MOSŨNGĨO MA MAKŨLYO MA MBIVILIA

We Ngai ailyĩ ata?

Ngai e mwĩĩ wa veva na tũitonya kũmwona. Nĩwe woombie matu, nthĩ, na syĩndũ syonthe ila syĩ thayũ. Ngai ndaaũmbwa, o na nde mwambĩlĩlyo. (Savuli 90:2) Ngai endaa andũ mamũmanthe na mamanye ũw’o ĩũlũ wake.—Soma Meko ma Atũmwa 17:24-27.

Ngai e ĩsyĩtwa ĩ yake. Nĩtũtonya kũmanya ũndũ ũilyĩ kwa kũsisya syĩndũ ila we mwene woombie. (Alomi 1:20) Ĩndĩ nĩ kana tũmũmanye nesa, no nginya tũsome Ndeto yake, Mbivilia. Nĩyo ĩtũeleasya nesa ĩũlũ wa ũseo wake.—Soma Savuli 103:7-10.

Ngai ew’aa ata ĩla andũ meeka ũla ũte ũlũngalu?

Mũmbi witũ, Yeova, nũmenete ala mekaa ũla ũte ũlũngalu. Nake oombie mũndũ na kĩtutya kyake. (Kũtũngĩlĩlwa Kwa Mĩao 25:16) Kĩu nĩkyo kĩtumi aingĩ maitũ tũmenete ũsili ũte wa katĩ. Ngai ti we umanĩte na ũthũku ũla wĩ kw’o. Oombie mũndũ e na ũthasyo wa kwĩnyuvĩa maũndũ. Ĩndĩ ũndũ wa kũmakya nĩ kana andũ aingĩ matũmĩaa ũthasyo ũsu naĩ kwa kwĩka maũndũ mate malũngalu. Ũu ũtumaa Yeova ew’a woo ngoonĩ.—Soma Mwambĩlĩlyo 6:5, 6; Kũtũngĩlĩlwa Kwa Mĩao 32:4, 5.

Yeova endete ũlũngalu, na ndesa kũmĩĩsya kwona andũ mayĩka ũla ũte ũlũngalu tene na tene. (Savuli 37:28, 29) Mbivilia nĩyathanĩte kana o mĩtũkĩ, Ngai akilyĩ anaveta onthe ala matekaa ũlũngalu.—Soma 2 Vetelo 3:7-9, 13.