Ĩsomo ya 5
Kĩeleelo kya Ngai Nĩ Kyaũ kwa Nthĩ?
Nĩkĩ Yeova woombie nthĩ? (1, 2)
Nĩkĩ nthĩ ti valatiso yuyu? (3) Kũkeethĩwa ata kwa andũ athũku? (4) Ĩvinda yĩla yũkĩte, Yesũ akeeka ata kwa awau? andũ ala akũangũ? akwʼũ? (5, 6)
Nĩ kenda wose kĩanda moathimonĩ asu ma ĩvinda yũkĩte, wĩ na vata wa kwĩka ata? (7)
1. Yeova oombie nthĩ ĩno nĩ kana andũ matonye kũtanĩa kwĩkala ĩũlũ wayo tene na tene. Endaa nthĩ ĩtũawe ĩvinda yonthe nĩ andũ alũngalu me na ũtanu. (Savuli 115:16; Isaia 45:18) Nthĩ ndĩkanangwa nongi; ĩkekala tene na tene.—Savuli 104:5; Mũtavanʼya 1:4.
2. Ngai atanatwʼĩkĩthya mũndũ, We nĩwanyuvie kalungu kamwe ka nthĩ na akatwʼa valatiso mbanake. Aketie mũũnda wa Eteni. Vaa nĩvo waiie mũndũũme na mũndũ-mũka ma mbee, Atamu na Eva. Ngai aĩ na kĩeleelo kya kwĩthĩwa nĩmasyae syana na mayusũsya nthĩ nima. Kavola-kavola mesaa kũtuma nthĩ yonthe ĩtwʼĩka valatiso.—Mwambĩlĩlyo 1:28; 2:8, 15.
3. Atamu na Eva meekie naĩ kwa kũtũla mwĩao wa Ngai na ngenda. Kwoou Yeova nĩwamavetie mũũndanĩ wa Eteni. Valatiso yaawʼa. (Mwambĩlĩlyo 3:1-6, 23) Ĩndĩ Yeova ndolĩtwe nĩ kĩeleelo kyake kwa nthĩ ĩno. Nĩwathanĩte kũmĩtwʼa valatiso, vala andũ makatũa tene na tene. Akeeka ũu ata?—Savuli 37:29.
4. Nthĩ ĩno ĩtatonyete kũtwʼĩka valatiso, no nginya andũ athũku mavetwe. (Savuli 37:38) Ũu ũkeekĩka Alimaketoni, ũla nĩwʼo kaũ wa Ngai wa kũmina ũthũku. Ĩtina wa vau, Satani akalikwʼa kyovonĩ kwa myaka 1,000. Ũu nĩkwonanʼya kana kũiĩ andũ athũku metiwa manange nthĩ. Andũ ma Ngai me oka nomo mevonoka.—Ũvuanʼyo 16:14, 16; 20:1-3.
5. Nĩwʼo ĩndĩ Yesũ Klĩsto wĩsumbĩka nthĩ ĩno e Mũsumbĩ kwa myaka 1,000. (Ũvuanʼyo 20:6) Kavola-kavola akaveta naĩ yume nthĩnĩ wa ilĩko na mĩĩ yitũ. Tũkatwʼĩka andũ eanĩu o tondũ Atamu na Eva mailyĩ mbee wa kwĩka naĩ. Ĩvinda yĩu kũikethĩwa ĩngĩ ũwau, ũkũũ, na kĩkwʼũ. Awau makavowʼa, na andũ akũũ makatwʼĩka ma mũika ĩngĩ.—Yovu 33:25; Isaia 33:24; Ũvuanʼyo 21:3, 4.
6. Ĩvinda ya Ũsumbĩki wa Yesũ wa Myaka Ngili, andũ aĩkĩĩku makathũkũma matwʼe nthĩ nima valatiso. (Luka 23:43, NW) Ĩngĩ, milioni sya ala akwʼũ ikathayũũkwʼa syĩ na thayũ wa kĩmũndũ ĩũlũ wa nthĩ. (Meko 24:15) Meeka ũndũ Ngai wendaa meke, makaendeea kwĩkala thayũ tene na tene ĩũlũ wa nthĩ. Malea kwĩka ũu, makaanangwa tene na tene.—Yoana 5:28, 29; Ũvuanʼyo 20:11-15.
7. Kwa nzĩa ĩsu kĩeleelo kya Ngai kya mbee kwa nthĩ kĩkaaĩla. Atĩĩ, we nowende kwĩthĩwa na kĩanda nthĩnĩ wa moathimo aa ma ĩvinda yũkĩte? Ethĩwa nũu, wĩ na vata wa kũendeea kwĩmanyĩsya ĩũlũ wa Yeova na kwĩwʼa mawendi make. Kũthi mawũmbanonĩ kũla kwĩ Nyũmba ya Ũsumbĩ ya Ngũsĩ sya Yeova ũtũinĩ waku kũkaũtetheesya wĩke ũu.—Isaia 11:9; Aevelania 10:24, 25.
[Visa Ithanguni ya 10]
Valatiso yaawʼa
[Visa Ithanguni ya 11]
Ĩtina wa Alimaketoni, nthĩ ĩkatuwa valatiso