ŨVUANYʼO KWA YOANA

1 Ũvuanyʼo wa Yesũ Klĩsto ũla Ngai wamũnengie asyonyʼe ngombo syake maũndũ ala matalea kwĩkĩka o mĩtũkĩ. Na nĩwatũmie mũlaĩka wake aũnengane kwa nzĩa ya mawonanyʼo kwa ngombo yake Yoana, 2 ũla waumisye ũkũsĩ ĩũlũ wa ndeto ĩla Ngai wanenganie, na ĩũlũ wa ũkũsĩ ũla Yesũ Klĩsto waumisye, ĩĩ, ĩũlũ wa maũndũ onthe ala woonie. 3 Nĩ mũtanu mũndũ ũla ũsomaa na wasya mũnene na ala mewʼaa ndeto sya wathani ũũ, na ala maatĩĩaa maũndũ ala maandĩkĩtwe vo, nĩkwĩthĩwa ĩvinda yĩla yĩnyuvĩtwe yĩ vakuvĩ.

4 Nyie Yoana, kwa ikundi mũonza ila syĩ kĩsionĩ kya Asia:

Ĩthĩwai na ũseo mwingĩ na mũuo kuma kwa “Ũla wĩ kwʼo na waĩ kwʼo na wũkĩte,” na kuma kwa maveva mũonza ala me mbee wa kĩvĩla kyake kya ũsumbĩ, 5 na kuma kwa Yesũ Klĩsto, “Ngũsĩ Ndĩkĩĩku,” “ũla waĩ wa mbee kũthayũũkwʼa,” na “Mũsumbĩ wa asumbĩ ma nthĩ.”

Na kwa ũla ũtwendete na watũthaisye kuma naĩnĩ kwĩsĩla nthakame yake mwene, 6 na atũtwʼĩkĩthya asumbĩ na athembi kwa Ngai wake, ũla nĩwe Ĩthe wake, ĩĩ, kwake nĩkwĩthĩwe ndaĩa na vinya tene na tene. Ameni.

7 Sisyai! Nĩwũkĩte na mathweo, na kĩla itho yĩkamwona, o na ala mamũtonyie; na mbaĩ syonthe sya nthĩ ikeekũnanga syĩ na kyeva nũndũ wake. Ĩĩ, Ameni.

8 “Ninyie Aliva na Omeka,” * easya ũu Yeova Ngai, “Ũla wĩ kwʼo na waĩ kwʼo na wũkĩte, Mwene Vinya Wʼonthe.”

9 Nyie Yoana, mwana-a-asa wenyu na wĩ mũamba nenyu thĩnanĩ na ũsumbĩnĩ na wũmĩĩsyonĩ ta mũatĩĩi wa Yesũ, naĩ kĩthamanĩ kĩtawa Vatimo nũndũ wa kũneena ĩũlũ wa Ngai na kumya ũkũsĩ ĩũlũ wa Yesũ. 10 Na nĩtongoewʼe nĩ veva mũtheu nĩneeyĩthĩie mũthenyanĩ wa Mwĩaĩi, na neewʼa wasya mũnene ta wa soo ũineena ĩtina wakwa, 11 ũkyasya: “Maũndũ ala ũkwona, andĩka ĩvukunĩ ya kũkũnzwa na ũiyĩtũma kwa ikundi ii mũonza: kya Eveso, kya Simulina, kya Velikamo, kya Thiatila, kya Salite, kya Vilatelivia, na kya Laotisia.”

12 Nĩneethyũũie nĩsisye ũla waneenaa nakwa, na yĩla neethyũũie nĩnoonie syĩndũ mũonza sya thaavu sya kwilĩĩla taa, 13 na ũmwe ũilye mwana wa mũndũ aĩ katĩkatĩ wa syĩndũ isu sya kwilĩĩla taa, ekĩĩte ngũa ndaasa ĩvikĩte nyaaĩnĩ na akeyova mũsivi wa thaavu kĩthũinĩ kyake. 14 O na ĩngĩ, mũtwe wake na nzwʼĩĩ yake syaĩ nzaũ ta wʼĩa mweũ, ta ĩa, * na metho make mailye ta ũmũĩ wa mwaki, 15 na nyaaĩ syake syailye ũthuku * mũseo wĩ ĩikonĩ ĩnene ya mwaki, na wasya wake waĩ ta wasya wa kĩwʼũ kingĩ. 16 Na kwʼokonĩ kwake kwa aũme akwete ndata mũonza, na kanywʼanĩ wake vaumĩlĩte ũvyũ mũĩ, mũasa ũtemaa na ngalĩ syelĩ, na ũthyũ wake wailye ta syũa saa ila yĩthĩawa yakanĩte vyũ. 17 Yĩla namwonie navalũka nyaaĩnĩ syake ta nĩ mũkwʼũ.

Nake ambilĩĩla kwʼoko kwake kwa aũme, na asya: “Ndũkakĩe. Ninyie ũla wa Mbee na ũla wa Mũthya, 18 na ũla wĩ thayũ, na nĩnakwie, ĩndĩ sisya! nĩ thayũ tene na tene, na nĩ na mbungũo sya kĩkwʼũ na sya Mbũa. * 19 Kwoou andĩka maũndũ ala woona, na maũndũ ala me vo, na maũndũ ala mekwĩkĩka ĩtina wa aa. 20 Nakyo kĩmbithĩ kĩtheu kya ila ndata mũonza woona kwʼokonĩ kwakwa kwa aũme na ila syĩndũ mũonza sya thaavu sya kwilĩĩla taa nĩ kĩĩ: Ila ndata mũonza syĩonanyʼa alaĩka mũonza ma ila ikundi mũonza, nasyo ila syĩndũ mũonza sya kwilĩĩla taa syĩonanyʼa ila ikundi mũonza.

2 “Kwa mũlaĩka wa kĩkundi kya Eveso andĩka atĩĩ: Aa nĩmo maũndũ ala meũwetwa nĩ ũla ũkwete ila ndata mũonza kwʼokonĩ kwake kwa aũme, na ũendelaa katĩkatĩ wa ila syĩndũ mũonza sya thaavu sya kwilĩĩla taa: 2 ‘Nĩnĩsĩ meko maku, na wĩa waku mũmũ na wũmĩĩsyo, na kana ndũtonya kũmĩĩsya andũ athũku, na nũmatataa ala maasya nĩ atũmwa ĩndĩ mo ti atũmwa, na nĩwĩthĩĩte kana mo nĩ akengani. 3 O na ĩngĩ, nũendeee na kũmĩĩsya na kwĩlũlũmĩĩlya kwondũ wa ĩsyĩtwa yakwa na ndwaanoa. 4 Ĩndĩ nĩ na ũndũ ũũ ĩũlũ waku: nũtiĩte wendo ũla waĩ nawʼo mbeenĩ.

5 “‘Kwondũ wa ũu lilikana ũvalũkĩte kuma va, na ũyĩlila na ũyĩka maũndũ ala weekaa mbeenĩ. Ethĩwa ndũkwĩka ũu, ngooka kwaku, na ngaveta kĩndũ kyaku kya kwilĩĩla taa kuma vandũ vakyo, walea kwĩlila. 6 Ĩndĩ ve ũndũ ũũ mũseo ũendeee na kwĩka: nũmenete meko ma kĩkundi kya ndĩni ya Nikolai, ala o nakwa nĩmamenete. 7 Ũla wĩ kũtũ nĩewʼe ũndũ ũũ veva ũũtavya ikundi: Ũla wĩsinda ngamwĩtĩkĩlya kũya ũsyao wa mũtĩ wa thayũ, ũla wĩ mũũndanĩ wa Ngai.’ *

8 “Na kwa mũlaĩka wa kĩkundi kya Simulina andĩka atĩĩ: Aa nĩmo maũndũ ala meũwetwa nĩ ‘ũla wa Mbee na ũla wa Mũthya,’ ũla wakwie na eethĩwa thayũ ĩngĩ: 9 ‘Nĩnĩsĩ thĩna waku na ũkya waku, ĩndĩ we wĩ mũthwii, na nĩnĩsĩ kũumana kwa ala meyĩtaa Ayuti ĩndĩ mo ti Ayuti, ĩndĩ mo nĩ ĩsinakoke ya Satani. 10 Ndũkakĩe maũndũ ala me vakuvĩ kũũkwata. Sisya! Ndevili nũkũendeea kwĩkya amwe menyu yela nĩ kana matatwe vyũ, na mũkeethĩwa na thĩna mĩthenya ĩkũmi. Endeea kwonanyʼa kana wĩ mũĩkĩĩku o na kũvika kĩkwʼũ, nakwa ngaũnenga ngovia ya thayũ. 11 Ũla wĩ kũtũ nĩewʼe ũndũ ũũ veva ũũtavya ikundi: Ũla wĩsinda ndakakwʼa kĩkwʼũ kya kelĩ nongi.’

12 “Na kwa mũlaĩka wa kĩkundi kya Velikamo andĩka atĩĩ: Aa nĩmo maũndũ ala meũwetwa nĩ ũla wĩ na ũvyũ mũĩ, mũasa, na ũtemaa na ngalĩ syelĩ: 13 ‘Nĩnĩsĩ vala wĩkalaa, navo nĩ vala ve kĩvĩla kya ũsumbĩ kya Satani; o na vailye ũu, nũendeee kũlũmya vyũ ĩsyĩtwa yakwa, na ndwaakaĩa mũĩkĩĩo waku nthĩnĩ wakwa o na mĩthenyanĩ ya Andiva, ngũsĩ yakwa ndĩkĩĩku, ũla wooaĩwe kwenyu, vala Satani ũtwĩe.

14 “‘Ĩndĩ nĩ na maũndũ aa manini ĩũlũ waku: vau ũĩ wĩ na ala maatĩĩaa momanyĩsyo ma Mbalaamu, ũla wamanyĩisye Mbalaki kwia kĩndũ kya kũlulutĩkya mbee wa ana ma Isilaeli, nĩ kana maye syĩndũ ithembewe mĩvwʼanano na meke ũlaalai. * 15 O ta ũu, wĩ na ala maatĩĩaa momanyĩsyo ma kĩkundi kya ndĩni ya Nikolai. 16 Kwoou ĩlile. Walea kwĩka ũu, nĩnũkĩte kwaku mĩtũkĩ, na ngokita namo ngĩtũmĩa ũvyũ mũasa wa kanywʼa wakwa.

17 “‘Ũla wĩ kũtũ nĩewʼe ũndũ ũũ veva ũũtavya ikundi: Ũla wĩsinda ngamũolela mana ĩla mbithe, na ngamũnenga kavila keũ, na ĩũlũ wako vaandĩkĩtwe ĩsyĩtwa yeũ, yĩla vate mũndũ o na ũmwe ũyĩsĩ eka o ũla wanengwa ĩsyĩtwa yĩu.’

18 “Na kwa mũlaĩka wa kĩkundi kya Thiatila andĩka atĩĩ: Aa nĩmo maũndũ ala meũwetwa nĩ Mwana wa Ngai, ũla wĩ na metho mailye ũmũĩ wa mwaki na maaũ make mailye ũthuku * mũseo: 19 ‘Nĩnĩsĩ meko maku, na wendo waku na mũĩkĩĩo, na ũthũkũmi na wũmĩĩsyo, na meko maku ala ma mĩtũkĩ nĩ maingĩ kwĩ ala ma mbee.

20 “‘O na ũu wĩ o vo, nĩ na ũndũ ũũ ĩũlũ waku: nĩwũmĩĩasya ũla mũndũ mũka Yeseveli, ũla wĩyĩtaa mwathani, na ũmanyĩasya na kũkenga ngombo syakwa syĩke ũlaalai * na kũya syĩndũ ithembewe mĩvwʼanano. 21 Na nĩnamũnengie ĩvinda ya kwĩlila, ĩndĩ ndekwenda kwĩlila naĩ ya ũlaalai * ĩla wĩkĩte. 22 Sisya! Nĩ vakuvĩ kũmwĩkya ũkomonĩ wa mũwau, na kũmalikya ala mekaa ũlaalai nake thĩnanĩ mũnene, malea kwĩlila nũndũ wa maũndũ ala watumie meka. 23 Na ngooaa syana syake na ũwau mũthũku mũno, nĩ kana ikundi syonthe imanye kana ninyie nĩthianaa mosũanĩo ala ma nthĩnĩ vyũ na ngoo, na ngamũĩva kĩla ũmwe wenyu kwosana na mawĩa make.

24 “‘Ĩndĩ nĩmatavya ũũ ala angĩ menyu me Thiatila, onthe ala mataatĩĩaa ũmanyĩsyo ũsu, ala matesĩ kĩla kĩtawa “maũndũ maliku ma Satani”: Ndimwongeleela mũio ũngĩ o na ũmwe. 25 O na vailye ũu, kwata ũlũmĩtye kĩla wĩ nakyo nginya yĩla nĩũka. 26 Na ũla wĩsinda na kũendeea kwĩka nginya mũminũkĩlyo maũndũ ta ala neekie, ngamũnenga ũkũmũ ĩũlũ wa mbaĩ, 27 na akaĩthya andũ na ndata ya kyũma na kũmatilanga ilungu ta mĩio ya yũmba, o tondũ neeaĩwe nĩ Asa wakwa. 28 Na ngamũnenga ndata ya kwakya. 29 Ũla wĩ kũtũ nĩewʼe kĩla veva ũũtavya ikundi.’

3 “Na kwa mũlaĩka wa kĩkundi kya Salite andĩka atĩĩ: Aa nĩmo maũndũ ala meũwetwa nĩ ũla wĩ na maveva mũonza ma Ngai na ila ndata mũonza: ‘Nĩnĩsĩ meko maku, wonekaa ta wĩ thayũ, ĩndĩ wĩ mũkwʼũ. 2 Ĩkala wĩ metho, na ũilũlũmĩĩlya maũndũ ala matialĩte, ala me vakuvĩ kũkwʼa, nũndũ ndinona wĩa waku ũtethetwʼe nesa vyũ methonĩ ma Ngai wakwa. 3 Kwoou, endeea kũlilikana kĩla wakwatie na kĩla weewie, na ũiendeea kũkĩsũvĩa, na ũyĩlila. Vate nzika walea kũamũka, ngooka ta kĩngʼei, na ndũkamanya nongi ĩsaa yĩla ngoka kwaku.

4 “‘Ĩndĩ, wĩ na andũ anini Salite ala mataavukya ngũa syoo, namo makaendanyʼa nakwa mekĩĩte ngũa nzaũ, nũndũ nĩmaĩlĩte. 5 Ũla wĩsinda o nake akeekĩwa ngũa nzaũ, na ndikavuta ĩsyĩtwa yake nongi kuma ĩvukunĩ ya thayũ, vandũ va ũu ngayĩweta mbee wa Asa wakwa na mbee wa alaĩka make. 6 Ũla wĩ kũtũ nĩewʼe ũndũ veva ũũtavya ikundi.’

7 “Na kwa mũlaĩka wa kĩkundi kya Vilatelivia andĩka atĩĩ: Aa nĩmo maũndũ ala meũwetwa nĩ ũla mũtheu, ũla wa wʼo, ũla wĩ na ũvungũo wa Ndaviti, na ũla ũvingũaa ũkethĩa vaiĩ ũngĩ ũvinga, na ũvingaa ũkethĩa vaiĩ ũngĩ ũvingũa: 8 ‘Nĩnĩsĩ meko maku, sisya! nĩnĩvingũĩte mũomo na vaiĩ ũmwe ũtonya kũũvinga. Na nĩnĩsĩ wĩ na vinya mũnini, na nĩwaatĩĩie ndeto yakwa na nĩwĩthĩĩtwe wĩ mũĩkĩĩku kwa ĩsyĩtwa yakwa. 9 Sisya! Ngatuma ala ma ĩsinakoke ya Satani ala maasya nĩ Ayuti ĩndĩ mo ti Ayuti, mekaa kũkengana, ĩĩ, ngatuma moka na kũkumana mbee wa nyaaĩ syaku, o na ngatuma mamanya kana nĩngwendete. 10 Nũndũ nĩwaendeeie kũkwata ndeto ya wũmĩĩsyo wakwa, * o nakwa ngaũsũvĩa saanĩ wa kũtatwa ũla ũkoka ĩũlũ wa nthĩ yonthe, nĩ kana ũtate ala matwĩe ĩũlũ wa nthĩ. 11 Nĩnũkĩte mĩtũkĩ. Endeea kũkwata ũlũmĩtye kĩla wĩ nakyo, nĩ kana mũndũ o na wĩva ndakaũvene ngovia yaku.

12 “‘Ũla wĩsinda ngamũtwʼĩkĩthya kĩtuĩ ĩkalũnĩ ya Ngai wakwa, na ndakauma vo nongi, na ngaandĩka ĩsyĩtwa ya Ngai wakwa ĩũlũ wake na ĩsyĩtwa ya ndũa ya Ngai wakwa, na ndũa ĩsu nĩ Yelusaleme Nzaũ ĩla ĩtheeaa kuma ĩtunĩ kwa Ngai wakwa, o na ngaandĩka ĩsyĩtwa yakwa yeũ ĩũlũ wake. 13 Ũla wĩ kũtũ nĩewʼe ũndũ veva ũũtavya ikundi.’

14 “Na kwa mũlaĩka wa kĩkundi kya Laotisia andĩka atĩĩ: Aa nĩmo maũndũ ala meũwetwa nĩ ũla wĩtawa Ameni, ngũsĩ ndĩkĩĩku na ya wʼo, ũla waĩ wa mbee kũmbwa nĩ Ngai: 15 ‘Nĩnĩsĩ meko maku, kana ndwĩ mũthithu o na ndwĩ mũvyũ. Wendi wakwa nĩ wĩthĩwe wĩ mũthithu kana wĩ mũvyũ. 16 Kwoou nũndũ wĩ na kamulutĩla na ndwĩ mũvyũ o na ndwĩ mũthithu, ngaũtwʼĩla nthĩ kuma kanywʼanĩ wakwa. 17 Nũndũ wĩasya, “Nĩ mũthwii na ndi na vata wa kĩndũ o na kĩmwe,” ĩndĩ ndwĩsĩ kana wĩ mũthĩni na wa kwĩwʼĩwa tei na ngya na kĩlalinda na wĩ mũthei, 18 nĩũtaa ũthooe kuma kwakwa thaavu ũla ũtheetwʼe na mwaki nĩ kana we wĩthĩwe mũthwii, na ngũa nzaũ wĩkĩe nĩ kana angĩ maikese kwona wĩ mũthei na ũyĩwʼa nthoni, na ndawa ya metho ũvake metho maku nĩ kana wĩthĩwe ũtonya kwona.

19 “‘Onthe ala nendete nĩnĩmakanasya na ngĩmalũnga. Kwoou ĩthĩwa na kĩthito na ũyĩlila. 20 Sisya! Nĩũngamĩte mũomonĩ na nĩendeee na kũkũnanga. Ethĩwa mũndũ o na wĩva nũkwĩwʼa wasya wakwa na aivingũa mũomo, ngalika nyũmba kwake na ngaĩsanĩa nake lĩu wa wĩoo. 21 Ũla wĩsinda ngamwĩtĩkĩlya kwĩkala vamwe nakwa kĩvĩlanĩ kyakwa kya ũsumbĩ, o tondũ nyie nasindie na nekala vamwe na Asa wakwa kĩvĩlanĩ kyake kya ũsumbĩ. 22 Ũla wĩ kũtũ nĩewʼe ũndũ veva ũũtavya ikundi.’”

4 Ĩtina wa maũndũ asu nĩnoonie, na sisya! mũomo mũvingũe ĩtunĩ, na wasya wa mbee ũla neewie ũineena nakwa waĩ ta wa soo, nawʼo wambĩa: “Ambata kũũ, na nĩngũkwonyʼa maũndũ ala matalea kwĩkĩka.” 2 Ĩtina wa ũu, o mĩtũkĩ veva wa Ngai nĩwookie ĩũlũ wakwa, na sisya! noona kĩvĩla kya ũsumbĩ kĩ vandũ vakyo ĩtunĩ, na vaĩ ũmwe wekalĩte kĩvĩlanĩ kĩu kya ũsumbĩ. 3 Na Ũla wekalĩte kĩvĩlanĩ kĩu oonekaa ailye ĩvia ya yasivi na ĩvia ya salitũ, na kĩvĩla kĩu kya ũsumbĩ kyathyũlũlũkĩtwe nĩ ũtaathi ũilye sumalatai.

4 Na kĩvĩla kĩu kya ũsumbĩ kyathyũlũlũkĩtwe nĩ ivĩla 24 sya ũsumbĩ, na noona atumĩa 24 mekalĩte ivĩlanĩ isu sya ũsumbĩ mekĩĩte ngũa nzaũ, na mĩtwenĩ yoo me na ngovia sya ũsumbĩ sya thaavu. 5 Na kĩvĩlanĩ kĩu kya ũsumbĩ vauma ũtisi na mawasya na itundumo; na mbee wa kĩvĩla kĩu kya ũsumbĩ vaĩ taa mũonza sya mwaki wakanĩte, nasyo syĩonanyʼa ala maveva mũonza ma Ngai. 6 Na mbee wa kĩvĩla kĩu kya ũsumbĩ vaĩ kĩndũ ta ũkanga ũilye kĩoo, ta kĩoo kĩũkenga.

Na katĩkatĩ vala kĩvĩla kya ũsumbĩ kyaĩ, vaĩ syũmbe inya syĩ thayũ ila syathyũlũlũkĩte kĩvĩla kĩu, na syaĩ na metho mbee na ĩtina. 7 Kyũmbe kĩ thayũ kya mbee kyailye mũnyambũ, na kyũmbe kĩ thayũ kya kelĩ kyailye nzaũ, na kyũmbe kĩ thayũ kya katatũ kyaĩ na ũthyũ ũilye wa mũndũ, na kyũmbe kĩ thayũ kya kana kyailye ndiũ ĩũlũkĩte. 8 Na kĩla kĩmwe kya syũmbe isu inya syĩ thayũ kyaĩ na nthwau thanthatũ; na nthwau isu syaĩ na metho kĩla vandũ, o na ungu wasyo. Na mũthenya na ũtukũ iendeeaa kwasya: “Mũtheu, mũtheu, mũtheu nĩ Yeova Ngai, Mwene Vinya Wʼonthe, ũla waĩ kwʼo na wĩ kwʼo na wũkĩte.”

9 Ĩvinda yonthe yĩla syũmbe isu syĩ thayũ iũmũkumya na kũmũtaĩa na kũmũtũngĩa mũvea Ũla wĩkalĩte kĩvĩlanĩ kya ũsumbĩ, Ũla wĩkalaa tene na tene, 10 ala atumĩa 24 nĩmavalũkaa mbee wa Ũla wĩkalĩte kĩvĩlanĩ kya ũsumbĩ na maimũthaitha Ũla wĩkalaa tene na tene, na mayĩkya ngovia syoo sya ũsumbĩ mbee wa kĩvĩla kĩu kya ũsumbĩ, makyasya: 11 “Nĩwaĩlĩte we Yeova Ngai waitũ, kwĩthĩwa na nguma na ndaĩa na vinya, nũndũ nĩwoombie syĩndũ syonthe, na nũndũ wa kwenda kwaku nĩsyeethĩiwe kwʼo na syoombwa.”

5 Na kwʼokonĩ kwa aũme kwa Ũla wĩkalĩte kĩvĩlanĩ kya ũsumbĩ nĩnoonie ĩvuku ya kũkũnzwa yĩandĩkĩtwe ngalĩko syelĩ, yĩsiĩlĩtwe na mosiĩlo mũonza yĩkalũma vyũ. 2 Na noona mũlaĩka wĩ vinya aineena na wasya mũnene, akyasya: “Nũũ ũla waĩlĩte kũvingũa ĩvuku ya kũkũnzwa na kũmbũa mosiĩlo mayo?” 3 Ĩndĩ vaiĩ o na ũmwe ĩtunĩ kana ĩũlũ wa nthĩ kana ungu wa nthĩ waĩ atonya kũvingũa ĩvuku yĩu ya kũkũnzwa kana kũsisya nthĩnĩ wayo. 4 Nĩnaĩie mũno nũndũ vayaĩ o na ũmwe waaoneka ũla ũtonya kũvingũa ĩvuku yĩu ya kũkũnzwa kana kũsisya nthĩnĩ wayo. 5 Ĩndĩ ũmwe wa ala atumĩa ambĩa: “Eka kũĩa. Sisya! Mũnyambũ wa mbaĩ ya Yuta, mwĩi wa Ndaviti, nĩwasindie nĩ kana avingũe ĩvuku ya kũkũnzwa na mosiĩlo mayo mũonza.”

6 Na noona kalondu kaũngamĩte vakuvĩ na kĩvĩla kya ũsumbĩ na katĩ wa ila syũmbe inya syĩ thayũ na ala atumĩa, na kailye ta kathĩnze, na kaĩ na mbya mũonza na metho mũonza, na metho asu meonanyʼa maveva mũonza ma Ngai, ala matũmĩtwe nthĩ yonthe. 7 Na vau kwa vau athengeea mbee na ayosa kuma kwʼokonĩ kwa aũme kwa Ũla wekalĩte kĩvĩlanĩ kya ũsumbĩ. 8 Yĩla woosie ĩvuku yĩu ya kũkũnzwa, ila syũmbe inya syĩ thayũ na ala atumĩa 24 mavalũka mbee wa kala Kalondu, na kĩla ũmwe woo aĩ na mbeve na mbakũli sya thaavu ila syausũĩte ũvani. (Ũvani wĩonanyʼa mboya sya ala atheu.) 9 Na meina wathi mweũ, makyasya: “Nĩwaĩlĩte kwosa ĩvuku ya kũkũnzwa na kũvingũa mosiĩlo mayo, nũndũ nĩwooaiwe na kwĩsĩla nthakame yaku wamũthooea Ngai andũ kuma kwa kĩla ũko na kĩthyomo na andũ na mbaĩ, 10 na wamatwʼĩkĩthya asumbĩ na athembi kwa Ngai waitũ, na makasumbĩka nthĩ me asumbĩ.”

11 Na noona, na neewʼa wasya wa alaĩka aingĩ kũthyũlũlũka kĩvĩla kĩu kya ũsumbĩ na ila syũmbe syĩ thayũ na ala atumĩa, na ũtalo woo waĩ ngili mbingĩ mũno kũndũ ngili mbingĩ mũno na makili kũndũ makili, 12 na maneenaa na wasya mũnene, makyasya: “Kalondu kala kooaiwe nĩkaĩlĩte kũnengwa ũtonyi na ũthwii na ũĩ na vinya na ndaĩa na nguma na ũathimo.”

13 Na neewʼa syũmbe syonthe ila syĩ ĩtunĩ na ĩũlũ wa nthĩ na ungu wa nthĩ na ũkanganĩ, na syĩndũ syonthe ila syĩ nthĩnĩ wasyo, ikyasya: “Kwa Ũla wĩkalĩte kĩvĩlanĩ kya ũsumbĩ na kwa kala Kalondu nĩkwĩthĩwe ũathimo na ndaĩa na nguma na vinya tene na tene.” 14 Na ila syũmbe inya syĩ thayũ syasya: “Ameni!” na ala atumĩa mavalũka na mathaitha.

6 Na noona kala Kalondu ayũmbũa ũmwe wa ala mosiĩlo mũonza, na neewʼa kĩmwe kya ila syũmbe inya syĩ thayũ kĩineena na wasya ta wa kĩtundumo, kĩyasya: “Ũka!” 2 Na noona, na sisya! mbalasi nzaũ, na ũla wekalĩte ĩũlũ wayo aĩ na ũta; na anengwa ngovia ya ũsumbĩ, na athi asindĩte na kũminũkĩlya ũsindi wake.

3 Yĩla woombũie ũsiĩlo wa kelĩ, neewʼa kyũmbe kĩ thayũ kya kelĩ kĩyasya: “Ũka!” 4 Na mbalasi ĩngĩ ya langi mũtune mũno yaumaala, na ũla wekalĩte ĩũlũ wayo anengwa ũkũmũ wa kũvetanga mũuo ĩũlũ wa nthĩ nĩ kana moaane, na anengwa ũvyũ mũnene.

5 Na yĩla woombũie ũsiĩlo wa katatũ, neewʼa kyũmbe kĩ thayũ kya katatũ kĩyasya: “Ũka!” Na noona, na sisya! mbalasi nziũ, na ũla wekalĩte ĩũlũ wayo aĩ na kĩthimi kwʼokonĩ kwake. 6 Na neewʼa kĩndũ ta wasya katĩkatĩ wa ila syũmbe inya syĩ thayũ, ũyasya: “Kĩvava kĩmwe kya nganũ nĩ ndinalĩ ĩmwe * na ivava itatũ sya mbaale nĩ ndinalĩ; na ndũkakiite mauta ma mũthata na mbinyu.”

7 Yĩla woombũie ũsiĩlo wa kana, neewʼa wasya wa kyũmbe kĩ thayũ kya kana, ũyasya: “Ũka!” 8 Na noona, na sisya! mbalasi ya langi wa mũu, * na ũla wekalĩte ĩũlũ wayo aĩ na ĩsyĩtwa Kĩkwʼũ. Na Mbũa * yamũatĩĩe o vakuvĩ. Na Mbũa na Kĩkwʼũ syanengwa ũkũmũ ĩũlũ wa kĩlungu kya kana kya nthĩ, syũae na ũvyũ mũasa, na ũnyivu wa lĩu, na ũwau mũthũku mũno, na nyamũ sya kĩthekanĩ sya nthĩ.

9 Yĩla woombũie ũsiĩlo wa katano, noona ungu wa kĩthembeo mathayũ * ma ala mooaĩtwe nũndũ wa ndeto ya Ngai na nũndũ wa ũkũsĩ ũla maumĩtye. 10 Na maneena na wasya mũnene, makyasya: “Mwĩaĩi Mũsumbĩ Mũnene, mũtheu na wa wʼo, ũkeesiĩĩa nginya ĩndĩĩ kumya ũsilĩlo na kũĩvanĩsya nthakame yitũ kwa ala matwĩe ĩũlũ wa nthĩ?” 11 Na kĩla ũmwe woo anengwa kanzũ nzaũ, na meewa mambe kũthũmũa o vanini, nginya ũtalo wĩanĩe wa ngombo ila ingĩ na ana-a-asa moo ala maĩ vakuvĩ kũawa o tondũ mo mooaiwe.

12 Na yĩla woombũie ũsiĩlo wa thanthatũ, kweethĩwa kĩthingitho kĩnene kya nthĩ; na syũa yeethĩwa yĩ yiũ ta ĩkunia yĩseũvĩtwʼe na wʼĩa mwiũ, * na mwei wʼonthe wekala nthakame, 13 na ndata sya matunĩ syavalũka nthĩ o tondũ makũyũ mate meu metĩkaa yĩla mũkũyũ wathingithwʼa nĩ kĩseve kĩ na vinya. 14 Na ĩtu yeeveta ta ĩvuku ya kũkũnzwa yĩilingwa, na iĩma syonthe na ithama syonthe syavetwa vandũ vasyo. 15 Namo asumbĩ ma nthĩ, anene, athwii, anene ma ita, andũ me vinya, ngombo syonthe, na onthe ala athasye meevitha ngunganĩ na katĩ wa mavia ma iĩma. 16 Na maendeea kwĩa iĩma na mavia: “Tũvalũkĩlei na mũitũvitha kuma ũthyũnĩ wa Ũla wĩkalĩte kĩvĩlanĩ kya ũsumbĩ, na kuma ũthilĩkunĩ wa kala Kalondu, 17 nũndũ mũthenya mũnene wa ũthilĩku woo nĩwavika, na nũũ ũtonya kũũngama?”

7 Ĩtina wa maũndũ asu nĩnoonie alaĩka ana maũngamĩte konanĩ * inya sya nthĩ, makwete makalũmya vyũ iseve inya sya nthĩ, nĩ kana kĩseve o na kĩva kĩikauutane ĩũlũ wa nthĩ kana ũkanganĩ kana mũtĩnĩ o na wĩva. 2 Na noona mũlaĩka ũngĩ ambatĩte kuma wumĩlonĩ wa syũa, e na ũsiĩlo wa Ngai ũla wĩ thayũ; na eeta ala alaĩka ana na wasya mũnene, ala manengetwe ũkũmũ wa kwananga nthĩ na ũkanga, 3 akyasya: “Mũikanange nthĩ kana ũkanga kana mĩtĩ, nginya twambe kwĩkĩa ũsiĩlo itulyanĩ sya ngombo sya Ngai waitũ.”

4 Na neewʼa ũtalo wa ala meekĩiwe ũsiĩlo, namo maĩ 144,000, na meekĩiwe ũsiĩlo kuma kĩla mbaĩ ya ana ma Isilaeli:

9 Ĩtina wa maũndũ asu noona, na sisya! ĩkomano ĩnene yĩla vataĩ mũndũ o na ũmwe ũtonya kũyĩtala, kuma mbaĩnĩ syonthe na ngo na andũ na ithyomo, maũngamĩte mbee wa kĩla kĩvĩla kya ũsumbĩ na mbee wa kala Kalondu, mekĩĩte kanzũ nzaũ; na maĩ na mbonge sya makĩndũ mokonĩ moo. 10 Na maneenaa na wasya mũnene, makyasya: “Ũtangĩĩo wumaa kwa Ngai, ũla wĩkalĩte kĩvĩlanĩ kya ũsumbĩ, na kwa kala Kalondu.”

11 Alaĩka onthe maũngamĩte mathyũlũlũkĩte kĩla kĩvĩla kya ũsumbĩ, na ala atumĩa na ila syũmbe inya syĩ thayũ, na mavalũka nthĩ na ũthyũ mbee wa kĩvĩla kĩu kya ũsumbĩ na mamũthaitha Ngai, 12 makyasya: “Ameni! Ngatho, nguma, ũĩ, mũvea, ndaĩa, ũtonyi, na vinya nĩ sya Ngai waitũ tene na tene. Ameni.”

13 Na ũmwe wa ala atumĩa angũlya: “Aa mekĩĩte kanzũ nzaũ naaũ, na maumĩte va?” 14 Na vau kwa vau namũsũngĩa, namwĩa: “Mwĩaĩi wakwa, we nue wĩsĩ.” Nake ambĩa: “Aa nĩ ala maumĩte ũla thĩnanĩ mũnene, na mathambĩtye kanzũ syoo na makaitwʼĩkĩthya nzaũ na nthakame ya kala Kalondu. 15 Nĩkyo kĩtumi me mbee wa kĩvĩla kya ũsumbĩ kya Ngai, na mamũthũkũmaa ũthũkũmi mũtheu mũthenya na ũtukũ ĩkalũnĩ yake; na Ũla wĩkalĩte kĩvĩlanĩ kya ũsumbĩ akatambũũkya ĩeema yake ĩũlũ woo. 16 Maikewʼa nzaa ĩngĩ o na maikewʼa waũni ĩngĩ, na syũa yĩikamavĩvya kana ũvyũvu o na wĩva, 17 nũndũ kala Kalondu, ũla wĩ vakuvĩ na kĩla kĩvĩla kya ũsumbĩ, akamaĩthya na akamatongoesya nthongonĩ sya kĩwʼũ kya thayũ. Na Ngai akavangũla methoi onthe methonĩ moo.”

8 Yĩla woombũie ũsiĩlo wa mũonza, nĩkwavindisye ki ĩtunĩ ta nusu saa. 2 Na noona alaĩka mũonza maũngamĩte mbee wa Ngai, na manengwa masoo mũonza.

3 Na mũlaĩka ũngĩ avika akwete kĩndũ kya thaavu kya kũtoeesya ũvani na aũngama kĩthembeonĩ, na anengwa ũvani mwingĩ nĩ kana awumye vamwe na mboya sya atheu onthe kĩthembeonĩ kya thaavu, kĩla kyaĩ mbee wa kĩvĩla kya ũsumbĩ. 4 Na syũki ya ũvani kuma kwʼokonĩ kwa mũlaĩka ũsu vamwe na mboya sya ala atheu syambata kwa Ngai. 5 Ĩndĩ vau kwa vau ũla mũlaĩka oosa kĩndũ kya kũtoeesya ũvani na akĩkĩa mwaki kuma vau kĩthembeonĩ na awĩkya ĩũlũ wa nthĩ. Na kweethĩwa itundumo na mawasya na ũtisi na kĩthingitho kya nthĩ. 6 Na alaĩka mũonza ala maĩ na ala masoo mũonza meeyũmbanyʼa kũmavuva.

7 Na wa mbee avuva soo wake. Na mbua ya mavia na mwaki ivulanĩte na nthakame, syekwʼa nthĩ; na kĩlungu kya katatũ kya nthĩ kyavya, na kĩlungu kya katatũ kya mĩtĩ kyavya, na mĩtĩ yonthe mĩũ yavya.

8 Na mũlaĩka wa kelĩ avuva soo wake. Na kĩndũ kĩilye kĩĩma kĩnene kyakanĩte mwaki kyekwʼa ũkanganĩ. Na kĩlungu kya katatũ kya ũkanga kyatwʼĩka nthakame; 9 na kĩlungu kya katatũ kya syũmbe syĩ thayũ ila syĩ ũkanganĩ kyakwʼa, na kĩlungu kya katatũ kya meli ila syaĩ ũkanganĩ kyaanangĩka.

10 Na mũlaĩka wa katatũ avuva soo wake. Na ndata nene yakanĩte ta taa yavalũka kuma ĩtunĩ, na yavalũkĩla kĩlungu kya katatũ kya mbũsĩ na kya nthongo * sya kĩwʼũ. 11 Ĩsyĩtwa ya ndata ĩsu nĩ mũtĩ wĩ ũũ. Na kĩlungu kya katatũ kya kĩwʼũ kyeethĩwa na ũũ, na andũ aingĩ makwʼa kumana na kĩwʼũ kĩu, nũndũ kyaĩ ũũ.

12 Na mũlaĩka wa kana avuva soo wake. Na kĩlungu kya katatũ kya syũa na kĩlungu kya katatũ kya mwei na kĩlungu kya katatũ kya ndata syakũnwa, nĩ kana kĩlungu kya katatũ kyasyo kĩtwʼĩke kĩvindu na kĩlungu kya katatũ kya mũthenya kĩikethĩwe na kyeni, na ũtukũ o nawʼo.

13 Na noona, na neewʼa ndiũ ĩũlũkĩte ĩtunĩ katĩ ĩkyasya ũũ na wasya mũnene: “Kyeva, kyeva, kyeva nĩ kwa ala matwĩe ĩũlũ wa nthĩ nũndũ wa mawasya ma masoo ala angĩ makilyĩ kũvuvwa nĩ alaĩka ala angĩ atatũ!”

9 Na mũlaĩka wa katano avuva soo wake. Na noona ndata yaĩ ĩnavalũka nthĩ kuma ĩtunĩ, na anengwa ũvungũo wa yĩla ĩima yĩte kĩtulu. * 2 Na avingũa yĩla ĩima yĩte kĩtulu, * na syũki yĩilye ta syũki ya ĩiko ĩnene yambata kuma ĩimanĩ yĩu, na syũa yamesya kĩvindu, na nzeve o nayo yamesya kĩvindu, nũndũ wa syũki yĩla yaumĩte ĩimanĩ yĩu. 3 Na ngie syauma syũkinĩ yĩu syathi ĩũlũ wa nthĩ, na syanengwa ũkũmũ, o ta ũla wa ila ingʼauĩ sya nthĩ. 4 Na syeewa iikanange nyeki sya nthĩ kana mũtĩ o na wĩva mwĩũ kana mũtĩ ũngĩ o na wĩva, ĩndĩ syanange o andũ ala mate na ũsiĩlo wa Ngai itulyanĩ syoo.

5 Na ngie isu syanengwa ũkũmũ wa kũmathĩnyʼa myei ĩtano, ĩndĩ iikamoae, na ũthĩnyʼo wasyo wailye ta wa kĩngʼauĩ yĩla kyaũma mũndũ. 6 Mĩthenyanĩ ĩsu andũ makamantha kĩkwʼũ ĩndĩ maikakyona, na makenda kũkwʼa, ĩndĩ kĩkwʼũ kĩkasemba kuma vala maĩ.

7 Na ngie isu syavwʼanene na mbalasi syĩyũmbanĩtye kwondũ wa kaũ; na mĩtwenĩ yasyo syaĩ na syĩndũ iilye ngovia sya ũsumbĩ sya thaavu, na syaĩ na mothyũ mailye ma andũ, 8 ĩndĩ syaĩ na nzwʼĩĩ iilye sya aka. Na maeo masyo mailye ma mĩnyambũ, 9 na syaĩ na ngao sya kĩthũi iilye ngao sya kyũma. Na wasya wa nthwau syasyo waĩ ta wasya wa makasya makusĩtwʼe nĩ mbalasi isembete kaũnĩ. 10 O na syaĩ na isithe syaĩ na mĩthya * ta ya ingʼauĩ, na ũkũmũ wa kũthĩnyʼa andũ vandũ va myei ĩtano waĩ isithenĩ syasyo. 11 Na syaĩ na mũsumbĩ, mũlaĩka wa yĩla ĩima yĩte kĩtulu. * Ĩsyĩtwa yake kwa Kĩevelania nĩ Avatoni, * ĩndĩ kwa Kĩkiliki etawa Avolioni. *

12 Kyeva kya mbee nĩ kĩvĩtu. Sisya! Ve mavinda elĩ ma kyeva mokĩte ĩtina wa maũndũ asu.

13 Na mũlaĩka wa thanthatũ avuva soo wake. Na neewʼa wasya kuma mbyanĩ sya kĩla kĩthembeo kya thaavu, kĩla kĩ mbee wa Ngai, 14 ũimwĩa ũla mũlaĩka wa thanthatũ waĩ na soo: “Thasya ala alaĩka ana movetwe ũsĩnĩ mũnene wa Euvalati.” 15 Na alaĩka asu ana ala moombanĩtwʼe kwondũ wa ũla saa na mũthenya na mwei na mwaka nĩmathaiwʼe nĩ kana moae kĩlungu kya katatũ kya andũ.

16 Na ũtalo wa ita sya ala makuĩtwe nĩ mbalasi waĩ makili mĩongo ĩlĩ kũndũ makili ĩkũmi; na nĩneewie ũtalo woo. 17 Na ũũ nĩwʼo noonie ila mbalasi woninĩ na ala mekalĩte ĩũlũ wasyo: Maĩ na ngao sya kĩthũi sya langi mũtune ta mwaki na wa mbuluu na wa mũvĩlĩtĩ, na mĩtwe ya mbalasi isu yailye ya mĩnyambũ, na kwaumĩla mwaki na syũki na mũvĩlĩtĩ makanywʼanĩ masyo. 18 Na kĩlungu kya katatũ kya andũ nĩkyooaiwe nĩ mothĩnyʼo atatũ, namo nĩ mwaki na syũki na mũvĩlĩtĩ, ala maumie makanywʼanĩ masyo. 19 Nũndũ ũkũmũ wa mbalasi isu wĩ makanywʼanĩ masyo na isithenĩ syasyo, nũndũ isithe syasyo iilye nzoka na syĩ na mĩtwe, na itũmĩaa isithe isu kũũmĩsya.

20 Ĩndĩ andũ ala angĩ mataaũawa nĩ mothĩnyʼo asu mayaaĩlila kumana na mawĩa ma moko moo; mayaaeka kũthaitha ndaimoni na mĩvwʼanano ya thaavu na ya vetha na ya ũthuku * na ya mbwaũ, ĩla ĩtatonya kwona kana kwĩwʼa kana kũthi. 21 Na mayaaĩlila naĩ syoo ila mekĩte sya ũaani kana maũndũ ma ũwe kana ũlaalai * kana ũngʼei.

10 Na noona mũlaĩka ũngĩ wĩ na vinya atheeete kuma ĩtunĩ, avwʼĩkĩtwe ĩthweo, na aĩ na ũtaathi mũtwenĩ wake na ũthyũ wake wailye syũa, na maaũ * make mailye ituĩ sya mwaki, 2 na kwʼokonĩ kwake aĩ na kavuku ka kũkũnzwa ke kakũnzũe. Na akinya ũkanga na kũũ kwake kwa aũme, na akinya nthĩ nyũmũ na kũũ kwake kwa aka, 3 na aneena na wasya mũnene o tondũ mũnyambũ ũlumaa. Na yĩla waneenie na wasya mũnene, mawasya ma ila itundumo mũonza maneena.

4 Na yĩla ila itundumo mũonza syaneenie, naĩ vakuvĩ kũandĩka, ĩndĩ neewʼa wasya kuma ĩtunĩ ũyasya: “Ĩkĩa ũsiĩlo maũndũ ala weewʼa maineenwa nĩ ila itundumo mũonza, na ndũkamaandĩke.” 5 Na mũlaĩka ũla noonie aũngamĩte, akinyĩte ũkanga na nthĩ nyũmũ, ookĩlya kwʼoko kwake kwa aũme elekelye ĩtunĩ, 6 na eevĩta na Ũla wĩkalaa tene na tene, ũla woombie ĩtu na syĩndũ syonthe ila syĩ nthĩnĩ wayo, na nthĩ na syĩndũ ila syĩ nthĩnĩ wayo, na ũkanga na syĩndũ ila syĩ nthĩnĩ wawʼo, akyasya: “Ĩvinda ya kweteela nĩ ĩthelu. 7 Ĩndĩ mĩthenyanĩ ĩla mũlaĩka wa mũonza wĩĩthĩwa e vakuvĩ kũvuva soo wake, nĩvo ĩndĩ Ngai ũkeanĩsya kĩmbithĩ kĩtheu kĩla watavanisye ta ũvoo mũseo kwa ngombo syake mwene, nasyo nĩ athani.”

8 Na neewʼa wasya kuma ĩtunĩ ũineena nakwa ĩngĩ, ũkyasya: “Enda wose kavuku kau kakũnzũe kala ke kwʼokonĩ kwa ũla mũlaĩka ũũngamĩte akinyĩte ũkanga na nthĩ nyũmũ.” 9 Na nathi kwa ũla mũlaĩka na namwĩa anenge kavuku kau ka kũkũnzwa. Nake ambĩa: “Kose na ũikaya, na nĩkeũtuma ĩvu yaku yĩthĩwa na ũũ, ĩndĩ kanywʼanĩ waku keĩthĩwa ke mũyo ta ũkĩ wa nzũkĩ.” 10 Na noosa kavuku kau ka kũkũnzwa kwʼokonĩ kwa ũla mũlaĩka na nakaya, na kanywʼanĩ wakwa kaĩ mũyo ta ũkĩ wa nzũkĩ, ĩndĩ yĩla nakaĩye, ĩvu yakwa yeethĩwa na ũũ. 11 Na neewa: “No nginya wathane ĩngĩ ĩũlũ wa andũ, mbaĩ, ithyomo, na asumbĩ aingĩ.”

11 Na nanengwa mũangi ũilye ta ndata, * na neewa: “Ũkĩla na ũithima vala vandũ vatheu va ĩkalũ ya Ngai na kĩthembeo na ala meũthaithĩa vo. 2 Ĩndĩ ndũkathime nza wa vala vandũ vatheu va ĩkalũ, ekana nayo, nũndũ nza ĩsu nĩnengetwe andũ ma mbaĩ ingĩ, na makakinyanga ĩla ndũa ntheu myei 42. 3 Ngatuma ngũsĩ syakwa ilĩ syathana mĩthenya 1,260, syĩkĩĩte ngũa sya makunia.” 4 Ngũsĩ isu ivwʼananĩtwʼe na mĩtĩ ĩlĩ ya mĩthata na syĩndũ ilĩ sya kwilĩĩla taa, na iũngamĩte mbee wa Mwĩaĩi wa nthĩ.

5 Ethĩwa mũndũ o na wĩva nũkwenda kũiũmĩsya, mwaki nĩwumaa kanywʼanĩ wasyo na ũivĩvya amaitha masyo. Ethĩwa mũndũ o na wĩva akenda kũiũmĩsya, no nginya oawe ũu. 6 Ngũsĩ isu syĩ na ũkũmũ wa kũvinga yayaya nĩ kana mbua ndĩkaue mĩthenyanĩ ĩla iendeee kwathana, na syĩ na ũkũmũ ĩũlũ wa kĩwʼũ, wa kũkĩtwʼĩkĩthya nthakame, na ũkũmũ wa kũkũna nthĩ na kĩla mũthemba wa ũthĩnyʼo mavinda maingĩ ũndũ ikwenda.

7 Na syamina kumya ũkũsĩ wasyo, nyamũ ya kĩthekanĩ ĩla yambatie kuma ĩimanĩ yĩte kĩtulu * ĩkokita nasyo na ĩkaisinda na ĩkasyũaa. 8 Na simba syasyo ikeethĩwa nzĩanĩ nene ya ndũa nene, ĩla kwa nzĩa ya ngelekanyʼo yĩtawa Sotomo na Misili, vala Mwĩaĩi wasyo wooaĩwe mũtĩnĩ. 9 Na andũ me kĩvathũkanyʼo, na ngo, na ithyomo, na mbaĩ makasisya simba syasyo mĩthenya ĩtatũ na nusu, na maiketĩkĩlya mĩĩ yasyo ĩthikwe mbũanĩ. 10 Na ala matwĩe ĩũlũ wa nthĩ makatana na kwĩwʼa mũyo nũndũ wa kĩkwʼũ kyasyo, na makanengane mĩthĩnzĩo ene kwa ene, nĩkwĩthĩwa ngũsĩ isu ilĩ nĩsyathĩnasya ala matwĩe ĩũlũ wa nthĩ.

11 Ĩtina wa ĩla mĩthenya ĩtatũ na nusu, mĩthũmũ ya thayũ kuma kwa Ngai yalika nthĩnĩ wasyo, na syaũngama na maaũ masyo, na ala masyonie makwatwa nĩ wia mwingĩ. 12 Na syeewʼa wasya mũnene kuma ĩtunĩ ũisyĩa: “Ambatai kũũ.” Na syambata ĩtunĩ syĩ ĩthweonĩ, na amaitha masyo masyona. * 13 Na saanĩ ũsu kweethĩwa kĩthingitho kĩnene, na kĩlungu kya ĩkũmi kya ndũa kyavalũka; na andũ 7,000 mooawa nĩ kĩthingitho kĩu, na andũ ala angĩ matelema na mamũkumya Ngai wa ĩtunĩ.

14 Kyeva kya kelĩ nĩ kĩvĩtu. Sisya! Kyeva kya katatũ nĩkyũkĩte mĩtũkĩ.

15 Na mũlaĩka wa mũonza avuva soo wake. Na kwaĩ mawasya manene ĩtunĩ, makyasya: “Ũsumbĩ wa nthĩ nũtwʼĩkĩte Ũsumbĩ wa Mwĩaĩi waitũ na wa Klĩsto wake, nake akasumbĩka e mũsumbĩ tene na tene.”

16 Na ala atumĩa 24 mekalĩte ivĩlanĩ sya ũsumbĩ mbee wa Ngai, mavalũka nthĩ na mothyũ moo na mamũthaitha Ngai, 17 makyasya: “Nĩtũũkũtũngĩa mũvea Yeova Ngai, Mwene Vinya Wʼonthe, ũla wĩ kwʼo na waĩ kwʼo, nũndũ nĩwosete vinya waku mwingĩ na ũkambĩĩa kũsumbĩka wĩ mũsumbĩ. 18 Ĩndĩ mbaĩ syathilĩka, na ũthilĩku waku wooka, na ĩvinda yĩla yĩnyuvĩtwe yavika ya kũsilĩla ala akwʼũ na kũinenga ĩtuvi ngombo syaku athani na atheu na ala makĩaa ĩsyĩtwa yaku, anini na anene, na kũmananga ala manangaa nthĩ.”

19 Na vala vandũ vatheu va ĩkalũ ya Ngai vavingũka ĩtunĩ, na ĩsandũkũ ya ũtianĩo wake yooneka yĩ vala vandũ vatheu va ĩkalũ yake. Na kwaĩ ũtisi na mawasya na itundumo na ithingitho sya nthĩ na mbua nene ya mavia.

12 Na wonanyʼo mũnene wooneka ĩtunĩ: Kwaĩ mũndũ mũka ũvwʼĩkĩtwe syũa, na mwei waĩ ungu wa nyaaĩ syake, na mũtwenĩ wake vaĩ ngovia ya ũsumbĩ yĩ na ndata 12, 2 na aĩ mũito. Na nĩwaĩaa akyaũnya nĩ woo wa kũsyaa.

3 Na kwooneka wonanyʼo ũngĩ ĩtunĩ. Sisya! Mũkũnga mũnene na mũtune mũno, wĩ na mĩtwe mũonza na mbya ĩkũmi, na mĩtwenĩ yawʼo waĩ na ngovia mũonza sya ũsumbĩ; 4 na kĩsithe kyawʼo kyakusĩtye kĩlungu kya katatũ kya ndata sya ĩtunĩ, na wasyĩkya ĩũlũ wa nthĩ. Na mũkũnga ũsu waũngama mbee wa mũndũ mũka ũsu waĩ vakuvĩ kũsyaa, nĩ kana asyaa, ũmelye kana kake.

5 Na asyaa kavĩsĩ, ĩĩ, mũndũũme ũla ũkaĩthya mbaĩ syonthe na ndata ya kyũma. Na kana kake kavulwʼa katwawa kwa Ngai, ũla waĩ kĩvĩlanĩ kyake kya ũsumbĩ. 6 Na mũndũ mũka ũsu akĩa athi vandũ vala waseũvĩwʼe nĩ Ngai weũnĩ, na aĩ aĩthwʼe mĩthenya 1,260 e vau.

7 Na kwaĩ kaũ ĩtunĩ: Mikaeli * na alaĩka make mokita na ũla mũkũnga vamwe na alaĩka mawʼo 8 ĩndĩ mayaasinda, * na vayaĩ mwanya woo ĩngĩ ĩtunĩ. 9 Na mũkũnga ũsu wekwʼa nthĩ, ĩla nzoka ngũũ, ĩla yĩtawa Ndevili na ĩngĩ Satani, ũla ũkengaa nthĩ yonthe; ekwʼa nthĩ, na alaĩka make mekwʼa nthĩ vamwe nake. 10 Na neewʼa wasya mũnene kuma ĩtunĩ ũyasya:

“Yu ve ũtangĩĩo na vinya na Ũsumbĩ wa Ngai waitũ na ũkũmũ wa Klĩsto wake, nũndũ ũla ũsikataa ana-a-asa maitũ nĩwekwʼa nthĩ, ũla ũmasikataa kwa Ngai mũthenya na ũtukũ! 11 Na mamũsinda nũndũ wa nthakame ya kala Kalondu na nũndũ wa ndeto ya ũkũsĩ woo, na mayaaenda mathayũ moo o na yĩla maĩ vakuvĩ kũawa. 12 Na nũndũ wa ũu, tanai inywʼĩ matu na ala mũtwĩe nthĩnĩ wamo! Kyeva nĩ kwa nthĩ na ũkanga, nũndũ Ndevili nĩwatheea kũla mũĩ, e na ũthatu mwingĩ, nũndũ nĩwĩsĩ e na kavinda o kanini.”

13 Yĩla ũla mũkũnga woonie kana nĩwekwʼa nthĩ, wamũthĩnyʼa ũla mũndũ mũka wasyaie kala kana kavĩsĩ. 14 Ĩndĩ mũndũ mũka ũsu anengwa nthwau ilĩ sya ndiũ nene, nĩ kana aũlũke athi vala vandũ vake weũnĩ, vala waĩ aĩthwʼe kwa ĩvinda, mavinda, na nusu ĩvinda, * e vaasa na ũthyũ wa ĩla nzoka.

15 Na nzoka yatavĩka kĩwʼũ kingĩ ta ũsĩ kuma kanywʼanĩ wayo ĩtina wa ũla mũndũ mũka, nĩ kana oawe nĩ ũsĩ ũsu. 16 Ĩndĩ nthĩ yamũtetheesya mũndũ mũka ũsu, na nthĩ yaathamya kanywʼa wayo na yamelya ũsĩ ũsu mũkũnga watavĩkie kuma kanywʼanĩ wawʼo. 17 Nĩvo ĩndĩ mũkũnga wathatĩie mũndũ mũka ũsu na wathi kũkita na ala matialĩte ma ũsyao wake, ala makwataa mĩao ya Ngai, na me na wĩa wa kumya ũkũsĩ ĩũlũ wa Yesũ.

13 Na ũla mũkũnga waũngama kĩthangathĩnĩ kya ũkanga.

Na noona nyamũ ya kĩthekanĩ yambatĩte kuma ũkanganĩ, yĩ na mbya ĩkũmi na mĩtwe mũonza, na mbyanĩ syayo yaĩ na ngovia ĩkũmi sya ũsumbĩ, ĩndĩ mĩtwenĩ yayo vaĩ masyĩtwa ma kũumana. 2 Nyamũ ya kĩthekanĩ ĩla noonie yailye kĩkoyo, * ĩndĩ maaũ mayo mailye ma nduva, na kanywʼa wayo wailye wa mũnyambũ. Na ũla mũkũnga wanenga nyamũ ĩsu ya kĩthekanĩ vinya na kĩvĩla kya ũsumbĩ na ũkũmũ mũnene.

3 Na noona mũtwe wayo ũmwe ũilye ta ũnaĩ na ũũmĩsye wa kũmyũaa, ĩndĩ kĩtau kĩu kyayo kĩla kyaĩ vakuvĩ kũmyũaa kyaĩ kĩnavoa, na andũ onthe ma nthĩ maatĩĩa nyamũ ĩsu ya kĩthekanĩ masengʼete. 4 Na mathaitha mũkũnga ũsu nũndũ nĩwamĩnengie ĩla nyamũ ya kĩthekanĩ ũkũmũ, na mathaitha nyamũ ĩsu ya kĩthekanĩ, makyasya: “Nũũ ũla ũilye ta nyamũ ĩno ya kĩthekanĩ, na nũũ ũla ũtonya kũkita nayo?” 5 Na yanengwa kanywʼa waneenaa maũndũ manene na kũumana, na yanengwa ũkũmũ wa kwĩka ũndũ ĩkwenda kwa myei 42. 6 Na yaathamya kanywʼa wayo kwelekela Ngai nĩ kana ĩumange ĩsyĩtwa yake na wĩkalo wake, ĩĩ, ala mekalaa ĩtunĩ. 7 Nyamũ ĩsu nĩyeetĩkĩlilwʼe kũkita na ala atheu na kũmasinda, na yanengwa ũkũmũ ĩũlũ wa ngo syonthe na andũ na ithyomo na mbaĩ. 8 Na onthe ala matwĩe ĩũlũ wa nthĩ makamĩthaitha. Na kuma mwambĩlĩlyo wa nthĩ, vaiĩ ĩsyĩtwa ya o na ũmwe woo yĩandĩkĩtwe ĩvukunĩ ya kũkũnzwa ya thayũ ya kala Kalondu kooaiwe.

9 Ũla wĩ kũtũ nĩewʼe. 10 Ethĩwa mũndũ o na wĩva nĩ wa kũtavwa, ũsu akatavwa. Na ethĩwa mũndũ o na wĩva akooaa na ũvyũ, * no nginya oawe na ũvyũ. Vaa nĩvo atheu mendekaa kwĩthĩwa na wũmĩĩsyo na mũĩkĩĩo.

11 Na noona nyamũ ĩngĩ ya kĩthekanĩ yambatĩte kuma nthĩ, na yaĩ na mbya ilĩ iilye sya kalondu, ĩndĩ yambĩĩa kũneena ta mũkũnga. 12 Na nĩtũmĩaa ũkũmũ wa ĩla nyamũ ya kĩthekanĩ ya mbee, nyamũ ĩsu yene. Na nĩtumaa nthĩ na ekali mayo mathaitha ĩla nyamũ ya mbee ya kĩthekanĩ, ĩla yaĩ na kĩtau kyaĩ vakuvĩ kũmyũaa na kyavoa. 13 Na nĩyĩkaa syama nene mbee wa andũ, o na nĩtumaa mwaki ũtheea nthĩ kuma ĩtunĩ.

14 Nĩkengaa ala matwĩe ĩũlũ wa nthĩ nũndũ wa syama ila yeetĩkĩlilwʼe kwĩka, ĩla nyamũ ya kĩthekanĩ yene, na nĩtavasya andũ ala matwĩe ĩũlũ wa nthĩ maseũvye mũvwʼanano wa ĩla nyamũ ya kĩthekanĩ, ĩla yatemetwe na ũvyũ ĩndĩ ĩkavoa. 15 Na nĩyeetĩkĩlilwʼe kũũnenga mĩthũmũ ya thayũ ũla mũvwʼanano wa nyamũ ya kĩthekanĩ, nĩ kana mũvwʼanano ũsu wa nyamũ ya kĩthekanĩ wĩthĩwe ũtonya kũneena na kũtuma andũ onthe ala meũlea kũthaitha mũvwʼanano wayo moawa.

16 Na nĩlasimĩthasya andũ onthe, anini na anene, athwii na ngya, ngombo na ala athasye, mekĩwe ũvano kwʼokonĩ kwoo kwa aũme na itulyanĩ syoo, 17 nĩ kana mũndũ o na wĩva ndakethĩwe atonya kũthooa kana kũthoosya ate o ũla wĩ na ũvano ũsu, nawʼo nĩ ĩsyĩtwa ya nyamũ ĩsu ya kĩthekanĩ kana namba ya ĩsyĩtwa yayo. 18 Vaa nĩ vo vekwendeka ũĩ: Eka ũla wĩ na ũmanyi eke ĩsavu ya namba ya ĩla nyamũ ya kĩthekanĩ, nũndũ nĩ namba ya mũndũ, na namba yayo nĩ 666.

14 Na noona, na sisya! kala Kalondu aũngamĩte Kĩĩmanĩ kya Saioni, e na ala 144,000 ala maandĩkĩtwe itulyanĩ syoo ĩsyĩtwa yake na ĩsyĩtwa ya Ĩthe wake. 2 Na neewʼa wasya kuma ĩtunĩ ũilye ta wasya wa kĩwʼũ kingĩ na wasya wa kĩtundumo; wasya ũla neewie waĩ ta wa aini mekwina makũnĩte mbeve syoo. 3 Na mainaa wathi weewʼĩkaa ta mweũ me mbee wa kĩla kĩvĩla kya ũsumbĩ na mbee wa ila syũmbe inya na ala atumĩa, na vaiĩ ũmwe waĩ atonya kũmanya wathi ũsu ate o ala 144,000, ala mathooetwe kuma ĩũlũ wa nthĩ. 4 Asu nĩmo ala mataaĩvukya na aka; ĩĩ, nĩ andũ atheu. Asu nĩmo ala maatĩĩaa kala Kalondu kwʼonthe kũla ũendaa. Mathooiwe kuma andũnĩ ta ũsyao wa mbee kwa Ngai na kwa kala Kalondu, 5 na vaiĩ ũvũngũ waaoneka makanywʼanĩ moo; mo mai na ĩlanga.

6 Na noona mũlaĩka ũngĩ aũlũkĩte ĩtunĩ katĩ, na aĩ na ũvoo mũseo wa tene na tene nĩ kana aũtavanyʼe kwa ala matwĩe ĩũlũ wa nthĩ, kwa kĩla mbaĩ na ũko na kĩthyomo na andũ. 7 Nake aneena na wasya mũnene, akyasya: “Mũkĩei Ngai na mũimũkumya, nũndũ saa wake wa ũsilĩlo nĩ mũviku, kwoou mũthaithei Ũla woombie ĩtu na nthĩ na ũkanga na nthongo * sya kĩwʼũ.”

8 Na mũlaĩka ũngĩ wa kelĩ aatĩĩa, akyasya: “Nĩ mbalũku! Mbaviloni Ĩla Nene nĩ mbalũku, ĩla yatumie mbaĩ syonthe inywʼa mbinyu ya wendi * wayo mwingĩ wa kwĩka ũlaalai!” *

9 Na mũlaĩka ũngĩ wa katatũ aatĩĩa, akyasya ũũ na wasya mũnene: “Ethĩwa mũndũ o na wĩva nũkũthaitha ĩla nyamũ ya kĩthekanĩ na mũvwʼanano wayo na ayĩkĩwa ũvano kĩtulyanĩ kyake kana kwʼokonĩ kwake, 10 akanywʼa mbinyu ya ũthatu wa Ngai ĩla ĩtulũlawa kĩkombenĩ Kyake kya ũthilĩku ĩtongeletwe kĩndũ, na akathĩnwʼa na mwaki na mũvĩlĩtĩ methonĩ ma alaĩka atheu na kala Kalondu. 11 Na syũki ya kũthĩnwʼa kwoo yambataa tene na tene, na mayĩthĩawa na ũthũmũo mũthenya na ũtukũ, ala mathaithaa ĩla nyamũ ya kĩthekanĩ na mũvwʼanano wayo na mũndũ o na wĩva ũla wĩkĩawa ũvano wa ĩsyĩtwa yayo. 12 Vaa nĩ vo ala atheu mendekaa kwĩthĩwa na wũmĩĩsyo, ala maatĩĩaa mĩao ya Ngai na malũmanasya vyũ na mũĩkĩĩo woo nthĩnĩ wa Yesũ.”

13 Na neewʼa wasya kuma ĩtunĩ, ũkyasya, “Andĩka: Nĩ atanu ala kuma yu na kũendeea makusaa me ngwatanĩo vamwe na Mwĩaĩi. Ĩĩ, veva wĩasya, eka mathũmũe kuma mawĩanĩ moo momũ, nũndũ maũndũ ala meekie maendaa vamwe namo.”

14 Na noona, na sisya! ĩthweo yeũ, na ũla wekalĩte ĩũlũ wa ĩthweo yĩu ailye mwana wa mũndũ, e na ngovia ya ũsumbĩ ya thaavu mũtwenĩ wake na kavyũ koĩ ke ngoto kwʼokonĩ kwake.

15 Na mũlaĩka ũngĩ auma vala vandũ vatheu va ĩkalũ na amwĩta na wasya mũnene ũla wekalĩte ĩũlũ wa yĩla ĩthweo, akyasya: “Tũmĩa kavyũ kaku ke ngoto na ũiketha, nũndũ saa wa kũketha nĩ mũviku, nĩkwĩthĩwa ngetha ya nthĩ nĩ mbĩu.” 16 Na ũla wekalĩte ĩũlũ wa yĩla ĩthweo ekya kavyũ kake ke ngoto ĩũlũ wa nthĩ, na nthĩ yakethwa.

17 Na mũlaĩka ũngĩ auma vala vandũ vatheu va ĩkalũ ĩtunĩ, o nake aĩ na kavyũ koĩ ke ngoto.

18 Na mũlaĩka ũngĩ auma kĩthembeonĩ, na aĩ na ũkũmũ ĩũlũ wa mwaki. Na amwĩta na wasya mũnene ũla waĩ na kavyũ koĩ ke ngoto, akyasya: “Tũmĩa kavyũ kaku koĩ ke ngoto na ũyũmbanyʼa itũngo sya mũsavivũ wa nthĩ, nũndũ nzavivũ syawʼo nĩ mbĩu.” 19 Na mũlaĩka ekya kavyũ kake ke ngoto ĩũlũ wa nthĩ na oombanyʼa mũsavivũ wa nthĩ, na awĩkya kĩangĩonĩ kya ũthatu wa Ngai. 20 Kĩangĩo kĩu kyaangĩiwe nza wa ndũa, na nthakame ĩla yaumie kĩangĩonĩ kĩu yambata yavikĩa itangʼa sya makanywʼa ma mbalasi, vandũ ve na ũasa wa maili 184. *

15 Na noona wonanyʼo ũngĩ ĩtunĩ, mũnene na wa kũsengyʼa, alaĩka mũonza me na mothĩnyʼo mũonza. Asu nĩmo ma mũthya, nũndũ kwĩsĩla mo ũthatu wa Ngai ũkathela.

2 Na noona kĩndũ kĩilye ũkanga wa kĩoo ũvulanĩte na mwaki, na ala masindie ĩla nyamũ ya kĩthekanĩ na mũvwʼanano wayo na namba ya ĩsyĩtwa yayo maũngamĩte ũtee wa ũla ũkanga wa kĩoo, makwete mbeve sya Ngai. 3 Na mainaa wathi wa Mose, ĩla ngombo ya Ngai, na wathi wa kala Kalondu, makyasya:

“Mawĩa maku nĩ manene na ma ũsengyʼo, Yeova Ngai, Mwene Vinya Wʼonthe. Nzĩa syaku nĩ sya ũlũngalu na sya wʼo, Mũsumbĩ wa tene na tene. 4 Nũũ ũla ũtakakũkĩa, we Yeova, na kũkumya ĩsyĩtwa yaku, nũndũ nue weka mũĩkĩĩku? Nũndũ mbaĩ syonthe ikooka na kũthaitha mbee waku, nĩkwĩthĩwa mĩao yaku mĩlũngalu nĩvuanĩtwʼe.”

5 Ĩtina wa maũndũ asu noona vala vandũ vatheu va ĩeema ya ũkũsĩ vaivingũwa ĩtunĩ, 6 na alaĩka mũonza ala me na ala mothĩnyʼo mũonza mauma vala vandũ vatheu, mekĩĩte ngũa ya katane ntheu ĩkũtisatisa na makeyova mĩsivi ya thaavu ithũinĩ syoo. 7 Na ũmwe wa ila syũmbe inya syĩ thayũ anenga ala alaĩka mũonza mbakũli mũonza sya thaavu syusũĩte ũthatu wa Ngai, ũla wĩkalaa tene na tene. 8 Na vala vandũ vatheu vausũa syũki nũndũ wa ndaĩa ya Ngai na nũndũ wa vinya wake, na vaiĩ mũndũ waĩ atonya kũlika vandũ vau vatheu nginya ala mothĩnyʼo mũonza ma ala alaĩka mũonza mathele.

16 Na neewʼa wasya mũnene kuma vala vandũ vatheu ũitavya ala alaĩka mũonza atĩĩ: “Endai mũtulũle ĩũlũ wa nthĩ ila mbakũli mũonza sya ũthatu wa Ngai.”

2 Na wa mbee athi na atulũla mbakũli yake ĩũlũ wa nthĩ. Na andũ ala maĩ na ũvano wa ĩla nyamũ ya kĩthekanĩ, na ala mathaithaa mũvwʼanano wayo, makwatwa nĩ kĩtau kĩthũku na kĩ woo.

3 Na wa kelĩ atulũla mbakũli yake ũkanganĩ. Nawʼo weethĩwa ta nthakame ya mũndũ mũkwʼũ, na syũmbe syonthe ila syaĩ thayũ syakwʼa, ĩĩ, syĩndũ ila syaĩ ũkanganĩ.

4 Na wa katatũ atulũla mbakũli yake mbũsĩnĩ na nthongonĩ * sya kĩwʼũ. Na syatwʼĩka nthakame. 5 Na neewʼa mũlaĩka ũla wĩ na ũkũmũ ĩũlũ wa kĩwʼũ, akyasya: “We, Ũla wĩ kwʼo na waĩ kwʼo, we Ũla mũĩkĩĩku, wĩ mũlũngalu, nĩkwĩthĩwa nĩwumĩtye mosilĩlo asu, 6 nũndũ nĩmetĩkisye nthakame ya atheu na ya athani, na nũmanengete nthakame manywʼe; na ũu nĩwʼo ũmaĩlĩte.” 7 Na neewʼa wasya kuma kĩthembeonĩ ũyasya: “Ĩĩ, Yeova Ngai, Mwene Vinya Wʼonthe, mosilĩlo maku nĩ ma wʼo na nĩ malũngalu.”

8 Na wa kana atulũla mbakũli yake ĩũlũ wa syũa, na syũa yanengwa ũkũmũ wa kũvĩvya andũ na mwaki. 9 Na andũ mavĩvwʼa nĩ ũvyũvu mwingĩ, na mayĩuma ĩsyĩtwa ya Ngai, ũla wĩ na ũkũmũ ĩũlũ wa mothĩnyʼo asu, na mayaaĩlila na kũmũkumya.

10 Na wa katano atulũla mbakũli yake kĩvĩlanĩ kya ũsumbĩ kya ĩla nyamũ ya kĩthekanĩ. Na ũsumbĩ wayo wamesya kĩvindu, na mambĩĩa kũũmanga nĩmĩ syoo nũndũ wa woo, 11 na mamũuma Ngai wa ĩtunĩ nũndũ wa woo na itau syoo, na mayaaĩlila kumana na meko moo.

12 Na wa thanthatũ atulũla mbakũli yake ũsĩnĩ mũnene wa Euvalati, na kĩwʼũ kyawʼo kyangʼala nĩ kana nzĩa ĩseũvwʼe kwondũ wa asumbĩ kuma ngalĩko ya wumĩlonĩ wa syũa.

13 Na noona moneeni atatũ mavuku na maveveee, ala moonekaa mailye ta syoa, mayuma kanywʼanĩ wa ũla mũkũnga na kanywʼanĩ wa ĩla nyamũ ya kĩthekanĩ na kanywʼanĩ wa ũla mwathani wa ũvũngũ. 14 Vate nzika asu nĩ moneeni maveveewe nĩ ndaimoni na nĩmekaa syama, na nĩmaendaa kwa asumbĩ ma nthĩ yonthe, kũmombanyʼa vamwe kwondũ wa kaũ wa ũla mũthenya mũnene wa Ngai Mwene Vinya Wʼonthe.

15 “Sisya! Nũkĩte ta kĩngʼei. Nĩ mũtanu mũndũ ũla wĩkalaa e metho na ũsũvĩaa ngũa syake sya ĩũlũ, nĩ kana ndakese kũthi e mũthei na andũ maimwona na ayĩwʼa nthoni.”

16 Na mamombanyʼa vamwe vandũ vetawa kwa Kĩevelania Alimaketoni. *

17 Na wa mũonza atulũla mbakũli yake nzevenĩ. Na ĩtina wa ũu wasya mũnene wauma vala vandũ vatheu, kuma kĩvĩlanĩ kya ũsumbĩ, ũkyasya: “Ũu nĩwathela!” 18 Na kweethĩwa ũtisi na mawasya na itundumo, na kwaĩ kĩthingitho kĩnene kya nthĩ kĩtaaĩthĩwa kuma andũ moombwa, kĩthingitho kĩu kyaĩ kĩnene na kyaĩ vinya mũno. 19 Na ĩla ndũa nene yaatũkana ilungu itatũ, na ndũa sya andũ ma mbaĩ ingĩ syavalũka; na Mbaviloni Ĩla Nene yalilikanwa mbee wa Ngai, nĩ kana ĩnengwe kĩkombe kya mbinyu ya ũthatu wa ũthilĩku wake. 20 Na ithama syonthe syakĩa, na iĩma iyaaoneka. 21 Na mbua nene ya mavia, kĩla yĩmwe yĩ na ũito ta wa talendi ĩmwe * yamatheeea andũ kuma ĩtunĩ, na andũ mamũuma Ngai nũndũ wa ũthĩnyʼo wa mbua ĩsu ya mavia, nĩkwĩthĩwa ũthĩnyʼo ũsu waĩ mũnene mũno.

17 Na mũlaĩka ũmwe katĩ wa alaĩka mũonza ala maĩ na mbakũli mũonza ambĩa: “Ũka na nĩngũkwonyʼa ũsilĩlo wa yĩla ĩlwaya ĩnene yĩkalĩte ĩũlũ wa kĩwʼũ kingĩ, 2 yĩla asumbĩ ma nthĩ meekie ũlaalai * nayo, na ala matwĩe ĩũlũ wa nthĩ mamilwa nĩ mbinyu ya ũlaalai * wayo.”

3 Nake angua kwĩsĩla vinya wa veva andwaa weũnĩ. Na noona mũndũ mũka ekalĩle nyamũ ya kĩthekanĩ ndune mũno ĩla yausũĩte masyĩtwa ma kũumana, na yaĩ na mĩtwe mũonza na mbya ĩkũmi. 4 Mũndũ mũka ũsu eekĩĩte ngũa ya langi wa nzambalaũ na ngũa ndune mũno, na eeyanakavĩtye na thaavu na mavia ma thooa mũnene na lũlũ, na kwʼokonĩ kwake aĩ na kĩkombe kya thaavu kyausũĩte maũndũ ma kũthatya na syĩndũ mbuku sya ũlaalai * wake. 5 Na kĩtulyanĩ kyake vaandĩkĩtwe ĩsyĩtwa ya kĩmbithĩ: “Mbaviloni Ĩla Nene, inyia wa malwaya na wa maũndũ ma kũthatya ma nthĩ.” 6 Na noona kana mũndũ mũka ũsu nĩwamilĩtwe nĩ nthakame ya atheu na nthakame ya ngũsĩ sya Yesũ.

Yĩla namwonie nĩnasengʼie mũno. 7 Kwoou mũlaĩka ũsu ambĩa: “Nĩkĩ wasengʼa? Nĩngũũtavya kĩmbithĩ kya mũndũ mũka ũsu na kya nyamũ ya kĩthekanĩ ĩla ĩmũkuĩte na yĩ na mĩtwe mũonza na mbya ĩkũmi: 8 Nyamũ ya kĩthekanĩ ĩla wonie, yaĩ vo, ĩndĩ yu ndĩ vo, na yĩ vakuvĩ kwambata kuma yĩla ĩimanĩ yĩte kĩtulu, * na ĩkaanangwa. Na ala matwĩe ĩũlũ wa nthĩ, ala masyĩtwa moo mataandĩkwa ĩvukunĩ ya kũkũnzwa ya thayũ kuma mwambĩlĩlyonĩ wa nthĩ, makasengʼa nũndũ wa ĩla nyamũ ya kĩthekanĩ, nĩkwĩthĩwa yaĩ vo, yu ndĩ vo, na ĩkeethĩwa vo ĩngĩ.

9 “Vaa nĩ vo vekwendeka kĩlĩko na ũĩ: Ĩla mĩtwe mũonza nĩ iĩma mũonza, ila ũla mũndũ mũka wĩkalĩle. 10 Na ve asumbĩ mũonza: Atano nĩ avalũku, ũmwe yu e vo, na ũla ũngĩ ndanamba kũvika; ĩndĩ yĩla wĩvika, akekala ĩvinda ĩkuvĩ. 11 Na nyamũ ya kĩthekanĩ ĩla yaĩ vo, ĩndĩ yu ndĩ vo, nyamũ ĩsu nĩ mũsumbĩ wa nyanya, ĩndĩ yumanĩte na ala asumbĩ mũonza, na ĩkaanangwa.

12 “Mbya ĩkũmi ila wonie nĩ asumbĩ ĩkũmi ala matanamba kũkwata ũsumbĩ, ĩndĩ makakwata ũkũmũ wa kwĩthĩwa me asumbĩ vamwe na nyamũ ya kĩthekanĩ vandũ va ĩsaa yĩmwe. 13 Asu me na kĩsũanĩo kĩmwe, na kwoou makanenga ĩla nyamũ ya kĩthekanĩ vinya na ũkũmũ woo. 14 Na makokita na kala Kalondu, ĩndĩ nũndũ we nĩ Mwĩaĩi wa eaĩi na Mũsumbĩ wa asumbĩ, akamasinda. O na ala me nake, ala metĩtwe, na anyuve, na aĩkĩĩku, makeeka oou.”

15 Na ambĩa: “Kĩwʼũ kingĩ kĩla wonie vala yĩla ĩlwaya yĩkalĩte, nĩ andũ na nguthu sya andũ na mbaĩ na ithyomo. 16 Na mbya ĩkũmi ila wonie vamwe na ĩla nyamũ ya kĩthekanĩ, ikamena yĩla ĩlwaya na kũyĩvena syĩndũ syayo syonthe na kũyĩtia yĩ ĩthei, na ikaya nyama syayo na kũyĩvĩvya vyũ na mwaki. 17 Nĩkwĩthĩwa Ngai nĩwĩkĩĩte ngoonĩ syoo mũvango wa kwĩka kĩla ũsũanĩĩte, ĩĩ, syĩke kwosana na kĩsũanĩo kyoo kĩmwe kwa kũnenga ĩla nyamũ ya kĩthekanĩ ũsumbĩ wasyo, nginya ndeto sya Ngai ianĩe. 18 Na mũndũ mũka ũla wonie nĩ ndũa nene ĩla ĩsumbĩkĩte asumbĩ ma nthĩ.”

18 Ĩtina wa ũu noona mũlaĩka ũngĩ atheeete kuma ĩtunĩ e na ũkũmũ mũnene, na nthĩ yamulĩkwa nĩ ũtheu wake mũtisu. 2 Na aneena na wasya mũnene, akyasya: “Nĩ mbalũku! Mbaviloni Ĩla Nene nĩ mbalũku, na ĩtwʼĩkĩte wĩkalo wa ndaimoni na vandũ vala kĩla veva mũvuku wĩkalaa na vala kĩla nyũnyi mbuku na ĩmenetwe yĩkalaa! 3 Nĩkwĩthĩwa mbaĩ syonthe nikwatĩtwʼe kwĩsĩla mbinyu ya wendi * wake mwingĩ wa kwĩka ũlaalai, * na asumbĩ ma nthĩ nĩmeekie ũlaalai nake, na akũni ma viasala mathuiwʼe nĩ syĩndũ syake mbingĩ sya thooa mũnene, ila ũtewʼaa nthoni kwĩyũmbanĩsya.”

4 Na neewʼa wasya ũngĩ kuma ĩtunĩ ũkyasya: “Umai nthĩnĩ wake, andũ makwa, ethĩwa mũikwenda kwĩka naĩ vamwe nake na ethĩwa mũikwenda kũkwata mothĩnyʼo vamwe nake. 5 Nũndũ naĩ syake nĩsingĩvĩte nginya ikavika ĩtunĩ, na Ngai nũlilikanĩte meko make mathũku. * 6 Mwĩkei o ũndũ weekie angĩ, ĩĩ, mwĩkei kũndũ kwĩlĩ kwa maũndũ ala weekie; kĩkombe kĩla wavulanilye, mũvulanĩlyei kũndũ kwĩlĩ. 7 O ũndũ weenenevasya na weethĩawa na syĩndũ mbingĩ sya thooa mũnene, ila ũtewʼaa nthoni kwĩyũmbanĩsya, o ta ũu mũthĩnyʼei na mũituma ethĩwa na kĩmeto. Nĩkwĩthĩwa aasya ngoonĩ yake: ‘Nĩilyĩ nthĩ ta mũsumbĩ mũndũ mũka, na nyie ndi ndiwa, na ndikameta nongi.’ 8 Nĩkyo kĩtumi mothĩnyʼo make makoka mũthenya ũmwe, na kĩkwʼũ na kĩmeto na yũa, na akavĩvwʼa vyũ na mwaki, nũndũ Yeova Ngai ũla ũmũsilĩle e vinya.

9 “Na asumbĩ ma nthĩ, ala meekie ũlaalai * nake na kũtanĩa vamwe nake syĩndũ mbingĩ sya thooa mũnene, ila ũteewʼaa nthoni kwĩyũmbanĩsya, makaĩa na kwĩkũnanga me na kyeva moona syũki yĩla yĩumana na kũvĩvwʼa kwake. 10 Makaũngama vaasa maikĩa kũthĩnwʼa take, na makyasya: ‘Kyeva, kyeva nĩ kwaku we ndũa nene, Mbaviloni ndũa yĩ vinya, nũndũ ũsilĩlo waku nĩwooka ĩsaanĩ yĩmwe!’

11 “O na ĩngĩ, akũni ma viasala ma nthĩ nĩmekũĩa na kũmeta nũndũ wake, nĩkwĩthĩwa yu vaiĩ mũndũ wa kũthooa mĩio yoo ya viasala, 12 mĩio yoo ya viasala ya thaavu, vetha, mavia ma thooa mũnene, lũlũ, ngũa nzeo, ngũa sya langi wa nzambalaũ, ndii mbũthũ sya thooa mũnene, ngũa ndune mũno; na syĩndũ syonthe ila iseũvĩtwʼe na mbwaũ syĩ mũuke mũseo; na syĩndũ sya mĩthemba yonthe ila iseũvĩtwʼe na maeo ma nzou, na ila iseũvĩtwʼe na mbwaũ sya thooa mũnene, ũthuku, * kyũma, na mavia manake, 13 o na mũtalasinĩ, ĩliki ya India, ũvani, mauta me mũuke mũseo, ũvumba, mbinyu, mauta ma mũthata, mũtu mũseo, nganũ, ngʼombe, malondu, mbalasi, makasya, ngombo, na andũ. * 14 Ĩĩ, matunda maseo ala wendete mũno yu ndwĩ namo, na malĩu onthe me mũyo na syĩndũ syonthe nzeo nĩsyĩvetete vala ũĩ na iikoneka ĩngĩ.

15 “Na akũni ma viasala ala mathooasya syĩndũ isu, ala mathuiwʼe nĩwe, makaũngama vaasa maikĩa kũthĩnwʼa take, na makaĩa na kũmeta, 16 makyasya: ‘Kyeva, kyeva nĩ kwaku we ndũa nene, ũla wĩkĩĩte ngũa ya katane nzeo, ngũa ya langi wa nzambalaũ, na ngũa ndune mũno na ũkeyanakavya na syĩndũ sya thaavu, na mavia ma thooa mũnene, na lũlũ, 17 nĩkwĩthĩwa ĩsaanĩ yĩmwe ũthwii ũsu wingĩvĩte ũu nĩwaanangwa!’

“Na kĩla kavuteni wa meli, na kĩla mũndũ ũendaa na meli, na atwai ma meli, na onthe ala mathũkũmaa ũkanganĩ, maũngama vaasa 18 na maneena na wasya mũnene masyaĩtye syũki yĩla yaumanĩte na kũvĩvwʼa kwake, na masya: ‘Nĩ ndũa yĩva ĩilye ta ĩla ndũa nene?’ 19 Na meeyũmba kĩtoo mĩtwenĩ yoo na maneena na wasya mũnene, maĩĩte na kũmeta, makyasya: ‘Kyeva, kyeva nĩ kwa ĩla ndũa nene, ĩla yatumie onthe ala maĩ na meli ũkanganĩ matwʼĩka athwii kumana na ũthwii wayo, nũndũ ĩsaanĩ yĩmwe nĩyaanangwa!’

20 “Tana nũndũ wayo, we ĩtu, o nenyu ala atheu, na atũmwa, na athani, nũndũ Ngai nũmĩsilĩle kwondũ wenyu!”

21 Na mũlaĩka wĩ vinya ookĩlya ĩvia yĩilye ta ĩvia ĩnene ya kũthia na ayĩkya ũkanganĩ, akyasya: “Ũu nĩwʼo Mbaviloni ĩla ndũa nene ĩkekwʼa nthĩ na mĩtũkĩ, na ndakoneka ĩngĩ nongi. 22 Na wasya wa aini ala mainaa makũnĩte mbeve, na wa akũni ma wathi, na wa avuvi ma mĩtũlilũ na ma masoo ndũkewʼĩka nthĩnĩ waku ĩngĩ. Na vaiĩ mũseũvya wa syĩndũ ũla ũthũkũmaa wĩa o na wĩva ũkoneka nthĩnĩ waku ĩngĩ, na vaiĩ wasya wa ĩvia ya kũthia ũkewʼĩka nthĩnĩ waku ĩngĩ. 23 Vaiĩ kyeni kya taa kĩkakena nthĩnĩ waku ĩngĩ, na vaiĩ wasya wa mũtwaani na wa mũtwawa ũkewʼĩka nthĩnĩ waku ĩngĩ; nũndũ akũni maku ma viasala nĩmo maĩ andũ ala ma vata ĩũlũ wa nthĩ, na nĩwakengie mbaĩ syonthe ũitũmĩa ũwe waku. 24 Ĩĩ, nthĩnĩ wake nĩvoonekie nthakame ya athani, ya atheu, na ya onthe ala mooaiwe ĩũlũ wa nthĩ.”

19 Ĩtina wa maũndũ asu neewʼa wasya ũla weewʼĩkaa ta wasya mũtũlu wa andũ aingĩ me ĩtunĩ. Na masya: “Aleluya! * Ũtangĩĩo na ndaĩa na vinya nĩ sya Ngai waitũ, 2 nũndũ mosilĩlo make nĩ ma wʼo na ma ũlũngalu. Nĩkwĩthĩwa nũsilĩle yĩla ĩlwaya ĩnene, yĩla yaanangie nthĩ na ũlaalai * wayo, na nũĩvanĩisye nthakame ya ngombo syake ĩla yĩ mokonĩ mayo.” 3 Na vau kwa vau maneena ĩngĩ ya kelĩ, masya: “Aleluya! * Na syũki yayo yambataa tene na tene.”

4 Na ala atumĩa 24 vamwe na ila syũmbe inya syĩ thayũ mavalũka nthĩ na mamũthaitha Ngai, ũla wĩkalĩte kĩvĩlanĩ kya ũsumbĩ, na masya: “Ameni! Aleluya!” *

5 O na ĩngĩ, wasya wauma kĩvĩlanĩ kya ũsumbĩ, na wasya: “Mũtaĩei Ngai, inywʼĩ ngombo syake syonthe, ala mũmũkĩaa, anini na anene.”

6 Na neewʼa wasya ũla weewʼĩkaa ta wasya mũtũlu wa andũ aingĩ na ta wasya wa kĩwʼũ kingĩ na ta wasya wa itundumo nene. Na masya: “Aleluya, * nũndũ Yeova Ngai waitũ, Mwene Vinya Wʼonthe, nĩwambĩĩie kũsumbĩka e mũsumbĩ! 7 Ekai tũtane na tũyĩthĩwa na mũyo na tũimũkumya, nĩkwĩthĩwa mũtwaano wa kala Kalondu nĩ mũviku na mũka wake nĩwĩyũmbanĩtye. 8 Ĩĩ, nũnengetwe mwanya wa kwĩkĩwa ngũa ya katane ĩkũtisatisa, ntheu na nzeo; ngũa ĩsu ya katane nzeo yĩonanyʼa meko ma ũlũngalu ma ala atheu.”

9 Na ambĩa, “Andĩka: Nĩ atanu ala mathoketwʼe lĩunĩ wa wĩoo wa mũtwaano wa kala Kalondu.” O na ĩngĩ ambĩa: “Isu nĩ ndeto sya wʼo sya Ngai.” 10 Yĩla neewie ũu, navalũka maaũnĩ make nĩmũthaithe. Ĩndĩ ambĩa: “Ĩsũvĩe! Ndũkeke ũu! Nyie nĩ ngombo o taku na ana-a-asa maku ala me na wĩa wa kumya ũkũsĩ ĩũlũ wa Yesũ. Mũthaithe Ngai! Nũndũ ũkũsĩ ĩũlũ wa Yesũ nĩwʼo kĩeleelo kya wathani.”

11 Na noona ĩtu yĩ ĩvingũku, na sisya! vaĩ mbalasi nzaũ. Na ũla wekalĩte ĩũlũ wayo etawa Mũĩkĩĩku na Wʼo, na nũsilaa na kũkita kwa ũlũngalu. 12 Metho make mailye ũmũĩ wa mwaki na mũtwenĩ wake aĩ na ngovia mbingĩ sya ũsumbĩ. Aĩ na ĩsyĩtwa yĩandĩkĩtwe na vaiĩ mũndũ wayĩsĩ eka we mwene, 13 na eekĩĩte ngũa ya ĩũlũ ĩtalĩkangĩlwe nĩ nthakame, na etawa Ndeto ya Ngai. 14 O na ĩngĩ, ita sya ĩtunĩ nĩsyamũatĩĩe syĩ mbalasinĩ nzaũ na syeekĩĩte ngũa nzaũ sya katane, ntheu na nzeo. 15 Kanywʼanĩ wake vaumĩlĩte ũvyũ mũĩ mũasa wa kũtema mbaĩ, na akasiĩthya na ndata ya kyũma. O na ĩngĩ, nũkinyangaa kĩangĩo kya mbinyu kya ũthatu wa ũthilĩku wa Ngai Mwene Vinya Wʼonthe. 16 Ngũanĩ yake ya ĩũlũ, ĩĩ, nthũnũnĩ yake, vaandĩkĩtwe ĩsyĩtwa, Mũsumbĩ wa asumbĩ na Mwĩaĩi wa eaĩi.

17 Na noona mũlaĩka aũngamĩte syũanĩ, na aneena na wasya mũnene atavya nyũnyi ila iũlũkaa ĩtunĩ katĩ: “Ũkai vaa, ũmbanai vamwe lĩunĩ mũnene wa wĩoo wa Ngai, 18 nĩ kana mũye nyama sya asumbĩ na nyama sya anene ma ita na nyama sya aũme me vinya na nyama sya mbalasi na sya ala mekalĩte ĩũlũ wasyo, na nyama sya onthe, nyama sya ala athasye na ngombo na sya ala anini na anene.”

19 Na noona ĩla nyamũ ya kĩthekanĩ na asumbĩ ma nthĩ na ita syoo mombanĩte vamwe nĩ kana mokite na ũla wĩkalĩte ĩũlũ wa ĩla mbalasi na ita syake. 20 Na ĩla nyamũ ya kĩthekanĩ yakwatwa vamwe na ũla mwathani wa ũvũngũ, ũla weekie syama mbee wayo na aasya andũ ala mekĩĩtwe ũvano wa ĩla nyamũ ya kĩthekanĩ na ala mathaithaa mũvwʼanano wayo. Na me o thayũ mekwʼa ĩianĩ ya mwaki yĩla yakanaa na mũvĩlĩtĩ. 21 Ĩndĩ ala angĩ mooawa na ũla ũvyũ mũasa ũla waumĩlĩte kanywʼanĩ wa ũla wekalĩte ĩũlũ wa ĩla mbalasi. Na nyũnyi syonthe syaya nyama syoo syavũna.

20 Na noona mũlaĩka atheeete kuma ĩtunĩ e na ũvungũo wa yĩla ĩima yĩte kĩtulu, * na aĩ na nyololo nene kwʼokonĩ kwake. 2 Na akwata ũla mũkũnga, ĩla nzoka ngũũ, ũla nĩwe Ndevili na Satani, na amwova myaka 1,000. 3 Na amwĩkya yĩla ĩimanĩ yĩte kĩtulu * na ayĩvinga na ayĩsiĩla, nĩ kana ndakakenge mbaĩ ĩngĩ nginya ĩla myaka 1,000 ĩthele. Na ĩtina wa ũu, no nginya athawʼe kwa ĩvinda ĩkuvĩ.

4 Na noona ivĩla sya ũsumbĩ, na ala masyĩkalĩle manengwa ũkũmũ wa kũsila. Ĩĩ, noona mathayũ * ma ala mooaiwe nũndũ wa kumya ũkũsĩ ĩũlũ wa Yesũ na kũneena ĩũlũ wa Ngai, na ala mataathaitha ĩla nyamũ ya kĩthekanĩ na mũvwʼanano wayo, na ala mataaĩkĩwa ũla ũvano itulyanĩ syoo na mokonĩ moo. Na meethĩwa thayũ na masumbĩka me asumbĩ vamwe na Klĩsto myaka 1,000. 5 (Akwʼũ ala angĩ mayaaĩthĩwa thayũ nginya yĩla myaka 1,000 yathelile.) Ũsu nĩwʼo ũthayũũkyo wa mbee. 6 Nĩ mũtanu na nĩ mũtheu mũndũ o na wĩva ũla wĩ na kĩanda ũthayũũkyonĩ wa mbee; nũndũ kĩkwʼũ kya kelĩ kĩi na ũkũmũ ĩũlũ wa asu, ĩndĩ makeethĩwa athembi ma Ngai na ma Klĩsto, na makasumbĩka me asumbĩ vamwe nake myaka 1,000.

7 Na ĩla myaka 1,000 yathela oou, Satani akathawʼa kuma kyovonĩ, 8 na akathi kũkenga mbaĩ ila syĩ ngalĩko inya sya nthĩ, Ngoki na Makoki, nĩ kana amombanyʼe vamwe kwondũ wa kaũ. Na ũtalo woo ũkeethĩwa ta kĩthangathĩ kya ũkanga. 9 Na mathi ĩũlũ wa nthĩ yonthe na mathyũlũlũka maeema ma ala atheu na ĩla ndũa yendetwe. Ĩndĩ mwaki wauma ĩtunĩ na wamamina vyũ. 10 Na Ndevili ũla wamakengaa ekwʼa ĩianĩ ya mwaki na mũvĩlĩtĩ, vala ĩla nyamũ ya kĩthekanĩ na ũla mwathani wa ũvũngũ maĩ; na makathĩnĩwʼa * vau mũthenya na ũtukũ tene na tene.

11 Na noona kĩvĩla kyeũ kya ũsumbĩ na Ũla wakĩkalĩle. Na nthĩ na ĩtu syakĩa syauma mbee wake, na vaiĩ vandũ vaaoneka kwondũ wasyo. 12 Na noona akwʼũ, anene na anini, maũngamĩte mbee wa kĩvĩla kĩu kya ũsumbĩ, na mavuku ma kũkũnzwa mavingũwa. Ĩndĩ ĩvuku yĩngĩ ya kũkũnzwa yavingũwa; yĩu nĩ ĩvuku ya thayũ. Na akwʼũ masilĩlwa kwĩanana na maũndũ ala maandĩkĩtwe mavukunĩ asu ma kũkũnzwa kwosana na meko moo. 13 Na ũkanga waumya akwʼũ ala maĩ nthĩnĩ wawʼo, na kĩkwʼũ na Mbũa * syaumya akwʼũ ala maĩ nthĩnĩ wasyo, na masilĩlwa kĩla mũndũ kwosana na meko make. 14 Na kĩkwʼũ na Mbũa * syekwʼa yĩla ĩianĩ ya mwaki. Kĩu nĩkyo kĩkwʼũ kya kelĩ, yĩla ĩia ya mwaki. 15 O na ĩngĩ ũla ũtaaĩthĩwa aandĩkĩtwe yĩla ĩvukunĩ ya thayũ ekwʼa ĩianĩ ya mwaki.

21 Na noona ĩtu yeũ na nthĩ nzaũ; nũndũ ĩtu ya mbee nĩ ĩvĩtu na nthĩ ya mbee nĩ mbĩtu, na ũkanga ndwĩ vo ĩngĩ. 2 O na ĩngĩ, noona ndũa ntheu, Yelusaleme Nzaũ, ĩtheeete kuma ĩtunĩ kwa Ngai, yũmbanĩtwʼe ta mũtwawa wanakavĩwʼe mũũme. 3 Na neewʼa wasya mũnene kuma kĩvĩlanĩ kya ũsumbĩ ũyasya: “Sisya! Ĩeema ya Ngai yĩ vamwe na andũ, na akekalaa vamwe namo, na makeethĩwa andũ make. Na Ngai mwene akeethĩwa vamwe namo. 4 Na akavangũla methoi onthe methonĩ moo, na kĩkwʼũ kĩikethĩwa vo ĩngĩ, o na kũikethĩwa ĩngĩ kĩmeto kana kĩĩo kana woo. Maũndũ ma mbee nĩ mavĩtu.”

5 Na Ũla wĩkalĩte kĩvĩlanĩ kya ũsumbĩ asya: “Sisya! Nĩngũtwʼĩkĩthya maũndũ onthe meũ.” O na ĩngĩ asya: “Andĩka, nũndũ ndeto ii nĩ sya kũĩkĩĩka na nĩ sya wʼo.” 6 Na ambĩa: “Nĩsyeanĩa! Ninyie Aliva na Omeka, * mwambĩlĩlyo na mũminũkĩlyo. Mũndũ o na wĩva ũla wĩ na waũni ngamũnenga kĩwʼũ mana * kĩla kyumĩte nthongonĩ * ya kĩwʼũ kya thayũ. 7 Ũla wĩsinda akatiĩwa syĩndũ isu, na ngeethĩwa Ngai wake nake akeethĩwa mwana wakwa. 8 Ĩndĩ ala me wia, na ala mate mũĩkĩĩo, na ala mekaa maũndũ mavuku ma kũthatya, na oaani, na ilaalai, * na ala mekaa maũndũ makonetye kũneenanyʼa na maveva, na athaithi ma mĩvwʼanano, na ala makenganaa, makekwʼa ĩianĩ yĩla yakanaa mwaki na mũvĩlĩtĩ. Kĩu nĩkyo kĩkwʼũ kya kelĩ.”

9 Na ũmwe wa ala alaĩka mũonza ala maĩ na mbakũli mũonza ila syaĩ na mothĩnyʼo mũonza ooka, na ambĩa: “Ũka na nĩngũkwonyʼa mũtwawa, mũka wa kala Kalondu.” 10 Na angua kwĩsĩla vinya wa veva andwaa kĩĩmanĩ kĩnene kĩtũlu, na ambonyʼa ĩla ndũa ntheu Yelusaleme ĩtheeete kuma ĩtunĩ kwa Ngai 11 na yaĩ na ũtheu mũtisu wa Ngai. Ũtisu wayo wailye ta ĩvia yĩla ya thooa mũnene vyũ, ta ĩvia ya yasivi ĩtheu vyũ. 12 Yaĩ na ũkũta mũnene mũtũlu na yaĩ na mĩvĩa 12 ĩla yaĩ na alaĩka 12, na mĩvĩanĩ ĩsu vaandĩkĩtwe masyĩtwa ma ila mbaĩ 12 sya ana ma Isilaeli. 13 Ngalĩko ya wumĩlonĩ wa syũa vaĩ mĩvĩa ĩtatũ, na ngalĩko ya ĩũlũ vaĩ mĩvĩa ĩtatũ, na ngalĩko ya ĩtheo vaĩ mĩvĩa ĩtatũ, na ngalĩko ya ũthũĩlonĩ wa syũa vaĩ mĩvĩa ĩtatũ. 14 Na ũkũta wa ndũa ĩsu waĩ na mavia ma mũsingi 12, na ĩũlũ wamo vaandĩkĩtwe masyĩtwa 12 ma ala atũmwa 12 ma kala Kalondu.

15 Na ũla waneenaa nakwa aĩ na mũangi wa kũthima wa thaavu nĩ kana athime ndũa ĩsu na mĩvĩa yayo vamwe na ũkũta wayo. 16 Na ndũa ĩsu yeanene ngalĩko syonthe, ũasa wayo weanene na ũthanthau wayo. Na athima ndũa ĩsu na mũangi, na kĩthimo kyayo kyaĩ maili 1,500; * ũasa wayo, na ũthanthau wayo, na ũtũlu wayo nĩsyeanene. 17 O na nĩwathimie ũkũta wayo, na waĩ mĩkono 144 * kwosana na kĩthimo kya mũndũ, na kĩthimo kya mũlaĩka. 18 Na ũkũta wayo waakĩtwe na yasivi, na ndũa ĩsu yaĩ ya thaavu mũtheu na yaĩ ntheu ta kĩoo. 19 Na mĩsingi ya ndũa ĩsu yaanakavĩtwʼe na kĩla ĩvia ya thooa mũnene: mũsingi wa mbee waĩ wa yasivi, wa kelĩ savili, wa katatũ kasitoni, wa kana sumalatai, 20 wa katano salitonyi, wa thanthatũ salitũ, wa mũonza savaliyati, wa nyanya mbelili, wa kenda tovasi, wa ĩkũmi kilisovilise, wa ĩkũmi na ĩmwe ayasinthi, wa ĩkũmi na ilĩ amethusito. 21 O na mĩvĩa yayo 12 yaseũvĩtwʼe na lũlũ 12; na kĩla mũvĩa waakĩtwe na lũlũ wawʼo. Na nzĩa nene ya ndũa ĩsu yaĩ thaavu mũtheu ũilye ta kĩoo kĩtheu.

22 Na ndyaaona ĩkalũ nthĩnĩ wayo nũndũ Yeova Mwene Vinya Wʼonthe nĩwe ĩkalũ ya ndũa ĩsu, vamwe na kala Kalondu. 23 Na ndũa ĩsu ndyaĩ na vata wa kyeni kya syũa kana mwei, nũndũ ũtheu mũtisu wa Ngai nĩwʼo wamĩmulĩkaa, na taa wayo waĩ kala Kalondu. 24 Na mbaĩ ikaendaa imulĩkĩlwe nĩ kyeni kyayo, na asumbĩ ma nthĩ makaete ũtheu woo mũtisu ndũanĩ ĩsu. 25 Na mĩvĩa yayo ndĩkavingwa mũthenya nongi, nũndũ kũikethĩwa ũtukũ. 26 Na makaete ũtheu mũtisu na ndaĩa ya mbaĩ nthĩnĩ wayo. 27 Ĩndĩ kĩndũ o na kĩva kĩvuku, na mũndũ o na wĩva ũla wĩkaa maũndũ ma kũthatya, na ũkenganaa, ndakalika nthĩnĩ wayo; ĩndĩ ala makalika no ala maandĩkĩtwe yĩla ĩvukunĩ ya kũkũnzwa ya thayũ ya kala Kalondu.

22 Na ambonyʼa ũsĩ wa kĩwʼũ kya thayũ, mũtheu ta kĩoo, wumĩte kĩla kĩvĩlanĩ kya ũsumbĩ kya Ngai na kya kala Kalondu 2 ũkesĩla katĩ wa ĩla nzĩa nene. Na ndee syelĩ sya ũsĩ ũsu syaĩ na mĩtĩ ya thayũ ĩla yasyaaa matunda mavinda 12, na yasyaaa kĩla mwei. Na matũ mayo maĩ ma kũvosya mbaĩ.

3 Na vaikethĩwa kĩumo nongi. Ĩndĩ kĩvĩla kya ũsumbĩ kya Ngai na kya kala Kalondu kĩkeethĩwa ndũanĩ ĩsu, na ngombo syake ikamũthũkũma ũthũkũmi mũtheu; 4 na makoona ũthyũ wake na ĩsyĩtwa yake yĩkeethĩwa itulyanĩ syoo. 5 Na ũtukũ ndũkethĩwa vo nongi, o na vaikethĩwa vata wa taa kana kyeni kya syũa, nũndũ Yeova Ngai nĩwe ũkamamulĩkĩla, na makasumbĩka me asumbĩ tene na tene.

6 Na ambĩa: “Ndeto ii nĩ sya kũĩkĩĩka na nĩ sya wʼo; ĩĩ, Yeova, Ngai ũla waveveeie athani, nĩwatũma mũlaĩka wake nĩ kana onyʼe ngombo syake maũndũ ala matatĩa kwĩkĩka o mĩtũkĩ. 7 Sisya! Nĩnũkĩte mĩtũkĩ. Nĩ mũtanu mũndũ ũla ũkwataa ndeto sya wathani wa ĩvuku yĩĩ ya kũkũnzwa.”

8 Nyie Yoana, ninyie neewie na noona maũndũ asu. Yĩla namonie na namewʼa, nĩnavalũkile maaũnĩ ma mũlaĩka ũsu wambonasya maũndũ asu nĩ kana nĩmũthaithe. 9 Ĩndĩ ambĩa: “Ĩsũvĩe! Ndũkeke ũu! Nyie nĩ ngombo o taku na ana-a-asa maku athani na ala makwataa ndeto sya ĩvuku yĩĩ ya kũkũnzwa. Mũthaithe Ngai.”

10 Na ambĩa: “Ndũkekĩe ũsiĩlo ndeto sya wathani wa ĩvuku yĩĩ ya kũkũnzwa, nũndũ ĩvinda yĩla yĩnyuvĩtwe yĩ vakuvĩ. 11 Eka ũla ũte mũlũngalu aendeee kwĩthĩwa ate mũlũngalu, na ũla mũvuku aendeee kwĩthĩwa e mũvuku; ĩndĩ eka ũla mũlũngalu aendeee kwĩthĩwa e mũlũngalu, na ũla mũtheu aendeee kwĩthĩwa e mũtheu.

12 “‘Sisya! Nĩnũkĩte mĩtũkĩ, na ĩtuvi yĩla nĩnenganae nĩ nayo, na ngaĩva kĩla ũmwe kwosana na wĩa wake. 13 Ninyie Aliva na Omeka, * wa mbee na wa mũthya, mwambĩlĩlyo na mũminũkĩlyo. 14 Nĩ atanu ala mathambĩtye kanzũ syoo, nĩ kana methĩwe na ũkũmũ wa kũthi ĩla mĩtĩnĩ ya thayũ, na nĩ kana makwate mwanya wa kũlika ĩla ndũanĩ mesĩle mĩvĩanĩ yayo. 15 Nza ve ngitĩ, * na ala mekaa maũndũ makonetye kũneenanyʼa na maveva, na ilaalai, * na oaani, na athaithi ma mĩvwʼanano, na kĩla mũndũ wendete ũvũngũ na ũkenganaa.’

16 “‘Nyie Yesũ, natũma mũlaĩka wakwa nĩ kana aumye ũkũsĩ kũla ũĩ ĩũlũ wa maũndũ aa ma kũtetheesya ikundi. Ninyie mwĩi na ũsyao wa Ndaviti na ndata ya kwakya ĩtisĩte.’”

17 Na veva na mũtwawa maendeeaa kwasya, “Ũka!” na ũla wĩwʼaa asye, “Ũka!” na mũndũ o na wĩva ũla wĩ na waũni nĩ oke; na eka mũndũ o na wĩva ũla ũkwenda ose kĩwʼũ kya thayũ mana.

18 “Nĩumya ũkũsĩ kwa mũndũ o na wĩva ũla wĩwʼaa ndeto sya wathani wa ĩvuku yĩĩ ya kũkũnzwa: Ethĩwa mũndũ o na wĩva akongela ũndũ maũndũnĩ asu, Ngai akamwongeleela mothĩnyʼo ala maandĩkĩtwe ĩvukunĩ yĩĩ ya kũkũnzwa; 19 na ethĩwa mũndũ o na wĩva akaola kĩndũ o na kĩva ndetonĩ sya wathani ũũ wa ĩvuku yĩĩ ya kũkũnzwa, Ngai akaveta kĩanda kyake kuma maũndũnĩ ala maandĩkĩtwe ĩvukunĩ yĩĩ ya kũkũnzwa, na ndakamwĩtĩkĩlya kũya matunda ma ĩla mĩtĩ ya thayũ na ndakamwĩtĩkĩlya kũlika ĩla ndũanĩ ntheu.

20 “Ũla umasya ũkũsĩ wa maũndũ aa easya, ‘Ĩĩ, nĩnũkĩte mĩtũkĩ.’”

“Ameni! Ũka, Mwĩaĩi Yesũ.”

21 Ũseo mwingĩ wa Mwĩaĩi Yesũ nĩwĩthĩwe na atheu onthe.