katũlũme kamwe ke mwakanĩ wako wa mbee kwondũ wa nthembo ya kũvĩvw’a; 58 na kavũli kamwe kwondũ wa nthembo ya naĩ; 59 na kwondũ wa nthembo ya ngwatanĩo, ngʼombe ilĩ, ndũũme itano, nthenge itano, na tũtũlũme tũtano, kĩla kamwe ke na mwaka ũmwe. Ĩsu nĩyo yaĩ nthembo ya Ngamalieli mwana wa Vetasuli.

60 Mũthenyanĩ wa kenda, mũnene wa ana ma Mbenyamini, ũla waĩ Avitani mwana wa Kiteoni, 61 nĩwaetie nthembo yake ya ĩsaani yĩmwe ya vetha yĩ na ũito wa sekeli 130 na mbakũli ĩmwe ya vetha yĩ na ũito wa sekeli 70 kwosana na kĩthimo kya sekeli ya vala vandũ vatheu, na syelĩ syausũĩte mũtu mũvinyu ũvulanĩtwʼe na mauta kwondũ wa nthembo ya lĩu; 62 na kĩkombe kĩmwe kya thaavu kĩ na ũito wa sekeli 10 kyusũĩte ũvumba; 63 na kasalũ kamwe, ndũũme ĩmwe, na katũlũme kamwe ke mwakanĩ wako wa mbee kwondũ wa nthembo ya kũvĩvw’a; 64 na kavũli kamwe kwondũ wa nthembo ya naĩ; 65 na kwondũ wa nthembo ya ngwatanĩo, ngʼombe ilĩ, ndũũme itano, nthenge itano, na tũtũlũme tũtano, kĩla kamwe ke na mwaka ũmwe. Ĩsu nĩyo yaĩ nthembo ya Avitani mwana wa Kiteoni.

66 Mũthenyanĩ wa ĩkũmi, mũnene wa ana ma Ndani, ũla waĩ Aieseli mwana wa Amisatai, 67 nĩwaetie nthembo yake ya ĩsaani yĩmwe ya vetha yĩ na ũito wa sekeli 130 na mbakũli ĩmwe ya vetha yĩ na ũito wa sekeli 70 kwosana na kĩthimo kya sekeli ya vala vandũ vatheu, na syelĩ syausũĩte mũtu mũvinyu ũvulanĩtwʼe na mauta kwondũ wa nthembo ya lĩu; 68 na kĩkombe kĩmwe kya thaavu kĩ na ũito wa sekeli 10 kyusũĩte ũvumba; 69 na kasalũ kamwe, ndũũme ĩmwe, na katũlũme kamwe ke mwakanĩ wako wa mbee kwondũ wa nthembo ya kũvĩvw’a; 70 na kavũli kamwe kwondũ wa nthembo ya naĩ; 71 na kwondũ wa nthembo ya ngwatanĩo, ngʼombe ilĩ, ndũũme itano, nthenge itano, na tũtũlũme tũtano, kĩla kamwe ke na mwaka ũmwe. Ĩsu nĩyo yaĩ nthembo ya Aieseli mwana wa Amisatai.

72 Mũthenyanĩ wa 11, mũnene wa ana ma Aseli, ũla waĩ Vakieli mwana wa Okalani, 73 nĩwaetie nthembo yake ya ĩsaani yĩmwe ya vetha yĩ na ũito wa sekeli 130 na mbakũli ĩmwe ya vetha yĩ na ũito wa sekeli 70 kwosana na kĩthimo kya sekeli ya vala vandũ vatheu, na syelĩ syausũĩte mũtu mũvinyu ũvulanĩtwʼe na mauta kwondũ wa nthembo ya lĩu; 74 na kĩkombe kĩmwe kya thaavu kĩ na ũito wa sekeli 10 kyusũĩte ũvumba; 75 na kasalũ kamwe, ndũũme ĩmwe, na katũlũme kamwe ke mwakanĩ wako wa mbee kwondũ wa nthembo ya kũvĩvw’a; 76 na kavũli kamwe kwondũ wa nthembo ya naĩ; 77 na kwondũ wa nthembo ya ngwatanĩo, ngʼombe ilĩ, ndũũme itano, nthenge itano, na tũtũlũme tũtano, kĩla kamwe ke na mwaka ũmwe. Ĩsu nĩyo yaĩ nthembo ya Vakieli mwana wa Okalani.

78 Mũthenyanĩ wa 12, mũnene wa ana ma Navitali, ũla waĩ Aila mwana wa Enani, 79 nĩwaetie nthembo yake ya ĩsaani yĩmwe ya vetha yĩ na ũito wa sekeli 130 na mbakũli ĩmwe ya vetha yĩ na ũito wa sekeli 70 kwosana na kĩthimo kya sekeli ya vala vandũ vatheu, na syelĩ syausũĩte mũtu mũvinyu ũvulanĩtwʼe na mauta kwondũ wa nthembo ya lĩu; 80 na kĩkombe kĩmwe kya thaavu kĩ na ũito wa sekeli 10 kyusũĩte ũvumba; 81 na kasalũ kamwe, ndũũme ĩmwe, na katũlũme kamwe ke mwakanĩ wako wa mbee kwondũ wa nthembo ya kũvĩvw’a; 82 na kavũli kamwe kwondũ wa nthembo ya naĩ; 83 na kwondũ wa nthembo ya ngwatanĩo, ngʼombe ilĩ, ndũũme itano, nthenge itano, na tũtũlũme tũtano, kĩla kamwe ke na mwaka ũmwe. Ĩsu nĩyo yaĩ nthembo ya Aila mwana wa Enani.

84 Ĩĩ nĩyo yaĩ nthembo ya kũvatha kĩthembeo kwondũ wa kũtũmĩwa ĩla yaetiwe nĩ anene ma Isilaeli ĩvinda yĩla kyetĩkĩiwʼe mauta: masaani 12 ma vetha, mbakũli 12 sya vetha, na ikombe 12 sya thaavu. 85 Kĩla ĩsaani ya vetha yaĩ na ũito wa sekeli 130 na kĩla mbakũli yaĩ na ũito wa sekeli 70; vetha wʼonthe wa mĩio ĩsu waĩ sekeli 2,400 kwosana na kĩthimo kya sekeli ya vala vandũ vatheu. 86 Kĩla kĩmwe kya ikombe isu 12 sya thaavu syusũĩte ũvumba kyaĩ na ũito wa sekeli 10 kwosana na kĩthimo kya sekeli ya vala vandũ vatheu; thaavu wʼonthe wa ikombe isu waĩ sekeli 120. 87 Ngʼombe syonthe ila syaetiwe kwondũ wa nthembo ya kũvĩvw’a syaĩ nzaũ 12, nasyo ndũũme syaĩ 12, tũtũlũme 12 kĩla kamwe ke na mwaka ũmwe vamwe na nthembo syatwʼo sya lĩu, na tũvũli 12 kwondũ wa nthembo ya naĩ; 88 na ngʼombe syonthe ila syaetiwe kwondũ wa nthembo ya ngwatanĩo syaĩ nzaũ 24, nasyo ndũũme syaĩ 60, nthenge 60, na tũtũlũme 60 kĩla kamwe ke ka mwaka ũmwe. Ĩsu nĩyo yaĩ nthembo ya kũvatha kĩthembeo kwondũ wa kũtũmĩwa ĩtina wa kwĩtĩkĩwʼa mauta.

89 Kĩla ĩvinda Mose walika ĩeemanĩ ya kũmbanĩa nĩ kana aneene na Ngai,* nĩweewʼaa wasya ũineena nake kuma ĩũlũ wa ngunĩko ya ĩsandũkũ ya Ũkũsĩ, kuma katĩkatĩ wa ala akelũvi elĩ; na Ngai nĩwaneenaa nake.

8 Na Yeova aneena na Mose, ayasya: 2 “Neena na Alũni na ũimwĩa atĩĩ: ‘Yĩla wakwatya ila taa mũonza syĩ kĩndũnĩ kya kwilĩĩla taa, syaĩlĩte kũmulĩka mbee wa kĩndũ kĩu kya kwilĩĩla taa.’” 3 Kwoou Alũni nĩweekie ũũ: Nĩwakwatisye taa isu nĩ kana imulĩke mbee wa kĩla kĩndũ kya kwilĩĩla taa, o tondũ Yeova wamwĩaĩe Mose. 4 Ũũ nĩw’o kĩla kĩndũ kya kwilĩĩla taa kyaseũvĩtw’e: Kyaseũvĩtwʼe na thaavu mũtue; kuma mũthambanĩ wakyo nginya malaanĩ makyo, kyaseũvĩtw’e na nyũndo. Kĩndũ kĩu kya kwilĩĩla taa kyaseũvĩtw’e o ũndũ Yeova woonetye Mose woninĩ.

5 Na Yeova aneena ĩngĩ na Mose, ayasya: 6 “Osa Alivai kuma katĩ wa Aisilaeli, na ũimathesya. 7 Ũũ nĩw’o ũũmathesya: Maminzangĩsye kĩw’ũ kya kũthesya naĩ, na no nginya menze nzw’ĩĩ sya mwĩĩ woo w’onthe na wenzi, na maivũa ngũa syoo, na mayĩthesya. 8 Ĩtina wa ũu, maĩle kwosa kasalũ vamwe na nthembo yako ya lĩu ya mũtu mũvinyu ũvulanĩtwʼe na mauta, na ũyosa kasalũ kangĩ kwondũ wa nthembo ya naĩ. 9 Na no nginya ũete Alivai mbee wa ĩeema ya kũmbanĩa na ũyũmbanyʼa ũmbano w’onthe wa Aisilaeli. 10 Yĩla ũkũete Alivai mbee wa Yeova, Aisilaeli maĩlĩte kwilĩĩla moko moo ĩũlũ wa Alivai. 11 Na no nginya Alũni anengane* Alivai mbee wa Yeova ta nthembo ya kũvyũlwʼa kuma kwa Aisilaeli, namo makamũthũkũmaa Yeova.

12 “Ĩtina wa ũu, no nginya Alivai mailĩĩle moko moo ĩũlũ wa mĩtwe ya tũsalũ tũu, na ĩndĩ kasalũ kamwe kayumĩwʼa Yeova ta nthembo ya naĩ na kasalũ kala kangĩ ta nthembo ya kũvĩvw’a nĩ kana Alivai mewʼanĩthwʼe na Ngai. 13 Wamina kwĩka ũu, ũngamya Alivai mbee wa Alũni na ana make na ũimanengane* ta nthembo ya kũvyũlwʼa kwa Yeova. 14 No nginya ũvathe Alivai kuma kwa Aisilaeli, na Alivai makeethĩawa makwa. 15 Ĩtina wa maũndũ asu, Alivai nĩmekwambĩĩa ũthũkũmi woo ũla ũkonanĩtye na ĩeema ya kũmbanĩa. Ũu nĩwʼo ũũmathesya na ũimanengane* ta nthembo ya kũvyũlwʼa. 16 Nũndũ nĩmo ala manenganĩtwe, na nĩnengetwe mo kuma kwa Aisilaeli. Nĩngũmosa methĩwe makwa vandũ va kĩla mwana mũkũũ wa* Aisilaeli. 17 Nĩkwĩthĩwa makithathi onthe* ma Aisilaeli nĩ makwa, methĩwe nĩ andũ kana nĩ nyamũ. Nĩnamatheisye kwondũ wakwa mũthenya ũla nooaie makithathi onthe* nthĩ ya Misili. 18 Nĩngwosa Alivai vandũ va kĩla mwana mũkũũ wa Aisilaeli. 19 Nĩngũnengane Alivai kwa Alũni na ana make ta ala manenganĩtwe kuma kwa Aisilaeli, meanĩasye ũthũkũmi woo ĩeemanĩ ya kũmbanĩa kwondũ wa Aisilaeli na mayĩwʼanĩthya Aisilaeli na Ngai, nĩ kana vaikethĩwe na ũkũno katĩ wa Aisilaeli nũndũ wa andũ ma Isilaeli kũthengeea vala vandũ vatheu.”

20 Na ĩndĩ Mose na Alũni na ũmbano wʼonthe wa Aisilaeli meeka Alivai maũndũ asu. Aisilaeli nĩmamekie kwosana na kyonthe kĩla Yeova wamwĩaĩe Mose ĩũlũ wa Alivai. 21 Kwoou Alivai nĩmeetheisye na mavũa ngũa syoo, na ĩtina wa kwĩka ũu, Alũni amanengane* ta nthembo ya kũvyũlwʼa mbee wa Yeova. Na ĩndĩ Alũni amewʼanĩthya na Ngai nĩ kana amathesye. 22 Ĩtina wa ũu, Alivai nĩmaendie ĩeemanĩ ya kũmbanĩa nĩ kana meanĩsye ũthũkũmi woo me mbee wa Alũni na ana make. O ũndũ Yeova weeaĩe Mose ĩũlũ wa Alivai, nowʼo meekanie namo.

23 Nĩvo ĩndĩ Yeova waneenie na Mose, ayasya: 24 “Ũndũ ũũ ũkonetye Alivai: Mũndũũme ũla wĩ na myaka 25 kwambata, akalikaa nguthunĩ ya ala mathũkũmaa ĩeemanĩ ya kũmbanĩa. 25 Ĩndĩ avĩtũkya myaka 50, akathũmũĩaa wĩa ũsu na ndakaendeeaa kũthũkũma vau. 26 Akeethĩawa atonya kũthũkũma ana-a-asa make ala maendeee kwĩanĩsya ianda syoo ĩeemanĩ ya kũmbanĩa, ĩndĩ ndaĩlĩte o na vanini kũaĩwa wĩa vau. Ũu nĩwʼo waĩlĩte kwĩkana na Alivai na ianda syoo.

9 Yeova nĩwaneenie na Mose weũnĩ wa Sinaĩ mweinĩ wa mbee wa mwaka wa kelĩ ĩtina wa mauma nthĩ ya Misili, ayasya: 2 “Aisilaeli maĩlĩte kũseũvya nthembo ya Vasaka ĩvindanĩ yĩla yĩnyuvĩtwe. 3 Mũthenyanĩ wa 14 wa mwei ũũ ĩ ya wĩoo,* nĩmwaĩlĩte kũmĩseũvya ĩvindanĩ yayo yĩla yĩnyuvĩtwe. Mwaĩlĩte kũmĩseũvya mũatĩĩe mĩao yonthe na mĩtalatala yonthe ĩla ĩtwʼĩtwe kwondũ wayo.”

4 Na kwoou Mose eea Aisilaeli maseũvye nthembo ya Vasaka. 5 Na maseũvya nthembo ya Vasaka mweinĩ wa mbee, mũthenyanĩ wa 14 wa mwei ũsu ĩ ya wĩoo,* me weũnĩ wa Sinaĩ. Kyonthe kĩla Yeova wamwĩaĩe Mose, nĩkyo Aisilaeli meekie.

6 Yu ĩndĩ, vaĩ aũme meevukĩtye nũndũ wa kũkiita mwĩĩ mũkwʼũ, na nũndũ wa ũu, mayaĩ matonya kũseũvya nthembo ya Vasaka mũthenya ũsu. Kwoou aũme asu nĩmaendie mbee wa Mose na Alũni mũthenya ũsu 7 na mamwĩa: “Twĩ avuku nũndũ wa kũkiita mwĩĩ mũkwʼũ. Nĩkĩ tũtamũthembea Yeova nthembo ĩsu ĩvindanĩ yĩla yĩnyuvĩtwe vamwe na Aisilaeli ala angĩ?” 8 Na ĩndĩ Mose eewʼa ũu amea: “Eteelai vaa, na ekai nĩwʼe mwĩao ũla Yeova ũkũnengane kwondũ wenyu.”

9 Nĩvo ĩndĩ Yeova wamwĩie Mose: 10 “Neena na Aisilaeli na ũimea, ‘Ethĩwa mũndũ o na wĩva katĩ wenyu kana wa nzyawa syenyu ila ikoka ĩtina wenyu nĩweevukya nũndũ wa kũkiita mwĩĩ mũkwʼũ kana nĩwathi kyalo vandũ vaasa, no nginya o nake aseũvĩsye Yeova nthembo ya Vasaka. 11 Maĩlĩte kũmĩseũvya mweinĩ wa kelĩ, mũthenyanĩ wa 14 ĩ ya wĩoo.* Maĩlĩte kũmĩya vamwe na mũkate ũte ĩlawa na nyũnyi syĩ ũũ. 12 Mayaĩlĩte o na vanini kũtialya kĩndũ o na kĩmwe kya nthembo ĩsu kĩkale nginya kwakya, na mayaĩlĩte kũtũla ĩvĩndĩ yayo o na yĩmwe. Maĩlĩte kũmĩseũvya maatĩĩe motwʼĩo onthe ala matwʼĩtwe kwondũ wa Vasaka. 13 Ĩndĩ ethĩwa mũndũ anaĩ mũtheu kana anaendete kyalo na avũthĩĩsya kũseũvya nthembo ya Vasaka, mũndũ ũsu no nginya avetangwe* katĩ wa andũ make, nũndũ ndaneemũthembea Yeova nthembo ĩvindanĩ yĩla yĩnyuvĩtwe. Mũndũ ũsu akasũngĩa kwondũ wa naĩ yake.

14 “‘Na ethĩwa ve mwĩkali wa ũeninĩ ũtwĩe katĩ wenyu, o nake nĩwaĩlĩte kũmũseũvĩsya Yeova nthembo ya Vasaka. Aĩlĩte kwĩka ũu aatĩĩe ũtwʼĩo ũla ũtwʼĩtwe kwondũ wa Vasaka na mũtalatala wayo. Ũtwʼĩo no ũmwe kwondũ wenyu na kwondũ wa mwĩkali wa ũeninĩ.’”

15 Yu ĩndĩ, mũthenyanĩ ũla ĩeema ya ũthaithi yaminie kwambwa, ĩtu nĩyavwʼĩkie ĩeema yĩu, nayo nĩ ĩeema ya Ũkũsĩ, ĩndĩ ĩ ya wĩoo kĩndũ kĩilye ta mwaki nĩkyekalile ĩũlũ wa ĩeema yĩu nginya kwakya. 16 Kĩu nĩkyo kyaendeeie kwĩkĩka: Ĩtu yĩu nĩyavwʼĩkaa ĩeema yĩu mũthenya, na ũtukũ nĩyaakakaa ta mwaki. 17 Kĩla ĩvinda ĩtu yĩu yookĩla ĩeemanĩ yĩu, Aisilaeli nĩmoombũũkaa vau kwa vau, na vala ĩtu yĩu yekala, vau nĩ vo Aisilaeli mambaa maeema. 18 Kwosana na mwĩao wa Yeova Aisilaeli nĩmoombũũkaa, na kwosana na mwĩao wa Yeova nĩmambaa maeema. Na maendeeaa kwĩkala vau mambĩte maeema ĩvinda yonthe ĩtu yĩu yekala ĩũlũ wa ĩeema ya ũthaithi. 19 Ĩvinda yĩla ĩtu yĩu yekala ĩũlũ wa ĩeema ya ũthaithi mĩthenya mingĩ, Aisilaeli nĩmamwĩwʼaa Yeova na mayoombũũkaa. 20 Mavinda amwe ĩtu yĩu yekalaa o mĩthenya mĩnini ĩũlũ wa ĩeema ya ũthaithi. Kwosana na mwĩao wa Yeova nĩmaendeeaa kwĩkala vau mambĩte maeema, na kwosana na mwĩao wa Yeova nĩmoombũũkaa. 21 Ĩndĩ mavinda amwe ĩtu yĩu yekalaa o kuma ĩ ya wĩoo nginya kwakya, na yookĩla kwakya, nĩmoombũũkaa. Ĩtu yĩu yĩthĩwe yookĩla mũthenya kana nĩ ũtukũ, nĩmoombũũkaa. 22 Ĩvinda yonthe ĩtu yĩu yekala ĩũlũ wa ĩeema ya ũthaithi, yĩthĩwe nĩ mĩthenya ĩlĩ, mwei ũmwe, kana o mbeange, Aisilaeli nĩmaendeeaa kwĩkala vau mambĩte maeema na mayoombũũkaa. Ĩndĩ yĩla ĩtu yĩu yookĩla, nĩwʼo moombũũkaa. 23 Kwosana na mwĩao wa Yeova nĩmambaa maeema, na kwosana na mwĩao wa Yeova nĩmoombũũkaa. Nĩmaendeeie kũmwĩwʼa Yeova kwosana na mwĩao wa Yeova o tondũ wamwĩaĩe Mose.

10 Nĩvo ĩndĩ Yeova weeie Mose: 2 “Ĩseũvĩsye masoo elĩ; maseũvye na vetha mũtue, na ũkamatũmĩaa kũmbanyʼa ũmbano na kũmbũũkya kambi. 3 Yĩla masoo asu elĩ mavuvwa, no nginya ũmbano wʼonthe ũmbanawʼe mbee waku mũomonĩ wa ĩeema ya kũmbanĩa. 4 Ethĩwa soo ũmwe nĩwʼo wavuvwa, no anene me oka, ala aũngamĩi ma makili ma Isilaeli, makombanawʼa mbee waku.

5 “Yĩla mwavuva soo na wasya ũũvĩndũkanga, ala mambĩte kambi ngalĩko ya wumĩlonĩ wa sua makoombũũkaa. 6 Yĩla mwavuva wasya ũũvĩndũkanga ĩvinda ya kelĩ, ala mambĩte kambi ngalĩko ya ĩtheo makoombũũkaa. No nginya mũvuvae masoo na wasya ũsu kĩla ĩvinda kĩkundi kĩmwe kya mbaĩ kĩkũmbũũka.

7 “Yĩla mũkũmbanyʼa ũmbano vamwe, mũkavuvaa masoo, ĩndĩ mate na wasya ũũvĩndũkanga. 8 Ana ma Alũni, ala athembi, maĩlĩte kũvuvaa masoo, na kũvuvwa kwamo kũkeethĩawa ta ũtw’ĩo ĩvinda yonthe kwondũ wenyu nzyawanĩ syenyu syonthe.

9 “Yĩla mwatwʼa kũkita na mũmaitha ũkũmũthĩnyʼa mwĩ nthĩ yenyu, mwaĩlĩte kũvuva wasya wa kaũ masoonĩ menyu, na Yeova Ngai wenyu akamũlilikana na aimũtangĩĩa kuma kwa amaitha menyu.

10 “O na ĩngĩ, mavindanĩ menyu ma kũtana, yĩla mwĩ na mboka syenyu na mwambĩĩonĩ wa myei yenyu, mũkavuvaa masoo asu ĩũlũ wa nthembo syenyu sya kũvĩvw’a na nthembo syenyu sya ngwatanĩo; ikatumaa mũlilikanwa mbee wa Ngai wenyu. Ninyie Yeova Ngai wenyu.”

11 Yu ĩndĩ, mwakanĩ wa kelĩ, mweinĩ wa kelĩ, mũthenyanĩ wa 20 wa mwei, yĩla ĩtu nĩyookĩlile ĩũlũ wa ĩeema ya ũthaithi ya ũla Ũkũsĩ. 12 Na ĩndĩ Aisilaeli makũsya kuma weũnĩ wa Sinaĩ kwosana na ũndũ meeĩaĩtwe mombũũkae, na ĩtu yĩu yaũngamĩla weũnĩ wa Valani. 13 Yĩĩ nĩyo yaĩ ĩvinda ya mbee kũmbũũka kwosana na mwĩao wa Yeova o tondũ wamwĩaĩe Mose.

14 Na kwoou kĩkundi kya mbaĩ itatũ kya kambi ya ana ma Yuta nĩkyo kyaĩ kya mbee kũmbũũka kwosana na nguthu syakyo,* na Nasoni mwana wa Aminatavu nĩwe waũngamĩe nguthu ĩsu. 15 Nguthu ya mbaĩ ya ana ma Isakali yaũngamĩwe nĩ Nethaneli mwana wa Nzuali. 16 Nguthu ya mbaĩ ya ana ma Nzevuluni yaũngamĩwe nĩ Eliavu mwana wa Eeloni.

17 Yĩla ĩeema ya ũthaithi yathaiwʼe, ana ma Ngelisoni na ana ma Melali, ala makuaa ĩeema ya ũthaithi, nĩmoombũũkie.

18 Ĩtina wa ũu, kĩkundi kya mbaĩ itatũ kya kambi ya Leũveni nĩkyoombũũkie kwosana na nguthu syakyo,* na Elisuli mwana wa Seteuli nĩwe waũngamĩe nguthu ĩsu. 19 Nguthu ya mbaĩ ya ana ma Simeoni yaũngamĩwe nĩ Selumieli mwana wa Nzulisatai. 20 Nguthu ya mbaĩ ya ana ma Ngati yaũngamĩwe nĩ Eliasavu mwana wa Ndeueli.

21 Ĩtina wa ũu, Akoathi, ala makuaa syĩndũ sya vala vandũ vatheu, nĩmoombũũkie. Na ĩeema ya ũthaithi yaaĩlĩte kwambwa maitwʼĩka nĩmavika.

22 Ĩtina wa ũu, kĩkundi kya mbaĩ itatũ kya kambi ya ana ma Evilaimu nĩkyoombũũkie kwosana na nguthu syakyo,* na Elisama mwana wa Amiuti nĩwe waũngamĩe nguthu ĩsu. 23 Nguthu ya mbaĩ ya ana ma Manase yaũngamĩwe nĩ Ngamalieli mwana wa Vetasuli. 24 Nguthu ya mbaĩ ya ana ma Mbenyamini yaũngamĩwe nĩ Avitani mwana wa Kiteoni.

25 Ĩtina wa ũu, kĩkundi kya mbaĩ itatũ kya kambi ya ana ma Ndani nĩkyoombũũkie kwosana na nguthu syakyo,* na nĩkyo kyaseseee kambi ila ingĩ syonthe kuma ngalĩko ya ĩtina, na Aieseli mwana wa Amisatai nĩwe waũngamĩe nguthu ĩsu. 26 Nguthu ya mbaĩ ya ana ma Aseli yaũngamĩwe nĩ Vakieli mwana wa Okalani. 27 Nguthu ya mbaĩ ya ana ma Navitali yaũngamĩwe nĩ Aila mwana wa Enani. 28 Ũsu nĩwʼo mũvango ũla waatĩĩawa nĩ Aisilaeli na nguthu syoo* yĩla mekũmbũũka.

29 Nĩvo ĩndĩ Mose waneenie na Ovavu mwana wa Leueli,* ũla waĩ Mũmitiani na mũthoni wake, na amwĩa atĩĩ: “Yu twĩenda kũkũsya tũthi nthĩ ĩla Yeova watwĩie, ‘Ngamũnenga yo.’ Endanyʼa naitũ, na tũkekalanasya naku nesa, nũndũ Yeova nĩwathanĩte maũndũ maseo kwondũ wa Isilaeli.” 30 Ĩndĩ amwĩa: “Ndiendanyʼa nenyu. Nĩsyoka nthĩ yakwa na kwa andũ makwa ma mũsyĩ.” 31 Nake Mose amwĩa: “Nĩngũkwĩsũva, ndũkatũtie, nũndũ nue wĩsĩ vala twaĩle kwamba kambi weũnĩ, na nue ũtonya kũtwonyʼa vala twaĩle kwĩsĩla.* 32 Na waendanyʼa naitũ, ũseo o na wĩva ũla Yeova ũkatwonasya, vate ndĩi o naku tũkakwonasya.”

33 Kwoou nĩmoombũũkie me nguthu kuma kĩĩmanĩ kya Yeova na mathi kyalo kya mĩthenya ĩtatũ, na ĩsandũkũ ya ũtianĩo wa Yeova yakuĩtwe mbee woo kwa mĩthenya ĩtatũ nginya yĩla vandũ va kũthũmũa voonekie kwondũ woo. 34 Na yĩla mombũũka, ĩtu ya Yeova yeethĩawa ĩũlũ woo mũthenya.

35 Kĩla ĩvinda yĩla Ĩsandũkũ yĩũthamwʼa, Mose aasya: “Ũkĩla, ame Yeova, na amaitha maku nĩmanyaĩĩkwʼe, na eka ala maũmenaa masembe maũkĩĩte.” 36 Na yĩla yathũmũwʼa, aasya: “Syoka, ame Yeova, vala ve makili matatalĩka ma Isilaeli.”

11 Yu ĩndĩ, andũ nĩmambĩĩie kũmũnyungunyĩĩsya Yeova me na woo. Yĩla Yeova weewie mainyungunyĩsya nĩwathilĩkile, na mwaki kuma kwa Yeova wamakanĩa na woaa amwe maĩ ũtee wa kambi. 2 Na yĩla andũ mambĩĩie kũmũĩĩa Mose, nĩwamũvoyie Yeova na kĩthingʼĩĩsyo, na mwaki ũsu wavoa. 3 Nũndũ wa ũu, vandũ vau veetiwe Tavela,* nũndũ mwaki kuma kwa Yeova nĩwamakanĩie.

4 Nĩvo ĩndĩ nguthu ya andũ ma kĩla mũthemba* ala maĩ katĩ woo yambĩĩie kwonanyʼa ĩtomo ya lĩu, na Aisilaeli o namo mambĩĩa kũĩa ĩngĩ, mayasya: “Nũũ ũla ũkũtũnenga nyama tũye? 5 Mwa twĩĩliĩla mũno makũyũ ala twaĩsaa mana Misili, vamwe na mongũ, matikitiki, itũngũũ sya liki, itũngũũ, na itũngũũ saumu! 6 Ĩndĩ yu tũendeee kwonzea vaa. Na vai kĩndũ kĩngĩ twonaa eka mana ĩno.”

7 Yu ĩndĩ, mana yailye ta ngii sya ndania, na langi wayo wailye ta wa kĩthana kĩla kĩtawa vetoliumu. 8 Andũ nĩmaendaa kũũ na kũũ makamĩkolanyʼa na ĩndĩ maimĩthia na moko matũmĩĩte ĩvia kana maimĩkima na ndĩĩ. Ĩtina wa ũu, mamĩtheũkĩasya mbisũnĩ kana makaseũvya mĩkate ya kĩlinge nayo, na yasamaa ta mũkate wĩ mũyo ũuĩtwe na mauta. 9 Yĩla ĩmwe yatheea kambinĩ ũtukũ, o nayo mana nĩyatheeaa ĩũlũ wayo.

10 Na Mose eewʼa andũ maiĩa, mũsyĩ ũmwe kũthi ũla ũngĩ, kĩla ũmwe e mũomonĩ wa ĩeema yake. Na Yeova athata mũno, na Mose o nake nĩweewie woo mũno. 11 Na ĩndĩ Mose amwĩa Yeova: “Nĩkĩ ũnengete mũthũkũmi waku thĩna? Nĩkĩ ndonete ũseo methonĩ maku, nĩ kana ũmbaĩkye mũio wa andũ aa onthe? 12 Nyie nĩnaitavie andũ aa onthe? Ninyie namasyaie nĩ kana ũmbĩe, ‘Makue kĩthũinĩ kyaku, o tondũ mũthũkũmi* ũkuaa kana kekwonga,’ nginya nthĩ ĩla weevĩtie kũnenga aa-ũmae moo? 13 Nyie nĩumya va nyama sya kũnenga andũ aa onthe? Nũndũ metindĩa kũndĩĩa, maimbĩa, ‘Tũnenge nyama tũye!’ 14 Nditonya kũkua andũ aa onthe nĩ nyioka; nĩĩwʼa ũndũ ũũ wĩ mũito mũno. 15 Ethĩwa ũũ nĩwʼo ũkwĩkana nakwa, nĩngũkwĩsũva, mbũae yu. Ethĩwa nĩnonete ũseo methonĩ maku, ndũkandeke none thĩna ũngĩ.”

16 Na Yeova amũsũngĩa Mose amwĩa: “Mbũmbanĩsye aũme 70 kuma katĩ wa atumĩa ma Isilaeli, aũme wĩsĩ nĩ atumĩa na anene ma andũ, na ũimatwaa ĩeemanĩ ya kũmbanĩa, na ũimeaĩa maũngame vau vamwe naku. 17 Nĩngũtheea nĩ kana nĩneene naku wĩ vau, na nĩngwosa kĩlungu kya veva ũla wĩ ĩũlũ waku na ndimailĩĩla, na makaũtetheeasya kũkua mũio wa andũ aa nĩ kana ũeke kũũkua wĩ weka. 18 Naku neena na andũ ũmatavye atĩĩ: ‘Ĩthesyei kwondũ wa ũnĩ, nũndũ vate ndĩi mũkaya nyama, nĩkwĩthĩwa Yeova nĩwĩwʼĩte mũiĩa, mũyasya: “Nũũ ũla ũkũtũnenga nyama tũye? Nĩ kavaa yĩla twaĩ Misili.” Vate ndĩi Yeova nũkũmũnenga nyama, na mũkamĩya. 19 Mũkamĩya, na mũikaya o mũthenya ũmwe kana mĩthenya 2 kana mĩthenya 5 kana mĩthenya 10 kana mĩthenya 20, 20 ĩndĩ mũkamĩya mwei mũima, nginya yumĩlĩĩle manyiũũnĩ menyu na nginya mũmĩmene, nũndũ nĩmũmũleete Yeova, ũla wĩ katĩkatĩ wenyu, na nĩmũmũĩĩe, mũyasya: “Nĩkĩ twaumie Misili?”’”

21 Na ĩndĩ Mose asya: “Andũ ala me katĩ woo nĩ aũme 600,000 ala maendaa na maaũ, na yu we mwene wĩasya, ‘Nĩngũmanenga nyama, na nĩmanenga ĩmatoetye kũya mwei mũimaʼ! 22 O na ndĩthya nima ikatwʼĩka niũthĩnzwa, no imeanyʼe? Kana makũyũ onthe ma ũkanganĩ makatwʼĩka nĩmeũkwatwʼa, no mameanyʼe?”

23 Na ĩndĩ Yeova eea Mose: “Kw’o kw’oko kwa Yeova nĩ kũkuvĩ? Yu nũkwĩyonea ethĩwa kĩla nĩwetete nĩkĩkwĩanĩa kana kĩianĩa.”

24 Na kwoou Mose aumaala na atavya andũ ndeto sya Yeova. Na oombanyʼa aũme 70 kuma katĩ wa atumĩa ma andũ na ameaĩa maũngame mathyũlũlũkĩte ĩeema. 25 Na Yeova atheea na ĩtu na aneena nake na oosa kĩlungu kĩmwe kya veva ũla waĩ ĩũlũ wake na awilĩĩla ĩũlũ wa kĩla ũmwe wa ala atumĩa 70. Na yĩla mausũiwe nĩ veva ũsu, mambĩĩa kwĩka ta athani,* ĩndĩ mayaasyoka kwĩka ũu ĩngĩ.

26 Yu vaĩ aũme elĩ maĩ o kambinĩ. Aũme asu meetawa Elitati na Metati. Na veva ũsu nĩwambĩĩie kwĩthĩwa ĩũlũ woo, nũndũ maĩ katĩ wa andũ ala masyĩtwa moo maandĩkiwe, ĩndĩ mayaathi ĩeemanĩ. Na kwoou mambĩĩa kwĩka ta athani me o ku kambinĩ. 27 Nĩvo ĩndĩ mwanake ũmwe wasembie na amwĩa Mose atĩĩ: “Elitati na Metati meĩka ta athani me kambinĩ!” 28 Na ĩndĩ Yosua mwana wa Nuni, ũla waĩ mũthũkũmi wa Mose kuma e wa mũika, asya: “Mwĩai wakwa Mose, masiĩĩe!” 29 Ĩndĩ Mose amwĩa: “Wĩĩwʼa kĩwĩu nũndũ wakwa? Ndũkatate, ta keka andũ onthe ma Yeova nĩmatwʼĩka athani na ta keka Yeova nĩwilĩĩla veva wake ĩũlũ woo!” 30 Ĩtina, Mose nĩwasyokie kambinĩ e vamwe na atumĩa asu ma Isilaeli.

31 Nĩvo ĩndĩ Yeova waumĩlilye kĩseve na kyambĩĩa kũsukuma ngwae kuma ũkanganĩ na kyatuma ivalũka ithyũlũlũkĩte kambi, ta mũendo wa mũthenya ũmwe ngalĩ ĩno na mũendo wa mũthenya ũmwe ngalĩ ĩla ĩngĩ, kũthyũlũlũka kambi yonthe, na syoombĩanĩa ũtũlu wa mĩkono ta ĩlĩ* kuma nthĩ. 32 Kwoou mũthenya ũsu wʼonthe na ũtukũ wʼonthe na mũthenya ũla waatĩĩe wʼonthe, andũ nĩmaendeeie kũmbanyʼa ngwae mate kũeka. Vai ũmwe woo waaũmbanyʼa kĩthimo kĩ ĩtheo wa komeli ĩkũmi,* na maendeeie kũinyaĩĩkĩsya nthĩ kũthyũlũlũka kambi yonthe kwondũ woo ene. 33 Ĩndĩ nyama isu syakililye syĩ o katĩkatĩ wa maeo moo, o na matanamba kũitanyuka, ũthatu wa Yeova wamakanĩa na Yeova ambĩĩa kũmakũna na ũthĩny’o mũnene wa kũaa.

34 Na kwoou meeta vandũ vau Kivilothi-ataava,* nũndũ vau nĩ vo mathikie andũ ala moonanisye ĩtomo ya lĩu. 35 Kuma Kivilothi-ataava andũ nĩmoombũũkie nĩ kana mathi Aselothi, na mekala Aselothi.

12 Ĩvinda yĩmwe Miliamu na Alũni nĩmambĩĩie kũmũneenea Mose naĩ nũndũ wa mũndũ mũka Mũkusi ũla watwaĩte, nĩkwĩthĩwa atwaĩte mũndũ mũka Mũkusi. 2 Na maasya: “We Yeova aneenete kwĩsĩla Mose e weka? Ndaneenete o na kwĩsĩla vala tũĩ?” Na Yeova nĩweethukĩĩsye. 3 Yu Mose nĩwe waĩ mũndũ ũla mũuu vyũ katĩ wa* andũ onthe ĩũlũ wa nthĩ.

4 Na vau kwa vau Yeova eea Mose na Alũni na Miliamu atĩĩ: “Endai, mwĩ atatũ, ĩeemanĩ ya kũmbanĩa.” Na me atatũ mathi vo. 5 Na Yeova atheea na kĩtuĩ kya ĩtu na aũngama mũomonĩ wa yĩla ĩeema na eeta Alũni na Miliamu. Na elĩ mathengeea. 6 Na ĩndĩ asya: “Nĩngũmwĩsũva, ĩthukĩĩsyei ndeto syakwa. Ta kethĩwa ve mwathani wa Yeova katĩ wenyu, nĩmanyĩthanyʼa kwake woninĩ, na nĩneena nake ndotonĩ. 7 Ĩndĩ ũu tiwʼo vailye na mũthũkũmi wakwa Mose! Nyũmba yakwa yonthe yĩ mokonĩ make.* 8 Nĩneenaa nake ũthyũ kwa ũthyũ,* na ndũmĩaa ndeto syĩ ũtheinĩ, ĩndĩ ti nthimo; na nĩwonaa mũvwʼano wa Yeova. Kwoou nĩkĩ ĩndĩ mũtaneekĩa kũneenea mũthũkũmi wakwa Mose naĩ?”

9 Na ũthatu wa Yeova wamakanĩa, na auma vala maĩ. 10 Na ĩtu yeeveta ĩũlũ wa yĩla ĩeema, na sisya! Miliamu nĩwakũnĩtwe na mangũ meũ ta ĩa. Na yĩla Alũni wavĩndũkie asisye Miliamu, nĩwoonie kana aĩ anakũnwa na mangũ. 11 Na ndatĩkanĩ ĩsu Alũni eea Mose: “Nĩngũkwĩsũva, mwĩai wakwa! Ame, ndũkatũkanyʼe nũndũ wa naĩ ĩno! Ũndũ ũũ twĩkĩte nĩ wa ũtumanu. 12 Nĩngũkwĩsũva, ndũkaeke aendeee kwĩkala ta mũndũ mũkw’ũ, ũla woete mwĩĩ nusu aisyawa!” 13 Na Mose ambĩĩa kũmwĩkaĩla Yeova, ayasya: “Ame Ngai, nĩngũkwĩsũva ũmũvosye! Mwa nĩngũkwĩsũva!”

14 Ĩndĩ Yeova amũsũngĩa Mose amwĩa: “Ĩthe akamũtwʼĩla mata ũthyũnĩ wake, we ndekĩĩthwʼa nthoni mĩthenya mũonza? Eka avathwe mĩthenya mũonza nza wa kambi, na ĩtina wa ũu, no atũngwe kambinĩ.” 15 Na kwoou Miliamu nĩwavathiwe nza wa kambi mĩthenya mũonza, na andũ mayaaũmbũũka nginya yĩla Miliamu watũngiwe kambinĩ. 16 Ĩtina wa ũu, andũ nĩmoombũũkie mauma Aselothi na mambĩĩa kwamba kambi weũnĩ wa Valani.

13 Na Yeova aneena na Mose, ayasya: 2 “Tũma aũme makathiane nthĩ ya Kanaanĩ,* ĩla ngũnenga Aisilaeli. Wĩtũma mũndũũme ũmwe kuma kĩla mbaĩnĩ ya aa-ĩthe make, na aĩle kwĩthĩwa e mũnene katĩ woo.”

3 Na kwoou Mose amatũma kuma weũnĩ wa Valani kwosana na mwĩao wa Yeova. Aũme asu onthe maĩ aũngamĩi ma Aisilaeli. 4 Aa nĩmo masyĩtwa moo: kuma mbaĩnĩ ya Leũveni, Samua mwana wa Nzakuli; 5 kuma mbaĩnĩ ya Simeoni, Savati mwana wa Oli; 6 kuma mbaĩnĩ ya Yuta, Kalevu mwana wa Yevune; 7 kuma mbaĩnĩ ya Isakali, Ikali mwana wa Yosevu; 8 kuma mbaĩnĩ ya Evilaimu, Osiea mwana wa Nuni; 9 kuma mbaĩnĩ ya Mbenyamini, Valiti mwana wa Lavu; 10 kuma mbaĩnĩ ya Nzevuluni, Ngatieli mwana wa Soti; 11 kuma mbaĩnĩ ya Yosevu, kwondũ wa mbaĩ ya Manase, Ngatiti mwana wa Susi; 12 kuma mbaĩnĩ ya Ndani, Amieli mwana wa Ngemali; 13 kuma mbaĩnĩ ya Aseli, Sethuli mwana wa Mikaeli; 14 kuma mbaĩnĩ ya Navitali, Navi mwana wa Vovisi; 15 kuma mbaĩnĩ ya Ngati, Ngeueli mwana wa Maki. 16 Asu nĩmo masyĩtwa ma aũme ala Mose watũmie makathiane nthĩ ĩsu. Na Mose atw’ĩĩa Osiea mwana wa Nuni ĩsyĩtwa Yosua.*

17 Na Mose aimatũma makathiane nthĩ ya Kanaanĩ, amea: “Ambatai kũu Nekevu, na ĩndĩ mũyambata kĩsionĩ kĩla kĩ iĩma. 18 Nenyu no nginya mũsisye ũndũ nthĩ ĩsu ĩilye na mũisisya ethĩwa andũ ala matwĩe nthĩ ĩsu me vinya kana nĩ onzu, nĩ aingĩ kana nĩ anini, 19 na ethĩwa nthĩ ĩsu nĩ nzeo kana nĩ nthũku na ethĩwa ndũa sya andũ asu nĩ kambi syĩ ũtheinĩ kana nĩ ngome syĩ vinya. 20 Na sisyai ethĩwa nthĩ ĩsu nĩ nou* kana nĩ mosu* na ethĩwa yĩ na mĩtĩ kana ndĩ nayo. Na no nginya mwĩthĩwe na ũkũmbaũ na mũyosa ũsyao ũmwe wa nthĩ ĩsu.” Yu ĩndĩ, yĩu yaĩ ĩvindanĩ yĩla nzavivũ sya mbee syeew’aa.

21 Kwoou nĩmambatie na mathiana nthĩ ĩsu kuma weũnĩ wa Nzini nginya Leovu, vakuvĩ na Levo-amathi.* 22 Yĩla mambatie Nekevu, nĩmaendie nginya mavika Eviloni, kũla kwatwĩe Aimani, Sesai, na Talimai, ala maĩ nzyawa sya Anaki. Ĩvindanĩ yĩu, ndũa ya Eviloni yaĩ yaakiwe myaka mũonza mbee wa ndũa ya Nzoani ya Misili. 23 Yĩla mavikie Mwandanĩ wa* Esikoli, nĩmatemie ũvonge waĩ na kĩkata kya nzavivũ kyaĩ kĩnene ũkethĩa no kĩkuawa nĩ aũme elĩ matũmĩĩte mũamba, na o vamwe na nzavivũ isu nĩmakuie matunda kauta ma makũngũmanga na makũyũ. 24 Meetie vandũ vau Mwanda wa* Esikoli* nũndũ wa kĩkata kĩla Aisilaeli matemie vau.

25 Mĩthenya 40 nĩyavĩtie, na aũme asu masyoka ĩtina wa kũthiana nthĩ ĩsu. 26 Na kwoou masyoka vala ve Mose na Alũni na ũmbano wʼonthe wa Isilaeli weũnĩ wa Valani, kũu Katesi. Na maelesya ũmbano wʼonthe maũndũ ala meeyoneete me nthĩ ĩsu na mamonyʼa ũsyao wayo. 27 Ũũ nĩwʼo matavisye Mose: “Nĩtũnalikile nthĩ ĩla ũnatũtũmĩte, na nĩ wʼo, yusũĩte ĩia na ũkĩ wa nzũkĩ, na ũũ nĩwʼo ũsyao wayo. 28 Ĩndĩ andũ ala matwĩe nthĩ ĩsu me vinya, na ndũa syayo nĩ mbiĩĩe na nĩ nene mũno. O na nĩtwonie nzyawa sya Anaki kũu. 29 Aamaleki matwĩe nthĩ ya Nekevu, na Aititi, Ayevusi, na Aamoli matwĩe kĩsionĩ kĩla kĩ iĩma, namo Akanaanĩ matwĩe vakuvĩ na ũkanga na ũtee wa Yolotani.”

30 Nĩvo ĩndĩ Kalevu watatie kũneena na andũ maũngye vau mbee wa Mose nĩ kana amavoovye, aimea: “Nĩtwambatei mĩtũkĩ, na vate ndĩi nĩtũkwĩyosea nthĩ ĩsu, nũndũ vate ndĩi nĩtũũmĩkĩlya vinya.” 31 Ĩndĩ aũme ala mambatĩte nake masya: “Tũitonya kwambata tũkokite na andũ asu, nũndũ me vinya kwĩ ithyĩ.” 32 Na maendeea kũtavya Aisilaeli maũndũ mathũku ĩũlũ wa nthĩ ĩla mathianĩte, mayasya: “Nthĩ ĩla tũendie kũthiana nĩ nthĩ ĩmelasya ekali mayo, na andũ onthe ala twonie vau nĩ mamũndũ manene. 33 Na nĩtwonie Nevilimu kũu, namo nĩ ana ma Anaki, nzyawa sya Nevilimu, na twaelekanwʼa namo twĩĩilye ta itoli, methonĩ maitũ na methonĩ moo.”

14 Na ĩndĩ ũmbano wʼonthe wookĩlya wasya, na andũ maendeea kũkĩlya wasya na kũĩa ũtukũ wʼonthe. 2 Na Aisilaeli onthe mambĩĩa kũnyungunyĩĩsya Mose na Alũni, na andũ onthe ũmbanonĩ ũsu mamaneeneaa naĩ, mayasya: “Nĩ kavaa keka twakwʼĩĩe nthĩ ya Misili, kana keka twakwʼĩĩe weũnĩ ũũ! 3 Nĩkĩ Yeova ũkũtũete nthĩ ĩno nĩ kana tũvalũkwʼe nĩ ũvyũ? Iveti sitũ na syana sitũ syĩtwʼĩka mũtavo. Ti kavaa tũkasyoka Misili?” 4 O na nĩmambĩĩie kũneenanyʼa, mayasya: “Nĩtwĩnyuvĩei mũtongoi na tũisyoka Misili!”

5 Nĩvo ĩndĩ Mose na Alũni mavalũkile nthĩ na mothyũ moo mbee wa ũmbano wʼonthe wa Aisilaeli. 6 Na Yosua mwana wa Nuni na Kalevu mwana wa Yevune, ala maĩ katĩ wa aũme ala maendie kũthiana nthĩ ĩsu, matembũa ngũa syoo, 7 na maneena na ũmbano wʼonthe wa Aisilaeli, mayasya: “Nthĩ ĩla tũnaendie kũthiana nĩ nthĩ nzeo mũno, mũno vyũ. 8 Ethĩwa Yeova nũkwendeew’a nithyĩ, vate ndĩi akatũlikya nthĩ ĩsu na akatũnenga yo, nayo nĩ nthĩ yusũĩte ĩia na ũkĩ wa nzũkĩ. 9 Ĩndĩ mũikatate kũleana na Yeova, na mũikatate kũkĩa andũ ma nthĩ ĩsu, nũndũ mo ti kĩndũ mbee witũ.* Mai na kĩndũ kya kũmaseseea, na Yeova e vamwe naitũ. Mũikamakĩe.”

10 Ĩndĩ ũmbano wʼonthe wambĩĩa kwasya nũũmakimanga na mavia. Ĩndĩ ũtheu mũtisu wa Yeova waumĩlĩĩla andũ onthe ma Isilaeli ĩeemanĩ ya kũmbanĩa.

11 Na ĩndĩ Yeova eea Mose: “Andũ aa meendeea kũmbũthya nginya ĩndĩĩ, na melea kũndĩkĩĩa nginya ĩndĩĩ o na kũtwʼĩka nĩmonete syama syonthe ila nĩkĩte katĩ woo? 12 Eka nĩmakũne na ũwau wa kũkwatanw’a na ndimavetanga vyũ, na eka ngũtwʼĩkĩthye mbaĩ nene na yĩ vinya kwĩ mo.”

13 Ĩndĩ Mose amwĩa Yeova: “Weeka ũu, Amisili, ala waumisye andũ aa katĩ woo kwa vinya waku, nĩmekwĩwʼa ũndũ ũsu, 14 na maitavya ekali ma nthĩ ĩno. O namo nĩmewʼĩte kana we, Yeova, wĩ katĩ wa andũ aa na nĩwamaumĩlĩĩile ũthyũ kwa ũthyũ. Nue Yeova, na ĩtu yaku yĩũngamĩte ĩũlũ woo, na ũendaa mbee woo na kĩtuĩ kya ĩtu mũthenya na kĩtuĩ kya mwaki ũtukũ. 15 Woaa andũ aa onthe savalĩ ũmwe,* mbaĩ ila syĩwʼĩte nguma syaku ikasya ũũ: 16 ‘Yeova nĩwaemiwe nĩ kũlikya andũ aa nthĩ ĩla weevĩtie kũmanenga, na kwoou amoaĩa weũnĩ.’ 17 Yu ĩndĩ, nĩngũkwĩsũva, Yeova, onanyʼa kana wĩ vinya mwingĩ o tondũ wathanie yĩla waisye: 18 ‘Yeova nĩ Ngai ũtathataa mĩtũkĩ na wĩ wendo mwingĩ ũtathelaa,* ũla ũekeaa mavĩtyo na kũlea kwĩwʼa, ĩndĩ ũtaema kwosea ĩtambya ala me na mavĩtyo, na kwosea ĩtambya syana nũndũ wa mavĩtyo ma aa-ĩthe masyo, kũvika nzyawa ya katatũ na kũvika nzyawa ya kana.’ 19 Nĩngũkwĩsũva, ekea andũ aa ĩvĩtyo yoo nũndũ wa wendo waku mũnene ũtathelaa, o tondũ wĩthĩĩtwe ũiekea andũ aa kuma yĩla maumie Misili kũvika yu.”

20 Nĩvo ĩndĩ Yeova waisye: “Nĩnamaekea o tondũ waneena. 21 Ĩndĩ o na vailye ũu, o tondũ nyie nĩ thayũ, nthĩ yonthe ĩkausũwa nĩ ũtheu mũtisu wa Yeova. 22 Ĩndĩ vai mũndũũme o na ũmwe wonete ũtheu wakwa mũtisu na syama ila neekie Misili na ila nĩkĩte weũnĩ na akaendeea kũndata mavinda aa ĩkũmi na akaema kwĩthukĩĩsya wasya wakwa 23 ũkona nthĩ ĩla neevĩtĩie aa-ĩthe moo. Aiee, vai ũmwe wa asu matanengae ndaĩa ũkamyona. 24 Ĩndĩ nũndũ mũthũkũmi wakwa Kalevu nĩwoonanisye veva wĩ kĩvathũkanyʼo na aendeea kũngatĩĩa na ngoo yonthe, vate ndĩi ngamũlikya nthĩ ĩsu waendie, na ũsyao wake ũkamĩmesya. 25 Nĩkwĩthĩwa yu Aamaleki na Akanaanĩ nĩmatwĩe mwandanĩ,* ũnĩ ĩthyũũei mũsyoke na mũithi mwelekele weũnĩ mũkwete nzĩa ĩla ĩelete Ũkanganĩ Mũtune.”

26 Na Yeova aneena na Mose na Alũni, aimea: 27 “Ũmbano ũũ mũthũku wĩendeea kũnyungunyĩĩsya nginya ĩndĩĩ? Nĩnĩwʼĩte kĩla Aisilaeli meũnyungunyĩsya ĩũlũ wakwa. 28 Matavye atĩĩ: ‘“Vate nzika, o tondũ nyie nĩ thayũ,” easya ũu Yeova, “nĩmwĩka o kĩla nĩwʼĩte mũineena! 29 Simba syenyu ikavalũka weũnĩ ũũ, ĩĩ, onthe ala me na myaka 20 kwambata ala maandĩkĩthiwʼe, onthe ala manyungunyĩisye. 30 Vai ũmwe katĩ wenyu ũkalika nthĩ ĩla neevĩtie* nasya mũkamĩtũa ate o Kalevu mwana wa Yevune na Yosua mwana wa Nuni.

31 “‘“Nakwa ngalikya syana syenyu vo, ila mwaisye ikatwʼĩka mũtavo, na ikamanya nthĩ ĩsu mwamĩleile. 32 Ĩndĩ simba syenyu ikavalũka weũnĩ ũũ. 33 Yu ana menyu metwʼĩka aĩthi weũnĩ ũũ myaka 40, na makasũngĩa kwondũ wa meko menyu ma kwĩthĩwa mũte aĩkĩĩku* nginya yĩla kimba kya mũthya kĩkavalũka weũnĩ ũũ. 34 Mũkasũngĩa kwondũ wa mavĩtyo menyu myaka 40, kwosana na ũtalo wa mĩthenya ĩla mwathianie nthĩ ĩsu, mĩthenya 40, mũthenya ũmwe kwondũ wa mwaka ũmwe, mũthenya ũmwe kwondũ wa mwaka ũmwe, na mũkamanya ũthũku wa kũleana nakwa.*

35 “‘“Nyie, Yeova, nĩnĩneenete. Ũũ nĩwʼo ngwĩkana na ũmbano ũũ wʼonthe mũthũku, onthe ala mombanĩte maleane nakwa: Mevikĩĩa mũthya woo weũnĩ ũũ, na vaa nĩ vo meũkwʼĩĩa. 36 Aũme ala Mose watũmie makathiane nthĩ ĩsu na matuma ũmbano wʼonthe ũmũnyungunyĩĩsya yĩla masyokie na maete ũvoo mũthũku ĩũlũ wa nthĩ ĩsu, 37 ĩĩ, aũme ala masyokie na matũnga ũvoo mũthũku ĩũlũ wa nthĩ ĩsu makakũnwa na maikwʼa mbee wa Yeova. 38 Ĩndĩ vate ndĩi, Yosua mwana wa Nuni na Kalevu mwana wa Yevune, ala maĩ katĩ wa aũme ala maendie kũthiana nthĩ ĩsu, meendeea kwĩkala thayũ.”’”

39 Yĩla Mose watavisye Aisilaeli onthe ndeto isu, andũ nĩmambĩĩie kũmeta mũno. 40 Ũnĩ wake nĩmaamũkie kwakya tene na matata kwambata mũthyanĩ wa kĩĩma, mayasya: “Yu nĩtwĩyũmbanĩtye kwambata vandũ vau Yeova ũneenete ĩũlũ wa vo, nĩkwĩthĩwa nĩtwĩkĩte naĩ.” 41 Ĩndĩ Mose asya: “Nĩkĩ mũkwenda kũvĩtũũkana na mwĩao wa Yeova? Ũndũ ũũ ndwĩaĩla. 42 Mũikambate, nũndũ Yeova nde vamwe nenyu; na nĩmũũsindwa nĩ amaitha menyu. 43 Nũndũ Aamaleki na Akanaanĩ me vau mokite nenyu, na nĩmũũvalũkwʼa nĩ ũvyũ. Nũndũ nĩmwĩthyũũĩte mũkaeka kũmũatĩĩa Yeova, Yeova ndeĩthĩwa vamwe nenyu.”

44 Ĩndĩ mookĩla na mĩtũlyo na mathi melekele kĩĩmanĩ ĩũlũ, ĩndĩ ĩsandũkũ ya ũtianĩo wa Yeova yatiiwe katĩkatĩ wa kambi, na Mose ndaauma vo. 45 Nĩvo ĩndĩ Aamaleki na Akanaanĩ ala matwĩe kĩĩmanĩ kĩu matheeie na mamakũna, na mamanyaĩĩkya nginya Olima.

15 Na Yeova aneena ĩngĩ na Mose, ayasya: 2 “Neena na Aisilaeli na ũimea, ‘Yĩla mũkesa kũlika nthĩ ĩla ngũmũnenga mũmĩtũe 3 na mũitwʼĩka nĩmũũmũvĩvĩsya Yeova nthembo kuma ndĩthyanĩ syenyu, yĩthĩwe nĩ nthembo ya kũvĩvwʼa kana nĩ nthembo ya kwĩanĩsya wĩvĩto wa mwanya kana nĩ nthembo ya ngenda kana nĩ nthembo ya mboka syenyu sya mavinda ala matwʼĩtwe mwakanĩ, nĩ kana yumye mũuke ũũmwendeesya* Yeova, 4 mũndũ ũla ũeteete Yeova nthembo yake no nginya amĩetanĩsye na nthembo ya lĩu ya mũtu mũvinyu wa kĩlungu kya ĩkũmi kya eva,* kĩvulanĩtwʼe na kĩlungu kya kana kya ini* kya mauta. 5 O na ĩngĩ, yĩla ũkumya nthembo ĩsu ya kũvĩvwʼa kana ũkumya nthembo ya katũlũme, ũkeethĩawa waĩlĩte kũnengane kĩlungu kya kana kya ini kya mbinyu kĩthĩwe nthembo ya kũnyuwa. 6 Na ethĩwa nĩ ndũũme, waĩlĩte kũseũvya nthembo ya lĩu ya ithimo ilĩ sya kĩlungu kya ĩkũmi kya eva kya mũtu mũvinyu ũvulanĩtwʼe na kĩlungu kya katatũ kya ini kya mauta. 7 Na nĩwaĩlĩte kũete kĩlungu kya katatũ kya ini kya mbinyu ta nthembo ya kũnyuwa, nĩ kana yĩthĩwe mũuke ũũmwendeesya* Yeova.

8 “‘Ĩndĩ ethĩwa wĩthemba nyamũ nũme kuma ndĩthyanĩ yaku yĩthĩwe nthembo ya kũvĩvw’a, kana wĩumya nthembo nĩ kana wĩanĩsye wĩvĩto wa mwanya, kana wĩumya nthembo sya ngwatanĩo kwondũ wa Yeova, 9 o vamwe na nyamũ ĩsu nũme yumĩte ndĩthyanĩ yaku, nĩwaĩlĩte kũete nthembo ya lĩu ya ithimo itatũ sya kĩlungu kya ĩkũmi kya eva kya mũtu mũvinyu ũvulanĩtwʼe na nusu ya ini ya mauta. 10 O na ĩngĩ, nĩwaĩlĩte kũete nusu ya ini ya mbinyu yĩthĩwe nthembo ya kũnyuwa ĩvĩvĩtwʼe na mwaki, nĩ kana yĩthĩwe mũuke ũũmwendeesya* Yeova. 11 Ũu nĩwʼo vakekawa kwondũ wa kĩla nzaũ, kĩla ndũũme, kĩla katũlũme, kana kĩla mbũi. 12 O na ethĩwa mwĩthemba indo siana ata, ũu nĩwʼo mũkekaa kwondũ wa kĩla ĩmwe, kwosana na ũtalo wasyo. 13 Ũu nĩwʼo kĩla mũndũ ũsyaĩtwe nĩ Mũisilaeli waĩlĩte kumasya nthembo ĩvĩvĩtwʼe na mwaki, nĩ kana yĩthĩwe mũuke ũũmwendeesya* Yeova.

14 “‘Ethĩwa ve mũeni ũtwĩe nenyu kana ethĩwa ve ũmwe wĩ katĩ wenyu na nĩwonete nzyawa syenyu mbingĩ na nĩwatwʼĩka nũkumya nthembo ya kũvĩvwʼa na mwaki, nĩ kana yĩthĩwe mũuke ũũmwendeesya* Yeova, aĩlĩte kwĩka o ũndũ inywʼĩ mwaĩle kwĩka. 15 Vakeethĩawa ũtwʼĩo ũmwe kwondũ wenyu ala mwĩ ũmbanonĩ ũũ na mwĩkali wa ũeninĩ ũla ũtwĩe nenyu. Ũkeethĩawa wĩ ũtwʼĩo wa ĩvinda yonthe kwondũ wa nzyawa syenyu syonthe. Inywʼĩ vamwe na mwĩkali wa ũeninĩ mũkeethĩawa mwĩ ũndũ ũmwe methonĩ ma Yeova. 16 Vakeethĩawa mwĩao ũmwe na ũtwʼĩo ũmwe kwondũ wenyu na kwondũ wa mwĩkali wa ũeninĩ ũla ũtwĩe vamwe nenyu.’”

17 Na Yeova aendeea kũneena na Mose, ayasya: 18 “Neena na Aisilaeli na ũimea atĩĩ: ‘Yĩla mwĩlika nthĩ ĩla nĩmũtwaĩte 19 na mũiya mũkate* o na wĩva wa nthĩ ĩsu, no nginya mwĩmumĩasya Yeova mũvothi. 20 No nginya mumasye mũvothi wa ũsyao wa mbee wa mũtu ũte mũvinyĩthye, nawʼo ũkeethĩawa wĩ mĩkate ya kĩlinge yĩ na ĩima katĩ. O ũndũ mumasya mũvothi ũla umĩte kĩvũĩonĩ, nowʼo mwaĩle kumya mũvothi ũũ. 21 Mũkamumĩasya Yeova mũvothi wa ũsyao ũmwe wa mbee wa mũtu ũte mũvinyĩthye nzyawanĩ syenyu syonthe.

22 “Yu ĩndĩ, ethĩwa nĩmwavĩtanyʼa na mwaema kũkwata mĩao ĩĩ yonthe Yeova ũtavĩtye Mose, 23 kyonthe kĩla Yeova wamwĩaĩe kwĩsĩla Mose kuma mũthenya ũla Yeova wanenganie mĩao ĩsu kwondũ wenyu na kwondũ wa nzyawa syenyu ila ikoka, 24 na ethĩwa ũmbano ũnavĩtanisye ũtesĩ, no nginya ũmbano wʼonthe ũthembe kasalũ kamwe ta nthembo ya kũvĩvw’a yĩthĩwe mũuke ũũmwendeesya* Yeova, na kaithembwa vamwe na nthembo yako ya lĩu na nthembo yako ya kũnyuwa kwosana na mũtalatala ũla waĩle kũatĩĩwa, na kavũli kamwe kaithembwa kethĩwe nthembo ya naĩ. 25 Na mũthembi akeewʼanĩthya ũmbano wʼonthe wa Aisilaeli na Ngai, na makaekewa, nũndũ mavĩtanisye matesĩ, na nĩmaeteie Yeova nthembo yoo yĩthĩwe nthembo ĩvĩvĩtw’e na mwaki na nĩmaetie nthembo yoo ya naĩ mbee wa Yeova kwondũ wa ĩvĩtyo yoo. 26 Onthe ala me ũmbanonĩ wa Aisilaeli vamwe na mwĩkali wa ũeninĩ ũla wĩkalaa katĩ woo makaekewa, nũndũ onthe mavĩtanisye matesĩ.

27 “‘Ethĩwa mũndũ o na wĩva nĩweeka naĩ atesĩ, no nginya aete mbũi nga yĩ mwakanĩ wayo wa mbee kwondũ wa nthembo ya naĩ. 28 Na mũthembi akeewʼanĩthya mũndũ ũsu wĩkĩte naĩ ĩte ya ngũlũ na akamũvĩtĩsya Yeova atesĩ, nĩ kana amwĩwʼanĩthye na Ngai nũndũ wa naĩ ĩsu, nake akaekewa. 29 Kwondũ wa kĩla mũndũ ũsyaĩtwe nĩ Mũisilaeli na kĩla mwĩkali wa ũeninĩ wĩ katĩ woo, vakeethĩawa mwĩao ũmwe kwondũ wenyu yĩla mũndũ weeka naĩ ĩte ya ngũlũ.

30 “‘Ĩndĩ mũndũ eeka naĩ na ngũlũ, ethĩwe asyaĩtwe nĩ Mũisilaeli kana nĩ mwĩkali wa ũeninĩ, akeethĩawa amũuma Yeova na kwoou no nginya avetangwe* katĩ wa andũ make. 31 Nũndũ mũndũ ũsu nũvũthĩĩsye ndeto ya Yeova na akatũla mwĩao wake, vate ndĩi no nginya avetangwe. Ĩvĩtyo yake yĩ ĩũlũ wake mwene.’”

32 Mũthenya ũmwe Aisilaeli me weũnĩ, nĩmeethĩie mũndũũme ũmwe aikolanyʼa ngũ mũthenyanĩ wa Savato. 33 Ala mamwĩthĩie aikolanyʼa ngũ nĩmamũtwaie mbee wa Mose na Alũni na ũmbano wʼonthe. 34 Na mamwĩkalya e mwove nũndũ vayawetetwe nesa ĩtambya yĩla waĩlĩte kwosewa.

35 Na Yeova amwĩa Mose: “Vate ndĩi, no nginya mũndũũme ũsu oawe, na ũmbano wʼonthe waĩlĩte kũmũkimangĩa nza wa kambi na mavia.” 36 Na kwoou ũmbano wʼonthe wamumaalya nza wa kambi na wamũkimanga na mavia nginya akwʼa, o tondũ Yeova wamwĩaĩe Mose.

37 Na Yeova aneena ĩngĩ na Mose, aimwĩa: 38 “Neena na Aisilaeli na ũimea kana no nginya meseũvĩasye manyenze mĩthyanĩ ya ngũa syoo nzyawanĩ syoo syonthe, na makeekĩaa ũlii wa mbuluu ĩũlũ wa manyenze ala me mũthyanĩ wa ngũa syoo. 39 ‘No nginya mwĩseũvĩasye mĩthya yĩ na manyenze nĩ kana mũkamyonaa na mũililikanaa mĩao yonthe ya Yeova na kũmĩkwata. Mũyaĩlĩte o na vanini kũatĩĩa ngoo syenyu na metho menyu, nũndũ kĩu nĩkyo kĩtumaa mwĩthĩwa mũte aĩkĩĩku kũla nĩĩ.* 40 Kĩu kĩkamũtetheeasya kũlilikana, na mũkakwataa mĩao yakwa yonthe na kwĩthĩwa mwĩ atheu kwa Ngai wenyu. 41 Ninyie Yeova Ngai wenyu, ũla wamumisye nthĩ ya Misili nĩ kana nonanyʼe kana nĩ Ngai wenyu. Ninyie Yeova Ngai wenyu.’”

16 Na ĩndĩ Kola mwana wa Isali, mwana wa Koathi, mwana wa Livai, ookĩla vamwe na Ndathani na Avilamu ana ma Eliavu, na Oni mwana wa Velethi, ala maĩ ana ma Leũveni. 2 Na mamũkĩlĩla Mose me vamwe na aũme 250 ma Isilaeli, namo maĩ anene ma ũmbano, anyuve kuma ũmbanonĩ, aũme me nguma. 3 Na kwoou moombana makananĩsye Mose na Alũni, na mamea atĩĩ: “Nĩmũtũnoetye! Ũmbano wʼonthe nĩ mũtheu, andũ onthe nĩ atheu, na Yeova e katĩ woo. Nĩkĩ ĩndĩ mwĩtũlĩtye ĩũlũ wa ũmbano wa Yeova?”

4 Na Mose eewʼa ũu, vau kwa vau avalũka nthĩ na ũthyũ wake. 5 Na ĩndĩ amwĩa Kola na onthe ala mamũkwatĩte mbau: “Kwakya Yeova akoonanyʼa ũla wake na ũla mũtheu na ũla waĩlĩte kũmũthengeea, na ũla ũkanyuva ũsu nĩwe ũkamũthengeea. 6 Ĩkai ũũ: Osai syĩndũ sya kwĩkĩa mwaki, we Kola vamwe na onthe ala maũkwatĩte mbau, 7 na ũnĩ mwĩsyĩkĩa mwaki na mũisyĩkĩa ũvumba mwĩ mbee wa Yeova; na mũndũ ũla Yeova ũkanyuva, ũsu nĩwe mũtheu. Inywʼĩ ana ma Livai nĩmwathi mũno!”

8 Nĩvo ĩndĩ Mose weeie Kola atĩĩ: “Mbĩthukĩĩsyei, nĩngũmwĩsũva, inywʼĩ ana ma Livai. 9 Inywʼĩ mwĩsũanĩa nĩ ũndũ mũnini kwĩthĩwa mũvathĩtwe nĩ Ngai wa Isilaeli kuma ũmbanonĩ wa Isilaeli na akamwĩtĩkĩlya mũmũthengeee nĩ kana mwĩanĩsye ũthũkũmi wa ĩeema ya ũthaithi ya Yeova na kũũngama mbee wa ũmbano nĩ kana mũũthũkũme, 10 na kwĩthwa amũetie vakuvĩ nake mwĩ vamwe na ana-a-ĩthe menyu onthe, ana ma Livai? No nginya mũtate kwĩyosea ũthembi o nawʼo? 11 Nũndũ wa ũu, we na onthe ala mombanĩte makaũkwata mbau nĩmũleanĩte na Yeova. Ĩndĩ Alũni ngalĩ ĩ yake, ekĩte ata nĩ kana mũnyungunyĩsye ĩũlũ wake?”

12 Ĩtina wa ũu, Mose nĩwatũmanie Ndathani na Avilamu ana ma Eliavu, ĩndĩ masya: “Ithyĩ tũikũka! 13 Wʼo nĩ ũndũ mũnini kwĩthĩwa watumisye nthĩ yusũĩte ĩia na ũkĩ wa nzũkĩ nĩ kana ũtũaĩe weũnĩ ũũ? Na eka ũu, yu wĩenda kũtwʼĩka no ue ũũtũsumbĩka?* 14 O tondũ twene ndwaatũlikya nthĩ o na yĩva yusũĩte ĩia na ũkĩ wa nzũkĩ kana ũkatũnenga kĩtheka na mĩũnda ya mĩsavivũ yĩthĩwe ũtiĩwa. Yu wĩenda kũvũthũanga metho ma aũme asu? Ithyĩ tũikũka!”

15 Na Mose athata mũno na amwĩa Yeova: “Ndũkethyũũe ũsisye nthembo yoo ya lĩu. Ndyaaosa ĩng’oi o na yĩmwe yoo, na vai ũmwe woo naaũmĩsya.”

16 Na ĩndĩ Mose amwĩa Kola: “Ũka mbee wa Yeova ũnĩ wĩ vamwe na onthe ala maũkwatĩte mbau, we vamwe namo na Alũni. 17 Kĩla ũmwe akooka na kĩndũ kyake kya kwĩkĩa mwaki na aikĩkĩa ũvumba, na kĩla ũmwe akaete kĩndũ kyake kya kwĩkĩa mwaki mbee wa Yeova, na ikeethĩwa syĩndũ sya kwĩkĩa mwaki 250. Makeeka ũu me vamwe naku na Alũni, kĩla ũmwe akwete kĩndũ kyake kya kwĩkĩa mwaki.” 18 Na kwoou kĩla ũmwe nĩwoosie kĩndũ kyake kya kwĩkĩa mwaki, na akĩkĩa mwaki na ũvumba na maũngama mũomonĩ wa ĩeema ya kũmbanĩa me vamwe na Mose na Alũni. 19 Na yĩla Kola woombanĩisye ala mamũkwataa mbau maileana namo mũomonĩ wa ĩeema ya kũmbanĩa, ũtheu mũtisu wa Yeova waumĩlĩĩla ũmbano wʼonthe.

20 Nĩvo ĩndĩ Yeova waneenie na Mose na Alũni, amea: 21 “Ĩvetei kĩkundinĩ kĩĩ, nĩ kana nĩmamine oyu.” 22 Na meewʼa ũu, mavalũka nthĩ na mothyũ moo, na masya: “Ame Ngai, Ngai wa veva wa andũ onthe,* yo naĩ ya mũndũ ũmwe nĩkũtuma ũthatĩa ũmbano wʼonthe?”

23 Na ĩndĩ Yeova amwĩa Mose: 24 “Neena na ũmbano na ũimea, ‘Ĩvetei vaasa na maeema ma Kola, Ndathani, na Avilamu!’”

25 Na ĩndĩ Mose ookĩla na athi vala ve Ndathani na Avilamu, na atumĩa ma Isilaeli maendanyʼa nake. 26 Na aneena na ũmbano, ayasya: “Nĩngũmwĩsũva mwĩvetange vaasa na maeema ma andũ aa athũku na mũikakiite kĩndũ o na kĩva kyoo, nĩ kana mũikese kwanangwa nũndũ wa naĩ yoo yonthe.” 27 Na vau kwa vau meevetanga vaasa na maeema ma Kola, Ndathani, na Avilamu kĩla ngalĩko. Na Ndathani na Avilamu maumaala, na maũngama mĩomonĩ ya maeema moo, me vamwe na iveti syoo, ana moo, na syana syoo nini.

28 Na ĩndĩ Mose asya: “Ũndũ ũũ nĩwʼo ũũtuma mũmanya kana Yeova nũndũmĩte nĩke maũndũ aa onthe, na kana mayumanĩte na ngoo yakwa:* 29 Ethĩwa andũ aa mekwatwa nĩ kĩkw’ũ kĩla kĩkwataa andũ onthe na ethĩwa mekanwʼa o ũndũ andũ ala angĩ onthe makanawʼa, manyai kana Yeova ndandũmĩte. 30 Ĩndĩ ethĩwa Yeova nũkũmeka ũndũ ũtaaĩkwa ĩngĩ na nthĩ ĩyathamũkana* na ĩimamelya na ĩimelya kyonthe kĩla me nakyo na maitheea Mbũanĩ* me thayũ, nĩvo ĩndĩ mũũmanya nesa ki kana aũme aa nĩmamũvũthĩtye Yeova.”

31 Na yĩla Mose waminie kũneena ndeto isu oou, nthĩ ĩla makinyĩte yaatũka. 32 Na nthĩ yaathamũkana* na yamamelya vamwe na mĩsyĩ yoo na andũ onthe ala maĩ ma Kola na malĩ yoo yonthe. 33 Na kwoou mo na andũ moo onthe matheea Mbũanĩ* me thayũ, na nthĩ yamavwʼĩka, na kwoou mathela na maa vyũ kuma katĩ wa ũmbano. 34 Na yĩla Aisilaeli onthe ala mamathyũlũlũkĩte meewie mauw’anĩtye mbu, malikwa nĩ wia na masemba makĩĩte, nĩkwĩthĩwa maisye: “O naitũ ko tũtamelwʼa nĩ nthĩ!” 35 Na ĩndĩ mwaki watheea kuma kwa Yeova na wavĩvya ala aũme 250 maendeee kũmũvĩvĩsya Ngai ũvumba.

36 Na Yeova eea Mose: 37 “Neena na Eleasali mwana wa mũthembi Alũni na ũimwĩa nĩose ila syĩndũ sya kwĩkĩa mwaki syatiwa mwakinĩ, nũndũ nĩ ntheu. O na ĩngĩ, mwĩe atwae mwaki ũsu vaasa na aiunyaĩĩkĩsya kũu. 38 Syĩndũ sya kwĩkĩa mwaki sya aũme ala mekie naĩ na nũndũ wa ũu makwʼa* syaĩlĩte kũtuwa itwʼĩke mavati matheke ma kyũma ma kũvwʼĩka kĩthembeo, nũndũ nĩmasietie mbee wa Yeova, na nitwʼĩkie ntheu. Syaĩlĩte kwĩthĩwa ũvano wa kũkanyʼa kwondũ wa Aisilaeli.” 39 Na kwoou mũthembi Eleasali oosa syĩndũ sya kwĩkĩa mwaki sya ũthuku ila syaetetwe nĩ aũme ala maĩ manavĩvwʼa nĩ mwaki, na syatuwa nĩ kana ivwʼĩke kĩthembeo, 40 o tondũ Yeova wamwĩaĩe kwĩsĩla Mose. Ũndũ ũsu waĩ ũlilikanasye Aisilaeli kana vai mũndũ ũte mwĩtĩkĩlye,* ũla ũte wa ũsyao wa Alũni, waĩlĩte kũthengeea na kũmũvĩvĩsya Yeova ũvumba, na kana mũndũ o na wĩva ndaĩlĩte kwĩthĩwa ta Kola na ala mamũkwatie mbau.

41 Ĩndĩ o ũnĩ wake, ũmbano wʼonthe wa Isilaeli waambĩĩa kũnyungunyĩĩsya Mose na Alũni, ũyasya: “Inywʼĩ mwĩ elĩ nĩmũaie andũ ma Yeova.” 42 Na yĩla ũmbano woombanie ũkananĩsye Mose na Alũni, mavĩndũka na masisya ĩeema ya kũmbanĩa, na sisya! ĩtu nĩyayĩvwʼĩkĩte, na ũtheu mũtisu wa Yeova wambĩĩa kumĩla.

43 Na Mose na Alũni mathi mbee wa ĩeema ya kũmbanĩa, 44 na Yeova amwĩa Mose: 45 “Inywʼĩ aũme aa, umai ũmbanonĩ ũũ, nĩ kana nĩmamine oyu.” Namo meewʼa ũu mavalũka nthĩ na mothyũ moo. 46 Na ĩndĩ Mose amwĩa Alũni: “Osa kĩndũ kya kwĩkĩa mwaki na ũikĩkĩa mwaki kuma kĩthembeonĩ na ũikĩkĩa ũvumba na ũithi na mĩtũkĩ ũmbanonĩ na ũimewʼanĩthya na Ngai, nũndũ Yeova nĩwamewʼĩa woo. Andũ nĩmambĩĩa kũkwata ũkũno!” 47 Na ndatĩkanĩ ĩsu Alũni oosa kĩndũ kya kwĩkĩa mwaki, o tondũ Mose waĩtye, na asemba katĩ wa ũmbano, na sisya! andũ maĩ manambĩĩa kũkwata ũkũno. Kwoou eekĩa ũvumba kĩndũnĩ kĩu kya kwĩkĩa mwaki na ambĩĩa kwĩwʼanĩthya andũ na Ngai. 48 Na aendeea kũũngama katĩ wa ala akw’ũ na ala me thayũ, na mũthya ũthĩnyʼo ũsu wathela. 49 Ala makwie nũndũ wa ũthĩnyʼo ũsu maĩ 14,700, ala makwie nũndũ wa Kola mate atale. 50 Mũthya, yĩla Alũni wesie kũsyoka vala Mose waĩ mũomonĩ wa ĩeema ya kũmbanĩa, ũthĩnyʼo ũsu waĩ ũnasiĩĩwa.

17 Na Yeova aneena na Mose, aimwĩa: 2 “Neena na Aisilaeli na ũyosa ndata ĩmwe kwondũ wa kĩla nyũmba ya aa-ĩthe moo; wĩosa ndata isu kuma anenenĩ ma kĩla nyũmba ya aa-ĩthe moo, na syonthe syĩĩthĩwa ndata 12. Wamina kwĩka ũu, andĩka ĩsyĩtwa ya kĩla mũnene ndatanĩ yake. 3 Waĩlĩte kũandĩka ĩsyĩtwa ya Alũni ndatanĩ ya Livai, nũndũ vaĩlĩte kwĩthĩwa na ndata ĩmwe kwondũ wa kĩla mũũngamĩi wa nyũmba ya aa-ĩthe make. 4 Na ĩndĩ ũyia ndata isu ĩeemanĩ ya kũmbanĩa mbee wa ũla Ũkũsĩ, vala nĩmumĩlĩĩlaa kĩla ĩvinda. 5 Na ndata ya mũndũũme ũla nĩnyuvĩte nĩkũthongooa, na nĩngũmina kũnyungunyĩsya kwa Aisilaeli ĩũlũ wakwa, na o na ĩũlũ wenyu.”

6 Na Mose aneena na Aisilaeli, na anene moo onthe mamũnenga ndata syoo, ndata ĩmwe kwondũ wa kĩla mũnene wa nyũmba ya aa-ĩthe make, syonthe syĩ ndata 12; na ndata ya Alũni yaĩ ĩmwe yasyo. 7 Na ĩndĩ Mose aia ndata isu mbee wa Yeova ĩeemanĩ ya ũla Ũkũsĩ.

8 Mũthenya ũla waatĩĩe, Mose nĩwaendie ĩeemanĩ ya ũla Ũkũsĩ, na sisya! ndata ya Alũni ĩla yaĩ kwondũ wa nyũmba ya Livai nĩyathongooete na yaendeee kumya malaa amwe meyũmbĩte na angĩ mavalĩku na kũsyaa matunda meu ma mũlosi. 9 Na ĩndĩ Mose aumaalĩlya andũ onthe ma Isilaeli ndata isu syonthe kuma vala syaĩ mbee wa Yeova. Na maisisya, na kĩla mũndũũme oosa ndata ĩ yake.

10 Nĩvo ĩndĩ Yeova wamwĩie Mose: “Tũnga ndata ya Alũni vala yauma mbee wa ũla Ũkũsĩ nĩ kana yĩthĩwe ũvano wa ũkanyʼo kwondũ wa ana aa ma ũlei, nĩ kana maeke kũnyungunyĩsya ĩũlũ wakwa na nĩ kana maikakwʼe.” 11 Na vau kwa vau Mose eeka o ũndũ Yeova wamwĩaĩe. Eekie o ũndũ weeaĩwe.

12 Na ĩndĩ Aisilaeli mamwĩa Mose: “Yu nĩndĩ tũkakwʼa, vate ndĩi nĩtũũthela, ithyonthe nĩtwathela! 13 Yu mũndũ o na wĩva akatata kũthengeea ĩeema ya ũthaithi ya Yeova eka kũkwʼa! Mwa ũu nĩwʼo tũũkwʼa?”

18 Nĩvo ĩndĩ Yeova waneenie na Alũni amwĩa: “We na ana maku vamwe na nyũmba ya aa-ĩthe maku mũkasũngĩa kwondũ wa ĩvĩtyo o na yĩva yĩkonanĩtye na vala vandũ vatheu, na we vamwe na ana maku mũkasũngĩa kwondũ wa ĩvĩtyo o na yĩva yĩkonanĩtye na wĩa wenyu wa ũthembi. 2 O na ĩngĩ, thengeesya ana-a-ĩthe maku ma mbaĩ ya Livai, mbaĩ ya ĩthe waku, nĩ kana makwatane naku na maiũthũkũma we vamwe na ana maku mbee wa ĩeema ya Ũkũsĩ. 3 Makeanĩasya ianda syoo kwondũ waku na kwondũ wa ĩeema yonthe. Ĩndĩ mayaĩlĩte o na vanini kũthengeea mĩio ya vala vandũ vatheu kana kĩthembeo, nĩ kana mũikakwʼe, we kana mo. 4 Makakwatana naku na maianĩsya ianda syoo ila ikonanĩtye na ĩeema ya kũmbanĩa na ũthũkũmi wʼonthe wa ĩeema, na vai mũndũ ũte mwĩtĩkĩlye* waĩlĩte kũmũthengeea. 5 No nginya mwĩanĩsye kĩanda kyenyu kĩla kĩkonanĩtye na vala vandũ vatheu na kĩthembeo, nĩ kana ndikewʼĩe andũ ma Isilaeli woo ĩngĩ. 6 Nyie mwene nĩnosete ana-a-ĩthe menyu, Alivai, kuma katĩ wa Aisilaeli na ngamũnenga mo ta mũthĩnzĩo. Nĩmanenganĩtwe kwa Yeova nĩ kana meanĩasye ũthũkũmi wa ĩeema ya kũmbanĩa. 7 We na ana maku ninyw’ĩ mũkeanĩasya ianda syenyu sya ũthembi ila ikonanĩtye na kĩthembeo na syĩndũ ila syĩ nthĩnĩ wa ũla vasia, na ninywʼĩ mũkeanĩasya ũthũkũmi ũsu. Nĩnĩmũnengete ũthũkũmi wa ũthembi ta mũthĩnzĩo, na mũndũ ũte mwĩtĩkĩlye* o na wĩva athengeea vo aĩlĩte kũawa.”

8 Na Yeova aneena ĩngĩ na Alũni, aimwĩa: “Nyie mwene nĩnĩnenganĩte mokonĩ maku mĩvothi ĩla ĩkaumawʼa kwondũ wakwa. We na ana maku nĩnamũnenga kĩlungu kĩna kya syĩndũ syonthe ntheu ila syaumw’a nĩ Aisilaeli na nĩkyo mũkaaĩawa ĩvinda yonthe. 9 Kĩĩ nĩkyo mũkaaĩawa kuma nthembonĩ ila ntheu vyũ ivĩvĩtwʼe na mwaki: nthembo syonthe ila meũthemba, o vamwe na nthembo syoo sya lĩu na nthembo syoo sya naĩ na nthembo syoo sya ĩvĩtyo ila mandetee. Kĩu nĩ kĩndũ kĩtheu vyũ kwondũ waku na ana maku. 10 Kĩla wanengwa ũkakĩĩsaa wĩ vandũ vatheu vyũ. Kĩla mũndũũme nũtonya kũkĩya. Kĩkeethĩawa kĩndũ kĩtheu kwaku. 11 O na ĩngĩ, nĩnaũnenga mĩthĩnzĩo ĩla makaumasya vamwe na nthembo syonthe sya kũvyũlwʼa sya Aisilaeli. Nĩnĩnenganĩte syĩndũ isu kwaku na kwa ana maku na kwa eĩtu maku na nĩsyo mũkaaĩawa ĩvinda yonthe. Mũndũ o na wĩva mũtheu nyũmbanĩ yaku nũtonya kũya syĩndũ isu.

12 “Nĩnaũnenga mauta onthe maseo vyũ na mbinyu yonthe nzaũ na nzeo vyũ na lĩu wa mbaa ngetha, ũsyao wa mbee ũla makanenganae kwondũ wa Yeova. 13 Ũsyao wa mbee kwĩwʼa wa kyonthe kya nthĩ yoo, ũla makamũetea Yeova, ũkeethĩawa wĩ waku. Mũndũ o na wĩva mũtheu nyũmbanĩ yaku nũtonya kũũya.

14 “Syĩndũ syonthe syanenganwe kwa Ngai* nthĩnĩ wa Isilaeli ikatwʼĩkaa syaku.

15 “Kĩla ĩkithathi ya* syĩndũ syonthe syĩ thayũ* mamũetee Yeova, yĩthĩwe nĩ mũndũ kana nĩ nyamũ, yĩkeethĩawa yaku. Ĩndĩ vate ndĩi ũkoovoasya ĩkithathi ya* mũndũ, na ĩkithathi ya* nyamũ ila mbuku o nayo nĩwaĩlĩte kwovosya. 16 No nginya ũmovosye na ndĩvi ya wovosyo mavikya mwei ũmwe kwambata, kwosana na thooa ũla ũtwʼĩtwe wa sekeli itano* sya vetha, ithimĩtwe kwosana na kĩthimo kya sekeli ya vala vandũ vatheu.* Isu nĩ ngela 20.* 17 No nzaũ ĩla ĩsyaĩtwe mbee, katũlũme kala kasyaĩtwe mbee, kana mbũi ĩla ĩsyaĩtwe mbee ũtaĩlĩte kwovosya. Isu nĩ ntheu. No nginya ũmizangĩsye nthakame yasyo kĩthembeonĩ, na ũituma mathunya masyo matoa ta nthembo ĩvĩvĩtw’e na mwaki yĩthĩwe mũuke ũmwendeesya* Yeova. 18 Na nyama sya nyamũ isu ikeethĩawa syenyu. Ikeethĩawa syenyu o ta nyama ya kĩthũi ya nthembo ya kũvyũlwʼa na o ta nyama ya kũũ kwa aũme. 19 Mũvothi wʼonthe mũtheu ũla Aisilaeli makamumĩsya Yeova, nĩnamũnenga, we vamwe na ana maku na eĩtu maku, na nĩwʼo mũkaaĩawa ĩvinda yonthe. Ũsu ũkeethĩawa ũtianĩo wa mũnyũ* wa ĩvinda yonthe mbee wa Yeova kwondũ waku na ũsyao waku.”

20 Na Yeova aendeea kũneena na Alũni, aimwĩa: “Ndũkethĩwa na ũtiĩwa nthĩ yoo, na ndũkethĩwa na ngʼũndũ katĩ woo. Ninyie ngʼũndũ yaku na ũtiĩwa waku katĩ wa Aisilaeli.

21 “Yu sisya, nĩnanenga ana ma Livai ilungu syonthe sya ĩkũmi nthĩnĩ wa Isilaeli ta ũtiĩwa nũndũ wa ũthũkũmi ũla meanĩasya, nawʼo nĩ ũthũkũmi ũla ũkonanĩtye na ĩeema ya kũmbanĩa. 22 Andũ ma Isilaeli mayaĩlĩte ĩngĩ kũthengeea ĩeema ya kũmbanĩa, nũndũ meeka ũu makeethĩwa meeka naĩ na makakwʼa. 23 Alivai nĩmo makeanĩasya ũthũkũmi ũla ũkonanĩtye na ĩeema ya kũmbanĩa, na nĩmo makasũngĩa kwondũ wa ĩvĩtyo yoo. Mayaĩlĩte kwĩyosea ũtiĩwa katĩ wa Aisilaeli na ũsu nĩ ũtwʼĩo wa ĩvinda yonthe nzyawanĩ syenyu syonthe. 24 Nũndũ nĩnĩnengete Alivai kĩlungu kya ĩkũmi kya mũvothi ũla andũ ma Isilaeli makamumĩasya Yeova kĩthĩwe ũtiĩwa woo. Nĩkyo kĩtumi nĩmatavĩtye atĩĩ: ‘Katĩ wa Aisilaeli, mayaĩlĩte kwosa ũtiĩwa.’”

25 Na ĩndĩ Yeova aneena na Mose, aimwĩa: 26 “Neena na Alivai, na ũimea atĩĩ: ‘Mũkanengawe kĩlungu kya ĩkũmi kĩla nĩmũnengete kuma kwa Aisilaeli ta ũtiĩwa wenyu, nenyu no nginya mumasye kĩlungu kya ĩkũmi kya kĩlungu kĩu kya ĩkũmi mũnengetwe ta mũvothi kwondũ wa Yeova. 27 Na kĩu mwanengane kĩkatalawa o ta mũvothi wa lĩu wa mbaa ngetha mumĩtye kĩvũĩonĩ kyenyu ene kana ũsyao wʼonthe umĩte iangĩonĩ syenyu ene sya mbinyu na mauta. 28 Ũu nĩwʼo o nenyu mũkamũnengae Yeova mũvothi kuma ilungunĩ sya ĩkũmi ila mũkakwataa kuma kwa Aisilaeli, na kuma ilungunĩ isu mũkamũnengae mũthembi Alũni mũvothi wenyu kwondũ wa Yeova. 29 No nginya mũmumĩasye Yeova mũvothi wa kĩla mũthemba, na mũvothi ũsu ũkeethĩawa wĩ kĩla kĩseo vyũ kuma mĩthĩnzĩonĩ yenyu yonthe ĩla mũnengetwe ta kĩndũ kĩtheu.’

30 “Na no nginya ũmatavye atĩĩ: ‘Yĩla mwaumya kĩla kĩseo vyũ kuma mĩthĩnzĩonĩ ĩsu, kĩu kĩkatalawa ta kyumĩtwʼe nĩ Alivai kuma ũsyaonĩ wa kĩvũĩo kyoo ene na ũsyaonĩ wa iangĩonĩ syoo ene sya mbinyu kana mauta. 31 Na mũkaĩsaa kĩla kyatiala vamwe na mĩsyĩ yenyu mwĩ vandũ o na va, nũndũ nĩ ndĩvi yenyu kwondũ wa ũthũkũmi wenyu ũla ũkonanĩtye na ĩeema ya kũmbanĩa. 32 Mũikatalwa ta mwĩkĩte naĩ ethĩwa nĩmwaumya kĩla kĩseo vyũ kuma mĩthĩnzĩonĩ ĩsu, na mũyaĩlĩte o na vanini kũvukya syĩndũ ntheu sya Aisilaeli, nũndũ mweeka ũu mũkakwʼa.’”

19 Na Yeova aneena ĩngĩ na Mose e vamwe na Alũni, ayasya: 2 “Ũũ nĩwʼo mwĩao ũla Yeova ũmwĩaĩe: ‘Neena na Aisilaeli na ũimatavya kana maĩlĩte ũkũetea ngʼombe nga ndune ĩte na thĩna o na ũmwe na ĩtaailĩĩlwa ĩsoki. 3 Mwaĩle kũnenga mũthembi Eleasali ngʼombe ĩsu; nake nũkũmĩtwaa nza wa kambi, na ĩithĩnzĩwa vau mbee wake. 4 Ĩtina wa ũu, mũthembi Eleasali aĩlĩte kwosa nthakame ĩmwe yayo na ayĩinda kyaa kyake nthĩnĩ wayo na aimĩtalĩkya mavinda mũonza yelekele mbee wa ĩeema ya kũmbanĩa. 5 Kuma vau, ngʼombe ĩsu yaĩlĩte kũvĩvwʼa asyaĩĩsye. Kĩkonde kyayo* na nyama yayo na nthakame yayo vamwe na kyaa kyayo, syonthe no nginya ivĩvwʼe. 6 Ĩtina wa ũu, mũthembi aĩle kwosa mũtĩ wa mũtalakwe,* ũvonge wa ĩsovo, na kĩtambaa kĩtune mũno na aisyĩkya mwakinĩ vala ngʼombe ĩsu ĩkũvĩvĩwʼa. 7 Mũthembi amina kwĩka ũu, aĩle kũvũa ngũa syake na aithamba mwĩĩ na kĩwʼũ, na ĩtina wa ũu, eĩthĩwa atonya kũlika kambinĩ; ĩndĩ mũthembi ũsu eĩthĩwa e mũvuku nginya ĩ ya wĩoo.

8 “‘Ũla wavĩvya ngʼombe ĩsu aĩle kũvũa ngũa syake na kĩw’ũ na aithamba mwĩĩ na kĩwʼũ, na eendeea kwĩthĩwa e mũvuku nginya ĩ ya wĩoo.

9 “‘Ĩtina wa ũu, mũndũ mũtheu aĩle kũmbanyʼa mũu wa ngʼombe ĩsu na aiũtwaa vandũ vatheu nza wa kambi, na mũu ũsu waĩlĩte kwiwa nĩ ũmbano wa Aisilaeli nĩ kana ũtũmĩwe kũseũvya kĩwʼũ kya kũthesya. Ĩsu nĩ nthembo ya naĩ. 10 Ũla ũkũmbanyʼa mũu wa ngʼombe ĩsu aĩlĩte kũvũa ngũa syake na eendeea kwĩthĩwa e mũvuku nginya ĩ ya wĩoo.

“‘Ũũ ũkeethĩawa wĩ ũtwʼĩo wa ĩvinda yonthe kwondũ wa Aisilaeli na mũeni ũla ũtwĩe katĩ woo. 11 Mũndũ o na wĩva akiita mũndũ mũkwʼũ* akeethĩawa e mũvuku mĩthenya mũonza. 12 Mũndũ ũsu akeethĩawa aĩlĩte kwĩthesya na kĩwʼũ kĩu* mũthenyanĩ wa katatũ, na mũthenyanĩ wa mũonza akeethĩwa e mũtheu. Ĩndĩ ethĩwa ndanethesya mũthenyanĩ wa katatũ, mũthenyanĩ wa mũonza ndakethĩwa e mũtheu. 13 Mũndũ o na wĩva wakiita kimba kya mũndũ o na wĩva mũkwʼũ* na ndanethesya, nũvukĩtye ĩeema ya ũthaithi ya Yeova, na mũndũ ũsu no nginya avetangwe* katĩ wa Isilaeli. Nũndũ ndanaminzangĩwʼa kĩwʼũ kya kũthesya, akaendeeaa kwĩthĩwa e mũvuku. Ũvuku wake ũkeethĩawa ĩũlũ wake.

14 “‘Ũũ nĩwʼo mwĩao ũla ũkaatĩĩawa yĩla mũndũ wakwʼĩĩa ĩeemanĩ: Mũndũ o na wĩva walika ĩeemanĩ yĩu na mũndũ o na wĩva eĩ ĩeemanĩ yĩu akeethĩwa e mũvuku mĩthenya mũonza. 15 Mũio o na wĩva ũtoveewe ngunĩko ĩũlũ wawʼo ũkeethĩawa wĩ mũvuku. 16 Ethĩwa mũndũ e kĩthekanĩ na nĩwakiita mũndũ ũaĩtwe na ũvyũ kana kimba kana ĩvĩndĩ ya mũndũ kana vandũ vathikĩtwe mũndũ, akeethĩawa e mũvuku mĩthenya mũonza. 17 Kwondũ wa mũndũ ũsu mũvuku, mũu ũmwe wa nthembo ĩla yavĩvw’a ya naĩ waĩlĩte kwoswa na ũyĩkĩwa mũionĩ, na ĩndĩ ũyĩtĩkĩw’a kĩwʼũ kĩtavĩtwe mbulutinĩ.* 18 Ĩtina wa ũu, mũndũ mũtheu akoosa ũvonge wa ĩsovo na aiũinda kĩw’ũnĩ kĩu na aikĩtalĩkangĩlya ĩeema na mĩio yonthe ĩla yĩĩ vau na andũ ala meĩ vau na mũndũ ũla ũkiitie ĩvĩndĩ kana mũndũ ũaĩtwe kana kimba kana vandũ vathikĩtwe mũndũ. 19 Na ĩndĩ mũndũ ũsu mũtheu akakĩtalĩkangĩlya mũndũ ũla mũvuku mũthenyanĩ wa katatũ na mũthenyanĩ wa mũonza, na mũthenyanĩ wa mũonza akamũthesya naĩ yake. Ĩtina wa ũu, no nginya avũe ngũa syake na aithamba na kĩwʼũ, na akeethĩwa mũtheu ĩ ya wĩoo.

20 “Ĩndĩ ethĩwa mũndũ nĩ mũvuku na ndanethesya, no nginya mũndũ ũsu avetangwe* ũmbanonĩ, nũndũ nũvukĩtye vala vandũ vatheu va Yeova. Ndanaminzangĩwʼa kĩwʼũ kya kũmũthesya, na kwoou nĩ mũvuku.

21 “‘Ũũ ũkeethĩwa wĩ ũtwʼĩo kwondũ woo ĩvinda yonthe: No nginya mũndũ ũla ũkũtalĩkangya kĩw’ũ kya kũthesya avũe ngũa syake, na ũla wakiita kĩwʼũ kya kũthesya akeethĩawa e mũvuku nginya ĩ ya wĩoo. 22 Kĩndũ o na kĩva kĩla mũndũ mũvuku wakiita kĩkeethĩawa kĩ kĩvuku, na mũndũ ũla wakĩkiita akethĩawa e mũvuku nginya ĩ ya wĩoo.’”

20 Mweinĩ wa mbee, ũmbano wʼonthe wa Aisilaeli nĩwavikie weũnĩ wa Nzini, na andũ mambĩĩa kũtũa Katesi. Vau nĩ vo Miliamu wakwʼĩĩe na athikwa.

2 Yu ĩndĩ, vayaĩ na kĩwʼũ kwondũ wa ũmbano ũsu, na moombana vamwe manyungunyĩsye Mose na Alũni. 3 Na andũ mambĩĩa kũtetya Mose, mayasya: “Nĩ kavaa keka twakwie yĩla ana-a-ia maitũ makwie me mbee wa Yeova! 4 Nĩkĩ mwaetie ũmbano wa Yeova weũnĩ ũũ nĩ kana tũkwʼĩĩe vaa na indo sitũ? 5 Na nĩkĩ mwatwambatisye kuma Misili mũtũete vandũ vaa vathũkĩte ũu? Vandũ vaa o na vaimea mbeũ, mĩkũyũ, mĩsavivũ, na mĩkũngũmanga, na vai kĩw’ũ kĩnyuwa!” 6 Nĩvo ĩndĩ Mose na Alũni maumie mbee wa ũmbano na mathi mũomonĩ wa ĩeema ya kũmbanĩa na mavalũka nthĩ na mothyũ moo, na ũtheu mũtisu wa Yeova wambĩĩa kũmaumĩlĩĩla.

7 Na ĩndĩ Yeova amwĩa Mose: 8 “Osa ĩla ndata na ũyũmbanyʼa ũmbano vamwe, we na Alũni mwana-a-inyia waku, na mũineena na ĩvia mbee wa metho moo nĩ kana yumye kĩwʼũ kyayo, na nũkumya kĩwʼũ ĩvianĩ yĩu kwondũ woo na ũinenga ala me ũmbanonĩ vamwe na indo syoo kĩwʼũ kya kũnywʼa.”

9 Na kwoou Mose oosa ĩla ndata kuma vala yaĩ mbee wa Yeova, o tondũ wamwĩaĩe. 10 Na ĩndĩ Mose na Alũni moombanĩsya ũmbano vau mbee wa ĩvia, na asya: “Ĩthukĩĩsyei, inywʼĩ andũ alei! Sisyai, nĩtũũmumĩsya kĩwʼũ ĩvianĩ yĩĩ!” 11 Na ĩndĩ Mose ookĩlya kw’oko kwake na akũna ĩvia yĩu kelĩ na ndata yake, na kĩw’ũ kingĩ kyambĩĩa kwĩtĩka na ala maĩ ũmbanonĩ mambĩĩa kũnywʼa kĩwʼũ vamwe na indo syoo.

12 Ĩtina Yeova nĩwaneenie na Mose na Alũni, na amea: “Nũndũ mũinonanyʼa kana nĩmũndĩkĩĩe na mũinangumya* mbee wa metho ma andũ ma Isilaeli, mũikalikya ala me ũmbanonĩ ũũ nthĩ ĩla ngamanenga.” 13 Kĩĩ nĩkyo kĩw’ũ kya Meliva,* vala Aisilaeli matetanisye na Yeova, na kĩu kyatuma akumwʼa* katĩ woo.

14 Nĩvo ĩndĩ Mose watũmie andũ kuma Katesi mathi vala ve mũsumbĩ wa Etomu, na mamwĩa: “Ũũ nĩwʼo mwana-a-inyia waku Isilaeli ũkwasya, ‘Nĩwĩsĩ nesa thĩna wʼonthe ũla tũkomanĩte nawʼo. 15 Aa-ĩthe maitũ nĩmaendie Misili, na nĩtwekalile Misili myaka* mingĩ, na Amisili nĩmatũthĩnisye na mathĩnyʼa aa-ĩthe maitũ. 16 Mũthya, nĩtwamwĩkaĩlile Yeova, na nĩwatwĩwie na atũma mũlaĩka na atumya Misili, na yu nithyĩ aa Katesi, ndũanĩ yĩ mũvakanĩ wa kĩsio kyaku. 17 Nĩtũũkwĩsũva ũtũeke twĩsĩle nthĩ yaku. Tũyĩĩsĩla mũũndanĩ o na wĩva kana vandũ ve mĩsavivũ, na tũinywʼa kĩwʼũ kya kĩthima o na kĩva. Twĩvĩta tũkinyĩle Lelũnĩ wa Mũsumbĩ tũte kwathũka ngalĩko ya kwʼoko kwa aũme kana kwʼoko kwa aka nginya tũvĩtũke kĩsio kyaku.’”

18 Ĩndĩ Etomu amwĩa atĩĩ: “Ndũkatate kwĩsĩla kĩsionĩ kitũ. Weeka ũu, ngaumaala na ũvyũ nĩkomane naku.” 19 Na Aisilaeli meewʼa ũu mamwĩa: “Ithyĩ twĩambata twĩsĩle lelũnĩ, na twanyw’a kĩwʼũ kyaku kana indo sitũ syakĩnyw’a, nĩtũũkũĩva. Kĩla tũkwenda no kwĩsĩla kĩsionĩ kyaku na maaũ.” 20 Ĩndĩ o na vailye ũu, asya: “Mũikatate kwĩsĩla vaa.” Na kwoou Etomu aumaala akomane namo e na andũ aingĩ na nguthu ya asikalĩ yĩ* vinya. 21 Na Etomu asiĩĩa Aisilaeli kwĩsĩla kĩsionĩ kyake; na nũndũ wa ũu, Aisilaeli mavĩndũka.

22 Na andũ ma Isilaeli, onthe ala maĩ ũmbanonĩ, makũsya kuma Katesi na mathi nginya Kĩĩmanĩ kya Olu. 23 Na Yeova aneena na Mose na Alũni me Kĩĩmanĩ kya Olu mũvakanĩ wa nthĩ ya Etomu, aimea: 24 “Alũni nũkũmbanw’a na andũ make.* Ndelika nthĩ ĩla nganenga Aisilaeli, nũndũ mwĩ elĩ nĩmwaleanile na mwĩao wakwa ũla naumisye ĩũlũ wa kĩw’ũ kya Meliva. 25 Osa Alũni na mwanae Eleasali na ũimambatya Kĩĩmanĩ kya Olu. 26 Mwavika, umya Alũni ngũa syake sya ũthembi na ũimwĩkĩa Eleasali mwana wake ngũa isu, na Alũni nũkũkwʼĩĩa vau.”*

27 Mose nĩweekie o ũndũ Yeova wamwĩaĩe, na malĩsa Kĩĩmanĩ kya Olu ũmbano wʼonthe ũsyaĩĩsye. 28 Na ĩndĩ Mose aumya Alũni ngũa syake sya ũthembi na amwĩkĩa Eleasali mwana wake ngũa isu. Ĩtina wa ũu, Alũni nĩwakwʼĩĩie vau kĩĩmanĩ ĩũlũ. Na Mose na Eleasali matheea kuma kĩĩmanĩ. 29 Na yĩla ũmbano wʼonthe woonie kana Alũni nĩwakwʼa, nyũmba yonthe ya Isilaeli yamũĩĩa Alũni mĩthenya 30.

21 Yĩla mũsumbĩ wa Alati, ũla waĩ Mũkanaanĩ na watwĩe Nekevu, weewie kana Aisilaeli nĩmavikie kĩsionĩ mesĩle nzĩanĩ ya Athalimu, nĩwamavithũkĩie na oosa amwe moo ta mũtavo. 2 Na kwoou Aisilaeli meevĩtĩa Yeova, mayasya: “Ethĩwa nũũnengane andũ aa mokonĩ maitũ, vate ndĩi nĩtũkwananga ndũa syoo.” 3 Na Yeova eethukĩĩsya wasya wa Aisilaeli na anengane Akanaanĩ mokonĩ moo, na mamananga vamwe na ndũa syoo. Na nũndũ wa ũu, vandũ vau veetwa Olima.*

4 Nĩvo ĩndĩ maendeeie na kyalo kyoo kuma Kĩĩmanĩ kya Olu mesĩle nzĩa ya Ũkanga Mũtune nĩ kana melingĩle nthĩ ya Etomu, ĩndĩ andũ manowʼa mũno nĩ kyalo kĩu. 5 Na andũ mambĩĩa kũneenea Ngai na Mose naĩ ĩngĩ na ĩngĩ, mayasya: “Nĩkĩ mwatumisye Misili nĩ kana tũkwʼĩĩe weũnĩ ũũ? Kũũ kũi lĩu na kũi kĩwʼũ, na twĩĩw’a tũmenie vyũ mũkate ũũ ũte vata.” 6 Na kwoou Yeova aetee andũ asu nzoka syĩ sumu,* na syambĩĩa kũmaũmanga, na nũndũ wa ũu, Aisilaeli aingĩ makwʼa.

7 Na kwoou andũ mathi vala ve Mose na mamwĩa: “Nĩtũvĩtĩtye nũndũ wa kũneena naĩ ĩũlũ wa Yeova na ĩũlũ waku. Neena na Yeova kwondũ witũ nĩ kana atũvetangĩe nzoka ii.” Na Mose aneena na Ngai kwondũ wa andũ. 8 Na ĩndĩ Yeova eea Mose atĩĩ: “Seũvya mũvwʼano wa nzoka yĩ sumu* na ũiũkwatĩlĩĩlya kĩtuĩnĩ. Na ĩndĩ mũndũ o na wĩva aũmwa, akeethĩawa aĩlĩte kũsisya mũvwʼano ũsu nĩ kana aendeee kwĩkala thayũ.” 9 Na vau kwa vau, Mose aseũvya nzoka ya ũthuku na amĩkwatĩlĩĩlya kĩtuĩnĩ, na kĩla ĩvinda mũndũ waũmwa nĩ nzoka na aisisya nzoka ĩsu ya ũthuku, ndakusaa.

10 Ĩtina wa ũu, Aisilaeli nĩmakũisye na mamba kambi Ovothi. 11 Na ĩndĩ makũsya kuma Ovothi na mamba kambi Iye-avalimu, weũnĩ ũla ũsianĩtye na Moavi, kwelekela ngalĩko ya wumĩlonĩ wa sua. 12 Mauma vau mambie kambi vakuvĩ na Mwanda wa* Nzeleti. 13 Kuma vau, nĩmakũisye na mamba kambi kĩsionĩ kya Alinoni, kĩla kĩ weũnĩ ũla wambĩĩe mũvakanĩ wa Aamoli; kĩsio kya Alinoni nĩkyo mũvaka wa Moavi, na kĩvakanĩtye Moavi na Aamoli. 14 Nĩkyo kĩtumi Ĩvuku ya Makaũ ma Yeova yĩwetete “kĩsio kya Vaevu kĩla kĩ Suva na myanda ya Alinoni, 15 na mũvaũũko* wa myanda ĩsu, ũla ũtheete welekele ndũanĩ ya Ali na ũkathi ũkuumanĩte na mũvaka wa Moavi.”

16 Kuma vau maendie Mbeeli. Kĩu nĩkyo kĩla kĩthima Yeova waneenie na Mose ĩũlũ wakyo, aimwĩa: “Ũmbanyʼa andũ, nĩ kana nĩmanenge kĩw’ũ.”

17 Ĩvinda yĩu, Isilaeli nĩmainie wathi ũũ:

“Vulutya, we kĩthima! Oseleelai!*

Na ĩndĩ mauma vau weũnĩ na mathi Matana, 19 na kuma Matana mathi Naalieli, na kuma Naalieli mathi Mbamothi. 20 Nĩmaumie Mbamothi na mathi mwandanĩ ũla wĩ kĩsionĩ kya* Moavi, na mambata nginya ĩũlũ kĩsionĩ kya Visika, kĩla kĩsianĩtye na Yesimoni.*

21 Na ĩndĩ Aisilaeli matũma andũ makaneene na Sioni mũsumbĩ wa Aamoli, na mamwĩa: 22 “Tũeke twĩsĩle nthĩ yaku. Tũiathũka tũlike mũũndanĩ kana vandũ vavandĩtwe mĩsavivũ. Tũinywʼa kĩwʼũ kĩthimanĩ o na kĩmwe. Twĩvĩta tũkinyĩle Lelũnĩ wa Mũsumbĩ nginya tũvĩtũke kĩsio kyaku.” 23 Ĩndĩ Sioni ndaaĩtĩkĩlya Aisilaeli mesĩle kĩsionĩ kyake. Vandũ va ũu, Sioni nĩwoombanisye andũ make onthe na athi akokite na Aisilaeli weũnĩ, na ĩndĩ avika Yaasi na ambĩĩa kũkita namo. 24 Ĩndĩ andũ ma Isilaeli nĩmamũsindie na ũvyũ na moosa nthĩ yake kuma Alinoni nginya Yavoki, vakuvĩ na Aamimoni, nũndũ Yaseli ĩvakene na kĩsio kya Aamimoni.

25 Na kwoou Aisilaeli moosa ndũa isu syonthe, na mambĩĩa kũtũa ndũanĩ syonthe sya Aamoli, na ndũa ĩmwe katĩ wa isu yaĩ Esivoni na tũtũla twayo* twʼonthe. 26 Nũndũ Esivoni yaĩ ndũa ya Sioni, mũsumbĩ wa Aamoli, ũla wokitĩte na mũsumbĩ wa Moavi na akamũvena nthĩ yake yonthe nginya Mwandanĩ wa Alinoni. 27 Ũsu nĩwʼo waĩ mwambĩlĩĩlyo wa ndeto ii sya kĩvũthya ineenawa na nthimo:

“Ũka Esivoni.

Eka ndũa ya Sioni yakwe na ĩilũlũmĩĩlw’a vyũ.

28 Nũndũ mwaki nĩwaumie Esivoni, na ũlĩlĩnzĩ wa mwaki kuma ndũanĩ ya Sioni.

Mwaki nũvĩvĩtye Ali ya Moavi, nũvĩvĩtye eai ma kũndũ kũtũlu kwa Alinoni.

29 Kyeva nĩ kwaku, we Moavi! Nĩmũkwanangwa, inywʼĩ andũ ma Kemosi!

Nũtumĩte ana make mathi kwĩvitha na eĩtu make matavwa nĩ Sioni, mũsumbĩ wa Aamoli.

31 Na kwoou Aisilaeli mambĩĩa kũtũa nthĩ ya Aamoli. 32 Na ĩndĩ Mose atũma aũme makathiane ndũa ya Yaseli. Na masinda tũtũla twayo* na matũkwata na malũngya Aamoli ala maĩ kũu. 33 Kuma vau nĩmavĩndũkie na mambata mesĩle Nzĩanĩ ya Mbasani. Na Oku mũsumbĩ wa Mbasani aumaala na andũ make onthe okite namo ndũanĩ ya Etilei. 34 Na Yeova amwĩa Mose: “Ndũkamũkĩe, nũndũ nĩngũmũnengane vamwe na andũ make onthe na nthĩ yake mokonĩ maku, na wĩmwĩka o ũndũ wamwĩkie Sioni mũsumbĩ wa Aamoli, ũla wekalaa Esivoni.” 35 Na kwoou maendeea kũmũkũna, vamwe na ana make na andũ make onthe, nginya weethĩa vai mũndũ o na ũmwe wake ũnatiala e thayũ, na moosa nthĩ yake.

22 Na ĩndĩ Aisilaeli mombũũka na mamba kambi yalatanĩ ĩtindimalu ya Moavi mũingo wa Yolotani masianĩtye na Yeliko. 2 Na Mbalaki mwana wa Nzivoli nĩwoonie maũndũ onthe ala Aisilaeli meekĩte Aamoli, 3 na Moavi atwʼĩka nda nũndũ wa andũ asu, nĩkwĩthĩwa maĩ aingĩ mũno; ĩĩ, Moavi nĩwakwatiwe nĩ wia nũndũ wa Aisilaeli na amamena mũno. 4 Na kwoou Moavi aneena na atumĩa ma Mitiani, aimea: “Yu ũmbano ũũ wĩnyenya vyũ kĩsio kitũ kyonthe, o tondũ nzaũ ĩnyenyaa vyũ nyeki ĩla yĩ kĩsesinĩ.”

Ĩvindanĩ yĩu Mbalaki mwana wa Nzivoli nĩwe waĩ mũsumbĩ wa Moavi. 5 Nĩwatũmie andũ vala ve Mbalaamu mwana wa Mbeoli kũu Vetholi, na vo nĩ vakuvĩ na ũla Ũsĩ* nthĩ ĩla ũsyaĩtwe. Amũtũmanie oke, ayasya: “Sisya! Vaa ve andũ maumĩte Misili. Na sisya! Nĩmausũĩte nthĩ, na matwĩe vaa vakuvĩ nakwa. 6 Yu ĩndĩ, nĩngũkwĩsũva ũke na ũiumanĩa andũ aa kwondũ wakwa, nũndũ me vinya kwĩ inyie. No kwĩthĩwa nĩvota kũmakĩlya vinya na ndimalũngya nthĩ ĩno, nũndũ nĩnĩsĩ nesa ki kana ũla waathima nũathimĩkaa na ũla waumanĩa nũkwatawa nĩ kĩumo.”

7 Na kwoou atumĩa ma Moavi na atumĩa ma Mitiani makwata nzĩa makuĩte ndĩvi ya kwaũsya mokonĩ moo na mathi vala ve Mbalaamu na mamũtavya ndeto sya Mbalaki. 8 Nĩvo ĩndĩ Mbalaamu wameie atĩĩ: “Komelai vaa ũtukũ wa ũmũnthĩ, na nĩngũka kũmũtavya ndeto o na yĩva ĩla Yeova ũkũndavya.” Na kwoou anene asu me mbee ũsumbĩnĩ wa Moavi mekala na Mbalaamu.

9 Na ĩndĩ Ngai amumĩlĩĩla Mbalaamu na asya: “Aũme aa me naku naaũ?” 10 Nake Mbalaamu asũngĩa Ngai ũla wa w’o amwĩa: “Mbalaki mwana wa Nzivoli, mũsumbĩ wa Moavi, nĩwatũmana kũla nĩĩ, ayasya, 11 ‘Sisya! Andũ aa maumĩte Misili nĩmausũĩte nthĩ. Yu ũka na ũimaumanĩa kwondũ wakwa. No kwĩthĩwa ndonya kũmokita na kũmalũngya kũũ.’” 12 Ĩndĩ Ngai eea Mbalaamu atĩĩ: “Ndũkatate kũendanyʼa namo. Na ndũkatate kũumanĩa andũ asu, nũndũ mo nĩ aathime.”

13 Ũnĩ ũsu kwakya yĩla Mbalaamu wookĩlile nĩwaneenie na anene asu me mbee ũsumbĩnĩ wa Mbalaki amea: “Syokai nthĩ yenyu, nũndũ Yeova ndanambĩtĩkĩlya kũendanyʼa nenyu.” 14 Na kwoou anene asu me mbee ũsumbĩnĩ wa Moavi makũsya na masyoka vala ve Mbalaki na mamwĩa: “Mbalaamu nĩwalea kũkanyʼa naitũ.”

15 Ĩndĩ Mbalaki atũma ĩngĩ anene me mbee ũsumbĩnĩ, aingangĩ na ma ndaĩa mũnango kwĩ ala ma mbee. 16 Na yĩla mavikie vala ve Mbalaamu mamwĩa: “Ũũ nĩwʼo Mbalaki mwana wa Nzivoli ũkwasya, ‘Nĩngũkwĩsũva, ndũkaeke ũndũ o na ũmwe ũũsiĩĩe kũka vala nĩĩ, 17 nũndũ nĩngũũtaĩa mũno na nĩngwĩka ũndũ o na wĩva ũla ũũmbĩa nĩke. Kwoou nĩngũkwĩsũva, ũka ũumanĩe andũ aa kwondũ wakwa.’” 18 Ĩndĩ Mbalaamu asũngĩa athũkũmi ma Mbalaki amea: “O na Mbalaki akanenga nyũmba yake mwene yusĩe vetha na thaavu, ndyĩsa kwĩka ũndũ o na ũmwe ũũvĩtũũkana na mwĩao wa Yeova Ngai wakwa, wĩthĩwe nĩ mũnini kana nĩ mũnene. 19 Ĩndĩ nĩngũmwĩsũva, o nenyu ĩkalai vaa ũtukũ wa ũmũnthĩ, nĩ kana nĩmanye ethĩwa ve ũndũ ũngĩ Yeova ũkũndavya.”

20 Nĩvo ĩndĩ Ngai wamumĩlĩĩile Mbalaamu ũtukũ na amwĩa: “Ethĩwa aũme aa meeka ũkwĩsĩa, endanyʼa namo. Ĩndĩ ũkaneena o ndeto ila ngakwĩa ũneene.” 21 Na kwoou Mbalaamu ookĩla ũnĩ wake kwakya na ailĩĩla matandĩko ĩng’oinĩ* yake na aendanyʼa na anene asu me mbee ũsumbĩnĩ wa Moavi.

22 Ĩndĩ ũthatu wa Ngai wakana nũndũ nĩwaendete, na mũlaĩka wa Yeova aũngama lelũnĩ nĩ kana amũsiĩĩe. Ĩvindanĩ yĩu Mbalaamu atwaĩte ĩng’oi yake, na athũkũmi make elĩ maĩ vamwe nake. 23 Na ĩng’oi yoona mũlaĩka wa Yeova aũngeme lelũnĩ akũĩte ũvyũ na akaũkwata na kwʼoko kwake, yatata kwathũka ũtee wa lelũ na yalika kĩthekanĩ. Ĩndĩ Mbalaamu ambĩĩa kũyĩvũa nĩ kana yĩsyoke lelũnĩ. 24 Nĩvo ĩndĩ mũlaĩka wa Yeova waũngamie kasĩlanĩ katheke kaĩ na ngũta sya mavia ngalĩko syelĩ na kaĩ katĩkatĩ wa mĩũnda ĩlĩ ya mĩsavivũ. 25 Na yĩla ĩng’oi yĩu yoonie mũlaĩka wa Yeova, yambĩĩa kwĩngʼengʼeesya ũkũtanĩ na yavinyĩanĩsya kũũ kwa Mbalaamu ũkũtanĩ, na Mbalaamu ambĩĩa kũyĩvũa ĩngĩ.

26 Na ĩndĩ mũlaĩka wa Yeova ayĩkelana ĩngĩ na aũngama vandũ vatheke yĩtaĩ yĩmwathũkĩa ngalĩko ya kwʼoko kwa aũme kana ya kwʼoko kwa aka. 27 Na yĩla ĩng’oi yĩu yoonie mũlaĩka wa Yeova, yatindia Mbalaamu ayĩkalĩle, na kwoou Mbalaamu athilĩka na aendeea kũyĩvũa na ndata yake. 28 Mũthya, Yeova nĩwatumie ĩng’oi yĩu yĩneena,* na yamwĩa Mbalaamu: “Nakwĩka ata nĩ kana ũmbũe mavinda aa atatũ?” 29 Na Mbalaamu asũngĩa ĩng’oi ayĩa: “Nĩũvũa nũndũ wĩngua ta ndia. Keka nĩ na ũvyũ kw’okonĩ kwakwa, nĩka ũkũaa!” 30 Nĩvo ĩndĩ ĩng’oi yĩu yamũkũlilye Mbalaamu atĩĩ: “Nyie ndi ĩng’oi yaku na ndyĩthĩĩtwe ndiũkua thayũnĩ waku wʼonthe nginya ũmũnthĩ? Ve ĩvinda yĩngĩ naakwĩka ũu?” Nake ayĩsũngĩa: “Aiee!” 31 Na ĩndĩ Yeova asalukya metho ma Mbalaamu, na oona mũlaĩka wa Yeova aũngeme lelũ, akũĩte ũvyũ na akaũkwata na kwʼoko kwake. Na vau kwa vau Mbalaamu akumana nginya nthĩ na avalũka nthĩ na ũthyũ wake.

32 Nĩvo ĩndĩ mũlaĩka wa Yeova wamwĩie: “Nĩkĩ wavũa ĩng’oi yaku mavinda aa atatũ? Sisya! Nyie mwene nĩnũkie ngũsiĩĩe, nũndũ kyalo kyaku nĩkĩũleana na kwenda kwakwa. 33 Ĩng’oi yĩĩ nĩyĩmbonie na yatata kũmbathũkĩa mavinda aa atatũ. Kwasũanĩa ta kethĩwa yĩinambathũkĩa! Kũvika yu nĩthĩwa ngũwaĩte na ngaekana na ĩngʼoi yĩkale thayũ.” 34 Na Mbalaamu eea mũlaĩka wa Yeova atĩĩ: “Nĩneeka naĩ, nũndũ ndyĩĩsĩ kana nue ũũngeme lelũ ũkomane nakwa. Na yu ethĩwa ũndũ ũũ nĩ mũthũku methonĩ maku, nĩngũsyoka.” 35 Ĩndĩ mũlaĩka wa Yeova amwĩa Mbalaamu atĩĩ: “Endanyʼa na aũme aa, ĩndĩ wĩneena ndeto o ila ngũũtavya.” Na kwoou Mbalaamu aendeea na kyalo kyake e na anene asu maĩ mbee ũsumbĩnĩ wa Mbalaki.

36 Yĩla Mbalaki weewie kana Mbalaamu nĩwooka, nĩwaumaalile na mĩtũkĩ na athi makomanĩe ndũanĩ ya Moavi, ĩla yĩ ũtumonĩ wa Alinoni mũvakanĩ wa kĩsio kĩu. 37 Na Mbalaki aneena na Mbalaamu amwĩa: “Nyie ndineeũtũmana? Nĩkĩ ũtaneeũka? Ko ũnoonaa ta ndatonya kũtuma ũtaĩwa mũno?” 38 Nake Mbalaamu amũsũngĩa Mbalaki amwĩa: “Yu ninyioo. Ĩndĩ nyie nĩngwĩtĩkĩlwʼa nĩwete kĩndũ? Ndeto ila Ngai ũkwĩkĩa kanywʼanĩ wakwa nosyo ngwĩthĩwa ndonya kũneena.”

39 Na ĩndĩ Mbalaamu aendanyʼa na Mbalaki, na mathi nginya Kiliathi-usothi. 40 Na Mbalaki athemba ngʼombe na malondu na anengane imwe itwaĩwe Mbalaamu na anene me mbee ũsumbĩnĩ ala maĩ vamwe nake. 41 Ũnĩ ũsu kwakya Mbalaki nĩwamwosie Mbalaamu na amwambatya nginya Mbamothi-mbaali; me vau aĩ atonya kwona andũ onthe.

23 Na ĩndĩ Mbalaamu amwĩa Mbalaki: “Aka ithembeo mũonza vaa, na ũinzeũvĩsya nzaũ mũonza na ndũũme mũonza.” 2 Na vau kwa vau Mbalaki eeka o tondũ Mbalaamu wamwĩie. Na Mbalaki e na Mbalaamu mathemba nzaũ ĩmwe na ndũũme ĩmwe ĩũlũ wa kĩla kĩmwe kya ithembeo isu. 3 Nĩvo ĩndĩ Mbalaamu weeie Mbalaki: “Ĩkala vaa ũtee wa nthembo yaku ya kũvĩvwʼa, nakwa nĩngũthi. Noĩthwa Yeova akaneena nakwa. Na kyonthe kĩla ũkũmbuanĩsya, nĩkyo ngũũtavya.” Na kwoou athi kalĩmanĩ kaĩ kathei.

4 Na ĩndĩ Ngai aneena na Mbalaamu, na Mbalaamu amwĩa: “Nĩnĩseũvisye ithembeo mũonza iatĩanĩe, na nathemba nzaũ ĩmwe na ndũũme ĩmwe ĩũlũ wa kĩla kĩmwe kya ithembeo isu.” 5 Na Yeova eekĩa ndeto ii kanywʼanĩ wa Mbalaamu: “Syoka vala ve Mbalaki, na ũũ nĩwʼo ũũmũtavya.” 6 Na kwoou asyoka na eethĩa Mbalaki e vamwe na anene onthe me mbee ũsumbĩnĩ wa Moavi maũngamĩte ũtee wa nthembo yake ya kũvĩvwʼa. 7 Na ĩndĩ aneena na nthimo, ayasya:

‘Ũka ũumanĩe Yakovo kwondũ wakwa.

Ĩĩ, ũka ũkaĩe ũseo wa Isilaeli.’

 8 Ndonya ata kũumanĩa ala Ngai ũtaumanĩĩte?

Na ndonya ata kũmatwʼa athũku ala Yeova ũtamatwʼĩte athũku?

11 Na ĩndĩ Mbalaki amwĩa Mbalaamu: “Yu wambĩka ata? Ngũetie nĩ kana ũumanĩe amaitha makwa, na yu vandũ va ũu, weeka kũmaathima.” 12 Nake amũsũngĩa: “Yo nyie ndyaĩle o kũneena kĩla Yeova weekĩa kanywʼanĩ wakwa?”

13 Na Mbalaki amwĩa: “Nĩngũkwĩsũva tũthi vandũ vangĩ ũkwĩthĩwa ũtonya kũmona. Wĩona o amwe moo; ndwĩmona onthe. Na ĩndĩ twĩ vau maumanĩe kwondũ wakwa.” 14 Na kwoou ambata nake nginya kĩsesinĩ kya Nzovimu, kĩla kĩ kĩsionĩ kya Visika, na aaka ithembeo mũonza na athemba nzaũ ĩmwe na ndũũme ĩmwe ĩũlũ wa kĩla kĩmwe kya ithembeo isu. 15 Kwoou Mbalaamu amwĩa Mbalaki: “Ĩkala vaa ũtee wa nthembo yaku ya kũvĩvwʼa nakwa nĩngũthi vaya nĩneene na Ngai.” 16 Na Yeova aneena na Mbalaamu na eekĩa ndeto ĩĩ kanywʼanĩ wake: “Syoka vala ve Mbalaki, na ũũ nĩwʼo ũũmũtavya.” 17 Na ĩndĩ Mbalaamu asyoka vala ve Mbalaki na amwĩthĩa eteele ũtee wa nthembo yake ya kũvĩvwʼa, e vamwe na anene me mbee ũsumbĩnĩ wa Moavi. Na Mbalaki amũkũlya: “Yeova asya ata?” 18 Na ĩndĩ aneena na nthimo, ayasya:

“Ũkĩla, Mbalaki, na ũitea kũtũ.

Mbĩthukĩĩsye, we mwana wa Nzivoli.

Aweta ũndũ, we ndawĩkaa?

Aneena, we ndeanĩasya?

22 Ngai nũmaumĩtye Misili.

Ailye ta mbya sya nzaũ ya kĩthekanĩ sya kũmaseseea.

Ĩvindanĩ yĩĩ ũndũ ũũ nĩwʼo ũtonya kũwetwa ĩũlũ wa Yakovo na Isilaeli:

‘Sisya kĩla Ngai wĩkĩte!’

25 Nĩvo ĩndĩ Mbalaki weeie Mbalaamu: “Ethĩwa ndũtonya kũmaumanĩa, o na kũmaathima ndwaĩle kũmaathima.” 26 Na Mbalaamu amwĩa Mbalaki: “Nyie ndineekwĩa, ‘Nĩĩka kyonthe kĩla Yeova ũkũweta’?”

27 Na ĩndĩ Mbalaki amwĩa Mbalaamu: “Nĩngũkwĩsũva ũmbĩtĩkĩlye ngũtwae vandũ vangĩ. Noĩthwa Ngai ũla wa wʼo atonya kũkwĩtĩkĩlya ũumanĩe andũ aa kwondũ wakwa wĩ vau.” 28 Na kwoou Mbalaki amwambatya Mbalaamu kĩsionĩ kĩ mũthyanĩ wa Veoli, kĩla kĩsianĩtye na Yesimoni.* 29 Na ĩndĩ Mbalaamu amwĩa Mbalaki: “Aka ithembeo mũonza vaa, na ũinzeũvĩsya nzaũ mũonza na ndũũme mũonza.” 30 Na kwoou Mbalaki eeka o tondũ Mbalaamu waisye, na athemba nzaũ ĩmwe na ndũũme ĩmwe ĩũlũ wa kĩla kĩmwe kya ithembeo isu.

24 Yĩla Mbalaamu woonie kana Yeova endaa* kũathima Isilaeli, ndaathi ĩngĩ kũmanthĩthya kana ve maũndũ mathũku mameteele, ĩndĩ athyũũie ũthyũ wake asisye weũnĩ. 2 Na yĩla Mbalaamu wookĩlilye metho na oona Aisilaeli mambĩte maeema kwosana na mbaĩ syoo, veva wa Ngai wooka ĩũlũ wake. 3 Na ĩndĩ aneena na nthimo, ayasya:

10 Nĩvo ĩndĩ Mbalaki wathilĩkĩile Mbalaamu. Na Mbalaki akũnanyʼa moko make na kĩvũthya na amwĩa Mbalaamu: “Nĩnakwĩtie nĩ kana ũumanĩe amaitha makwa, ĩndĩ vandũ va ũu, mavindanĩ aa atatũ wĩkĩte o kũmaathima. 11 Yu syoka kwaku na mĩtũkĩ. Nĩnavangĩte ũkũtaĩa mũno, ĩndĩ sisya! Yeova nĩwaũvata ndaĩa ĩsu.”

12 Na Mbalaamu amũsũngĩa Mbalaki amwĩa: “Nyie ndyaatavya aũme ala watũmĩte atĩĩ: 13 ‘O na Mbalaki akanenga nyũmba yake yusĩe vetha na thaavu, ndyĩsa kwĩka na ngenda* ũndũ o na ũmwe ũũvĩtũũkana na mwĩao wa Yeova, wĩthĩwe nĩ mũseo kana nĩ mũthũku, na kana nganeena o kĩla Yeova ũkũndavya’? 14 Na yu nĩngũsyoka kwa andũ makwa. Ũka ngũtavye maũndũ ala andũ aa makeka andũ maku ĩvinda yũkĩte.”* 15 Na kwoou aneena na nthimo, ayasya:

20 Na yĩla woonie Amaleki, aendeea kũneena na nthimo, ayasya:

21 Na yĩla woonie Akeni, aendeea kũneena na nthimo, ayasya:

“Wĩkalo waku nĩ mũsũvĩĩku, na ũtũo waku wĩ ĩvianĩ ĩũlũ.

22 Ĩndĩ mũndũ akavĩvya Akeni.*

Vevĩta ĩvinda yĩana ata Aasuli mataũtavĩte?”

23 Na aendeea kũneena na nthimo, ayasya:

“Nĩ kyeva ta kĩ! Nũũ ũkavonoka yĩla Ngai ũkeka ũu?

Ĩndĩ o nake akathela vyũ.”

25 Na ĩndĩ Mbalaamu ookĩla na athi na asyoka kwake. Na Mbalaki o nake akwata nzĩa ĩ yake athi.

25 Ĩvindanĩ yĩla Aisilaeli mekalaa Sitimu, andũ nĩmambĩĩie kwĩka ũlaalai na eĩtu ma Moavi. 2 Aka asu nĩmathokisye andũ asu maendanyʼe namo yĩla meũthi kũthembea ngai syoo, na andũ mambĩĩa kũya na kũkumanĩa ngai syoo. 3 Na kwoou Aisilaeli meelikya ũthaithinĩ* wa Mbaali ya Veoli, na Yeova athatwʼa nĩ Isilaeli. 4 Na ĩndĩ Yeova amwĩa Mose: “Osa atongoi* onthe ma andũ aa na ũimasũsya mbee wa Yeova sua yaĩte,* nĩ kana ũthatu wa Yeova ũeke kwakanĩa Isilaeli.” 5 Nĩvo ĩndĩ Mose weeie asili ma Isilaeli atĩĩ: “Kĩla ũmwe wenyu aĩle kũaa aũme make ala melikilye ũthaithinĩ wa* Mbaali ya Veoli.”

6 Ĩndĩ o kavindanĩ kau, ũmwe wa Aisilaeli asu aete mũndũ mũka Mũmitiani vakuvĩ na ana-a-asa make mbee wa Mose na ũmbano wʼonthe wa Aisilaeli, o kavindanĩ kala maendeee kũĩĩa mũomonĩ wa ĩeema ya kũmbanĩa. 7 Na yĩla Vineasi mwana wa Eleasali mwana wa mũthembi Alũni woonie ũndũ ũsu, ookĩla na mĩtũkĩ kuma katĩ wa ũmbano na oosa ĩtumo kwʼokonĩ kwake. 8 Na ĩndĩ aatĩĩa mũndũũme ũsu wa Isilaeli nginya ĩeemanĩ nthĩnĩ na amatonyanĩsya elĩ mũkuthũ, mũndũũme ũsu wa Isilaeli vamwe na mũndũ mũka ũsu, na ĩtumo yake yesĩla mamuthanĩ ma ũsyai ma mũndũ mũka ũsu. Na kwoou ũkũno ũsu waĩ ĩũlũ wa Isilaeli waũngamwʼa. 9 Ala mooaiwe nĩ ũkũno ũsu maĩ andũ 24,000.

10 Na ĩndĩ Yeova amwĩa Mose: 11 “Vineasi mwana wa Eleasali mwana wa mũthembi Alũni nĩwatuma nĩeka kũthilĩkĩla andũ ma Isilaeli nũndũ ndanomĩĩsya kwona maisindana nakwa o na vanini. Na kwoou ndinamina vyũ Aisilaeli o na kau nendaa mũno kũthaithwa nĩ weka. 12 Nũndũ wa ũu, asya atĩĩ: ‘Nĩngũtianĩa nake ũtianĩo wa mũuo. 13 Na ũtianĩo ũsu ũkeethĩawa ũtianĩo wa kũĩkĩĩthya kana ĩvinda yonthe ũthembi ũkeethĩawa wake na wa ũsyao wake ũla ũkoka ĩtina wake, nũndũ ndanomĩĩsya kwona andũ maisindana na Ngai wake na nĩweewʼanĩthya andũ ma Isilaeli na Ngai.’”

14 Yu ĩndĩ, mũndũũme Mũisilaeli ũla wooaiwe vamwe na mũndũ mũka ũsu Mũmitiani eetawa Nzimili mwana wa Salu, na aĩ mũnene wa nyũmba ya aa-ĩthe make mbaĩnĩ ya Simeoni. 15 Nake mũndũ mũka Mũmitiani ũla wooaiwe eetawa Kosivi na aĩ mwĩĩtu wa Nzuli; Nzuli aĩ mũtongoi wa mĩsyĩ ya aa-ĩthe kũu Mitiani.

16 Na ĩtina wa ĩvinda Yeova amwĩa Mose: 17 “Thĩnyʼa Amitiani na ũimananga, 18 nũndũ methĩĩtwe maimũthĩnyʼa kwa kũmũsesenga na ũseleke mwĩlikye maũndũnĩ ala mwĩlikĩtye makonanĩtye na Veoli na Kosivi mwĩĩtu wa mũnene wa Mitiani, mwĩĩtu-a-asa woo ũla wooaiwe mũthenya ũla Aisilaeli makwatiwe nĩ ũkũno nũndũ wa maũndũ ala meekĩkie makonanĩtye na Veoli.”

26 Ĩtina wa ũkũno ũsu, Yeova nĩwaneenie na Mose na Eleasali mwana wa mũthembi Alũni amea atĩĩ: 2 “Osai ũtalo wa andũ onthe ũmbanonĩ wa Aisilaeli ala me na myaka 20 kwambata, kwosana na nyũmba sya aa-ĩthe moo; mwĩtala onthe ala matonya kũlika itanĩ sya Isilaeli.” 3 Na kwoou Mose na mũthembi Eleasali maneena namo me yalatanĩ ĩtindimalu ya Moavi vakuvĩ na Yolotani kũu Yeliko, mayasya: 4 “Osai ũtalo woo kuma myaka 20 kwambata, o tondũ Yeova ũmwĩaĩe Mose.”

Yu ĩndĩ, ana ma Isilaeli ala maumie nthĩ ya Misili maĩ: 5 Leũveni, mwana ũla mũkũũ wa Isilaeli; ana ma Leũveni maĩ aa: kuma kwa Anoki, mũsyĩ wa Aanoki; kuma kwa Valu, mũsyĩ wa Avalu; 6 kuma kwa Esiloni, mũsyĩ wa Aesiloni; kuma kwa Kalimi, mũsyĩ wa Akalimi. 7 Ĩsu nĩyo yaĩ mĩsyĩ ya Aleũveni, na ũtalo wʼonthe wa ala maandĩkĩthiwʼe waĩ 43,730.

8 Mwana wa Valu aĩ Eliavu. 9 Na ana ma Eliavu maĩ Nemũeli, Ndathani, na Avilamu. Ndathani na Avilamu nĩmo ala manyuvĩtwe kuma ũmbanonĩ, ala mookĩlile maleane na Mose na Alũni me vamwe na kĩkundi kya Kola yĩla mookĩlile maleane na Yeova.

10 Na nthĩ nĩyaathamũkanie* na yamamelya. Ĩndĩ Kola mwene akwie e na ala mamũkwatĩte mbau yĩla mwaki wavĩvisye aũme 250. Na kĩu kyamakwatie kyatiiwe kĩ ngewa ya kũkanyʼa. 11 Ĩndĩ ana ma Kola mayaakwʼa.

12 Ana ma Simeoni kwosana na mĩsyĩ yoo maĩ aa: kuma kwa Nemũeli, mũsyĩ wa Anemũeli; kuma kwa Yamini, mũsyĩ wa Ayamini; kuma kwa Yakini, mũsyĩ wa Ayakini; 13 kuma kwa Nzela, mũsyĩ wa Anzela; kuma kwa Sauli, mũsyĩ wa Asauli. 14 Ĩsu nĩyo yaĩ mĩsyĩ ya Asimeoni: ũtalo woo wʼonthe waĩ 22,200.

15 Ana ma Ngati kwosana na mĩsyĩ yoo maĩ aa: kuma kwa Nzevoni, mũsyĩ wa Anzevoni; kuma kwa Aki, mũsyĩ wa Aaki; kuma kwa Suni, mũsyĩ wa Asuni; 16 kuma kwa Osini, mũsyĩ wa Aosini; kuma kwa Eeli, mũsyĩ wa Aeeli; 17 kuma kwa Aloti, mũsyĩ wa Aaloti; kuma kwa Aleli, mũsyĩ wa Aaleli. 18 Ĩsu nĩyo yaĩ mĩsyĩ ya ana ma Ngati, na ala maandĩkĩthiwʼe katĩ woo maĩ 40,500.

19 Ana ma Yuta maĩ Elu na Onani. Ĩndĩ Elu na Onani makwʼĩĩie nthĩ ya Kanaanĩ. 20 Na ana ma Yuta kwosana na mĩsyĩ yoo maĩ aa: kuma kwa Siela, mũsyĩ wa Asiela; kuma kwa Velesi, mũsyĩ wa Avelesi; kuma kwa Nzela, mũsyĩ wa Anzela. 21 Na ana ma Velesi maĩ aa: kuma kwa Esiloni, mũsyĩ wa Aesiloni; kuma kwa Amuli, mũsyĩ wa Aamuli. 22 Ĩsu nĩyo yaĩ mĩsyĩ ya Yuta, na ala maandĩkĩthiwʼe katĩ woo maĩ 76,500.

23 Ana ma Isakali kwosana na mĩsyĩ yoo maĩ aa: kuma kwa Tola, mũsyĩ wa Atola; kuma kwa Vuva, mũsyĩ wa Avuni; 24 kuma kwa Yasuvu mũsyĩ wa Ayasuvu; kuma kwa Similoni, mũsyĩ wa Asimiloni. 25 Ĩsu nĩyo yaĩ mĩsyĩ ya Isakali, na ala maandĩkĩthiwʼe katĩ woo maĩ 64,300.

26 Ana ma Nzevuluni kwosana na mĩsyĩ yoo maĩ aa: kuma kwa Seletu, mũsyĩ wa Aseletu; kuma kwa Eloni, mũsyĩ wa Aeloni; kuma kwa Yaleeli, mũsyĩ wa Ayaleeli. 27 Ĩsu nĩyo yaĩ mĩsyĩ ya Anzevuluni, na ala maandĩkĩthiwʼe katĩ woo maĩ 60,500.

28 Ana ma Yosevu kwosana na mĩsyĩ yoo maĩ aa: Manase na Evilaimu. 29 Ana ma Manase maĩ aa: kuma kwa Makili, mũsyĩ wa Amakili; na Makili nĩwe waĩ ĩthe wa Ngileati; kuma kwa Ngileati, mũsyĩ wa Angileati. 30 Ana ma Ngileati maĩ aa: kuma kwa Ieseli, mũsyĩ wa Aieseli; kuma kwa Eeleki, mũsyĩ wa Aeeleki; 31 kuma kwa Asilieli, mũsyĩ wa Aasilieli; kuma kwa Sekemu, mũsyĩ wa Asekemu; 32 kuma kwa Semita, mũsyĩ wa Asemita; kuma kwa Eevieli, mũsyĩ wa Aeevieli. 33 Yu ĩndĩ, Nzeloveati mwana wa Eevieli ndaĩ na kĩmwana o na kĩmwe, ĩndĩ aĩ na eĩtu me oka, na masyĩtwa ma eĩtu ma Nzeloveati maĩ Maala, Noa, Okila, Milika, na Tilisa. 34 Ĩsu nĩyo yaĩ mĩsyĩ ya Manase, na ala maandĩkĩthiwʼe katĩ woo maĩ 52,700.

35 Aa nĩmo maĩ ana ma Evilaimu kwosana na mĩsyĩ yoo: kuma kwa Suthela, mũsyĩ wa Asuthela; kuma kwa Mbekeli, mũsyĩ wa Ambekeli; kuma kwa Taani, mũsyĩ wa Ataani. 36 Na aa nĩmo maĩ ana ma Suthela: kuma kwa Elani, mũsyĩ wa Aelani. 37 Ĩsu nĩyo yaĩ mĩsyĩ ya ana ma Evilaimu, na ala maandĩkĩthiwʼe katĩ woo maĩ 32,500. Asu nĩmo maĩ ana ma Yosevu kwosana na mĩsyĩ yoo.

38 Ana ma Mbenyamini kwosana na mĩsyĩ yoo maĩ aa: kuma kwa Mbela, mũsyĩ wa Ambela; kuma kwa Asiveli, mũsyĩ wa Aasiveli; kuma kwa Ailamu, mũsyĩ wa Aailamu; 39 kuma kwa Sevuvamu, mũsyĩ wa Asevuvamu; kuma kwa Uvamu, mũsyĩ wa Auvamu. 40 Ana ma Mbela maĩ Aliti na Naamani: kuma kwa Aliti, mũsyĩ wa Aaliti; kuma kwa Naamani, mũsyĩ wa Anaamani. 41 Asu nĩmo maĩ ana ma Mbenyamini kwosana na mĩsyĩ yoo, na ala maandĩkĩthiwʼe katĩ woo maĩ 45,600.

42 Ana ma Ndani kwosana na mĩsyĩ yoo maĩ aa: kuma kwa Suamu, mũsyĩ wa Asuamu. Ĩsu nĩyo yaĩ mĩsyĩ ya Ndani kwosana na mĩvĩa yoo. 43 Ala maandĩkĩthiwʼe katĩ wa mĩsyĩ yonthe ya Asuamu maĩ 64,400.

44 Ana ma Aseli kwosana na mĩsyĩ yoo maĩ aa: kuma kwa Imina, mũsyĩ wa Aimina; kuma kwa Isivi, mũsyĩ wa Aisivi; kuma kwa Mbelia, mũsyĩ wa Ambelia; 45 kuma kwa ana ma Mbelia: kuma kwa Eeveli, mũsyĩ wa Aeeveli; kuma kwa Malikieli, mũsyĩ wa Amalikieli. 46 Mwĩĩtu wa Aseli eetawa Sela. 47 Ĩsu nĩyo yaĩ mĩsyĩ ya ana ma Aseli, na ala maandĩkĩthiwʼe katĩ woo maĩ 53,400.

48 Ana ma Navitali kwosana na mĩsyĩ yoo maĩ aa: kuma kwa Yaseeli, mũsyĩ wa Ayaseeli; kuma kwa Nguni, mũsyĩ wa Anguni; 49 kuma kwa Yeseli, mũsyĩ wa Ayeseli; kuma kwa Silemu, mũsyĩ wa Asilemu. 50 Ĩsu nĩyo yaĩ mĩsyĩ ya Navitali kwosana na mĩvĩa yoo, na ala maandĩkĩthiwʼe katĩ woo maĩ 45,400.

51 Ũũ nĩwʼo ũtalo wa Aisilaeli ala maandĩkĩthiwʼe: 601,730.

52 Na ĩtina wa ũu, Yeova amwĩa Mose: 53 “Andũ asu onthe maĩle kũaĩwa isio sya ĩ nthĩ syĩthĩwe ũtiĩwa woo kwosana na masyĩtwa onthe ala maandĩkĩthĩtwʼe. 54 Kwondũ wa ikundi ila nene, waĩlĩte kwongelanga ũtiĩwa woo, na kwondũ wa ikundi ila nini, waĩlĩte kũolanga ũtiĩwa woo. Kĩla kĩkundi kyaĩlĩte kũnengwa ũtiĩwa kwosana na ũtalo wa ala maandĩkĩthĩtwʼe. 55 Ĩndĩ nthĩ yaĩle kũaanwʼa kwa kũkũna kula. Na ĩtina wa ũu, kĩla mũndũ akakwataa ũtiĩwa kĩsionĩ kya mbaĩ ya aa-ĩthe make. 56 Ũtiĩwa wa kĩla kĩkundi wĩtuwa kwosana na kula na kĩla kĩkundi kĩiaĩwa ũtiĩwa wakyo, kĩthĩwe nĩ kĩnene kana nĩ kĩnini.”

57 Yu ĩndĩ, ala maandĩkĩthiwʼe kuma kwa Alivai kwosana na mĩsyĩ yoo maĩ aa: kuma kwa Ngelisoni, mũsyĩ wa Angelisoni; kuma kwa Koathi, mũsyĩ wa Akoathi; kuma kwa Melali, mũsyĩ wa Amelali. 58 Ĩĩ nĩyo yaĩ mĩsyĩ ya Alivai: mũsyĩ wa Alivini, mũsyĩ wa Aeviloni, mũsyĩ wa Amali, mũsyĩ wa Amusi, mũsyĩ wa Akola.

Koathi nĩwe waĩ ĩthe wa Amilamu. 59 Na mũka wa Amilamu eetawa Yokeveti, na aĩ mwĩĩtu wa Livai, ũla Livai wasyaĩwe nĩ mũka me Misili. Na Yokeveti nĩwamũsyaĩe Amilamu Alũni na Mose na mwĩĩtu-a-inyia woo Miliamu. 60 Na ĩndĩ Alũni asyaĩwa Natavu, Aviũ, Eleasali, na Ithamali. 61 Ĩndĩ Natavu na Aviũ nĩmakwie nũndũ wa kũmũkwatĩsya Yeova mwaki ũte mwĩtĩkĩlye.

62 Ũtalo wʼonthe wa ala maandĩkĩthiwʼe waĩ 23,000, aũme onthe ala maĩ na mwei ũmwe kwambata. Namo mayaandĩkĩthwʼa na Aisilaeli, nũndũ mayaaĩle kũnengwa ũtiĩwa katĩ wa Aisilaeli.

63 Asu nĩmo maandĩkĩthiwʼe nĩ Mose na mũthembi Eleasali yĩla maandĩkĩthasya Aisilaeli me yalatanĩ ĩtindimalu ya Moavi vakuvĩ na Yolotani kũu Yeliko. 64 Ĩndĩ vai ũmwe katĩ woo waandĩkĩthiwʼe nĩ Mose na mũthembi Alũni yĩla ũtalo wa Aisilaeli woosiwe me weũnĩ wa Sinaĩ. 65 Nũndũ Yeova aisye ũũ ĩũlũ woo: “Vate ndĩi makakwʼĩĩa weũnĩ.” Na kwoou vai mũndũũme o na ũmwe katĩ woo watialĩte ate o Kalevu mwana wa Yevune na Yosua mwana wa Nuni.

27 Nĩvo ĩndĩ eĩtu ma Nzeloveati, mwana wa Eevieli, mwana wa Ngileati, mwana wa Makili, mwana wa Manase, kuma mĩsyĩ ya Manase mwana wa Yosevu, mathengeeie. Masyĩtwa ma eĩtu make maĩ Maala, Noa, Okila, Milika, na Tilisa. 2 Nĩmaũngamie mbee wa Mose, mũthembi Eleasali, mbee wa anene, na mbee wa ũmbano wʼonthe mũomonĩ wa ĩeema ya kũmbanĩa na masya: 3 “Ĩthe witũ akwʼĩĩe weũnĩ, ĩndĩ ndaĩ kĩkundinĩ kya andũ ala mookĩlile maleana na Yeova, ala makwatĩte Kola mbau, ĩndĩ akwie nũndũ wa naĩ yake mwene na ndaĩ na kĩmwana o na kĩmwe. 4 Ve vata mwaũ ĩsyĩtwa ya ĩthe witũ yae kuma kwa mũsyĩ wake aĩ nĩkwĩthĩwa ndaĩ na kĩmwana? Tũnenge ũtiĩwa katĩ wa ana-a-ĩthe ma ĩthe witũ.” 5 Na kwoou Mose atwaa ũndũ ũsu mawetie mbee wa Yeova.

6 Nĩvo ĩndĩ Yeova weeie Mose atĩĩ: 7 “Eĩtu ma Nzeloveati maneena wʼo. O na ethĩwa vailye ata waĩle kũmanenga ũtiĩwa katĩ wa ana-a-ĩthe ma ĩthe woo na ũimanenga ũtiĩwa wa ĩthe woo. 8 O na ĩngĩ, neena na Aisilaeli na ũimea, ‘Ethĩwa mũndũ nĩwakwʼa ate na kĩmwana, no nginya ũtiĩwa wake ũnengwe mwĩĩtu wake. 9 Na ethĩwa nde na mwĩĩtu, mũkanenga ana-a-ĩthe make ũtiĩwa wake. 10 Na ethĩwa nde na ana-a-ĩthe, mũkanenga ana-a-ĩthe ma ĩthe ũtiĩwa wake. 11 Na ethĩwa ĩthe wake nde na ana-a-ĩthe, mũkanenga ũtiĩwa wake mũndũ wa mũsyĩ wake ũla wa mũvĩa wa vakuvĩ vyũ kĩ-nthakame, nake akaũmesya. Ũsu nĩ ũtwʼĩo ũkethĩawa wĩ mwĩao kwondũ wa Aisilaeli, o tondũ Yeova ũmwĩaĩe Mose.’”

12 Na ĩndĩ Yeova eea Mose: “Ambata kĩĩma kĩĩ kya Avalimu, na wĩ vau ũyĩloela nthĩ ĩla ngũnenga Aisilaeli. 13 Na wamyona, o naku nũkũmbanwʼa vamwe na andũ maku,* o ta Alũni mwana-a-inyia waku, 14 nũndũ yĩla ũmbano watetanĩisye nakwa weũnĩ wa Nzini, inywʼĩ nĩmwaleanile na mwĩao wakwa na mwalea kũngumya* mbee woo nũndũ wa kĩla kĩwʼũ. Kĩu nĩ kĩla kĩwʼũ kya Meliva kũya Katesi weũnĩ wa Nzini.”

15 Nĩvo ĩndĩ Mose wamwĩie Yeova: 16 “Eka Yeova, Ngai wa veva wa andũ onthe,* anyuve mũndũ wa kũũngamĩa ũmbano ũũ 17 ũla ũkaumaalaa na ailika mbee woo na ũla ũkamatongoeasya maumaalĩte na mailika, nĩ kana ala me ũmbanonĩ wa Yeova maikethĩwe mailye ta malondu mate na mũĩthi.” 18 Na kwoou Yeova amwĩa Mose: “Osa Yosua mwana wa Nuni, ũla nĩ mũndũũme wĩ na veva, na ũimwilĩĩla kwʼoko kwaku. 19 Na ĩndĩ ũimũũngamya mbee wa mũthembi Eleasali na mbee wa ũmbano wʼonthe, naku no nginya ũmũnyuve masyaĩĩsye nĩ kana amatongoeasye. 20 Nĩwaĩlĩte kũmũnenga ũkũmũ ũmwe waku,* nĩ kana ũmbano wʼonthe wa Aisilaeli ũmwĩthukĩĩsye. 21 Na aĩle kũũngama mbee wa mũthembi Eleasali, nĩ kana Eleasali akũlye ũtwi wa Yeova kwondũ wake atũmĩĩte sila wa Ulimu. Kwosana na mwĩao wake makaumaalaa na kwosana na mwĩao wake makalikaa, we na Aisilaeli onthe ala me vamwe nake na ũmbano wʼonthe.”

22 Na kwoou Mose eeka o tondũ Yeova wamwĩaĩe. Nĩwamwosie Yosua na amũũngamya mbee wa mũthembi Eleasali na mbee wa ũmbano wʼonthe, 23 na amwilĩĩla moko make na amũnyuva atongosye, o tondũ Yeova waneenete kwĩsĩla Mose.

28 Na Yeova aneena ĩngĩ na Mose, aimwĩa: 2 “Ĩaĩe Aisilaeli na ũimea atĩĩ: ‘No nginya mũĩkĩĩthasye kana nĩmwandetee nthembo yakwa, mũkate wakwa. No nginya mũnthembeae nthembo syakwa sya kũvĩvwʼa na mwaki nĩ kana syĩthĩwe mũuke wa kwendeesya* mavindanĩ masyo ala manyuvĩtwe.’

3 “Na ũimea atĩĩ: ‘Ĩno nĩyo nthembo ĩvĩvĩtw’e na mwaki ĩla mũkamũeteae Yeova: kwondũ wa mũthenya ũmwe kĩla ĩvinda mũkathembaa tũtũlũme twĩlĩ twa mwaka ũmwe tũte na thĩna o na ũmwe twĩthĩwe nthembo ya kũvĩvw’a. 4 Katũlũme kamwe mũkakathembaa kwakya, na katũlũme kala kangĩ mũkakathembaa ĩ ya wĩoo,* 5 na mũkatũthembanĩasya na nthembo ya lĩu ya kĩlungu kya ĩkũmi kya eva* kya mũtu mũvinyu ũvulanĩtwʼe na kĩlungu kya kana kya ini* kya mauta ma matunda makimakime ma mũthata. 6 Nĩ nthembo ya kũvĩvw’a yaĩlĩte kumwʼa kĩla ĩvinda, ĩla yambĩĩiwʼe Kĩĩmanĩ kya Sinaĩ yĩthĩawe mũuke wa kwendeesya,* nĩ nthembo ĩvĩvĩtw’e na mwaki kwondũ wa Yeova, 7 na yaĩlĩte kumanĩwʼa na nthembo yayo ya kũnyuwa, ya kĩlungu kya kana kya ini kwondũ wa kĩla katũlũme. Mũkaendaa kwĩta nthembo ĩsu ya kũnyuwa ĩtonya kũmila nthĩnĩ wa vala vandũ vatheu nĩ kana yĩthĩwe nthembo ya kũnyuwa kwondũ wa Yeova. 8 Na mũkathembaa katũlũme kala kangĩ ĩ ya wĩoo.* Mũkakathembanĩasya na nthembo ya lĩu o ta ĩla ya kwakya vamwe na nthembo yako ya kũnyuwa o ta ĩla ya kwakya, na mũkaithembaa ta nthembo ĩvĩvĩtw’e na mwaki yĩthĩwe mũuke ũũmwendeesya* Yeova.

9 “‘Ĩndĩ mũthenyanĩ wa Savato, nthembo ĩsu yaĩlĩte kwĩthĩwa ya tũtũlũme twĩlĩ twa mwaka ũmwe tũte na thĩna o na ũmwe na ithimo ilĩ sya kĩlungu kya ĩkũmi kya eva kya mũtu mũvinyu ũvulanĩtwʼe na mauta ta nthembo ya lĩu, vamwe na nthembo yayo ya kũnyuwa. 10 Ĩsu nĩyo ĩkethĩawa yĩ nthembo ya kũvĩvw’a mũthenyanĩ wa Savato, vamwe na nthembo ya kũvĩvw’a ĩla yaĩlĩte kumwʼa kĩla ĩvinda na nthembo yayo ya kũnyuwa.

11 “‘Mwambĩĩonĩ wa kĩla mwei,* mũkamũeteae Yeova nthembo ya kũvĩvw’a ya tũsalũ twĩlĩ, ndũũme ĩmwe, na tũtũlũme mũonza twa mwaka ũmwe tũte na thĩna o na ũmwe, 12 na ithimo itatũ sya kĩlungu kya ĩkũmi kya mũtu mũvinyu ũvulanĩtwʼe na mauta wĩthĩwe nthembo ya lĩu kwondũ wa kĩla nzaũ na ithimo ilĩ sya kĩlungu kya ĩkũmi kya mũtu mũvinyu ũvulanĩtwʼe na mauta wĩthĩwe nthembo ya lĩu kwondũ wa ĩ ndũũme, 13 na kĩthimo kya kĩlungu kĩmwe kya ĩkũmi kya mũtu mũvinyu ũvulanĩtwʼe na mauta wĩthĩwe nthembo ya lĩu kwondũ wa kĩla katũlũme; ĩsu nĩ nthembo ya kũvĩvw’a, nayo nĩ mũuke wa kwendeesya,* na nthembo ĩvĩvĩtwʼe na mwaki kwondũ wa Yeova. 14 Na nthembo syasyo sya kũnyuwa syaĩlĩte kwĩthĩwa syĩ nusu ya ini ya mbinyu kwondũ wa nzaũ ĩmwe na kĩlungu kya katatũ kya ini kwondũ wa ĩ ndũũme na kĩlungu kya kana kya ini kwondũ wa katũlũme kamwe. Ĩsu nĩyo nthembo ya kũvĩvw’a ya kĩla mwei ĩla ĩkaumawʼa mwaka wʼonthe. 15 O na ĩngĩ, o vamwe na nthembo ya kũvĩvw’a ĩla yaĩlĩte kumwʼa kĩla ĩvinda vamwe na nthembo yayo ya kũnyuwa, kavũli kamwe nĩkaĩlĩte kumĩwʼa Yeova kethĩwe nthembo ya naĩ.

16 “‘Mũthenya wa 14 wa mwei wa mbee ũkeethĩawa wĩ Vasaka ya Yeova. 17 Na mũthenyanĩ wa 15 wa mwei ũsu, kũkeethĩawa na mboka. Mũkaĩsaa mũkate ũte ĩlawa mĩthenya mũonza. 18 Mũthenyanĩ wa mbee kũkeethĩawa na ũmbano mũtheu. Mũyaĩlĩte o na vanini kũthũkũma wĩa o na ũmwe mũmũ. 19 Na nĩmwaĩlĩte kũmũetee Yeova nthembo ya kũvĩvwʼa ya tũsalũ twĩlĩ, ndũũme ĩmwe, na tũtũlũme mũonza twa mwaka ũmwe. Mwaĩlĩte kũthemba nyamũ ite na thĩna o na ũmwe. 20 Mwaĩlĩte kũithemba vamwe na nthembo syasyo sya lĩu sya mũtu mũvinyu ũvulanĩtwʼe na mauta, na ithimo syasyo syaĩlĩte kwĩthĩwa syĩ ithimo itatũ sya kĩlungu kya ĩkũmi kwondũ wa ĩ ndũũme. 21 Kwondũ wa kĩla katũlũme katĩ wa tũla tũtũlũme mũonza, mwaĩlĩte kũthemba kĩthimo kya kĩlungu kĩmwe kya ĩkũmi, 22 o vamwe na mbũi ĩmwe yĩthĩwe nthembo ya naĩ nĩ kana mwĩw’anĩthwʼe na Ngai. 23 Mũkathembaa nthembo ĩsu o vamwe na nthembo ya kũvĩvw’a ya kwakya, ĩla ĩkethĩawa kwondũ wa nthembo ya kũvĩvw’a ĩla yaĩlĩte kumwʼa kĩla ĩvinda. 24 Mũkasyumasya ta lĩu* na mũkasyumasya ũndũ ũmwe kwa mĩthenya mũonza, syĩthĩwe nthembo ĩvĩvĩtw’e na mwaki nĩ kana yĩthĩwe mũuke ũũmwendeesya* Yeova. Mũkathembanĩasya nthembo ĩsu na nthembo ya kũvĩvwʼa ĩla yaĩlĩte kumwʼa kĩla ĩvinda vamwe na nthembo yayo ya kũnyuwa. 25 Mũthenyanĩ wa mũonza mwaĩlĩte kwĩthĩwa na ũmbano mũtheu. Mũyaĩlĩte o na vanini kũthũkũma wĩa o na ũmwe mũmũ.

26 “‘Mũthenyanĩ wa matunda ma mbee meu, yĩla mũũmũetee Yeova nthembo ya lĩu wa ngetha nzaũ, mwaĩle kwĩthĩawa na ũmbano mũtheu mbokanĩ yenyu ya syumwa. Mũyaĩlĩte o na vanini kũthũkũma wĩa o na ũmwe mũmũ. 27 Mũkaetae nthembo ya kũvĩvw’a yĩthĩwe mũuke ũũmwendeesya* Yeova, na nthembo ĩsu ĩkeethĩawa yĩ tũsalũ twĩlĩ, ndũũme ĩmwe, na tũtũlũme mũonza twa mwaka ũmwe, 28 na kwondũ wa nthembo yasyo ya lĩu ya mũtu mũvinyu ũvulanĩtwʼe na mauta, mũkaetae ithimo itatũ sya kĩlungu kya ĩkũmi kwondũ wa kĩla nzaũ, ithimo ilĩ sya kĩlungu kya ĩkũmi kwondũ wa ĩ ndũũme, 29 kĩthimo kya kĩlungu kĩmwe kya ĩkũmi kwondũ wa kĩla katũlũme katĩ wa tũla tũtũlũme mũonza, 30 o vamwe na kavũli kamwe nĩ kana mwĩwʼanĩthwʼe na Ngai. 31 Mũkaithembanĩasya vamwe na nthembo ya kũvĩvw’a ĩla yaĩlĩte kumwʼa kĩla ĩvinda vamwe na nthembo yayo ya lĩu. Nyamũ isu iyaĩlĩte kwĩthĩwa na thĩna o na ũmwe, na ikathembanĩawʼa vamwe na nthembo syasyo sya kũnyuwa.

29 “‘Na mũthenyanĩ wa mbee wa mwei wa mũonza, nĩmwaĩlĩte kwĩthĩwa na ũmbano mũtheu. Mũyaĩlĩte o na vanini kũthũkũma wĩa mũmũ o na ũmwe. Mũthenyanĩ ũsu nĩmwaĩlĩte kũvuva soo. 2 Mũkathembaa nthembo ya kũvĩvw’a yĩthĩwe mũuke ũũmwendeesya* Yeova, na nthembo ĩsu ĩkeethĩawa ya kasalũ kamwe, ndũũme ĩmwe, na tũtũlũme mũonza twa mwaka ũmwe, na nyamũ isu syonthe iyaĩlĩte kwĩthĩwa na thĩna o na ũmwe, 3 na mũkaithembanĩasya na nthembo yasyo ya lĩu ya mũtu mũvinyu ũvulanĩtwʼe na mauta, na kĩthimo kyayo kyaĩlĩte kwĩthĩwa kĩ ithimo itatũ sya kĩlungu kya ĩkũmi kya eva kwondũ wa ĩ nzaũ, ithimo ilĩ sya kĩlungu kya ĩkũmi kwondũ wa ĩ ndũũme, 4 na kĩthimo kya kĩlungu kĩmwe kya ĩkũmi kwondũ wa kĩla katũlũme katĩ wa tũla tũtũlũme mũonza, 5 na kathenge kamwe kethĩwe nthembo ya naĩ ya kũmwĩwʼanĩthya na Ngai. 6 Mũkathembaa nthembo ĩsu vamwe na nthembo ya kũvĩvw’a ya kĩla mwei na nthembo yayo ya lĩu na vamwe na nthembo ya kũvĩvw’a ĩla yaĩlĩte kumwʼa kĩla ĩvinda na nthembo yayo ya lĩu, vamwe na nthembo syasyo sya kũnyuwa, kwosana na mũtalatala ũla waĩle kũatĩĩwa kwondũ wasyo, yĩthĩwe mũuke wa kwendeesya,* nayo nĩ nthembo ĩvĩvĩtw’e na mwaki kwondũ wa Yeova.

7 “‘Na mũthenyanĩ wa ĩkũmi wa mwei ũũ wa mũonza, nĩmwaĩlĩte kwĩthĩwa na ũmbano mũtheu, na no nginya mwĩthĩnyʼe.* Mũyaĩlĩte o na vanini kũthũkũma wĩa o na ũmwe. 8 Na mũkaetee Yeova nthembo ya kũvĩvw’a, yĩthĩwe mũuke wa kwendeesya,* na nthembo ĩsu ĩkeethĩawa ya kasalũ kamwe, ndũũme ĩmwe, na tũtũlũme mũonza twa mwaka ũmwe, na nyamũ isu syonthe iyaĩlĩte kwĩthĩwa na thĩna o na ũmwe. 9 Na kwondũ wa nthembo yasyo ya lĩu ya mũtu mũvinyu ũvulanĩtwʼe na mauta, mũkaetae ithimo itatũ sya kĩlungu kya ĩkũmi kwondũ wa ĩ nzaũ, ithimo ilĩ sya kĩlungu kya ĩkũmi kwondũ wa ĩ ndũũme, 10 kĩthimo kya kĩlungu kĩmwe kya ĩkũmi kwondũ wa kĩla katũlũme katĩ wa tũla tũtũlũme mũonza, 11 na kavũli kamwe kethĩwe nthembo ya naĩ, o vamwe na ĩla nthembo ya naĩ ya kwĩwʼanĩthya andũ na Ngai na ĩla nthembo ya kũvĩvwʼa yaĩlĩte kumwʼa kĩla ĩvinda na nthembo yayo ya lĩu, vamwe na nthembo syasyo sya kũnyuwa.

12 “‘Na mũthenyanĩ wa 15 wa mwei wa mũonza, mwaĩlĩte kwĩthĩwa na ũmbano mũtheu. Mũyaĩlĩte o na vanini kũthũkũma wĩa mũmũ o na ũmwe, na no nginya mũtanĩe mboka kwondũ wa Yeova mĩthenya mũonza. 13 Na mũkaetae nthembo ya kũvĩvw’a, nayo nĩ nthembo ĩvĩvĩtw’e na mwaki yĩthĩwe mũuke ũũmwendeesya* Yeova, na ĩkeethĩawa yĩ nthembo ya tũsalũ 13, ndũũme 2, na tũtũlũme 14 twa mwaka ũmwe, na nyamũ isu syonthe iyaĩlĩte kwĩthĩwa na thĩna o na ũmwe. 14 Na kwondũ wa nthembo yasyo ya lĩu ya mũtu mũvinyu ũvulanĩtwʼe na mauta, mũkaetae ithimo itatũ sya kĩlungu kya ĩkũmi kwondũ wa kĩla nzaũ katĩ wa ila nzaũ 13, ithimo ilĩ sya kĩlungu kya ĩkũmi kwondũ wa kĩla ndũũme katĩ wa ila ndũũme 2, 15 na kĩthimo kya kĩlungu kĩmwe kya ĩkũmi kwondũ wa kĩla katũlũme katĩ wa tũla tũtũlũme 14, 16 na kavũli kamwe kethĩwe nthembo ya naĩ, o vamwe na nthembo ya kũvĩvw’a ĩla yaĩlĩte kumwʼa kĩla ĩvinda, nthembo yayo ya lĩu, na nthembo yayo ya kũnyuwa.

17 “‘Na mũthenyanĩ wa kelĩ, mũkaetae tũsalũ 12, ndũũme 2, na tũtũlũme 14 twa mwaka ũmwe, na nyamũ isu syonthe iyaĩlĩte kwĩthĩwa na thĩna o na ũmwe, 18 na mũkasietanĩasya na nthembo yasyo ya lĩu na nthembo syasyo sya kũnyuwa kwondũ wa i nzaũ, i ndũũme, na tũtũlũme kwosana na ũtalo wasyo mũatĩĩe mũtalatala ũla waĩle kũatĩĩwa, 19 na kavũli kamwe kethĩwe nthembo ya naĩ, o vamwe na nthembo ya kũvĩvw’a ĩla yaĩlĩte kumwʼa kĩla ĩvinda na nthembo yayo ya lĩu, vamwe na nthembo syasyo sya kũnyuwa.

20 “‘Na mũthenyanĩ wa katatũ, mũkaetae nzaũ 11, ndũũme 2, na tũtũlũme 14 twa mwaka ũmwe, na nyamũ isu syonthe iyaĩlĩte kwĩthĩwa na thĩna o na ũmwe, 21 na mũkasietanĩasya na nthembo yasyo ya lĩu na nthembo syasyo sya kũnyuwa kwondũ wa i nzaũ, i ndũũme, na tũtũlũme kwosana na ũtalo wasyo mũatĩĩe mũtalatala ũla waĩle kũatĩĩwa, 22 na mbũi ĩmwe yĩthĩwe nthembo ya naĩ, o vamwe na nthembo ya kũvĩvw’a ĩla yaĩlĩte kumwʼa kĩla ĩvinda na nthembo yayo ya lĩu na nthembo yayo ya kũnyuwa.

23 “‘Na mũthenyanĩ wa kana, mũkaetae nzaũ 10, ndũũme 2, na tũtũlũme 14 twa mwaka ũmwe, na nyamũ isu syonthe iyaĩlĩte kwĩthĩwa na thĩna o na ũmwe, 24 na mũkasietanĩasya na nthembo yasyo ya lĩu na nthembo syasyo sya kũnyuwa kwondũ wa i nzaũ, i ndũũme, na tũtũlũme kwosana na ũtalo wasyo mũatĩĩe mũtalatala ũla waĩle kũatĩĩwa, 25 na kavũli kamwe kethĩwe nthembo ya naĩ, o vamwe na nthembo ya kũvĩvw’a ĩla yaĩlĩte kumwʼa kĩla ĩvinda, nthembo yayo ya lĩu, na nthembo yayo ya kũnyuwa.

26 “‘Na mũthenyanĩ wa katano, mũkaetae nzaũ 9, ndũũme 2, na tũtũlũme 14 twa mwaka ũmwe, na nyamũ isu syonthe iyaĩlĩte kwĩthĩwa na thĩna o na ũmwe, 27 na mũkasietanĩasya na nthembo yasyo ya lĩu na nthembo syasyo sya kũnyuwa kwondũ wa i nzaũ, i ndũũme, na tũtũlũme kwosana na ũtalo wasyo mũatĩĩe mũtalatala ũla waĩle kũatĩĩwa, 28 na mbũi ĩmwe yĩthĩwe nthembo ya naĩ, o vamwe na nthembo ya kũvĩvw’a ĩla yaĩlĩte kumwʼa kĩla ĩvinda na nthembo yayo ya lĩu na nthembo yayo ya kũnyuwa.

29 “‘Na mũthenyanĩ wa thanthatũ, mũkaetae nzaũ 8, ndũũme 2, na tũtũlũme 14 twa mwaka ũmwe, na nyamũ isu syonthe iyaĩlĩte kwĩthĩwa na thĩna o na ũmwe, 30 na mũkasietanĩasya na nthembo yasyo ya lĩu na nthembo syasyo sya kũnyuwa kwondũ wa i nzaũ, i ndũũme, na tũtũlũme kwosana na ũtalo wasyo mũatĩĩe mũtalatala ũla waĩle kũatĩĩwa, 31 na mbũi ĩmwe yĩthĩwe nthembo ya naĩ, o vamwe na nthembo ya kũvĩvw’a ĩla yaĩlĩte kumwʼa kĩla ĩvinda, nthembo yayo ya lĩu, na nthembo syayo sya kũnyuwa.

32 “‘Na mũthenyanĩ wa mũonza, mũkaetae nzaũ 7, ndũũme 2, na tũtũlũme 14 twa mwaka ũmwe, na nyamũ isu syonthe iyaĩlĩte kwĩthĩwa na thĩna o na ũmwe, 33 na mũkasietanĩasya na nthembo yasyo ya lĩu na nthembo syasyo sya kũnyuwa kwondũ wa i nzaũ, i ndũũme, na tũtũlũme kwosana na ũtalo wasyo mũatĩĩe mũtalatala ũla waĩle kũatĩĩwa kwondũ wasyo, 34 na mbũi ĩmwe yĩthĩwe nthembo ya naĩ, o vamwe na nthembo ya kũvĩvw’a ĩla yaĩlĩte kumwʼa kĩla ĩvinda, nthembo yayo ya lĩu, na nthembo yayo ya kũnyuwa.

35 “‘Mũthenyanĩ wa nyanya, mwaĩlĩte kwĩthĩwa na ũmbano wa mwanya. Mũyaĩlĩte o na vanini kũthũkũma wĩa mũmũ o na ũmwe. 36 Mũkaetae nthembo ya kũvĩvw’a, nayo nĩ nthembo ĩvĩvĩtw’e na mwaki yĩthĩwe mũuke ũũmwendeesya* Yeova, na ĩkeethĩawa yĩ nthembo ya nzaũ ĩmwe, ndũũme ĩmwe, na tũtũlũme mũonza twa mwaka ũmwe, na nyamũ isu syonthe iyaĩlĩte kwĩthĩwa na thĩna o na ũmwe, 37 na mũkasietanĩasya na nthembo yasyo ya lĩu na nthembo syasyo sya kũnyuwa kwondũ wa ĩ nzaũ, ĩ ndũũme, na tũtũlũme kwosana na ũtalo wasyo mũatĩĩe mũtalatala ũla waĩle kũatĩĩwa, 38 na mbũi ĩmwe yĩthĩwe nthembo ya naĩ, o vamwe na nthembo ya kũvĩvw’a ĩla yaĩlĩte kumwʼa kĩla ĩvinda na nthembo yayo ya lĩu na nthembo yayo ya kũnyuwa.

39 “‘Isu nĩsyo mũkamumĩasya Yeova mbokanĩ syenyu sya mavinda ala matw’ĩtwe mwakanĩ, o vamwe na nthembo syenyu sya wĩvĩto na nthembo syenyu sya ngenda syĩthĩwe nthembo syenyu sya kũvĩvw’a na nthembo syenyu sya lĩu na nthembo syenyu sya kũnyuwa na nthembo syenyu sya ngwatanĩo.’” 40 Na Mose atavya Aisilaeli kyonthe kĩla Yeova wamwĩaĩe.

30 Na ĩndĩ Mose aneena na aũngamĩi ma mbaĩ sya Isilaeli, ayasya: “Ũũ nĩwʼo Yeova ũmwĩaĩe: 2 Ethĩwa mũndũũme nĩwamwĩvĩtĩa Yeova kana nĩweeyĩava kwĩanĩsya* wĩvĩto wa kwĩyĩima, no nginya eanĩsye ndeto yake. Aĩlĩte kwĩka kyonthe kĩla weevĩta kwĩka.

3 “Na ethĩwa mũndũ mũka nĩwamwĩvĩtĩa Yeova kana nĩweevĩta wĩvĩto wa kwĩyĩima e wa mũika na e o nyũmbanĩ ya ĩthe wake 4 na ĩthe ayĩwʼa wĩvĩto wake kana wĩvĩto ũla weevĩta wa kwĩyĩima na ĩthe wake aiema kũleana nake, wĩvĩto o na wĩva ũla weevĩta wĩendeea kwĩthĩwa ũmwovete, na wĩvĩto o na wĩva ũla weevĩta wa kwĩyĩima wĩendeea kwĩthĩwa ũmwovete. 5 Ĩndĩ ĩthe eewʼa wĩvĩto wake kana eewʼa nĩweevĩta kwĩyĩima ũndũ mũna na aimũvata, wĩvĩto wake ndwĩendeea kũmwova. Yeova nũkũmũekea mũndũ mũka ũsu nũndũ ĩthe wake nĩwamũvata.

6 “Ĩndĩ ethĩwa nĩwatwawa e o mwove nĩ wĩvĩto wake kana nĩ watho ũla wathanie atasũanĩĩte 7 na mũũme wake aiwĩwʼa na ailea kũmũvata mũthenya ũla wawĩwʼa, wĩvĩto o na wĩva ũla wĩvĩtĩte kana wĩvĩto o na wĩva wa kwĩyĩima ũla wĩvĩtĩte wĩendeea kwĩthĩwa ũmwovete. 8 Ĩndĩ ethĩwa mũthenya ũla mũũme wawĩwʼa nĩwamũvata, mũũme no aũngamye wĩvĩto ũsu kana watho ũla wathanie atasũanĩĩte, na Yeova nũkũekea mũndũ mũka ũsu.

9 “Ethĩwa mũndũ mũka nĩ ndiwa kana mũtwaano wake nĩ mũthasye na nĩweevĩta, wĩvĩto o na wĩva ũla weevĩta wĩĩthĩwa ũmwovete.

10 “Ĩndĩ ethĩwa mũndũ mũka nĩweevĩta wĩvĩto kana nĩweevĩta wĩvĩto wa kwĩyĩima e o nyũmbanĩ ya mũũme 11 na mũũme wake aiwĩwʼa na ailea kũmũvata kana kũleana nake, wĩvĩto o na wĩva ũla weevĩta kana wĩvĩto o na wĩva wa kwĩyĩima ũla weevĩta wĩendeea kwĩthĩwa ũmwovete. 12 Ĩndĩ wĩvĩto o na wĩva ũla weevĩta kana wĩvĩto o na wĩva wa kwĩyĩima ũla weeyĩava ndwĩendeea kwĩthĩwa ũmwovete kuma mũthenya ũla mũũme wawĩwʼa na awũũngamya vyũ. Mũũme wake nĩwawũũngamya, na Yeova nũkũekea mũndũ mũka ũsu. 13 Ethĩwa mũndũ mũka nĩweevĩta wĩvĩto o na wĩva kana ethĩwa nĩweeyĩava kwĩanĩsya wĩvĩto o na wĩva wa kwĩyĩima,* mũũme nĩwe waĩle kũtwʼa nũkũwĩanĩsya kana nũkũwũũngamya. 14 Ĩndĩ ethĩwa mĩthenya nĩyaendeea kũvĩta na mũũme wake ndeũleana nake o na vanini, akeethĩawa amwĩtĩkĩlĩtye kwĩanĩsya wĩvĩto o na wĩva ũla wĩvĩtĩte kana wĩvĩto o na wĩva wa kwĩyĩima ũla wĩvĩtĩte. Mũũme akeethĩawa amwĩtĩkĩlĩtye nũndũ ndaaleana nake mũthenya ũla wamwĩwie ayĩvĩta. 15 Ĩndĩ mũũme aũngamya wĩvĩto wake ĩtina wa ĩvinda ĩna, ĩtina wa mũthenya ũla wawĩwie, nĩwe ũkaĩvĩa ĩvĩtyo ya mũka.

16 “Ĩsu nĩyo myolooto ĩla Yeova wamũnengie Mose ĩũlũ wa mũndũũme na mũka wake, na ĩũlũ wa mũndũũme na mwĩĩtu wake wa mũika ũla wĩkalaa nyũmbanĩ yake.”

31 Na Yeova aneena ĩngĩ na Mose amwĩa: 2 “Ĩvanĩsya Aisilaeli kũla kwĩ Amitiani. Na ĩtina wa ũu, nũkũmbanw’a vamwe na andũ maku.”*

3 Na kwoou Mose aneena na andũ, ayasya: “Ũmbany’ai aume ma kũkita* katĩ wenyu nĩ kana makomane na Amitiani na maianĩsya ũĩvanĩsyo wa Yeova ĩũlũ wa Amitiani. 4 Kuma kĩla mbaĩnĩ ya mbaĩ sya Aisilaeli, nenganai aũme 1,000 malike itanĩ.” 5 Na kwoou kuma kwa makili ma Isilaeli, aũme 1,000 kuma kĩla mbaĩ nĩmanyuviwe, na onthe me 12,000 nĩmoombaniwʼe kwondũ wa kaũ.*

6 Na ĩndĩ Mose anengane aũme asu itanĩ, aũme 1,000 kuma kĩla mbaĩ, vamwe na Vineasi mwana wa Eleasali ethĩwe mũthembi kwondũ wa ita, ũla kw’okonĩ kwake veethĩawa na ĩla mĩio mĩtheu na ala masoo ma kumya wasya wa kũtongoesya andũ. 7 Na mokita na Mitiani, o tondũ Yeova wamwĩaĩe Mose, na moaa aũme onthe. 8 Na asumbĩ atano ma Mitiani nĩ amwe katĩ wa andũ ala mooaiwe, namo maĩ Evi, Lekemu, Nzuli, Uulu, na Leva. O na nĩmooaie Mbalaamu mwana wa Mbeoli na ũvyũ. 9 Ĩndĩ Aisilaeli nĩmoosie aka na syana sya Mitiani ta mũtavo. O na nĩmoosie ta mũtavo nyamũ syoo syonthe sya mũsyĩ, indo syoo syonthe, na malĩ yoo yonthe. 10 O na nĩmavĩvisye na mwaki ndũa syonthe ila matwĩe na kambi syoo syonthe.* 11 Na nĩmoosie mũtavo w’onthe ũla makwatie, andũ na nyamũ. 12 Na maete andũ ala matavĩte na mũtavo ũla moosete vala ve Mose na mũthembi Eleasali na ũmbano wa Aisilaeli; nĩmaetie mũtavo woo vala ve kambi yalatanĩ ĩtindimalu ya Moavi vakuvĩ na Yolotani kũu Yeliko.

13 Nĩvo ĩndĩ Mose na mũthembi Eleasali na anene onthe ma ũmbano maumaalile makomanĩe namo nza wa kambi. 14 Ĩndĩ Mose athatĩa aũme ala manyuvĩtwe maũngamĩe ita isu, anene ma makili na anene ma maana ala masyokie maumĩte kaũnĩ ũsu. 15 Na Mose amakũlya: “Nĩkĩ mwaeka aka onthe mekale thayũ? 16 Sisyai! Aa nĩmo maatĩĩie ndeto ya Mbalaamu na masesenga Aisilaeli meethĩwa mate aĩkĩĩku kũla kwĩ Yeova ĩvindanĩ ya ala maũndũ meekĩkie makonetye Veoli, na nũndũ wa ũu, ũmbano wa Yeova wakwatwa nĩ ũkũno. 17 Yu ĩndĩ, ũaai imwana syonthe na mũyũaa aka onthe ala maakoma na mũndũũme. 18 Ĩndĩ no mũeke eĩtu onthe ala mataakoma na mũndũũme maendeee kwĩkala thayũ. 19 Na mwaĩlĩte kwamba maeema nza wa kambi mĩthenya mũonza. Kĩla ũmwe wenyu ũaie mũndũ* na kĩla ũmwe wenyu ũkiitie mũndũ ũaĩtwe aĩlĩte kwĩthesya mũthenyanĩ wa katatũ na mũthenyanĩ wa mũonza, inyw’ĩ na ala mwosie ta mũtavo. 20 O na nĩmwaĩlĩte kũthesya ngũa syonthe, na syĩndũ syonthe iseũvĩtw’e na ũa,* na syĩndũ syonthe iseũvĩtw’e na wʼĩa wa mbũi, na syĩndũ syonthe sya mbwaũ.”

21 Na ĩndĩ mũthembi Eleasali aneena na aũme ma ita ala maendete kaũnĩ amea: “Ũũ nĩwʼo ũtwʼĩo ũla Yeova ũnengete Mose: 22 ‘No thaavu, vetha, ũthuku, kyũma,* ĩvulũ, na kyũma kĩito, 23 kyonthe kĩla kĩtonya kwĩsĩlwʼa mwakinĩ, mwaĩlĩte kwĩsĩlya mwakinĩ, na syĩĩthĩwa syĩ ntheu. Ĩndĩ o na vailye ũu, syĩndũ isu syaĩlĩte kũsyoka ithewʼe na kĩwʼũ kya kũthesya. Syĩndũ syonthe ila itatonya kwĩsĩlwʼa mwakinĩ mwaĩlĩte kũsyĩsĩlya kĩwʼũnĩ. 24 Na nĩmwaĩlĩte kũvũa ngũa syenyu mũthenyanĩ wa mũonza na mũkeethĩwa mwĩ atheu, na ĩtina wa ũu, no mũlike kambinĩ.’”

25 Na ĩndĩ Yeova eea Mose atĩĩ: 26 “Osa ũtalo wa kĩla kĩtavĩtwe, o vamwe na ũtalo wa andũ na nyamũ; ĩka ũu wĩ na mũthembi Eleasali na aũngamĩi ma nyũmba sya aa-ĩthe ma ũmbano ũũ. 27 Na ĩndĩ ũiaanyʼa mũtavo ũsu kũndũ kwĩlĩ nĩ kana ũnengwe ala me itanĩ ila inaendie kaũnĩ na ala angĩ onthe me ũmbanonĩ. 28 Na nĩ kana umĩsye Yeova koti, waĩlĩte kwosa kuma kwa asikalĩ ala maendie kaũnĩ thayũ* ũmwe katĩ wa kĩla mathayũ 500, methĩwe nĩ andũ, nĩ indo, nĩ mangʼoi, kana nĩ malondu na mbũi. 29 Waĩlĩte kwosa kuma mũtavonĩ woo ũla maaĩwe na ũinenga mũthembi Eleasali kĩla woosa nĩ kana kĩthĩwe mũvothi wa Yeova. 30 Na kuma mũtavonĩ ũla wanengwa Aisilaeli, waĩlĩte kwosa mũndũ ũmwe katĩ wa kĩla andũ 50, nyamũ ĩmwe katĩ wa kĩla indo 50, ĩngʼoi yĩmwe katĩ wa kĩla mangʼoi 50, nyamũ ĩmwe katĩ wa kĩla ndĩthya ya malondu na mbũi 50, na nyamũ ĩmwe katĩ wa kĩla mũthemba wa nyamũ sya mũsyĩ 50, na ũinenga Alivai, ala meanĩasya ianda ila ikonanĩtye na ĩeema ya ũthaithi ya Yeova.”

31 Na kwoou Mose na mũthembi Eleasali meeka o ũndũ Yeova wamwĩaĩe Mose. 32 Ũtalo wa mũtavo ũla watialĩte katĩ wa syĩndũ ila andũ matavie mathi kaũnĩ waĩ malondu na mbũi 675,000, 33 indo 72,000, 34 na mangʼoi 61,000. 35 Ũtalo wa aka ala mataĩ maakoma na mũndũũme waĩ aka* 32,000. 36 Nusu ya mũtavo ĩla yanengiwe ala maendie kaũnĩ yaĩ malondu na mbũi 337,500. 37 Ũtalo wa malondu na mbũi ila syaumiw’e ta koti kwondũ wa Yeova waĩ 675. 38 Na indo syaĩ 36,000, na ila syaumiwʼe ta koti kwondũ wa Yeova syaĩ 72. 39 Na mangʼoi maĩ 30,500, na ala maumiw’e ta koti kwondũ wa Yeova maĩ 61. 40 Na andũ* maĩ 16,000, na ala maumiwe ta koti kwondũ wa Yeova maĩ andũ* 32. 41 Na ĩndĩ Mose anenga mũthembi Eleasali koti ũsu wĩthĩwe mũvothi kwondũ wa Yeova, o tondũ Yeova wamwĩaĩe Mose.

42 Na nũsu ĩla yanengiwe Aisilaeli, ĩla Mose wamĩvathanisye na kĩlungu kĩla kyaaĩwe aũme ala maendie kaũnĩ, 43 yaĩ malondu na mbũi 337,500, 44 na indo 36,000, 45 na mangʼoi 30,500, 46 na andũ* 16,000. 47 Na ĩndĩ Mose oosa kuma nusunĩ ĩla yanengiwe Aisilaeli mũndũ ũmwe katĩ wa kĩla andũ 50, na nyamũ ĩmwe katĩ wa kĩla nyamũ 50, na anenga Alivai, ala meanĩasya kĩanda kĩla kĩkonanĩtye na ĩeema ya ũthaithi ya Yeova, o tondũ Yeova wamwĩaĩe Mose.

48 Na ĩndĩ aũme ala manyuvĩtwe maũngamĩe makili ma asikalĩ ala maĩ itanĩ, anene ma makili na anene ma maana, mathengeea Mose, 49 na meea Mose atĩĩ: “Ithyĩ athũkũmi maku nĩtwoosa ũtalo wa asikalĩ ala me ungu witũ, na vai ũmwe woo ũte vo. 50 Kwoou eka kĩla ũmwe witũ aete kĩla ũnakwatie kĩthĩwe nthembo kwondũ wa Yeova, kĩthĩwe nĩ kĩndũ kya thaavu, masoa ma maaũ, mbangili, mbete sya kwĩkĩa mũulĩ, mĩnaĩ, kana nĩ syĩndũ ingĩ sya wanake, nĩ kana twĩw’anĩthw’e* na Yeova.”

51 Na kwoou Mose na mũthembi Eleasali moosa thaavu ũla asikalĩ asu maetie, o syĩndũ syonthe sya wanake. 52 Thaavu wʼonthe ũla mamũnengie Yeova ta mũvothi waĩ sekeli 16,750,* ũla waumie mokonĩ ma anene ma makili na anene ma maana. 53 Kĩla mũsikalĩ nĩweeyoseete mũtavo. 54 Na Mose na mũthembi Eleasali moosa thaavu ũsu waetiwe nĩ anene ma makili na anene ma maana na maũtwaa ĩeemanĩ ya kũmbanĩa nĩ kana wĩthĩwe ũlilikanyʼo mbee wa Yeova kwondũ wa andũ ma Isilaeli.

32 Yu ĩndĩ, ana ma Leũveni na ana ma Ngati maĩ na indo mbingĩ mũno, na kwoou masisya na moona kana nthĩ ya Yaseli na nthĩ ya Ngileati yaĩ nzeo kwondũ wa indo. 2 Na ana ma Ngati na ana ma Leũveni mathi vala ve Mose, mũthembi Eleasali, na anene ma ũmbano na masya: 3 “Nthĩ ya Atalothi, Ndivoni, Yaseli, Nimila, Esivoni, Eleale, Sevamu, Nevo, na Mbeoni, 4 nthĩ ĩla Yeova wakĩlilye vinya mbee wa ũmbano wa Isilaeli, nĩ nthĩ nzeo kwondũ wa indo, na ithyĩ athũkũmi maku twĩ na indo mbingĩ.” 5 Na maendeea kwasya: “Ethĩwa nĩtwonete ũseo methonĩ maku, ithyĩ athũkũmi maku nĩtũnengwe nthĩ ĩno tũmĩmesye. Ndũkatume tũinga Yolotani.”

6 Na ĩndĩ Mose eea ana ma Ngati na ana ma Leũveni atĩĩ: “Inywʼĩ mwĩenda kũendeea kũtũa vaa ana-a-ĩthe menyu maithi kaũnĩ? 7 Ve vata mwaũ mũtulye andũ ma Isilaeli wĩthĩe mai na wendi wa kũinga malike nthĩ ĩla Yeova ũtatĩa kũmanenga? 8 Ũu nĩwʼo aa-ĩthe menyu meekie yĩla namatũmie kuma Katesi-mbalinea mathi makone nthĩ ĩsu. 9 Yĩla maendie nginya Mwandanĩ wa* Esikoli na moona nthĩ ĩsu, nĩmatulilye andũ ma Isilaeli weethĩa mai na wendi wa kũlika nthĩ ĩla Yeova waĩtye nũkũmanenga. 10 Na kwoou ũthatu wa Yeova wakana mũthenya ũsu na eevĩta, ayasya: 11 ‘Aũme ala maumie Misili me na myaka 20 kwambata maikona nthĩ ĩla neevĩtie kũnenga Avalaamu, Isaka, na Yakovo, nũndũ mainangatĩĩa na ngoo yonthe, 12 ate o Kalevu mwana wa Yevune, ũla Mũkenisi, na Yosua mwana wa Nuni, nũndũ mo nĩmamũatĩĩĩte Yeova na ngoo yonthe.’ 13 Na ũthatu wa Yeova wakanĩa Isilaeli na atuma manganga weũnĩ myaka 40 nginya yĩla nzyawa yonthe ĩla yeekaa maũndũ mathũku methonĩ ma Yeova yathelile. 14 Yu inywʼĩ nĩmũkĩlĩte vandũ va aa-ĩthe menyu ta ũsyao wa eki ma naĩ na mũkatuma Yeova athilĩkĩla Isilaeli mũnango. 15 Na yu mwaeka kũmũatĩĩa, vate ndĩi nũkũtia andũ aa onthe ĩngĩ weũnĩ, nenyu nĩmũũtuma maminwa.”

16 Ĩtina wa ĩvinda nĩmaendie ĩngĩ vala ve Mose, na mamwĩa: “Twĩtĩkĩlye twake itũũ sya mavia kwondũ wa indo sitũ na ndũa kwondũ wa syana sitũ. 17 Ĩndĩ twĩendeea kwĩkala twĩyũmbanĩtye kwondũ wa kaũ na nĩtũũthi mbee wa Aisilaeli nginya tũmavikye kĩsionĩ kyoo, nasyo syana sitũ syĩendeea kwĩkala ndũanĩ mbiĩĩe nĩ kana iseseewe iikathĩnwʼe nĩ ekali ma ĩ nthĩ. 18 Tũikasyoka nyũmbanĩ sitũ nginya kĩla Mũisilaeli akwate nthĩ ĩla ũkanengwa ta ũtiĩwa. 19 Nĩkwĩthĩwa tũikanenganĩwʼa ũtiĩwa vamwe namo mũingo ũya ũngĩ wa Yolotani na isionĩ ila syĩ mbee, nũndũ nĩtũkwatĩte ũtiĩwa witũ ngalĩkonĩ ĩno ya wumĩlonĩ wa sua ya Yolotani.”

20 Na Mose amasũngĩa amea: “Ethĩwa nĩmũkwĩka ũndũ ũũ, nawʼo nĩ kwosa mĩio ya kaũ mbee wa Yeova kwondũ wa kaũ, 21 na ethĩwa kĩla ũmwe wenyu nũkwosa mĩio ya kaũ na ayĩinga Yolotani mbee wa Yeova yĩla ũkwĩthĩwa ailũngya amaitha make maume mbee wake 22 nginya yĩla nthĩ ĩsu ĩkakĩlwʼa vinya methonĩ ma Yeova, nĩvo ĩndĩ mwĩĩthĩwa mũtonya kũsyoka na mũyĩĩthĩwa na ĩvĩtyo methonĩ ma Yeova na ma Isilaeli. Na ĩndĩ mũkamesya nthĩ ĩno mbee wa Yeova. 23 Ĩndĩ mwalea kwĩka ũndũ ũsu, mũkeethĩwa mwamũvĩtĩsya Yeova. Na vathi ũu, manyai kana naĩ yenyu ĩkamũandũa. 24 Kwoou no mwake ndũa kwondũ wa syana syenyu na itũũ kwondũ wa ndĩthya syenyu, ĩndĩ no nginya mwĩanĩsye kĩla mwathana.”

25 Na ĩndĩ ana ma Ngati na ana ma Leũveni meea Mose atĩĩ: “Ithyĩ athũkũmi maku twĩĩka o tondũ mwĩai wakwa watwĩaĩa. 26 Syana sitũ, iveti sitũ, indo sitũ, na nyamũ sitũ syonthe sya mũsyĩ syĩendeea kwĩkala ndũanĩ sya Ngileati, 27 ĩndĩ ithyĩ athũkũmi maku nĩtũkũinga mũingo ũya ũngĩ; aũme onthe me na mĩio ya kaũ nĩmeũthi kaũnĩ mbee wa Yeova, o tondũ mwĩai wakwa waneena.”

28 Na kwoou Mose aneena na mũthembi Eleasali, na Yosua mwana wa Nuni, na aũngamĩi ma nyũmba sya aa-ĩthe ma mbaĩ sya Isilaeli na ameaĩa ĩũlũ woo, 29 ayasya: “Ethĩwa ana ma Ngati na ana ma Leũveni nĩmekũinga mũingo ũya ũngĩ wa Yolotani vamwe nenyu, aũme onthe ala me na mĩio ya kaũ kwondũ wa kũthi kaũnĩ mbee wa Yeova, na nthĩ ĩsu ĩikĩlwʼa vinya mbee wenyu, mũkamanenga nthĩ ĩno ya Ngileati mamĩmesye. 30 Ĩndĩ ethĩwa maiosa mĩio ya kaũ na mayĩinga vamwe nenyu, makatũa vamwe nenyu nthĩ ya Kanaanĩ.”

31 Nĩvo ĩndĩ ana ma Ngati na ana ma Leũveni masũngĩie masya: “Kĩla Yeova watũtavya ithyĩ athũkũmi maku nĩkyo tũkwĩka. 32 Nĩtũkwosa mĩio ya kaũ na tũyĩinga mbee wa Yeova nginya nthĩ ya Kanaanĩ, ĩndĩ kĩsio kĩla kĩkwĩthĩwa ũtiĩwa witũ kĩĩthĩwa ngalĩko ĩno ya Yolotani.” 33 Na kwoou Mose anenga ana ma Ngati, ana ma Leũveni, na nusu ya mbaĩ ya Manase mwana wa Yosevu ũsumbĩ wa Sioni mũsumbĩ wa Aamoli na ũsumbĩ wa Oku mũsumbĩ wa Mbasani; nĩwamanengie nthĩ ĩsu yonthe, vamwe na ndũa sya isio isu na ndũa ila syathyũlũlũkĩte nthĩ ĩsu.

34 Na ana ma Ngati maaka* Ndivoni, Atalothi, Aloeli, 35 Atilothi-sovani, Yaseli, Yokivea, 36 Mbethi-nimila, na Mbethi-alani, ndũa mbiĩĩe, na maaka itũũ sya mavia kwondũ wa ndĩthya syoo. 37 Na ana ma Leũveni maaka Esivoni, Eleale, Kiliathaimu, 38 Nevo, na Mbaali-meoni (masyĩtwa ma ndũa isu maĩ mavĩndũe) na Sivima; na mambĩĩa kũtwʼĩĩa ndũa ila matũngĩĩie masyĩtwa angĩ.

39 Na ana ma Makili mwana wa Manase maumaala na mavithũkĩa Ngileati na mamĩkwata na malũngya Aamoli ala matwĩe vo. 40 Na kwoou Mose anenga Makili mwana wa Manase, Ngileati, na ambĩĩa kũtũa vo. 41 Na Yaili mwana wa Manase ookĩla na amavithũkĩa na akwata motũi moo ma maeema, na ambĩĩa kwĩta motũi asu Avothi-yaili.* 42 Na Nova ookĩla avithũkĩa Kenathi na amĩkwata na tũtũla twayo,* na ambĩĩa kũmĩta Nova o ũndũ we mwene weetawa.

33 Kũũ nĩkwʼo kũndũ kũla andũ ma Isilaeli mambie kambi kyalonĩ kyoo yĩla maumie nthĩ ya Misili kwosana na nguthu syoo* matongoewʼe nĩ Mose na Alũni. 2 Kwosana na mwĩao wa Yeova, Mose nĩwaandĩkaa kwʼonthe kũla moombũũkasya kambi kuma vandũ vamwe kũthi vala vangĩ kyalonĩ kyoo, na ũũ nĩwʼo mambie kambi kuma vandũ vamwe kũthi vala vangĩ: 3 Moombũũkie kuma Lamesesi mũthenyanĩ wa 15 wa mwei wa mbee. Mũthenyanĩ o ũsu ĩtina wa Vasaka, Aisilaeli nĩmaumaalile na ũkũmbaũ* Amisili onthe mene. 4 Kavindanĩ o kau, Amisili makwetye kũthika syana syoo sya mbee ila Yeova wooaĩte katĩ woo, nũndũ Yeova nĩwasilĩle ngai syoo.

5 Kwoou Aisilaeli moombũũka kuma Lamesesi na mamba kambi Sukothi. 6 Na ĩndĩ moombũũka kuma Sukothi na mamba kambi Ethamu, kĩsionĩ kĩ mũthyanĩ wa weũ. 7 Ĩtina wa ũu, nĩmoombũũkie kuma Ethamu na mavĩndũka masyoka melekele kĩsionĩ kya Viailothi, kĩla kĩsianĩtye na Mbaali-nzevoni, na mamba kambi vakuvĩ na Mikitoli. 8 Ĩtina wa ũu, nĩmoombũũkie kuma Viailothi na mathi mesĩle katĩkatĩ wa ũkanga nginya weũnĩ na maendeea kũthi me nguthu kyalo kya mĩthenya ĩtatũ weũnĩ wa Ethamu na mamba kambi Mala.

9 Na ĩndĩ moombũũka kuma Mala na mavika Elimu. Kũu Elimu kwaĩ nthongo* 12 sya kĩwʼũ na mĩtende 70, na kwoou mamba kambi vau. 10 Kuma vau nĩmoombũũkie Elimu na mamba kambi Ũkanganĩ Mũtune. 11 Ĩtina wa ũu, nĩmoombũũkie kuma Ũkanganĩ Mũtune na mamba kambi weũnĩ wa Sini. 12 Na ĩndĩ moombũũka kuma weũnĩ wa Sini na mamba kambi Ndovika. 13 Ĩtina nĩmoombũũkie kuma Ndovika na mamba kambi Alusi. 14 Kuma vau nĩmoombũũkie Alusi na mamba kambi Levitimu, vala vataĩ kĩwʼũ kya kũnyuwa nĩ andũ. 15 Ĩtina wa ũu, nĩmoombũũkie kuma Levitimu na mamba kambi weũnĩ wa Sinaĩ.

16 Nĩmoombũũkie kuma weũnĩ wa Sinaĩ na mamba kambi Kivilothi-ataava. 17 Na ĩndĩ moombũũka kuma Kivilothi-ataava na mamba kambi Aselothi. 18 Ĩtina wa ũu, nĩmoombũũkie kuma Aselothi na mamba kambi Lithima. 19 Kuma vau nĩmoombũũkie Lithima na mamba kambi Limoni-velesi. 20 Na ĩndĩ moombũũka kuma Limoni-velesi na mamba kambi Livina. 21 Na moombũũka kuma Livina na mamba kambi Lisa. 22 Kuma vau nĩmoombũũkie Lisa na mamba kambi Keelatha. 23 Na ĩndĩ moombũũka kuma Keelatha na mamba kambi Kĩĩmanĩ kya Seveli.

24 Ĩtina wa ũu, nĩmoombũũkie kuma Kĩĩmanĩ kya Seveli na mamba kambi Alata. 25 Na ĩndĩ moombũũka kuma Alata na mamba kambi Makelothi. 26 Kuma vau nĩmoombũũkie Makelothi na mamba kambi Taathi. 27 Ĩtina wa ũu, nĩmoombũũkie kuma Taathi na mamba kambi Tela. 28 Na ĩndĩ moombũũka kuma Tela na mamba kambi Mithika. 29 Ĩtina nĩmombũũkie kuma Mithika na mamba kambi Asimona. 30 Kuma vau nĩmoombũũkie Asimona na mamba kambi Moselothi. 31 Na ĩndĩ moombũũka kuma Moselothi na mamba kambi Mbene-yaakani. 32 Na moombũũka kuma Mbene-yaakani na mamba kambi Olu-akitikati. 33 Kuma vau nĩmoombũũkie Olu-akitikati na mamba kambi Yotivatha. 34 Ĩtina nĩmoombũũkie kuma Yotivatha na mamba kambi Avilona. 35 Na ĩndĩ moombũũka kuma Avilona na mamba kambi Esioni-ngeveli. 36 Ĩtina wa ũu, nĩmoombũũkie kuma Esioni-ngeveli na mamba kambi weũnĩ wa Nzini, navo nĩ Katesi.

37 Ĩtina nĩmoombũũkie kuma Katesi na mamba kambi Kĩĩmanĩ kya Olu, mũvakanĩ wa nthĩ ya Etomu. 38 Na mũthembi Alũni ambata Kĩĩmanĩ kya Olu kwosana na mwĩao wa Yeova na akwʼĩĩa vau mwakanĩ wa 40 ĩtina wa Aisilaeli kuma nthĩ ya Misili, mũthenyanĩ wa mbee wa mwei wa katano. 39 Alũni aĩ na myaka 123 yĩla wakwʼĩĩie Kĩĩmanĩ kya Olu.

40 Nĩvo ĩndĩ mũsumbĩ wa Alati, ũla waĩ Mũkanaanĩ na watwĩe Nekevu nthĩ ya Kanaanĩ, weewie ĩũlũ wa kũka kwa Aisilaeli.

41 Ĩtina wa ĩvinda nĩmoombũũkie kuma Kĩĩmanĩ kya Olu na mamba kambi Nzalimona. 42 Ĩtina wa ũu, nĩmoombũũkie kuma Nzalimona na mamba kambi Vunoni. 43 Kuma vau nĩmoombũũkie Vunoni na mamba kambi Ovothi. 44 Na ĩndĩ moombũũka kuma Ovothi na mamba kambi Iye-avalimu, mũvakanĩ wa Moavi. 45 Ĩtina nĩmoombũũkie kuma Iyimu na mamba kambi Ndivoni-ngati. 46 Ĩtina wa ũu, nĩmoombũũkie kuma Ndivoni-ngati na mamba kambi Alimoni-ndivilathaimu. 47 Na ĩndĩ moombũũka kuma Alimoni-ndivilathaimu na mamba kambi iĩmanĩ sya Avalimu vakuvĩ na Nevo. 48 Mũthya, nĩmoombũũkie kuma iĩmanĩ sya Avalimu na mamba kambi yalatanĩ ĩtindimalu ya Moavi vakuvĩ na Yolotani kũu Yeliko. 49 Nĩmekalile mambĩte kambi kũkuumana na Yolotani, kuma Mbethi-yesimothi nginya Aveli-sitimu, yalatanĩ ĩtindimalu ya Moavi.

50 Na Yeova aneena na Mose e yalatanĩ ĩtindimalu ya Moavi vakuvĩ na Yolotani kũu Yeliko, na amwĩa: 51 “Neena na Aisilaeli na ũimea atĩĩ: ‘Yu nĩmũkũinga Yolotani na mũilika nthĩ ya Kanaanĩ. 52 No nginya mũmalũngye vyũ ekali onthe ma nthĩ isu kuma mbee wenyu na mũyananga mĩvwʼanano yoo yonthe myasũvye ya mavia na mĩvwʼanano yoo yonthe ya kyũma, na no nginya mũomboange kũndũ kwʼonthe kũtũlu kũla mathaithĩaa. 53 Na nĩmũũmesya nthĩ ĩsu na mũimĩtũa, nũndũ vate ndĩi nĩngũmũnenga yo mũmĩmesye. 54 No nginya mũaĩe mĩsyĩ yenyu nthĩ ĩsu yĩthĩwe yoo kwa kũkũna kũla. Ethĩwa kĩkundi nĩ kĩnene mwaĩlĩte kwongelanga ũtiĩwa wakyo, na ethĩwa kĩkundi nĩ kĩnini mwaĩlĩte kũolanga ũtiĩwa wakyo. Kĩla mũndũ akakwataa ũtiĩwa wake kwosana na vala kula yake yavalũka. Mwĩnengwa isio syĩthĩwe ũtiĩwa wenyu kwosana na mbaĩ sya aa-ĩthe menyu.

55 “‘Ĩndĩ ethĩwa mũilũngya ekali ma nthĩ isu maume mbee wenyu, ala mũũtialya makeethĩawa ta ivuti methonĩ menyu na mĩw’a mbaunĩ syenyu, na makamũthĩnasya mwĩ nthĩ ĩla mũũlika mũtũe. 56 Nakwa ngamwĩka kĩla navangĩte kũmeka.’”

34 Na Yeova aneena ĩngĩ na Mose, ayasya: 2 “Neena na Aisilaeli na ũimeaĩa ũũ: ‘Yĩla mũũlika nthĩ ya Kanaanĩ, yĩĩthĩwa ũtiĩwa wenyu, nthĩ ĩsu ya Kanaanĩ yĩĩthĩwa yenyu kwosana na mĩvaka yayo.

3 “‘Mũvaka wenyu wa ngalĩko ya ĩtheo wĩĩthĩwa umĩte weũnĩ wa Nzini kũkuumana na Etomu, na mũvaka ũsu ngalĩko ya wumĩlonĩ wa sua wĩĩthĩwa umĩte mũthyanĩ wa Ũkanga wa Mũnyũ.* 4 Mũvaka ũsu waĩle kũvĩndũka wĩsĩle ĩtheo wa kyambato kya Akilavimu na ũiendeea nginya Nzini, na mũthya wawʼo wĩĩthĩwa ĩtheo wa Katesi-mbalinea. Kuma vau mũvaka ũsu waĩle kũthi nginya Asali-atali na ũiendeea ũvike Asimoni. 5 Mũvaka ũsu waĩle kũvĩndũkĩa Asimoni na ũithi nginya Kyandanĩ kya* Misili, na mũthya wawʼo wĩĩthĩwa Ũkanganĩ.*

6 “‘Mũvaka wenyu wa ngalĩko ya ũthũĩlonĩ wa sua waĩle kwĩthĩwa ũla Ũkanga Mũnene* na ndee syawʼo. Ũsu nĩwʼo ũkwĩthĩwa mũvaka wenyu ngalĩko ya ũthũĩlonĩ wa sua.

7 “‘Nawʼo ũũ nĩwʼo waĩle kwĩthĩwa mũvaka wenyu ngalĩko ya ĩũlũ: Kuma ũla Ũkanganĩ Mũnene mwĩvanĩĩa mũvaka wenyu nginya Kĩĩmanĩ kya Olu. 8 Kuma Kĩĩmanĩ kya Olu mwĩvanĩĩa mũvaka ũsu nginya Levo-amathi,* na mũvaka ũsu wĩthi nginya Nzetati. 9 Kuma vau mũvaka ũsu wĩendeea nginya Nziviloni, na mũthya wawʼo wĩĩthĩwa Asali-enani. Ũsu nĩwʼo ũkwĩthĩwa mũvaka wenyu ngalĩko ya ĩũlũ.

10 “‘Ĩtina wa ũu, mwaĩle kũvanĩĩa mũvaka wenyu wa ngalĩko ya wumĩlonĩ wa sua kuma Asali-enani nginya Seviamu. 11 Na mũvaka ũsu waĩle kuma Seviamu nginya Livila, ngalĩko ya wumĩlonĩ wa sua ya Aini, na ũitheea nginya ũkĩle tũlĩma tũla twĩ ngalĩko ya wumĩlonĩ wa sua ya Ũkanga wa Kinelethi.* 12 Mũvaka ũsu wĩendeea nginya Yolotani, na mũthya wawʼo wĩĩthĩwa Ũkanganĩ wa Mũnyũ. Ĩsu nĩyo ĩkethĩawa nthĩ yenyu na mĩvaka yayo ĩla ĩmĩthyũlũlũkĩte.’”

13 Na kwoou Mose aneena na Aisilaeli, na ameaĩa ũũ: “Ĩno nĩyo nthĩ ĩla mũkũaĩwa kwa kũkũna kula yĩthĩwe yenyu, o tondũ Yeova wĩaĩte ĩnengwe mbaĩ kenda na nũsu. 14 Nũndũ mbaĩ ya Aleũveni kwosana na nyũmba ya aa-ĩthe moo, na mbaĩ ya Angati kwosana na nyũmba ya aa-ĩthe moo, na nusu ya mbaĩ ya Manase nĩmaminĩte kwĩyosea ũtiĩwa woo. 15 Mbaĩ isu ilĩ na nusu nĩsyĩyoseete ũtiĩwa wasyo kĩsionĩ kya Yolotani vakuvĩ na Yeliko, ngalĩko ya wumĩlonĩ wa sua.”

16 Na Yeova aneena ĩngĩ na Mose, ayasya: 17 “Aa nĩmo masyĩtwa ma aũme ala mekũmũaanĩsya nthĩ ĩla mũũmesya: mũthembi Eleasali na Yosua mwana wa Nuni. 18 Na mwĩnyuva mũnene ũmwe kuma kĩla mbaĩ nĩ kana amũtetheesye kũaanyʼa nthĩ ĩsu. 19 Aa nĩmo masyĩtwa ma aũme ala mũũnyuva: kuma mbaĩnĩ ya Yuta, Kalevu mwana wa Yevune; 20 kuma mbaĩnĩ ya ana ma Simeoni, Semueli mwana wa Amiuti; 21 kuma mbaĩnĩ ya Mbenyamini, Elitati mwana wa Kisiloni; 22 kuma mbaĩnĩ ya ana ma Ndani, mũnene ũmwe, nake nĩ Mbuki mwana wa Yokili; 23 kuma mbaĩnĩ ya ana ma Manase mwana wa Yosevu, mũnene ũmwe, nake nĩ Anieli mwana wa Evoti; 24 kuma mbaĩnĩ ya ana ma Evilaimu mwana wa Yosevu, mũnene ũmwe, nake nĩ Kemũeli mwana wa Sivitani; 25 kuma mbaĩnĩ ya ana ma Nzevuluni, mũnene ũmwe, nake nĩ Elisavani mwana wa Valinaki; 26 kuma mbaĩnĩ ya ana ma Isakali, mũnene ũmwe, nake nĩ Valitieli mwana wa Asisani; 27 kuma mbaĩnĩ ya ana ma Aseli, mũnene ũmwe, nake nĩ Aiuti mwana wa Selomi; 28 kuma mbaĩnĩ ya ana ma Navitali, mũnene ũmwe, nake nĩ Vetaeli mwana wa Amiuti.” 29 Asu nĩmo Yeova weeaĩe maanĩsye Aisilaeli nthĩ mavika nthĩ ya Kanaanĩ.

35 Na Yeova aendeea kũneena na Mose e yalatanĩ ĩtindimalu ya Moavi vakuvĩ na Yolotani kũu Yeliko, ayasya: 2 “Neena na Aisilaeli ũmatavye kana nĩmaĩlĩte kũnenga Alivai ndũa sya kwĩkala kuma ũtiĩwanĩ ũla meũkwata, na nĩmaĩlĩte kũnenga Alivai isesi ila ithyũlũlũkĩte ndũa isu. 3 Nĩmo makatũaa ndũanĩ isu, na isesi isu ikeethĩawa kwondũ wa indo syoo, malĩ syoo, na nyamũ ila ingĩ syonthe me nasyo. 4 Na isesi sya ndũa ila mũũnenga Alivai ikeethĩawa syĩ na ũthanthau wa mĩkono 1,000* kuma ũkũtanĩ kũthyũlũlũka ndũa. 5 Mwaĩlĩte kũthimaa nza wa ndũa mĩkono 2,000 ngalĩko ya wumĩlonĩ wa sua, mĩkono 2,000 ngalĩko ya ĩtheo, mĩkono 2,000 ngalĩko ya ũthũĩlonĩ wa sua, na mĩkono 2,000 ngalĩko ya ĩũlũ, na ĩ ndũa yaĩlĩte kwĩthĩwa katĩkatĩ. Isu nĩsyo ikethĩawa isesi sya ndũa syoo.

6 “Ndũa ila mũũnenga Alivai syĩĩthĩwa syĩ ndũa 6 sya kwĩvitha, ila mũndũ ũla woaa ũngĩ ũkakĩĩaa vo, na nĩmũũmanenga ndũa ingĩ 42. 7 Kwoou ndũa syonthe ila mũũnenga Alivai syĩĩthĩwa syĩ 48, vamwe na isesi syasyo. 8 Mũkanenga Alivai ndũa isu kuma ũtiĩwanĩ wa Aisilaeli. Ethĩwa kĩkundi nĩ kĩnene kĩkanengane ndũa mbingangĩ, na ethĩwa kĩkundi nĩ kĩnini kĩkanengane ndũa ninangi. Kĩla kĩkundi kĩkanenga Alivai ndũa imwe syakyo kwosana na ũtiĩwa ũla kĩkwatĩte.”

9 Na Yeova aendeea kũneena na Mose, ayasya: 10 “Neena na Aisilaeli na ũimea atĩĩ: ‘Yu mũkilyĩ kũinga Yolotani mũlike nthĩ ya Kanaanĩ. 11 Na nĩmwaĩlĩte kwĩnyuvĩa ndũa itonya kũvikĩka na mĩtũkĩ nĩ kana syĩthĩwe ndũa sya kwĩvitha, na vau nĩ vo mũndũ ũla woaa ũngĩ* kũte kwenda kwake ũkakĩĩaa. 12 Ndũa isu ikatũmĩawa kwĩvitha mũĩvanĩsya wa nthakame, nĩ kana mũndũ ũla ũwaĩte ũngĩ ndakoawe nginya yĩla ũkaũngama silanĩ mbee wa ũmbano. 13 Ũu nĩwʼo mũkatũmĩaa ndũa thanthatũ sya kwĩvitha ila mũũnyuva. 14 Mwĩnyuva ndũa itatũ mũingo ũũ wa Yolotani na ndũa itatũ nthĩ ya Kanaanĩ nĩ kana syĩthĩwe ndũa sya kwĩvitha. 15 Ndũa isu thanthatũ ikeethĩwa wĩvitho kwondũ wa Aisilaeli, kwondũ wa mwĩkali wa ũeninĩ, na kwondũ wa mũndũ ũla ũthamĩĩe kĩsionĩ kyenyu; mũndũ o na wĩva ũla woaa ũngĩ* kũte kwenda kwake akakĩĩaa kũu.

16 “‘Ĩndĩ ethĩwa akũna mũndũ ũla ũngĩ na kĩndũ kya kyũma* na mũndũ ũsu akwʼa, ũsu nĩ mũaani. Vate ndĩi mũaani ũsu aĩlĩte kũawa. 17 Na ethĩwa amũkima na ĩvia yĩtonya kũmũaa na aikwʼa, ũsu nĩ mũaani. Vate ndĩi mũaani ũsu aĩlĩte kũawa. 18 Na ethĩwa amũkũna na kĩndũ kĩseũvĩtwʼe na mũtĩ kĩtonya kũmũaa na aikwʼa, ũsu nĩ mũaani. Vate ndĩi mũaani ũsu aĩlĩte kũawa.

19 “‘Mũĩvanĩsya wa nthakame nĩwe waĩlĩte kũaa mũaani ũsu. Akomana nake, we mwene nĩwe waĩle kũmũaa. 20 Ethĩwa mũndũ nĩwasukuma mũndũ ũkũmũmena kana ekya kĩndũ amũkime e na kĩeleelo kya kũmũũmĩsya* na akwʼa, 21 kana ethĩwa mũndũ ũkũmena ũngĩ nĩwamũkũna na kwʼoko kwake, na akwʼa, vate ndĩi ũla wakũnana aĩlĩte kũawa. Ũsu nĩ mũaani. Mũĩvanĩsya wa nthakame aĩlĩte kũaa mũaani ũsu akomana nake.

22 “‘Ĩndĩ ethĩwa mũndũ nĩwasukuma ũngĩ kana amũkima na kĩndũ ate na kĩeleelo kya kũmũũmĩsya* na ndamũmenete na ndeĩvangĩte kwĩka ũu, 23 kana ethĩwa amũtumba na ĩvia atamwene na mayĩĩ na ũmaitha kana ndeũmanthaa ũndũ ũtonya kũmũũmĩsya, na mũndũ ũsu nĩwakwʼa, 24 ũmbano waĩlĩte kũsilanyʼa ũla wakũnana na mũĩvanĩsya wa nthakame, kwosana na motwʼĩo asu. 25 Nĩvo ĩndĩ ũmbano ũkamũvonokya ũla ũaanĩte kuma kwʼokonĩ kwa mũĩvanĩsya wa nthakame na aitũngwa ndũanĩ yake ya kwĩvitha ĩla wakĩĩie, nake no nginya aendeee kwĩkala vau nginya yĩla mũthembi mũnene ũla wetĩkĩiwʼe mauta matheu ũkakwʼa.

26 “‘Ĩndĩ ethĩwa mũndũ ũsu ũaanĩte nĩwakĩla mũvaka wa ndũa yake ya kwĩvitha ĩla wakĩĩie 27 na mũĩvanĩsya wa nthakame aimwĩthĩa nza wa mũvaka wa ndũa yake ya kwĩvitha na aimũaa mũndũ ũsu ũaanĩte, mũĩvanĩsya ũsu ndakethĩwa na ĩvĩtyo ya kwĩtĩkya nthakame. 28 Nĩkwĩthĩwa no nginya aendeee kwĩkala ndũanĩ yake ya kwĩvitha nginya yĩla mũthembi mũnene ũkakwʼa. Na mũthembi mũnene akwʼa, mũndũ ũsu ũaanĩte akeethĩwa atonya kũsyoka kĩsionĩ kyake. 29 Maũndũ asu makeethĩawa me ũtwʼĩo kwondũ wenyu yĩla mũũtwʼa sila nzyawanĩ syenyu syonthe kwʼonthe kũla mũkethĩwa mũtwĩe.

30 “‘Mũndũ o na wĩva ooaa mũndũ* ũngĩ, aĩlĩte kũawa nũndũ nĩ mũaani, ĩndĩ aĩlĩte kũawa o ethĩwa ve andũ* matonya kũkũsĩĩa ũndũ ũsu; ethĩwa ũkũsĩ no wa mũndũ ũmwe, vai mũndũ* waĩlĩte kũawa. 31 Mũyaĩlĩte o na vanini kwosa wovosyo kwondũ wa thayũ wa mũaani waĩlĩte kũawa, nũndũ vate ndĩi nĩwaĩlĩte kũawa. 32 Na mũyaĩlĩte o na vanini kwosa wovosyo kwondũ wa mũndũ wakĩĩa ndũanĩ yake ya kwĩvitha nĩ kana asyoke kĩsionĩ kyake na aindeea kwĩkala kwʼo mũthembi mũnene ate mũkwʼũ.

33 “‘Mũyaĩlĩte o na vanini kũvukya nthĩ ĩla mũtwĩe, nũndũ nthakame nĩvukasya nthĩ, na vai kĩndũ kĩtonya kũete wĩwʼanĩthyo kwondũ wa nthakame ĩla yetĩkwʼa ĩ nthĩ ate o nthakame ya ũla wamĩtĩkya. 34 Mũyaĩlĩte o na vanini kũvukya nthĩ ĩla mũtwĩe, nũndũ noyo nyie nĩtwĩe; nĩkwĩthĩwa nyie, Yeova, nĩtwĩe katĩ wa andũ ma Isilaeli.’”

36 Na aũngamĩi ma mĩsyĩ ya nzyawa sya Ngileati mwana wa Makili mwana wa Manase kuma mĩsyĩnĩ ya ana ma Yosevu mathengeea na maneena na Mose na anene ala maĩ aũngamĩi ma mĩsyĩ ya Aisilaeli. 2 Na masya: “Yeova nĩwakwĩaĩe we mwĩai wakwa ũaanyʼe nthĩ kwosana na kula yĩthĩwe ũtiĩwa kwondũ wa Aisilaeli na we mwĩai wakwa nĩweeĩaĩwe nĩ Yeova ũnengane ũtiĩwa wa mwana-a-asa witũ Nzeloveati kwa eĩtu make. 3 Aka asu makatwawa nĩ aũme ma mbaĩ ĩngĩ ya Isilaeli, ũtiĩwa woo ũvetwa ũtiĩwanĩ wa aa-ĩthe maitũ na ũyongelwa ũtiĩwanĩ wa mbaĩ ĩla meũtwawa, na nũndũ wa ũu, ũivetwa ũtiĩwanĩ ũla tũkwatĩte kwĩsĩla kula. 4 Yu ĩndĩ, yĩla ĩvinda ya Yuvilii yĩkavika kwondũ wa andũ ma Isilaeli, ũtiĩwa wa aka asu ũkongeleelwa ũtiĩwanĩ wa mbaĩ ĩla makethĩwa matwaĩtwe, na nũndũ wa ũu, ũtiĩwa woo ũkaumwʼa ũtiĩwanĩ wa mbaĩ ya aa-ĩthe maitũ.”

5 Na ĩndĩ Mose eeaĩa Aisilaeli kwosana na mwĩao wa Yeova, aimea: “Ndeto ila mbaĩ ya ana ma Yosevu maneena nĩ sya wʼo. 6 Ũũ nĩwʼo Yeova ũkwĩaĩa eĩtu ma Nzeloveati: ‘No matwawe nĩ ũla mekwenda. Ĩndĩ maĩlĩte kũtwawa nĩ mũndũ wa mũsyĩ wa mbaĩ ya ĩthe woo. 7 Vai ũtiĩwa wa Aisilaeli waĩlĩte kuma mbaĩ ĩmwe kũthi ĩla ĩngĩ, nũndũ Aisilaeli mayaĩlĩte kũlekya ũtiĩwa wa mbaĩ ya aa-ũmae moo. 8 Na mwĩĩtu o na wĩva wanengwa ũtiĩwa mbaĩnĩ ya Isilaeli aĩlĩte kũtwawa nĩ mũndũ wa mbaĩ ya ĩthe wake, nĩ kana ũtiĩwa ũla Aisilaeli makwatĩte kuma kwa aa-ũmae moo ndũkaume mokonĩ moo. 9 Vai ũtiĩwa waĩlĩte kuma mbaĩnĩ ĩmwe na ũithi mbaĩnĩ ĩngĩ, nũndũ mbaĩ sya Isilaeli iyaĩlĩte kũlekya ũtiĩwa wasyo.’”

10 Na eĩtu ma Nzeloveati nĩmeekie o tondũ Yeova wamwĩaĩe Mose. 11 Na kwoou eĩtu asu ma Nzeloveati, ala nĩ Maala, Tilisa, Okila, Milika, na Noa, nĩmatwaiwe nĩ ana ma ana-a-ĩthe ma ĩthe woo. 12 Matwaiwe nĩ aũme ma mĩsyĩ ya Manase mwana wa Yosevu nĩ kana ũtiĩwa woo ũendeee kwĩkala mbaĩnĩ ya mũsyĩ wa ĩthe woo.

13 Ĩsu nĩyo mĩao na motwʼĩo ala Yeova wanengie Aisilaeli kwĩsĩla vala ve Mose me yalatanĩ ĩtindimalu ya Moavi vakuvĩ na Yolotani kũu Yeliko.