Mashahidi wa Yehova—Imani Yenye Matendo, Sehemu ya 2: Nuru na Iangaze
Ĩtina wa Mwana-a-Asa Rutherford na anyanya make kũthawʼa kuma kolokolonĩ mwaka wa 1919, wĩa mwingĩ nĩweeteele Amanyĩwʼa ma Mbivilia. O tondũ vonanĩtwʼe nthĩnĩ wa vitio Mashahidi wa Yehova—Imani Yenye Matendo, Sehemu ya 2: Nuru na Iangaze, Amanyĩwʼa ma Mbivilia maĩ mavĩngwe, ũmanyi woo wa Mbivilia waĩ ũendeee kwongeleka, na mũĩkĩĩo woo ũitatwa. (Nth. 4:18; Mal. 3:1-3; Yoa. 15:20) Ĩtina wa kũsisya vitio ĩno, no ũsũngĩe makũlyo aa?
(1) Amanyĩwʼa ma Mbivilia matũmĩie nzĩa syĩkũ kũtavanyʼa ũvoo mũseo? (2) Nĩ imanyĩthya syĩva syaumiwʼe maũmbanonĩ manene ma mwanya mwakanĩ wa 1931 na 1935? (3) Nĩ ũvoo mwaũ wa vata waeleetwʼe nthĩnĩ wa ĩkaseti ya Noovemba 1, 1939, ya Mnara wa Mlinzi? (4) Elesya nĩ kyaũ kyaumĩlile kũya Madison Square Garden ĩla Mwana-a-Asa Rutherford waumasya ũvoo ĩũlũ wa “Serikali na Amani.” (5) Nĩ kyaũ kya vata mũno kyaumĩlilwʼe nĩ ũvoo ĩũlũ wa “Amani—Je, Inaweza Kudumu?” ũla waumiwʼe nĩ Mwana-a-Asa Knorr? (6) Mwaka wa 1942, Ngũsĩ sya Yeova syeekie mĩvango yĩva ya kwongeleela ũthũkũmi woo wa ũtavanyʼa? (7) Elesya amwe ma matambya ala moosiwe nĩ Ngũsĩ sya Yeova kũtetea mũĩkĩĩo woo kwosana na mĩao kũya Amelika, Kananda, na Ukiliki. (8) Sukulu ya Ngileati yatetheeisye ata kwongeleka kwa wĩa wa ũtavanyʼa? (9) Nĩ wĩa mwaũ wa vata wambĩĩie mwakanĩ wa 1946, na nĩkĩ wambĩĩie? (10) Ngũsĩ sya Yeova moosie matambya meva ma kwosanĩthya mwĩkalĩle woo na mĩao ĩla yĩ Mbivilianĩ? (11) Elesya amwe ma moalyũku ala meekiwe myakanĩ ya 1970 nĩ kana ũseũvyo wosane kwa vakuvĩ na ũndũ Mbivilia yaĩtye. (12) Vitio ĩno yakũtetheesya ata kũmanya nesa vyũ kana ũseũvyo ũũ nĩ wa Yeova na kana nĩwe ũũtongoesye? (13) Ũtwi waku wa kũendeea kũtavanyʼa kwa kĩthito o na ĩla kwĩ mathĩna walũlũmĩlwa ata nĩ vitio ĩno? (14) Tũtonya kũtũmĩa vitio ĩno ata kũtetheesya andũ maitũ ma mũsyĩ, amanyĩwʼa maitũ ma Mbivilia, na angĩ?
Kĩla mũthenya wavĩta wongeleelaa ũndũ mũna nthĩnĩ wa isitoli ya Ngũsĩ sya Yeova. Lekoti ikoonanyʼa ata ĩũlũ wa kĩthito kitũ ũtavanyʼanĩ? O tondũ ana-a-asa maitũ ma ĩvinda ĩvĩtu meekie, ekai tũendeee ‘kũeka kyeni kĩkene’!—2 Ako. 4:6.