Valũa Kuma kwa Nzama Ĩla Ĩtongoesye

Mũklĩsto mwendwa:

O ũndũ wĩsĩ, Mbivilia nĩ ĩvuku yĩeleetye mũno ĩũlũ wa andũ. Aingĩ moo maĩ aũme na aka aĩkĩĩku maĩ na mathĩna o ta ala matũkwataa. Maĩ na “mwĩkalĩle ũmwe naitũ.” (Yakovo 5:17) Amwe moo nĩmavinyĩĩiwe mũno nĩ mathĩna na mawĩmakĩo. Namo angĩ nĩmaũmĩiwʼe ngoo mũno nĩ andũ ma mũsyĩ kana ala mathaithaa namo. Na ve amwe maandũawa nĩ wasya woo wa ngoo nũndũ wa mavĩtyo moo.

Yo andũ asu nĩmamũtiĩte Yeova vyũ? Aiee. Aingĩ moo mailyĩ ta mũandĩki wa Savuli ũla wavoyie atĩĩ: “Nĩnaĩte ta ĩlondu yau; mantha mũthũkũmi waku; nũndũ ndyũlawa nĩ mĩao yaku.” (Savuli 119:176) We no wasye ta mũandĩki ũsu wa Savuli?

Yeova ndolawa nĩ malondu make ala melelũkaa kuma ĩĩthyanĩ yake. Ĩndĩ nũmamanthaa na mavinda maingĩ ekaa ũu atũmĩĩte athaithi ala angĩ. Kwa ngelekanyʼo, kwasũanĩa ũndũ Yeova watetheeisye mũthũkũmi wake Yovu, ũla wakwatiwe nĩ mathĩna me kĩvathũkanyʼo. Yovu nĩwaaisye malĩ yake, akwʼĩĩwa nĩ andũ make, na akwatwa nĩ ũwau mũthũku mũno. O na ĩngĩ, Yovu nĩwoomĩĩisye ndeto sya kũtũla ngoo ila syaneeniwe nĩ andũ ala maaĩlĩte kũmwĩkĩa vinya. Ĩndĩ o na ũu wĩ o vo, ndaamũtia Yeova, o na kau ve ĩvinda waĩ na mosũanĩo mataĩlĩte. (Yovu 1:22; 2:10) Yeova amũtetheeisye Yovu ata ethĩwe na mawoni maseo?

Nzĩa ĩmwe ĩla Yeova watetheeisye Yovu nĩ kwĩsĩla mũthũkũmi wake weetawa Eliu. Ĩla Yovu waeleisye thĩna wake, Eliu nĩwamwĩthukĩĩisye na ĩndĩ eewʼa aĩle kũneena nake. Esaa kũmwĩa ata? Esaa kwambĩĩa kũmũtũla mũtĩ kana kũmwonyʼa mavĩtyo make kwa nzĩa ĩkũtuma ewʼa nthoni? We Eliu nĩwoonaa ta we mũseo kwĩ Yovu? Aiee. Eliu awetie ndeto ii atongoewʼe nĩ veva wa Ngai. Aisye atĩĩ: “Nĩilyĩ kwa Ngai o ũndũ ũilyĩ: O nakwa nĩnoombiwe na yũmba.” Na ĩndĩ amũũmĩĩsya Yovu kwa kũmwĩa atĩĩ: “Ũtĩsyo wakwa ndũkakũtelemya, o na kũvivinya kwakwa kũikethĩwa kũito ĩũlũ waku.” (Yovu 33:6, 7) Kwa wʼo, Yovu nĩwendaa ũtao, ĩndĩ vandũ va Eliu kũmwongeleela Yovu mũio mũito, amũnengie ũtao ũsu kwa nzĩa nzeo na amwĩkĩa vinya.

Twĩenda ũmanye kana mbulosua ĩno tũnamĩandĩkie twĩ na woni ta ũsu waĩ na Eliu. Mbee, tũnambie kwĩthukĩĩsya, na twasũanĩa kwa ũliku maũndũ ala makwatĩte ana-a-asa na eĩtu-a-asa amwe melelũkĩte, na tweethukĩĩsya mawoni moo. (Nthimo 18:13) Na ĩndĩ twavoya na twasoma Maandĩko ala monanĩtye ũndũ Yeova watetheeisye athũkũmi make ĩvinda ya tene ala makwatiwe nĩ maũndũ asu. Ĩtina wa ũu, twaandĩka mbulosuanĩ ĩno maũndũ ala mawetetwe Maandĩkonĩ asu vamwe na maũndũ ala makwatĩte ana-a-asa na eĩtu-a-asa. Twĩũkũlya kwa ndaĩa ũsome mbulosua ĩno. Ĩthĩwa wĩsĩ kana nĩtũkwendete mũno.

Nzama Ĩla Ĩtongoesye ya Ngũsĩ sya Yeova