“Ũathimwe Ũmanyi Waku”

NDETO isu syaneeniwe nĩ Ndaviti, ũla waĩ wa mbaĩ ya Isilaeli, aikatha mũndũ mũka ũmwe wakomanie nake. Mũndũ mũka ũsu eetawa Avikaili. We Ndaviti amũkathaa nĩkĩ, na tũtonya kũatĩĩa ngelekanyʼo ya Avikaili ata?

Ndaviti akomanie na Avikaili ĩvinda yĩla wasembete akĩĩte Mũsumbĩ Saulo. Avikaili atwaĩtwe nĩ mũthwii weetawa Navali, ũla waĩthĩasya indo syake mbingĩ nthĩ yĩ iĩma yaĩ ngalĩko ya ĩtheo ya Yuta. Ndaviti vamwe na ala waĩ namo maĩ “ta ũvai” wasũvĩaa aĩthi ma Navali na indo syoo. Me o ngalĩko ĩsu, Ndaviti nĩwesie kũtũma aũme kwa Navali etĩtye ‘o kĩla kĩkoneka kwʼokonĩ kwake’ kya mbaa lĩu. (1 Sam. 25:8, 15, 16) Ndaviti aĩ na kĩtumi kĩseo kya kwĩtya ũtethyo kwa Navali wasũanĩa ũndũ we vamwe na andũ make masũvĩĩte malĩ ya Navali.

Ĩndĩ Navali eekie kwosana na ĩsyĩtwa yake, yĩla ũalyũlo wayo nĩ “Mũndũ Mũtumanu” kana “Ndia.” Asũngĩie Ndaviti na ngũlũ na alea kũmũtethya. Nĩvo ĩndĩ Ndaviti wathatie na avanga kwĩyĩĩvanĩsya nũndũ wa kĩko kĩu kya ũtumanu Navali weekie. Navali na mũsyĩ wake mayaĩ malea kwona naĩ nũndũ wa ũtumanu wake.—1 Sam. 25:2-13, 21, 22.

Ĩla Avikaili wamanyie kĩla kyeteelye mũsyĩ wake, nĩweenengie vinya na oosa ĩtambya. Nĩwaendie vala ve Ndaviti enyivĩtye mũno amwĩsũva asũanĩe ngwatanĩo yake na Yeova. Nĩwasyokie anenga Ndaviti, ũla nĩwe waĩ atwʼĩke mũsumbĩ ĩtina wa Saulo, lĩu ũmũtoetye vamwe na andũ make. Ndaviti nĩweetĩkĩlile kana Yeova nĩwatũmĩa mũndũ mũka ũsu kũmũsiĩĩa ndakeke ũndũ waĩ ũtonya kũtuma amũvĩtĩsya Ngai. Nĩvo ĩndĩ Ndaviti wamwĩie: “Ũathimwe ũmanyi waku, na ĩthĩwa wĩ mũathime we, ũla ũnziĩĩie ũmũnthĩ ndikethĩwe na ĩvĩtyo ya kwĩtĩkya nthakame.”—1 Sam. 25:18, 19, 23-35.

Ũndũ ũmwe wĩ ũtheinĩ tũkwĩmanyĩsya nĩ kana tũyaĩle kũtutya Navali, ũla ũtaaonanyʼa kana nũkũtũnga mũvea nũndũ wa ũseo ũla weekĩtwe. Ũndũ ũngĩ wa vata tũkwĩmanyĩsya nĩ kana tũkesa kwona ta ve ũndũ mũthũku ũkilyĩ kwĩkĩka, nũseo tũkosa ĩtambya tũũsiĩĩe. Tweeka ũu tũkeethĩawa tũyonanyʼa twĩ na woni ta wa mũandĩki ũmwe wa Savuli, ũla waisye atĩĩ: “Manyĩsya nyie kwonaa katĩ o na ũmanyi.”—Sav. 119:66.

Angĩ no mone ĩla twatũmĩa ũĩ kana kĩlĩko nesa tũyĩka maũndũ. Methĩwe nĩmeũkũtavya na kanywʼa kana maiũtavya, ngoonĩ yoo no methĩwe mayasya o ta Ndaviti: “Ũathimwe ũmanyi waku.”