“Mendaa nyie mwene nĩkunĩkĩlĩle nĩmanye kĩla yo Mbivilia ĩmanyĩasya”

ĨVINDA YAKWA ĨVĨTU:

Nasyaĩwe Santo Domingo, nthĩ ya Dominican Republic na twasyaĩtwe syana inya na ninyie naĩ ĩlumaita. Asyai makwa maĩ asomu mũno na mendaa matũeee vandũ ve andũ aseo na alũngalu. Myaka ĩna mbee wa ndanamba kũsyawa, asyai makwa nĩmakomanie na amisonalĩ ma ndĩni ya Mormon. Nũndũ asyai makwa nĩmendeeiwʼe nĩ ũndũ amisonalĩ asu meekĩĩte ngũa nesa, nĩmatwie kana mũsyĩ witũ waĩle kwĩthĩwa wĩ ũmwe katĩ wa mĩsyĩ ya mbee kĩthamanĩ kĩu kũlika Ĩkanisanĩ ya Mormon.

O nĩendeee na kwĩana, nĩnatanĩaa maũndũ ala tweekaa ĩkanisanĩ, na nĩnanengete ndaĩa momanyĩsyo ma Ĩkanisa ya Mormon ĩũlũ wa mwĩkalo wa mũsyĩ na myolooto ya mwĩkalĩle. Nĩnatanĩaa kwĩthĩwa nĩ wa ndĩni ya Mormon na neethĩwa na mũvango wa kũtwʼĩka misonalĩ.

Ĩla naĩ na myaka 18, mũsyĩ witũ nĩwathamĩĩe nthĩ ya Amelika nĩ kana nĩthi yunivasiti ĩla nzeo kũu. Mwaka ũmwe ĩtina wa twathamĩĩa kũu Florida, mwĩĩtu-a-inyia wa mwaitũ na mũũme nĩmookie kũtwona. Nĩmatũthokisye tũendanyʼe namo ũmbanonĩ mũnene wa Mbivilia. Nĩnendeeiwʼe nĩ kwona onthe ala maĩ vakuvĩ nakwa maisoma maandĩko na maiandĩka maũndũ ala manene. Kwoou nĩnavoyie kalamu na ĩthangũ, o nakwa nambĩĩa kũandĩka.

Ĩtina wa ũmbano ũsu mũnene, mwĩĩtu-a-inyia wa mwaitũ na mũũme nĩmaisye kana nũndũ nĩnendaa kũtwʼĩka misonalĩ, nĩmeũndetheesya kũmanya maũndũ mana ĩũlũ wa Mbivilia. Noonie ũsu wĩ woni mũseo nũndũ ĩvindanĩ yĩu, neesĩ mũno Ĩvuku ya Ndĩni ya Mormon kwĩ Mbivilia.

ŨNDŨ MBIVILIA YAALYŨLILE MWĨKALĨLE WAKWA:

Kĩla ĩvinda tũineena maũndũ ma Mbivilia kwĩsĩla simũ, mwĩĩtu-a-inyia wa mwaitũ na mũũme mambĩaa nĩĩkĩĩthye kana mũĩkĩĩo wakwa nĩwosanĩte na Mbivilia. Mendaa nyie mwene nĩkunĩkĩlĩle nĩmanye kĩla yo Mbivilia ĩmanyĩasya.

Ve maũndũ maingĩ ma ndĩni ya Mormon naĩkĩĩte, ĩndĩ ndyeesĩ nesa kana kwa wʼo maumĩte Maandĩkonĩ. Mwĩĩtu-a-inyia wa mwaitũ nĩwandũmĩie ĩkaseti ya Amkeni! ya 08/11/1995, yĩla yĩkyavĩthĩtwʼe nĩ Ngũsĩ sya Yeova, na yaeleetye maũndũ mana ĩũlũ wa mũĩkĩĩo wa ndĩni ya Mormon. Nĩnasengʼie kũmanya kana ndyeesĩ nesa momanyĩsyo maingĩ ma ndĩni ya Mormon. Ũu watumie nĩsisya Kĩsesenĩ kya Indaneti kya ndĩni ya Mormon nĩmanye maũndũ ala mawetetwe ĩkasetinĩ ya Amkeni! maĩ ma wʼo kana maĩ ma ũvũngũ. Neethĩie maĩ ma wʼo na naĩkĩĩthya vyũ ĩla naendie nyũmbanĩ ĩla yĩ na syĩndũ ikonetye ndĩni ya Mormon ĩla yĩ mũsyĩ wa Utah.

Naĩkĩĩaa kana momanyĩsyo ma Ĩvuku ya Mormon na ma Mbivilia nĩmetĩkĩlĩnaa. Ĩndĩ ĩla nambĩĩie kũsoma Mbivilia na kĩthito, nĩwʼo namanyie kana momanyĩsyo ma ndĩni ya Mormon nĩmaleanĩte na ma Mbivilia. Kwa ngelekanyʼo, ĩvukunĩ ya Esekieli 18:4, New World Translation, Mbivilia yaĩtye thayũ nũkusaa. Ĩndĩ nthĩnĩ wa Alma 42:9, Ĩvuku ya Mormon yaĩtye: “Thayũ ndũtonya kũkwʼa.”

O vamwe na kũmanya kana momanyĩsyo ma ndĩni ya Mormon nĩmaleanaa na Mbivilia, ndyaaendeewʼa nĩ momanyĩsyo ma ndĩni ya Mormon ma mũndũ kwenda mũno nthĩ yake. Kwa ngelekanyʼo, andũ ma ndĩni ya Mormon mamanyĩawʼa kana mũũnda wa Eteni waĩ Jackson County, Missouri, Amelika. O na ĩngĩ, atongoi ma ĩkanisa yĩu mamanyĩasya kana “mũthenya ũmwe Ngai akasumbĩka nthĩ yonthe kwĩsĩla silikalĩ ya Amelika.”

Nĩnasengʼawʼa nĩ momanyĩsyo ma ndĩni ya Mormon ĩũlũ wa maũndũ ala makakwata nthĩ ila ingĩ o vamwe na nthĩ ĩla nasyaĩwe. Mũndũ ũmwe wa ndĩni ya Mormon ũla wamanyĩawʼa nĩ kana atwʼĩke misonalĩ nĩwangũnĩie simũ wĩoo ũmwe, na natũmĩa mwanya ũsu tũneenee ũndũ ũsu. Namũkũlilye kana no etĩkĩle kũkita na andũ ala angĩ ma ndĩni ya Mormon ethĩwa nthĩ yake ĩkokita na yoo. Nĩnasengʼie ĩla waisye kana no eke ũu. Nĩneekie ũkunĩkĩli ĩũlũ wa maũndũ ala naĩkĩĩte na naneenea maũndũ asu vamwe na atongoi ma Ĩkanisa ya Mormon. Neeiwe kana maũndũ ala nakũlĩtye maĩ kĩmbithĩ na makamanyĩka o ũndũ kyeni kĩkaendeea kwongeleka.

Nĩnatũlĩkile ngoo nũndũ wa mosũngĩo moo, na nambĩĩa kwĩthiana nyie mwene, na kĩla kyatumaa nenda nĩtwʼĩke misonalĩ wa ndĩni ya Mormon. Nĩnamanyie kana ũndũ ũmwe watumaa nenda nĩtwʼĩke misonalĩ nĩ kũtetheesya andũ ala angĩ. O na ĩngĩ, nendaa kũtwʼĩka misonalĩ nĩ kana andũ manengae ndaĩa. Ĩndĩ, ndyeesĩ maũndũ maingĩ ĩũlũ wa Ngai. O na kũtwʼĩka nĩnasomete Mbivilia mavinda maingĩ, ndyoonaa yĩ ya vata. Ndyeesĩ ũndũ o na ũmwe ũkonetye kĩeleelo kya Ngai ĩũlũ wa nthĩ kana andũ.

MOATHIMO ALA NĨKWATĨTE:

Ĩla nambĩĩie kwĩmanyĩsya Mbivilia vamwe na Ngũsĩ sya Yeova, nĩnamanyie maũndũ ta, ĩsyĩtwa ya Ngai, ũndũ kwĩkĩkaa twakwʼa, na kĩanda kya Yesũ nthĩnĩ wa kwĩanĩwʼa kwa kĩeleelo kya Ngai. Nĩnambĩĩie kũmanya nesa ĩvuku yĩĩ ya kwendeesya, na nĩnatanĩaa kũneena na andũ angĩ ĩũlũ wa ũwʼo ũla neemanyĩasya. Nĩneethĩawa nĩsĩ kana Ngai e vo, ĩndĩ ĩla nambĩĩe kwĩmanyĩsya Mbivilia, naĩ ndonya kũneena nake kwĩsĩla mboya ta Mũnyanya wakwa ũla mũnene vyũ. Matukũ 12, Mwei wa 7, 2004, nĩnavatisiwe natwʼĩka ũmwe wa Ngũsĩ sya Yeova, na ĩtina wa myei thanthatũ natwʼĩka mũtavanyʼa wa ĩvinda yonthe.

Kwa ĩvinda ya myaka ĩtano, nĩnathũkũmie ovisinĩ ũla mũnene wa nthĩ yonthe wa Ngũsĩ sya Yeova ũla wĩ Brooklyn, New York. Nĩnatanĩie mũno kũtetheesya kũkyavĩthwʼa kwa Mbivilia na mavuku ala maeleetye Mbivilia, ala matetheeasya andũ milioni mbingĩ ĩũlũ wa nthĩ, na nĩnĩendeee kũtanĩa kũtetheesya andũ angĩ memanyĩsye ĩũlũ wa Ngai.