Vaulo Nĩwaendie Lomi

Mũtũmwa Vaulo aminĩie Savalĩ yake ya katatũ ya kũtavanyʼa ndũanĩ ya Yelusaleme. E vau nĩwakwatiwe na ekwʼa yela. Ĩndĩ kwĩ ũtukũ, Yesũ nĩwaneenie nake woninĩ na amwĩa atĩĩ: ‘Nũũthi Lomi ũkatavanyʼe kwʼo.’ Ĩtina wa ĩvinda, Vaulo nĩwaumiwʼe Yelusaleme na atwawa Kaisalea, na ekala myaka ĩlĩ e yela. Yĩla wavikiwʼe mbee wa Ngavana Vesito, Vaulo aisye-ĩ: ‘Ekai nĩthi Lomi ngasilĩlwe nĩ Kaisali.’ Nake Vesito amwĩa: “Wasya wĩenda ĩkoani yaku yĩkethukĩĩwʼe nĩ Kaisali; kwa Kaisali nĩkwʼo ũũthi.” Ĩtina wa ũu, Vaulo nĩweekĩiwe melinĩ yaendete Lomi, na aendanisye na ana-a-asa angĩ elĩ, ala nĩ Luka na Alisitaliko.

Me ũkanganĩ maendete nĩkweethĩiwe na kĩuutani kĩnene kĩla kyamathĩnisye mĩthenya mingĩ. Kĩla mũndũ oonaa nũkũkwʼa. Ĩndĩ Vaulo ameie atĩĩ: ‘Mũlaĩka nũneenie nakwa ndotonĩ na ambĩa: “Ndũkakĩe, Vaulo. Nũũvika Lomi, na kĩla mũndũ wĩ melinĩ ĩno akavika kwʼo e mũima.” Kwoou ekai kwĩmakĩa, mũyĩkwʼa.’

Kĩuutani kĩu kyaendeeie vandũ va mĩthenya 14. Ĩndĩ mũthya nĩmesie kwona nthĩ nyũmũ. Nthĩ ĩsu yaĩ kĩthama kya Melita. Meli ĩsu nĩyatinie nthĩ na ũu watuma ĩtilĩkanga ilungu, ĩndĩ andũ onthe 276 ala maĩ melinĩ ĩsu mavikie nthĩ nyũmũ me aima. Andũ amwe nĩmathambĩie nĩ kana mavike kĩthamanĩ kĩu, ĩndĩ angĩ meekie kũkwatĩlĩĩla ilungu sya meli ĩsu na ũu watuma mavika ũtee wa ũkanga. Andũ ala mekalaa kĩthamanĩ kya Melita nĩmatetheeisye andũ asu maumie melinĩ na mamavuvĩa mwaki mote.

Ĩtina wa myei ĩtatũ, asikalĩ nĩmeekĩie Vaulo melinĩ ĩngĩ na mamũtwaa Lomi. Yĩla wavikie kũu, ana-a-asa nĩmookie kũmũthaũa. Vaulo amona, nĩwamũtũngĩie Yeova mũvea na eethĩwa na ũkũmbaũ. O na kũtwʼĩka Vaulo aĩ mwove na no wasungawa nĩ mũsikalĩ, nĩweetĩkĩlĩtwʼe kwĩkala nyũmba yake ya kũkomboa. Ekalile vau vandũ va myaka ĩlĩ. Andũ nĩ mookaa kũmwona na nĩwamatavasya ũvoo mũseo ĩũlũ wa Ũsumbĩ wa Ngai na aimamanyĩsya ĩũlũ wa Yesũ. O na ĩngĩ Vaulo nĩwaandĩkĩie ikundi sya Asia Nini na Yutia valũa. Kwa wʼo Yeova nĩwamũtũmĩie Vaulo kũnyaĩĩkya ũvoo mũseo mbaĩnĩ mbingĩ.