Valũa Kuma kwa Nzama Ĩla Ĩtongoesye

Kwaku We Mũsomi Ũmwendete Yeova:

Yesũ aisye, “Mũkamanya ũla wʼo, na ũla wʼo ũkamũthasya.” (Yoana 8:32) Isu nĩ ndeto sya kwĩkĩa vinya mũno. Nĩ ũndũ ũtonyeka kũmanya ũla wʼo, o na ‘mĩthenyanĩ ĩno ya mũminũkĩlyo’ yĩ na mĩisyo na yusũĩtwe nĩ ũkengani. (2 Timotheo 3:1) We no ũlilikane ĩvinda ya mbee vyũ ĩla wambĩĩe kũelewa ũwʼo wa Ndeto ya Ngai? Vate nzika, nĩweewie mũyo mwingĩ mũno!

Ĩndĩ, o tondũ ne ũndũ wa vata kwĩmanyĩsya ũla wʼo na kũtavya angĩ ĩũlũ wa maũndũ ala wĩmanyĩĩtye, nowʼo ne ũndũ wa vata kwĩkala kwosana namo. Nĩ kana twĩke ũu, nĩtwaĩle kwĩyĩkalya ene wendonĩ wa Ngai. Ũu nĩ kwasya ata? Ndeto ila Yesũ waneenie ũtukũ wa kũamũkĩa kĩkwʼũ kyake nisũngĩĩte ĩkũlyo yĩu. Eeie atũmwa make aĩkĩĩku atĩĩ: “Ethĩwa nĩmũkwataa mĩao yakwa, mũkekalaa wendonĩ wakwa; o ũndũ nyie [nĩkwataa] mĩao ya Asa wakwa, na nĩkalaa wendonĩ wake.”—Yoana 15:10.

Nĩwoona kana Yesũ ekalile wendonĩ wa Ĩthe wake kwa kũkwata mĩao yake? O naitũ twaĩle kwĩka oou. Nĩ kana twĩkale wendonĩ wa Ngai, nĩtwaĩle kũatĩĩa ũla wʼo thayũnĩ witũ. Ũtukũ o ũsu, Yesũ aisye atĩĩ: “Ethĩwa nĩmwĩsĩ maũndũ aa, mwĩ aathime ethĩwa nĩmũũmeka.”—Yoana 13:17.

Twĩĩkwatya kana ĩvuku yĩĩ nĩyĩũkũtetheesya ũendeee kũatĩĩa ũla wʼo thayũnĩ waku, na nũndũ wa ũu ũyĩyĩkalya mwene “wendonĩ wa Ngai . . . kũvika thayũ ũtathela.”—Yuta 21.