Nĩmakĩĩe Nthĩ Ĩngĩ Nũndũ wa Mũsumbĩ Mũthũku

Mũthenya ũmwe Yosevu nĩwaamũkisye Meli amũtavye ũndũ wa vata. Mũlaĩka wa Yeova aĩ anamũkĩa ũtukũ ndotonĩ na akamwĩa atĩĩ: “Ũkĩla wose kana na inyia wako na mũikĩa mũthi Misili, na mũyĩkala kwʼo nginya yĩla ngaũtavya, nũndũ Elote nũkilyĩ kũmantha kana kau akoae.”—Mathayo 2:13.

Kwoou, Yosevu, Meli, vamwe na kana koo mate kwananga ĩvinda nĩmaendie mevithĩte kwĩ ũtukũ. Meekie ũu ĩvinda yĩla yaĩlĩte nũndũ Elote nĩwamanyie kana ala andũ oĩ nĩmamũkengie. Atavĩtye andũ asu oĩ kana mamwona Yesũ masyoke makamũtavye, na vandũ va ũu masyoka kwoo mesĩle nzĩa ĩngĩ. Elote nĩweewie woo mũno. Na nũndũ ndaĩ aaeka mũvango wake wa kũmũaa Yesũ, nĩwaumisye mwĩao twana twʼonthe twa tũvĩsĩ tũla tũtavĩtũkĩtye myaka ĩlĩ, na tũsyaĩwe Mbetheleemu na isionĩ ila syĩ vakuvĩ nayo tũawe. Aumisye mwĩao ũsu ĩtina wa kũvindĩĩsya maũndũ ala watavĩtwʼe nĩ ala andũ oĩ na ĩvinda yĩla mamũtavĩtye maũndũ asu.

Kũawa kwa twana twʼonthe twa tũvĩsĩ waĩ ũndũ mũthũku na wa kũtelemya mũno! O na kau tũitonya kũmanya nĩ twana twĩana twooaiwe, kĩĩo na kĩmeto kingĩ kĩla kyaĩ na aa-inyia ma syana isu nĩkyeanĩisye wathani wa Mbivilia ũla wawetiwe nĩ mwathani wa Ngai weetawa Yelemia.—Yelemia 31:15.

Ĩvindanĩ yĩu twana twooawa, Yosevu na andũ make maĩ makĩĩe Misili, na nĩmaendeeie kwĩkala kũu. Me kũu Misili, ũtukũ ũmwe mũlaĩka wa Yeova nĩwamũkĩie Yosevu ĩngĩ ndotonĩ. Mũlaĩka ũsu amwĩie atĩĩ: “Ũkĩla wose kana na inyia wako na mũithi nthĩ ya Isilaeli, nũndũ ala manamanthaa kũaa kana kau nĩ akwʼũ.” (Mathayo 2:20) Kwoou, Yosevu nĩwamanyie kana yu no masyoke mũsyĩ kwoo. Kwa nzĩa ĩsu ve wathani ũngĩ wa Mbivilia weanĩie. Wathani ũsu waĩtye kana Mwana wa Ngai akeetwa kuma Misili.—Osea 11:1.

Yosevu endaa andũ make mekale Yutia, na no ĩthĩwa endaa mekale kĩsionĩ kĩmwe kya Yutia kyaĩ vakuvĩ na ndũa ya Mbetheleemu, vala mekalaa mataendete Misili. Ĩndĩ nĩwamanyie kana mwana wa Elote, ũla weetawa Alikelau, nĩwe waĩ mũsumbĩ wa Yutia. O na ĩngĩ, kwa nzĩa ya ndoto Ngai nĩwamũtavisye Yosevu ĩũlũ wa mũisyo ũla wesaa kũmakwata mekala Yutia. Kwoou, Yosevu na andũ make nĩmaendie ngalĩko ya ĩũlũ na mekala ndũanĩ ya Nasaleti ĩla yaĩ Kalilii, vaasa na Yelusaleme. Yesũ eanĩie ndũanĩ ĩsu ya Nasaleti, na ũu weanĩsya wathani ũngĩ ũla waĩtye: “Akeetwa Mũnasaleti.”—Mathayo 2:23.