“Nĩnĩmamanyĩthĩtye Ĩsyĩtwa Yaku”

“Nĩnĩmanyĩthĩtye ĩsyĩtwa yaku kwa andũ ala wanengie kuma kwa ala ma nthĩ. . . . Nĩnĩmamanyĩthĩtye ĩsyĩtwa yaku na ngaendeea kũtuma yĩmanyĩka.”—YOANA 17:6, 26.

Kĩla Kyonanawʼa Nĩ Ndeto sya Yesũ: Yesũ nĩwatumie ĩsyĩtwa ya Ngai yĩmanyĩka kwa kũyĩtũmĩa ũtavanyʼanĩ wake. Yĩla Yesũ wasomaa Maandĩko, o tondũ wekaa kaingĩ, nĩwatamũkaa ĩsyĩtwa ya Ngai mwene. (Luka 4:16-21) Amanyĩisye aatĩĩi make mavoyae atĩĩ: “Asa, ĩsyĩtwa yaku yĩtaĩwe.”—Luka 11:2.

Ũndũ Aklĩsto ma Mbee Meanĩisye Kĩu: Mũtũmwa Vetelo atavisye atumĩa ala maĩ Yelusaleme kana Ngai nĩwanyuvĩte kuma mbaĩnĩ ingĩ “andũ kwondũ wa ĩsyĩtwa yake.” (Meko ma Atũmwa 15:14) Atũmwa vamwe na ala angĩ nĩmatavanisye kana “kĩla mũndũ wĩkaĩlaa ĩsyĩtwa ya Yeova akatangĩĩwa.” (Meko ma Atũmwa 2:21; Alomi 10:13) O na nĩmatũmĩie ĩsyĩtwa ya Ngai mavukunĩ ala maandĩkie. Ĩvuku The Tosefta, yĩla yĩandĩkĩtwe mĩao ya Kĩyuti yathelile kũandĩkwa vakuvĩ mwaka wa 300 ĩtina wa Klĩsto. Ĩvuku yĩu yaĩtye kana mavuku ma Aklĩsto maĩ matonya kũvĩvwʼa mũthenya wa Savato, vamwe na ilungu ila syawetete ĩsyĩtwa ya Ngai.

Naaũ Maatĩĩaa Kĩu Ũmũnthĩ? Mbivilia ya Revised Standard Version ĩla yavĩtũkĩthiwʼe nĩ National Council of the Churches of Christ nthĩ ya Amelika yaĩtye ũũ ĩthangũnĩ ya mbee: “Kũtũmĩa ĩsyĩtwa ya Ngai, ũla nowe Ngai e weka, nĩ ta kwonanyʼa ve ngai ingĩ waĩlĩte kũvathũkanwʼa nasyo, na ĩsyĩtwa yĩu yaekie kũtũmĩwa ndĩninĩ ya Kĩyuti o na ĩvinda ya Ũklĩsto ĩtambĩĩe. Na kwoou ndĩni syonthe sya Kĩklĩsto ĩũlũ wa nthĩ yonthe iyaĩlĩte kũtũmĩa ĩsyĩtwa yĩu.” Na ĩndĩ ĩsyĩtwa ya Ngai yavutwa Mbivilianĩ ĩsu na vandũ vayo vaandĩkwa ĩsyĩtwa ya ũnene “MWĨAĨI.” Na o mĩtũkĩ ĩkanisa ya Vatican yatavisye athembi mayo atĩĩ: “Ĩsyĩtwa ya Ngai yĩla yĩandĩkawa na nthoo ii inya YHWHa ila syĩtawa tetragrammaton yĩikatate kwoneka mbathinĩ kana mboyanĩ, o na yĩikatamũkwe o na vanini.”

Naaũ ũmũnthĩ matũmĩaa ĩsyĩtwa ya Ngai na maitavya ala angĩ ĩũlũ wayo? Yĩla Sergey waĩ o wa mũika e Kyrgyzstan, nĩwasyaisye vitio yoonanĩtye kana ĩsyĩtwa ya Ngai nĩ Yeova. Ekalile vandũ va myaka 10 atewʼa ĩsyĩtwa yĩu ĩngĩ. Ĩtina Sergey nĩwathamĩĩie Amelika, na e kũu athokewa nĩ Ngũsĩ ilĩ sya Yeova ila syamwonisye ĩsyĩtwa ya Ngai Mbivilianĩ. Sergey atanie mũno kũmanya kana ve andũ matũmĩaa ĩsyĩtwa Yeova. Ũndũ wa kwendeesya nĩ kana ĩvuku Webster’s Third New International Dictionary ĩyĩelesya kĩla “Yeova Ngai” yonanasya yaĩtye: “Yĩĩ nĩ ĩsyĩtwa ya Ngai mũnene ũla wĩsĩkĩe na ũthaithawa e weka nĩ Ngũsĩ sya Yeova.”

[Maelesyo ma Kwongeleela]