“Umya Ũkũsĩ Vyũ”

1. Nĩ ngelekanyʼo yĩkũ nzeo Vaulo waiie ĩũlũ wa ũtavanyʼa?

¹ “Ĩanĩsya ũthũkũmi waku [vyũ].” (2 Tim. 4:5) Vate nzika mũtũmwa Vaulo aĩ na ũthasyo wa kũneena ĩla wamũtaa Timotheo aitũmĩa ndeto isu. Katĩ wa mwaka wa 47 Ĩ.Y. na 56 Ĩ.Y., Vaulo nĩwaminie kyalo kya katatũ kya ũmisonalĩ. Ĩvuku ya Meko ma Atũmwa yĩwetaa mavinda maingĩ kana Vaulo nĩwaumasya “ũkũsĩ vyũ.” (Meko 23:11; 28:23, NW) Tũtonya kwĩka ũu ata ũmũnthĩ?

2. Tũtonya ata kumya ũkũsĩ vyũ yĩla tũũtavanyʼa nyũmba na nyũmba?

² Nyũmba na Nyũmba: Nĩ kana tũtavye ene nyũmba ala mataaĩwʼa ũvoo mũseo, no tũtavanyʼe masaa me kĩvathũkanyʼo. Mũndũũme ũla mwene mũsyĩ no kwĩthĩwa ethĩawa nyũmba masaa ma mawĩoo kana Wathanthatũ na Wakyumwa. Twaĩle kũtwʼa kũneena na mũndũ kĩla nyũmba, na tũisyoka mavinda maingĩ kũla twalea kwĩthĩa mũndũ mũsyĩ. Nata twalea kwĩsa kwĩthĩa mũndũ mũsyĩ? Kũandĩka valũa kana kũkũna simũ no kwĩthĩwe na mosyao maseo.

3. Wĩ na myanya yĩkũ ya kumya ũkũsĩ kũla kwĩ andũ aingĩ na ĩla vaumĩla mwanya?

³ Kũla Kwĩ Andũ Aingĩ na Ĩla Vaumĩla Mwanya: Athũkũmi ma Yeova ũmũnthĩ matavanasya “ũĩ” wa wʼo kwa onthe ala makethukĩĩsya. Mavinda amwe mekaa ũu “nzĩanĩ nene” kana “kũndũnĩ kwaamu.” (Nth. 1:20, 21) Ĩla tũkwĩka mawĩa maitũ ma kĩla mũthenya, nĩtwĩthĩawa tũisũanĩa ũndũ tũtonya kumya ũkũsĩ? No twasye kana twĩ ‘athangaasye mũno nĩ ĩla ndeto’? (Meko 18:5) Ethĩwa nĩ wʼo, tũendeee kwĩanĩsya kĩanda kitũ kya ‘kumya ũkũsĩ vyũ.’​—Meko 10:42, NW; 17:17; 20:20, 21, 24.

4. Mboya na kũsũanĩĩa itonya kũtũtetheesya ata kumya ũkũsĩ vyũ?

⁴ O na ũu, mavinda amwe no tũemwe kumya ũkũsĩ nũndũ twĩ na wonzu mũna kana wʼĩa wa mũsyawa. Vate nzika Yeova nũeleawa mawonzu maitũ. (Sav. 103:⁠14) Ĩndĩ, ĩla tweewʼa tũtatonya kumya ũkũsĩ, nĩtũtonya kũmũvoya tũkwate ũkũmbaũ wa kũneena. (Meko 4:29, 31) Ĩngĩ, ĩla tũkwĩmanyĩsya ene na kũvindĩĩsya Ndeto ya Ngai, nĩtwaĩle kũsũanĩĩa ũndũ tũtonya kwendeewʼa mũno nĩ ũseo mũnene wa ũvoo mũseo. (Avi. 3:8) Kwĩka ũu kũkatũtonyethya kũtavanyʼa na kĩthito!

5. Tũtonya kwĩthĩwa na kĩanda ata nthĩnĩ wa kwĩanĩwʼa kwa wathani wa Yoeli?

⁵ Wathani wa Yoeli woonanĩtye kana mbee wa kũka kwa mũthenya mũnene na wa kũtĩsya wa Yeova, andũ ma Ngai ‘makaendaa mbee’ na maiketĩkĩlya kĩndũ o na kĩmwe kĩmasiĩĩe kũtavanyʼa. (Yoe. 2:2, 7-9) Ekai twĩkĩe kĩthito vyũ wĩanĩ ũũ ũtakasyokewa wa kumya ũkũsĩ!