NEEMIA

1 Ndeto sya Neemia* mwana wa Akalia: Yu mweinĩ wa Kisilevu,* mwakanĩ wa 20, naĩ ngomenĩ* ya Susani.* 2 Ĩvindanĩ yĩu Aanani, mwana-a-inyia ũmwe wakwa, nĩwookie aumĩte Yuta e na aũme angĩ, na nĩnamakũlilye ĩũlũ wa Ayuti ala matialĩte katĩ wa ala matavĩtwe, ala masyokie ĩ nthĩ. O na nĩnamakũlilye ĩũlũ wa Yelusalemu. 3 Manzũngĩie mambĩa: “Ala matialĩte kũu kĩsionĩ* mavonokie kuma ũtavwanĩ, maũndũ moo maendeee naĩ vyũ na nĩ ma kwĩwʼĩwa nthoni. Ngũta sya Yelusalemu nĩ mbomboe, na mĩvĩa yayo nĩ mĩvĩvye na mwaki.”

4 Yĩla neewie ndeto isu oou, nekalile nthĩ na nambĩĩa kũĩa na kũmeta kwa mĩthenya mingĩ, na naendeea kũtĩĩa kũya na kũvoya mbee wa Ngai wa ĩtunĩ. 5 Naisye: “Ame Yeova, Ngai wa ĩtunĩ, Ngai mũnene ũla andũ maĩlĩte kũkĩa na kũnenga ndaĩa, ũla ũkwataa ũtianĩo wake na wonasya wendo ũtathelaa ala mamwendete na makwataa mĩao yake, 6 mwa, tea matũ maku wĩthukĩĩsye nesa na ũisalukya metho maku wĩthukĩĩsye mboya ya mũthũkũmi waku ĩla ngũũvoya ũmũnthĩ, mũthenya na ũtukũ, ĩũlũ wa athũkũmi maku Aisilaeli, o ĩvindanĩ yĩu ndiumbũla naĩ ila andũ ma Isilaeli makwĩkĩte. Nĩtũvĩtĩtye, nyie na andũ ma nyũmba ya ĩthe wakwa. 7 Vate nzika, nĩtũkwĩkĩte maũndũ mathũku kwa kũema kũkwata mĩao, myolooto, na motwʼĩo ala wanengie mũthũkũmi waku Mose.

8 “Mwa lilikana, ndeto ii weeaĩe* mũthũkũmi waku Mose: ‘Mweethĩwa mũte aĩkĩĩku, ngamũnyaĩĩkya ngonĩ sya andũ. 9 Ĩndĩ mwanzyokea na mwaatĩĩa mĩao yakwa na kũmĩwʼa, o na ethĩwa andũ menyu ala manyaĩĩkĩtwʼe makeethĩwa mũthyanĩ wa matu, ngamombanyʼa kuma kũu na ndimaete vala nĩnyuvĩte ĩsyĩtwa yakwa yĩkalae.’ 10 Mo nĩ athũkũmi maku na andũ maku, ala woovoisye na vinya waku mwingĩ na kwʼoko kwaku kwĩ vinya. 11 Mwa, ame Yeova, tea matũ maku wĩthukĩĩsye mboya ya mũthũkũmi waku na mboya ya athũkũmi maku ala matanĩaa kũkĩa ĩsyĩtwa yaku, na mwa, ũmũnthĩ eka maũndũ ma mũthũkũmi waku mathi nesa, na eka mũndũũme ũũ ambĩwʼĩe ĩnee.”

Yu ninyie nanengae mũsumbĩ mbinyu.

2 Mweinĩ wa Nisani* mwakanĩ wa 20 wa Mũsumbĩ Alitasasita, mbinyu nĩyaiiwe mbee wake na o tondũ nakothaa kwĩka nĩnamyosie na namũnenga. Ĩndĩ ndyaĩ naaĩsa kũũngama mbee wake nĩ na ũthyũ mũtuku. 2 Kwoou mũsumbĩ ambĩa: “Nĩkĩ ũtukĩtye ũthyũ ũu na ndwĩ mũwau? Wĩ na thĩna ngoonĩ na nĩkyo kĩtumi ũtukĩtye ũthyũ ũu.” Nũndũ wa ũu, nĩnakwatiwe nĩ wia mwingĩ.

3 Nĩvo ĩndĩ neeie mũsumbĩ atĩĩ: “Mũsumbĩ nĩekale ĩvinda yĩasa! Ndonya kũlea kũtukya ũthyũ ũu ata, na ndũa, ĩla nĩ vo aa-ũmae makwa mathikĩtwe, nĩ mbombokangu, na mĩvĩa yayo nĩvĩvĩtwʼe na mwaki?” 4 Nake mũsumbĩ angũlya: “Na yu wĩenda ata?” Vau kwa vau nĩnavoyie Ngai wa ĩtunĩ. 5 Ĩtina wa ũu, neeie mũsumbĩ atĩĩ: “Ethĩwa mũsumbĩ nũkwendeewʼa nĩ ũndũ ũũ, na ethĩwa mũthũkũmi waku nĩwonete ũseo methonĩ maku, ndũme Yuta, ndũanĩ ĩla aa-ũmae makwa mathikĩtwe, nĩ kana ngamyake ĩngĩ.” 6 Na ĩndĩ mũsumbĩ angũlya ũũ mũka* ailyĩ ũtee wake: “Kyalo kyaku kĩkua ĩvinda yĩasavĩte ata, na ũkasyoka ĩndĩĩ?” Kwoou mũsumbĩ nĩwendeeiwʼe nĩ kũndũma, na namũtavya yĩla ngasyoka.

7 Ĩtina wa ũu, neeie mũsumbĩ atĩĩ: “Ethĩwa ũndũ ũũ nũkwendeesya mũsumbĩ, nĩnengwe valũa nĩtwaĩe makavana ma kĩsio kĩla kĩ Mũingo wa Ũla Ũsĩ,* nĩ kana manenge mwanya nĩsĩle kĩsionĩ kyoo nĩ mũsũvĩĩku nginya Yuta, 8 o vamwe na valũa ũngĩ ndwaĩe Asavu mũsũvĩi wa Kĩtheka kya Mũsumbĩ, nĩ kana anenge mbwaũ sya mĩamba ya mĩvĩa ya Ngome ya ĩla Nyũmba* na kwondũ wa ngũta sya ndũa ĩsu na nyũmba ĩla ngekalaa.” Kwoou mũsumbĩ anenga valũa isu, nĩkwĩthĩwa kwʼoko kũseo kwa Ngai wakwa kwaĩ ĩũlũ wakwa.

9 Mũthya, nĩnesie kũvika vala ve makavana ma kĩsio kĩla kĩ Mũingo wa Ũla Ũsĩ na namanenga valũa sya mũsumbĩ. O na ĩngĩ, mũsumbĩ nĩwanengie anene ma ita na atwai ma mbalasi nĩendanyʼe namo. 10 Yĩla Sanavalati ũla waĩ Mũoloni na Tovia ũla waĩ mũnene* Mũamimoni meewie ũu, nĩmathatie mũno mamanya kana ve mũndũ waĩ anooka kwĩka andũ ma Isilaeli ũndũ mũseo.

11 Mũthya, nĩnesie kũvika Yelusalemu, na nekala vo mĩthenya ĩtatũ. 12 Nĩnookĩlile ũtukũ, nĩ na aũme angĩ avũthũ, na ndyaatavya mũndũ o na ũmwe kĩla Ngai wakwa weekĩĩte ngoonĩ yakwa nĩke kwondũ wa Yelusalemu, na ndyaĩ na nyamũ ĩngĩ eka o ĩla yanguĩte. 13 Na nathi o ũtukũ ũsu nĩsĩlĩte Mũvĩanĩ wa Mwandanĩ, navĩtĩla mbee wa Mbuluti ya Nzoka Nene nathi nginya Mũvĩanĩ wa Ivumbu sya Mũu, na nasisya nesa ũndũ ngũta sya Yelusalemu ila syaomboetwe syailye o vamwe na mĩvĩa yasyo ĩla yavĩvĩtwʼe na mwaki. 14 Na nathi nginya Mũvĩanĩ wa Mbuluti na nginya Ndianĩ ya Mũsumbĩ, ĩndĩ nyamũ ĩla yanguĩte ndyaĩ ĩtonya kũvĩta nĩkwĩthĩwa vayaĩ na mwanya ĩanĩa. 15 Ĩndĩ naendeea kwambatĩla mwandanĩ ũsu* kwĩ ũtukũ, na naendeea kũsisya nesa ũndũ ũkũta ũsu wailye, na ĩtina wa ũu nasyoka nesĩla Mũvĩanĩ wa Mwandanĩ, na ĩndĩ nasyoka vala nambĩĩĩte.

16 Anini ma atongoi mayaamanya vala naendie na kĩla neekaa, nĩkwĩthĩwa vai ũndũ o na ũmwe naĩ nĩnatavya Ayuti, athembi, andũ me ndaĩa, anini ma atongoi, na athũkũmi ala angĩ. 17 Mũthya, nameie atĩĩ: “Inywʼĩ nĩmwene ũndũ maũndũ maitũ mailye naĩ wĩana, ũndũ Yelusalemu yombokangĩte na ũndũ mĩvĩa yayo ĩvĩvĩtwʼe na mwaki. Ũkai yu, tũtũngĩĩe ngũta sya Yelusalemu, nĩ kana nthoni ii iikaendeee.” 18 Na ĩndĩ namatavya ũndũ kwʼoko kũseo kwa Ngai wakwa kwaĩ ĩũlũ wakwa na ndeto ila mũsumbĩ wandavĩtye. Meewʼa ũu maisye: “Ũkĩlai twake.” Kwoou meeyĩkĩa* vinya kwondũ wa wĩa ũsu mũseo.

19 Yu yĩla Sanavalati ũla waĩ Mũoloni, Tovia ũla waĩ mũnene* Mũamimoni, na Ngesemu ũla waĩ Mũalavu meewie ũu, nĩmambĩĩie kũtũthekeea na matũvũthĩĩsya maitwĩa: “Yu kĩĩ nĩ kyaũ mũkwĩka? Mwĩleana na mũsumbĩ?” 20 Ĩndĩ o na ũu wĩ o vo, namasũngĩie namea: “Ngai wa ĩtunĩ nĩwe ũkũtuma wĩa witũ ũthi nesa, na ithyĩ athũkũmi make nĩtũkũkĩla twake; ĩndĩ inywʼĩ mũi na kĩanda, o na vai kĩndũ mũtonya kwĩtya Yelusalemu, o na mũi na ũlilikano* vo.”

3 Mũthembi mũnene Eliasivu na ana-a-ĩthe athembi nĩmookĩlile maaka Mũvĩa wa Malondu. Maũtheisye* na meekĩa mĩomo yawʼo; maũtheisye nginya mwakonĩ mũtũlu wa Mea, na mathi nginya mwakonĩ mũtũlu wa Ananeli. 2 Na aũme ma Yeliko nĩmo maakaa kĩlungu kĩla kyaatĩĩe; na kĩlungu kĩla kyaatĩĩe kyaakawa nĩ Nzakuli mwana wa Imili.

3 Ana ma Asenaa nĩmo maakie Mũvĩa wa Makũyũ; mawakie na mbwaũ na ĩndĩ meekĩa mĩomo yawʼo, ivingi syawʼo, na mĩamba yawʼo. 4 Na kĩlungu kĩla kyaatĩĩe kyatũngĩĩiwe nĩ Melemothi mwana wa Uliya mwana wa Akosi, na kĩlungu kĩla kyaatĩĩe kyatũngĩĩwa nĩ Mesulamu mwana wa Mbelekia mwana wa Mesesaveli, na kĩlungu kĩla kyaatĩĩe kyatũngĩĩwa nĩ Nzatoki mwana wa Vaana. 5 Na kĩlungu kĩla kyaatĩĩe kyatũngĩĩiwe nĩ Atekoa, ĩndĩ aũme moo me nguma mayaaĩtĩkĩla kwĩnyivya matetheesye* ũthũkũminĩ wa mavwana moo.

6 Yoiata mwana wa Vasea na Mesulamu mwana wa Mbesoteia matũngĩĩie Mũvĩa wa Ndũa Ĩla ya Tene; nĩmaũseũvisye na mbwaũ na ĩndĩ meekĩa mĩomo yawʼo, ivingi syawʼo, na mĩamba yawʼo. 7 Melatia ũla waĩ Mũngiveoni na Yatoni ũla waĩ Mũmelonothi nĩmo matũngĩĩie kĩlungu kĩla kyaatĩĩe; asu maĩ aũme ma Ngiveoni na Misiva ala maĩ ungu wa ũkũmũ wa* ngavana wa kĩsio kĩla kĩ Mũingo wa Ũla Ũsĩ.* 8 Usieli mwana wa Aliaia, ũmwe wa atwii ma thaavu, nĩwe watũngĩĩie kĩlungu kĩla kyaatĩĩe, na Aanania, ũmwe wa aseũvya ma manukato,* nĩwe watũngĩĩie kĩlungu kĩla kyaatĩĩe; na matandaasya mavia Yelusalemu nginya Ũkũtanĩ Mũthanthau. 9 Na Levaia mwana wa Uulu, mũnene wa nũsu ya kĩsio* kya Yelusalemu, nĩwe watũngĩĩie kĩlungu kĩla kyaatĩĩe. 10 Na Yetaia mwana wa Alumavu nĩwe watũngĩĩie kĩlungu kĩla kyaatĩĩe kyaĩ mbee wa nyũmba yake, na Atusi mwana wa Asavineia nĩwe watũngĩĩie kĩlungu kĩla kyaatĩĩe.

11 Malikiya mwana wa Alimu na Asuvu mwana wa Vaathi-moavi matũngĩĩie kĩlungu kĩngĩ,* o vamwe na Mwako Mũtũlu wa Maiko. 12 Salumu mwana wa Aloesi, mũnene wa nusu ya kĩsio* kya Yelusalemu, nĩwe watũngĩĩie kĩlungu kĩla kyaatĩĩe, e na eĩtu make.

13 Anuni nĩwe watũngĩĩie Mũvĩa wa Mwandanĩ e na ekali ma Nzanoa; mawakie na meekĩa mĩomo yawʼo, ivingi syawʼo, na mĩamba yawʼo, na matũngĩĩie mĩkono 1,000* ya ũkũta nginya Mũvĩanĩ wa Ivumbu sya Mũu. 14 Malikiya mwana wa Lekavu mũnene wa kĩsio* kya Mbethi-akelemu atũngĩĩie Mũvĩa wa Ivumbu sya Mũu; awakie na eekĩa mĩomo yawʼo, ivingi syawʼo, na mĩamba yawʼo.

15 Saluni mwana wa Koliose, mũnene wa kĩsio* kya Misiva, nĩwe watũngĩĩie Mũvĩa wa Mbuluti; awakie vamwe na kĩala kyawʼo, eekĩa mĩomo yawʼo, ivingi syawʼo, na mĩamba yawʼo, na asyoka atũngĩĩa ũkũta wa Ndia ya Mũtaũ ũla ũendete Mũũndanĩ wa Mũsumbĩ na athi nginya Ngasinĩ ĩla ĩtheete yumĩte Ndũanĩ ya Ndaviti.

16 Neemia mwana wa Asivuki, mũnene wa nusu ya kĩsio* kya Mbethi-suli, atũngĩĩie kĩlungu kĩla kyaatĩĩe kuma mbee wa Mbũa sya Ndaviti nginya ndianĩ ĩla yaĩ ĩnaakwa na athi nginya Nyũmbanĩ ya Ala me Vinya.

17 Alivai nĩmo matũngĩĩie kĩlungu kĩla kyaatĩĩe: Leumu mwana wa Mbani; na Asavia, mũnene wa nusu ya kĩsio* kya Keila, nĩwe watũngĩĩie kĩlungu kĩla kyaatĩĩe kwondũ wa kĩsio kyake. 18 Ana-a-ĩthe nĩmo matũngĩĩie kĩlungu kĩla kyaatĩĩe: Mbavai mwana wa Enatati, mũnene wa nusu ya kĩsio* kya Keila.

19 Na Eseli mwana wa Yesua mũnene wa Misiva nĩwe wamũatĩĩe, na atũngĩĩie kĩlungu kĩngĩ kĩla kyaatĩĩe mbee wa kyambato kya kũthi Vala Vaiawa Mĩio ya Kaũ ĩla Ngomenĩ ya Kũtwʼĩĩka Ũkũta.

20 Mbaluku mwana wa Nzavai athũkũmaa na kĩthito na nĩwe watũngĩĩie kĩlungu kĩngĩ kĩla kyaatĩĩe, kuma Ngomenĩ ya Kũtwʼĩĩka Ũkũta nginya mũomonĩ wa nyũmba ya mũthembi mũnene Eliasivu.

21 Melemothi mwana wa Uliya mwana wa Akosi nĩwe watũngĩĩie kĩlungu kĩngĩ kĩla kyaatĩĩe, kuma mũomonĩ wa nyũmba ya Eliasivu nginya mũthyanĩ wa nyũmba ya Eliasivu.

22 Na athembi, aũme ma ũiĩ wa Yolotani,* nĩmo matũngĩĩie kĩlungu kĩla kyaatĩĩe. 23 Mbenyamini na Asuvu nĩmo matũngĩĩie kĩlungu kĩla kyaatĩĩe mbee wa nyũmba yoo. Nake Asalia mwana wa Maaseia mwana wa Anania nĩwe watũngĩĩie kĩlungu kĩla kyaatĩĩe vakuvĩ na nyũmba yake. 24 Mbinui mwana wa Enatati nĩwe watũngĩĩie kĩlungu kĩla kĩngĩ kyaatĩĩe, kuma nyũmbanĩ ya Asalia nginya Ngomenĩ ya Kũtwʼĩĩka Ũkũta na athi nginya konanĩ.

25 Valali mwana wa Usai nĩwe watũngĩĩie kĩlungu kĩla kyaatĩĩe mbee wa Ngome ya Kũtwʼĩĩka Ũkũta na mwako mũtũlu ũla umĩte Nyũmbanĩ ya Mũsumbĩ, mwako wa ĩũlũ wa Kĩwanza kya Mũsungi. Nake Vetaia mwana wa Valosi nĩwe watũngĩĩie kĩlungu kĩla kyaatĩĩe.

26 Na athũkũmi ma ĩkalũnĩ* ala mekalaa Oveli nĩmo matethisye wĩa wa kũtũngĩĩa kũthi nginya mbee wa Mũvĩa wa Kĩwʼũ ngalĩko ya wumĩlonĩ wa sua na mwakonĩ mũtũlu ũla waumĩlĩte ũkũtanĩ.

27 Atekoa nĩmo matũngĩĩie kĩlungu kĩla kĩngĩ kyaatĩĩe, kuma mbee wa mwako mũtũlu mũnene ũla waumĩlĩte ũkũtanĩ nginya ũkũtanĩ wa Oveli.

28 Namo athembi matethisye wĩa wa kũtũngĩĩa ĩũlũ wa Mũvĩa wa Mbalasi, kĩla ũmwe mbee wa nyũmba yake.

29 Nzatoki mwana wa Imeli nĩwe watũngĩĩie kĩlungu kĩla kyaatĩĩe mbee wa nyũmba yake.

Nake Semaia mwana wa Sekania, mũsũvĩi wa Mũvĩa wa Wumĩlonĩ wa Sua, nĩwe watũngĩĩie kĩsio kĩla kyaatĩĩe.

30 Aanania mwana wa Selemia na Anuni mwana wa thanthatũ wa Nzalavu nĩmo matũngĩĩie kĩlungu kĩngĩ kĩla kyaatĩĩe.

Nake Mesulamu mwana wa Mbelekia nĩwe watũngĩĩie kĩlungu kĩla kyaatĩĩe mbee wa lumu yake nene.

31 Malikiya ũmwe wa ala maĩ ngwatanĩonĩ ya atwii ma thaavu, nĩwe watũngĩĩie kĩlungu kĩla kyaatĩĩe kũthi nginya nyũmbanĩ ya athũkũmi ma ĩkalũnĩ* na akũni ma viasala, mbee wa Mũvĩa wa Kũkunĩkĩla na kũthi nginya kasũmbanĩ ka ĩũlũ ka konanĩ.

32 Na atwii ma thaavu na akũni ma viasala nĩmo matethisye wĩa wa kũtũngĩĩa katĩkatĩ wa kasũmba ka ĩũlũ ka konanĩ na Mũvĩa wa Malondu.

4 Yĩla Sanavalati weewie oou kana nĩtwambĩĩa kũtũngĩĩa ũkũta, nĩweewie woo na athata mũno, na aendeea kũvũthĩĩsya Ayuti. 2 Na asya ũũ mbee wa ana-a-ĩthe na ita sya Samalia: “Mo Ayuti aa monzete ũu meĩkanyʼa ata? Nĩmeũtethya wĩa ũũ me oka? Nĩmekumya nthembo? Nĩmeũmina wĩa ũũ na mũthenya ũmwe? Nĩmeũvota kũtũmĩa mavia aa mavĩte makaũngũa ala me ivumbunĩ sya mavia maombokangu syĩ na kĩtoo?”

3 Yu Tovia ũla waĩ Mũamimoni, aũngye vau ũtee wake, na aisye: “O na mbĩwa ĩkalĩsa ũkũtanĩ ũũ wa mavia mekwaka, ndĩema kũũvalũkya.”

4 Ĩthukĩĩsye, ame Ngai witũ, nũndũ nĩtũũvũthwʼa, na eka kĩvũthya kyoo kĩsyoke mĩtwenĩ yoo ene, na manengane matavwe matwawe nthĩ ĩngĩ. 5 Na ndũkavwʼĩke ĩvĩtyo yoo kana ũvute naĩ yoo yume mbee waku, nĩkwĩthĩwa nĩmaumanga aki.

6 Kwoou twaendeea kwaka ũkũta, na ũkũta ũsu wʼonthe wakwatanwʼa na watũngĩĩwa wavika nusu ya ũtũlu wawʼo, na andũ maendeea kwĩkĩa ngoo syoo wĩanĩ ũsu.

7 Yu yĩla Sanavalati, Tovia, Aalavu, Aamimoni, na Aasitoti meewie oou kana wĩa wa kũtũngĩĩa ngũta sya Yelusalemu nũendeee na mbee na kana mavũthi nĩmaendeee kũlindwa, nĩmathatie mũno. 8 Nĩmasamie moke kũvithũkĩa Yelusalemu na kũlua nduuthĩ vo. 9 Ĩndĩ nĩtwavoyie Ngai witũ na twaia asungi matũsunge mũthenya na ũtukũ.

10 O na ũu wĩ o vo, andũ ma Yuta maasya: “Vinya wa athũkũmi* nũolekete, na ve mavia maingĩ mũno maombokangu; tũikaaĩsa kwaka ũkũta.”

11 Na amaitha maitũ maendeeie kwasya: “Matambĩte kũmanya kana kũtwona, twĩlika vala maĩ tũmoae na tũiũngamya ũ wĩa.”

12 Kĩla ĩvinda Ayuti ala mekalaa vakuvĩ namo mooka, matwĩaa ũũ ĩngĩ na ĩngĩ:* “Metũvithũkĩa kuma ngalĩko syonthe.”

13 Kwoou naia aũme isionĩ ila syĩ ĩtheo vyũ mwanyanĩ ũla wĩ ĩtina wa ũkũta kũndũnĩ kũla kũte kwiĩĩe, na namaiie kwosana na mĩsyĩ yoo me na mbyũ syoo, matumo moo, na mbũta syoo. 14 Yĩla noonie ũndũ makĩaa, nĩnookĩlile vau kwa vau na neea andũ me ndaĩa na anini ma atongoi na andũ ala angĩ atĩĩ: “Mũikamakĩe. Mũlilikanei Yeova, ũla nĩ Ngai mũnene na waĩle kũkĩwa na kũnengwa ndaĩa; na ũkitĩai ana-a-ĩthe menyu, ana menyu na eĩtu menyu, iveti syenyu na mĩsyĩ yenyu.”

15 Yu ĩtina wa amaitha maitũ kwĩwʼa kana nĩtwamanyie kĩla meekaa na kana Ngai ũla wa wʼo nĩwaanangĩte mũvango woo, ithyonthe nĩtwasyokie wĩanĩ wa kwaka ũkũta. 16 Kuma mũthenya ũsu na kũendeea, nusu ya aũme makwa nĩyo yathũkũmaa nayo nusu ĩla ĩngĩ yeethĩawa ĩkwete matumo, ngao, mbũta, na makoti ma kyũma. Namo anene me mbee ũsumbĩnĩ maũngamaa ĩtina wa andũ onthe ma nyũmba ya Yuta 17 ala maakaa ũkũta. Ala makuaa mĩio matethasya wĩa na kwʼoko kũmwe o makwete mũio wa kaũ na kwʼoko kũla kũngĩ. 18 Na kĩla mwaki eethĩawa eyovete ũvyũ kĩnyunyunĩ kyake o aendeee kwaka, na ũla waaĩlĩte kũvuva ũvya eethĩawa aũngamĩte ũtee wakwa.

19 Nĩvo ĩndĩ neeie andũ me ndaĩa na anini ma atongoi na andũ ala angĩ atĩĩ: “Wĩa nĩ mwingĩ mũno, na tũnyaĩĩkĩte kĩla vandũ ũkũtanĩ ũkethĩa kĩla ũmwe nũtaanĩsye mũno na ũla ũngĩ. 20 Mweewʼa wasya wa ũvya, ũmbanĩai vala tũĩ. Ngai witũ nũkũtũkitĩa.”

21 Kwoou twaendeea kũthũkũma o nusu ĩla ĩngĩ ĩkwete matumo, kuma kwakya nginya ndata syauma. 22 Ĩvindanĩ yĩu neeie andũ atĩĩ: “Kĩla mũndũũme, e vamwe na mũthũkũmi wake, akomele Yelusalemu, na makatũsungaa ũtukũ na maithũkũma mũthenya.” 23 Kwoou nyie, ana-a-ĩthe makwa, athũkũmi makwa, na asungi ala mambatĩĩie tũyaaĩsa kumya ngũa sitũ, na kĩla ũmwe witũ ekalaa akwete mũio wake wa kau na kwʼoko kwake kwa aũme.

5 O na ũu wĩ o vo, nĩveethĩiwe na kĩĩo kĩnene andũnĩ na ivetinĩ syoo nũndũ wa kĩla meekawa nĩ ana-a-ĩthe moo Ayuti. 2 Amwe maasya: “Ithyĩ na ana maitũ na eĩtu maitũ twĩ aingĩ. No nginya tũmanthe lĩu wa mbaa ngetha nĩ kana tũye na tũiendeea kwĩkala thayũ.” 3 Namo angĩ maasya: “Twĩnengane mĩũnda yitũ na mĩũnda yitũ ya mĩsavivũ na nyũmba sitũ syĩthĩwe ũĩkĩĩthyo wa kana tũkaĩva lĩu wa mbaa ngetha ũla twanengwa ĩvindanĩ ya yũa.” 4 Na ve o angĩ maasya: “Tũkomboethetye mĩũnda yitũ na mĩũnda yitũ ya mĩsavivũ nĩ kana tũkwate mbesa sya kumya koti wa mũsumbĩ. 5 Yu twĩ na ana-a-ĩthe maitũ twĩ mwĩĩ ũmwe na nthakame ĩmwe,* na syana sitũ iilye o ta syana syoo; ĩndĩ nĩtũnenganae ana maitũ na eĩtu maitũ ũkombonĩ. Na yu tũĩ eĩtu amwe maitũ nĩ ngombo. Ĩndĩ tũi na ũtonyi wa kũũngamya ũndũ ũũ, nĩkwĩthĩwa mĩũnda yitũ na mĩũnda yitũ ya mĩsavivũ nĩ ya andũ angĩ.”

6 Yĩla neewie kĩĩo kyoo na ndeto isu nĩnathatie mũno. 7 Kwoou nĩnasũanĩie maũndũ asu ngoonĩ yakwa, na nakanyʼa andũ me ndaĩa na anini ma atongoi ndimea atĩĩ: “Aĩ yu kĩla ũmwe wenyu nũkwĩtya mwana-a-ĩthe wake mwene ũtandĩthyo!”*

O na ĩngĩ, nĩnavangĩthisye ũmbano mũnene nũndũ woo. 8 Na namea atĩĩ: “Nĩtũtatĩte ũndũ tũtonya, tũkathooa ĩngĩ ana-a-ĩthe maitũ Ayuti ala mathooiwʼe i mbaĩnĩ; ĩndĩ yu inywʼĩ nĩmũũthoosya ana-a-ĩthe menyu ene, na nĩtwaĩle kũmathooa ĩngĩ?” Yĩla meewie ũu, mavindya ki na maaĩwa nĩ wa kwasya. 9 Na ĩndĩ namea: “Kĩla mũkwĩka ti kĩseo. Yo mũyaĩlĩte kũendaa kwa kũmũkĩa Ngai witũ nĩ kana mbaĩ, ila nĩ amaitha maitũ, iikatũvũthye? 10 Na kwongela ũu, nyie, ana-a-ĩthe makwa, na athũkũmi makwa nĩtũmakovethasya mbesa na lĩu wa mbaa ngetha. Mwa, nĩtũekei kũkovethya tũkwate ũtandĩthyo. 11 Nĩngũmwĩsũva, ũmũnthĩ ũũ mũmatũngĩe mĩũnda yoo, mĩũnda yoo ya mĩsavivũ, mĩũnda yoo ya mĩthata, na nyũmba syoo, o vamwe na kĩlungu kya ĩana,* kĩla mũmetasya kĩthĩwe ũtandĩthyo, kya mbesa, lĩu wa mbaa ngetha, mbinyu nzaũ, na mauta.”

12 Meewʼa ũu masũngĩie masya: “Nĩtũũmatũngĩa syĩndũ isu na tũimetya kĩndũ o na kĩmwe. Twĩĩka o kĩu waweta.” Kwoou neeta athembi na naavĩthya aũme asu nĩ kana meanĩsye watho ũsu. 13 O na ĩngĩ, nĩnavuunzangie mĩtũlo ya ngũa yakwa* na nasya: “Ngai ũla wa wʼo navuunzange oou kĩla mũndũũme ũteanĩsya watho ũũ amumye nyũmbanĩ yake na malĩnĩ yake, na navuunzangwe oou na aitiwa ate kĩndũ.” Yĩla ũmbano wʼonthe weewie ũu, waisye: “Ameni!”* Na mamũtaĩa Yeova, na andũ meeka o ũndũ mathanĩte.

14 Kwongela ũu, kuma mũthenya ũla wanyuvie nĩthĩwe ngavana woo nthĩ ya Yuta, kuma mwakanĩ wa 20 nginya mwakanĩ wa 32 wa Mũsumbĩ Alitasasita, myaka 12, nyie na ana-a-ĩthe makwa tũyaaya lĩu ũla waaĩle kũnengwa ngavana. 15 Ĩndĩ makavana ala maĩ mbee wakwa nĩmakuĩthĩtye andũ mũio mũito na kĩla mũthenya nĩmoosaa sekeli 40* sya vetha kuma kwoo kwondũ wa mũkate na mbinyu. O na ĩngĩ, athũkũmi moo nĩmanyamaasya andũ. Ĩndĩ nyie ndyaaĩka ũu nũndũ nĩnamũkĩaa Ngai.

16 O na ĩngĩ, nĩnatetheeisye kwaka ũkũta ũũ, na tũyaaosa kĩtheka o na kĩmwe; athũkũmi makwa onthe meethĩawa mombanĩe vau wĩanĩ. 17 Vaĩ na Ayuti na anini ma atongoi 150 ala maĩsaa mesanĩ yakwa, o vamwe na ala mookaa kũla tũĩ maumĩte mbaĩnĩ. 18 Kĩla mũthenya nĩnauĩawa* nzaũ ĩmwe, malondu thanthatũ maseo, na nyũnyi, na ĩvinda yĩmwe ĩtina wa kĩla mĩthenya ĩkũmi nĩveethĩawa na mbinyu sya mĩthemba yonthe kwa wingĩ. O na maũndũ asu onthe me o vo, ndyaaĩtya lĩu ũla waĩle kũnengwa ngavana, nĩkwĩthĩwa ĩvindanĩ yĩu andũ nĩmakuĩte mũio mũito nũndũ wa wĩa ũla matethasya. 19 Ndilikane na ũimbonyʼa ũseo,* ame Ngai wakwa, nũndũ wa maũndũ onthe ala nĩkĩte kwondũ wa andũ aa.

6 Yu yĩla Sanavalati, Tovia, Ngesemu ũla waĩ Mũalavu, na amaitha ala angĩ maitũ meewie oou kana nĩnaminĩte kũtũngĩĩa ũkũta na kana vayaĩ mavũthi matialĩte (o na kau nginya ĩvindanĩ yĩu ndyaĩ nĩnamba kwĩkĩa mĩomo ya mĩvĩa), 2 vau kwa vau Sanavalati na Ngesemu nĩmandũmĩie ũtũmani ũũ: “Ũka, tũvange ĩvinda yĩla tũũkomanĩa motũinĩ ma ũiĩnĩ wĩ mwandanĩ wa Ono.” Ĩndĩ masamĩte mambũmĩsye. 3 Kwoou namatũmĩa atũmwa, ndimea: “Nĩ na wĩa mwingĩ mũno ũngwatanĩtye, na nditonya kũtheea kũu. Ve kĩtumi kyaũ wĩa ũũngame nĩ kana nĩtheee kũla mũĩ?” 4 Nĩmandũmĩie ũtũmani o ũla ũla mavinda ana, nakwa kĩla ĩvinda namasũngĩaa ũndũ o ũla ũla.

5 Na ĩndĩ, ĩvindanĩ ya katano, Sanavalati atũma mũthũkũmi wake kũla nĩĩ e na ũtũmani o ũla ũla, na amũtũmie akwete valũa mũvingũe. 6 Waandĩkĩtwe ũũ: “Katĩ wa i mbaĩ nĩkwĩwʼĩkĩte, o na Ngesemu nũkũweta ũndũ ũũ, kana we na Ayuti mũsamĩte mũleane na mũsumbĩ. Nĩkyo kĩtumi ũkwaka ũkũta; na kwosana na maũndũ asu twĩwʼĩte nue ũũtwʼĩka mũsumbĩ woo. 7 O na ĩngĩ, nũnyuvĩte athani matangaase ĩũlũ waku Yelusalemu yonthe mayasya, ‘Ve mũsumbĩ Yuta!’ Na yu maũndũ asu nĩmeũtavwʼa mũsumbĩ. Kwoou ũka, tũneenee ũndũ ũsu vamwe.”

8 Ĩndĩ namũtũmanĩie ũsũngĩo ũũ: “Vai ũndũ o na ũmwe katĩ wa maũndũ ala ũũweta wĩkĩkĩte; no uwe umanĩte na maũndũ asu.”* 9 Nũndũ onthe maendeee kũtata kũtũtelemya, mayasya: “Nĩmeũleelya moko moo wĩanĩ ũũ, na maikesa kũũmina.” Yu, nĩngũũvoya, lũlũmĩĩlya moko makwa.

10 Na ĩndĩ nathi nyũmbanĩ ya Semaia mwana wa Ndelaia mwana wa Meetaveli ĩvindanĩ yĩla ũtaumaa nyũmbanĩ yake. Ambĩie atĩĩ: “Tũvange ĩvinda tũkomanĩe nyũmbanĩ ya Ngai ũla wa wʼo, ĩkalũnĩ nthĩnĩ, na tũivinga mĩomo ya ĩkalũ, nĩkwĩthĩwa nĩmekũka ũkũaa. Meũka ũkũaa ũtukũ.” 11 Ĩndĩ namwĩie: “Mũndũ takwa nĩwaĩlĩte kũsemba akĩĩte? We mũndũ takwa no alike ĩkalũnĩ na ayĩkala thayũ? Ndithi kũlika vo!” 12 Nĩvo ĩndĩ namanyie kana Ngai ndamũtũmĩte, ĩndĩ Tovia na Sanavalati nĩmo mamũĩvĩte awete wathani ũsu angengethye. 13 Aĩvĩtwe andelemye na aituma nĩka naĩ, nĩ kana makwate itumi sya kũmbanangĩa ĩsyĩtwa na maimbũthya.

14 Ame Ngai wakwa, lilikana Tovia na Sanavalati na meko asu, o vamwe na mwathani mũndũ mũka Noatia na athani ala angĩ matindĩaa kũtata kũndelemya.

15 Kwoou ũkũta nĩwathelile mũthenyanĩ wa 25 mweinĩ wa Eluli,* ĩtina wa kwakwa mĩthenya 52.

16 Yĩla amaitha maitũ onthe meewie ũndũ ũsu oou na mbaĩ syonthe ila syatũthyũlũlũkĩte syawona, nĩmeewie nthoni mũno,* na mamanya kana Ngai witũ nĩwe watumie wĩa ũsu ũthela. 17 Mĩthenyanĩ ĩsu andũ me ndaĩa ma Yuta nĩmatũmĩaa Tovia valũa mbingĩ, nake Tovia aimasũngĩa. 18 Andũ aingĩ ma Yuta nĩmeevĩtĩte kũmũkwata mbau, nũndũ aĩ mũthoni wa Sekania mwana wa Alaa, na mwanae Yeoanani atwaĩte mwĩĩtu wa Mesulamu mwana wa Mbelekia. 19 O na ĩngĩ, matindĩaa kũndavya maũndũ maseo ĩũlũ wake na ĩndĩ maithi kũmũtavya kĩla naweta. Ĩtina wa ũu, Tovia nĩwandũmĩaa valũa sya kũndelemya.

7 Yĩla ũkũta waminie kũtũngĩĩwa oou, nĩneekĩie mĩomo; na ĩndĩ asũvĩi ma mĩvĩa, aini, na Alivai manyuvwa. 2 Nĩvo ĩndĩ naiie mwana-a-ĩthe wakwa Aanani aũngamĩe Yelusalemu, vamwe na Aanania mũnene wa Ngome, nĩkwĩthĩwa aĩ mũndũ mũĩkĩĩku vyũ na wakĩĩte Ngai ũla wa wʼo kwĩ andũ angĩ aingĩ. 3 Kwoou nameie atĩĩ: Mĩvĩa ya Yelusalemu ndyaĩlĩte kũvingũwa nginya sua yĩvyũve, na o maendeee kũsunga, maĩlĩte kũvinga mĩomo na maimĩkĩa ivingi. Na mwaĩlĩte kũnenga ekali ma Yelusalemu wĩa wa kũsunga, kĩla ũmwe aũngame vala waĩlĩte kũsunga na kĩla ũmwe mbee wa nyũmba yake.” 4 Yu ndũa yaĩ nthanthau na nene, na andũ ala maĩ nthĩnĩ wayo maĩ o avũthũ, na nyũmba iyambĩte kũtũngĩĩwa.

5 Ĩndĩ Ngai wakwa nĩweekĩie yĩsilya ngoonĩ yakwa nũmbanyʼe anene me ndaĩa na anini ma atongoi na andũ nĩ kana matalanwʼe lekotinĩ sya mĩsyĩ yoo. Na ĩndĩ noona ĩvuku yatalanĩtye ala masyokie mbee kuma ũtavwanĩ, na neethĩa yĩandĩkĩtwe atĩĩ:

6 Na aa nĩmo andũ ma kĩsio kya nthĩ* ala mambatie kuma ũtavwanĩ, ala Mũsumbĩ Nevukatinesa wa Mbavilonĩ watavĩte na ala ĩtina masyokie Yelusalemu na Yuta, kĩla ũmwe ndũanĩ yake, 7 ala masyokanisye na Nzeluvaveli, Yesua, Neemia, Asalia, Laamia, Naamani, Molitekai, Mbilisani, Misivelethi, Mbikivai, Neumu, na Mbaana.

Ũtalo wa aũme Aisilaeli wailye ta ũũ: 8 ana ma Valosi, 2,172; 9 ana ma Sevatia, 372; 10 ana ma Alaa, 652; 11 ana ma Vaathi-moavi, nzyawanĩ sya Yesua na Yoavu, 2,818; 12 ana ma Elamu, 1,254; 13 ana ma Nzatu, 845; 14 ana ma Nzakai, 760; 15 ana ma Mbinui, 648; 16 ana ma Mbevai, 628; 17 ana ma Asikati, 2,322; 18 ana ma Atonikamu, 667; 19 ana ma Mbikivai, 2,067; 20 ana ma Atini, 655; 21 ana ma Ateli, nzyawanĩ sya Esekia, 98; 22 ana ma Asumu, 328; 23 ana ma Mbenzai, 324; 24 ana ma Alivu, 112; 25 ana ma Ngiveoni, 95; 26 aũme ma Mbethileemu na Netova, 188; 27 aũme ma Anathothi, 128; 28 aũme ma Mbethi-asimavethi, 42; 29 aũme ma Kiliathi-yealimu, Kevila, na Mbeelothi, 743; 30 aũme ma Lama na Ngeva, 621; 31 aũme ma Mikimasu, 122; 32 aũme ma Mbetheli na Ai, 123; 33 aũme ma Nevo ĩla ĩngĩ, 52; 34 ana ma Elamu ũla ũngĩ, 1,254; 35 ana ma Alimu, 320; 36 ana ma Yeliko, 345; 37 ana ma Lotu, Atiti, na Ono, 721; 38 ana ma Senaa, 3,930.

39 Ũtalo wa athembi wailye ta ũũ: ana ma Yetaia kuma nyũmbanĩ ya Yesua, 973; 40 ana ma Imeli, 1,052; 41 ana ma Vasuli, 1,247; 42 ana ma Alimu, 1,017.

43 Ũtalo wa Alivai wailye ta ũũ: ana ma Yesua, ma Katimieli, kuma mũsyĩnĩ wa Oteva, 74. 44 Ũtalo wa aini wailye ta ũũ: ana ma Asavu, 148. 45 Ũtalo wa asũvĩi ma mĩvĩa wailye ta ũũ: ana ma Salumu, ana ma Ateli, ana ma Talimoni, ana ma Akuvu, ana ma Atita, ana ma Sovai, 138.

46 Athũkũmi ma ĩkalũnĩ* ala masyokie maĩ aa: ana ma Nziia, ana ma Asuva, ana ma Tavaothi, 47 ana ma Kelosi, ana ma Sia, ana ma Vatoni, 48 ana ma Levana, ana ma Akava, ana ma Salimai, 49 ana ma Anani, ana ma Ngiteli, ana ma Kaali, 50 ana ma Leaia, ana ma Lesini, ana ma Nekota, 51 ana ma Ngasamu, ana ma Usa, ana ma Vasea, 52 ana ma Mbesai, ana ma Ameuni, ana ma Nevusesimu, 53 ana ma Mbakivuki, ana ma Akuva, ana ma Aliuli, 54 ana ma Mbasilithi, ana ma Meita, ana ma Alisa, 55 ana ma Mbalikosi, ana ma Sisela, ana ma Tema, 56 ana ma Nesia, ana ma Ativa.

57 Ana ma athũkũmi ma Solomoni ala masyokie maĩ aa: ana ma Sotai, ana ma Sovelethi, ana ma Velita, 58 ana ma Yaala, ana ma Ndalikoni, ana ma Ngiteli, 59 ana ma Sevatia, ana ma Atili, ana ma Vokelethi-asevaimu, ana ma Amoni. 60 Athũkũmi onthe ma ĩkalũnĩ* na ana ma athũkũmi ma Solomoni maĩ 392.

61 Na aa nĩmo mambatie kuma Teli-mela, Teli-alisa, Keluvi, Atoni, na Imeli, ĩndĩ mayaĩ matonya kũĩkĩĩthya kana nyũmba sya aa-ĩthe moo syaĩ sya Isilaeli na kana mo ene maĩ Aisilaeli: 62 ana ma Ndelaia, ana ma Tovia, ana ma Nekota, 642. 63 Na kuma athembinĩ vaĩ ana ma Avaia, ana ma Akosi, ana ma Mbalisilai, ũla waumisye kĩveti eĩtunĩ ma Mbalisilai, ũla waĩ Mũngileati, na eetanĩwʼa na ĩsyĩtwa ya mũsyĩ woo. 64 Asu nĩmo mamanthie masyĩtwa ma mĩsyĩ yoo lekotinĩ sya masyĩtwa ma mĩsyĩ yonthe, ĩndĩ mayaamona, na kwoou mayaaĩtĩkĩlwʼa ũthũkũminĩ wa ũthembi.* 65 Ngavana* ameie mayaĩlĩte kũya syĩndũ ila ntheu vyũ nginya yĩla vakakwatĩkana mũthembi ũtonya kũkũlya ũtao atũmĩĩte Ulimu na Thumimu.

66 Ũtalo wa ũmbano wʼonthe waĩ 42,360, 67 tũteũtala aũme moo ngombo na aka ngombo, ala maĩ 7,337; o na maĩ na aini aũme na aini aka 245. 68 Maĩ na mbalasi 736, nyũmbũ 245, 69 ngamĩle 435, mangʼoi 6,720.

70 Aũngamĩi amwe ma nyũmba sya aa-ĩthe moo nĩmaumisye mĩvothi kwondũ wa wĩa ũsu. Ngavana* anenganie ndulakima sya thaavu 1,000,* mbakũli 50, na kanzũ sya athembi 530 vala vaiawa ũthwii. 71 Na aũngamĩi amwe ma nyũmba sya aa-ĩthe nĩmanenganie ndulakima sya thaavu 20,000 na mina sya vetha 2,200* iiwe vala vaiawa mbesa sya kũtethya wĩa. 72 Na andũ ala angĩ manenganie ndulakima sya thaavu 20,000, mina sya vetha 2,000, na kanzũ 67 sya athembi.

73 Na athembi, Alivai, asũvĩi ma mĩvĩa, aini, andũ amwe, athũkũmi ma ĩkalũnĩ,* na Aisilaeli ala angĩ onthe* nĩmatũie ndũanĩ syoo. Mwei wa mũonza ũivika, Aisilaeli maĩ matũie ndũanĩ syoo.

8 Andũ onthe nĩmoombanĩie kĩwanzanĩ kya ndũa mbee wa Mũvĩa wa Kĩwʼũ me na kĩeleelo kĩmwe, na meea mũandĩki* Esila aete ĩvuku ya Mĩao ya Mose, ĩla Yeova weeaĩe Aisilaeli. 2 Kwoou mũthenyanĩ wa mbee wa mwei wa mũonza, mũthembi Esila nĩwaetie Mĩao mbee wa ũmbano wa aũme, aka, na onthe ala maĩ matonya kwĩthukĩĩsya na kũelewa. 3 Na amĩsomea mbee wa kĩwanza kya ndũa mbee wa Mũvĩa wa Kĩwʼũ, kuma kwakya nginya mũthenya katĩ. Asomeie aũme, aka, na onthe ala maĩ matonya kũelewa; na andũ methukĩĩsya nesa ĩvuku ya Mĩao. 4 Na mũandĩki* Esila aũngamĩte kĩtaanĩ kya mbwaũ kyaseũvĩtwʼe kwondũ wa ũndũ ũsu; na ala maũngamĩte ũtee wake kwʼokonĩ kwake kwa aũme maĩ Matithia, Sema, Anaia, Ulia, Ilikia, na Maaseia; na ala maũngamĩte kwʼokonĩ kwake kwa aka maĩ Vetaia, Misaeli, Malikiya, Asumu, Asi-vatana, Nzekalia, na Mesulamu.

5 Esila nĩwavuie ĩvuku yĩu andũ onthe mene, nĩkwĩthĩwa aũngamĩte vandũ vatũlu kwĩ andũ onthe. Na aendeee kũyĩvua, andũ onthe nĩmaũngamie. 6 Nĩvo ĩndĩ Esila wamũtaĩie Yeova Ngai ũla wa wʼo, Ũla mũnene, na andũ onthe masũngĩa masya, “Ameni!* Ameni!” na mookĩlya moko moo. Na ĩndĩ makumana nginya nthĩ na mothyũ moo na mavalũka mbee wa Yeova. 7 Na Yesua, Mbani, Selevia, Yamini, Akuvu, Savethai, Otia, Maaseia, Kelita, Asalia, Yosavatu, Anani, na Velaia, ala maĩ Alivai, maeleasya andũ Mĩao, o andũ asu maũngye. 8 Na maendeea kũsoma ĩvuku yĩu na wasya mũnene, Mĩao ya Ngai ũla wa wʼo, mayĩelesya nesa na ũtheinĩ kĩla ndeto isu syoonanasya; kwoou matetheesya andũ maelewa kĩla kyasomawa.*

9 Na Neemia, ũla nĩwe waĩ ngavana* ĩvindanĩ yĩu, Esila ũla waĩ mũthembi na mũandĩki,* na Alivai ala mamanyĩasya andũ meea andũ onthe atĩĩ: “Mũthenya ũũ nĩ mũtheu kwa Yeova Ngai wenyu. Mũikamete o na mũikaĩe.” Nĩkwĩthĩwa andũ onthe nĩmaĩaa methukĩĩsye ndeto sya Mĩao. 10 Ameie atĩĩ: “Endai, mũye syĩndũ ila nzeo* na mũinywʼa kĩla kĩ mũyo, na mũinenga lĩu ala mate na kĩndũ; nĩkwĩthĩwa mũthenya ũũ nĩ mũtheu kwa Mwĩai witũ, na mũikewʼe woo, nũndũ ũtanu wa Yeova nĩ ngome yenyu.”* 11 Na Alivai makiakiasya andũ onthe, mayasya: “Ekai kũĩa! nĩkwĩthĩwa mũthenya ũũ nĩ mũtheu, na mũikewʼe woo.” 12 Kwoou andũ onthe mathi kũya na kũnywʼa na kũtwaĩa andũ angĩ lĩu na matana mũno, nĩkwĩthĩwa nĩmaeleiwe ndeto ila maĩ manatavwʼa.

13 Na mũthenyanĩ wa kelĩ, aũngamĩi ma nyũmba sya aa-ĩthe sya andũ onthe, athembi, na Alivai moombana mathyũlũlũkĩte mũandĩki* Esila nĩ kana makwate ũmanyi mwingangĩ wa ndeto sya Mĩao. 14 Na ĩndĩ meethĩa vaandĩkĩtwe Mĩaonĩ kĩla Yeova weeaĩte kwĩsĩla Mose kana Aisilaeli maĩle kwĩkala ivandanĩ* ĩvindanĩ ya mboka mweinĩ wa mũonza, 15 na kana maĩlĩte kũtavanyʼa na maitangaasa kĩla vandũ ndũanĩ syoo syonthe na Yelusalemu yonthe, mayasya: “Endai kĩsionĩ kĩ iĩma mũkaete mbonge syĩ matũ sya mĩthata, mĩsonovali, mĩandasi na mĩtende, na mbonge syĩ matũ sya mĩtĩ ĩngĩ mũseũvye ivanda, kwosana na kĩla kĩandĩkĩtwe.”

16 Kwoou andũ mathi na maiete nĩ kana meseũvĩsye ivanda, kĩla ũmwe kĩalanĩ kyake, o vamwe na iwanzanĩ syoo, iwanzanĩ sya nyũmba ya Ngai ũla wa wʼo, kĩwanzanĩ kya ndũa kya Mũvĩa wa Kĩwʼũ, na kĩwanzanĩ kya ndũa kya Mũvĩa wa Evilaimu. 17 Nũndũ wa ũu, andũ onthe ma ũmbano ala maĩ manauma ũtavwanĩ maseũvya ivanda na mekala ivandanĩ isu, nĩkwĩthĩwa Aisilaeli mayeekĩte ũu kuma mĩthenyanĩ ya Yosua mwana wa Nuni nginya mũthenyanĩ ũsu, na kĩu kyatuma kwĩthĩwa na ũtanu mwingĩ mũno. 18 Na mũthenya kũthi ũla ũngĩ ĩvuku ya Mĩao ya Ngai ũla wa wʼo nĩyasomawa, kuma mũthenya wa mbee nginya mũthenyanĩ wa mũthya. Na nĩmeethĩiwe na mboka mĩthenya mũonza, na kwaĩ na ũmbano wa mwanya mũthenyanĩ wa nyanya, o ũndũ kweeyĩaĩtwe.

9 Mũthenyanĩ wa 24 mweinĩ ũsu, Aisilaeli nĩmoombanie; nĩmatĩĩie kũya mekĩĩte ngũa sya makunia na meeyũmba kĩtoo. 2 Aisilaeli nĩmeevathanie na aeni onthe, na maũngama maumbũla naĩ syoo na mavĩtyo ma aa-ĩthe. 3 Na ĩndĩ maũngama vandũ voo, na kwa ĩvinda ya masaa atatũ,* masoma ĩvuku ya Mĩao ya Yeova Ngai woo na wasya mũnene; na matũmĩa masaa angĩ atatũ mayumbũla naĩ syoo na kũmũkumanĩa Yeova Ngai woo.

4 Yesua, Mbani, Katimieli, Sevania, Mbuni, Selevia, Mbani, na Kenani nĩmaũngamie kĩtaanĩ kĩtũlu kya Alivai, na mamũĩĩa Yeova Ngai woo na wasya mũnene. 5 Na Yesua, Katimieli, Mbani, Asavineia, Selevia, Otia, Sevania, na Vethaia ala maĩ Alivai masya atĩĩ: “Ũngamai na mũitaĩa Yeova Ngai wenyu kuma tene na tene kũvika tene na tene.* Na ekai mataĩe ĩsyĩtwa yaku ĩtheu, yĩla yĩnenevetwʼe ĩũlũ wa moathimo onthe na ũtaĩo wʼonthe.

6 “We wĩ weka nue Yeova; nĩwoombie matu, ĩĩ, ĩtu yĩla yĩ ĩũlũ wa matu na kyonthe kĩla kĩ nthĩnĩ wayo,* nthĩ na kyonthe kĩla kĩ ĩũlũ wayo, mokanga na kyonthe kĩla kĩ nthĩnĩ wamo. Nũsyĩkalasya syonthe syĩ thayũ, na nguthu sya matunĩ niũkumanĩaa. 7 Nue Yeova Ngai ũla wa wʼo, ũla wanyuvie Avalamu na wamumya Ulu ya Akalitei na wamwĩta Avalaamu. 8 Nĩwoonie ngoo yake yĩ ndĩkĩĩku mbee waku, na kwoou watianĩa ũtianĩo nake wĩmũnenga nthĩ ya Akanaanĩ, Aititi, Aamoli, Avelisi, Ayevusi, na Angilikasi, vamwe na ũsyao wake;* na nĩweanĩisye mawatho maku, nĩkwĩthĩwa wĩ mũlũngalu.

9 “Kwoou nĩwoonie mathĩna ma aa-ũmae maitũ me Misili, na weewʼa kĩĩo kyoo me Ũkanganĩ Mũtune. 10 Na ĩndĩ weeka mawonanyʼo na syama ĩũlũ wa Valao na athũkũmi make onthe na andũ onthe ma nthĩ yake, nũndũ nĩweesĩ kana nĩmeekie andũ maku maũndũ ma mĩtũlyo. Nĩweeseũvĩisye ĩsyĩtwa yĩla yĩtwĩe vo nginya ũmũnthĩ. 11 Na waaanyʼa ũkanga mbee woo, na kwoou maingĩla ũkanganĩ mesĩle nthĩ nyũmũ, na wekya ala mamaatĩĩe ũkanganĩ nthĩnĩ ta ĩvia yekwʼa ũkanganĩ wĩ na kĩwʼũ kĩ na itulumo. 12 Mũthenya wamatongoeasya na kĩtuĩ kya ĩtu, na ũtukũ na kĩtuĩ kya mwaki, nĩ kana ũmamulĩkĩle nzĩa ĩla maĩlĩte kwĩsĩla. 13 Na nĩwatheeie Kĩĩmanĩ kya Sinaĩ na waneena namo kuma ĩtunĩ na wamanenga motwʼĩo malũngalu, mĩao ya wʼo,* myolooto mĩseo na maũndũ angĩ wameaĩe meke. 14 Nĩwamamanyĩthisye Savato yaku ntheu, na wamanenga maũndũ ala wameaĩe meke, myolooto, na mĩao kwĩsĩla mũthũkũmi waku Mose. 15 Yĩla maĩ na nzaa nĩwamanengie mũkate kuma ĩtunĩ, na yĩla maĩ na waũni nĩwamaumĩisye kĩwʼũ ĩvianĩ yĩ ngũka, na wamea malike mamesye nthĩ ĩla weevĩtĩte kũmanenga.*

16 “Ĩndĩ mo aa-ũmae maitũ nĩmeekie maũndũ na mĩtũlyo na moomya syongo syoo,* na mayaaĩthukĩĩsya mĩao yaku. 17 Nĩmaleile kwĩthukĩĩsya, na mayaalilikana meko maku ma ũsengyʼo ala weekĩte katĩ woo, vandũ va ũu nĩmoomisye syongo syoo* na meenyuvĩa mũtongoi masyoke ũkombonĩ Misili. Ĩndĩ we wĩ Ngai wĩthĩawa eyũmbanĩtye kũekea,* wĩ ĩnee* na tei, ũtathataa na mĩtũkĩ na wĩ wendo mwingĩ ũtathelaa,* na ndwaamatia. 18 O na yĩla meeseũvĩsye mũvwʼanano wa kyũma* wa kasaũ na maasya, ‘Ũũ nĩwe Ngai waku ũla wakũtongoesye kuma Misili,’ na meeka meko manene mate na ndaĩa, 19 o na ĩvindanĩ yĩu we, nũndũ wĩ tei mwingĩ, ndwaamatia yĩla maĩ weũnĩ. Kĩtuĩ kya ĩtu kĩyaauma ĩũlũ woo mũthenya nĩ kana kĩmatongoesye nzĩanĩ, o na kĩtuĩ kya mwaki kĩyaauma ĩũlũ woo ũtukũ nĩ kana kĩmamulĩkĩle nzĩa ĩla maĩlĩte kwĩsĩla. 20 Na nĩwamanengie veva waku mũseo nĩ kana methĩwe na ũmanyi, na ndwaamavata mana makanywʼanĩ moo, na nĩwamanengie kĩwʼũ yĩla maĩ na waunĩ. 21 Wamanengie lĩu me weũnĩ myaka 40. Mayaaaĩwa nĩ kĩndũ. Ngũa syoo iyaakũa, na maaũ moo mayaaimba.

22 “Nĩwamanengie mosumbĩ na ngo sya andũ, wamaaĩa kĩlungu kwa kĩlungu, na kwoou mamesya nthĩ ya Sioni, nayo nĩ, nthĩ ya mũsumbĩ Esivoni, o vamwe na nthĩ ya Oku mũsumbĩ wa Mbasani. 23 Na nĩwatumie ana moo methĩwa me aingĩ mũno ta ndata sya matunĩ. Na ĩndĩ wamaete nthĩ ĩla wathĩte aa-ũmae moo kana makamĩlika na maimĩmesya. 24 Kwoou ana moo nĩmalikile nthĩ ĩsu na mamĩmesya, na wakĩlya Akanaanĩ vinya mbee woo, ala maĩ ekali ma nthĩ ĩsu, na wamanengane kwʼokonĩ kwoo, asumbĩ moo vamwe na ngo sya andũ sya nthĩ ĩsu, nĩ kana mekane namo ũndũ mekwenda. 25 Na makwata ndũa mbiĩĩe na nthĩ nou, na nyũmba syusĩe mĩthemba yonthe ya syĩndũ nzeo, ithima syaĩ mbĩnze, mĩũnda ya mĩsavivũ, mĩũnda ya mĩthata, na mĩtĩ mingĩ ya matunda. Kwoou nĩmaĩe na meanĩwa na manoa, na meetanĩthya ũseonĩ waku mwingĩ.

26 “Ĩndĩ o na ũu wĩ o vo, nĩmaleile kũkwĩwʼa na maleana naku na mathyũũĩa Mĩao yaku mĩongo yoo.* Nĩmooaie athani maku ala mamakanasya mamatũnge kũla ũĩ, na meeka maũndũ mekwonanyʼa kana mai na ndaĩa o na vanini. 27 Nũndũ wa ũu, nĩwamanenganie mokonĩ ma amaitha moo, ala maendeeie kũmathĩnyʼa. Ĩndĩ nĩmakũĩĩaa yĩla meũthĩna, naku nĩwamewʼaa wĩ ĩtunĩ; na nũndũ wa tei waku mwingĩ, nĩwamanengae atangĩĩi mamavonokye kuma mokonĩ ma amaitha moo.

28 “Ĩndĩ wamina kũmavonokya oou, nĩmeekaa ĩngĩ kĩla kĩthũku mbee waku, naku nĩwamanenganae mokonĩ ma amaitha moo, namo maimasumbĩka.* Ĩtina wa ũu, nĩmakũsyokeaa na maikwĩkaĩla ũmatetheesye, naku nĩweewʼaa wĩ ĩtunĩ na ũimavonokya ĩngĩ na ĩngĩ nũndũ wa tei waku mwingĩ. 29 O na kau nĩwamakanasya nĩ kana ũmatũnge Mĩaonĩ yaku, nĩmeekie maũndũ na mĩtũlyo na malea kwĩthukĩĩsya mĩao yaku; na nĩmavĩtisye nũndũ wa kũlea kũatĩĩa myolooto yaku, ĩla mũndũ wĩkalaa thayũ amĩatĩĩa. Ĩndĩ nĩmoomisye syongo syoo na kĩu kyatuma mathyũũa mĩongo yoo na moomya ngingo syoo, na malea kwĩthukĩĩsya. 30 Nĩwamomĩĩisye myaka mingĩ na waendeea kũmakanyʼa na veva waku ũtũmĩĩte athani maku, ĩndĩ mayaakwĩthukĩĩsya. Mũthya, nĩwamanenganie mokonĩ ma ngo sya andũ sya i nthĩ. 31 Na teinĩ waku mwingĩ, ndwaamamina kana ũkamatia, nũndũ wĩ Ngai wĩ ĩnee* na tei.

32 “Na yu, ame Ngai witũ, Ngai mũnene, wĩ vinya, na waĩle kũkĩwa na kũnengwa ndaĩa, ũla wĩanĩĩtye ũtianĩo wake na wonanĩtye wendo wake ũtathelaa, ndũkavũthĩĩsye mathĩna onthe ala matũkwatĩte ithyĩ, asumbĩ maitũ, anene maitũ, athembi maitũ, athani maitũ, aa-ũmae maitũ, na andũ maku onthe kuma mĩthenyanĩ ya asumbĩ ma Asuli kũvika ũmũnthĩ. 33 Wĩthĩĩtwe wĩ mũlũngalu maũndũnĩ onthe ala matũkwatĩte, nĩkwĩthĩwa wĩ mũĩkĩĩku; ĩndĩ nithyĩ twĩkĩte maũndũ mathũku. 34 Asumbĩ maitũ, anene maitũ, athembi maitũ, na aa-ũmae maitũ, mayaakwata Mĩao yaku o na mayaaĩthukĩĩsya maũndũ ala wameaĩe meke kana molilikanyʼo* ala wamakanisye namo. 35 O na yĩla maĩ ũsumbĩnĩ woo na matanĩaa syĩndũ mbingĩ nzeo ila wamanengete na maĩ nthĩ nthanthau na nou ĩla wamanengete, mayaakũthũkũma na mayaatia imanyĩo syoo nthũku. 36 Nũndũ wa ũu, ũmũnthĩ twĩ ngombo. Ĩĩ, twĩ ngombo nthĩ ĩla wanengie aa-ũmae maitũ maĩsae ũsyao wayo na syĩndũ syayo nzeo. 37 Ũsyao wayo mwingĩ nĩ wa asumbĩ ala ũiĩte ĩũlũ witũ nũndũ wa naĩ sitũ. Matũsumbĩkaa ithyĩ* na indo sitũ ũndũ mekwenda, na twĩ thĩnanĩ mũnene mũno.

38 “Kwoou nũndũ wa maũndũ asu onthe, nĩtũkũandĩka ũtianĩo mũlũmu, na ũyĩĩkĩĩthwʼa kwa kwĩkĩwa mũulĩ wa anene maitũ, Alivai maitũ, na athembi maitũ.”

10 Ala maĩkĩĩthisye ũtianĩo ũsu kwa kũwĩkĩa mũulĩ maĩ:

9 O na ĩngĩ, Alivai aa nĩmo meekĩie mũulĩ ũtianĩo ũsu: Yesua mwana wa Asania, Mbinui wa ana ma Enatati, Katimieli, 10 na ana-a-ĩthe Sevania, Otia, Kelita, Velaia, Anani, 11 Mika, Leovu, Asavia, 12 Nzakuli, Selevia, Sevania, 13 Otia, Mbani, na Mbeninu.

14 Aũngamĩi aa ma andũ nĩmo mawĩkĩie mũulĩ: Valosi, Vaathi-moavi, Elamu, Nzatu, Mbani, 15 Mbuni, Asikati, Mbevai, 16 Atoniya, Mbikivai, Atini, 17 Ateli, Esekia, Asulu, 18 Otia, Asumu, Mbenzai, 19 Alivu, Anathothi, Nevai, 20 Makiviasi, Mesulamu, Eesili, 21 Mesesaveli, Nzatoki, Yatua, 22 Velatia, Anani, Anaia, 23 Osiea, Aanania, Asuvu, 24 Aloesi, Vilia, Soveki, 25 Leumu, Asavina, Maaseia, 26 Aiya, Anani, Ananu, 27 Maluku, Alimu, na Mbaana.

28 Na andũ ala angĩ, namo nĩ athembi, Alivai, asũvĩi ma mĩvĩa, aini, athũkũmi ma ĩkalũnĩ,* na kĩla mũndũ weevathĩte kuma ngonĩ sya andũ sya i nthĩ nĩ kana aatĩĩe Mĩao ya Ngai ũla wa wʼo, o vamwe na iveti syoo, ana moo, na eĩtu moo, onthe ala maĩ na ũmanyi na ũtonyi wa kũelewa maũndũ,* 29 nĩmakwatanie na ana-a-ĩthe, aũme moo me nguma, na meeyova na kĩumo na wĩvĩto, nĩ kana maendelae Mĩaonĩ ya Ngai ũla wa wʼo, ĩla wanenganie kwĩsĩla Mose mũthũkũmi wa Ngai ũla wa wʼo, na maiatĩĩaa nesa maũndũ onthe ala Yeova Mwĩai witũ wĩaĩte mekwe, motwʼĩo make, na myolooto yake. 30 Tũikanenga ngo sya andũ ma i nthĩ eĩtu maitũ, na tũikosea ana maitũ eĩtu moo.

31 Ethĩwa andũ ma ngo sya i nthĩ makatũetee syĩndũ na kĩla mũthemba wa lĩu wa mbaa ngetha matũthooesye mũthenyanĩ wa Savato, tũikamathooea kĩndũ o na kĩmwe mũthenyanĩ wa Savato kana mũthenyanĩ mũtheu. O na ĩngĩ, mwakanĩ wa mũonza tũkaeka nthĩ ĩthũmũe na tũiekea onthe ala tũtaĩte.

32 O na nĩtweeyĩkĩĩie mwĩao kĩla ũmwe witũ aumasye kĩlungu kya katatũ kya sekeli* kĩla mwaka kwondũ wa ũthũkũmi wa nyũmba* ya Ngai witũ, 33 kwondũ wa mĩkate ĩla ĩvangawa tũkundi ĩilĩanĩlwʼe,* nthembo ya lĩu ya kĩla ĩvinda, nthembo ya kũvĩvwʼa ĩla yumawʼa kĩla ĩvinda ya Savato na kũtisa kwa myei, na kwondũ wa mboka ila itwʼĩtwe, kwondũ wa syĩndũ ntheu, kwondũ wa nthembo sya naĩ sya kwĩwʼanĩthya Aisilaeli, na kwondũ wa wĩa wʼonthe wa nyũmba ya Ngai witũ.

34 O na ĩngĩ, nĩtwakũnie kula tũmanye nĩ ĩndĩĩ athembi, Alivai, na andũ makaetae ngũ nyũmbanĩ ya Ngai witũ kwosana na nyũmba sya aa-ĩthe maitũ, mavindanĩ ala manyuvĩtwe, mwaka kũthi ũla ũngĩ, nĩ kana syakanĩe kĩthembeonĩ kya Yeova Ngai witũ, kwosana na kĩla kĩandĩkĩtwe Mĩaonĩ. 35 O na tũkaetae nyũmbanĩ ya Yeova ũsyao wa mbee mwĩu wa nthĩ yitũ na ũsyao wa mbee mwĩu wa kĩla mũthemba wa mũtĩ wa matunda, mwaka kũthi ũla ũngĩ, 36 o vamwe na makithathi ma ana maitũ* na nyamũ ĩla yasyawa mbee indonĩ sitũ, kwosana na kĩla kĩandĩkĩtwe Mĩaonĩ, na nyamũ ĩla yasyawa mbee ngʼombenĩ sitũ na malondunĩ na mbũinĩ sitũ. Tũkasietae nyũmbanĩ ya Ngai witũ, vala ve athembi ala mathũkũmaa nyũmbanĩ ya Ngai witũ. 37 O na ĩngĩ, ũsyao wa mbee wa mũtu witũ ũte mũvinyĩthye, mĩvothi yitũ, ũsyao wa kĩla mũthemba wa mũtĩ, mbinyu nzaũ, na mauta, twaĩlĩte kũeteae athembi tũlumunĩ twa kwia syĩndũ twa* nyũmba ya Ngai witũ, o na tũkaeteae Alivai kĩlungu kya ĩkũmi kya nthĩ yitũ, nĩkwĩthĩwa Alivai nĩmo mombanasya ilungu sya ĩkũmi sya ndũa sitũ syonthe ila tũĩmaa.

38 Na no nginya mũthembi, mwana wa Alũni, ethĩwe vamwe na Alivai yĩla Alivai mekũmbanyʼa kĩlungu kya ĩkũmi; namo Alivai maĩlĩte kũete kĩlungu kya ĩkũmi kya kĩlungu kya ĩkũmi nyũmbanĩ ya Ngai witũ, tũlumunĩ twa* ĩkũmbĩ. 39 Nĩkwĩthĩwa tũlumunĩ twa kwia syĩndũ* nĩ vo Aisilaeli na ana ma Alivai maĩlĩte kũete mũvothi wa lĩu wa mbaa ngetha, mbinyu nzaũ, na mauta, na nĩ vo mĩio ya vala vandũ vatheu yĩthĩawa, o vamwe na athembi ala meũthũkũma, asũvĩi ma mĩvĩa, na aini. Tũikalekeleelya nyũmba ya Ngai witũ.

11 Yu anene ma andũ mekalaa Yelusalemu; ĩndĩ andũ ala angĩ nĩmakũnie kula nĩ kana maete mũndũ ũmwe katĩ wa kĩla andũ ĩkũmi ekale Yelusalemu, ĩla ndũa ntheu, namo ala angĩ kenda mayĩkala ndũanĩ ila ingĩ. 2 O na ĩngĩ, andũ nĩmaathimie aũme onthe ala meeyumisye mekale Yelusalemu.

3 Na aa nĩmo maĩ aũngamĩi ma kĩsio kya nthĩ* ala mekalaa Yelusalemu. (Aisilaeli ala angĩ, athembi, Alivai, athũkũmi ma ĩkalũnĩ,* na ana ma athũkũmi ma Solomoni, mekalaa ndũanĩ ila ingĩ sya Yuta, kĩla ũmwe vala waaĩwe amesye ndũanĩ yake.

4 O na ve andũ amwe ma Yuta na ma Mbenyamini mekalaa Yelusalemu.) Kuma andũnĩ ma Yuta vaĩ Athaia mwana wa Usia mwana wa Nzekalia mwana wa Amalia mwana wa Sevatia mwana wa Maalaleli wa ana ma Velesi, 5 na Maaseia mwana wa Mbaluku mwana wa Koliose mwana wa Aasaia mwana wa Ataia mwana wa Yoialivu mwana wa Nzekalia mwana wa Mũsiela. 6 Ana onthe ma Velesi ala matwĩe Yelusalemu maĩ aũme 468 me ũtonyi.

7 Na aa nĩmo maĩ andũ ma Mbenyamini: Salu mwana wa Mesulamu mwana wa Yoeti mwana wa Vetaia mwana wa Kolaia mwana wa Maaseia mwana wa Ithieli mwana wa Yesaia, 8 na ĩtina wake Ngavai na Salai, andũ 928; 9 na Yoeli mwana wa Nzikili nĩwe waĩ mũsyaĩĩsya woo, na Yuta mwana wa Asenua nĩwe waatĩĩe aũngamĩe ndũa.

10 Kuma kwa athembi: Yetaia mwana wa Yoialivu, Yakini, 11 Selaia mwana wa Ilikia mwana wa Mesulamu mwana wa Nzatoki mwana wa Melaiothi mwana wa Aituvu, mũtongoi wa nyũmba* ya Ngai ũla wa wʼo, 12 na ana-a-ĩthe moo ala matethisye wĩa wa ĩla nyũmba, maĩ 822; na Ataia mwana wa Yeloamu mwana wa Velalia mwana wa Amisi mwana wa Nzekalia mwana wa Vasuli mwana wa Malikiya, 13 na ana-a-ĩthe, aũngamĩi ma nyũmba sya aa-ĩthe, maĩ 242; na Amasisai mwana wa Asaleli mwana wa Aisai mwana wa Mesilemothi mwana wa Imeli, 14 na ana-a-ĩthe moo ala maĩ aũme me vinya, na ngũmbaũ, maĩ 128; na mũsyaĩĩsya woo aĩ Nzavitieli, ũla waumĩte mũsyĩnĩ wĩ nguma.

15 Na kuma kwa Alivai: Semaia mwana wa Asuvu mwana wa Asilikamu mwana wa Asavia mwana wa Mbuni, 16 na Savethai na Yosavatu, ala maĩ ma aũngamĩi ma Alivai, maũngamĩe wĩa ũla watethawʼa nza wa nyũmba ya Ngai ũla wa wʼo; 17 na Matania, mwana wa Mika mwana wa Nzaviti mwana wa Asavu, mũtongoi wa wini, ũla watongoeasya mbathi sya kũtaĩa ĩvindanĩ ya mboya, na Mbakivukia, mũtetheesya wa ana-a-ĩthe, na Avita mwana wa Samua mwana wa Ngalali mwana wa Yetuthuni. 18 Alivai onthe ala maĩ ndũanĩ ntheu maĩ 284.

19 Na asũvĩi ma mĩvĩa maĩ Akuvu, Talimoni, na ana-a-ĩthe ala masungaa mĩvĩa, andũ 172.

20 Aisilaeli ala angĩ, athembi, na Alivai maĩ ndũanĩ ila ingĩ syonthe sya Yuta, kĩla ũmwe ũtiĩwanĩ wake ũla wanengetwe.* 21 Na athũkũmi ma ĩkalũnĩ* mekalaa Oveli, na Nziia na Ngisiva nĩmo maũngamĩe athũkũmi ma ĩkalũnĩ.*

22 Na mũsyaĩĩsya wa Alivai kũu Yelusalemu aĩ Usisi mwana wa Mbani mwana wa Asavia mwana wa Matania mwana wa Mika, wa ana ma Asavu, ala aini; nĩwe waũngamĩe wĩa wa nyũmba ya Ngai ũla wa wʼo. 23 Nĩkwĩthĩwa mũsumbĩ nĩwaumĩtye mwĩao kwondũ woo, na vaĩ na mũvango watwʼĩtwe wa kũsũvĩaa aini kwosana na mavata moo ma kĩla mũthenya. 24 Na Vethaia mwana wa Mesesaveli wa ana ma Nzela mwana wa Yuta nĩwe waĩ mũtai wa mũsumbĩ* kĩla ũndũnĩ ũkonetye andũ.

25 Na aa nĩmo motũi na isio syamo: Andũ amwe ma Yuta mekalaa Kiliathi-aliva na tũtũlanĩ twayo,* Ndivoni na tũtũlanĩ twayo, Yekaviseeli na motũinĩ mayo, 26 Yesua, Molata, Mbethi-veleti, 27 Asali-suali, Mbeeli-sieva na tũtũlanĩ twayo,* 28 Nzikilaki, Mekona na tũtũlanĩ twayo,* 29 Eni-limoni, Nzola, na Yalimuthi, 30 Nzanoa, Atulamu na motũinĩ masyo, Lakisi na isio syayo, na Aseka na tũtũlanĩ twayo.* Matũie* kuma Mbeeli-sieva nginya Mwandanĩ wa Inomu.

31 Na andũ ma Mbenyamini matwĩe Ngeva, Mikimasi, Aiya, Mbetheli na tũtũlanĩ twayo,* 32 Anathothi, Novu, Anania, 33 Asoli, Lama, Ngitaimu, 34 Atiti, Nzevoimu, Nevalati, 35 Lotu, na Ono, mwanda wa mavundi. 36 Na ikundi imwe sya Alivai kuma Yuta syatũie kĩsionĩ kya Mbenyamini.

12 Aa nĩmo athembi na Alivai ala mambatanisye na Nzeluvaveli mwana wa Sealitieli, na Yesua: Selaia, Yelemia, Esila, 2 Amalia, Maluku, Atusi, 3 Sekania, Leumu, Melemothi, 4 Ito, Nginethoi, Aviya, 5 Miyamini, Maatia, Mbilika, 6 Semaia, Yoialivu, Yetaia, 7 Salu, Amoki, Ilikia, na Yetaia. Asu nĩmo maĩ aũngamĩi ma athembi na ana-a-ĩthe moo mĩthenyanĩ ya Yesua.

8 Alivai maĩ Yesua, Mbinui, Katimieli, Selevia, Yuta, na Matania, ũla watongoeasya mbathi sya kũtũnga mũvea e vamwe na ana-a-ĩthe. 9 Na ana-a-ĩthe moo Mbakivukia na Uni maũngamaa masianĩtye namo yĩla me wĩanĩ wa kũsunga.* 10 Yesua nĩwe waĩ ĩthe wa Yoiakimu, na Yoiakimu nĩwe waĩ ĩthe wa Eliasivu, na Eliasivu nĩwe waĩ ĩthe wa Yoiata. 11 Na Yoiata nĩwe waĩ ĩthe wa Yonathani, na Yonathani nĩwe waĩ ĩthe wa Yatua.

12 Mĩthenyanĩ ya Yoiakimu, aa nĩmo maĩ athembi, aũngamĩi ma nyũmba sya aa-ĩthe: Melaia nĩwe waũngamĩe mũsyĩ wa Selaia; Aanania nĩwe waũngamĩe mũsyĩ wa Yelemia; 13 Mesulamu nĩwe waũngamĩe mũsyĩ wa Esila; Yeoanani nĩwe waũngamĩe mũsyĩ wa Amalia; 14 Yonathani nĩwe waũngamĩe mũsyĩ wa Maluki; Yosevu nĩwe waũngamĩe mũsyĩ wa Sevania; 15 Atina nĩwe waũngamĩe mũsyĩ wa Alimu; Elikai nĩwe waũngamĩe mũsyĩ wa Melaiothi; 16 Nzekalia nĩwe waũngamĩe mũsyĩ wa Ito; Mesulamu nĩwe waũngamĩe mũsyĩ wa Nginethoni; 17 Nzikili nĩwe waũngamĩe mũsyĩ wa Aviya; . . .* nĩwe waũngamĩe mũsyĩ wa Miniamini; Vilitai nĩwe waũngamĩe mũsyĩ wa Moatia; 18 Samua nĩwe waũngamĩe mũsyĩ wa Mbilika; Yeonathani nĩwe waũngamĩe mũsyĩ wa Semaia; 19 Matenai nĩwe waũngamĩe mũsyĩ wa Yoialivu; Usisi nĩwe waũngamĩe mũsyĩ wa Yetaia; 20 Kalai nĩwe waũngamĩe mũsyĩ wa Salai; Eveli nĩwe waũngamĩe mũsyĩ wa Amoki; 21 Asavia nĩwe waũngamĩe mũsyĩ wa Ilikia; Nethaneli nĩwe waũngamĩe mũsyĩ wa Yetaia.

22 Aũngamĩi ma nyũmba sya aa-ĩthe ma Alivai mĩthenyanĩ ya Eliasivu, Yoiata, Yoanani, na Yatua nĩmaandĩkĩthiwʼe, o ũndũ ũmwe na athembi, nginya ĩvindanĩ ya ũsumbĩ wa Ndalio ũla waĩ Mũvelisia.

23 Alivai ala maĩ aũngamĩi ma nyũmba sya aa-ĩthe nĩmaandĩkiwe ĩvukunĩ ya ngewa ya mavinda, nginya mĩthenyanĩ ya Yoanani mwana wa Eliasivu. 24 Aũngamĩi ma Alivai maĩ Asavia, Selevia, na Yesua mwana wa Katimieli, na ana-a-ĩthe maũngamaa masianĩtye namo nĩ kana maine mbathi sya kũtaĩa Ngai na maimũtũngĩa mũvea kwosana na mĩao ya Ndaviti mũndũ wa Ngai ũla wa wʼo, kĩkundi kya ũsũvĩi kĩvasanĩte na kĩngĩ kya ũsũvĩi. 25 Matania, Mbakivukia, Ovatia, Mesulamu, Talimoni, na Akuvu maĩ asũvĩi ma mĩvĩanĩ, maisũvĩa tũlumu twa kwia syĩndũ tũla twaĩ vakuvĩ na mĩvĩa. 26 Asu mathũkũmaa mĩthenyanĩ ya Yoiakimu mwana wa Yesua mwana wa Yosataki na mĩthenyanĩ ya ngavana Neemia na Esila ũla waĩ mũthembi na mũandĩki.*

27 Ĩvindanĩ yĩla ngũta sya Yelusalemu syavathawa, nĩmamanthie Alivai na mamaete Yelusalemu kuma kũndũnĩ kwʼonthe kũla mekalaa nĩ kana matanĩe kũvathwa kũu me atanu, mayina mbathi sya kũtũnga mũvea, na makũnanganĩtye masaya, makũnĩte mĩio ya kũinga yĩ na ndii, na mĩio ĩngĩ ya wathi yĩ na ndii 12.* 28 Na ana ma aini* nĩmoombanie kuma ũiĩnĩ,* isionĩ syonthe ila syathyũlũlũkĩte Yelusalemu, motũinĩ ma Netova, 29 Mbethi-ngilikali, na isionĩ sya Ngeva na Asimavethi, nĩkwĩthĩwa aini nĩmeeyakĩe motũi mathyũlũlũkĩte Yelusalemu. 30 Na athembi na Alivai nĩmeetheisye, na mathesya andũ, mĩvĩa, na ũkũta.

31 Na ĩndĩ nĩnaetie anene ma Yuta ĩũlũ wa ũkũta. O na ĩngĩ, nĩnanyuvie ikundi ilĩ nene sya aini sya kũtũnga mũvea na ikundi sya kũmaatĩĩa, na kĩkundi kĩmwe kyathi kwʼokonĩ kwa aũme kwa ũkũta ũsu kyelekele Mũvĩanĩ wa Ivumbu sya Mũu. 32 Osaia na nusu ya anene ma Yuta nĩmamaumie ĩtina, 33 vamwe na Asalia, Esila, Mesulamu, 34 Yuta, Mbenyamini, Semaia, na Yelemia. 35 Maĩ vamwe na ana aa amwe ma athembi ala maĩ na masoo: Nzekalia mwana wa Yonathani mwana wa Semaia mwana wa Matania mwana wa Mikaia mwana wa Nzakuli mwana wa Asavu, 36 na ana-a-ĩthe Semaia, Asaleli, Milalai, Ngilalai, Maai, Nethaneli, Yuta, na Aanani, me na mĩio ya wathi ya Ndaviti mũndũ wa Ngai ũla wa wʼo; na mũandĩki* Esila nĩwe wamatongoesye. 37 Me Mũvĩanĩ wa Mbuluti, mambatĩile ĩmwe kwa ĩmwe Ngasinĩ ya Ndũa ya Ndaviti mesĩle kyambatonĩ kya ũkũta ĩũlũ wa Nyũmba ya Ndaviti na mathi nginya Mũvĩanĩ wa Kĩwʼũ ngalĩko ya wumĩlonĩ wa sua.

38 Kĩkundi kĩla kĩngĩ kya aini kya kũtũnga mũvea kyaendie ngalĩko ĩla ĩngĩ,* na nakĩatĩĩa nĩ na nusu ya andũ, ĩũlũ wa ũkũta twathi twavĩta Mwako Mũtũlu wa Maiko na twathi nginya Ũkũtanĩ Mũthanthau 39 na twambatĩla Mũvĩanĩ wa Evilaimu nginya Mũvĩanĩ wa Ndũa Ĩla ya Tene na twathi nginya Mũvĩanĩ wa Makũyũ, Mwakonĩ Mũtũlu wa Ananeli, Mwakonĩ Mũtũlu wa Mea, na twaendeea nginya Mũvĩanĩ wa Malondu; na naũngamĩla Mũvĩanĩ wa Mũsũvĩi.

40 Mũthya, ikundi isu ilĩ sya aini sya kũtũnga mũvea nĩsyaũngamie mbee wa nyũmba ya Ngai ũla wa wʼo; na ũu nowʼo neekie nĩ na nusu ya anini ma atongoi, 41 na athembi Eliakimu, Maaseia, Miniamini, Mikaia, Elioenai, Nzekalia, na Aanania, me na masoo, 42 na Maaseia, Semaia, Eleasali, Usisi, Yeoanani, Malikiya, Elamu, na Eseli. Na aini maina na wasya mũnene maũngamĩwe nĩ Isilaia.

43 Mũthenya ũsu nĩmaumisye nthembo mbingĩ na matana, nĩkwĩthĩwa Ngai ũla wa wʼo nĩwatumie matana me na mũyo mwingĩ. O namo aka nĩmatanie o vamwe na syana, nginya ũtanu wa Yelusalemu weewʼĩka vaasa mũno.

44 Mũthenya ũsu, aũme nĩmanyuviwe maũngamĩe makũmbĩ kwondũ wa mĩvothi, ũsyao wa mbee, na ilungu sya ĩkũmi. Maaĩlĩte kwosa ilungu ila syawetetwe Mĩaonĩ kwondũ wa athembi na Alivai kuma mĩũndanĩ ya ndũa masyũmbanĩsye makũmbĩnĩ asu, nĩkwĩthĩwa kwaĩ na ũtanu Yuta nũndũ wa athembi na Alivai ala mathũkũmaa. 45 Na nĩmambĩĩie kwĩanĩsya mawĩa ma Ngai woo na kĩanda kya kũthesya syĩndũ, o ũndũ aini na asũvĩi ma mĩvĩa meekaa, kwosana na mĩao ya Ndaviti na mwanae Solomoni. 46 Nĩkwĩthĩwa tene mũno mĩthenyanĩ ya Ndaviti na Asavu, nĩkweethĩawa atongoi* ma aini na ma mbathi sya kũtaĩa Ngai na kũmũtũngĩa mũvea. 47 Na mĩthenyanĩ ya Nzeluvaveli na mĩthenyanĩ ya Neemia, Aisilaeli onthe nĩmaumasya ilungu kwondũ wa aini na asũvĩi ma mĩvĩa, kwosana na mavata ma kĩla mũthenya. O na ĩngĩ, nĩmaiaa kĩlungu ũtee kwondũ wa Alivai, namo Alivai mayia kĩlungu ũtee kwondũ wa nzyawa sya Alũni.

13 Mũthenyanĩ ũsu, ĩvuku ya Mose nĩyasomiwe andũ methukĩĩsye, na meethĩa vaandĩkĩtwe kana vai Mũamimoni kana Mũmoavi waĩlĩte kwĩsa kũlika ũmbanonĩ wa Ngai ũla wa wʼo, 2 nĩkwĩthĩwa mayaathaũa Aisilaeli na mũkate na kĩwʼũ, ĩndĩ vandũ va ũu, maĩvie Mbalaamu nĩ kana amaumanĩe. O na ũu wĩ o vo, Ngai witũ nĩwavĩndũie kĩumo kĩu kyatwʼĩka ũathimo. 3 Yĩla meewie Mĩao ĩsu oou, nĩmambĩĩie kũvatha andũ onthe ala mataĩ Aisilaeli* kuma kwa Aisilaeli.

4 Yu ũndũ ũsu ũtanamba kwĩthĩwa, mũthembi ũla waũngamĩe tũlumu twa kwia syĩndũ twa* nyũmba* ya Ngai witũ aĩ Eliasivu, ũla wailenyʼe ũndũ na Tovia. 5 Nĩwamũnengete lumu nene ya kwia syĩndũ,* vala mbeenĩ maiaa nthembo ya lĩu, ũvani, na mĩio na kĩlungu kya ĩkũmi kya lĩu wa mbaa ngetha, mbinyu nzaũ, na mauta, ila Alivai, aini, na asũvĩi ma mĩvĩa maaĩlĩte kũnengwa, vamwe na mĩvothi ya athembi.

6 Na ĩvindanĩ yĩu yonthe nyie ndyaĩ Yelusalemu, nĩkwĩthĩwa nasyokie kũla kwĩ mũsumbĩ mwakanĩ wa 32 wa Mũsumbĩ Alitasasita wa Mbavilonĩ; na ĩtina wa ĩvinda yĩana ũna, neetya mũsumbĩ mwanya nĩthi. 7 Na ĩndĩ nooka Yelusalemu na noona ũndũ mũthũku mũno ũla Eliasivu weekĩte kwa kũnenga Tovia lumu ya kwia syĩndũ kĩwanzanĩ kya nyũmba ya Ngai ũla wa wʼo. 8 Ũndũ ũsu nĩwanthatisye mũno, na kwoou nekya syĩndũ syonthe sya nyũmba ya Tovia nza wa lumu ĩsu ya kwia syĩndũ.* 9 Ĩtina wa ũu nĩnaumisye mĩao, na mathesya tũlumu twa kwia syĩndũ;* na natũnga mĩio ya nyũmba ya Ngai ũla wa wʼo vau, vamwe na nthembo ya lĩu na ũvani.

10 O na ĩngĩ, nĩnamanyie kana Alivai mayanengawe ilungu syoo, na nũndũ wa ũu, Alivai na aini ala matethasya wĩa nĩmaekete kũtethya wĩa ũsu na mathi kĩla mũndũ mũũndanĩ wake. 11 Kwoou natetya anini ma atongoi na namea atĩĩ: “Nĩkĩ nyũmba ya Ngai ũla wa wʼo ĩlekeleelwʼe?” Na ĩndĩ namombanyʼa na namatũnga kũla maaĩlĩte kũthũkũma. 12 Na andũ onthe ma Yuta maete kĩlungu kya ĩkũmi kya lĩu wa mbaa ngetha, mbinyu nzaũ, na mauta tũlumunĩ twa kwia syĩndũ. 13 Na ĩndĩ naia mũthembi Selemia, mũandĩki* Nzatoki, na Vetaia ũla waĩ Mũlivai maũngamĩe tũlumu twa kwia syĩndũ, na Anani mwana wa Nzakuli mwana wa Matania nĩwe wamatetheeasya, nĩkwĩthĩwa aũme asu moonekaa me ma kwĩkwatwʼa. Maĩ na kĩanda kya kwaĩa ana-a-ĩthe moo ilungu syoo.

14 Ndilikane, ame Ngai wakwa, ĩũlũ wa ũndũ ũũ, na ndũkavute meko makwa ma wendo ũtathelaa ala nĩkĩte kwondũ wa nyũmba ya Ngai wakwa na ũthũkũmi* wayo.

15 Mĩthenyanĩ ĩsu nĩnoonie andũ kũu Yuta maikinyanga iangĩo sya mbinyu mũthenya wa Savato, maiete ivumbu sya lĩu wa mbaa ngetha na maisyaĩkya mangʼoi, na maiete mbinyu, nzavivũ, makũyũ, na mĩthemba yonthe ya mĩio kũu Yelusalemu mũthenyanĩ wa Savato. Kwoou nĩnamakanisye maeke kũthoosya syĩndũ mũthenya ũsu.* 16 Na andũ ma Tile ala mekalaa ndũanĩ nĩmaetae makũyũ na mĩthemba yonthe ya syĩndũ sya kũthoosya, makaithooesya andũ ma Yuta na Yelusalemu mũthenyanĩ wa Savato. 17 Kwoou natetya andũ me ndaĩa ma Yuta na namea atĩĩ: “Nĩ ũthũku wĩva ũũ mũkwĩka, o na nginya mũkavukya mũthenya wa Savato? 18 Ũu tyo wʼo aa-ũmae menyu meekie, na nũndũ wa ũu Ngai witũ atũetee ithyĩ o vamwe na ndũa ĩĩ mũisyo ũũ wʼonthe? Yu mwĩongeleela ũthatu wake ũla wakanĩe Isilaeli kwa kũvukya Savato.”

19 Kwoou Savato ĩtanamba kwambĩĩa, yĩla syuu syambĩĩie kũvika mĩvĩanĩ ya Yelusalemu oou, nĩneeaie mĩomo ĩvingwe. O na ĩngĩ, nĩnaisye kana ndyaĩlĩte kũvingũwa nginya Savato ĩthele, na naia athũkũmi amwe makwa mĩvĩanĩ nĩ kana mĩio ndĩkaetwe mũthenyanĩ wa Savato. 20 Nũndũ wa ũu, akũni ma viasala na athoosya ma mĩthemba yonthe ya syĩndũ sya kũthoosya nĩmakomeile nza wa Yelusalemu ĩvinda yĩmwe kana mavinda elĩ. 21 Na ĩndĩ namakanyʼa ndimea atĩĩ: “Nĩkĩ mũũkomela mbee wa ũkũta? Mweeka ũu ĩngĩ, nĩmumya vo na vinya.” Kuma ĩvinda yĩu na kũendeea mayaaũka mũthenyanĩ wa Savato.

22 Na nĩnatavisye Alivai kana maĩlĩte kwĩtheasya kĩla ĩvinda na mayũka masũvĩe mĩvĩa nĩ kana mekalye mũthenya wa Savato wĩ mũtheu. Ame Ngai wakwa, ndilikane nũndũ wa ũndũ ũsu o nawʼo, na ũimbĩwʼĩa tei kwosana na wendo waku mwingĩ ũtathelaa.

23 O na ĩngĩ, mĩthenyanĩ ĩsu nĩnoonie Ayuti matwaĩte* aka Aasitoti, Aamimoni, na Amoavi. 24 Nusu ya ana moo yaneenaa Kĩasitoti na nusu ĩla ĩngĩ yaneenaa kĩthyomo kya ngo sya andũ syĩ kĩvathũkanyʼo, ĩndĩ vai ũmwe woo weesĩ kũneena kĩthyomo kya Ayuti. 25 Kwoou nĩnamatetisye na namaumanĩa na nakũna aũme amwe na nakũa nzwʼĩĩ syoo na natuma mevĩta na Ngai, ndimea: “Mũyaĩlĩte kũnenga ana moo eĩtu menyu na mũyaĩlĩte kwĩtĩkĩla mwĩĩtu o na ũmwe woo atwawe nĩ ana menyu kana inywʼĩ ene mũmũtwae. 26 Mo ti mo matumie Mũsumbĩ Solomoni wa Isilaeli avĩtya? Mbaĩnĩ mbingĩ vayaĩ mũsumbĩ ũngĩ take; na nĩwendetwe nĩ Ngai wake, na nũndũ wa ũu Ngai amũtwʼĩkĩthya mũsumbĩ wa Isilaeli yonthe. Ĩndĩ aka aeni nĩmatumie o nake eka naĩ. 27 Yo ti ũndũ wa kũsengyʼa kwenyu kwĩka ũthũku ũũ ũnenevete ũu kwa kwĩthĩwa mũte aĩkĩĩku kwa Ngai witũ kwa kũtwaa aka aeni?”

28 Mwana ũmwe wa Yoiata mwana wa mũthembi mũnene Eliasivu nĩwatwaĩte mwĩĩtu wa Sanavalati ũla waĩ Mũoloni. Kwoou namũlũngya auma mbee wakwa.

29 Malilikane, ame Ngai wakwa, nũndũ nĩmavukĩtye ũthembi na ũtianĩo wa athembi na wa Alivai.

30 Na nĩnamatheisye kumana na maũndũ onthe maeni, na nanenga athembi na Alivai ianda syoo, kĩla ũmwe ũthũkũminĩ wake, 31 na navanga ngũ ietawe mavindanĩ ala manyuvĩtwe na ũsyao mwĩu wa mbee.

Ndilikane na ũimbonyʼa ũseo,* ame Ngai wakwa.