KŨTŨNGĨLĨĨLWA KWA MĨAO

1 Ii nĩsyo ndeto ila Mose waneenie na Aisilaeli onthe me weũnĩ ũla wĩ kĩsionĩ kya Yolotani, yalatanĩ ĩtindimalu mbee wa Suvu, katĩ wa Valani, Toveli, Lavani, Aselothi, na Ndisaavu. 2 Nĩ kyalo kya mĩthenya 11 kuma Olevu nginya Katesi-mbalinea wĩsĩle nzĩa ya Kĩĩma kya Seili. 3 Mwakanĩ wa 40, mweinĩ wa 11, mũthenya wa mbee wa mwei ũsu, Mose nĩwaneenie na Aisilaeli* kwosana na kyonthe kĩla Yeova wamwĩaĩe amatavye. 4 Eekie ũu ĩtina wa kũsinda Sioni mũsumbĩ wa Aamoli, ũla watwĩe Esivoni, na Oku mũsumbĩ wa Mbasani, ũla watwĩe Asitalothi, ĩla yĩ Etilei. 5 Mose nĩwambĩĩie kũelesya Mĩao me kĩsionĩ kya Yolotani nthĩ ya Moavi, ayasya:

6 “Yeova Ngai witũ nĩwatũtavisye twĩ Olevu, ‘Nĩmwĩkalĩte mũno kĩsionĩ kĩĩ kĩ iĩma. 7 Vĩndũkai na mũithi kĩsionĩ kĩ iĩma kya Aamoli na kwelekela kũla kwĩ atũi moo onthe ala me Alava, kĩsionĩ kĩ iĩma, Sevela, Nekevu, na ũtee wa ũkanga, nthĩ ya Akanaanĩ, na Levanoni,* nginya ũla ũsĩnĩ mũnene, ũsĩ wa Euvalati. 8 Sisyai, nĩniĩte nthĩ ĩno mbee wenyu. Endai na mũimesya nthĩ ĩla Yeova weevĩtĩe aa-ĩthe menyu, Avalaamu, Isaka, na Yakovo, kana akamanenga o vamwe na ũsyao woo* ĩtina woo.’

9 “Na ĩvindanĩ yĩu namwĩie, ‘Nditonya kũmũkua nĩ nyioka. 10 Yeova Ngai wenyu nũmwingĩvĩtye, na yu ũmũnthĩ mwĩ aingĩ mũno ta ndata sya matunĩ. 11 Yeova, Ngai wa aa-ũmae menyu, namwingĩvye mavinda ngili kwĩ ũndũ mwĩana, na ekai amũathime o tondũ ũmwathĩte. 12 Ndonya ata kũmũkua nĩ nyioka na ndikua mĩio yenyu vamwe na ĩteta yenyu? 13 Nyuvai aũme oĩ, me na ũmanyi, na me na ũtũĩka ma mbaĩ syenyu, na ngamatwʼĩkĩthya aũngamĩi ĩũlũ wenyu.’ 14 Nenyu mwanzũngĩa, ‘Kĩla watũtavya twĩke nĩ kĩseo.’ 15 Kwoou noosa aũngamĩi ma mbaĩ syenyu, aũme oĩ na me na ũtũĩka, na namatwʼĩkĩthya aũngamĩi ĩũlũ wenyu, anene ma makili, anene ma maana, anene ma mĩongo ĩtano, anene ma makũmi, na atongoi ma mbaĩ syenyu.

16 “Ĩvindanĩ yĩu neeaĩe asili menyu atĩĩ: ‘Yĩla mũkwĩthukĩĩsya ĩkoani katĩ wa ana-a-ĩthe menyu, mwaĩlĩte kũsilanyʼa mũndũ na mwana-a-ĩthe kana mwĩkali wa ũeninĩ na ũlũngalu. 17 Mũyaĩle kwĩthĩwa na kyende yĩla mũũsila. Mwaĩle kwĩthukĩĩsya mũndũ mũnini o ũndũ mũtonya kwĩthukĩĩsya mũndũ mũnene. Mũikatelemwʼe nĩ andũ, nũndũ ũsili nĩ wa Ngai; na ethĩwa ĩkoani nĩ yũmũ mũno kwenyu, mwaĩlĩte kũyĩete vala nĩĩ, nakwa ndiyĩthukĩĩsya.’ 18 Ĩvindanĩ yĩu nĩnamwĩaĩe ĩũlũ wa maũndũ onthe ala mwaĩlĩte kwĩka.

19 “Na ĩndĩ nĩtwaumie Olevu na twesĩla weũnĩ ũsu wʼonthe mũnene na wa kũtĩsya ũla mwoonie nzĩanĩ ya kĩsio kĩ iĩma kya Aamoli, o tondũ Yeova Ngai witũ watwĩaĩe, na mũthya twesa kũvika Katesi-mbalinea. 20 Nĩvo ĩndĩ namũtavisye, ‘Nĩmwavika kĩsionĩ kĩ iĩma kya Aamoli, kĩla Yeova Ngai witũ ũkũtũnenga. 21 Sisyai, Yeova Ngai wenyu nũmũnengete nthĩ ĩno. Ambatai, mĩmesyei, o tondũ Yeova, Ngai wa aa-ũmae menyu, wamũtavisye. Mũikakĩe o na mũikateleme.’

22 “Ĩndĩ, inywʼonthe nĩmwookie vala nĩĩ na mwambĩa, ‘Tũtũmei aũme mbee witũ mathi makathiane ĩ nthĩ na mayũka matũtavye nzĩa ĩla twaĩle kwĩsĩla na nĩ ndũa iilye ata tũkwĩthĩa.’ 23 Ũndũ ũsu nĩwambendeeisye, kwoou nanyuva aũme 12 katĩ wa aũme menyu, ũmwe kwondũ wa kĩla mbaĩ. 24 Na makũsya na mambata kĩsionĩ kĩ iĩma na mavika Mwandanĩ wa* Esikoli na mathiana ĩ nthĩ. 25 Nĩmoosie matunda amwe ma ĩ nthĩ na mamakua matũetee, na mooka matũtavya, ‘Nthĩ ĩla Yeova Ngai witũ ũkũtũnenga nĩ nzeo.’ 26 Ĩndĩ nĩmwaleile kwambata, na mwaleana na mwĩao wa Yeova Ngai wenyu. 27 Nĩmwaendeeie kũnyungunyĩsya mwĩ maeemanĩ menyu na mwaasya, ‘Nĩkwĩthĩwa Yeova nĩwatũmenie nĩkyo kĩtumi watumisye nthĩ ya Misili atũnengane mokonĩ ma Aamoli matwanange. 28 Tũendete kũndũ kũilye ata? Ana-a-ĩthe maitũ nĩmatumie tũkwʼa ngoo* mayasya, “Andũ asu nĩ anene na nĩ aasa kwĩ ithyĩ, na ndũa syoo nĩ nene na mbiĩĩe kũvika ĩtunĩ,* na nĩtwonie ana ma Aanaki kũu.”’

29 “Kwoou namũtavisye, ‘Mũikateleme kana mũlikwe nĩ wia nũndũ woo. 30 Yeova Ngai wenyu nũkũthi mbee wenyu na akamũkitĩa, o tondũ weekie Misili mbee wa metho menyu. 31 Na nĩmwoonie mwĩ weũnĩ ũndũ Yeova Ngai wenyu wamũkuie o tondũ mũndũũme ũkuaa mwana wake, kĩla vandũ mwaendie nginya mwavika vandũ vaa.’ 32 Ĩndĩ o na maũndũ asu onthe me vo, mũyaamũĩkĩĩa Yeova Ngai wenyu, 33 ũla waendaa mbee wenyu nzĩanĩ, nĩ kana athiane vala mũkwamba maeema. Nĩwamumĩlĩĩlaa na mwaki ũtukũ na ĩtu mũthenya nĩ kana amwonyʼe nzĩa ĩla mwaĩlĩte kwĩsĩla.

34 “Ĩvindanĩ yĩu yonthe Yeova nĩweewʼaa maũndũ ala mwaneenaa, na athata mũno na eevĩta ayasya: 35 ‘Vai mũndũ o na ũmwe katĩ wa nzyawa ĩno nthũku ũkona nthĩ nzeo ĩla neevĩtie kana nganenga aa-ĩthe menyu, 36 ate o Kalevu mwana wa Yevune. Akamyona, na ngamũnenga we vamwe na ana make nthĩ ĩla wakinyĩle, nĩkwĩthĩwa nũmũatĩĩte Yeova na ngoo yonthe.* 37 (O na Yeova nĩwanthatĩie nũndũ wenyu, na asya, “O naku ndũkamĩlika. 38 Yosua mwana wa Nuni, ũla ũũngamaa mbee waku, nĩwe ũkalika nthĩ ĩsu. Mwĩkĩe vinya,* nũndũ akatuma Aisilaeli mamĩmesya.”) 39 O na ĩngĩ, syana syenyu ila mwaisye kana ikatwʼĩka mũtavo na ana menyu ala ũmũnthĩ matesĩ ũseo kana ũthũku, makamĩlika, na ngamanenga yo mamĩmesye. 40 Ĩndĩ inywʼĩ, vĩndũkai na mũithi weũnĩ mwĩsĩle nzĩa ya Ũkanga Mũtune.’

41 “Nĩvo ĩndĩ mwambĩie, ‘Nĩtũmũvĩtĩsye Yeova. Yu nĩtũkwambata na tũyũkita, o tondũ Yeova Ngai witũ ũtwĩaĩe!’ Kwoou kĩla ũmwe wenyu eekĩa mĩio yake ya kaũ, na mwasũanĩaa ta ũkwĩthĩwa wĩ ũndũ wĩ laisi kwambata kĩĩmanĩ. 42 Ĩndĩ Yeova ambĩa, ‘Matavye atĩĩ: “Mũikambate mũkite, nũndũ ndiĩthĩwa vamwe nenyu. Mweeka ũu, nĩmũũsindwa nĩ amaitha menyu.”’ 43 Kwoou naneena nenyu, ĩndĩ mũyaaĩthukĩĩsya. Vandũ va ũu, mwaleana na mwĩao wa Yeova na nũndũ wa mĩtavyo mwatata kwambata kĩĩmanĩ. 44 Nĩvo ĩndĩ Aamoli ala matwĩe kĩĩmanĩ kĩu maumaalũkile makomane nenyu na mamũsembanyʼa o tondũ nzũkĩ syĩkaa, na mamũnyaĩĩkya kuma Seili nginya Olima. 45 Kwoou nĩmwasyokie na mwambĩĩa kũĩĩa mbee wa Yeova, ĩndĩ Yeova ndaamwĩthukĩĩsya o na ndaaũngana nenyu. 46 Nĩkyo kĩtumi mwaendeeie kwĩkala Katesi ĩvinda yĩasa ũu.

2 “Na ĩndĩ twavĩndũka na twathi weũnĩ twĩsĩle nzĩa ya Ũkanga Mũtune, o tondũ Yeova wandavĩtye, na twathiũũka Kĩĩma kya Seili mĩthenya mingĩ. 2 Mũthya Yeova ambĩie, 3 ‘Nĩmũthyũũkĩte kĩĩma kĩĩ ĩvinda yĩasa mũno. Yu vĩndũkai mũthi ngalĩko ya ĩũlũ. 4 Na ũinenga andũ mwĩao ũũ: “Mũkesĩla vakuvĩ na mũvaka wa ana-a-ĩthe menyu, nzyawa sya Esaũ, ala matwĩe Seili, na makamũkĩa, na no nginya mwĩsũvĩe mũno. 5 Mũikathokoane namo,* nũndũ ndikamũnenga kĩlungu o na kĩmwe kya nthĩ yoo, o na kalungu keanĩe ũnyaaĩ wa kũũ, nĩkwĩthĩwa nĩnĩnengete Esaũ Kĩĩma kya Seili kĩthĩwe kyake. 6 Mwaĩlĩte kũmanenga mbesa kwondũ wa lĩu ũla mũkaya, na mwaĩlĩte kũĩvĩa kĩwʼũ kĩla mũkanywʼa. 7 Nĩkwĩthĩwa Yeova Ngai wenyu nũmũathimĩte maũndũnĩ onthe ala mwĩkĩte. Nĩwĩsĩ nesa ũndũ mwĩsĩlĩte weũnĩ ũũ mũnene. Myakanĩ ĩĩ 40 Yeova Ngai wenyu nĩwĩthĩĩtwe vamwe nenyu, na mũyaakosa kĩndũ.”ʼ 8 Kwoou twesĩla vakuvĩ na ana-a-ĩthe maitũ, nzyawa sya Esaũ, ala matwĩe Seili, twalea kwĩsĩla nzĩa ya Alava, kuma Elathi na kuma Esioni-ngeveli.

“Na ĩndĩ twavĩndũka na twesĩla nzĩa ya weũnĩ wa Moavi. 9 Nĩvo ĩndĩ Yeova wambĩie, ‘Mũikathokoane na Moavi kana mũkite nayo, nũndũ ndikamũnenga kĩsio o na kĩmwe kya nthĩ yake kĩthĩwe kyenyu nĩkwĩthĩwa nĩnĩnenganĩte Ali yĩthĩwe ya nzyawa sya Loti. 10 (Aemi mekalaa kũu tene, andũ anene na aingĩ mũno na aasa ta Aanaki. 11 Alevai o namo moonekaa ta Aanaki, na Amoavi mametaa Aemi. 12 Mbeenĩ, Aoli matwĩe Seili, ĩndĩ nzyawa sya Esaũ nĩsyeeyoseie nthĩ ĩsu na syamamina na syatũa vo vandũ voo, o tondũ Isilaeli ĩkekana na nthĩ ĩla nĩ ũtiĩwa woo, ĩla Yeova vate nzika ũkamanenga.) 13 Yu endai na mũyĩinga Mwanda wa Nzeleti.’ Kwoou twainga Mwanda wa* Nzeleti. 14 Ĩvinda yĩla twakuie kuma Katesi-mbalinea kũvika twakĩla Mwanda wa* Nzeleti yaĩ myaka 38, nginya nzyawa yonthe ya aũme ma kaũ yathela kambinĩ, o tondũ Yeova wamevĩtĩe. 15 Kw’oko kwa Yeova kwaĩ ĩũlũ woo nĩ kana amanange kuma kambinĩ nginya mathela vyũ.

16 “Yĩla aũme onthe ma kaũ katĩ wa andũ makwie oou, 17 Yeova nĩwaneenie nakwa ĩngĩ, ambĩa, 18 ‘Ũmũnthĩ nĩmũũkĩla mũvaka wa nthĩ ya Moavi, nayo nĩ, Ali. 19 Mwavika vakuvĩ na Aamimoni, mũikamathokoe kana mũmathee, nũndũ ndikamũnenga kĩlungu o na kĩmwe kya nthĩ ya Aamimoni kĩthĩwe kyenyu, nĩkwĩthĩwa nĩnĩkĩnengete nzyawa sya Loti kĩthĩwe kyoo. 20 Ĩsu o nayo yatalawa ta nthĩ ya Alevai. (Alevai matwĩe vo tene, na Aamimoni mametaa Nzamisumimu. 21 Maĩ andũ anene na aingĩ mũno na aasa ta Aanaki; ĩndĩ Yeova amananga mauma mbee wa Aamimoni, namo mamalũngya na matũa vandũ voo. 22 Ũu nĩwʼo weekie kwondũ wa nzyawa sya Esaũ, ala yu matwĩe Seili, yĩla waanangie Aoli kuma mbee woo, nĩ kana meyosee nthĩ yoo na maitũa vo kũvika ũmũnthĩ. 23 Namo Aavi, mekalaa motũinĩ mavikĩte Ngasa nginya yĩla mbaĩ ya Kavitolimu, ĩla yaumĩte Kavitoli,* yamanangie na yatũa vo vandũ voo.)

24 “‘Ũkĩlai, na mũikĩlanĩlya Mwanda wa* Alinoni. Sisyai, nĩnĩnenganĩte Sioni ũla Mũamoli, mũsumbĩ wa Esivoni mokonĩ menyu. Kwoou ambĩĩai kwosa nthĩ yake na mũyũkita nake. 25 Ũmũnthĩ nĩngwambĩĩa kũtuma andũ onthe ĩtheo wa matu ala makewʼa ũvoo ĩũlũ wenyu matelema na mailikwa nĩ wia. Makathĩnĩka na maitetema* nũndũ wenyu.’

26 “Na ĩndĩ natũma andũ kuma weũnĩ wa Ketemothi kũla kwĩ Mũsumbĩ Sioni wa Esivoni, me na ndeto ii sya mũuo, 27 ‘Mbĩtĩkĩlye nĩvĩtĩle nthĩ yaku. Nĩĩsĩla o lelũnĩ na ndiathũka kw’okonĩ kwa aũme kana kw’okonĩ kwa aka. 28 Ngaya o lĩu na ndinywʼa o kĩwʼũ kĩla ũkanthooesya. Mbĩtĩkĩlye o nĩvĩte na maaũ, 29 ũu nĩwʼo nzyawa sya Esaũ ila itwĩe Seili na Amoavi ala matwĩe Ali mambĩkie, nginya nĩinge Yolotani nĩlike nthĩ ĩla Yeova Ngai witũ ũkũtũnenga.’ 30 Ĩndĩ Mũsumbĩ Sioni wa Esivoni ndaatwĩtĩkĩlya tũvĩte, nũndũ Yeova Ngai wenyu nĩweetĩkĩlilye veva wake wĩthĩwe na ngũlũ na ngoo yake yeethĩwa yĩ mbũmũ, nĩ kana amũnengane mokonĩ menyu o tondũ vailye ũmũnthĩ.

31 “Na ĩndĩ Yeova ambĩa, ‘Sisyai, nĩnambĩĩte kũmũnenga Sioni na nthĩ yake. Ambĩĩai kwĩyosea nthĩ yake.’ 32 Yĩla Sioni wookie vamwe na andũ make onthe tũkomanĩe ku Yaasi nĩ kana tũkite, 33 Yeova Ngai witũ nĩwamũnenganie kwitũ, na kwoou twamũsinda, vamwe na ana make, na andũ make onthe. 34 Nĩtwakwatie ndũa syake syonthe ĩvindanĩ yĩu na twaananga vyũ kĩla ndũa, o vamwe na aũme, aka, na syana. Tũyaatialya mũndũ o na ũmwe. 35 Tweeyoseie indo syĩ syoka o vamwe na mũtavo wa syĩndũ ingĩ kuma ndũanĩ ila twakwatĩte. 36 Kuma Aloeli, ĩla yĩ ũtumonĩ wa Mwanda wa* Alinoni (o vamwe na ndũa ĩla yĩ mwandanĩ ũsu), nginya Ngileati, vai ndũa yaĩ vinya mbee witũ. Yeova Ngai witũ nĩwainenganie syonthe mokonĩ maitũ. 37 Ĩndĩ o na ũu wĩ o vo, mũyaathengeea nthĩ ya Aamimoni, ũtee wʼonthe wa Mwanda wa* Yavoki na ndũa ila syĩ kĩsionĩ kĩ iĩma, kana vandũ vangĩ o na va vala Yeova Ngai witũ wavatanĩte.

3 “Na ĩndĩ twavĩndũka na twambata na Nzĩa ya Mbasani. Na Oku, mũsumbĩ wa Mbasani, aumaala na andũ make onthe tũkomanĩe ku Etilei nĩ kana tũkite. 2 Kwoou Yeova andavya, ‘Ndũkamũkĩe, nũndũ nĩngũmũnengane vamwe na andũ make onthe na nthĩ yake mokonĩ maku, na wĩmwĩka o ũndũ weekie Sioni mũsumbĩ wa Aamoli, ũla wekalaa Esivoni.’ 3 Kwoou Yeova Ngai witũ nĩwanenganie Mũsumbĩ Oku wa Mbasani o nake vamwe na andũ make onthe mokonĩ maitũ, na twaendeea kũmoaa nginya weethĩa vai mũndũ o na ũmwe wake ũnatiala e thayũ. 4 Na ĩndĩ twakwata ndũa syake syonthe. Twoosie ndũa 60, kĩsio kyonthe kya Alikovu, ũsumbĩ wa Oku kũu Mbasani. 5 Ndũa isu syonthe syaĩ mbiĩĩe na ngũta ndaasa, syaĩ na mĩvĩa, na mĩamba. O na ĩngĩ, nĩtwoosie tũtũla tũngĩ twingĩ mũno. 6 Ĩndĩ o na ũu wĩ o vo, nĩtwasyanangie vyũ, o tondũ tweekanie na Mũsumbĩ Sioni wa Esivoni, kwa kwananga kĩla ndũa vyũ, o vamwe na aũme, aka, na syana. 7 Na nĩtweeyoseie indo syonthe na mũtavo wa ndũa isu.

8 “Ĩvindanĩ yĩu nĩtwoosie nthĩ ya asumbĩ elĩ ma Aamoli ala maĩ kĩsionĩ kya Yolotani, kuma Mwandanĩ wa* Alinoni nginya Kĩĩmanĩ kya Elimoni 9 (kĩĩma kĩla Asitoni makĩtaa Silioni, na Aamoli makĩtaa Senili), 10 ndũa syonthe sya ĩla nthĩ ndũlu na ndindimalu, Ngileati yonthe, na Mbasani yonthe kũvika Saleka na Etilei, ndũa sya ũsumbĩ ũla waĩ wa Oku kũu Mbasani. 11 Nũndũ Mũsumbĩ Oku wa Mbasani nĩwe waĩ wa mũthya watialĩte katĩ wa Alevai. Mũsekeseke wake* waĩ wa kyũma,* na wĩ o kwʼo Lava ya Aamimoni. Nĩ wa ũasa wa mĩkono kenda* na ũthanthau wa mĩkono ĩna, kwosana na kĩthimo kya mĩkono kĩla kĩtwʼĩtwe. 12 Ĩvindanĩ yĩu nĩtwoosie nthĩ ĩno: kuma Aloeli, ĩla yĩ vakuvĩ na Mwanda wa* Alinoni, na nusu ya kĩsio kĩ iĩma kya Ngileati, na nĩnĩnengete Aleũveni na Angati ndũa syayo. 13 Na kĩsio kĩla kyatialĩte kya Ngileati na Mbasani yonthe na ũsumbĩ wa Oku nĩnĩnengete nusu ya mbaĩ ya Manase. Kĩsio kyonthe kya Alikovu, kĩla kĩ Mbasani, kyeesĩkĩe ta nthĩ ya Alevai.

14 “Yaili mwana wa Manase oosie kĩsio kyonthe kya Alikovu kũvika mũvakanĩ wa Angesuli na Amaaka na eeta motũi asu ma Mbasani na ĩsyĩtwa yake, Avothi-yaili.* Ũu nĩwʼo metawa kũvika ũmũnthĩ. 15 Na nĩnĩnengete Makili kĩsio kya Ngileati. 16 Na Aleũveni na Angati nĩmanengete kuma Ngileati kũvika Mwandanĩ wa* Alinoni, na katĩkatĩ wa mwanda ũsu nĩ vo mũvaka, na kũvika Yavoki, mwanda ũla nĩwʼo mũvaka wa Aamimoni, 17 na Alava na Yolotani na ũla mũvaka, kuma Kinelethi kũvika Ũkanga wa Alava, Ũkanga wa Mũnyũ,* nthĩ wa ivaũũko sya Visika kwelekela wumĩlonĩ wa sua.

18 “Na ĩndĩ namũnenga mwĩao ũũ: ‘Yeova Ngai wenyu nũmũnengete nthĩ ĩno ĩtwʼĩke yenyu. Aũme menyu onthe ngũmbaũ makoosa mĩio ya kaũ na mayĩinga mbee wa ana-a-ĩthe menyu, Aisilaeli. 19 No iveti syenyu, syana syenyu, na indo syenyu (nĩnĩsĩ nesa kana mwĩ na indo mbingĩ mũno) ikaendeea kwĩkala ndũanĩ ila nĩmũnengete, 20 nginya Yeova anenge ana-a-ĩthe menyu ũthũmũo, o tondũ ũmwĩkĩte, na nginya o namo makwate ũtiĩwa wa nthĩ ĩla Yeova Ngai wenyu ũkamanenga mũingo wa Yolotani. Nĩvo ĩndĩ mwĩsyoka kĩla ũmwe ũtiĩwanĩ wake ũla nĩmũnengete.’

21 “Ĩvindanĩ yĩu neeaĩe Yosua ũũ: ‘Nĩwonete na metho maku ũndũ Yeova Ngai waku wĩkĩte asumbĩ asu elĩ. Ũu nowʼo Yeova ũkeka mosumbĩ onthe kũla ũkainga ũlike. 22 Mũikamakĩe, nũndũ Yeova Ngai wenyu nĩwe ũkũmũkitĩa.’

23 “Ĩvindanĩ yĩu neesũvie Yeova, namwĩa, 24 ‘Ame Mwĩai Ũla Mũnene Yeova, nĩwambĩĩa kwonyʼa mũthũkũmi waku ũnene waku na kwʼoko kwaku kwĩ vinya, nũndũ nĩ ngai yĩva ĩtunĩ kana ĩũlũ wa nthĩ ĩtonya kwĩka meko me vinya taku? 25 Mwa mbĩtĩkĩlye nĩinge na ndyona nthĩ ĩsu nzeo ĩla yĩ mũingo wa Yolotani, kĩsio kĩĩ kĩseo kĩ iĩma na Levanoni.’ 26 Ĩndĩ Yeova no wanthatĩe mũno nũndũ wenyu, na ndaĩ atonya kũmbĩthukĩĩsya. Vandũ va ũu, Yeova ambĩie, ‘Nũu! Ndũkaaneene nakwa ĩngĩ ĩũlũ wa ũndũ ũsu. 27 Ambata ĩũlũ wa Visika, na ũisisya ngalĩko ya ũthũĩlonĩ wa sua na ngalĩko ya ĩũlũ na ngalĩko ya ĩtheo na ngalĩko ya wumĩlonĩ wa sua na ũyĩloela nthĩ ĩsu na metho maku, nũndũ ndũkainga ũsĩ ũũ wa Yolotani. 28 Nyuva Yosua na ũimũthangaasya na ũimwĩkĩa vinya nũndũ nĩwe ũkainga mbee wa andũ aa na nĩwe ũkatuma matiĩwa nthĩ ĩla ũkwona.’ 29 Maũndũ asu onthe meethĩiwe yĩla twatwĩe mwandanĩ ũla wĩ mbee wa Mbethi-veoli.

4 “Yu, inywʼĩ Aisilaeli, ĩthukĩĩsyei myolooto na motw’ĩo ala ngũmũmanyĩsya mũatĩĩae, nĩ kana mũendeee kwĩthĩwa thayũ na mũilika na mũyosa nthĩ ĩla Yeova, Ngai wa aa-ũmae menyu, ũkũmũnenga. 2 Mũikongele ndeto ila ngũmwĩaĩa, o na mũikasiole, nĩ kana mũendeee kũkwata mĩao ya Yeova Ngai wenyu ĩla ngũmwĩaĩa.

3 “Metho menyu ene nĩmonete kĩla Yeova weekie ĩvindanĩ ya Mbaali wa Veoli; Yeova Ngai wenyu nĩwaanangie kuma katĩ wenyu kĩla mũndũ waatĩĩie Mbaali wa Veoli. 4 Ĩndĩ inywʼonthe ala mũlũmanĩtye na Yeova Ngai wenyu mwĩ thayũ ũmũnthĩ. 5 Sisyai, nĩnĩmũmanyĩĩtye myolooto na motw’ĩo, o tondũ Yeova Ngai wakwa ũmbĩaĩe, nĩ kana mũatĩĩae maũndũ asu mwĩ nthĩ ĩla mũkosa. 6 No nginya mũatĩĩae maũndũ asu nesa, nũndũ ngo sya andũ ila ikewʼa ĩũlũ wa myolooto ĩsu yonthe, ikoona mwĩ na ũĩ na ũmanyi, na ikasya, ‘Vate nzika, mbaĩ ĩno nene yĩ na andũ oĩ na me na ũmanyi.’ 7 Nũndũ nĩ mbaĩ yĩva nene yĩ na ngai syĩthĩawa vakuvĩ nayo o tondũ Yeova Ngai witũ wĩthĩawa vakuvĩ naitũ ĩvindanĩ o na yĩva yĩla twamwĩkaĩla? 8 Na nĩ mbaĩ yĩva nene yĩ na myolooto mĩlũngalu na motw’ĩo ta Mĩao ĩĩ yonthe ĩla ngwia mbee wenyu ũmũnthĩ?

9 “Ĩndĩ ĩthĩwai metho na mũyĩsũvĩa mũno,* nĩ kana mũikolwe nĩ maũndũ ala metho menyu monete na nĩ kana maikaume ngoonĩ syenyu mĩthenya yonthe ya thayũ wenyu. O na ĩngĩ, no nginya mũmamanyĩthye ana menyu na esũkũũu. 10 Mũthenya ũla mwaũngamie mbee wa Yeova Ngai wenyu kũu Olevu, Yeova ambĩie, ‘Mbũmbanĩsye andũ vamwe nĩ kana mewʼe ndeto syakwa, nĩ kana memanyĩsye kũngĩa mĩthenya yonthe ĩla meĩthĩwa thayũ ĩũlũ wa nthĩ na nĩ kana mamanyĩsye ana moo.’

11 “Kwoou mwathengeea na mwaũngama nthĩ wa kĩĩma, na kĩĩma kĩu kyakene mwaki nginya matunĩ;* kwaĩ na kĩvindu, ĩtu, na ũtuku mwingĩ. 12 Na Yeova ambĩĩa kũneena nenyu kuma mwakinĩ. Nĩmweewie wasya wa ndeto, ĩndĩ mũyaaona mũvw’ano o na ũmwe, vaĩ o wasya wʼoka. 13 Na nĩwamũtavisye ũtianĩo wake, ũla wamwĩaĩe mũũkwatae, nayo nĩ ĩla Mĩao Ĩkũmi.* Ĩtina wa ũu, nĩwamĩandĩkie masengeanĩ elĩ ma mavia. 14 Ĩvindanĩ yĩu Yeova nĩwambĩaĩe nĩmũmanyĩsye myolooto na motw’ĩo, ala mwaĩle kũkwataa mwĩ nthĩ ĩla mũũlika mũmĩmesye.

15 “Kwoou, ĩsũvĩei mũno,* nũndũ mũyaaona mũvw’ano o na wĩva mũthenya ũla Yeova waneenie nenyu mwĩ Olevu kuma katĩkatĩ wa mwaki, 16 nĩ kana mũikeke maũndũ matonya kũete wanangĩko kwa kwĩseũvĩsya mũvw’anano o na wĩva mwasũvye ũilye kĩndũ o na kĩva, mũvw’ano wa mũndũũme kana mũndũ mũka, 17 mũvwʼano wa nyamũ o na yĩva yĩ ĩũlũ wa nthĩ kana mũvwʼano wa nyũnyi o na yĩva ĩũlũkaa yayayanĩ, 18 mũvwʼano wa kĩndũ o na kĩva kĩtambũkaa ĩũlũ wa nthĩ kana mũvwʼano wa ĩkũyũ o na yĩva yĩ kĩw’ũnĩ ungu wa nthĩ. 19 Na yĩla mwookĩlya metho menyu mũsisye matu na mwoona sua na mwei na ndata, nguthu yonthe ya matunĩ, mũikasesengeke na mũyĩikumanĩa na kũithaitha. Yeova Ngai wenyu nũinengete ngo syonthe sya andũ ungu wa matu. 20 Ĩndĩ inywʼĩ ninywʼĩ Yeova woosie na amumya ĩikonĩ ĩnene ya kũtwekethya syũma,* amumya Misili, nĩ kana mũtwʼĩke andũ ala nĩ malĩ yake mwene,* o ũndũ mũilye ũmũnthĩ.

21 “Yeova nĩwanthatĩie nũndũ wenyu, na eevĩta kana ndyaĩlĩte kũinga Yolotani kana nĩlike nthĩ nzeo ĩla Yeova Ngai wenyu ũkũmũnenga yĩthĩwe ũtiĩwa. 22 Nũndũ nyie nĩkwʼĩĩa nthĩ ĩno; ndikainga Yolotani, ĩndĩ inywʼĩ mũkainga na mũimesya nthĩ ĩsu nzeo. 23 Ĩthĩwai mwĩ metho mũikolwe nĩ ũtianĩo wa Yeova Ngai wenyu ũla watianĩie nenyu, na mũikeseũvĩsye mũvw’anano mwasũvye, mũvw’ano wa kĩndũ o na kĩva mũvatĩtwe nĩ Yeova Ngai wenyu. 24 Nũndũ Yeova Ngai wenyu nĩ mwaki ũvĩvasya vyũ, Ngai wendaa kũthaithwa e weka.

25 “Yĩla mũkekala nthĩ ĩsu kwa ĩvinda yĩasa na mũyĩthĩwa na syana na esũkũũu, ethĩwa mũkeeka maũndũ mathũku mũno na mũiseũvya mũvw’anano mwasũvye wa mũthemba o na wĩva na mũyĩka kĩla kĩthũku methonĩ ma Yeova Ngai wenyu na kwoou mũimũthatya, 26 nĩngwosa ĩtu na nthĩ imũkũsĩĩe ũmũnthĩ kana vate nzika mũkathela na mĩtũkĩ kuma nthĩ ĩla mũkũinga Yolotani mũmesye. Mũikekala ĩvinda yĩasa vo, ĩndĩ mũkaanangwa vyũ. 27 Yeova akamũnyaĩĩkya ngonĩ sya andũ, na mwĩ mbaĩnĩ ila Yeova ũkamũlũngya mũthi, no andũ anini katĩ wenyu makavonoka. 28 Mwĩ kũu mũkalasimĩka kũthaitha ngai sya mbwaũ na mavia iseũvĩtwʼe nĩ moko ma andũ, ngai itatonya kwona kana kwĩwʼa kana kũya kana kũnyungĩa.

29 “Ethĩwa mũkamũmantha Yeova Ngai wenyu mwĩ kũu, vate nzika mũkamwona, ethĩwa mũkakũlya ũtao wake na ngoo yenyu yonthe na thayũ* wenyu wʼonthe. 30 Ĩtina yĩla mũkethĩwa mũthĩnĩte mũno na maũndũ asu onthe mamũkwatĩte, nĩvo ĩndĩ mũkasyokea Yeova Ngai wenyu na mũyĩthukĩĩsya wasya wake. 31 Nũndũ Yeova Ngai wenyu nĩ Ngai wĩ tei. Ndakamũtia kana amwanange kana olwe nĩ ũtianĩo ũla watianĩie na aa-ũmae menyu.

32 “Yu, kũlyai ĩũlũ wa mĩthenya ya tene mbee wa ĩvinda yenyu, kuma mũthenya ũla Ngai woombie mũndũ ĩũlũ wa nthĩ; manthai kuma mũthya ũmwe wa matu kũvika mũthya ũla ũngĩ wa matu. Ve ũndũ o na wĩva mũnene ta ũũ waaĩsa kwĩkĩka kana ũndũ o na wĩva ũilye ta ũũ waaĩsa kwĩw’ĩka? 33 Ve andũ angĩ maaĩwʼa wasya wa Ngai aineena kuma mwakinĩ o tondũ inywʼĩ mweewie na mwaendeea kwĩkala thayũ? 34 Kana Ngai aaĩsa kũtata kwĩyosea mbaĩ kuma katĩ wa mbaĩ ĩngĩ atũmĩĩte mosilĩlo,* mawonanyʼo, syama, kaũ, kwʼoko kwĩ vinya, kwʼoko kũtambũũkye, na meko ma kũtelemya, o tondũ Yeova Ngai wenyu weekie kwondũ wenyu Misili mbee wa metho menyu? 35 Inywʼĩ ene nĩmwonetwʼe maũndũ asu nĩ kana mũmanye Yeova nĩwe Ngai ũla wa wʼo; vai ũngĩ ate o we. 36 Nĩwatumie mwĩwʼa wasya wake kuma ĩtunĩ nĩ kana amũlũnge, na atuma mwona mwaki wake mũnene ĩũlũ wa nthĩ, na mweewʼa ndeto syake kuma mwakinĩ.

37 “Nũndũ nĩwendie aa-ũmae menyu na anyuva ũsyao woo* ĩtina woo, nĩmwaumiwʼe Misili na vinya mwingĩ e vo. 38 Nĩwalũngilye mbaĩ nene na syĩ vinya kwĩ inywʼĩ kuma mbee wenyu, nĩ kana amũete na aimũnenga nthĩ yoo yĩthĩwe ũtiĩwa wenyu, o tondũ kũilye ũmũnthĩ. 39 Kwoou, ũmũnthĩ ũũ, manyai na mũyĩkĩa ngoonĩ kana Yeova nĩwe Ngai ũla wa wʼo ĩũlũ ĩtunĩ na ĩtheo kũũ nthĩ. Vai ũngĩ. 40 No nginya mũkwatae myolooto yake na mĩao yake ĩla ngũmwĩaĩa ũmũnthĩ, nĩ kana maũndũ menyu mathi nesa na ma ana menyu ĩtina wenyu, nĩ kana mwĩkale ĩvinda yĩasa nthĩ ĩla Yeova Ngai wenyu ũkũmũnenga.”

41 Ĩvindanĩ yĩu Mose nĩwavathie ndũa itatũ ngalĩko ya wumĩlonĩ wa sua ya Yolotani. 42 Ethĩwa mũndũ o na wĩva nĩwooaa mũndũ ũngĩ ate kwenda na ndanatwĩe amũmenete, no nginya akĩĩe ndũanĩ ĩmwe katĩ wa ndũa isu na ayĩkala thayũ. 43 Ndũa isu nĩ Mbeseli ĩla yĩ weũnĩ wĩ nthĩ ndũlu na ndindimalu kwondũ wa Aleũveni, Lamothi ĩla yĩ Ngileati kwondũ wa Angati, na Ngolani ĩla yĩ Mbasani kwondũ wa Amanase.

44 Yu ĩĩ nĩyo Mĩao ĩla Mose waiie mbee wa andũ ma Isilaeli. 45 Aa nĩmo molilikanyʼo, myolooto, na motw’ĩo ala Mose wanengie Aisilaeli ĩtina wa kuma Misili, 46 kĩsionĩ kya Yolotani, mwandanĩ ũla ũsianĩtye na Mbethi-veoli, nthĩ ya Mũsumbĩ Sioni wa Aamoli, ũla watwĩe Esivoni, ũla Mose na Aisilaeli mamũsindie ĩtina wa kuma Misili. 47 Na moosa nthĩ yake na nthĩ ya Mũsumbĩ Oku wa Mbasani, asumbĩ elĩ ma Aamoli ala maĩ kĩsionĩ kĩla kĩ ngalĩko ya wumĩlonĩ wa sua ya Yolotani, 48 kuma Aloeli, ĩla yĩ ũtumonĩ wa Mwanda wa* Alinoni, nginya Kĩĩmanĩ kya Sioni, nakyo nĩ, Elimoni, 49 na Alava yonthe kĩsionĩ kĩla kĩ ngalĩko ya wumĩlonĩ wa sua ya Yolotani, na nginya Ũkanganĩ wa Alava,* nthĩ wa ivaũũko sya Visika.

5 Nĩvo ĩndĩ Mose weetie Aisilaeli onthe na amatavya atĩĩ: “Inywʼĩ Aisilaeli, ĩthukĩĩsyei myolooto na motw’ĩo ala ngũmũtavya ũmũnthĩ, na no nginya mwĩmanyĩsye maũndũ aa na mũimakwataa vyũ. 2 Yeova Ngai witũ nĩwatianĩie ũtianĩo naitũ kũu Olevu. 3 Yeova ndaatianĩa na aa-ũmae maitũ ũtianĩo ũsu, ĩndĩ atianĩie naitũ, ithyonthe ala twĩ thayũ vaa ũmũnthĩ. 4 Yeova aneeneie nenyu kĩĩmanĩ ũthyũ kwa ũthyũ, kuma mwakinĩ. 5 Ĩvindanĩ yĩu naũngamĩte katĩkatĩ wa Yeova nenyu nĩ kana nĩmũtavye ndeto ya Yeova, nĩkwĩthĩwa mwaĩ na wia nũndũ wa mwaki na mũyaambata kĩĩmanĩ. Aisye:

6 “‘Ninyie Yeova Ngai waku, ũla wakumisye nthĩ ya Misili, kuma nyũmbanĩ ya ũkombo. 7 Ndũkaaĩse kwĩthĩwa na ngai ingĩ ate o nyie.*

8 “‘Ndũkeseũvĩsye mũvw’anano mwasũvye kana mũvw’ano wa* kĩndũ o na kĩva kĩ ĩũlũ ĩtunĩ kana ĩũlũ wa nthĩ kana kĩwʼũnĩ ungu wa nthĩ. 9 Ndũkamĩkumanĩe kana ũsesengwe ũmĩthũkũme, nũndũ nyie, Yeova Ngai waku, nĩ Ngai wendaa kũthaithwa e weka, woseaa ĩtambya syana nũndũ wa mavĩtyo ma aa-ĩthe masyo, kũvika nzyawa ya katatũ na kũvika nzyawa ya kana ya ala mamenaa, 10 ĩndĩ nĩnonasya wendo ũtathelaa* nzyawa ngili sya ala mambendete na makwataa mĩao yakwa.

11 “‘Ndũkatũmĩe ĩsyĩtwa ya Yeova Ngai waku kwa nzĩa ĩtaĩle, nũndũ Yeova ndakaema kwosea ĩtambya mũndũ o na wĩva ũla ũtũmĩaa ĩsyĩtwa yake kwa nzĩa ĩtaĩle.

12 “‘Kwataa mũthenya wa Savato nĩ kana ũwĩkalye wĩ mũtheu, o tondũ Yeova Ngai waku wakwĩaĩe. 13 Ũkathũkũmaa na ũitethya wĩa waku wʼonthe mĩthenya thanthatũ, 14 ĩndĩ mũthenya wa mũonza nĩ savato kwondũ wa Yeova Ngai waku. Ndũkatethye wĩa o na ũmwe, we kana mwana waku kana mwĩĩtu waku kana mũndũũme waku ngombo kana mwĩĩtu waku ngombo kana nzaũ yaku kana ĩngʼoi yaku kana nyamũ o na yĩva yaku ya mũsyĩ kana mwĩkali wa ũeninĩ ũla wĩkalaa ndũanĩ syaku,* nĩ kana mũndũũme waku ngombo kana mwĩĩtu waku ngombo athũmũe o taku. 15 Lilikana waĩ ngombo nthĩ ya Misili na Yeova Ngai waku nĩwakumisye kũu na kw’oko kwĩ vinya na kw’oko kũtambũũkye. Nĩkyo kĩtumi Yeova Ngai waku wakwĩaĩe ũkwatae mũthenya wa Savato.

16 “‘Nenga ĩthe waku na inyia waku ndaĩa, o tondũ Yeova Ngai waku ũkwĩaĩe, nĩ kana wĩkale thayũ ĩvinda yĩasa na ũyaĩla* wĩ nthĩ ĩla Yeova Ngai waku ũkũũnenga.

17 “‘Ndũkoae.

18 “‘O na ndũkeke ũlaalai.

19 “‘O na ndũkoye.

20 “‘O na ndũkaumye ũkũsĩ wa ũvũngũ ĩũlũ wa mũndũ ũngĩ.

21 “‘O na ndũkewʼĩe kĩveti kya mũndũ ũngĩ ĩtomo. O na ndũkewʼĩe nyũmba ya mũndũ ũngĩ ĩtomo kana mũũnda wake kana mũndũũme wake ngombo kana mwĩĩtu wake ngombo kana nzaũ yake kana ĩng’oi yake kana kĩndũ o na kĩva kya mũndũ ũngĩ.’

22 “Yeova atavĩisye ũmbano wenyu wʼonthe mĩao ĩĩ* kĩĩmanĩ na wasya mũnene, kuma mwakinĩ, ĩtunĩ, na ũtukunĩ mwingĩ, na ndaaongeleela ũndũ ũngĩ; na ĩndĩ amĩandĩka masengeanĩ elĩ ma mavia na anenga mo.

23 “Ĩndĩ yĩla mweewie wasya kuma kĩvindunĩ kĩu oou, yĩla kĩĩma kyaendeee kwakana, aũngamĩi onthe ma mbaĩ syenyu na atumĩa nĩmanthengeeie. 24 Na ĩndĩ mwasya, ‘Sisya, Yeova Ngai witũ nĩwatwonyʼa ũtheu wake mũtisu na ũnene wake, na nĩtweewʼa wasya wake kuma mwakinĩ. Ũmũnthĩ nĩtwoona kana Ngai no aneene na mũndũ na aiendeea kwĩkala thayũ. 25 Yu, nĩkĩ twaĩle kũkwʼa? Nũndũ mwaki ũũ mũnene no ũtũvĩvye. Twaendeea kwĩwʼa wasya wa Yeova Ngai witũ, vate nzika nĩtũũkwʼa. 26 Nũndũ nũũ katĩ wa onthe ala me mwĩĩ wa nyama* waaĩwʼa wasya wa Ngai ũla wĩ thayũ aineena kuma mwakinĩ o tondũ tweewʼa na aiendeea kwĩkala thayũ? 27 We mwene no nginya ũthengeee wĩwʼe kyonthe kĩla Yeova Ngai witũ ũkũweta, na nue ũũtũtavya maũndũ onthe ala Yeova Ngai witũ ũkũũtavya, na nĩtũkwĩthukĩĩsya na tũimeka.’

28 “Kwoou Yeova nĩweewie ndeto ila mwandavisye, na Yeova ambĩa, ‘Nĩneewʼa ndeto ila andũ aa maũtavya. Kyonthe kĩla maweta nĩ kĩseo. 29 Keka mavinda onthe no methĩawe na ngoo ĩkũngĩa na kũkwataa mĩao yakwa yonthe; nĩvo ĩndĩ maũndũ moo mathi nesa o vamwe na ma ana moo tene na tene! 30 Thi ũmatavye atĩĩ: “Syokai maeemanĩ menyu.” 31 Ĩndĩ waĩlĩte kwĩkala vaa nakwa, na eka ngũtavye mĩao yonthe, myolooto, na motw’ĩo ala waĩlĩte kũmamanyĩsya na ala maĩlĩte kũkwataa me nthĩ ĩla ngũmanenga mamesye.’ 32 Yu inywʼĩ andũ mwaĩlĩte kwĩthĩwa mwĩ metho nĩ kana mwĩke o tondũ Yeova Ngai wenyu wamwĩaĩa. Mũikelelũke kwʼokonĩ kwa aũme kana kwa aka. 33 Mwaĩlĩte kwĩsĩla nzĩanĩ yonthe ĩla Yeova Ngai wenyu wamwĩaĩa, nĩ kana mũendeee kwĩkala thayũ na mũyaĩla na mũyĩkala mĩthenya mingĩ nthĩ ĩla mũũmesya.

6 “Yu ĩĩ nĩyo mĩao, myolooto, na motwʼĩo ala Yeova Ngai waku wanengane ũmanyĩwʼe, nĩ kana ũtonye kũatĩĩaa maũndũ asu yĩla ũkũinga ũlike nthĩ ĩla ũũmesya. 2 Waĩlĩte kũkĩa Yeova Ngai waku na ũikwataa motwʼĩo make onthe na mĩao yake ĩla ngũkwĩaĩa, we na mwana waku na mwĩsũkũũu, mĩthenya yonthe ya thayũ waku, nĩ kana wĩkale thayũ ĩvinda yĩasa. 3 Na no nginya mwĩthukĩĩsye maũndũ asu, inywʼĩ Aisilaeli, na mũimaatĩĩa nesa, nĩ kana mwaĩle na mũyingĩva mũno mwĩ nthĩ ĩla yusũĩte ĩia na ũkĩ wa nzũkĩ, o tondũ Yeova, Ngai wa aa-ũmae menyu, ũmwathĩte.

4 “Ĩthukĩĩsye, we Isilaeli: Yeova Ngai witũ nĩ Yeova ũmwe. 5 No nginya ũmwende Yeova Ngai waku na ngoo yaku yonthe na thayũ* waku wʼonthe na vinya waku wʼonthe.* 6 Ndeto ii ila ngũkwĩaĩa ũmũnthĩ no nginya syĩthĩawe ngoonĩ yaku, 7 na no nginya ũikindĩlĩĩlae* ananĩ maku na ũineenaa ĩũlũ wasyo yĩla ũilyĩ nthĩ nyũmbanĩ yaku na yĩla ũendete nzĩanĩ na yĩla wakoma na yĩla waamũka. 8 Syoveee ta ũlilikanyʼo kwʼokonĩ kwaku, na no nginya syĩthĩwe ta kĩndũ kyoveewe kana kĩkĩĩtwe kĩtulyanĩ kyaku.* 9 Iandĩke mĩtĩnĩ ĩla yĩ ndeenĩ sya mũomo wa nyũmba yaku na mĩvĩanĩ yaku.

10 “Yĩla Yeova Ngai wenyu ũkamũvikya nthĩ ĩla weevĩtĩe aa-ũmae menyu Avalaamu, Isaka, na Yakovo kana akamũnenga, nthĩ yĩ na ndũa nene mũno na nzeo ila mũtaaaka, 11 nyũmba syusĩe syĩndũ nzeo sya mĩthemba yonthe ila mũtaathũkũmĩa, maima ma kĩwʼũ ala mũtaaĩnza, na mĩũnda ya mĩsavivũ na mĩthata ĩla mũtaavanda, na mũiya na mũyĩanĩwa, 12 ĩsũvĩei mũikolwe nĩ Yeova, ũla wamumisye nthĩ ya Misili, kuma nyũmbanĩ ya ũkombo. 13 Yeova Ngai wenyu nĩwe mwaĩlĩte kũkĩa, na nĩwe mwaĩlĩte kũthũkũma, na mwaĩlĩte kwĩvĩta na ĩsyĩtwa yake. 14 Mũikaatĩĩe ngai ingĩ, ngai o na syĩva sya ngo sya andũ ala mamũthyũlũlũkĩte, 15 nũndũ Yeova Ngai wenyu ũla wĩ katĩ wenyu nĩ Ngai wendaa kũthaithwa e weka. Mwaema kwĩka ũu, ũthatu wa Yeova Ngai wenyu ũkamwakanĩa na akamũmina kuma ĩũlũ wa nthĩ.

16 “Mũikamũtate Yeova Ngai wenyu o ũndũ mwamũtatie mwĩ Masa. 17 Mwaĩlĩte kũatĩĩaa mĩao ya Yeova Ngai wenyu na kĩthito o vamwe na molilikanyʼo make na myolooto yake ĩla ũmwĩaĩe mũatĩĩe. 18 No nginya mwĩkae kĩla kyaĩle na kĩla kĩseo methonĩ ma Yeova, nĩ kana mwaĩle na nĩ kana mũlike na mũimesya nthĩ nzeo ĩla Yeova weevĩtĩe aa-ũmae menyu, 19 kwa kũlũngya amaitha menyu onthe maume mbee wenyu, o tondũ Yeova wathanĩte.

20 “Ĩvinda yũkĩte, yĩla mwana waku ũkaũkũlya, ‘Molilikanyʼo, myolooto, na motwʼĩo ala Yeova Ngai witũ ũkwĩaĩe monanasya kyaũ?’ 21 nĩvo ĩndĩ ũkatavya mwana waku, ‘Twaĩ ngombo sya Valao nthĩ ya Misili, ĩndĩ Yeova atumya Misili na kw’oko kwĩ vinya. 22 Kwoou Yeova nĩwaendeeie kwĩka mbee wa metho maitũ mawonany’o na syama syĩ vinya, na sya kũete wanangĩko, ila syathĩnisye Misili, Valao, na nyũmba yake yonthe. 23 Na nĩwatumisye kũu nĩ kana atũete kũũ atũnenge nthĩ ĩla weevĩtĩe aa-ũmae maitũ. 24 Nĩvo ĩndĩ Yeova watwĩaĩe tũatĩĩae myolooto ĩsu yonthe na tũimũkĩa Yeova Ngai witũ nĩ kana tũendeeae nesa mavinda onthe, na nĩ kana tũendeee kwĩkala thayũ, o tondũ tũilye ũmũnthĩ. 25 Na tũkatalwa kwĩthĩwa twĩ alũngalu ethĩwa tũkeethĩwa twĩ metho tũatĩĩe mĩao ĩsu yonthe kwa kũmwĩwʼa* Yeova Ngai witũ, o tondũ ũtwĩaĩe.’

7 “Yĩla Yeova Ngai wenyu ũkamũete nthĩ ĩla mũkilyĩ kũlika na mũimesya, akasyoka avetange mbaĩ nene syume mbee wenyu: Aititi, Angilikasi, Aamoli, Akanaanĩ, Avelisi, Aivi, na Ayevusi, mbaĩ mũonza nene mũno na syĩ vinya kwĩ inyw’ĩ. 2 Yeova Ngai wenyu akamanengane kwenyu, na mũkamasinda. Vate nzika mwaĩlĩte kũmananga vyũ. Mũikatianĩe ũtianĩo o na ũmwe namo kana mũmewʼĩe tei. 3 Mũikatwaane* namo. Mũikanenge ana moo eĩtu menyu kana mwose eĩtu moo kwondũ wa ana menyu. 4 Nũndũ makatuma ana menyu maeka kũmbatĩĩa na maithũkũma ngai ingĩ; nĩvo ĩndĩ ũthatu wa Yeova ũkamwakanĩa, na aimũmina na mĩtũkĩ.

5 “Vandũ va ũu, ũũ nĩwʼo mwaĩle kwĩkana namo: Mũomboe ithembeo syoo, mwanange ituĩ syoo sya ũthaithi, mũtilange mĩtĩ yoo ya ũthaithi,* na mũivĩvya mĩvwʼanano yoo myasũvye. 6 Nũndũ mwĩ andũ atheu kwa Yeova Ngai wenyu, na Yeova Ngai wenyu nũmũnyuvĩte mũtwʼĩke andũ make, malĩ yake ya mwanya,* kuma ngonĩ syonthe sya andũ ila syĩ ĩũlũ wa nthĩ.

7 “Yeova ndaamwenda na kũmũnyuva aĩ nĩkwĩthĩwa mwaĩ aingĩ mũno kwĩ ngo syonthe sya andũ, nũndũ ninywʼĩ mwaĩ anini vyũ ngonĩ syonthe sya andũ. 8 Vandũ va ũu, Yeova amumisye Misili na kwʼoko kwĩ vinya, amwovosya kuma nyũmbanĩ ya ũkombo, kuma kwʼokonĩ kwa* Valao mũsumbĩ wa Misili, nĩkwĩthĩwa Yeova nĩwamwendete na nĩwalũmanilye na wĩvĩto ũla weevĩtĩe aa-ũmae menyu. 9 Nĩmwĩsĩ nesa kana Yeova Ngai wenyu nĩwe Ngai ũla wa w’o, Ngai mũĩkĩĩku, wĩanĩasya ũtianĩo wake na wonasya nzyawa ngili sya ala mamwendete na makwataa mĩao yake wendo ũtathelaa. 10 Ĩndĩ ala mamũmenete akamaĩvanĩsya ĩmwe kwa ĩmwe na wanangĩko. Ndakalea kwosea ĩtambya na mĩtũkĩ ala mamũmenete; akamaĩvanĩsya ĩmwe kwa ĩmwe. 11 Kwoou, ĩthĩwai mwĩ metho mũkwate mĩao na myolooto na motwʼĩo ala ngũmwĩaĩa ũmũnthĩ, kwa kũmaatĩĩa.

12 “Ethĩwa mũkaendeea kwĩthukĩĩsya motwʼĩo aa na kũmaatĩĩa na kũmekaa, Yeova Ngai wenyu akeanĩsya ũtianĩo wake na akamwony’a wendo ũtathelaa ũla weevĩtĩe aa-ũmae menyu. 13 Akamwenda na aimũathima na aimwingĩvya. Ĩĩ, akamũathima na syana mbingĩ* na ũsyao wa mũthanga wenyu, lĩu wenyu wa mbaa ngetha, mbinyu yenyu nzaũ, mauta menyu, tũsaũ twa ngʼombe syenyu na tũlondu twa ndĩthya syenyu, mwĩ nthĩ ĩla weevĩtĩe aa-ũmae menyu kana akamũnenga. 14 Mũkeethĩwa mwĩ andũ ala aathime vyũ ngonĩ syonthe sya andũ; vai mũndũũme kana mũndũ mũka katĩ wenyu ũkethĩwa ate na kana, o na indo syenyu iikaema kũsyaa. 15 Yeova akamũvetangĩa mowau onthe, na ndakamũetee ũwau o na ũmwe katĩ wa mowau mathũku mũno ala mwoonie Misili. Vandũ va ũu, akamaetee onthe ala mamũmenete. 16 Mwaĩlĩte kwananga* ngo syonthe sya andũ ala Yeova Ngai wenyu ũkamũnenga. Mũikamewʼĩe* tei, na mũikathũkũme ngai syoo, nũndũ kwĩka ũu kũkeethĩwa kwĩ kĩtei kwenyu.

17 “Ethĩwa mũkeetavya ngoonĩ syenyu, ‘Mbaĩ ii syĩ na andũ aingĩ mũno kwĩ ithyĩ. Tũtonya kũilũngya ata?’ 18 mũikamakĩe. Mwaĩle kwĩlilikanyʼa ũndũ Yeova Ngai wenyu weekanie na Valao na Misili yonthe, 19 mosilĩlo* manene ala mweeyoneie na metho menyu na mawonanyʼo na syama na kwʼoko kwĩ vinya na kwʼoko kũtambũũkye kũla Yeova Ngai wenyu watũmĩie kũmumya kũu. Ũu nĩwʼo Yeova Ngai wenyu ũkekana na ngo syonthe sya andũ ala mũũkĩa. 20 Yeova Ngai wenyu akatuma matũlĩka ngoo* nginya ala matialĩte na ala mevithaa mũikamone mathele. 21 Mũikateleme nũndũ woo, nĩkwĩthĩwa Yeova Ngai wenyu e vamwe nenyu, Ngai mũnene ũla andũ maĩlĩte kũkĩa na kũnenga ndaĩa.

22 “Vate nzika, Yeova Ngai wenyu akalũngya mbaĩ ii kuma mbee wenyu o kavola kwa kavola. Mũiketĩkĩlwʼa kũimina na mĩtũkĩ nĩ kana nyamũ sya kĩthekanĩ iikaingĩve na iimũkĩlya vinya. 23 Yeova Ngai wenyu akanengane mbaĩ isu mokonĩ menyu na ayĩisinda vyũ nginya iminwe. 24 Akanengane asumbĩ masyo mokonĩ menyu, na mũkavuta masyĩtwa moo kuma ungu wa matu. Vai mũndũ ũkamũsiĩĩa, nginya yĩla mũkaimina vyũ. 25 Mwaĩlĩte kũvĩvya na mwaki mĩvwʼanano myasũvye ya ngai syoo. Mũikewʼĩe ĩtomo vetha na thaavu ũla wĩ ĩũlũ wayo kana mũwose, nĩ kana kwĩka ũu kũikatwʼĩke kĩtei kwenyu, nũndũ kĩu nĩ kĩndũ kya kũmũthatya Yeova Ngai wenyu. 26 Mũikaete kĩndũ kya kũthatya nyũmbanĩ syenyu nũndũ kĩu kĩkatuma mwĩthĩwa kĩndũ kyaĩlĩte kwanangwa vyũ o takyo. Mwaĩlĩte kũkĩmena vyũ na kũkyona ta kĩndũ kya kũthatya, nũndũ nĩ kĩndũ kyaĩlĩte kwanangwa vyũ.

8 “Mwaĩlĩte kwĩthĩwa mwĩ metho mũkwatae mĩao yonthe ĩla ngũmũnenga ũmũnthĩ, nĩ kana mũendeee kwĩkala thayũ na mũyingĩva na mũilika na mũimesya nthĩ ĩla Yeova weevĩtĩie aa-ũmae menyu. 2 Lilikanai lelũ mũasa ũla Yeova Ngai wenyu watumie mwĩsĩla myaka ĩĩ 40 weũnĩ, nĩ kana atume mwĩnyivya na aimũtata amanye kĩla kyaĩ ngoonĩ syenyu, ethĩwa mũkakwataa mĩao yake kana mũikakwataa. 3 Kwoou nĩwatumie mwĩnyivya na amũeka mweethĩwa na nzaa na amũnenga mana, ĩla mũteesĩ o na aa-ĩthe menyu mateesĩ, nĩ kana atume mũmanya kana mũndũ ndekalaa thayũ nũndũ wa mũkate wʼoka ĩndĩ mũndũ ekalaa thayũ nũndũ wa kĩla ndeto yumaa kanywʼanĩ wa Yeova. 4 Ngũa ila mweekĩaa iyaakũa, o na maaũ menyu mayaaimba myaka ĩĩ 40. 5 Nĩmwĩsĩ nesa ngoonĩ syenyu kana o tondũ mũndũ ũlũngaa mwana wake, Yeova Ngai wenyu nĩwamũlũngaa.

6 “Yu no nginya mũkwatae mĩao ya Yeova Ngai wenyu kwa kũendaa nzĩanĩ syake na kwa kũmũkĩaa. 7 Nũndũ Yeova Ngai wenyu amũtwaĩte nthĩ nzeo, nthĩ yĩ tũlũsĩ twa kĩwʼũ,* nthongo* na mbuluti* ivĩtĩle ũiĩnĩ wĩ mwandanĩ na kĩsionĩ kĩ iĩma, 8 nthĩ yĩ nganũ na mbaale, yĩ mĩsavivũ, mĩkũyũ, na makũngũmanga, nthĩ yĩ mauta ma mĩthata na ũkĩ wa nzũkĩ, 9 nthĩ ĩla ĩtakethĩwa na ũnyivu wa lĩu na mũtakaĩwa nĩ kĩndũ, nthĩ yĩ mavia me na kyũma* na iĩmanĩ syayo mũkenza ũthuku.

10 “Yĩla mũkaya na mũyĩanĩwa, no nginya mwĩtaĩa Yeova Ngai wenyu nũndũ wa nthĩ nzeo ĩla ũmũnengete. 11 Ĩthĩwai mwĩ metho mũikolwe nĩ Yeova Ngai wenyu kwa kũema kũkwata mĩao yake, sila wake, na motw’ĩo make ala ngũmwĩaĩa ũmũnthĩ. 12 Yĩla mũkaya na mũyĩanĩwa na mũkaka nyũmba nzeo na mũitũa nthĩnĩ wasyo, 13 yĩla ngʼombe syenyu na malondu na mbũi syenyu ikaingĩva na vetha na thaavu wenyu ũkongeleka na yĩla mũkethĩwa na syĩndũ mbingĩ sya kĩla mũthemba, 14 mũikaaeke ngoo syenyu syĩthĩwe na mĩtũlyo na iituma mũlwa nĩ Yeova Ngai wenyu, ũla wamumisye nthĩ ya Misili, kuma nyũmbanĩ ya ũkombo, 15 ũla watumie mwĩsĩla weũnĩ mũnene na wa kũtĩsya, wĩ na nzoka syĩ sumu na ing’auĩ na wĩ na nthĩ nyũmũ ĩte kĩwʼũ. Nĩwatumie kĩwʼũ kĩtĩka kuma ĩvianĩ yũmũ 16 na amũĩthya mana weũnĩ, ĩla aa-ĩthe menyu mateesĩ, nĩ kana atume mwĩnyivya na aimũtata na aituma mũtetheka ĩvindanĩ yũkĩte. 17 Ethĩwa mũkasya ngoonĩ syenyu, ‘Vinya wakwa mwene na ũtonyi wa kwʼoko kwakwa mwene nĩwʼo ũtumĩte nĩkwata ũthwii ũũ,’ 18 lilikanai kana Yeova Ngai wenyu nĩwe ũmũnengae vinya wa kũmantha ũthwii, nĩ kana eanĩsye ũtianĩo wake ũla weevĩtĩe aa-ũmae menyu, o tondũ kũilyĩ ũmũnthĩ.

19 “Ethĩwa mũkesa kũlwa nĩ Yeova Ngai wenyu na mũyĩatĩĩa ngai ingĩ na mũyĩithũkũma na mũyĩikumanĩa, nĩngũmũkũsĩĩa ũmũnthĩ kana vate ndĩi mũkathela. 20 Mũkathela o ta mbaĩ ila Yeova ũkwananga syume mbee wenyu, nũndũ mũyaaĩthukĩĩsya wasya wa Yeova Ngai wenyu.

9 “Ĩwʼai, inywʼĩ Aisilaeli, ũmũnthĩ nĩmũkũinga Yolotani mũlike na mũilũngya mbaĩ nene na syĩ vinya kwĩ inywʼĩ, ndũa nene na mbiĩĩe kũvika matunĩ,* 2 andũ anene na aasa, ana ma Aanaki, ala mwĩsĩ na mweewie kũyĩwa ĩũlũ woo, ‘Nũũ ũtonya kũsinda ana ma Anaki?’ 3 Kwoou mwaĩlĩte kũmanya ũmũnthĩ kana Yeova Ngai wenyu nũkũinga mbee wenyu. We nĩ mwaki ũvĩvasya vyũ, na akamamina. Akamakĩlya vinya mbee wa metho menyu nĩ kana mũmalũngye* na mĩtũkĩ na mũimananga, o tondũ Yeova ũmwathĩte.

4 “Yĩla Yeova ũkamalũngya maume mbee wenyu mũikaasye ngoonĩ syenyu, ‘Yeova ambetie nthĩ ĩno nĩmĩmesye nũndũ wa ũlũngalu wakwa.’ Vandũ va ũu, Yeova elũngya mbaĩ ii syume mbee wenyu nũndũ wa ũthũku wasyo. 5 Mũyĩendete kũmesya nthĩ ĩsu nũndũ wa ũlũngalu wenyu kana kwĩthĩwa mũte na ũkengani ngoonĩ syenyu. Vandũ va ũu, Yeova Ngai wenyu elũngya mbaĩ isu syume mbee wenyu nũndũ wa ũthũku wasyo na nĩ kana Yeova eanĩsye ndeto ila weevĩtĩie aa-ũmae menyu, Avalaamu, Isaka, na Yakovo. 6 Manyai ĩndĩ kana Yeova Ngai wenyu ndeũmũnenga nthĩ ĩno nzeo mũmĩmesye aĩ nũndũ mwĩ alũngalu, nĩkwĩthĩwa inywʼĩ mwĩ andũ me syongo mbũmũ.*

7 “Lilikanai, mũikaaũlwe nongi, ũndũ mwamũthatisye Yeova Ngai wenyu weũnĩ. Kuma mũthenya ũla mwaumie nthĩ ya Misili nginya mwavika vandũ vaa, mwĩthĩĩtwe mũileana na Yeova. 8 O na kũu Olevu nĩmwamũthatisye Yeova, na Yeova amũthatĩa mũno nginya weethĩa nĩwĩyũmbanĩtye kũmũmina. 9 Yĩla nambatie kĩĩmanĩ ngose ala masengea ma mavia, masengea ma ũtianĩo ũla Yeova watianĩie nenyu, nekalile kĩĩmanĩ mĩthenya 40, mũthenya na ũtukũ, ndyaaya lĩu na ndyaanywʼa kĩwʼũ. 10 Na ĩndĩ Yeova anenga ala masengea elĩ ma mavia mandĩkĩtwe na kyaa kya Ngai, na ĩũlũ wamo vaĩ ndeto syonthe ila Yeova wamũtavĩsye kĩĩmanĩ kuma mwakinĩ mũthenyanĩ wa ũla ũmbano. 11 Mũthyanĩ wa mĩthenya 40, mũthenya na ũtukũ, Yeova nĩwanengie ala masengea elĩ ma mavia, ala masengea ma ũtianĩo, 12 na Yeova ambĩa, ‘Ũkĩla, theea na mĩtũkĩ wume vaa nũndũ andũ maku ala waumisye Misili nĩmekĩte ũthũku mũnene. Nĩmatiĩte na mĩtũkĩ nzĩa ĩla nameaĩe maatĩĩae. Nĩmeseũvĩsye mũvwʼanano wa kyũma.’* 13 Nĩvo ĩndĩ Yeova wambĩie, ‘Nĩnonete andũ aa, na sisya! nĩ andũ me syongo mbũmũ.* 14 Ndũkanziĩĩe, na nĩngũmamina na ndivuta ĩsyĩtwa yoo kuma ungu wa matu, na eka ngũtwʼĩkĩthye mbaĩ yĩ vinya na yĩ na andũ aingĩ mũno kwĩ mo.’

15 “Nĩvo ĩndĩ navĩndũkie na natheea kuma kĩĩmanĩ, o kĩĩma kĩu kyakanĩte mwaki, na nakwete ala masengea elĩ ma ũtianĩo na moko makwa elĩ. 16 Na ĩndĩ nasisya na noona kana nĩmwamũvĩtĩsye Yeova Ngai wenyu! Nĩmweeseũvĩisye kasaũ ka kyũma.* Nĩmwavĩndũkĩte na mĩtũkĩ mũkatia nzĩa ĩla Yeova wamwĩaĩe mũatĩĩae. 17 Kwoou nĩnoosie ala masengea elĩ na namekya nthĩ na moko makwa elĩ na namoaa mbee wa metho menyu. 18 Na ĩndĩ navalũka mbee wa Yeova, o ta ĩvinda ya mbee, mĩthenya 40, mũthenya na ũtukũ. Ndyaaya lĩu o na ndyaanywʼa kĩwʼũ, nũndũ wa naĩ syonthe ila mweekĩte yĩla mweekie ũthũku methonĩ ma Yeova na mwamũthatya. 19 Nĩkwĩthĩwa nĩnakĩaa mũno ũndũ Yeova wamũthatĩe mũno wĩana, nũndũ nĩweeyũmbanĩtye kũmũmina. Ĩndĩ o na vailye ũu, Yeova nĩwambĩthukĩĩisye ĩvindanĩ yĩu o nayo.

20 “Yeova nĩwamũthatĩe Alũni mũno nginya weethĩa nĩweeyũmbanĩtye kũmũmina, ĩndĩ nĩneesũvanie kwondũ wa Alũni ĩvindanĩ yĩu o nayo. 21 Na ĩndĩ noosa kasaũ kau, kala mwavĩtisye yĩla mwakaseũvisye, na nakavĩvya na mwaki; nĩnakatumbatumbangie na nakathia vyũ nginya kavinya ta kĩtoo, na nekya kĩtoo kĩu kalũsĩnĩ kala katheete kuma kĩĩmanĩ.

22 “O na ĩngĩ, mwĩ Tavela, mwĩ Masa, na mwĩ Kivilothi-ataava, nĩmwamũthatisye Yeova. 23 Yĩla Yeova wamwĩie mume Katesi-mbalinea na asya, ‘Ambatai na mũimesya nthĩ ĩla vate nzika ngũmũnenga!’ nĩmwaleanile ĩngĩ na mwĩao wa Yeova Ngai wenyu, na mũyaamũĩkĩĩa o na mũyaamwĩwʼa. 24 Mwĩthĩĩtwe mũileana na Yeova kuma yĩla namũmanyie.

25 “Kwoou nĩnaendeeie kũvalũka mbee wa Yeova mĩthenya 40, mũthenya na ũtukũ, naendeeie kwĩka ũu nũndũ Yeova aisye nũkũmũmina. 26 Nĩnambĩĩie kũmwĩsũva Yeova ndimwĩa, ‘Ame Mwĩai Ũla Mũnene Yeova, ndũkanange andũ maku. Mo nĩ malĩ yaku mwene,* ala woovoisye na ũnene waku na wamaumya Misili na kw’oko kwĩ vinya. 27 Lilikana athũkũmi maku Avalaamu, Isaka, na Yakovo. Ndũkaũngane na wũmũ wa ngoo wa andũ aa, ũthũku woo, na naĩ yoo. 28 Nũndũ waema kwĩka ũu, andũ ma nthĩ ĩla watumisye nĩmatonya kwasya: “Yeova nĩwaemiwe nĩ kũmatwaa nthĩ ĩla wamathĩte, na nũndũ nĩwamamenete, amaumisye kũu nĩ kana amoaĩe weũnĩ.” 29 Nũndũ mo nĩ andũ maku na malĩ yaku mwene,* ala wamaumisye kũu na ũtonyi waku mwingĩ na kwʼoko kwaku kũtambũũkye.ʼ

10 “Ĩvindanĩ yĩu, Yeova ambĩie, ‘Ĩyasĩe masengea elĩ ma mavia mailye ta ala ma mbee, na ũyambata wũke kũla nĩĩ kĩĩmanĩ; o na ĩngĩ, no nginya wĩseũvĩsye ĩsandũkũ ya mbwaũ. 2 Na ngaandĩka masengeanĩ asu ndeto ila syaĩ masengeanĩ ala ma mbee, ala wooaie, na waĩlĩte kũmekĩa ĩsandũkũnĩ yĩu.’ 3 Kwoou naseũvya ĩsandũkũ ya mbwaũ sya mũaa* na nasa masengea elĩ ma mavia mailye ta ala ma mbee na nambata kĩĩmanĩ nguĩte masengea asu elĩ na moko makwa. 4 Na ĩndĩ aandĩka masengeanĩ asu ndeto ila waandĩkĩte vau mbeenĩ, ĩla Mĩao Ĩkũmi,* ĩla Yeova wamũtavĩisye kĩĩmanĩ kuma mwakinĩ mũthenyanĩ wa ũla ũmbano; na Yeova anenga mo. 5 Nĩvo ĩndĩ navĩndũkie na natheea kuma kĩĩmanĩ na neekĩa masengea asu ĩsandũkũnĩ yĩla naĩ nĩnaseũvya, na no vo maĩ, o tondũ Yeova wambĩaĩe.

6 “Ĩtina wa ũu, Aisilaeli nĩmaumie Mbeelothi Mbene-yaakani mathi Mosela. Vau nĩ vo Alũni wakwʼĩĩie na athikwa, na mwana wake Eleasali ambĩĩa kũthũkũma e mũthembi vandũ vake. 7 Kuma vau maendie Ngutikonda, na kuma Ngutikonda mathi Yotivatha, nthĩ yĩ tũlũsĩ twa kĩwʼũ.*

8 “Ĩvindanĩ yĩu Yeova nĩwavathie mbaĩ ya Livai ĩkuae ĩsandũkũ ya ũtianĩo wa Yeova, ĩũngamae mbee wa Yeova ĩmũthũkũme, na ĩyĩathimaa ĩsyĩtwanĩ yake, o tondũ mekaa kũvika ũmũnthĩ. 9 Nĩkyo kĩtumi Livai ũtanengetwe kĩanda kana ũtiĩwa vamwe na ana-a-ĩthe. Yeova nĩwe ũtiĩwa wake, o tondũ Yeova Ngai waku wamũtavisye. 10 Nyie mwene nĩnekalile kĩĩmanĩ o tondũ neekie ĩvindanĩ ya mbee, mĩthenya 40, mũthenya na ũtukũ, na Yeova nĩwambĩthukĩĩisye ĩvindanĩ yĩu o nayo. Yeova ndendaa kũmwananga. 11 Na ĩndĩ Yeova ambĩa, ‘Enda mbee wa andũ, na mũyĩyũmbanyʼa mũkũsye, nĩ kana malike na maimesya nthĩ ĩla neevĩtĩie aa-ũmae moo kana ngamanenga.’

12 “Yu, inywʼĩ Aisilaeli, Yeova Ngai wenyu eenda mwĩke ata? Ũndũ ũũ wĩ wʼoka: mũmũkĩe Yeova Ngai wenyu, mũendae nzĩanĩ syake syonthe, mũmwende, mũmũthũkũmae Yeova Ngai wenyu na ngoo yenyu yonthe na thayũ* wenyu wʼonthe, 13 na mũikwataa mĩao na motw’ĩo ma Yeova ala ngũmwĩaĩa ũmũnthĩ nĩ kana mũendeee nesa. 14 Sisyai, matu nĩ ma Yeova Ngai wenyu, o na matu ma matu,* na nthĩ vamwe na syĩndũ syonthe ila syĩ nthĩnĩ wayo. 15 Ĩndĩ Yeova athengeeie na oonyʼa wendo aa-ũmae menyu me oka, na nũmũnyuvĩte, inywʼĩ ũsyao woo, kuma ngonĩ syonthe sya andũ, o tondũ mũilye ũmũnthĩ. 16 No nginya yu mũthesye* ngoo syenyu na mũieka kwĩthĩwa mwĩ omũ ũu.* 17 Nũndũ Yeova Ngai wenyu nĩ Ngai wa i ngai na Mwĩai wa eai, Ngai mũnene, wĩ vinya, na waĩle kũkĩwa na kũnengwa ndaĩa, ũla ũtendeeasya mũndũ o na wĩva na ũtetĩkĩlaa ĩvaki. 18 Nũsilaa katĩ kwondũ wa mwana ũte ĩthe* na ndiwa na nĩwendete mwĩkali wa ũeninĩ, nũmũnengae lĩu na ngũa. 19 O nenyu no nginya mwende mwĩkali wa ũeninĩ, nũndũ mwaĩ ekali ma ũeninĩ nthĩ ya Misili.

20 “Yeova Ngai wenyu nĩwe mwaĩlĩte kũkĩa, nĩwe mwaĩlĩte kũthũkũma, nĩwe mwaĩlĩte kũlũmanyʼa nake, na mwaĩlĩte kwĩvĩta na ĩsyĩtwa yake. 21 Nĩwe ũla mwaĩlĩte kũtaĩa. Nĩwe Ngai wenyu, ũla ũmwĩkĩte maũndũ aa onthe manene na ma kũsengyʼa na ma kũkĩwa ala mwĩyoneete na metho menyu. 22 Yĩla aa-ũmae menyu matheeie mathi Misili maĩ andũ* 70, na yu Yeova Ngai wenyu nũtumĩte mwingĩva mũno ta ndata sya matunĩ.

11 “No nginya mũmwende Yeova Ngai wenyu na kĩla ĩvinda mũyĩanĩasya kĩanda kyenyu kwake na motw’ĩo make, sila wake, na mĩao yake. 2 Nĩmwĩsĩ kana ũmũnthĩ nĩneena nenyu, na ti na ana menyu ala matesĩ kana mataaona ũkanyʼo wa Yeova Ngai wenyu, ũnene wake, kwʼoko kwake kwĩ vinya na kwʼoko kwake kũtambũũkye. 3 Mayaaona mawonany’o make na meko make ala weekie Misili kũla kwĩ Valao mũsumbĩ wa Misili na nthĩ yake yonthe; 4 kana ũndũ weekanie na ita sya Misili, mbalasi sya Valao na makasya make ma kaũ, ala mavw’ĩkiwe vyũ nĩ kĩwʼũ kya Ũkanga Mũtune yĩla mamũsembanĩtye, na Yeova amananga vyũ.* 5 Mayaaona kĩla weekie kwondũ wenyu* mwĩ weũnĩ nginya mwavika vandũ vaa, 6 kana ũndũ weekie Ndathani na Avilamu, ana ma Eliavu mwana wa Leũveni, yĩla nthĩ yaathamisye na yamamelya, vamwe na mĩsyĩ yoo na maeema moo na kĩndũ kyonthe kĩ thayũ kĩla kyamaatĩĩie, mbee wa metho ma Aisilaeli onthe. 7 Metho menyu nĩmeyoneete meko onthe manene ala Yeova wĩkĩte.

8 “No nginya mũkwatae mwĩao wʼonthe ũla ngũmwĩaĩa ũmũnthĩ, nĩ kana mwĩthĩwe na vinya na mũyĩinga mũlike ĩ nthĩ mũmĩmesye, 9 na nĩ kana mũtonye kwĩkala ĩvinda yĩasa nthĩ ĩla Yeova weevĩtie kũnenga aa-ũmae menyu na ũsyao woo,* nthĩ yusũĩte ĩia na ũkĩ wa nzũkĩ.

10 “Nthĩ ĩno mũendete kũmesya ndĩilye ta nthĩ ya Misili, ĩla mwaumie, kũla mwavandaa mbeũ syenyu na mũyĩingʼithya na nyaaĩ syenyu,* ta mũũnda wa mboka. 11 Ĩndĩ nthĩ ĩla mũkilyĩ kũinga mũmesye nĩ nthĩ yĩ iĩma na ndiĩ syĩ myandanĩ. Ĩnyusaa kĩwʼũ kĩla kyaua kuma ĩtunĩ; 12 nĩ nthĩ ĩla Yeova Ngai wenyu ũsũvĩaa. Metho ma Yeova Ngai wenyu mekalaa mamĩsyaĩĩsye, kuma mwambĩĩonĩ wa mwaka kũvika mũthyanĩ wa mwaka.

13 “Na ethĩwa mũkeewʼaa na kĩthito mĩao yakwa ĩla ngũmwĩaĩa ũmũnthĩ na mũimwenda Yeova Ngai wenyu na mũimũthũkũmaa na ngoo yenyu yonthe na thayũ* wenyu wʼonthe, 14 o na ĩngĩ, ngamuĩsya mbua nthĩ yenyu ĩvindanĩ yĩla yĩtwʼĩtwe, mbua ya nthwa na mbua ya uũa, na mũkoombanyʼa lĩu wenyu wa mbaa ngetha na mbinyu yenyu nzaũ na mauta menyu. 15 Na ngatuma nyeki ĩmea isesinĩ syenyu kwondũ wa indo syenyu, na mũkaya na mũyĩanĩwa. 16 Ĩsũvĩei mũiketĩkĩlye ngoo syenyu isesengwe syelelũke na mũithaitha ngai ingĩ na mũyĩikumanĩa. 17 Mwaema kwĩka ũu, ũthatu wa Yeova ũkamwakanĩa, na akavinga matu nĩ kana kũikaue na nthĩ ndĩkanengane ũsyao wayo na mũkathela na mĩtũkĩ mume nthĩ nzeo ĩla Yeova ũkũmũnenga.

18 “No nginya ũkindĩlĩĩle ndeto ii syakwa ngoonĩ yaku na thayũnĩ* waku na ũisyova syĩthĩwe ũlilikanyʼo kwʼokonĩ kwaku, na syaĩlĩte kwĩthĩwa ta kĩndũ kyoveewe kana kĩkĩĩtwe kĩtulyanĩ kyaku.* 19 Imanyĩasye syana syaku, neenaa ĩũlũ wasyo yĩla ũilyĩ nyũmbanĩ yaku na yĩla ũendete nzĩanĩ na yĩla wakoma na yĩla waamũka. 20 Iandĩke mĩtĩnĩ ĩla yĩ ũtee wa mũomo wa nyũmba yaku na mĩvĩanĩ yaku, 21 nĩ kana we na ana maku mũtonye kwĩkala thayũ ĩvinda yĩasa mwĩ nthĩ ĩla Yeova weevĩtie kana akanenga aa-ũmae menyu, ĩvinda yonthe yĩla ĩtu yĩkethĩawa ĩũlũ wa nthĩ.

22 “Ethĩwa mũkaatĩĩa vyũ mwĩao ũũ ũla ngũmũnenga na mũiũkwataa, mũmwende Yeova Ngai wenyu, mũendae nzĩanĩ syake syonthe, na mũilũmanasya nake, 23 Yeova akalũngya mbaĩ ii syonthe syume mbee wenyu, na mũkoosa nthĩ ya mbaĩ nene na syĩ andũ aingĩ kwĩ inywʼĩ. 24 Kĩla vandũ nyaaĩ syenyu ikakinya vakatwʼĩka venyu. Mũvaka wenyu ũkeethĩwa wumĩte weũnĩ kũvika Levanoni, kuma ũla Ũsĩnĩ, ũsĩ wa Euvalati, kũvika ũkanga ũla wĩ ngalĩko ya ũthũĩlonĩ wa sua.* 25 Vai mũndũ ũkamũsiĩĩa. Yeova Ngai wenyu akatuma andũ ma nthĩ yonthe ĩla mũkesĩla matelema na maimũkĩa, o tondũ ũmwathĩte.

26 “Sisyai, ũmũnthĩ nĩngwia mbee wenyu ũathimo na kĩumo: 27 ũathimo ethĩwa nĩmũkwĩwʼa mĩao ya Yeova Ngai wenyu ĩla ngũmwĩaĩa ũmũnthĩ, 28 na kĩumo ethĩwa nĩmũũlea kwĩwʼa mĩao ya Yeova Ngai wenyu na mũyelelũka kuma nzĩanĩ ĩla ngũmwĩaĩa mũatĩĩae ũmũnthĩ na mũiatĩĩa ngai ila mũtesĩ.

29 “Yĩla Yeova Ngai wenyu ũkamũlikya nthĩ ĩla mũũmesya, no nginya mũtangaase* ũathimo Kĩĩmanĩ kya Ngelisimu na kĩumo Kĩĩmanĩ kya Evali. 30 Syo iyĩĩ ngalĩko ĩla ĩngĩ ya Yolotani welekele ngalĩ ya ũthũĩlonĩ wa sua, nthĩ ya Akanaanĩ ala mekalaa Alava, ũsianĩtye na Ngilikali, ũtee wa mĩtĩ mĩnene ya Mole? 31 Nũndũ nĩmũkũinga Yolotani mũlike na mũimesya nthĩ ĩla Yeova Ngai wenyu ũkũmũnenga. Yĩla mũkamĩmesya na mũitũa vo, 32 no nginya mwĩthĩwe mwĩ metho mũatĩĩe myolooto yonthe na motw’ĩo ala ngwia mbee wenyu ũmũnthĩ.

12 “Ĩĩ nĩyo myolooto na sila ũla mwaĩlĩte kwĩthĩwa mwĩ metho mũatĩĩae mĩthenya yonthe ĩla mũkethĩwa thayũ mwĩ nthĩ ĩla Yeova Ngai wa aa-ũmae menyu ũkũmũnenga mũmesye. 2 Mwaĩlĩte kwananga vyũ kũndũ kwʼonthe kũla mbaĩ ila mũkakĩlya vinya syĩthĩĩtwe iithaithĩa ngai syoo, kwĩthĩwe nĩ iĩmanĩ ndũlu kana nĩ tũlĩmanĩ kana ungu wa mũtĩ o na wĩva wĩ matũ maingĩ. 3 Mwaĩlĩte kũvalũkya ithembeo syoo, mwananganyʼe ituĩ syoo sya ũthaithi, mũvĩvye mĩtĩ yoo ya ũthaithi* na mwaki, na mũitemanga mĩvwʼanano myasũvye ya ngai syoo, nĩ kana mũvetange masyĩtwa masyo vandũnĩ vau.

4 “Mũikathaithe Yeova Ngai wenyu na nzĩa ĩsu. 5 Vandũ va ũu, mũmanthei Yeova Ngai wenyu vandũ o na va vala ũkanyuva kwia ĩsyĩtwa yake na vandũ vala ũkekalaa katĩ wa mbaĩ syenyu syonthe, na endaai vo. 6 Vau nĩ vo mwaĩlĩte kũetae nthembo syenyu sya kũvĩvw’a, nthembo ingĩ syenyu, ilungu syenyu sya ĩkũmi, mũvothi kuma mokonĩ menyu, nthembo syenyu sya wĩvĩto, nthembo syenyu sya ngenda, na makithathi ma* ngʼombe syenyu na ma malondu na mbũi syenyu. 7 No nginya inywʼĩ na mĩsyĩ yenyu mũĩĩe vau mbee wa Yeova Ngai wenyu na mũitanĩa wĩa wenyu wʼonthe, nũndũ Yeova Ngai wenyu nũmũathimĩte.

8 “Mũikeke ũndũ tũkwĩka vaa ũmũnthĩ, kĩla mũndũ ayĩka kĩla ũkwona kyaĩlĩte methonĩ make mwene,* 9 nũndũ mũinamba kũlika vandũ va kũthũmũa na ũtiĩwanĩ ũla Yeova Ngai wenyu ũkũmũnenga. 10 Yĩla mũkainga Yolotani na mũitũa nthĩ ĩla Yeova Ngai wenyu ũkũmũnenga mũmesye, vate ndĩi akamũnenga ũthũmũo kuma amaithanĩ menyu onthe ala mamũthyũlũlũkĩte, na mũkekalaa mwĩ asũvĩĩku. 11 Mũkaete syĩndũ syonthe ila ngũmwĩaĩa vala Yeova Ngai wenyu ũkanyuva ĩsyĩtwa yake yĩkalae; mũkaete nthembo syenyu sya kũvĩvw’a, nthembo ingĩ syenyu, ilungu syenyu sya ĩkũmi, mũvothi kuma mokonĩ menyu, na kĩla nthembo ya wĩvĩto ĩla mũkevĩtĩa Yeova. 12 Mũkatana mbee wa Yeova Ngai wenyu, inywʼĩ na ana menyu, eĩtu menyu, aũme menyu ngombo na aka menyu ngombo, na Mũlivai ũla wĩ ndũanĩ syenyu,* nũndũ we ndanengetwe kĩanda kana ũtiĩwa vamwe nenyu. 13 Ĩsũvĩei mũikathembee nthembo syenyu sya kũvĩvw’a vandũ vangĩ o na va vala mũkwona. 14 Mwaĩlĩte kũthembea nthembo sya kũvĩvw’a o vandũ vala Yeova wĩnyuva kĩsionĩ kĩmwe katĩ wa isio sya mbaĩ syenyu, na vau nĩ vo mwaĩle kwĩkĩa maũndũ onthe ala ngũmwĩaĩa.

15 “Ĩndĩ ĩvinda o na yĩva yĩla mwenda kũya nyama,* no mũthĩnze nyamũ na mũiya nyama kwosana na ũathimo ũla Yeova Ngai wenyu ũmũnengete ndũanĩ syenyu syonthe.* Mũndũ mũvuku na mũndũ ũte mũvuku no aye, o ũndũ mũtonya kũya kĩlongʼa kana nthia. 16 Ĩndĩ mũikaye nthakame; mwaĩlĩte kũmĩta nthĩ ta kĩw’ũ. 17 Mũiketĩkĩlwʼa kũĩĩa ndũanĩ syenyu* kĩlungu kya ĩkũmi kya lĩu wenyu wa mbaa ngetha, mbinyu yenyu nzaũ, mauta menyu, makithathi ma* ngʼombe syenyu na ma mbũi na malondu menyu, nthembo o na yĩva ya nthembo syenyu sya wĩvĩto ila mweevĩta, nthembo syenyu sya ngenda, kana mũvothi kuma mokonĩ menyu. 18 Mwaĩlĩte kũĩĩa syĩndũ isu mbee wa Yeova Ngai wenyu vala Yeova Ngai wenyu wĩnyuva; mũkeeka ũu inywʼĩ na ana menyu, eĩtu menyu, athũkũmi menyu aũme na athũkũmi menyu aka, na Mũlivai ũla wĩ ndũanĩ syenyu;* na mũkatanĩa mbee wa Yeova Ngai wenyu wĩanĩ wenyu wʼonthe. 19 Ĩsũvĩei mũikalekeleelye Mũlivai ĩvinda yonthe yĩla mũkekala nthĩ yenyu.

20 “Yĩla Yeova Ngai wenyu ũkanenevangya kĩsio kyenyu, o tondũ ũmwathĩte, na mũyasya, ‘Nĩngwenda kũya nyama,’ nũndũ mwĩ na wendi* wa kũya nyama, no mũye nyama ĩvinda o na yĩva mwamyenda.* 21 Ethĩwa vala Yeova Ngai wenyu wanyuva kwia ĩsyĩtwa yake nĩ vaasa mũno nenyu, nĩvo ĩndĩ mwaĩlĩte kũthĩnza ngʼombe imwe syenyu kana mbũi na malondu amwe menyu ala Yeova ũmũnengete, o tondũ namwĩaĩa, na mwaĩlĩte kũĩĩa ndũanĩ syenyu* ĩvinda yonthe mwasyenda.* 22 No mũmĩye o ũndũ mũtonya kũya kĩlongʼa na nthia; mũndũ mũvuku na mũndũ ũte mũvuku no mamĩye. 23 Ĩndĩ tw’ai vyũ kana mũikaya nthakame, nũndũ nthakame nĩyo thayũ, na mũikaye thayũ vamwe na nyama. 24 Mũikamĩye. Mwaĩlĩte kũmĩta nthĩ ta kĩwʼũ. 25 Mũikamĩye, nĩ kana maũndũ menyu vamwe na ma syana syenyu ĩtina wenyu mathi nesa, nũndũ mwĩĩka kĩla kyaĩlĩte methonĩ ma Yeova. 26 Mwaĩlĩte kũete o syĩndũ syenyu ntheu vamwe na nthembo syenyu sya wĩvĩto yĩla mũkũka vala Yeova ũkanyuva. 27 Mũkaumĩsya nthembo syenyu sya kũvĩvw’a vau, nyama na nthakame, kĩthembeonĩ kya Yeova Ngai wenyu, na nthakame ya nthembo syenyu yaĩlĩte kwĩtwa ũtee wa kĩthembeo kya Yeova Ngai wenyu, ĩndĩ no mũye nyama.

28 “Ĩthĩwai metho mwĩwʼe ndeto ii syonthe ila ngũmwĩaĩa, nĩ kana maũndũ menyu maendae nesa na ma ana menyu ĩtina wenyu, nũndũ mwĩĩka kĩla kĩseo na kyaĩlĩte methonĩ ma Yeova Ngai wenyu.

29 “Yĩla Yeova Ngai wenyu ũkamina mbaĩ ila mũkakĩlya vinya, na yĩla mũkethĩwa mũtwĩe nthĩ yasyo, 30 ĩthĩwai mwĩ metho mũikalike kĩteinĩ o tasyo ĩtina wa mbaĩ isu kũminwa syume mbee wenyu. Mũikakũlye ĩũlũ wa ngai syoo, mũyasya, ‘Mbaĩ ino syathaithaa ngai syoo ata? O nakwa nĩĩka o tasyo.’ 31 Mũikeke Yeova Ngai wenyu ũu, nũndũ mekaa ngai syoo kĩla mũthemba wa maũndũ ma kũthatya ala Yeova ũmenete, o na nĩmavĩvasya ana na eĩtu moo na mwaki kwondũ wa ngai syoo. 32 Kĩla ndeto ngũmwĩaĩa mwaĩlĩte kwĩthĩwa mwĩ metho mũmĩke. Mũyaĩlĩte kũmyongela kana kũmĩolanga.

13 “Ethĩwa mwathani kana ũla wathanaa atũmĩĩte ndoto nĩwookĩla katĩ wenyu na amũnenga wonanyʼo kana ũndũ wa kũsengy’a, 2 na wonany’o kana ũndũ wa kũsengyʼa ũla wamũtavya ĩũlũ wawʼo ũyĩanĩa yĩla ũkwasya, ‘Ekai tũatĩĩe ngai ingĩ,’ ngai ila mũtesĩ, ‘na ekai tũithũkũme,’ 3 mũikethukĩĩsye ndeto sya mwathani ũsu kana mũoti ũsu wa ndoto, nĩkwĩthĩwa Yeova Ngai wenyu nũkũmũtata amanye kana nĩmwendete Yeova Ngai wenyu na ngoo yenyu yonthe na thayũ* wenyu wʼonthe. 4 Mwaĩlĩte kũatĩĩaa Yeova Ngai wenyu, nĩwe mwaĩlĩte kũkĩa, mwaĩlĩte kũkwataa mĩao yake, mwaĩlĩte kwĩthukĩĩasya wasya wake; nĩwe mwaĩlĩte kũthũkũma, na nĩwe mwaĩlĩte kũlũmanyʼa nake. 5 Ĩndĩ mwathani ũsu kana mũoti ũsu wa ndoto aĩlĩte kũawa, nũndũ nĩwamwĩkĩa vinya mũleane na Yeova Ngai wenyu, ũla wamumisye nthĩ ya Misili na amwovosya kuma nyũmbanĩ ya ũkombo, amwelelũkye kuma nzĩanĩ ĩla Yeova Ngai wenyu ũmwĩaĩe mũatĩĩae. Na no nginya mũvetange kĩla kĩthũku katĩ wenyu.

6 “Ethĩwa mwana-a-inyia waku, mwana wa inyia waku, kana mwana waku kana mwĩĩtu waku kana kĩveti kyaku kĩla wendete kana mũnyanyau wa vakuvĩ vyũ* nĩwatata kũũsesenga na kĩmbithĩ, ayasya, ‘Tũthi tũkathũkũme ngai ingĩ,’ ngai ila we kana aa-ũmae maku mateesĩ, 7 kuma ngainĩ sya ngo sya andũ ala mamũthyũlũlũkĩte, syĩthĩwe syĩ vakuvĩ nenyu kana syĩ vaasa nenyu, kuma mũthya ũmwe wa nthĩ kũvika mũthya ũla ũngĩ wa nthĩ, 8 ndũketĩkĩlane nake kana ũmwĩthukĩĩsye, o na ndwaĩlĩte kũmwĩwʼĩa tei kana kũmwĩwʼĩa ĩnee kana kũmũvitha; 9 vandũ va ũu, vate ndĩi waĩlĩte kũmũaa. Kw’oko kwaku nĩkwʼo kwaĩlĩte kwĩthĩwa kwĩ kwa mbee kũmũaa, na moko ma andũ ala angĩ onthe maiatĩĩa. 10 Na no nginya ũmũkimange na mavia nginya ũmũae, nũndũ nĩwatata ũkwelelũkya ũmũtie Yeova Ngai waku, ũla wakumisye nthĩ ya Misili, kuma nyũmbanĩ ya ũkombo. 11 Nĩvo ĩndĩ Aisilaeli onthe makewʼa na maikĩa, na maikeka ĩngĩ nongi ũndũ o na wĩva ũthũkĩte ta ũsu katĩkatĩ wenyu.

12 “Mũkesa kwĩwʼa vaiwetwa ndũanĩ ĩmwe katĩ wa ndũa ila Yeova Ngai wenyu ũmũnengete mwĩkale, 13 ‘Andũ matatethya nĩmaumĩlĩte katĩ wenyu nĩ kana melelũkye ekali ma ndũa yoo, mayasya: “Tũthi tũkathũkũme ngai ingĩ,” ngai ila mũtesĩ,’ 14 mwaĩlĩte kũsisya ũndũ ũsu, mũũkunĩkĩle nesa vyũ na mũikũlĩĩlya; na ethĩwa nĩvaĩkĩĩthw’a kwa wʼo ũndũ ũsu wa kũthatya nĩwĩkĩtwe katĩ wenyu, 15 vate ndĩi mwaĩlĩte kũaa ekali ma ndũa ĩsu na ũvyũ. Myanangei vyũ na ũvyũ na kyonthe kĩla kĩ nthĩnĩ wayo, o vamwe na indo syayo. 16 Na ĩndĩ mwaĩlĩte kũmbanĩsya mũtavo wayo wʼonthe katĩkatĩ wa kĩwanza kya ndũa ĩsu na mũivĩvya ndũa ĩsu na mwaki, na mũtavo wayo ũkeethĩwa nthembo nima kwondũ wa Yeova Ngai wenyu. Ĩkaendeea kwĩthĩwa yĩ ivumbu sya mavia. Ndyaĩlĩte kwĩsa kwakwa ĩngĩ. 17 Kw’oko kwenyu kũyaĩlĩte kwosa kĩndũ kĩvathĩtwe kwondũ wa kwanangwa,* nĩ kana Yeova Ngai ethyũũe kuma ũthatunĩ wake wakanĩte na aimwĩwʼĩa tei na ĩnee na aimwingĩvya, o tondũ weevĩtĩe aa-ũmae menyu. 18 Nũndũ nĩmwaĩlĩte kwĩwʼaa* Yeova Ngai wenyu kwa kũkwataa mĩao yake yonthe ĩla ngũmwĩaĩa ũmũnthĩ, na kwoou mũyĩkaa kĩla kyaĩlĩte methonĩ ma Yeova Ngai wenyu.

14 “Mwĩ ana ma Yeova Ngai wenyu. Mũiketemange kana mwenze itulya syenyu ngunũ* kwondũ wa mũndũ mũkwʼũ. 2 Nũndũ mwĩ andũ atheu kwa Yeova Ngai wenyu, na Yeova nũmũnyuvĩte mũtwʼĩke andũ make, malĩ yake ya mwanya,* kuma ngonĩ syonthe sya andũ ila syĩ ĩũlũ wa nthĩ.

3 “Mũikaye kĩndũ o na kĩva kya kũthatya. 4 Ii nĩsyo nyamũ ila mũtonya kũya: nzaũ, ĩlondu, mbũi, 5 nthia, kĩlongʼa, nthwaia, mbũi ya kĩthekanĩ, nzwaala, ĩlondu ya kĩthekanĩ, na ĩlondu ya kĩĩmanĩ. 6 No mũye nyamũ o na yĩva yĩ na ĩvũngũ yatũku yĩaanĩkĩte kelĩ na ĩthaumasya. 7 Ĩndĩ, mũikaye nyamũ ii iatĩĩe ila ithaumasya kana syĩ na mavũngũ matũku: ngamĩle, mbũkũ, na kĩnyowe, nũndũ nithaumasya ĩndĩ iyĩthĩawa na mavũngũ matũku. Nĩ mbuku kwenyu. 8 O na ngũlũe nũndũ yĩ ĩvũngũ yatũku ĩndĩ ndĩthaumasya. Nĩ mbuku kwenyu. Mũikaye nyama syasyo kana mũkwate simba syasyo.

9 “Katĩ wa syũmbe syonthe ila syĩkalaa kĩw’ũnĩ, no mũye ii: Kyũmbe o na kĩva kĩ nthwau na makwaũ, no mũye. 10 Ĩndĩ mũikaye kyũmbe o na kĩva kĩte na nthwau na makwaũ. Nĩ kĩvuku kwenyu.

11 “No mũye nyũnyi o na yĩva ĩte mbuku. 12 Ĩndĩ mũikaye ii: ndiũ, kĩvaalala, ndei nziũ, 13 mbolosya ndune, mbolosya nziũ, kĩla mũthemba wa kĩmangaũ, 14 kĩla mũthemba wa ngũngũũ, 15 nyaa, ndunduli, ĩngwʼaa, kĩla mũthemba wa kĩlũĩ, 16 ndunduli nini, ndunduli yĩ matũ maasa, ĩvata ya kĩwʼũnĩ, 17 ngunĩ, ndei, ĩvutavutĩlya, 18 ĩsaũ, kĩla mũthemba wa ĩkũthakũthĩi, ngomakomi, na ũvuvu. 19 O nasyo syũmbe syonthe syĩ nthwau ila syĩkalaa syĩ ikundi* nĩ mbuku kwenyu. Iyaĩlĩte kũĩwa. 20 No mũye kyũmbe o na kĩva kĩte kĩvuku kĩũlũkaa.

21 “Mũikaye nyamũ o na yĩva yĩthĩiwe yĩ ngwʼũ. No mũmĩnenge mwĩkali wa ũeninĩ ũla wĩkalaa ndũanĩ syenyu,* na no amĩye, kana mũmĩthooesye mũeni. Nũndũ mwĩ andũ atheu kwa Yeova Ngai wenyu.

“Mũikatheũkĩsye katena ka mbũi ĩianĩ ya inyia wako.

22 “No nginya mũnengane kĩlungu kya ĩkũmi kya ũsyao wa mbeũ sya mĩũnda yenyu mwaka kũthi ũla ũngĩ. 23 Mũkaĩĩa kĩlungu kya ĩkũmi kya lĩu wenyu wa mbaa ngetha, mbinyu yenyu nzaũ, mauta menyu, na makithathi ma* ngʼombe syenyu na malondu na mbũi syenyu mbee wa Yeova Ngai wenyu vala ũkanyuva ĩsyĩtwa yake yĩkalae, nĩ kana mwĩmanyĩsye kũmũkĩaa Yeova Ngai wenyu mavinda onthe.

24 “Ĩndĩ ethĩwa kyalo kĩu nĩ kĩasa mũno kwenyu na mũitonya kũkua syĩndũ isu nginya vala Yeova Ngai wenyu ũnyuvĩte kwondũ wa ĩsyĩtwa yake nĩkwĩthĩwa nĩ vaasa mũno nenyu (nũndũ Yeova Ngai wenyu akamũathima), 25 no mũithoosye, na mũikua mbesa isu mokonĩ menyu, nginya vala Yeova Ngai wenyu wĩnyuva. 26 Na ĩndĩ no mũtũmĩe mbesa isu kũthooa kĩndũ o na kĩva mũkwenda.* No mũthooe ngʼombe, malondu, mbũi, mbinyu na syĩndũ ingĩ sya kũnyuwa itonya kũtuma mũmilwa, na kĩndũ o na kĩva kĩũmwendeesya;* na mũkaĩĩa vau mbee wa Yeova Ngai wenyu na mũitana, inywʼĩ na andũ ma mĩsyĩ yenyu. 27 Na mũikalekeleelye Mũlivai ũla wĩ ndũanĩ syenyu, nũndũ ndanengetwe kĩanda kana ũtiĩwa vamwe nenyu.

28 “Mũthyanĩ wa kĩla myaka ĩtatũ, mwaĩlĩte kũete kĩlungu kyonthe kya ĩkũmi kya ũsyao wenyu kwondũ wa mwaka ũsu na mũikia ndũanĩ syenyu. 29 Na ĩndĩ Mũlivai ũla ũtanengetwe kĩanda kana ũtiĩwa vamwe nenyu, mwĩkali wa ũeninĩ, mwana ũte ĩthe,* na mũndũ mũka ndiwa ũla wĩ ndũanĩ syenyu akooka na aiya avũne, nĩ kana Yeova Ngai wenyu amũathime maũndũnĩ onthe ala mũkwĩka.

15 “Mũthyanĩ wa kĩla myaka mũonza, mwaĩlĩte kũekeanĩa makoani. 2 Ũũ nĩwʼo mũkaekeanĩaa: Kĩla mũndũ ũtaĩte mũtũi wake akamũekea ĩkoani yake. Ndaĩlĩte kwĩa mũtũi wake kana mwana-a-ĩthe amũĩve, nũndũ kũekewa kũu kwatangaaswa kwosana na mwĩao wa Yeova. 3 No wĩe mũeni akũĩve, ĩndĩ waĩlĩte kũekea mwana-a-ĩthe waku kĩla ũmũtaĩte. 4 O na ũu wĩ o vo, vai ũmwe wenyu waĩlĩte kũtwʼĩka ngya, nũndũ vate nzika, Yeova akamũathima mwĩ nthĩ ĩla Yeova Ngai wenyu ũkũmũnenga mũmesye yĩthĩwe ũtiĩwa, 5 ĩndĩ no ethĩwa mũkeethukĩĩsya vyũ wasya wa Yeova Ngai wenyu na kũatĩĩa nesa mwĩao ũũ wʼonthe ngũmũnenga ũmũnthĩ. 6 Nũndũ Yeova Ngai wenyu akamũathima o tondũ ũmwathĩte, na mũkakovethya mbaĩ mbingĩ,* ĩndĩ inywʼĩ mũikakova; na mũkasumbĩka mbaĩ mbingĩ, ĩndĩ inywʼĩ iikamũsumbĩka.

7 “Ethĩwa ũmwe wa ana-a-ĩthe maku nĩwatwʼĩka ngya katĩ wenyu ndũanĩ ĩmwe nthĩ ĩla Yeova Ngai wenyu ũkũmũnenga, ndũkomye ngoo yaku kana ũkũnzĩe mwana-a-ĩthe waku ngya kwʼoko. 8 Nũndũ waĩlĩte kũmũtambũũkĩsya kw’oko kwaku na ũlau na ũyĩka kyonthe kĩla ũtonya ũmũkovethye* kĩndũ o na kĩva wĩ na vata nakyo kana ũte nakyo. 9 Ĩsũvĩei mũikethĩwe na woni ũũ mũthũku ngoonĩ syenyu, ‘Mwaka wa mũonza, mwaka wa ũthasyo, nũthengeee,ʼ na mũyĩema kwonyʼa mwana-a-ĩthe wenyu ũla ngya ũlau na mũyĩema kũmũnenga kĩndũ. Ethĩwa akamwĩkaĩla Yeova nũndũ wenyu, mũkeethĩwa mweeka naĩ. 10 Mwaĩlĩte kũmũnenga na ũlau, na mũyaĩlĩte* kũmũnenga mũinyungunyĩsya, nũndũ ũu nĩw’o ũkatuma Yeova Ngai wenyu aathima meko menyu na wĩa wenyu wʼonthe. 11 Nĩkwĩthĩwa mavinda onthe kũkeethĩawa na andũ ngya ĩ nthĩ. Na nĩkyo kĩtumi ngũmwĩaĩa ũũ, ‘Mwaĩlĩte kũtambũũkĩsya mwana-a-ĩthe wenyu ũla wĩ nthĩ yenyu na ũkũthĩna na ngya kwʼoko kwenyu na ũlau.’

12 “Ethĩwa ũmwe wa ana-a-ĩthe maku, mũndũũme Mũevelania kana mũndũ mũka, nĩwathoowʼa kwaku na nũkũthũkũmĩte myaka thanthatũ, nĩvo ĩndĩ mwakanĩ wa mũonza waĩlĩte kũmũthasya. 13 Na ethĩwa nũũmũthasya, ndũkaeke athi moko mathei. 14 Waĩlĩte kũmũnenga na ũlau kĩndũ kuma ndĩthyanĩ yaku, kĩvũĩonĩ kyaku, na kĩangĩonĩ kyaku kya mauta na mbinyu. Waĩle kũmũnenga o ũndũ Yeova Ngai waku ũkũathimĩte. 15 Lilikana kana waĩ ngombo nthĩ ya Misili na Yeova Ngai waku akwovosya. Nĩkyo kĩtumi ngũkwĩaĩa wĩke ũu ũmũnthĩ.

16 “Ĩndĩ ethĩwa akakwĩa, ‘Ndikũtia nĩthi!’ Nũndũ nũkwendete na nĩwendete mũsyĩ waku, nĩkwĩthĩwa aneethĩawa e mũtanu e vamwe naku, 17 nĩvo ĩndĩ waĩlĩte kwosa mũkuva na ũitonya kũtũ kwake nawʼo nginya ũvike mũomonĩ, na akeethĩawa ngombo yaku thayũ wake wʼonthe. Ũu nowʼo waĩle kwĩkana na mwĩĩtu waku ngombo. 18 Ndũkone wĩ ũndũ wĩ vinya yĩla wamũthasya na aũtia, nĩkwĩthĩwa ũthũkũmi wake wa myaka thanthatũ kwaku ũnaĩ kũndũ kwĩlĩ kwa ũthũkũmi wa mũthũkũmi mũandĩke, na Yeova Ngai waku nũkũathimĩte maũndũnĩ onthe ala mekĩtwe.

19 “Waĩlĩte kũthesya kwondũ wa Yeova Ngai waku kĩla nyamũ nũme yasyawa ya mbee ngʼombenĩ syaku na malondunĩ maku. Ndũkathũkũme wĩa o na wĩva na nyamũ ĩla yasyawa ya mbee ngʼombenĩ* syaku kana ũtile w’ĩa nyamũ ĩla yasyawa ya mbee malondunĩ maku. 20 We na andũ ma mũsyĩ waku mwaĩlĩte kũmĩĩĩa mbee wa Yeova Ngai wenyu mwaka kũthi ũla ũngĩ mwĩ vala Yeova ũkanyuva. 21 Ĩndĩ ethĩwa yĩ na thĩna o na ũmwe, yĩthĩwe yaĩte mamutha, ĩyonaa nthĩ, kana yĩ na thĩna ũngĩ o na wĩva mũnene, mũikamĩthembee Yeova Ngai wenyu. 22 Mwaĩle kũmĩĩĩa ndũanĩ syenyu,* mũndũ mũvuku na ũte mũvuku vamwe, o ta kĩlongʼa kana nthia. 23 Ĩndĩ mũikaye nthakame yayo; mwaĩlĩte kũmĩta nthĩ o ta kĩw’ũ.

16 “Lilikanaai mwei wa Avivu,* na mũitanĩaa Vasaka ya Yeova Ngai wenyu, nũndũ mweinĩ wa Avivu, Yeova Ngai wenyu nĩwamumisye Misili ũtukũ. 2 Na mwaĩlĩte kumĩsya Yeova Ngai wenyu nthembo ya Vasaka, kuma malondunĩ na ngʼombenĩ, vala Yeova ũkanyuva ĩsyĩtwa yake yĩkalae. 3 Mũyaĩlĩte kũmĩĩsanĩsya na kĩndũ o na kĩva kĩkĩĩtwe ĩlawa; mĩthenya mũonza mwaĩlĩte kũya mũkate ũte ĩlawa, mũkate wa mathĩna, nũndũ mwaumie Misili na mĩtũkĩ. Ĩkaai ũu nĩ kana mũlilikane mũthenya ũla mwaumie nthĩ ya Misili ĩvinda yonthe yĩla mũkwĩkala thayũ. 4 Vai mũtu mũkime* mũkaatu mwaĩlĩte kwĩthĩwa nawʼo kĩsionĩ kyenyu kyonthe kwa mĩthenya mũonza, o na vai nyama o na ĩmwe ĩla mũkathemba ĩ ya wĩoo mũthenyanĩ wa mbee yaĩlĩte kwĩkala ũtukũ wʼonthe nginya kwakya. 5 Mũiketĩkĩlwʼa kumĩsya nthembo ya Vasaka ndũanĩ o na yĩva ĩla mũkwenda katĩ wa ndũa ila Yeova Ngai wenyu ũkũmũnenga. 6 Ĩndĩ mwaĩle kwĩka ũu mwĩ vala Yeova Ngai wenyu ũkanyuva ĩsyĩtwa yake yĩkalae. Mwaĩlĩte kumya nthembo ya Vasaka ĩ ya wĩoo sua yathũa oou, ĩvindanĩ yĩla yĩnyuvĩtwe yĩla mwaumie Misili. 7 No nginya mũmĩuĩe na mũimĩĩĩa vala Yeova Ngai wenyu ũkanyuva, na kwakya no mũsyoke maeemanĩ menyu. 8 Mĩthenya thanthatũ mwaĩlĩte kũya mũkate ũte ĩlawa, na mũthenyanĩ wa mũonza kũkeethĩawa ũmbano wa mwanya wa Yeova Ngai wenyu. Mũikatethye wĩa o na wĩva.

9 “Mwaĩlĩte kũtala syumwa mũonza. Mwaĩlĩte kwambĩĩa kũtala syumwa mũonza kuma ĩvinda yĩla mwambĩĩa kũtema iia iũngamĩte na kavyũ ke ngoto. 10 Na ĩndĩ mwaĩlĩte kũtanĩa Mboka ya Syumwa kwondũ wa Yeova Ngai wenyu na nthembo ya ngenda kuma mokonĩ menyu, kwĩanana na ũndũ Yeova Ngai wenyu ũmũathimĩte. 11 Na mwaĩlĩte kũtana mbee wa Yeova Ngai wenyu, inywʼĩ na ana menyu, eĩtu menyu, aũme menyu ngombo, aka menyu ngombo, Alivai ala me ndũanĩ syenyu,* ekali ma ũeninĩ, syana ite ĩthe,* na mũndũ mũka ndiwa, ala me katĩ wenyu, mwĩ vala Yeova Ngai wenyu wĩnyuva ĩsyĩtwa yake yĩkalae. 12 Lilikanai kana mwaĩ ngombo Misili, na mũiatĩĩa na kwĩanĩsya myolooto ĩĩ.

13 “Mwaĩlĩte kũtanĩaa Mboka ya Ivanda* mĩthenya mũonza yĩla mwoombanyʼa lĩu wa mbaa ngetha kuma ivũĩonĩ syenyu na kuma iangĩonĩ syenyu sya mauta na mbinyu. 14 Tanai ĩvindanĩ ya mboka yenyu, inywʼĩ na ana menyu, eĩtu menyu, aũme menyu ngombo, aka menyu ngombo, Alivai, ekali ma ũeninĩ, syana ite ĩthe, na mũndũ mũka ndiwa, ala me ndũanĩ syenyu. 15 Mĩthenya mũonza mũkatanĩa mboka kwondũ wa Yeova Ngai wenyu vala Yeova wĩnyuva, nĩkwĩthĩwa Yeova Ngai wenyu akaathima ũsyao wenyu wʼonthe na maũndũ onthe ala mũkeka, na mũkeethĩwa na ũtanu mwingĩ.

16 “Mavinda atatũ kwa mwaka, aũme menyu onthe maĩlĩte kũkaa mbee wa Yeova Ngai wenyu vandũ vala ũkanyuva: Mbokanĩ ya Mũkate ũte Ĩlawa, Mbokanĩ ya Syumwa, na Mbokanĩ ya Ivanda,* na vai ũmwe katĩ woo waĩlĩte kũka mbee wa Yeova moko mathei. 17 Mũthĩnzĩo ũla kĩla ũmwe ũkaete waĩle kwĩthĩwa wĩanene na ũathimo ũla Yeova Ngai wenyu ũmũnengete.

18 “Mwaĩlĩte kũnyuva asili na atongoi ma kĩla mbaĩ ndũanĩ syonthe* ila Yeova Ngai wenyu ũkũmũnenga, na no nginya masilanasye andũ na ũlũngalu. 19 Ndũkelelũkye ũsili wa katĩ, ndũkethĩwe na kyende, kana wĩtĩkĩle ĩvaki, nũndũ ĩvaki nĩyĩlindaa metho ma ala oĩ na yĩkelelũkya ndeto sya ala alũngalu. 20 Atĩĩai ũsili wa katĩ; ĩĩ, mavinda onthe tatai mũatĩĩe ũsili wa katĩ, nĩ kana mũendeee kwĩkala thayũ na mũimesya nthĩ ĩla Yeova Ngai wenyu ũkũmũnenga.

21 “Mũyaĩlĩte kũvanda mũtĩ o na wĩva wĩthĩwe mũtĩ wa ũthaithi* vakuvĩ na kĩthembeo kya Yeova Ngai wenyu kĩla mũkeseũvĩsya.

22 “O na mũikeyĩũngamĩsye kĩtuĩ kya ũthaithi, kĩndũ kĩla Yeova Ngai wenyu ũmenete.

17 “Ndũkaumĩsye Yeova Ngai waku nzaũ kana ĩlondu yĩ na thĩna o na ũmwe kana yĩ na ũndũ o na wĩva mũthũku, nũndũ kwĩka ũu kũkathatya Yeova Ngai waku.

2 “Ethĩwa mũndũũme kana mũndũ mũka nĩweethĩwa katĩ wenyu, ndũanĩ ĩmwe katĩ wa ndũa ila Yeova Ngai wenyu ũkũmũnenga, ũkwĩka kĩla kĩthũku methonĩ ma Yeova Ngai wenyu na ũkwananga ũtianĩo wake, 3 na ayelelũka na aithaitha ngai ingĩ na ayĩikumanĩa kana aikumanĩa sua kana mwei kana nguthu yonthe ya matunĩ, ũndũ ũla ndeyĩaĩte. 4 Yĩla watavwʼa ĩũlũ wa ũndũ ũsu wʼonthe kana wawĩwʼa, nĩvo ĩndĩ waĩlĩte kũũkunĩkĩla nesa. Ethĩwa nĩvaĩkĩĩthwʼa kana nĩwʼo ũndũ ũsu wa kũthatya nĩwĩkĩtwe Isilaeli, 5 no nginya umaalye mũndũũme kana mũndũ mũka ũla wĩkĩte ũndũ ũsu mũthũku nza wa mĩvĩa ya ndũa, na no nginya mũndũũme ũsu kana mũndũ mũka ũsu akimangwe na mavia akwʼe. 6 Ũla ũkũawa aĩlĩte kũawa ethĩwa ve ũkũsĩ* wa ngũsĩ ilĩ kana ngũsĩ itatũ. Ndaĩlĩte kũawa nũndũ wa ũkũsĩ wa ngũsĩ ĩmwe. 7 Moko ma ngũsĩ isu nĩmo maĩlĩte kwĩthĩwa me ma mbee kũmũaa, na moko ma andũ ala angĩ onthe maiatĩĩa. No nginya mũvetange kĩla kĩthũku katĩ wenyu.

8 “Ethĩwa ĩkoani yĩ vinya mũno kwenyu kũsilanyʼa nĩyaumĩla ndũanĩ ĩmwe katĩ wa ndũa syenyu, yĩthĩwe nĩ ĩkoani yĩkonetye kwĩtĩkya nthakame kana ĩkoani ya kĩ-mĩao yaumĩla kana kĩko kya ũngʼendu kyeekwa kana maũndũ angĩ me na ngananĩo, mwaĩlĩte kũkĩla na mũithi vala Yeova Ngai wenyu wĩnyuva. 9 Endai vala ve athembi Alivai na mũsili ũla ũkethĩwa vo mĩthenyanĩ ĩsu, na mũimakũlya, namo makaumya ũtwʼĩo. 10 Na ĩndĩ no nginya mwĩke kwosana na ũtwʼĩo ũla mamũnenga kuma vala Yeova ũnyuvĩte. Ĩthĩwai mwĩ metho mwĩke kwosana na kyonthe kĩla mamwĩaĩa. 11 No nginya mwĩke kwosana na mwĩao ũla makamwonyʼa na kwosana na ũtwʼĩo ũla makamũtangaasĩa. Mũikelelũke mũthi kwʼokonĩ kwa aũme kana kwʼokonĩ kwa aka, mũtie ũtwʼĩo ũla mamũnenga. 12 Mũndũ ũla wĩtũlasya kwa kũema kwĩthukĩĩsya mũthembi ũla ũkũthũkũma Yeova Ngai wenyu kana mũsili, no nginya akwʼe. No nginya mũvetange kĩla kĩthũku kuma Isilaeli. 13 Nĩvo ĩndĩ andũ onthe makewʼa na maikĩa, na maikethĩwa na mĩtũlyo ĩngĩ.

14 “Yĩla mwĩlika nthĩ ĩla Yeova Ngai wenyu ũkũmũnenga na mũimĩmesya na mũyĩkala nthĩnĩ wayo, na mũyasya, ‘Ekai tũnyuve mũsumbĩ ĩũlũ witũ ta mbaĩ syonthe ila itũthyũlũlũkĩte,’ 15 ũndũnĩ ũsu, vate nzika mwaĩlĩte kũnyuva mũsumbĩ ũla Yeova Ngai wenyu wĩvatha. Mwaĩlĩte kũnyuva mũsumbĩ kuma katĩ wa ana-a-ĩthe menyu. Mwĩ avate kwĩnyuvĩa mũndũ mũeni ũla ũte mwana-a-ĩthe wenyu ethĩwe mũsumbĩ wenyu. 16 Ĩndĩ o na vailye ũu, ndaĩlĩte kwĩyosea mbalasi mbingĩ kana atume andũ masyoka Misili nĩ kana akwate mbalasi ingĩ mbingangĩ, nũndũ Yeova amwĩie, ‘Mũikaaĩse kũsyokela nzĩanĩ ĩĩ.’ 17 O na ndaĩlĩte kwĩthĩwa na iveti mbingĩ, nĩ kana ngoo yake ndĩkelelũke; o na ndaĩlĩte kwĩmanthĩa vetha na thaavu mwingĩ mũno. 18 Yĩla ũkekalĩla kĩvĩla kyake kya ũsumbĩ, no nginya aumĩĩsye Mĩao ĩĩ ĩvukunĩ;* akaumĩĩsya mĩao mĩandĩke ĩla iĩtwe nĩ athembi Alivai.

19 “Aĩlĩte kwĩkalaa nayo, na no nginya amĩsomae mĩthenya yonthe ya thayũ wake, nĩ kana amanye kũmũkĩa Yeova Ngai wake na kũatĩĩaa ndeto syonthe sya Mĩao ĩĩ na myolooto ĩĩ kwa kũmĩkaa. 20 Kwoou ngoo yake ndĩkenenevya ĩũlũ wa ana-a-ĩthe, na ndakelelũka atie mwĩao ũũ, athi kwʼokonĩ kwa aũme kana kwʼokonĩ kwa aka, nĩ kana aendeee kwĩthĩwa e mũsumbĩ ũsumbĩnĩ wake kwa ĩvinda yĩasa, we na ana make katĩ wa Isilaeli.

18 “Athembi Alivai, ĩĩ, mbaĩ yonthe ya Livai, ndĩkanengwa kĩanda kana ũtiĩwa vamwe na Isilaeli. Makaya nthembo ivĩvĩtwʼe na mwaki kwondũ wa Yeova, ila nĩ ũtiĩwa wake. 2 Kwoou mayaĩlĩte kwĩthĩwa na ũtiĩwa katĩkatĩ wa ana-a-ĩthe moo. Yeova nĩwe ũtiĩwa woo, o tondũ ũmatavĩtye.

3 “Yu kĩĩ nĩkyo andũ maĩlĩte kũnenga athembi: Mũndũ ũla waumya nthembo, yĩthĩwe nĩ nzaũ kana ĩlondu, aĩlĩte kũnenga mũthembi ituo, ngambu, na ĩvu. 4 Mwaĩlĩte kũmũnenga ũsyao wa mbee wa lĩu wenyu wa mbaa ngetha, mbinyu yenyu nzaũ, mauta menyu, na wʼĩa wa mbee ũla mwatila malondu menyu. 5 Yeova Ngai wenyu nũmũnyuvĩte vamwe na ana make kuma mbaĩnĩ syenyu syonthe mathũkũmae ĩsyĩtwanĩ ya Yeova ĩvinda yonthe.

6 “Ĩndĩ ethĩwa Mũlivai nĩwauma ndũanĩ ĩmwe katĩ wa ndũa syenyu ila syĩ Isilaeli vala ũnekalaa na nĩwenda* kũthi vala Yeova ũnyuvĩte,* 7 no athũkũmĩae vau ĩsyĩtwanĩ ya Yeova Ngai wake o ta ana-a-ĩthe onthe, Alivai, ala mathũkũmĩaa vau mbee wa Yeova. 8 Akanengawe lĩu wĩanene na woo, o vamwe na kĩla wakwata athoosya malĩ ya aa-ũmae make.

9 “Yĩla mũkalika nthĩ ĩla Yeova Ngai wenyu ũkũmũnenga, mũikemanyĩsye kũatĩĩa imanyĩo sya kũthatya sya mbaĩ isu. 10 Vaikoneke nthĩnĩ wenyu mũndũ ũkũvĩtĩlya mwana wake kana mwĩĩtu wake mwakinĩ, mũndũ o na wĩva ũkwaũsya, mũndũ o na wĩva ũkwĩka syama sya ũwe, mũndũ o na wĩva ũkũmantha maũndũ meũmwonyʼa ĩũlũ wa ĩvinda yũkĩte, mũoi, 11 mũndũ o na wĩva ũla wovaa angĩ na syama sya ũwe, mũndũ o na wĩva ũla ũneenanasya na maveva kana ũla wĩ na mavinya ma kũvuanyʼa ĩvinda yũkĩte, kana mũndũ o na wĩva ũla ũkũlasya ĩũlũ wa akwʼũ. 12 Nĩkwĩthĩwa mũndũ ũla wĩkaa maũndũ asu nũmũthatasya Yeova, na nũndũ wa imanyĩo isu sya kũthatya Yeova Ngai wenyu nũkũlũngya mbaĩ isu syume mbee wenyu. 13 Mwaĩle kũĩkĩĩthya kana mũiweteka ũthũku mbee wa Yeova Ngai wenyu.

14 “Nĩkwĩthĩwa mbaĩ ii ila mũkwosa nthĩ yoo nĩsyethukĩĩasya ala meekaa syama sya ũwe na ala maũasya, ĩndĩ Yeova Ngai wenyu ndamwĩtĩkĩlĩtye mwĩke ũndũ o na ũmwe ta ũsu. 15 Yeova Ngai wenyu akamũkĩlĩlya mwathani ũilye takwa kuma ana-a-ĩthenĩ menyu. No nginya mũmwĩthukĩĩsye. 16 Nũndũ ũu nĩwʼo mwakũlilye Yeova Ngai wenyu mwĩ Olevu ũla mũthenya wa ũmbano yĩla mwaisye, ‘Ndũkaeke twĩwʼe wasya wa Yeova Ngai witũ kana twone mwaki ũũ mũnene ĩngĩ, nĩ kana tũikakwʼe.’ 17 Nĩvo ĩndĩ Yeova wambĩie, ‘Kĩla maweta nĩ kĩseo. 18 Ngamokĩlĩlya mwathani ũilye taku kuma katĩkatĩ wa ana-a-ĩthe moo, na ngeekĩa ndeto syakwa kanywʼanĩ wake, na akamatavya maũndũ onthe ala ngũmwĩaĩa. 19 Ĩĩ, ngenda mũndũ ũla ũtakethukĩĩsya ndeto syakwa ila ũkaneena ĩsyĩtwanĩ yakwa asũngĩe.

20 “‘Ethĩwa mwathani o na wĩva nĩwalikwa nĩ mĩtũlyo na aweta ndeto ndamwĩaĩe ĩsyĩtwanĩ yakwa kana aneena ĩsyĩtwanĩ ya ngai ingĩ, mwathani ũsu no nginya akwʼe. 21 Ĩndĩ, no mwasye ũũ ngoonĩ syenyu: “Tũkamanya ata kana Yeova ndanaweta ndeto ĩsu?” 22 Yĩla mwathani waneena ĩsyĩtwanĩ ya Yeova na ndeto ĩla waneena ndĩneanĩa kana ndĩnekĩka, Yeova ndananeena ndeto ĩsu. Mwathani ũsu aneena nũndũ wa mĩtũlyo. Mũyaĩlĩte kũmũkĩa.’

19 “Yĩla Yeova Ngai wenyu wĩananga mbaĩ ila Yeova Ngai wenyu ũkũmũnenga nthĩ yasyo na mũyĩthĩwa mũivetangĩte na mũkatũa ndũanĩ syasyo na nyũmbanĩ syasyo, 2 mwaĩlĩte kũvatha ndũa itatũ katĩkatĩ wa nthĩ yenyu ĩla Yeova Ngai wenyu ũkũmũnenga mũmesye. 3 Mwaĩlĩte kũaanyʼa kĩsio kya nthĩ ĩla Yeova Ngai wenyu ũkũmũnenga mũmesye ilungu itatũ, na mũiseũvya nzĩa nĩ kana mũaani o na wĩva ethĩwe atonya kũkĩĩa ndũanĩ ĩmwe katĩ wa isu.

4 “Yu ũũ nĩwʼo mũaani waĩle kwĩka nĩ kana aendeee kwĩkala thayũ yĩla wooaa mũndũ ũngĩ ate kwenda na ndanatwĩe amũmenete; 5 ta yĩla mũndũ wathi na mũndũ ũngĩ kĩthekanĩ makakolanyʼe ngũ na ayũkĩlya kw’oko kwake ateme mũtĩ na ĩthoka, ĩndĩ ĩthoka yĩu yĩisingila na yĩyuma mũtĩnĩ na yĩikima mũndũ ũsu na aikwʼa, mũaani ũsu aĩle kũkĩĩa ndũanĩ ĩmwe katĩ wa isu nĩ kana aendeee kwĩkala thayũ. 6 Aema kwĩka ũu, mũĩvanĩsya wa nthakame no amũsembany’e athatĩte mũno,* na aimũkwata, na aimũaa, nũndũ ndũa ĩsu yĩ vaasa mũno. Ĩndĩ, ndeĩaĩlĩte kũkwʼa, nĩkwĩthĩwa ndanatwĩe amenete mũndũ ũsu ũngĩ. 7 Nĩkyo kĩtumi ngũmwĩaĩa atĩĩ: ‘Vathai ndũa itatũ.’

8 “Ethĩwa Yeova Ngai wenyu nĩwathanthasya kĩsio kyenyu o tondũ weevĩtĩe aa-ũmae menyu na aimũnenga nthĩ yonthe ĩla wathanie kana akanenga aa-ũmae menyu, 9 ethĩwa mũkeethĩwa mwĩ aĩkĩĩku na mũiatĩĩa mwĩao ũũ wʼonthe ũla ngũmũnenga ũmũnthĩ, mũmwende Yeova Ngai wenyu na mavinda onthe mũiendaa nzĩanĩ syake, nĩvo ĩndĩ mũkongela ndũa ingĩ itatũ ndũanĩ ii itatũ. 10 Na kwoou vai nthakame ĩte ĩvĩtyo ĩketĩkwʼa nthĩ yenyu ĩla Yeova Ngai wenyu ũkũmũnenga yĩthĩwe ũtiĩwa, na mũikethĩwa na ĩvĩtyo ya kwĩtĩkya nthakame.

11 “Ĩndĩ ethĩwa mũndũ nũnamenete mũndũ ũngĩ na anatwĩe amwovetye amũvithũkĩe na aimũũmĩsya* mũno na aikwʼa, na mũndũ ũsu aikĩĩa ndũanĩ ĩmwe katĩ wa isu, 12 nĩvo ĩndĩ atumĩa ma ndũa yake maĩlĩte kũmwĩta kuma vau na maimũnengane mokonĩ ma mũĩvanĩsya wa nthakame, na no nginya akwʼe. 13 Mũyaĩlĩte* kũmwĩwʼĩa tei, na no nginya mũvetange ĩvĩtyo ya kwĩtĩkya nthakame ĩte ĩvĩtyo kuma Isilaeli, nĩ kana maũndũ menyu mathi nesa.

14 “Yĩla mũkakwata ũtiĩwa wenyu nthĩ ĩla Yeova Ngai wenyu ũkũmũnenga mũmesye, mũikaakũĩĩsye mũvaka wa mũtũi wenyu mũwumye vala aa-ũmae menyu meekĩie mĩvaka.

15 “Ngũsĩ ĩmwe ndyaĩle kũtuma mũndũ asilĩlwa* nũndũ wa ĩvĩtyo o na yĩva kana naĩ o na yĩva ũtonya kwĩthĩwa ekĩte. Ũndũ ũsu waĩlĩte kũĩkĩĩthwʼa nĩ ũkũsĩ* wa ngũsĩ ilĩ kana ũkũsĩ wa ngũsĩ itatũ. 16 Ethĩwa ngũsĩ ĩkwenda kũũmĩsya mũndũ nĩyaumya ũkũsĩ na yamũsikata nũndũ wa ĩvĩtyo ĩna, 17 aũme asu elĩ ala me na ĩkoani yĩu makaũngama mbee wa Yeova, mbee wa athembi na asili ala makethĩwa maithũkũma mĩthenyanĩ ĩsu. 18 Asili makakunĩkĩla ũndũ ũsu nesa, na ethĩwa mũndũ ũla waumya ũkũsĩ nĩ ngũsĩ ya ũvũngũ na asikatĩa mwana-a-ĩthe ũvũngũ, 19 mwaĩlĩte kũmwĩka o ũndũ eĩsamĩte kwĩka mwana-a-ĩthe, na no nginya mũvetange kĩla kĩthũku katĩ wenyu. 20 Ala makatiala makeewʼa na maikĩa, na maikeka ĩngĩ nongi ũndũ o na wĩva ũthũkĩte ta ũsu katĩ wenyu. 21 Mũyaĩlĩte* kũmwĩwʼĩa tei: Thayũ ũkaĩvwa kwa thayũ, itho kwa itho, ĩeo kwa ĩeo, kw’oko kwa kw’oko, kũũ kwa kũũ.

20 “Ethĩwa nĩmwathi kaũnĩ kũkita na amaitha menyu na mũyona kana mbalasi syoo na makasya moo ma kaũ na ita syoo sya asikalĩ nĩ mbingĩ mũno kwĩ syenyu, mũikamakĩe, nũndũ Yeova Ngai wenyu ũla wamumisye nthĩ ya Misili e vamwe nenyu. 2 Mũkilyĩ kũlika kaũnĩ, mũthembi aĩlĩte kũthengeea na aineena na andũ. 3 Aĩlĩte kũmatavya, ‘Ĩwʼai, inywʼĩ Aisilaeli, mwĩ vakuvĩ kũkita na amaitha menyu. Mũikatũlĩke ngoo. Mũikakĩe kana kũtelema kana kũtetema nũndũ woo, 4 nũndũ Yeova Ngai wenyu aendanĩtye nenyu okite amaitha menyu na aimũtangĩĩa.’

5 “O na ĩngĩ, anene maĩlĩte kũtavya andũ atĩĩ, ‘Nũũ wakĩte nyũmba nzaũ na ndanamba kũmĩlika? Ekai asyoke nyũmbanĩ yake. Aema kwĩka ũu, nũtonya kũkwʼĩĩa kaũnĩ na mũndũ ũngĩ aimĩlika. 6 Na nũũ ũvandĩte mũũnda wa mĩsavivũ na ndanambĩĩa kũya ũsyao wawʼo? Ekai athi na aisyoka mũsyĩ kwake. Nũndũ aema kwĩka ũu, nũtonya kũkwʼĩĩa kaũnĩ na mũndũ ũngĩ ayambĩĩa kũya ũsyao wawʼo. 7 Na nũũ wĩvaĩtye mũndũ mũka na ndanamba kũmũtwaa? Ekai athi na aisyoka mũsyĩ kwake. Nũndũ aema kwĩka ũu nũtonya kũkwʼĩĩa kaũnĩ na mũndũũme ũngĩ aimũtwaa.’ 8 O na ĩngĩ, anene asu maĩlĩte kũkũlya andũ, ‘Nũũ wĩ na wia na ũtũlĩkĩte ngoo? Aĩlĩte kũsyoka mũsyĩ kwake, nĩ kana ndakatume ana-a-ĩthe make matũlĩka ngoo o take.’* 9 Anene mamina kũneena na andũ, maĩlĩte kũnyuva anene ma ita matongoesye andũ.

10 “Ethĩwa nĩmwathengeea ndũa mũkite nayo, mwaĩlĩte kũmĩtangaasĩa maũndũ ala mwaĩle kwĩka mwĩwʼane. 11 Ethĩwa nĩmamũnenga ũsũngĩo wa mũuo na nĩmamũvingũĩa mĩomo, andũ onthe ala meethĩwa vau makatwʼĩka menyu kwondũ wa wĩa wa kũlasimĩthwʼa, na makamũthũkũmaa. 12 Ĩndĩ ethĩwa nĩyalea kwĩwʼana nenyu na vandũ va ũu ĩyambĩĩa kũkita nenyu, mwaĩlĩte kũmĩthyũlũlũka, 13 na vate nzika, Yeova Ngai wenyu akamĩnengane mokonĩ menyu, na no nginya mũae na ũvyũ kĩla mũndũũme wĩ ndũanĩ ĩsu. 14 Ĩndĩ o na ũu wĩ o vo, no mwĩyosee aka, syana, indo, na kyonthe kĩla kĩ ndũanĩ ĩsu, mũtavo wayo wʼonthe, na mũkaya mũtavo wa amaitha menyu, ũla Yeova Ngai wenyu ũmũnengete.

15 “Ũu nĩwʼo mũkekana na ndũa syonthe ila syĩ vaasa vyũ nenyu ila ite sya ndũa sya mbaĩ ii syĩ vakuvĩ nenyu. 16 Ĩndĩ ndũanĩ sya ngo ii sya andũ, ila Yeova Ngai wenyu ũkũmũnenga syĩthĩwe ũtiĩwa, mũikaeke mũndũ o na ũmwe ekale* thayũ. 17 Vandũ va ũu, mwaĩlĩte kũmananga vyũ, Aititi, Aamoli, Akanaanĩ, Avelisi, Aivi, na Ayevusi, o tondũ Yeova Ngai wenyu ũmwĩaĩe; 18 nĩ kana iikamũmanyĩsye kũatĩĩa syĩthĩo syoo syonthe sya kũthatya ila mbaĩ isu syĩkaa ngai syoo, na iituma mũmũvĩtĩsya Yeova Ngai wenyu.

19 “Ethĩwa nĩmwathyũlũlũka ndũa nĩ kana mũmĩkwate na mwĩthĩĩtwe mũyũkita nayo mĩthenya mingĩ, mũyaĩlĩte kwananga mĩtĩ yayo kwa kũmĩtema na ĩthoka. No mũye ũsyao wayo, ĩndĩ mũyaĩlĩte kũmĩtema. Yo nĩmwaĩlĩte kũthyũlũlũka mũtĩ wa kĩthekanĩ o ũndũ mũtonya kũthyũlũlũka mũndũ? 20 No mwanange mũtĩ o ũla mwĩsĩ ndũtũmĩawa kwondũ wa lĩu. No mũũteme na mũyaka wiio wa kũthyũlũlũka ndũa ĩla ĩkũkita nenyu, nginya ĩvalũke.

21 “Ethĩwa mũndũ nĩweethĩwa oaĩwe kĩthekanĩ nthĩ ĩla Yeova Ngai wenyu ũkũmũnenga mũmesye na vayĩsĩkĩe nũũ ũmũaie, 2 atumĩa menyu na asili maĩlĩte kumaala na maithima ũasa wa kuma vau ve mwĩĩ ũsu mũkwʼũ nginya ndũanĩ ila iũthyũlũlũkĩte. 3 Nĩvo ĩndĩ atumĩa ma ndũa ĩla yĩ vakuvĩ vyũ na mwĩĩ ũsu maĩlĩte kwosa moi* ĩtaaĩsa kũthũkũmĩthwʼa kuma ndĩthyanĩ, ĩla ĩtaaĩsa kũkusya ĩsoki, 4 na atumĩa ma ndũa ĩsu maĩlĩte kũinga moi ĩsu* na maimĩtwaa mwandanĩ* ũvĩtĩtye kĩwʼũ ũla ũte mũĩme kana ũkavandwa mbeũ, na maĩlĩte kũmĩtũlĩla ngingo mwandanĩ ũsu.

5 “Na athembi Alivai, makathengeea nũndũ Yeova Ngai wenyu nũmanyuvĩte mamũthũkũmae, matangaase moathimo ĩsyĩtwanĩ ya Yeova. Makatangaasa ũndũ kĩla ngananĩo ikonetye ũngʼendu syaĩlĩte kũminwa. 6 Na ĩndĩ atumĩa onthe ma ndũa ĩla yĩ vakuvĩ vyũ na mwĩĩ ũsu mũkwʼũ maĩlĩte kũthambĩa moko moo ĩũlũ wa moi* ĩla yatũlĩlwa ngingo mwandanĩ, 7 na maĩle kũtangaasa, ‘Moko maitũ mainaaĩtĩkya nthakame ĩĩ, o na metho maitũ mainaaona ĩyĩtĩkwʼa. 8 Ndũkatalĩle ĩvĩtyo andũ maku Isilaeli, ala woovoisye, ame Yeova, na ndũketĩkĩlye ĩvĩtyo ya nthakame ĩte ĩvĩtyo yĩkale katĩ wa andũ maku Isilaeli.’ Na ĩndĩ maikatalĩlwa ĩvĩtyo ya kwĩtĩkya nthakame. 9 Mweeka ũu mũkavetanga ĩvĩtyo ya nthakame ĩte ĩvĩtyo katĩ wenyu kwa kwĩka kĩla kyaĩlĩte methonĩ ma Yeova.

10 “Ethĩwa nĩmwathi kũkita na amaitha menyu na Yeova Ngai wenyu aimasinda kwondũ wenyu na mũimatava, 11 na ũyona mũndũ mũka mwanake katĩ wa ala atave na ũyendeewʼa nĩwe na ũyenda kũmwosa atwʼĩke kĩveti kyaku, 12 no ũmũete nyũmba kwaku. Na ĩndĩ aĩlĩte kwenza mũtwe wake, kũseũvya mbwaa syake, 13 na ayumya ngũa ila weekĩĩte aitavwa, na ayĩkala nyũmbanĩ yaku. Akaĩĩa inyia wake na ĩthe wake mwei mũima, na ĩtina wa ũu, no ũkome nake; ũkatwʼĩka mũũme nake akatwʼĩka kĩveti kyaku. 14 Ĩndĩ ethĩwa ndũnendeewʼa nĩwe, nĩvo ĩndĩ waĩlĩte kũmũlekya athi vala ũkwenda.* Ĩndĩ ndũtonya kũmũthoosya ũkwate mbesa kana kũmũkua naĩ, nũndũ nũmwĩkĩĩthĩtye nthoni.

15 “Ethĩwa mũndũũme e iveti ilĩ na endete kĩmwe mbee wa kĩla kĩngĩ* na syelĩ nimũsyaĩe ana na mwana ũla mũkũũ nĩ wa kĩveti kĩla kĩtendetwe, 16 mũthenyanĩ ũla ũkanenga ana make ũtiĩwa wake, ndaketĩkĩlwʼa kũkua mwana wa kĩveti kĩla kyendetwe ta we mwana ũla mũkũũ vandũ va mwana wa kĩla kĩtendetwe, ũla nĩwe mũkũũ. 17 Aĩlĩte kwonanyʼa kana mwana wa kĩveti kĩla kĩtendetwe nĩwe mwana ũla mũkũũ kwa kũmũnenga kũndũ kwĩlĩ kwa syĩndũ syonthe ila wĩ nasyo, nũndũ ũsu nĩwʼo mwambĩlĩĩlyo wa ũsyao wake. Kĩanda kya mwana ũla mũkũũ nĩ kyake.

18 “Ethĩwa mũndũ e na mwana mbaa matũ na mũlei na ndewʼaa ĩthe kana inyia, na nĩmatatĩte kũmũlũnga ĩndĩ nũleete kũmethukĩĩsya, 19 ĩthe na inyia maĩle kũmũkwata na maimũtwaa vala ve atumĩa mũvĩanĩ wa ndũa yake 20 na maitavya atumĩa ma ndũa yake, ‘Mwana ũũ witũ nĩ mbaa matũ na nĩ mũlei, na nũleaa kũtwĩwʼa. E ĩtomo na nĩ mũthengi.’ 21 Na ĩndĩ no nginya aũme onthe ma ndũa yake mamũkimange na mavia nginya akwʼe. Kwoou no nginya mũvetange kĩla kĩthũku katĩ wenyu, na Aisilaeli onthe makeewʼa na maikĩa.

22 “Ethĩwa mũndũ nĩweeka naĩ ĩkũtuma atwʼĩĩwa kũawa na nĩwooawa na nĩmwamũsũsya mũtĩnĩ, 23 mwĩĩ wake mũkwʼũ ndwaĩlĩte kwĩkala mũtĩnĩ ũtukũ wʼonthe. Vandũ va ũu, mwaĩlĩte kũĩkĩĩthya kana nĩmwamũthika mũthenya ũsu, nũndũ ũla wasũwʼa nĩ kĩndũ kĩumanĩe nĩ Ngai, na mũyaĩlĩte kũvukya nthĩ yenyu ĩla Yeova Ngai wenyu ũkũmũnenga yĩthĩwe ũtiĩwa.

22 “Ethĩwa nĩwoona nzaũ ya mwana-a-ĩthe waku kana ĩlondu yake yaĩte, ndũketwʼe ndũnayona. Vate nzika waĩlĩte kũyĩinga ũtũngĩe mwana-a-ĩthe waku. 2 Ĩndĩ ethĩwa mwana-a-ĩthe waku ndekalaa vakuvĩ naku kana ndũmwĩsĩ, waĩlĩte kũete nyamũ ĩsu mũsyĩ kwaku, na yaĩlĩte kwĩkala naku nginya mwana-a-ĩthe waku amĩmanthe. Nĩvo ĩndĩ waĩlĩte kũmũtũngĩa. 3 Ũu nĩwʼo waĩlĩte kwĩkana na ĩng’oi yake, ngũa yake, na kĩndũ o na kĩva kĩla mwana-a-ĩthe waku waasya na wakyona. Ndũketwʼe ndũnakyona.

4 “Ethĩwa nĩwoona ĩng’oi ya mwana-a-ĩthe waku kana nzaũ yake yavalũka nzĩanĩ, ndũketwʼe ndũnamyona. Vate nzika waĩlĩte kũmũtetheesya okĩlye nyamũ ĩsu.

5 “Mũndũ mũka ndaĩlĩte kwĩkĩa ngũa sya mũndũũme, o na mũndũũme ndaĩlĩte kwĩkĩa ngũa sya mũndũ mũka. Nũndũ mũndũ o na wĩva ũkwĩka ũu nĩ ũthatyo kwa Yeova Ngai wenyu.

6 “Ethĩwa nĩweethĩa ndala ya nyũnyi ũtee wa nzĩa yĩ na tũswii kana matumbĩ, yĩthĩwe yĩ mũtĩnĩ kana vandũ nthĩ, na inyia nũvwʼĩkĩĩte tũswii tũu kana akavwʼĩkĩa matumbĩ asu, ndũkosanĩsye inyia vamwe na tũswii twake. 7 Ĩkĩĩthya nĩwalekya inyia athi, ĩndĩ no wĩyosee tũswii. Ĩka ũu nĩ kana maũndũ maku mathi nesa na ũyĩkala thayũ ĩvinda yĩasa.

8 “Ethĩwa nĩwaaka nyũmba nzaũ, no nginya wake ũkũta mũkuvĩ kĩalanĩ kyaku, nĩ kana ndũkaetee mũsyĩ waku ĩvĩtyo ya kwĩtĩkya nthakame mũndũ avalũka kuma vau.

9 “Ndũkavande mĩthemba ĩlĩ ya mbeũ mũũndanĩ waku wa mĩsavivũ. Nũndũ weeka ũu, ũsyao wʼonthe ũla ũkasyawa nĩ mbeũ ila wavanda o vamwe na ũsyao wa mũũnda ũsu wa mĩsavivũ ũkeethĩwa wa vandũ vatheu.

10 “Ndũkaĩme na nzaũ na ĩng’oi syĩ vamwe.

11 “Ndũkekĩe ngũa ĩseũvĩtwʼe na w’ĩa na katane ivulanĩtwʼe vamwe.

12 “Waĩlĩte kũseũvya manyenze mĩthyanĩ ĩna ya ngũa ila ũkwĩkĩa.

13 “Ethĩwa mũndũũme nĩwatwaa mũndũ mũka na akoma nake ĩndĩ ayĩsa kwambĩĩa kũmũmena* 14 na aimũsikata kana e na mwĩkalĩle mũthũku na aimwanangĩa ĩsyĩtwa ayasya atĩĩ: ‘Nĩnoosie mũndũ mũka ũũ, ĩndĩ yĩla nakomie nake, ndyaaona ũndũ ũkũĩkĩĩthya kana ndeesĩ mũndũũme,’ 15 ĩthe na inyia wa mwĩĩtu ũsu maĩlĩte kũetee atumĩa mũvĩanĩ wa ndũa ũndũ ũkũĩkĩĩthya kana mwĩĩtu ũsu ndeesĩ mũndũũme. 16 Ĩthe wa mwĩĩtu ũsu aĩlĩte kũtavya atumĩa, ‘Nanengie mũndũũme ũũ mwĩĩtu wakwa ethĩwe kĩveti kyake, ĩndĩ nũkũmũmena* 17 na emũsikata kana e na mwĩkalĩle mũthũku, ayasya atĩĩ: “Nĩnonete kana mwĩĩtu wenyu nde na ũndũ ũkũĩkĩĩthya kana ndeesĩ mũndũũme.” Yu ũũ nĩwʼo ũĩkĩĩthyo wa kana mwĩĩtu wakwa ndeesĩ mũndũũme.’ Na ĩndĩ makatambũũkya ngũa ĩsu, ĩla nĩyo ũĩkĩĩthyo, mbee wa atumĩa ma ndũa. 18 Atumĩa ma ndũa makoosa mũndũũme ũsu na maimũkũna ivoko. 19 Makamumya vainĩ wa sekeli 100* sya vetha na mayĩinenga ĩthe wa mwĩĩtu ũsu, nũndũ mũndũũme ũsu nĩwĩkĩĩthĩtye nthoni mwĩĩtu ũtesĩ mũndũũme wa Isilaeli, na mwĩĩtu ũsu akaendeea kwĩthĩwa kĩveti kyake. Mũndũũme ũsu ndaketĩkĩlwʼa kũthasya mũtwaano nake ĩvinda yonthe yĩla wĩ thayũ.

20 “Ĩndĩ ethĩwa ũndũ ũsu ũsikatĩwe nĩ wa wʼo, na vai ũndũ ũkũĩkĩĩthya kana mwĩĩtu ũsu ndeesĩ mũndũũme, 21 maĩlĩte kũete mwĩĩtu ũsu mũomonĩ wa nyũmba ya ĩthe, na aũme ma ndũa yake maĩlĩte kũmũkimanga na mavia akwʼe, nũndũ nĩwĩkĩte ũndũ wĩ nthoni Isilaeli kwa kwĩka ũlaalai* e nyũmbanĩ ya ĩthe. Kwoou no nginya mũvetange kĩla kĩthũku katĩ wenyu.

22 “Ethĩwa mũndũũme nĩweethĩwa akomete na mũndũ mũka ũla nĩ kĩveti kya mũndũũme ũngĩ, elĩ no nginya moawe vamwe, mũndũũme ũla wakoma na mũndũ mũka ũsu o vamwe na ũ mũndũ mũka. Kwoou no nginya mũvetange kĩla kĩthũku kyume Isilaeli.

23 “Ethĩwa mwĩĩtu ũtesĩ mũndũũme nĩwĩvaĩtwʼe nĩ mũndũũme, na mũndũũme ũngĩ aikomanĩa nake ndũanĩ na aikoma nake, 24 mwaĩlĩte kũmaete elĩ mũvĩanĩ wa ndũa ĩsu na mũimakimanga na mavia, nĩkwĩthĩwa mwĩĩtu ũsu ndaneeua mbu e ndũanĩ na nĩkwĩthĩwa mũndũũme ũsu nũnekĩĩthisye nthoni kĩveti kya mũndũ ũngĩ. Kwoou no nginya mũvetange kĩla kĩthũku katĩ wenyu.

25 “Ĩndĩ, ethĩwa mũndũũme ũsu akomana na mwĩĩtu ũsu wĩvaĩtwʼe nza wa ndũa na mũndũũme ũsu amũkĩlya vinya na akoma nake, mũndũũme ũsu akooawa e weka, 26 na mũikeke mwĩĩtu ũsu ũndũ o na ũmwe. Mwĩĩtu ũsu ndaneka naĩ ĩtonya kũtuma oawa. Ũndũ ũsu ũvwʼanene na yĩla mũndũ wavithũkĩa ũngĩ na amũaa.* 27 Nĩkwĩthĩwa akomanie nake nza wa ndũa, na mwĩĩtu ũsu wĩvaĩtwʼe aua mbu, ĩndĩ vayĩĩ mũndũ wa kũmwĩtaana.

28 “Ethĩwa mũndũũme nĩwakomana na mwĩĩtu ũtesĩ mũndũũme ũla ũte mwĩvaasye na aimũkĩlya vinya na aikoma nake na maimanyĩka, 29 mũndũũme ũla wakoma nake no nginya anenge ĩthe wa mwĩĩtu ũsu sekeli 50 sya vetha, nake akatwʼĩka kĩveti kyake. Nĩkwĩthĩwa nũmwĩkĩĩthisye nthoni, mũndũũme ũsu ndaketĩkĩlwʼa kũthasya mũtwaano nake ĩvinda yonthe yĩla ũkwĩkala thayũ.

30 “Vai mũndũũme waĩlĩte kwosa kĩveti kya ĩthe, nĩ kana ndakavũthye ĩthe.*

23 “Vai mũndũũme mũvakũe kwa kũvevenzwa mee make kana mũtile ĩmutha yake ya ũsyai ũtonya kũlika ũmbanonĩ wa Yeova.

2 “Vai mwana ũsyaĩwe nza wa mũtwaano ũtonya kũlika ũmbanonĩ wa Yeova. Vai ũmwe wa nzyawa syake ũtonya kũlika ũmbanonĩ wa Yeova, o na kũvika nzyawa ya ĩkũmi.

3 “Vai Mũamimoni kana Mũmoavi ũtonya kũlika ũmbanonĩ wa Yeova. O na nginya nzyawa ya ĩkũmi, vai ũmwe wa nzyawa syoo ũtonya kwĩsa kũlika ũmbanonĩ wa Yeova, 4 nũndũ mayaamũtethya na lĩu na kĩwʼũ yĩla mwaĩ nzĩanĩ mumĩte Misili, na nĩkwĩthĩwa nĩmaĩvie Mbalaamu mwana wa Mbeoli kuma Vetholi ya Mesovotamia nĩ kana amũumanĩe.* 5 Ĩndĩ Yeova Ngai wenyu nĩwaleile kwĩthukĩĩsya Mbalaamu. Vandũ va ũu, Yeova Ngai wenyu nĩwavĩndũie kĩumo kĩu kyatwʼĩka ũathimo kwenyu, nĩkwĩthĩwa Yeova Ngai wenyu nĩwamwendete. 6 Mĩthenyanĩ yenyu yonthe, mũyaĩlĩte kũmatetheesya methĩwe na mũuo na mayaĩla.

7 “Ndũkamene Mũetomu, nũndũ nĩ mwana-a-ĩthe waku.

“Ndũkamene Mũmisili, nĩkwĩthĩwa waĩ mwĩkali wa ũeninĩ nthĩ yake. 8 Nzyawa ya katatũ ya syana ila masyaa no ĩlike ũmbanonĩ wa Yeova.

9 “Yĩla mwamba kambi mũvithũkĩe amaitha menyu, mwaĩlĩte kwĩvathana na ũndũ o na wĩva mũthũku.* 10 Ethĩwa mũndũũme nĩweethĩwa e mũvuku nũndũ wa kumwa nĩ ũsamba* ũtukũ, aĩlĩte kumaala nza wa kambi na ndakasyoke kambinĩ. 11 Twavika ĩ ya wĩoo, aĩlĩte kũthamba na kĩwʼũ, na ĩndĩ sua yĩithũa no asyoke kambinĩ. 12 Mwaĩlĩte kũvatha vandũ va kĩmbithĩ* nza wa kambi, na vau nĩ vo mwaĩlĩte kũendaa. 13 Mwaĩlĩte kwĩthĩwa na mũtĩ wa kwĩnza syĩndũnĩ syenyu. Yĩla mwasũnzũmala nza, mwaĩlĩte kwĩnza ĩima nawʼo na ĩndĩ mũivwʼĩka mai menyu. 14 Nĩkwĩthĩwa Yeova Ngai wenyu nũkũvĩtĩla kambinĩ yenyu nĩ kana amwovosye na ainengane amaitha menyu mokonĩ menyu, na no nginya kambi yenyu yĩthĩwe yĩ ntheu, nĩ kana ndakone kĩndũ o na kĩva kĩ kĩko nthĩnĩ wenyu na ayĩthyũũa aeke kũendanyʼa nenyu.

15 “Ndwaĩlĩte kũtũnga ngombo kũla kwĩ vwana wayo yĩla yasemba ĩkĩĩte vwana wayo na yooka kwaku. 16 No mwĩkalanyʼe nayo vandũ o na va vala ĩkũnyuva ndũanĩ ĩmwe katĩ wa ndũa syenyu, vala ĩkwenda. Mũikamĩthĩnyʼe.

17 “Vai ũmwe wa eĩtu ma Isilaeli waĩle kũtwʼĩka ĩlwaya ya ĩkalũ, o na vai ũmwe wa ana ma Isilaeli waĩle kũtwʼĩka ĩlwaya ya ĩkalũ. 18 Mũikaete mbesa ila syaĩvwa mũndũ mũka ĩlwaya kana mbesa ila syaĩvwa* mũndũũme ĩlwaya* nyũmbanĩ ya Yeova Ngai wenyu nĩ kana mwĩanĩsye wĩvĩto, nĩkwĩthĩwa elĩ nĩ ũthatyo kwa Yeova Ngai wenyu.

19 “Ndũkatume mwana-a-ĩthe waku aĩva ũsyao, wĩthĩwe nĩ wa mbesa, lĩu, kana kĩndũ o na kĩva kĩla kĩtonya kũete ũsyao. 20 No wĩe mũeni akũĩve ũsyao, ĩndĩ ndwaĩlĩte kwĩa mwana-a-ĩthe waku akũĩve ũsyao, nĩ kana Yeova Ngai waku akũathime wĩanĩ waku wʼonthe nthĩ ĩla ũendete kũmesya.

21 “Ethĩwa nĩweevĩtĩa Yeova Ngai waku wĩvĩto, ndũkethĩwe na kavola ka kũwĩanĩsya. Nĩkwĩthĩwa vate nzika, Yeova Ngai waku akakũandũa; waema kwĩka ũu, ũkeethĩwa wĩkĩte naĩ. 22 Ĩndĩ waema kwĩvĩta, ndũkethĩwa weeka naĩ. 23 Wĩvĩto waku nĩ nthembo ya ngenda. No nginya wĩanĩsye kĩla weevĩtĩa Yeova Ngai waku na kanywʼa waku.

24 “Ethĩwa nĩwalika mũũndanĩ wa mĩsavivũ wa mũtũi waku, no ũye nzavivũ nginya wĩanyʼe,* ĩndĩ ndwaĩlĩte kwĩkĩa nzavivũ o na imwe kĩkavũnĩ kyaku.

25 “Ethĩwa nĩwalika mũũndanĩ wa mũtũi waku wĩ na lĩu wa mbaa ngetha ũte mũkethe, no ũtwʼe iia ila mbĩu na moko maku, ĩndĩ ndwaĩlĩte kũtema lĩu ũsu wa mũtũi waku na kavyũ ke ngoto.

24 “Ethĩwa mũndũũme nĩwatwaa mũndũ mũka ĩndĩ aiema kwendeewʼa nĩwe nũndũ nĩwoona kĩndũ kĩtaĩlĩte ĩũlũ wake, no nginya amũandĩkĩe valũa wa kũthasya mũtwaano, amũnenge, na aimũeka aume kwake. 2 Auma kwake, no athi na aitwawa nĩ mũndũũme ũngĩ. 3 Ethĩwa mũndũũme ũsu wa kelĩ nĩwamũmena* na amũandĩkĩa valũa wa kũthasya mũtwaano, amũnenga, na aeka auma kwake kana ethĩwa mũndũũme ũsu wa kelĩ ũnamũtwaĩte nĩwakwʼa, 4 mũũme wake wa mbee ũla waekie athi ndaketĩkĩlwʼa kũmũtwaa ĩngĩ nũndũ nĩ mũvuku, nĩkwĩthĩwa kĩu nĩ kĩndũ kya kũmũthatya Yeova. Ndũkaete naĩ nthĩ ĩla Yeova Ngai waku ũkũũnenga ĩtwʼĩke ũtiĩwa.

5 “Ethĩwa mũndũũme no ĩndĩ ũnatwaanie, ndaĩlĩte kũthũkũma itanĩ kana kũnengwa ianda ingĩ o na syĩva. Kwa mwaka ũmwe, ndaĩlĩte kũnengwa ianda ingĩ na aĩlĩte kwĩkala mũsyĩ nĩ kana atanĩthye kĩveti kyake.

6 “Vai mũndũ waĩlĩte kwosa ĩvia ya kũthia kana nthio yayo yĩũngamĩe* kĩla wakovethany’a, nũndũ kwĩka ũu nĩ kwosa thayũ wa mũndũ* ũũngamĩe kĩla wamũkovethya.

7 “Ethĩwa mũndũ nĩweethĩwa oyĩte ũmwe* wa ana-a-ĩthe Aisilaeli na nũmũthĩnĩtye na akamũthoosya, mũndũ ũsu ũmũyĩte no nginya akwʼe. Mwaĩlĩte kũvetanga kĩla kĩthũku katĩ wenyu.

8 “Yĩla kweethĩwa na ũwau wa mangũ,* ĩthĩwai mwĩ metho mũno mwĩke kwosana na kyonthe kĩla athembi Alivai memwĩaĩa. Ĩthĩwai mwĩ metho mwĩke o ũndũ nameaĩe. 9 Lilikanai ũndũ Yeova Ngai wenyu weekie Miliamu yĩla mwaĩ nzĩanĩ mumĩte Misili.

10 “Ethĩwa nĩwakovethya mũtũi waku kĩndũ kya mũthemba o na wĩva, ndũkalike nyũmba kwake wĩyosee kĩla ũkũũnenga kĩũngamĩe kĩla wamũkovethya. 11 Waĩlĩte kũũngama nza, na mũndũ ũla wamũkovethya aĩlĩte kũkũetee nza kĩu ũkũũnenga kĩũngamĩe kĩla wamũkovethya. 12 Na ethĩwa mũndũ ũsu nĩ ngya, ndũkathi kũkoma wĩ o na kĩndũ kĩu ũkũnengie kĩũngamĩe kĩla wamũkovethya. 13 Waĩle kwĩka kyonthe kĩla ũtonya ũmũtũngĩe kĩla waũnenga kĩũngamĩe kĩla wamũkovethya sua yathũa oou, na akathi kũkoma na ngũa yake, na akakũathima; na ũkatalwa kwĩthĩwa wĩ mũlũngalu mbee wa Yeova Ngai waku.

14 “Ndũkatũmĩe ũkengani ũvene mũthũkũmi mũandĩke ũla ũthĩnaa na ngya, ethĩwe nĩ ũmwe wa ana-a-ĩthe maku kana nĩ mwĩkali wa ũeninĩ wĩ nthĩ yenyu, ndũanĩ syenyu.* 15 Waĩlĩte kũmũnenga ndĩvi yake mũthenya o ũsu, sua yĩtanathũa, nũndũ nũkũthĩna na thayũ wake wĩkwetye kĩla ũkũĩvwa. Waema kwĩka ũu, akaĩĩa Yeova nũndũ waku, na ũkeethĩwa na naĩ.

16 “Aa-ĩthe mayaĩlĩte kũawa nũndũ wa kĩla syana syoo syeeka, na syana iyaĩlĩte kũawa nũndũ wa kĩla aa-ĩthe meeka. Mũndũ aĩlĩte kũawa no ũndũ wa naĩ yake mwene.

17 “Ndũkelelũkye sila wa mwĩkali wa ũeninĩ kana mwana ũte ĩthe,* na ndũkose ngũa ya mũndũ mũka ndiwa ĩũngamĩe* kĩla wamũkovethya. 18 Lilikana kana waĩ ngombo Misili, na Yeova Ngai waku akwovosya kuma kũu. Nĩkyo kĩtumi ngũkwĩaĩa wĩke ũu.

19 “Yĩla ũũketha ngetha yaku mũũndanĩ na ũyũlwa nĩ kyove kĩmwe, ndũkakĩsyokee. Kyaĩlĩte kũtiĩwa mwĩkali wa ũeninĩ, mwana ũte ĩthe, na mũndũ mũka ndiwa, nĩ kana Yeova Ngai waku akũathime maũndũnĩ onthe ala ũkwĩka.

20 “Yĩla wathingithya* mũtĩ waku wa mũthata, ndwaĩlĩte kũthingithya mbonge syawʼo. Kĩla kyatiala kyaĩlĩte kwĩthĩwa kya mwĩkali wa ũeninĩ, mwana ũte ĩthe, na mũndũ mũka ndiwa.

21 “Yĩla ũkũmbanyʼa nzavivũ mũũndanĩ waku wa mĩsavivũ, ndũkasyoke ũkombanyʼe kĩla kyatiala. Kyaĩlĩte kũtiĩwa mwĩkali wa ũeninĩ, mwana ũte ĩthe, na mũndũ mũka ndiwa. 22 Lilikana kana waĩ ngombo nthĩ ya Misili. Nĩkyo kĩtumi ngũkwĩaĩa wĩke ũũ.

25 “Yĩla ngananĩo syaumĩla katĩ wa andũ elĩ, no mathi kũla kwĩ asili, na makamasilanyʼa na maitangaasa kana ũla mũlũngalu nde na ĩvĩtyo na ũla mũthũku e na ĩvĩtyo. 2 Ethĩwa ũsu mũthũku aĩlĩte kũkũnwa, mũsili akamwĩaĩa akome nthĩ na ĩvu, na mũndũ ũsu akakũnwa mũsili e vo. Ũtalo wa ivoko waĩlĩte kwosana na ũthũku ũla wĩkĩte. 3 No amũkũne nginya ivoko 40, ĩndĩ ndaĩlĩte kũvĩtũkya vau. Aendeea kũmũkũna ivoko mbingĩ mbee wa isu, mwana-a-ĩthe wenyu akekĩĩthwʼa nthoni methonĩ menyu.

4 “Ndũkove nzaũ mũnuka yĩla ĩkũvũa* lĩu wa mbaa ngetha.

5 “Ethĩwa aũme masyaanĩw’e mekalaa ĩmwe na ũmwe woo aikwʼa ate na kavĩsĩ, kĩveti kya ũsu wakwʼa kĩyaĩlĩte kũtwawa nĩ mũndũ ũngĩ ũte wa mũsyĩ ũsu. Mwana-a-inyia wa mũũme aĩlĩte kũthi kwakyo, akyose kĩtwʼĩke kĩveti kyake, na aikĩtwaa o ũndũ mũndũ mũka waĩlĩte kũtwawa nĩ mwana-a-inyia wa mũũme. 6 Mwana wa mbee ũla mũndũ mũka ũsu ũkasyaa akeetanĩwʼa na mwana-a-inyia ũla mũkwʼũ, nĩ kana ĩsyĩtwa yake yĩikavetangwe Isilaeli.

7 “Yu ethĩwa mũndũũme ũsu ndekwenda kũtwaa kĩveti ndiwa kya mwana-a-inyia, kĩveti kĩu ndiwa kyaĩlĩte kũthi kũla kwĩ atumĩa mũvĩanĩ wa ndũa na kĩyasya, ‘Mwana-a-inyia wa mũũme wakwa nĩwalea kũsũvĩa ĩsyĩtwa ya mwana-a-inyia andũnĩ ma Isilaeli. Ndanetĩkĩla kũndwaa o ũndũ mũndũ mũka waĩlĩte kũtwawa nĩ mwana-a-inyia wa mũũme.’ 8 No nginya atumĩa ma ndũa yake mamwĩte na maineena nake. Aendeea kwasya, ‘Ndikwenda kũmũtwaa,’ 9 nĩvo ĩndĩ kĩveti ndiwa kya mwana-a-inyia wake kĩkamũthengeea mbee wa atumĩa, kyumye kĩatũ kũũnĩ kwake, kĩmũtw’ĩle mata ũthyũ, na kĩyasya, ‘Ũu nĩwʼo mũndũũme ũla walea kwaka nyũmba ya mwana-a-inyia wake waĩle kwĩkwa.’ 10 Mũsyĩ wake* nthĩnĩ wa Isilaeli ũkeetawa ‘Nyũmba ya ũla waumiwʼe kĩatũ.’

11 “Ethĩwa aũme elĩ nĩmambĩĩa kũkita, na kĩveti kya ũmwe kĩilikĩlĩĩla nĩ kana kĩsiĩĩe mũũme ndakakũnwe nĩ mũndũũme ũsu ũngĩ na kĩitambũũkya kwʼoko kwakyo na kĩimũkwata mamutha ma kĩmbithĩ, 12 no nginya mũtile kwʼoko kwakyo. Mũyaĩlĩte kũkĩwʼĩa* tei.

13 “Ndũkethĩwe na mavia elĩ me kĩvathũkanyʼo ma kũthima mũvukonĩ waku, ĩvia ĩnene na ĩnini. 14 Ndũkethĩwe na mĩkeve ĩlĩ yĩ kĩvathũkanyʼo ya kũthima nyũmba kwaku,* mũkeve mũnene na mũnini. 15 Waĩle kwĩthĩwa na mavia ma wʼo na meanene na kĩthimo kya wʼo na kĩanene, nĩ kana wĩkale ĩvinda yĩasa nthĩ ĩla Yeova Ngai waku ũkũũnenga. 16 Nũndũ kĩla mũndũ ũte mũĩkĩĩku ũla wĩkaa maũndũ ta asu nĩ ũthatyo kwa Yeova Ngai wenyu.

17 “Lilikanai kĩla Aamaleki mamwĩkie mwĩ nzĩanĩ mumĩte Misili, 18 ũndũ mwakomanĩie namo nzĩanĩ na mavithũkĩa onthe ala maendete o kavola ĩtina wenyu yĩla mwaĩ anou na mũtaĩ na vinya. Mayaamũkĩa Ngai. 19 Yĩla Yeova Ngai wenyu ũkethĩwa amũnengete ũthũmũo kumana na amaitha menyu onthe ala mamũthyũlũlũkĩte nthĩ ĩla Yeova Ngai wenyu ũkũmũnenga yĩthĩwe ũtiĩwa mũmĩmesye, mwaĩlĩte kũtuta vyũ ũlilikano wa Aamaleki kuma ungu wa matu. Mũikaaũlwe.

26 “Yĩla mũthya mũkalika nthĩ ĩla Yeova Ngai wenyu ũkũmũnenga yĩthĩwe ũtiĩwa na mũimĩmesya na mũitũa vo, 2 mwaĩle kwosa ũsyao ũmwe wa mbee wa ngetha yonthe ya* ĩ nthĩ, ũla mũkombanyʼa kuma nthĩ yenyu ĩla Yeova Ngai wenyu ũkũmũnenga, na mũiwĩkĩa kĩkavũnĩ na mũithi vala Yeova Ngai wenyu wĩnyuva ĩsyĩtwa yake yĩkalae. 3 No nginya mũthi vala ve mũthembi ũla ũkethĩwa kwʼo mĩthenyanĩ ĩsu na mũimwĩa, ‘Ũmũnthĩ nĩnooka kũtavya Yeova Ngai waku kana nĩnalika nthĩ ĩla Yeova weevĩtĩe aa-ũmae maitũ kũtũnenga.’

4 “Nĩvo ĩndĩ mũthembi ũkosa kĩkavũ kĩu kuma kwʼokonĩ kwaku na aikia mbee wa kĩthembeo kya Yeova Ngai waku. 5 Na ĩndĩ ũkatangaasa ũũ mbee wa Yeova Ngai waku: ‘Ĩthe wakwa aĩ Mũalamu wangangaa,* na atheea Misili na ekala kwʼo ta mũeni, e na andũ avũthũ nyũmbanĩ yake. Ĩndĩ e kũu nĩwatwʼĩkie mbaĩ nene, na yĩ vinya na yĩ andũ aingĩ. 6 Na Amisili nĩmatũkuie naĩ na matũthĩnyʼa na matũthũkũmĩthya wĩa mũmũ wa ũkombo. 7 Kwoou twambĩĩa kũmũĩĩa Yeova, Ngai wa aa-ũmae maitũ, na Yeova eewʼa wasya witũ na asisya kũnyamaa kwitũ na kũthĩnwʼa kwitũ na ũndũ twavinyĩĩawa. 8 Mũthya Yeova nĩwatumisye Misili na kwʼoko kwĩ vinya na kwʼoko kũtambũũkye vamwe na meko ma kũtelemya na mawonanyʼo na syama. 9 Na ĩndĩ atũete kũũ atũnenga nthĩ ĩno, nthĩ yusũĩte ĩia na ũkĩ wa nzũkĩ. 10 Yu nĩnaete ũsyao wa mbee wa ngetha ya nthĩ ĩla Yeova ũnengete.’

“No nginya ũwie mbee wa Yeova Ngai waku na ũikumana mbee wa Yeova Ngai waku. 11 Nĩvo ĩndĩ ũkatana nũndũ wa ũseo wʼonthe ũla Yeova Ngai waku ũkũnengete vamwe na mũsyĩ waku, we na Mũlivai na mwĩkali wa ũeninĩ ũla wĩ katĩ wenyu.

12 “Yĩla wamina kumya kĩlungu kyonthe kya ĩkũmi kya ũsyao waku mwakanĩ wa katatũ, mwaka wa kĩlungu kya ĩkũmi, ũkakĩnenga Mũlivai, mwĩkali wa ũeninĩ, mwana ũte ĩthe,* na mũndũ mũka ndiwa, na makaya nginya mavũne me ndũanĩ syaku.* 13 Nĩvo ĩndĩ ũkasya mbee wa Yeova Ngai waku, ‘Nĩnĩvetete kĩlungu kĩtheu nyũmba kwakwa na ngakĩnenga Mũlivai, mwĩkali wa ũeninĩ, mwana ũte ĩthe, na mũndũ mũka ndiwa, o tondũ wambĩaĩe. Nditũlĩte kana ngavũthĩĩsya mĩao yaku. 14 Ndyaaya kĩlungu kĩmwe kyakyo ndimeta kana ngavetanga kĩlungu o na kĩmwe kyakyo nĩ mũvuku kana nganenga akwʼũ kĩlungu o na kĩmwe kyakyo. Nĩnĩthukĩĩsye wasya wa Yeova Ngai wakwa na nĩnĩkĩte maũndũ onthe ala wambĩaĩe. 15 Yu sisya nthĩ kuma wĩkalonĩ waku mũtheu, ĩtunĩ, na ũiathima andũ maku Isilaeli na nthĩ ĩla ũtũnengete, o tondũ weevĩtĩe aa-ũmae maitũ, nthĩ yusũĩte ĩia na ũkĩ wa nzũkĩ.’

16 “Ũmũnthĩ Yeova Ngai waku ekwĩaĩa wĩkae kwosana na myolooto ĩno na motwʼĩo aa. No nginya ũmaatĩĩae na ũyĩka kwosana namo na ngoo yaku yonthe na thayũ* waku wʼonthe. 17 Ũmũnthĩ Yeova nĩwamũtangaasĩa kana akatwʼĩka Ngai wenyu ethĩwa mũkaendaa nzĩanĩ syake na mũkaatĩĩaa myolooto yake, mĩao yake, na motwʼĩo make, na ethĩwa mũkethukĩĩasya wasya wake. 18 Na ũmũnthĩ nĩmwamũtangaasĩa Yeova kana mũkatwʼĩka andũ make, malĩ yake ya mwanya,* o tondũ ũmwathĩte, na mũkakwataa mĩao yake yonthe 19 na akamũtũlya ĩũlũ wa mbaĩ ila ingĩ syonthe wũmbĩte, atume mũtaĩwa na mwĩthĩwa na nguma na mũkumwʼa o mũendeee kũĩkĩĩthya kana mwĩ andũ atheu vala ve Yeova Ngai wenyu, o tondũ wathanĩte.”

27 Nĩvo ĩndĩ Mose vamwe na atumĩa ma Isilaeli meeaĩe andũ, maimea atĩĩ: “Atĩĩai kĩla mwĩao ngũmũnenga ũmũnthĩ. 2 Na mũthenya ũla mwĩinga Yolotani mũlike nthĩ ĩla Yeova Ngai wenyu ũkũmũnenga, mwĩvanga mavia manene na mũimakandĩka.* 3 Na ĩndĩ mwamina kũinga mũkaandĩka ndeto syonthe sya Mĩao ĩĩ ĩũlũ wamo, nĩ kana mũtonye kũlika nthĩ ĩla Yeova Ngai wenyu ũkũmũnenga, nthĩ yusũĩte ĩia na ũkĩ wa nzũkĩ o tondũ Yeova, Ngai wa aa-ũmae menyu, ũmwathĩte. 4 Mwainga Yolotani mwaĩlĩte kũvanga mavia asu Kĩĩmanĩ kya Evali na mũimakandĩka,* o tondũ ngũmwĩaĩa ũmũnthĩ. 5 O na ĩngĩ, mũkaakĩa Yeova Ngai wenyu kĩthembeo, kĩthembeo kya mavia. Mũyaĩlĩte kũtũmĩa mĩio ya kyũma* kũmatila. 6 Mwaĩlĩte kwaka kĩthembeo kĩu kya Yeova Ngai wenyu na mavia mate matile na mũyumĩsya Yeova Ngai wenyu nthembo sya kũvĩvwʼa ĩũlũ wakyo. 7 Mũkaumya nthembo sya ngwatanĩo na mũiya nthembo isu mwĩ vau, na mũkatana mbee wa Yeova Ngai wenyu. 8 Na mũiandĩka nesa ndeto syonthe sya Mĩao ĩĩ mavianĩ asu.”

9 Nĩvo ĩndĩ Mose na athembi Alivai maneenie na Aisilaeli onthe, mayasya atĩĩ: “Vindyai na mũyĩthukĩĩsya, inywʼĩ Aisilaeli. Ũmũnthĩ nĩmwatwʼĩka andũ ma Yeova Ngai wenyu. 10 No nginya mwĩthukĩĩsye wasya wa Yeova Ngai wenyu na mũyĩka kwosana na mĩao yake na myolooto yake, ĩla ngũmwĩaĩa ũmũnthĩ.”

11 Mũthenya ũsu Mose eeaĩe andũ, ayasya: 12 “Mbaĩ ii iatĩĩe ikaũngama Kĩĩmanĩ kya Ngelisimu iathime andũ mwainga Yolotani: Simeoni, Livai, Yuta, Isakali, Yosevu, na Mbenyamini. 13 Nasyo ii iatĩĩe ikaũngama Kĩĩmanĩ kya Evali itangaase kĩumo: Leũveni, Ngati, Aseli, Nzevuluni, Ndani, na Navitali. 14 Na Alivai makasũngĩa kĩla Mũisilaeli ũũ na wasya mũnene:

15 “‘Nĩ mũumanĩe mũndũ ũla ũseũvasya mũvwʼanano mwasũvye kana wa kyũma,* kĩndũ kĩla nĩ ũthatyo kwa Yeova, wĩa wa moko ma vundi,* na akaũvitha.’ (Na andũ onthe makasũngĩa mayasya, ‘Ameni!’*)

16 “‘Nĩ mũumanĩe mũndũ ũla ũvũthasya ĩthe kana inyia.’ (Na andũ onthe makasya, ‘Ameni!’)

17 “‘Nĩ mũumanĩe mũndũ ũla ũkũĩĩasya mũvaka wa mũtũi wake.’ (Na andũ onthe makasya, ‘Ameni!’)

18 “‘Nĩ mũumanĩe mũndũ ũla ũtumaa kĩlalinda kĩvĩtya nzĩa.’ (Na andũ onthe makasya, ‘Ameni!’)

19 “‘Nĩ mũumanĩe mũndũ ũla welelũkasya sila wa katĩ aisilĩla mwĩkali wa ũeninĩ, mwana ũte ĩthe,* kana mũndũ mũka ndiwa.’ (Na andũ onthe makasya, ‘Ameni!’)

20 “‘Nĩ mũumanĩe mũndũ ũla ũkomaa na kĩveti kya ĩthe wake, nũndũ nĩwavũthya ĩthe wake.’* (Na andũ onthe makasya, ‘Ameni!’)

21 “‘Nĩ mũumanĩe mũndũ ũla ũkomaa na nyamũ o na yĩva.’ (Na andũ onthe makasya, ‘Ameni!’)

22 “‘Nĩ mũumanĩe mũndũ ũla ũkomaa na mwĩĩtu masyaanĩwʼe, mwĩĩtu wa ĩthe wake kana mwĩĩtu wa inyia wake.’ (Na andũ onthe makasya, ‘Ameni!’)

23 “‘Nĩ mũumanĩe mũndũ ũla ũkomaa na inyia wa mũka.’ (Na andũ onthe makasya, ‘Ameni!’)

24 “‘Nĩ mũumanĩe mũndũ ũla woveeasya na ayũaa mũtũi wake.’ (Na andũ onthe makasya, ‘Ameni!’)

25 “‘Nĩ mũumanĩe mũndũ ũla wĩtĩkĩlaa ĩvaki nĩ kana oae* mũndũ ũte ĩvĩtyo.’* (Na andũ onthe makasya, ‘Ameni!’)

26 “‘Nĩ mũumanĩe mũndũ ũla ũtakaatĩĩaa ndeto sya Mĩao ĩĩ kwa kwĩka kwosana nasyo.’ (Na andũ onthe makasya, ‘Ameni!’)

28 “Na ethĩwa vate ndĩi mũkethukĩĩsya wasya wa Yeova Ngai wenyu, kwa kwĩthĩwa mwĩ metho mũatĩĩae mĩao yake yonthe ĩla ngũmwĩaĩa ũmũnthĩ, vate nzika Yeova Ngai wenyu akamũtũlya ĩũlũ wa mbaĩ ila ingĩ syonthe syĩ ĩũlũ wa nthĩ. 2 Moathimo aa onthe makooka ĩũlũ wenyu na maimũvikĩa, nũndũ nĩmũendeeaa kwĩthukĩĩsya wasya wa Yeova Ngai wenyu:

3 “Mũkaathimwa mwĩ ndũanĩ, na mũiathimwa mwĩ mĩũndanĩ.

4 “Syana syenyu ikaathimwa* o vamwe na ũsyao wa nthĩ yenyu na ũsyao wa indo syenyu, tũsaũ twenyu na tũlondu.

5 “Kĩkavũ kyenyu kĩkaathimwa o vamwe na mbakũli yenyu ya kũkimĩa* mũtu.

6 “Mũkaathimwa yĩla mwĩlikaa, na mũkaathimwa yĩla mwĩumaalaa.

7 Yeova akatuma amaitha menyu ala mamũkĩlĩlaa masindĩwa mbee wenyu. Makamũvithũkĩa kuma ngalĩko ĩmwe, ĩndĩ makasemba mamũkĩĩte mathi ngalĩko mũonza syĩ kĩvathũkanyʼo. 8 Yeova akeyĩaa ũathimo wũke makũmbĩnĩ menyu na ĩũlũ wa kĩla wĩa mũũtethya, na vate nzika akamũathima mwĩ nthĩ ĩla Yeova Ngai wenyu ũkũmũnenga. 9 Yeova akamũtwʼĩkĩthya andũ atheu kwake, o tondũ wamwĩvĩtĩe, nũndũ nĩmũendeeaa kũkwata mĩao ya Yeova Ngai wenyu na kũendaa nzĩanĩ syake. 10 Ngo syonthe sya andũ ĩũlũ wa nthĩ ikeeyonea kana mwĩtanĩawʼa na ĩsyĩtwa ya Yeova, na ikamũkĩa.

11 “Yeova akatuma mwĩthĩwa na syana mbingĩ mũno na indo mbingĩ mũno na ũsyao mwingĩ mũno wa nthĩ mwĩ nthĩ ĩla Yeova Ngai weevĩtĩe aa-ũmae menyu kũmũnenga. 12 Yeova akamũvingũĩa ĩkũmbĩ yake ĩseo, ĩtu, ausye mbua nthĩ yenyu ĩvindanĩ yĩla yaĩlĩte na aiathima kyonthe kĩla mũkwĩka. Mũkakovethya mbaĩ mbingĩ, ĩndĩ inywʼĩ ene mũikethĩwa na vata wa kũkova. 13 Yeova akamũtwʼĩkĩthya mũtwe, na ti kĩsithe; na mũkeethĩwa ĩũlũ, na ti nthĩ, ethĩwa mũkeewʼaa mĩao ya Yeova Ngai wenyu ĩla ngũmwĩaĩa ũmũnthĩ mũmĩkwatae na mũimĩka. 14 Mũikelelũkwʼe mume ndetonĩ ii syonthe ila ngũmwĩaĩa ũmũnthĩ, mũthi kwʼokonĩ kwa aũme kana kwa aka, mũatĩĩe ngai ingĩ nĩ kana mũithũkũme.

15 “Ĩndĩ ethĩwa mũikethukĩĩsya wasya wa Yeova Ngai wenyu kwa kwĩthĩwa mwĩ metho mũatĩĩe mĩao yake yonthe na motwʼĩo ala ngũmwĩaĩa ũmũnthĩ, iumo ii syonthe ikooka ĩũlũ wenyu na mũikevathana nasyo:

16 “Mũkaumanĩwa mwĩ ndũanĩ, na mũkaumanĩwa mwĩ mĩũndanĩ.

17 “Kĩkavũ kyenyu kĩkaumanĩwa o vamwe na mbakũli yenyu ya kũkimĩa* mũtu.

18 “Syana syenyu ikaumanĩwa* na ũsyao wa nthĩ yenyu na tũsaũ twenyu na tũlondu twenyu.

19 “Mũkaumanĩwa yĩla mwĩlikaa, na mũkaumanĩwa yĩla mwĩumaalaa.

20 “Yeova akamũetee kĩumo, kũvũavũana na ũsilĩlo ũndũnĩ wʼonthe ũla mũkwĩka nginya mũminwe na mũithela na mĩtũkĩ, nũndũ wa imanyĩo syenyu nthũku na nũndũ wa kũndia. 21 Yeova akatuma mowau mamwĩkwatĩla nginya amũmine vyũ mume nthĩ ĩla mũendete kwosa mũmĩmesye. 22 Yeova akamũkũna na ũwau wa kĩthũi kĩnene, ũvyũvu mwingĩ, ĩtũatũ, ndetema yĩ na ĩvyũvĩ, ũvyũ, mbaa, na mbuka; na makamũatĩĩa nginya mũthele. 23 Matu ala me ĩũlũ wa mĩtwe yenyu makeethĩwa ũthuku, na nthĩ ĩla yĩ ungu wenyu, kyũma.* 24 Yeova akatuma mbua ĩla yuaa nthĩ yenyu kuma matunĩ ĩtwʼĩka mũtutu na kĩtoo nginya mũminwe. 25 Yeova akatuma mũsindĩwa mbee wa amaitha menyu. Mũkamavithũkĩa kuma ngalĩko ĩmwe, ĩndĩ mũkasemba mũmakĩĩte mũthi ngalĩko mũonza syĩ kĩvathũkanyʼo; na mũkeethĩwa kĩndũ kya kũtelemya mosumbĩnĩ onthe ma nthĩ. 26 Na simba syenyu ikatwʼĩka lĩu wa nyũnyi syonthe sya yayaya na nyamũ ila syĩ ĩũlũ wa nthĩ, na vai mũndũ ũkatuma ikĩa ithi.

27 “Yeova akamũkũna na mĩimũ ya Misili, ũwau wa mwĩyovo, mũvũlĩkango wa makũndũ, na malaa ma kĩkonde, mowau ala mũtatonya kũvoa. 28 Yeova akamũkũna na ndũũka na mũyĩthĩwa ilalinda na mũivũavũana.* 29 Mũkathi mũvavatĩte mũthenya katĩ, o tondũ kĩlalinda kĩendaa kĩvavatĩte kĩvindunĩ, na vai ũndũ o na ũmwe mũkeka ũkaĩla; na mũkatindĩaa kũvenwa na ũkengani na kũvutwa, na vai mũndũ o na ũmwe ũkamũtangĩĩa. 30 Ũkeevaasya mũndũ mũka, ĩndĩ mũndũũme ũngĩ akamũvukya. Ũkaaka nyũmba, ĩndĩ ndũkatũa nthĩnĩ wayo. Ũkavanda mũũnda wa mĩsavivũ, ĩndĩ ndũkambĩĩa kũya ũsyao wawʼo. 31 Nzaũ yaku ĩkathĩnzĩwa mbee wa metho maku, ĩndĩ ndũkaya nyama o na ĩmwe yayo. Ĩngʼoi yaku yĩkooywa ũyene, ĩndĩ ndũkayĩtũngĩwa. Ĩlondu yaku yĩkanengwa amaitha maku, ĩndĩ ndũkethĩwa na wa kũũtangĩĩa. 32 Ana maku na eĩtu maku makanengwa andũ angĩ o ũsyaĩĩsye, na mavinda onthe ũkeethĩawa na mea ma kũmona, ĩndĩ moko maku maikethĩwa na vinya wa kwĩka ũndũ o na ũmwe. 33 Ũsyao wa nthĩ yaku na kyonthe kĩla ũkakwataa kĩkaĩsawa nĩ andũ ũtamesĩ, na mavinda onthe ũkavenawa na ũkengani na ũkavinyĩĩawa. 34 Ũkakwatwa nĩ ndũũka nũndũ wa maũndũ ala metho maku makona.

35 “Yeova akakũna mau menyu na maaũ menyu na mĩimũ yĩ woo na ĩtavoaa, kuma nyaaĩ sya maaũ menyu nginya lolotya wa mĩtwe yenyu. 36 Yeova akamũlũngya inywʼĩ na mũsumbĩ ũla mũkaia ĩũlũ wenyu mũthi mbaĩnĩ ĩla inywʼĩ mũtamĩsĩ na ĩla aa-ũmae menyu mateesĩ, na mwĩ kũu mũkathũkũma ngai ingĩ, ngai sya mbwaũ na sya mavia. 37 Na mũkatwʼĩka kĩndũ kya kũtelemya na kya kũvũthwʼa,* na kĩndũ kya kũthekeewa ngonĩ syonthe sya andũ ila Yeova ũkamũlũngya mũthi.

38 “Mũkavanda mbeũ mbingĩ mũũndanĩ, ĩndĩ mũkaketha o tũnini, nũndũ ngie ikaiya. 39 Mũkavanda mĩũnda ya mĩsavivũ na mũimĩĩmĩa, ĩndĩ mũikanywʼa mbinyu o na ĩmwe na vai kĩndũ mũkaketha, nũndũ iinyũ ikamĩya. 40 Mũkeethĩwa na mĩtĩ ya mĩthata kĩsionĩ kyenyu kyonthe, ĩndĩ mũikevaka mauta o na amwe, nũndũ ũsyao wa mĩthata yenyu ũketĩka. 41 Mũkasyaa ana na eĩtu, ĩndĩ maikaendeea kwĩthĩwa menyu, nũndũ makatavwa. 42 Ikundi sya ngie ikausũa* mĩtĩnĩ yenyu yonthe na ũsyaonĩ wa nthĩ yenyu. 43 Mwĩkali wa ũeninĩ ũla wĩ katĩ wenyu akaendeea kwambata mũno vyũ ĩũlũ wenyu, nenyu mũkaendeea kũtheea nthĩ mũno na mũno. 44 Akamũkovethya, ĩndĩ inywʼĩ mũikamũkovethya. Akatwʼĩka mũtwe ĩndĩ inywʼĩ mũkatwʼĩka kĩsithe.

45 “Vate nzika, iumo ii syonthe ikooka ĩũlũ wenyu na iimũatĩĩa na iimũkwata nginya mũminwe, nũndũ mũyaaĩthukĩĩsya wasya wa Yeova Ngai wenyu kwa kũkwata mĩao yake na motwʼĩo make ala wamwĩaĩe. 46 Na ikaendeea kũmũkwata inywʼĩ na nzyawa syenyu ta wonanyʼo na ũndũ wa kũsengyʼa wa ĩvinda yonthe, 47 nũndũ mũyaamũthũkũma Yeova Ngai wenyu mwĩ atanu na mwĩ na mũyo ngoonĩ yĩla mwaĩ na syĩndũ singĩvĩte ũu sya kĩla mũthemba. 48 Yeova akatũma amaitha menyu ĩũlũ wenyu, na mũkamathũkũma mwĩ na nzaa na waũni na mwĩ atwʼĩkĩe na mũte na kĩndũ o na kĩmwe. Akailĩĩla ĩsoki ya kyũma* ngingonĩ syenyu nginya amũmine.

49 “Yeova akatũma mbaĩ ya vaasa ĩmũvithũkĩe, kuma mũthya wa nthĩ; ĩkamũthanyũkĩa ta ndiũ, mbaĩ ĩla mũtakaelewa kĩthyomo kyayo, 50 mbaĩ mbai ĩla ĩtakona andũ akũũ ta kĩndũ kana kwĩwʼĩa amũika tei. 51 Makaya ũsyao wa indo syenyu na ũsyao wa nthĩ yenyu nginya mũminwe. Maikamũtialĩlya lĩu o na ũmwe wa mbaa ngetha, mbinyu nzaũ kana mauta, tũsaũ kana tũlondu nginya mamwanange. 52 Makamũthyũlũlũka, mamũvingĩe ndũanĩ syenyu syonthe* kĩla vandũ nthĩ yenyu nginya ndũa syenyu ndũlu na ndũmu ila mwĩkwatĩtye ivalũke. Ĩĩ, vate nzika, makamũthyũlũlũka mwĩ ndũanĩ syenyu syonthe kĩla vandũ nthĩ yenyu ĩla Yeova Ngai wenyu ũmũnengete. 53 Nĩvo ĩndĩ mũkalasimĩka kũya syana syenyu,* nyama ya ana menyu na eĩtu menyu ala Yeova Ngai wenyu ũmũnengete, nũndũ wa kũthyũlũlũkwa na kũtwʼĩkanĩwʼa mũno na mathĩna maingĩ ala mũmaitha wenyu ũkamũetee.

54 “O na mũndũũme ũla mũuu vyũ na ũkiakiasya angĩ katĩ wenyu ndakewʼĩa tei mwana-a-ĩthe kana kĩveti kyake kĩla wendete kana ana make ala matiele, 55 na ndakaana namo nyama o na ĩmwe ya ana make ĩla ũkaya, nĩkwĩthĩwa ndakethĩwa na kĩndũ kĩngĩ o na kĩva nũndũ wa kũthyũlũlũkwa na kũtwʼĩkanĩwʼa mũno na nũndũ wa mathĩna maingĩ ala mũmaitha wenyu ũkaete ndũanĩ syenyu. 56 Na mũndũ mũka ũla mũuu na ũkiakiasya angĩ katĩ wenyu ũla o na ũtesa kũsũanĩa kũkinya nthĩ na ũnyaaĩ wa kũũ kwake nũndũ nĩmũnanyʼe mũno ndakewʼĩa tei mũũme wake ũla wendete kana kĩvĩsĩ kyake kana mwĩĩtu wake, 57 o na kyonthe kĩla kyumaa mwĩĩnĩ wake ĩtina wa kũsyaa na ana ala ũsyaaa, nĩkwĩthĩwa akamaya evithĩte nũndũ wa kũthyũlũlũkwa na kũvinganĩwʼa mũno na nũndũ wa mathĩna maingĩ ala mũmaitha wenyu ũkaete ndũanĩ syenyu.

58 “Ethĩwa mũikethĩwa mwĩ metho mũatĩĩe ndeto syonthe sya Mĩao ĩĩ ila iandĩkĩtwe ĩvukunĩ yĩĩ na mũikakĩa ĩsyĩtwa yĩu ĩtheu na ya kũkĩwa na kũnengwa ndaĩa, ya Yeova Ngai wenyu, 59 Yeova akamũetee inywʼĩ vamwe na ũsyao wenyu mokũno mathũku mũno, manene na mateũthela, na mowau mathũku mũno na mateũvoa. 60 Akamũetee ĩngĩ mowau onthe ma Misili ala mwakĩaa, na vate nzika mũikavoa. 61 O na ĩngĩ, Yeova akamũetee kĩla mũthemba wa ũwau kana ũkũno ũla ũtaandĩkĩtwe ĩvukunĩ ya Mĩao ĩĩ nginya mũminwe. 62 O na kau nĩmũtwʼĩkĩte aingĩ mũno ta ndata sya matunĩ, no avũthũ katĩ wa ũtalo wenyu makatiala, nũndũ mũyaaĩthukĩĩsya wasya wa Yeova Ngai wenyu.

63 “Na o tondũ ĩvindanĩ yĩmwe Yeova wendeeawʼa nĩ kũtuma mwaĩla na mwingĩva, nowʼo Yeova ũkendeewʼa nĩ kũmwananga na kũmũmina; na mũkavetangwa vyũ nthĩ ĩla mũkilyĩ kũmesya.

64 “Yeova akamũnyaĩĩkya katĩ wa mbaĩ syonthe, kuma mũthya ũmwe wa nthĩ nginya mũthya ũla ũngĩ wa nthĩ, na mwĩ kũu mũkalasimĩka kũthaitha ngai sya mbwaũ na sya mavia, ila inywʼĩ mũtesĩ na aa-ũmae menyu mateesĩ. 65 Mũikethĩwa na mũuo mwĩ katĩ wa mbaĩ isu kana vandũ va kũthũmũsya nyaaĩ sya maaũ menyu. Vandũ va ũu, mwĩ kũu Yeova akamũnenga ngoo yĩ na kĩũũyũ na metho manou na mũitũlĩka ngoo.* 66 Thayũ wenyu ũkeethĩwa mũisyonĩ mũnene, na mũkakĩaa ũtukũ na mũthenya; na mũikethĩwa mwĩsĩ nesa kana nĩmũkũendeea kwĩkala thayũ. 67 Kwakya mũkaasya, ‘Keka no ĩ ya wĩoo!’ na ĩ ya wĩoo mũkaasya, ‘Keka no kwakya!’ nũndũ wa wia ũla mũkethĩwa nawʼo ngoonĩ syenyu na nũndũ wa kĩla metho menyu makona. 68 Na vate nzika Yeova akamũtũnga Misili na meli, mwĩsĩlĩte nzĩa ĩla namũtavisye, ‘Mũikamyona ĩngĩ nongi,’ na mwĩ kũu mũkalasimĩka kwĩthoosya kwa amaitha menyu mwĩthĩwe aũme ngombo na aka ngombo, ĩndĩ vai mũndũ ũkamũthooa.”

29 Ii nĩsyo ndeto sya ũtianĩo ũla Yeova weeaĩe Mose atianĩe na Aisilaeli me nthĩ ya Moavi, eka ũtianĩo ũla watianĩĩte namo me Olevu.

2 Nĩvo ĩndĩ Mose weetie Aisilaeli onthe na amea atĩĩ: “Nĩmwonete maũndũ onthe ala Yeova weekie mbee wa metho menyu nthĩ ya Misili vala ve Valao na athũkũmi make onthe na nthĩ yake yonthe, 3 mosilĩlo* manene ala mwoonie na metho menyu, ala mawonanyʼo manene na syama. 4 Ĩndĩ o na kũvika ũmũnthĩ, Yeova ndamũnengete ngoo ya kũelewa na metho ma kwona na matũ ma kwĩwʼa. 5 ‘Yĩla namũtongoeasya weũnĩ myaka 40, ngũa ila mweekĩaa iyaatwʼĩka na iatũ ila mweekĩaa iyaatwʼĩka. 6 Mũyaaya mũkate, na mũyaanywʼa mbinyu kana kĩndũ o na kĩva kĩtonya kũtuma mũmilwa, nĩ kana mũmanye kana ninyie Yeova Ngai wenyu.’ 7 Mũthya nĩmwesie kũvika vaa, na Sioni mũsumbĩ wa Esivoni na Oku mũsumbĩ wa Mbasani maumaala mokite naitũ, ĩndĩ twamasinda. 8 Ĩtina nĩtwoosie nthĩ yoo na twamĩnenga Aleũveni, Angati, na nusu ya mbaĩ ya Manase, yĩthĩwe ũtiĩwa woo. 9 Kwoou, atĩĩai ndeto sya ũtianĩo ũũ na mũisyĩwʼa, nĩ kana maũndũ onthe ala mũkwĩka mathi nesa.

10 “Ũmũnthĩ inywʼonthe nĩmũũngamĩte mbee wa Yeova Ngai wenyu, aũngamĩi ma mbaĩ syenyu, atumĩa menyu, anene menyu, kĩla mũndũũme wa Isilaeli, 11 syana syenyu, iveti syenyu, na mwĩkali wenyu wa ũeninĩ ũla wĩ kambinĩ yenyu, kuma ũla ũmunĩaa ngũ kũvika ũla ũmũutĩaa kĩwʼũ. 12 Mwĩ vaa nĩ kana mũlike ũtianĩonĩ wa Yeova Ngai wenyu na wĩvĩtonĩ wake, ũla Yeova Ngai wenyu ũkũtianĩa nenyu ũmũnthĩ 13 nĩ kana ũmũnthĩ amũtwʼĩkĩthye andũ make na nĩ kana ethĩwe Ngai wenyu, o tondũ ũmwathĩte na o tondũ weevĩtĩe aa-ũmae menyu, Avalaamu, Isaka, na Yakovo.

14 “Yu ndiũtianĩa ũtianĩo ũũ na wĩvĩto ũũ nenyu mwĩ inywʼoka, 15 ĩndĩ nĩ vamwe na ala maũngamĩte naitũ vaa ũmũnthĩ mbee wa Yeova Ngai witũ na vamwe na ala mate naitũ vaa ũmũnthĩ. 16 (Nĩkwĩthĩwa nĩmwĩsĩ nesa ũndũ twekalaa nthĩ ya Misili na ũndũ twavĩtĩlile katĩkatĩ wa mbaĩ syĩ kĩvathũkanyʼo twĩ kyalonĩ kitũ. 17 Na nĩmwoonaa syĩndũ syoo sya kũthatya na mĩvwʼanano yoo ya kũthatya* ya mbwaũ na mavia, vetha na thaavu, ĩla yaĩ katĩ woo.) 18 Ĩthĩwai mwĩ metho nĩ kana vaikethĩwe mũndũũme kana mũndũ mũka, mũsyĩ kana mbaĩ katĩ wenyu ũmũnthĩ ĩla ngoo yayo ĩkũmwelelũkya ĩmumye vala ve Yeova Ngai witũ nĩ kana ĩkathaithe ngai sya mbaĩ isu, na nĩ kana vaikethĩwe mwĩi katĩ wenyu ũũsyaa ũsyao wĩ sumu na mũtĩ wĩ ũũ.

19 “Ĩndĩ ethĩwa mũndũ akeewʼa ndeto sya wĩvĩto ũũ na ayĩnenevya ngoonĩ yake, ayasya, ‘Ngeethĩwa na mũuo, o na kau nĩendeea kũkinyĩla nzĩanĩ sya ngoo yakwa mwene,’ na kwoou ayananga maũndũ onthe ala me* nzĩanĩ yake, 20 Yeova ndakethĩwa eyũmbanĩtye kũmũekea. Vandũ va ũu, ũthatu mwingĩ wa Yeova ũkakanĩa mũndũ ũsu, na vate nzika kĩumo kyonthe kĩla kĩandĩkĩtwe ĩvukunĩ yĩĩ kĩkamũkwata, na vate ndĩi Yeova akavuta ĩsyĩtwa yake kuma ungu wa matu. 21 Nĩvo ĩndĩ Yeova ũkamũvatha amumye mbaĩnĩ syonthe sya Isilaeli nĩ kana akwatwe nĩ mũisyo kwosana na kĩumo kyonthe kya ũtianĩo ũla ũandĩkĩtwe ĩvukunĩ yĩĩ ya Mĩao.

22 “Yĩla nzyawa ya ĩvinda yĩla yũkĩte ya ana menyu na mũeni kuma nthĩ ya vaasa makona mokũno ma ĩ nthĩ, mathĩna ala Yeova ũetete ĩũlũ wayo, 23 mũvĩlĩtĩ na mũnyũ na kũvya, na kwoou wĩthĩe nthĩ yayo yonthe ndĩkavandwa kana kũmea, o na vai mũmea o na wĩva ũkamea vo, o ta kũngʼuthũlwa kwa Sotomo na Ngomola, Atima na Nzevoiimu, ila Yeova wangʼuthũlile ũthatunĩ wake na ũthilĩkunĩ wake, 24 mo na mbaĩ syonthe ikasya, ‘Nĩkĩ Yeova weekie nthĩ ĩĩ ũũ? Nĩ kyaũ kyatumie ethĩwa na ũthatu ũũ mwingĩ, na wakanĩte ũu?’ 25 Nĩvo ĩndĩ makasya, ‘Nĩkwĩthĩwa nĩmatiie ũtianĩo wa Yeova, Ngai wa aa-ũmae moo, ũla watianĩie namo amaumya nthĩ ya Misili. 26 Ĩndĩ nĩmaendie na mathũkũma ngai ingĩ na maikumanĩa, ngai ila mateesĩ na ila ũtametĩkĩlĩtye kũthaitha.* 27 Nĩvo ĩndĩ ũthatu wakanĩte wa Yeova wookie nthĩ ĩsu kwa kũmĩetee kĩumo kyonthe kĩla kĩandĩkĩtwe ĩvukunĩ yĩĩ. 28 Na kwoou Yeova amakũa kuma mũthanganĩ woo e na ũthatu na ũthilĩku na woo mwingĩ na amatwaa nthĩ ĩngĩ, vala maĩ ũmũnthĩ.’

29 “Maũndũ ala mavithe nĩ ma Yeova Ngai witũ, ĩndĩ maũndũ ala mavuanyʼe nĩ maitũ na ma nzyawa sitũ tene na tene, nĩ kana twĩkae kwosana na ndeto syonthe sya Mĩao ĩĩ.

30 “Yĩla ndeto ii syonthe ikeanĩa kwenyu, moathimo na kĩumo kĩla naia mbee wenyu, na mũyĩililikana* mwĩ mbaĩnĩ syonthe ila Yeova Ngai wenyu ũmũnyaĩĩkĩtye, 2 na mũisyokea Yeova Ngai wenyu na mũyĩthukĩĩsya wasya wake kwosana na kyonthe kĩla ngũmwĩaĩa ũmũnthĩ, inywʼĩ na ana menyu, na ngoo yenyu yonthe na thayũ* wenyu wʼonthe, 3 nĩvo ĩndĩ Yeova Ngai wenyu ũkatũnga andũ menyu ala atave na aimewʼĩa tei na aimũmbanyʼa ĩngĩ kuma ngonĩ syonthe sya andũ kũla Yeova Ngai wenyu ũmũnyaĩĩkĩtye. 4 O na ethĩwa andũ menyu manyaĩĩkĩtwʼe kũvika mũthyanĩ wa matu, kuma kũu Yeova Ngai wenyu akamũmbanyʼa na aimũtũnga. 5 Yeova Ngai wenyu akamũtũnga nthĩ ĩla aa-ĩthe menyu moosie na mamĩmesya, na mũkamĩmesya; na akatuma mwaĩla na aimwingĩvya kwĩ aa-ĩthe menyu. 6 Yeova Ngai wenyu akathesya* ngoo yenyu na ngoo ya ũsyao wenyu, nĩ kana mũmwende Yeova Ngai wenyu na ngoo yenyu yonthe na thayũ* wenyu wʼonthe na nĩ kana mwĩkale thayũ. 7 Nĩvo ĩndĩ Yeova Ngai wenyu wĩetee amaitha menyu, ala mamũmenie na mamũthĩnyʼa iumo ii syonthe.

8 “Na ĩndĩ mũkasyoka na mũyĩthukĩĩsya wasya wa Yeova na mũyĩatĩĩa mĩao yake yonthe ĩla ngũmwĩaĩa ũmũnthĩ. 9 Yeova Ngai wenyu akatuma mwaĩla mũno wĩanĩ wʼonthe wa moko menyu, akaingĩvya syana syenyu na indo syenyu na ũsyao wa nthĩ yenyu, nũndũ Yeova akatanĩa ĩngĩ kũtuma mwaĩla, o tondũ watanĩaa kũtuma aa-ũmae menyu maĩla. 10 Nũndũ ĩvindanĩ yĩu mũkethukĩĩsya wasya wa Yeova Ngai wenyu na mũikwata mĩao yake na motwʼĩo ala maandĩkĩtwe ĩvukunĩ yĩĩ ya Mĩao, na mũkasyokea Yeova Ngai wenyu na ngoo yenyu yonthe na thayũ* wenyu wʼonthe.

11 “Yu mwĩao ũũ ngũmwĩaĩa ũmũnthĩ ti mũito mũno kwenyu, o na ti aĩ mũitonya kũũkwata.* 12 Ũi matunĩ, nĩ kana mwasye, ‘Nũũ ũkwambata matunĩ akatwosee, nĩ kana tũwĩwʼe na tũiũatĩĩa?’ 13 O na ndwĩ ngalĩko ĩla ĩngĩ ya ũkanga nĩ kana mwasye, ‘Nũũ ũla ũkũinga ngalĩko ĩla ĩngĩ ya ũkanga akatwosee, nĩ kana tũwĩwʼe na tũiũatĩĩa?’ 14 Nũndũ ndeto ĩsu yĩ vakuvĩ vyũ nenyu, kanywʼanĩ wenyu na ngoonĩ yenyu, nĩ kana mũmĩke.

15 “Sisyai, nĩngwia mbee wenyu ũmũnthĩ thayũ na ũseo, na kĩkwʼũ na ũthũku. 16 Ethĩwa nĩmũkwĩthukĩĩsya mĩao ya Yeova Ngai wenyu ĩla ngũmwĩaĩa ũmũnthĩ, kwa kũmwendaa Yeova Ngai wenyu, kwa kũendaa nzĩanĩ syake, na kwa kũkwataa mĩao yake na motwʼĩo make na sila wake, nĩvo ĩndĩ mũkekala thayũ na mũyingĩva, na Yeova Ngai wenyu akamũathima mwĩ nthĩ ĩla mũendete kũmesya.

17 “Ĩndĩ ethĩwa ngoo yenyu ĩkeelelũka na mũilea kwĩthukĩĩsya na mũisesengwa na mũikumanĩa ngai ingĩ na kũithũkũma, 18 nĩmũtavya ũmũnthĩ kana vate nzika mũkathela. Mũikekala ĩvinda yĩasa nthĩ ĩla mũkũinga Yolotani mũmĩmesye. 19 Nĩosa ĩtu na nthĩ syĩthĩwe ngũsĩ ĩũlũ wenyu ũmũnthĩ kana nĩniĩte thayũ na kĩkwʼũ mbee wenyu, ũathimo na kĩumo; na no nginya mũnyuve thayũ nĩ kana mwĩkale thayũ, inywʼĩ na nzyawa syenyu, 20 kwa kũmwenda Yeova Ngai wenyu, kwa kwĩthukĩĩsya wasya wake, na kwa kũlũmanyʼa nake, nũndũ nĩwe thayũ wenyu na nũndũ wake mũkekala ĩvinda yĩasa nthĩ ĩla Yeova weevĩtie kũnenga aa-ũmae menyu, Avalaamu, Isaka, na Yakovo.”

31 Nĩvo ĩndĩ Mose waumaalile na atavya Aisilaeli onthe ndeto ii, 2 aimea: “Ũmũnthĩ nĩ na myaka 120. Nditonya kũendeea kũmũtongoesya,* nũndũ Yeova andavĩtye, ‘Ndũkainga Yolotani.’ 3 Yeova Ngai wenyu nĩwe ũkũinga mbee wenyu, na we mwene akamina mbaĩ ii syonthe syĩ mbee wenyu, na mũkailũngya. Yosua nĩwe ũkamũtongoesya mũinge, o tondũ Yeova ũwetete. 4 Yeova akeekana nasyo o tondũ weekie Sioni na Oku, asumbĩ ma Aamoli, na nthĩ yoo yĩla wamaminie. 5 Yeova akaisinda kwondũ wenyu, na mũkeekana nasyo kwosana na mwĩao wʼonthe ũla nĩmũnengete. 6 Ĩthĩwai na ũkũmbaũ na vinya. Mũikakĩe kana kũtelema mbee wasyo, nũndũ Yeova Ngai wenyu nĩwe ũkũendanyʼa nenyu. Ndakaema kũmũtetheesya o na ndakamũtia.”

7 Nĩvo ĩndĩ Mose weetie Yosua na amũtavya mbee wa metho ma Aisilaeli onthe atĩĩ: “Ĩthĩwa na ũkũmbaũ na vinya, nũndũ nue ũkaete andũ aa nthĩ ĩla Yeova weevĩtĩe aa-ũmae moo kũmanenga, na ũkamanenga yo yĩthĩwe ũtiĩwa. 8 Yeova nĩwe ũkũũtongoesya, na eendeea kwĩthĩwa vamwe naku. Ndakaema kũũtetheesya o na ndakaũtia. Ndũkakĩe kana ũteleme.”

9 Nĩvo ĩndĩ Mose waandĩkie Mĩao ĩĩ na amĩnenga athembi, Alivai, ala makuaa ĩsandũkũ ya ũtianĩo wa Yeova, na atumĩa onthe ma Isilaeli. 10 Mose ameaĩe ayasya atĩĩ: “Mũthyanĩ wa kĩla myaka mũonza, ĩvindanĩ yĩla yĩnyuvĩtwe mwakanĩ wa ũthasyo, ĩvinda ya Mboka ya Ivanda,* 11 yĩla Aisilaeli onthe mooka mbee wa Yeova Ngai wenyu vala ũnyuvĩte, mwaĩlĩte kũsomea Aisilaeli onthe Mĩao ĩĩ nĩ kana mamĩwʼe. 12 Ũmbanyʼai andũ onthe vamwe, aũme, aka, syana,* na mwĩkali wa ũeninĩ ũla wĩ ndũanĩ syenyu,* nĩ kana methukĩĩsye na mayĩmanyĩsya ĩũlũ wa Yeova Ngai wenyu na kũmũkĩa na mayĩthĩwa me metho mekae kwosana na ndeto syonthe sya Mĩao ĩĩ. 13 Nĩvo ĩndĩ ana moo ala matesĩ Mĩao ĩĩ makethukĩĩsya na mayĩmanyĩsya kũkĩa Yeova Ngai wenyu mĩthenyanĩ yonthe ĩla mũkekala nthĩ ĩla mũkũinga Yolotani mũmesye.”

14 Nĩvo ĩndĩ Yeova weeie Mose atĩĩ: “Sisya! Ĩvinda yaku ya kũkwʼa nĩ ĩthengeeu. Ĩta Yosua, na mũithi* ĩeemanĩ ya kũmbanĩa, nĩ kana nĩmũtwʼĩkĩthye mũtongoi.” Kwoou Mose na Yosua nĩmaendie ĩeemanĩ ya kũmbanĩa. 15 Na ĩndĩ Yeova aumĩla ĩeemanĩ e kĩtuĩnĩ kya ĩtu, na kĩtuĩ kĩu kya ĩtu kyaũngama mũomonĩ wa ĩeema yĩu.

16 Yeova eeie Mose atĩĩ: “Sisya! Wĩ vakuvĩ kũkwʼa,* na andũ aa nĩmekwambĩĩa kwĩka ũmalwaya wa kĩ-veva na ngai ngeni ila imathyũlũlũkĩte nthĩ ĩla maendete. Makandia na maitũla ũtianĩo wakwa ũla nĩtianĩĩte namo. 17 Ĩvindanĩ yĩu ũthatu wakwa ũkamakanĩa, na ngamatia na ndimavitha ũthyũ wakwa nginya manangwe. Na ĩndĩ ĩtina wa mĩisyo mingĩ na mathĩna kũmakwata, makasya, ‘Yo mĩisyo ĩĩ ndĩtũkwatĩte nĩkwĩthĩwa Ngai witũ nde katĩ witũ?’ 18 Ĩndĩ ngaendeea kũvitha ũthyũ wakwa mũthenya ũsu nũndũ wa ũthũku wʼonthe ũla mekĩte kwa kwĩthyũũĩa ngai ingĩ.

19 “Yu ĩyĩandĩkĩe ndeto sya wathi ũũ na ũyĩimanyĩsya Aisilaeli. Ĩkĩĩthya nĩmaũmanya* nĩ kana wathi ũũ wĩthĩwe ũkũsĩ wakwa kwa andũ ma Isilaeli. 20 Yĩla ngamaete nthĩ ĩla neevĩtĩie aa-ũmae moo, nthĩ yusũĩte ĩia na ũkĩ wa nzũkĩ, na maiya mavũne na mayaĩla,* makeethyũũĩa ngai ingĩ na mayĩithũkũma na makambũthya na maitũla ũtianĩo wakwa. 21 Yĩla mekwatwa nĩ mĩisyo mingĩ na mathĩna, wathi ũũ ũkeethĩwa ũkũsĩ kwoo (nũndũ nzyawa syoo iyaĩlĩte kũlwa nĩwʼo), nĩkwĩthĩwa nĩnĩsĩ mosũanĩo moo ala masũanĩaa o na matanamba kũlika nthĩ ĩla neevĩtie ĩũlũ wayo.”

22 Kwoou mũthenya ũsu Mose nĩwaandĩkie wathi ũũ na aũmanyĩsya Aisilaeli.

23 Nĩvo ĩndĩ wamũtwʼĩkĩthisye* Yosua mwana wa Nuni mũtongoi na asya atĩĩ: “Ĩthĩwa na ũkũmbaũ na vinya, nũndũ nue ũkaete Aisilaeli nthĩ ĩla namevĩtĩie, na ngaendeea kwĩthĩwa vamwe naku.”

24 Mose amina kũandĩka oou ndeto syonthe sya Mĩao ĩĩ ĩvukunĩ, 25 Mose nĩweeaĩe Alivai ala makuaa ĩsandũkũ ya ũtianĩo wa Yeova, ayasya: 26 “Osai ĩvuku yĩĩ ya Mĩao na mũiyia ũtee wa ĩsandũkũ ya ũtianĩo wa Yeova Ngai wenyu, na yĩ vau yĩkeethĩawa ũkũsĩ kwenyu.

27 Nũndũ nyie mwene nĩnĩsĩ nesa ũlei wenyu na ũndũ mwĩ mbaa matũ.* Ethĩwa mwĩthĩĩtwe mũileana na Yeova mũno wĩana ũu nĩ o thayũ vamwe nenyu, mũikaleana nake ĩ ya mũno nakwʼa! 28 Mbũmbanĩsyei atumĩa onthe ma mbaĩ syenyu na anene menyu, na ekai nĩneene ndeto ii mayĩwʼa, na ekai nose ĩtu na nthĩ syĩthĩwe ngũsĩ kwoo. 29 Nũndũ nĩnĩsĩ nesa nakwʼa mũikalea kwĩka maũndũ mathũku na mũkeelelũka mume nzĩanĩ ĩla namwĩaĩe. Na vate nzika, mũisyo ũkamũkwata mũthyanĩ wa mĩthenya, nũndũ mũkeeka kĩla kĩthũku methonĩ ma Yeova na mũkamũthatya na wĩa wa moko menyu.”

30 Na ĩndĩ Mose nĩwasyokeleeile ndeto sya wathi ũũ kuma mwambĩĩo nginya mũthya, ũmbano wʼonthe wa Isilaeli wĩthukĩĩsye:

 3 Nũndũ ngatavanyʼa ĩsyĩtwa ya Yeova.

Ngaweta ĩũlũ wa ũnene wa Ngai witũ!

 5 Mo ene nĩmo mekĩte ũthũku.

Mo ti syana syake, ũthũku nĩ woo ene.

Mo nĩ nzyawa ngʼendu na nthyoeku!

15 Yĩla Yesuluni* wanoie, nĩwekisye nthele na ũngʼendu.

Nũnoete, ũkaimba, na ĩvu yaku yĩkaneneva.

29 Ta kethĩwa nĩ oĩ! No masũanĩe mũno ĩũlũ wa ũndũ ũũ.

No masũanĩe ĩũlũ wa kĩla kĩkamakwata.

Ekai iũngame na iimũtetheesya.

Ekai itwʼĩke vandũ venyu va kwĩvitha.

Nĩnũaaa, na nĩnĩnenganae thayũ.

44 Kwoou Mose ooka na atũngĩlĩĩla ndeto syonthe sya wathi ũũ andũ mayĩwʼa, we na Osiea* mwana wa Nuni. 45 Mose amina kũtavya Aisilaeli onthe ndeto ii syonthe, 46 ameie: “Ĩkĩai ngoonĩ ndeto syonthe sya ũkanyʼo wakwa ũla namũnenga ũmũnthĩ, nĩ kana mwĩaĩe ana menyu methĩwe me metho kũatĩĩaa ndeto syonthe sya Mĩao ĩĩ. 47 Nũndũ ndeto ĩĩ ti ya mana kwenyu, ĩndĩ mũkekala thayũ, ethĩwa mũkeewʼa ndeto ĩĩ, na ethĩwa mũkamĩwʼa mũkekala thayũ ĩvinda yĩasa nthĩ ĩla mũkũinga Yolotani mũmĩmesye.”

48 Yeova aneenie na Mose mũthenya o ũsu, ayasya atĩĩ: 49 “Ambata Kĩĩmanĩ kya Avalimu, Kĩĩma kya Nevo, kĩla kĩ nthĩ ya Moavi, kĩla kĩsyaĩtye Yeliko, na ũyĩloela nthĩ ya Kanaanĩ, ĩla ngũnenga Aisilaeli yĩthĩwe yoo. 50 Na ĩndĩ ũkakwʼĩĩa kĩĩmanĩ kĩu ũkilyĩ kwambata, na ũyũmbanwʼa vamwe na andũ maku,* o tondũ Alũni mwana-a-inyia waku wakwʼĩĩe Kĩĩmanĩ kya Olu na oombanwʼa vamwe na andũ make, 51 nũndũ mwĩ elĩ mũyaĩ aĩkĩĩku kwakwa katĩ wa Aisilaeli kĩw’ũnĩ kya Meliva ĩla yĩ Katesi weũnĩ wa Nzini, nĩkwĩthĩwa mũyaanthesya mbee wa andũ ma Isilaeli. 52 Ũkoona nthĩ ĩsu wĩ vaasa, ĩndĩ ndũkalika nthĩ ĩla ngũnenga andũ ma Isilaeli.”

33 Yu ũũ nĩwʼo ũathimo ũla Mose mũndũ wa Ngai ũla wa w’o watavisye Aisilaeli atanamba kũkw’a. 2 Aisye atĩĩ:

 7 Na atavisye Yuta ũathimo ũũ:

 8 Aisye ũũ ĩũlũ wa Livai:

12 Aisye ũũ ĩũlũ wa Mbenyamini:

13 Aisye ũũ ĩũlũ wa Yosevu:

18 Aisye ũũ ĩũlũ wa Nzevuluni:

19 Makeeta ngo sya andũ kĩĩmanĩ.

Me vau makathemba nthembo sya ũlũngalu.

20 Aisye ũũ ĩũlũ wa Ngati:

“Nĩmũathime ũla ũkũthanthasya mĩvaka ya Ngati.

Atongoi ma andũ makoombana vamwe.

22 Aisye ũũ ĩũlũ wa Ndani:

“Ndani nĩ mũnyambũ wa mũika.

Akatũlĩla kuma Mbasani.”

23 Aisye ũũ ĩũlũ wa Navitali:

Mesya ngalĩko ya ũthũĩlonĩ wa sua na ngalĩko ya ĩtheo.”

24 Aisye ũũ ĩũlũ wa Aseli:

“Aseli nũathimĩtwe na ana.

29 Wĩ mũtanu, we Isilaeli!

34 Na ĩndĩ Mose auma yalatanĩ ĩtindimalu ya Moavi ambata Kĩĩmanĩ kya Nevo, mũthyanĩ wa Visika, ũla ũsyaĩtye Yeliko. Na Yeova amwonyʼa nthĩ yonthe, kuma Ngileati nginya Ndani, 2 na Navitali yonthe na nthĩ ya Evilaimu na Manase, na nthĩ yonthe ya Yuta kũvika ũkanga ũla wĩ ngalĩko ya ũthũĩlonĩ wa sua,* 3 na Nekevu na Ũiĩ,* ũiĩ ũla wĩ mwandanĩ wa Yeliko, ndũa ya mĩtende, kũvika Nzoali.

4 Nĩvo ĩndĩ Yeova wamwĩie: “Ĩĩ nĩyo nthĩ ĩla neevĩtĩie Avalaamu, Isaka, na Yakovo, ndyasya, ‘Ngamĩnenga ũsyao waku.’* Nĩnaeka wamyona na metho maku, ĩndĩ ndwĩinga ũlike vo.”

5 Ĩtina wa ũu, Mose mũthũkũmi wa Yeova nĩwakwʼĩĩie nthĩ ya Moavi o tondũ Yeova wawetete. 6 Amũthikie mwandanĩ wĩ nthĩ ya Moavi, ũsianĩtye na Mbethi-veoli, na vai mũndũ wĩsĩ vala mbũa yake yĩĩ nginya ũmũnthĩ. 7 Mose aikwʼa aĩ na myaka 120. Metho make mayaĩ na mbindu, na vinya wake ndwathelete. 8 Andũ ma Isilaeli mamũĩĩie Mose yalatanĩ ĩtindimalu ya Moavi kwa mĩthenya 30. Na ĩndĩ mĩthenya ya kũĩĩa na kũmetea Mose yathela.

9 Yosua mwana wa Nuni ausũĩte veva wa ũĩ, nĩkwĩthĩwa Mose nĩwamwilĩĩlĩte kwʼoko kwake; na Aisilaeli mambĩĩa kũmwĩthukĩĩsya, na meeka o ũndũ Yeova weeaĩe Mose. 10 Ĩndĩ Isilaeli kũyaaĩsa kũkĩla ĩngĩ mwathani ũilye ta Mose, ũla Yeova weesĩ ũthyũ-kwa-ũthyũ. 11 Nĩweekie mawonanyʼo onthe na syama ila Yeova wamũtũmĩte akeke nthĩ ya Misili kũla kwĩ Valao na athũkũmi make onthe na nthĩ yake yonthe, 12 vamwe na kwʼoko kwĩ vinya na ũtonyi mwingĩ mũno ũla Mose woonanisye mbee wa metho ma Aisilaeli onthe.